വന്യജീവി സങ്കേതത്തിലൂടെ സഞ്ചരിക്കുമ്പോൾ കടുവകളെ കാണുന്നത് ഭാഗ്യമാണെന്നും നീണ്ട തപസ്യയിലൂടെ അത്തരം ഭാഗ്യം സിദ്ധിച്ചവരാണ് വൈൽഡ് ലൈഫ് ഫോട്ടൊഗ്രഫർമാരെന്നു മുൻ ചീഫ് സെക്രട്ടറി ഡോ. വേണു IAS (റിട്ട.) അഭിപ്രായപ്പെട്ടു.
ലൈറ്റ്സോഴ്സ് ക്യാമറ വോക്കേഴ്സ് സംഘടിപ്പിക്കുന്ന മൂന്നുദിവസത്തെ വൈൽഡ് ലൈഫ് ഫോട്ടൊഗ്രഫി എക്സിബിഷൻ ഉൽഘാടനം ചെയ്തു സംസാരിക്കുകയായിരുന്നു കൊച്ചി മുസിരിസ് ബിനാലെ ചെയർപെഴ്സൻ കൂടിയായ ഡോ. വേണു.
വന്യജീവി ഫോട്ടൊഗ്രഫർമാരായ ബാലൻ മാധവൻ, സുരേഷ് ഇളമൺ, ലൈറ്റ്സോഴ്സ് മെൻ്ററും സിനിമറ്റോഗ്രഫറും ചലച്ചിത്ര സംവിധായകനുമായ പ്രതാപ് ജോസഫ്, എം. എ. ലത്തീഫ്, ഷബീർ തുറക്കൽ, ഹാരിസ് ടി എം എന്നിവർ സംസാരിച്ചു.
ലൈറ്റ്സോഴ്സ് അംഗങ്ങളായ 20 ഫോട്ടൊഗ്രഫർമാർ മഹാരാഷ്ട്രയിലെ തടോബ ടൈഗർ റിസർവിൽ നിന്നും പലപ്പോഴായി പകർത്തിയ എൺപതോളം ചിത്രങ്ങളാണ് തടോബ റ്റെയിൽസിൽ പ്രദർശിപ്പിക്കുന്നത്. ഏപ്രിൽ 27ന് പ്രദർശനം സമാപിക്കും. ഇനിയുള്ള രണ്ടുദിവസങ്ങളിലും രാവിലെ 10 മുതൽ വൈകിട്ട് 7 വരെയാണ് പ്രദർശനം.
