വയനാട് — വയനാട് ജില്ലയില് ഉരുള്പൊട്ടലുമായി ബന്ധപ്പെട്ട് ഇന്ന് മുഖ്യമന്ത്രി പിണറായി വിജയന്റെ അധ്യക്ഷതയില് സര്വ്വകക്ഷിയോഗം ചേരും. വയനാട് കളക്ടറേറ്റിലെ എപിജെ ഹാളില് രാവിലെ നടക്കുന്ന യോഗത്തില് വയനാട്ടില് ക്യാമ്പ് ചെയ്യുന്ന മന്ത്രിമാര്, ജില്ലയിലെ എംഎല്എമാര്, ജില്ലാ പഞ്ചായത്ത് പ്രസിഡന്റ്, രാഷ്ട്രീയ പാര്ട്ടി നേതാക്കള് എന്നിവര് പങ്കെടുക്കും. ഇന്ന് രാവിലെ എപിജെ ഹാളില് മുഖ്യമന്ത്രിയുടെ അധ്യക്ഷതയില് ഉദ്യോഗസ്ഥരുടെ യോഗവും നടക്കും.
ഇന്നും സംസ്ഥാനത്ത് അതി ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ് നല്കിയിട്ടുണ്ട്. അതിശക്തമായ മഴയെ തുടര്ന്ന് ഇന്ന് 9 ജില്ലകളില് യെല്ലോ അലേര്ട്ട് പ്രഖ്യാപിച്ചിരിക്കുകയാണ്. എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളിലാണ് യെല്ലോ അലേര്ട്ട് പ്രഖ്യാപിച്ചത്.സംസ്ഥാനത്ത് മഴയ്ക്കൊപ്പം മണിക്കൂറില് 50 കിലോമീറ്റര് വരെ വേഗതയില് വീശിയേക്കാവുന്ന കാറ്റിനും സാധ്യതയുണ്ട്. വടക്ക് പടിഞ്ഞാറന് കാറ്റ് അടുത്ത രണ്ടുദിവസം ശക്തമായി തുടരുമെന്നും മലയോര തീരദേശ മേഖലകളില് ഉള്ളവര് അതീവ ജാഗ്രത പാലിക്കണമെന്നും നിര്ദേശമുണ്ട്.
കനത്ത മഴ തുടരുന്ന സാഹചര്യത്തില് 10 ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ഇന്ന് അവധി പ്രഖ്യാപിച്ചു. തിരുവനന്തപുരം, കൊല്ലം, ആലപ്പുഴ ഒഴികെയുള്ള ജില്ലകളിലെ മുഴുവന് വിദ്യാഭ്യാസ സ്ഥാപനങ്ങള്ക്കും കോട്ടയം ജില്ലയിലെ കാഞ്ഞിരപ്പള്ളി, മീനച്ചില് താലൂക്കിലെ വിദ്യാഭ്യാസ സ്ഥാപനങ്ങള്ക്കുമാണ് അവധി പ്രഖ്യാപിച്ചത്.
വയനാട് ഉണ്ടായ ദുരന്തത്തില് കേന്ദ്ര സര്ക്കാര് കേരള സര്ക്കാരിനെ കുറ്റപ്പെടുത്തിയതിനെതിരെ മുഖ്യമന്ത്രി പിണറായി വിജയന് രംഗത്തെത്തിയിരുന്നു. ദുരന്തം ഉണ്ടായ സ്ഥലത്ത് നിന്നും ആളുകളെ നേരത്തേ ഒഴിപ്പിച്ചതിനാല് വന് ദുരന്തമാണ് ഒഴിവായത് എന്നും പഴിചാരന് കേന്ദ്ര സര്ക്കാര് ഇപ്പോള് വരരുതെന്നും മുഖ്യമന്ത്രി പറഞ്ഞു. തിരുവനന്തപുരത്ത് നടത്തിയ വാര്ത്താസമ്മേളനത്തിലാണ് മുഖ്യമന്ത്രി അമിത് ഷായ്ക്ക് കൃത്യമായ മറുപടി നല്കിയത്.
