📱വാർത്തകൾ ഒറ്റനോട്ടത്തിൽ📱 – 2026 | ജൂൺ 12 | വെള്ളി ✍️ കപിൽ ശങ്കർ

🔹വോട്ട് ചോരിക്ക് ശേഷം രാജ്യത്ത് ഇപ്പോള്‍ നടക്കുന്നത് സീറ്റ് ചോരിയാണെന്ന് എഐസിസി ജനറല്‍ സെക്രട്ടറി കെ.സി. വേണുഗോപാല്‍. ഭൂരിപക്ഷം ലഭിക്കാന്‍ വേണ്ടി മറ്റു പാര്‍ട്ടികളില്‍നിന്നും എംപിമാരെ രാജിവെപ്പിച്ച്പിന്നീട് ബിജെപി എംപിമാരാക്കി മാറ്റുകയാണെന്നും വേണുഗോപാല്‍ പറഞ്ഞു. മീനാക്ഷി നടരാജന്റെ പത്രിക തള്ളിയതുമായി ബന്ധപ്പെട്ട വിഷയത്തെ രാഷ്ട്രീയമായും നിയമപരമായും നേരിടുമെന്നും അദ്ദേഹം കൂട്ടിച്ചേര്‍ത്തു.

🔹സംസ്ഥാനത്തെ പൊലീസില്‍ വന്‍ അഴിച്ചുപണി. പി.വിജയനെ ക്രമസമാധാന ചുമതലയുള്ള എഡിജിപിയായി നിയമിച്ചു. ക്രമസമാധാന ചുമതലയില്‍ ഉണ്ടായിരുന്ന എച്ച്. വെങ്കിടേഷിനെ ക്രൈംബ്രാഞ്ച് മേധാവിയായി മാറ്റി. പൊലീസ് ആസ്ഥാനത്തെ എഡിജിപിയായിരുന്ന എസ്. ശ്രീജിത്തിന് ജയില്‍ മേധാവിയായി നിയമനം. ജയില്‍ എഡിജിപിയായിരുന്ന ബല്‍റാം കുമാര്‍ ഉപാധ്യായ ബറ്റാലിയന്‍ എഡിജിപിയാകും. ഇന്റലിജന്‍സ് മേധാവിയായി ദിനേന്ദ്ര കശ്യപിനെ നിയമിച്ചു. യതീഷ് ചന്ദ്ര എറണാകുളം റേഞ്ച് ഡിഐജിയാകും.

🔹വയനാടിനും കൊല്ലത്തിനും കോഴിക്കോടിനും പുറമെ തിരുവനന്തപുരത്തും ഷിഗല്ല സ്ഥിരീകരിച്ചു. തോന്നക്കല്‍ പുത്തന്‍തോപ്പ് ചാക്ക എന്നിവിടങ്ങളിലുള്ള ആറ് കുട്ടികള്‍ക്കാണ് രോഗ ബാധ സ്ഥീരികരിച്ചത്. വയനാട് കോളിയാടി സ്‌കൂളില്‍ 9 പേര്‍ക്കും കോഴിക്കോട് മൂന്ന് പേര്‍ക്കും കൊല്ലത്ത് രണ്ട് പേര്‍ക്കും ഷിഗെല്ല ഇതുവരെ റിപ്പോര്‍ട്ട് ചെയ്തു. സംസ്ഥാനത്താകെ 20പേര്‍ക്ക് ഷിഗെല്ല ബാധ സ്ഥിരീകരിച്ചു. സ്വകാര്യ ആശുപത്രിയില്‍ ചികിത്സയില്‍ കഴിയുന്ന കുട്ടികളുടെ ആരോഗ്യ സ്ഥിതി തൃപ്തികരമെന്ന് ആരോഗ്യ വകുപ്പ് അധികൃതര്‍ അറിയിച്ചു.

🔹കേരളത്തില്‍ വീണ്ടും നിപ വൈറസ് ബാധ റിപ്പോര്‍ട്ട് ചെയ്ത സാഹചര്യത്തില്‍ സ്ഥിതിഗതികള്‍ സൂക്ഷ്മമായി നിരീക്ഷിച്ച് കേന്ദ്ര സര്‍ക്കാര്‍. രോഗവ്യാപനം തടയാന്‍ ആവശ്യമായ എല്ലാ പിന്തുണയും ഉറപ്പാക്കിയിട്ടുണ്ടെന്നും കേന്ദ്ര ആരോഗ്യ മന്ത്രാലയം വ്യക്തമാക്കി.

🔹പകര്‍ച്ചപ്പനി ബാധിച്ച് 13,025 പേര്‍ ഇന്നലെ ആശുപത്രികളില്‍ ചികിത്സ തേടി. കൂടാതെ ഇന്നലെ മാത്രം നാലുപേര്‍ക്ക് ഷിഗെല്ല സ്ഥിരീകരിച്ചു. ഒരു ഡെങ്കിപ്പനി മരണവും ഒരു എലിപ്പനി മരണവും ഇന്നലെ റിപ്പോര്‍ട്ട് ചെയ്തു.

🔹മൂന്നുവര്‍ഷത്തിലധികമായി നികുതിയടയ്ക്കാത്തതിനെത്തുടര്‍ന്ന് സിപിഎം പാര്‍ട്ടി ഓഫീസുകള്‍ക്കെതിരെ ഷൊര്‍ണൂര്‍ നഗരസഭ റവന്യൂ റിക്കവറി നടപടിയെടുത്തു. കുളപ്പുള്ളി, ഷൊര്‍ണൂര്‍ ലോക്കല്‍ കമ്മിറ്റി ഓഫീസുകള്‍ക്കെതിരയാണ് നടപടി.

🔹രാജ്യത്തിന്റെ മതനിരപേക്ഷത അപകടത്തിലാണെന്ന് പ്രതിപക്ഷ നേതാവ് പിണറായി വിജയന്‍. പൊതുമേഖല സ്ഥാപനങ്ങളെ കേന്ദ്ര ഗവണ്‍മെന്റ് വിറ്റഴിക്കുന്നു. റെയില്‍വെ, തപാല്‍ മേഖല തകര്‍ച്ചയിലാണ്. നിയമന നിരോധനമാണ് ഈ മേഖലയില്‍ നടക്കുന്നത്.എംജി സര്‍വകലാശാല വിസിയായി സംഘപരിവാറുകാരനെ നിയമിച്ചതും സെനറ്റില്‍ 19 ആര്‍എസ്എസുകാര്‍ ഉള്ളതും ചൂണ്ടിക്കാട്ടി സര്‍ക്കാര്‍ ആര്‍എസ്എസിന് കീഴടങ്ങിയെന്ന് അദ്ദേഹം ആരോപിച്ചു.

🔹സിഎംആര്‍എല്‍ മാസപ്പടി കേസില്‍ വീണ തൈക്കണ്ടിയിലിന് വീണ്ടും സമന്‍സ് അയച്ച് ഇഡി. ബുധനാഴ്ച കൊച്ചി ഓഫീസില്‍ ചോദ്യം ചെയ്യലിന് നേരിട്ട് ഹാജരാകാനാണ് നിര്‍ദേശം.

🔹പ്രതിപക്ഷ നേതാവ് പിണറായി വിജയന്റെ വസതിയില്‍ റെയ്ഡിനെത്തിയ ഇഡി ഉദ്യോഗസ്ഥരെയും വാഹനങ്ങളും ആക്രമിച്ച കേസില്‍ ഏഴ് പ്രതികളെ കസ്റ്റഡിയില്‍ വിട്ടു. കേസിലെ പ്രധാന പ്രതിയും സിപിഎം നേതാവുമായ ഐ.പി. ബിനുവിന് ആവശ്യമായ വൈദ്യസഹായം ഉറപ്പാക്കണമെന്ന് കോടതി പോലീസിന് കര്‍ശന നിര്‍ദ്ദേശം നല്‍കി.

🔹തിരുവനന്തപുരം കോര്‍പറേഷനിലെ വാഴോട്ടുകോണം കൗണ്‍സിലര്‍ ആര്‍ സുഗതന്റെ അറസ്റ്റില്‍ പൊലീസ് നടത്തിയത് പട്ടി ഷോയെന്ന് മുന്‍ ഡിജിപിയും ബിജെപി നേതാവുമായ ആര്‍ ശ്രീലേഖ. സുഗതന്‍ ഗുണ്ടയല്ല, ഒരു ജനപ്രതിനിധിയാണെന്നും നാട്ടുകാര്‍ക്ക് പ്രിയപ്പെട്ടവനാണെന്നും ശ്രീലേഖ പറഞ്ഞു.
ആകാശത്തേക്ക് വെടിവെച്ച സിഐ വിപിന്റേത് ചീപ്പ് ഹീറോയിസമാണെന്നും ശ്രീലേഖ വിമര്‍ശിച്ചു.

🔹പാലാ നഗരസഭയില്‍ യുഡിഎഫില്‍ പരസ്യപ്പോര് രൂക്ഷമാകുന്നു. ചെയര്‍പേഴ്സണ്‍ ദിയ പുളിക്കകണ്ടത്തിലില്‍ വിശ്വാസം നഷ്ടപ്പെട്ടെന്ന് വൈസ് ചെയര്‍പേഴ്സണ്‍ ഉള്‍പ്പെടെ ആറ് കൗണ്‍സിലര്‍മാര്‍ നേതൃത്വത്തിന് കത്തയച്ചു. കോണ്‍ഗ്രസ് കൗണ്‍സിലര്‍ക്കെതിരെ മോഷണക്കുറ്റം ചുമത്തി അപമാനിച്ചെന്നും കത്തില്‍ ആരോപിക്കുന്നു.

🔹ചിന്നക്കനാലില്‍ ആന കുത്തി പരിക്കേറ്റ് കോട്ടയം മെഡിക്കല്‍ കോളേജില്‍ ചികിത്സയില്‍ കഴിയുന്ന കുട്ടിയെ പ്രതിപക്ഷ നേതാവ് പിണറായി വിജയന്‍ കാണാനെത്തി. പിണറായി വിജയന്‍ കുട്ടിയോട് സംസാരിച്ചു. കുട്ടിക്ക് ഇപ്പോഴും വേദന ഉണ്ടെന്നും അസുഖം മാറുമെന്ന ശുഭപ്രതീക്ഷയാണെന്നും അദ്ദേഹം പറഞ്ഞു. സര്‍ക്കാര്‍ മാറിയത് ആന അറിഞ്ഞില്ല എന്ന് പറയുന്നത് ഒന്നിനും മറുപടി അല്ലെന്നും അദ്ദേഹം പറഞ്ഞു.

🔹രാജ്യസഭാ എംപി എഎ റഹീമിന്റെ ചിത്രം ഉപയോഗിച്ച് സോഷ്യല്‍ മീഡിയയില്‍ വ്യാജ വാര്‍ത്ത പ്രചരിപ്പിച്ച സംഭവത്തില്‍ രണ്ടുപേര്‍ക്കെതിരെ തിരുവനന്തപുരം സൈബര്‍ ക്രൈം പോലീസ് കേസെടുത്തു. എംപിയുടെ പരാതിയെ തുടര്‍ന്നാണ് ശ്രീകാന്ത് പള്ളിക്കത്തോട്, റിയാസ് തത്തോത്ത് എന്നിവര്‍ക്കെതിരെ നടപടി സ്വീകരിച്ചത്.

🔹നടി അന്‍സിബയ്ക്കെതിരെ കടുത്ത നീക്കവുമായി അമ്മ. മാധ്യമങ്ങള്‍ക്ക് അഭിമുഖങ്ങള്‍ നല്‍കി സംഘടനയെ തകര്‍ക്കാന്‍ ശ്രമിച്ചുവെന്ന് കാണിച്ച് അന്‍സിബയ്ക്ക് കാരണം കാണിക്കല്‍ നോട്ടീസ് നല്‍കിയിരിക്കുകയാണ് സംഘടന. 17-ാം തിയതിക്ക് മുന്‍പായി വ്യക്തമായ മറുപടി നല്‍കിയില്ലെങ്കില്‍ സംഘടനയില്‍ നിന്ന് പുറത്താക്കുമെന്നും മുന്നറിയിപ്പുണ്ട്.

🔹താരസംഘടനയായ അമ്മ നല്‍കിയ കാരണം കാണിക്കല്‍ നോട്ടീസിന് മറുപടി നല്‍കി അന്‍സിബ ഹസന്‍. സംഘടനാ ചട്ടങ്ങള്‍ക്ക് വിരുദ്ധമായി താന്‍ എന്തു ചെയ്തെന്ന് വ്യക്തമാക്കണമെന്നും കാരണം കാണിക്കല്‍ നോട്ടീസില്‍ വ്യക്തത വരുത്തണമെന്നുമാണ് അന്‍സിബ അറിയിച്ചിരിക്കുന്നത്.

🔹നടിയെ ആക്രമിച്ച കേസിലെ മെമ്മറി കാര്‍ഡ് ചോര്‍ന്നെന്ന അതിജീവിതയുടെ ഹര്‍ജി ഹൈക്കോടതി ഫയലില്‍ സ്വീകരിച്ചു. മെമ്മറി കാര്‍ഡ് – പെന്‍ഡ്രൈവ് എന്നിവ രജിസ്ട്രാര്‍ക്ക് കൈമാറണം. സീല്‍ഡ് കവറില്‍ ഹൈക്കോടതിയില്‍ ഹാജരാക്കാനാണ് നിര്‍ദേശം നല്‍കിയിരിക്കുന്നത്.

🔹തിരുവനന്തപുരം മെഡിക്കല്‍ കോളേജ് ആശുപത്രിയില്‍ ശ്വാസകോശ സംബന്ധമായ അസുഖത്തിന് ചികിത്സയിലായിരുന്ന 60 വയസ്സുകാരനായ കുഞ്ഞുകൃഷ്ണനെ കാണാതായി. രണ്ട് ദിവസം മുന്‍പ് വാര്‍ഡില്‍ നിന്നും കാണാതായ ഇദ്ദേഹത്തിനായി മകന്‍ നല്‍കിയ പരാതിയില്‍ പോലീസ് കേസെടുത്ത് അന്വേഷണം ആരംഭിച്ചു. എന്നാല്‍ രോഗിയെ ഇതുവരെ കണ്ടെത്താനായിട്ടില്ല.

🔹മലപ്പുറത്തും കോഴിക്കോട്ടുമായി ഇന്നലെ മൂന്ന് പേര്‍ മുങ്ങിമരിച്ചു. മലപ്പുറം അരീക്കോട് ചോലയില്‍ വീട്ടില്‍ അലിയുടെ മക്കളായ നാലാം ക്ലാസ് വിദ്യാര്‍ത്ഥി അഫിയ, മൂന്നാം ക്ലാസ്സ് വിദ്യാര്‍ത്ഥി അഫ്നാന്‍ എന്നിവരാണ് കുളത്തില്‍ മുങ്ങി മരിച്ചത്. സ്‌കൂള്‍ വിട്ടു വന്ന ശേഷം വീടിനടുത്തുള്ള കുളത്തില്‍ കുളിക്കാന്‍ പോയതായിരുന്നു ഇവര്‍. കോഴിക്കോട് തിരുവങ്ങൂരിലെ പാറക്കുളത്തില്‍ മുങ്ങി മരിച്ചത് അത്തോളി സ്വദേശിയും വിദ്യാര്‍ത്ഥിയുമായ വിഘ്നേഷ് (16) ആണ്.

🔹തിരുവനന്തപുരം കാട്ടാക്കടയില്‍ വിദ്യാര്‍ത്ഥികള്‍ തമ്മിലുണ്ടായ സംഘര്‍ഷത്തില്‍ ഒരു കുട്ടിയുടെ വയറ്റില്‍ മുറിവേറ്റു. രണ്ട് സ്‌കൂളിലെ കുട്ടികളാണ് പരസ്പരം ഏറ്റുമുട്ടിയത്. പരിക്കേറ്റ വിദ്യാര്‍ത്ഥി ആശുപത്രിയില്‍ ചികിത്സയിലാണ്. ഇജാസ് എന്ന വിദ്യാര്‍ത്ഥിക്കാണ് പരിക്കേറ്റത്. സംഭവത്തെക്കുറിച്ച് പൊലീസ് അന്വേഷണം നടത്തി വരികയാണ്.

🔹കേന്ദ്രസര്‍ക്കാരുമായി സഹകരിച്ച് പ്രവര്‍ത്തിക്കുമെന്ന് തമിഴ്നാട് മുഖ്യമന്ത്രി സി ജോസഫ് വിജയ്. തമിഴ്നാടിന്റെ താല്പര്യങ്ങള്‍ സംരക്ഷിച്ചുകൊണ്ട് കേന്ദ്രവുമായി സഹകരിക്കുമെന്നും വികസിത ഇന്ത്യ സൃഷ്ടിക്കപ്പെടുന്നത് സഹകരണ ഫെഡറലിസത്തിലൂടെയാണെന്നും നീതി ആയോഗ് യോഗത്തില്‍ വിജയ് പറഞ്ഞു. നീറ്റ് പരീക്ഷയോടുള്ള എതിര്‍പ്പും യോഗത്തില്‍ വിജയ് പരസ്യമാക്കി.

🔹ഹരിയാനയിലെ ഗുരുഗ്രാമില്‍ ഥാര്‍ ഇടിച്ചുകയറ്റുകയും യുവതിയെയും മറ്റ് ജീവനക്കാരെയും ക്രൂരമായി മര്‍ദ്ദിക്കുകയും ചെയ്ത ഡല്‍ഹി പൊലീസ് ഉദ്യോഗസ്ഥനെതിരെ കേസെടുത്തു. ഗുരുഗ്രാമിലെ സെക്ടര്‍ 51-ലുള്ള രഹേജ നവ്യ പ്രോജക്ട് എന്ന അപ്പാര്‍ട്ട്മെന്റ് സമുച്ചയത്തിലാണ് ഞെട്ടിക്കുന്ന ഈ സംഭവം നടന്നത്.

🔹പശ്ചിമ ബംഗാളില്‍ മമതാ ബാനര്‍ജിയുടെ നേതൃത്വത്തിലുള്ള തൃണമൂല്‍ കോണ്‍ഗ്രസ് കനത്ത രാഷ്ട്രീയ പ്രതിസന്ധി നേരിടുന്നതിനിടെ കോടിക്കണക്കിന് രൂപ വരുന്ന പാര്‍ട്ടി ഫണ്ടും മറ്റ് ആസ്തികളും ആര്‍ക്ക് ലഭിക്കുമെന്നതില്‍ ചര്‍ച്ച. നിയമസഭാ തിരഞ്ഞെടുപ്പ് പരാജയത്തിന് പിന്നാലെ പാര്‍ട്ടിയില്‍ ഉണ്ടായ വലിയ പിളര്‍പ്പോടെ പണത്തിനും ആസ്തികള്‍ക്കും അവകാശി ആരെന്ന ചോദ്യമാണ് ഉയരുന്നത്.

🔹ഉത്തര്‍പ്രദേശിലെ ബുന്ദേല്‍ഖണ്ഡ് മേഖലയിലുള്ള മഹോബ ജില്ലയിലെ മുധാര ഗ്രാമത്തില്‍ കടുത്ത ജലക്ഷാമം കാരണം യുവാക്കള്‍ക്ക് വിവാഹം ആലോചിക്കാന്‍ പോലും കഴിയാത്ത സാഹചര്യം നിലനില്‍ക്കുന്നതായി റിപ്പോര്‍ട്ട്. ഗ്രാമത്തിലെ വരണ്ട പൈപ്പുകളും കുടിവെള്ള ക്ഷാമവും കാരണം ഇവിടേക്ക് തങ്ങളുടെ പെണ്‍മക്കളെ വിവാഹം കഴിച്ചയക്കാന്‍ മറ്റ് ഗ്രാമങ്ങളിലുള്ളവര്‍ മടിക്കുന്നതാണ് യുവാക്കളെ പ്രതിസന്ധിയിലാക്കിയിരിക്കുന്നത്.

🔹മധ്യപ്രദേശില്‍ രാജ്യസഭാ തിരഞ്ഞെടുപ്പില്‍ മൂന്ന് ബിജെപി സ്ഥാനാര്‍ത്ഥികളും എതിരില്ലാതെ തെരഞ്ഞെടുക്കപ്പെട്ടു. കോണ്‍ഗ്രസ് സ്ഥാനാര്‍ത്ഥി മീനാക്ഷി നടരാജന്റെ പത്രിക തള്ളിയതിനെതിരെ സുപ്രീം കോടതിയില്‍ നല്‍കിയ ഹര്‍ജി പരിഗണിക്കുന്നതിന് തൊട്ടുമുമ്പായിരുന്നു ഈ അപ്രതീക്ഷിത നീക്കം. ഇതോടെ കോണ്‍ഗ്രസിന്റെ നിയമപോരാട്ടം അപ്രസക്തമായി.

🔹പ്രധാനമന്ത്രി നരേന്ദ്ര മോദിയെ പ്രശംസിച്ചതിന് പിന്നാലെ ഉയര്‍ന്ന അഭ്യൂഹങ്ങള്‍ തള്ളി തൃണമൂല്‍ എംപി ശത്രുഘ്നന്‍ സിന്‍ഹ. പ്രതിസന്ധി ഘട്ടങ്ങളില്‍ കൂടെ നിന്ന മമത ബാനര്‍ജിയെ ഒരിക്കലും വിട്ടുപോകില്ലെന്ന് അദ്ദേഹം വ്യക്തമാക്കി. മമതയുടെ നിര്‍ബന്ധപ്രകാരമാണ് താന്‍ അസന്‍സോളില്‍ മത്സരിച്ചതെന്നും സിന്‍ഹ കൂട്ടിച്ചേര്‍ത്തു.

🔹ഗോവയില്‍ ഇരുപത്തിരണ്ടുകാരനായ കോളേജ് വിദ്യാര്‍ത്ഥി ആത്മഹത്യ ചെയ്ത സംഭവത്തില്‍ ഗോവ മനുഷ്യാവകാശ കമ്മീഷന്‍ സ്വമേധയാ കേസെടുത്തു. ഇതേത്തുടര്‍ന്ന് ഗോവ ചീഫ് സെക്രട്ടറി, ആഭ്യന്തര വകുപ്പ് സെക്രട്ടറി, നോര്‍ത്ത് ഗോവ സൂപ്രണ്ട് ഓഫ് പോലീസ്, ബന്ധപ്പെട്ട പൊലീസ് സ്റ്റേഷനിലെ ഇന്‍സ്പെക്ടര്‍ എന്നിവര്‍ക്ക് കമ്മീഷന്‍ നോട്ടീസ് അയച്ചു.

🔹അഹമ്മദാബാദിലെ വിമാനാപകടത്തില്‍ മരിച്ചവരുടെ 96% കുടുംബങ്ങള്‍ക്കും എയര്‍ ഇന്ത്യ 25 ലക്ഷം രൂപ വീതം ഇടക്കാല ധനസഹായം നല്‍കി. ടാറ്റാ സണ്‍സ് പ്രഖ്യാപിച്ച 1 കോടി രൂപയുടെ സഹായവും ഭൂരിഭാഗം പേര്‍ക്ക് ലഭിച്ചു. അന്തിമ നഷ്ടപരിഹാര ചര്‍ച്ചകള്‍ ആരംഭിച്ചെങ്കിലും ഔദ്യോഗിക റിപ്പോര്‍ട്ടിന് ശേഷമേ വിതരണം പൂര്‍ത്തിയാകൂ.

🔹ഇറാനെ ആക്രമിക്കുമെന്ന നിലപാടില്‍ നിന്ന് യുഎസ് പിന്നോട്ട്. ഇരുരാജ്യങ്ങളും തമ്മില്‍ സമാധാന ഉടമ്പടി ഒപ്പുവയ്ക്കാന്‍ സാധ്യതയുണ്ടെന്നും അതുകൊണ്ട് ഇറാനെതിരെയുള്ള ആക്രമണത്തില്‍ നിന്ന് പിന്മാറുന്നെന്നും യുഎസ് പ്രസിഡന്റ് ഡോണള്‍ഡ് ട്രംപ് പറഞ്ഞു. അവസാനഘട്ട നിബന്ധനകള്‍ ഇറാന്‍ അംഗീകരിച്ചെന്നും അദ്ദേഹം പറഞ്ഞു. ഹോര്‍മുസ് കടലിടുക്ക് ഉടന്‍ തുറക്കുമെന്നും ഉടമ്പടി ഒപ്പിടുന്ന ദിവസം തന്നെ ഹോര്‍മുസ് തുറക്കുമെന്നും ചിലപ്പോള്‍ സമാധാന ഉടമ്പടിയില്‍ ഈയാഴ്ച തന്നെ ഒപ്പിട്ടേക്കുമെന്നും ട്രംപ് പറഞ്ഞു.

🔹അമേരിക്കയുമായി അന്തിമ കരാറിലെത്തിയെന്ന വാര്‍ത്തകള്‍ വെറും ഊഹാപോഹങ്ങള്‍ മാത്രമാണെന്ന് ഇറാന്‍ വിദേശകാര്യ മന്ത്രാലയം. ഏതെങ്കിലും തരത്തിലുള്ള കരാറിന്റെ കാര്യത്തില്‍ ടെഹ്റാന്‍ ഇതുവരെ അന്തിമ തീരുമാനമെടുത്തിട്ടില്ലെന്ന് ഇറാന്‍ വിദേശകാര്യ മന്ത്രാലയ വക്താവ് ഇസ്മായില്‍ ബഗായ് വ്യക്തമാക്കി.

🔹ഒമാന്‍ തീരത്ത് എംടി ജല്‍വീര്‍ എന്ന ചരക്കുകപ്പലിന്റെ എഞ്ചിന്‍ റൂമില്‍ തീപിടുത്തമുണ്ടായി. കപ്പലിലുണ്ടായിരുന്ന 20 ഇന്ത്യന്‍ നാവികരും സുരക്ഷിതരാണെന്ന് അധികൃതര്‍ അറിയിച്ചു. പശ്ചിമേഷ്യയിലെ സംഘര്‍ഷങ്ങളുടെ പശ്ചാത്തലത്തില്‍ ഈ ആഴ്ച ഒമാന്‍ തീരത്തുണ്ടാകുന്ന മൂന്നാമത്തെ കപ്പല്‍ അപകടമാണിത്.

🔹ഇരുപത്തിമൂന്നാമത് ഫുട്‌ബോള്‍ ലോകകപ്പിന് മെക്‌സിക്കോ സിറ്റിയിലെ ആസ്റ്റക്ക സ്റ്റേഡിയത്തില്‍ വര്‍ണ്ണാഭമായ തുടക്കം. മെക്‌സിക്കോയുടെ സംസ്‌കാരവും ചരിത്രവും വിളിച്ചോതുന്ന നൃത്ത-നാടക പ്രകടനങ്ങളോടെയാണ് ചടങ്ങുകള്‍ ആരംഭിച്ചത്. കൊളംബിയന്‍ പോപ്പ് താരം ഷക്കീറയും നൈജീരിയന്‍ ആഫ്രോബീറ്റ് താരം ബര്‍ണ ബോയിയും ചേര്‍ന്നാണ് വര്‍ണ്ണാഭമായ ഉദ്ഘാടന ചടങ്ങുകള്‍ക്ക് നേതൃത്വം നല്‍കിയത്. മനോഹരമായ കരിമരുന്ന് പ്രയോഗം സ്റ്റേഡിയത്തെ ആവേശത്തിലാഴ്ത്തി.

🔹ലോകകപ്പ് 2026ലെ ആദ്യ മത്സരത്തില്‍ മിന്നും വിജയം കുറിച്ച് ആതിഥേയരായ മെക്സിക്കോ. ദക്ഷിണാഫ്രിക്കയെ എതിരില്ലാത്ത രണ്ട് ഗോളുകള്‍ക്കാണ് മെക്സിക്കന്‍ സംഘം തകര്‍ത്തത്. മൂന്ന് റെഡ് കാര്‍ഡുകള്‍ പിറന്ന മത്സരത്തിന്റെ ഒന്‍പതാം മിനിറ്റില്‍ യൂലിയന്‍ ക്വിനോനസിലൂടെ ലീഡ് നേടിയ മെക്സിക്കോ 67-ാം മിനിറ്റില്‍ റൗള്‍ ജിമെനെസിന്റെ ഗോളിലൂടെ വിജയമുറപ്പിച്ചു. ദക്ഷിണാഫ്രിക്കന്‍ താരങ്ങളായ യായ സിത്തോളെയും തെംബ സാനെയും മെക്‌സിക്കോ താരം സെസാര്‍ മൊണ്ടെസും മത്സരത്തില്‍ റെഡ് കാര്‍ഡ് കണ്ടു.

🔹പത്ത് വര്‍ഷങ്ങള്‍ക്ക് ശേഷം നടന്‍ സൂര്യയുടെ കരിയറിലുണ്ടായ ബ്ലോക്ക് ബസ്റ്റര്‍ ചിത്രമായിരുന്നു ‘കറുപ്പ്’. ആര്‍ജെ ബാലാജി സംവിധാനം ചെയ്ത ചിത്രമിപ്പോള്‍ ഒടിടിയിലേക്ക് എത്തുകയാണ്. 300 കോടി രൂപയിലധികം ലോകവ്യാപകമായി കളക്ഷന്‍ നേടിയ ചിത്രം ജൂണ്‍ 12 ന് ആമസോണ്‍ പ്രൈം വിഡിയോയിലൂടെയാണ് ഒടിടിയിലെത്തുന്നത്. നടന്‍ ഇന്ദ്രന്‍സും ചിത്രത്തില്‍ ശ്രദ്ധേയമായ വേഷം അവതരിപ്പിച്ചിട്ടുണ്ട്. തമിഴിന് പുറമേ, മലയാളം, തെലുങ്ക്, ഹിന്ദി, കന്നഡ ഭാഷകളിലും സിനിമ ലഭ്യമാകും. നാട്ടി, സ്വാസിക, അനഘ മായ രവി, ശിവദ, സുപ്രീത് റെഡ്ഡി തുടങ്ങിയവരാണ് ചിത്രത്തിലെ മറ്റ് പ്രധാന അഭിനേതാക്കള്‍. രണ്ട് പതിറ്റാണ്ടുകള്‍ക്ക് ശേഷം സൂര്യയും തൃഷയും വീണ്ടും ഒന്നിക്കുന്നു എന്നതാണ് ചിത്രത്തിന്റെ പ്രധാന ആകര്‍ഷണം. സായ് അഭ്യങ്കാറാണ് ചിത്രത്തിന് സംഗീതം ഒരുക്കിയിരിക്കുന്നത്.

🔹ആക്ഷന്‍ താരം വിശാല്‍ ആദ്യമായി സംവിധാനം ചെയ്യുന്ന ചിത്രം മകുടത്തിന്റെ ടീസര്‍ പുറത്ത്. വിശാല്‍ തന്നെയാണ് ചിത്രത്തില്‍ നായകനാകുന്നത്. മൂന്നു വ്യത്യസ്ത ഗെറ്റപ്പിലാണ് വിശാല്‍ ചിത്രത്തില്‍ വേഷമിടുന്നത്. ടീസറിലും ഈ ഗെറ്റപ്പുകളില്‍ വിശാലെത്തുന്നുണ്ട്. വിശാലിന്റെ പവര്‍ പാക്ക്ഡ് ആക്ഷന്‍ എന്റര്‍ടെയ്‌നര്‍ ആയിരിക്കും മകുടം എന്ന് ടീസര്‍ വ്യക്തമാക്കുന്നു. ഒരു മനുഷ്യനെ കത്തിച്ച് , അവന്‍ നിന്നു കത്തുന്ന തീയില്‍ നിന്നും വിശാല്‍ സിഗരറ്റ് കൊളുത്തുന്ന ഷോട്ടോടെയാണ് ടീസര്‍ തുടങ്ങുന്നത്. കടലിന്റെ പശ്ചാത്തലത്തില്‍ ചേസിങ്ങുകളും , തീപാറുന്ന കിടിലന്‍ സംഘട്ടന രംഗങ്ങളും ഒപ്പം നാന്‍ കടലിലെ വാഴ്‌റവന്‍ അല്ല, അന്ത കടലയേ ആഴ്‌റവന്‍! എന്ന പഞ്ച് ഡയലോഗോടെയുമാണ് ടീസര്‍ അവസാനിക്കുന്നത്. തുഷാരാ വിജയനാണ് ചിത്രത്തില്‍ വിശാലിന്റെ ജോഡി. തമിഴ് – തെലുങ്ക് താരം അഞ്ജലിയും ചിത്രത്തിലുണ്ട്.. ജി. വി. പ്രകാശ് കുമാറാണ് സംഗീത സംവിധായകന്‍. ജൂലൈയില്‍ മകുടം റിലീസ് ചെയ്യും.

💦 ഗുരുജിയുടെ വാക്കുകൾ
*****************************

നീ മുങ്ങി താഴുന്നത് കാണാൻ നോക്കി നിൽക്കുന്നവരാണ് നിനക്ക് ചുറ്റും…നീന്തി കര കയറുന്നത് അവർക്ക് താങ്ങില്ല…..
ജീവിതമാണ്.., തളരാതെ തുഴയണം.
മുങ്ങി താഴുന്നിടത്തു നിന്ന് തന്നെ തുഴഞ്ഞു കയറിക്കോണം… തളർത്താൻ
നോക്കുന്നവർക്ക് മുന്നിൽ, തഴച്ചു വളരേണം.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

•ജൂൺ 12 ലോകമെമ്പാടും ലോക ബാലവേല വിരുദ്ധ ദിനമായി (World Day Against Child Labour) ആചരിക്കുന്നു. കുട്ടികളുടെ അവകാശങ്ങൾ സംരക്ഷിക്കുന്നതിനും ബാലവേല എന്ന സാമൂഹിക തിന്മയ്‌ക്കെതിരെ പൊതുജനങ്ങളിൽ അവബോധം വളർത്തുന്നതിനുമായാണ് ഈ ദിനം പ്രധാനമായും മാറ്റിവെച്ചിരിക്കുന്നത്.ദാരിദ്ര്യം കൊണ്ടോ മറ്റ് സാഹചര്യങ്ങൾ കൊണ്ടോ സ്കൂളിൽ പോകാനാകാതെ, കഠിനമായ ജോലികളിൽ ഏർപ്പെടാൻ നിർബന്ധിതരാകുന്ന ദശലക്ഷക്കണക്കിന് കുട്ടികളുടെ സംരക്ഷണം ഉറപ്പാക്കുകയും പ്രധാന ലക്ഷ്യ മാണ്.കുട്ടികൾക്ക് സുരക്ഷിതമായ അന്തരീക്ഷവും വിദ്യാഭ്യാസത്തിനുള്ള അവകാശവും ഉറപ്പാക്കാൻ രാജ്യങ്ങളെ പ്രേരിപ്പിക്കുക എന്നതും ഉൾപെടുന്നു.

•ലവിംഗ് ഡേ (Loving Day): അന്തർദേശീയ തലത്തിൽ പ്രണയത്തിന്റെയും സൗഹൃദത്തിന്റെയും പ്രാധാന്യം ഓർമ്മിപ്പിക്കുന്ന ദിനം.

•സൂപ്പർമാൻ ഡേ (Superman Day): ലോകപ്രശസ്ത അമാനുഷിക കഥാപാത്രമായ സൂപ്പർമാന്റെ ആരാധകർക്കായി മാറ്റിവെച്ച ദിനം.

•ഫിലിപ്പീൻസ് സ്വാതന്ത്ര്യദിനം: 1898 ജൂൺ 12-നാണ് ഫിലിപ്പീൻസ് സ്പെയിനിൽ നിന്നും സ്വാതന്ത്ര്യം പ്രഖ്യാപിച്ചത്.

തയ്യാറാക്കിയത്: കപിൽ ശങ്കർ

26 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 12 | വെള്ളി ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

തയ്യാറാക്കിയത്: കപിൽ ശങ്കർ

നിശ്ശബ്ദതയുടെ തണൽമരങ്ങൾ; ഓർമ്മകളിൽ പെയ്യുന്ന മാതൃപിതൃപുണ്യം.. ✍️ സിജു ജേക്കബ്

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ജൂൺ 24 | ബുധൻ ✍️തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹“ഇന്നത്തെ ചിന്താവിഷയം” 🌹 – 2026 | ജൂൺ 24 | ബുധൻ ✍️ പ്രൊഫസ്സർ എ.വി. ഇട്ടി മാവേലിക്കര

LEAVE A REPLY Cancel reply

Most Popular

നിശ്ശബ്ദതയുടെ തണൽമരങ്ങൾ; ഓർമ്മകളിൽ പെയ്യുന്ന മാതൃപിതൃപുണ്യം.. ✍️ സിജു ജേക്കബ്

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ജൂൺ 24 | ബുധൻ ✍️തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹“ഇന്നത്തെ ചിന്താവിഷയം” 🌹 – 2026 | ജൂൺ 24 | ബുധൻ ✍️ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ജൂൺ 24 | ബുധൻ ✍️ ബേബി മാത്യു അടിമാലി

Recent Comments

EDITOR PICKS

നിശ്ശബ്ദതയുടെ തണൽമരങ്ങൾ; ഓർമ്മകളിൽ പെയ്യുന്ന മാതൃപിതൃപുണ്യം.. ✍️ സിജു ജേക്കബ്

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ജൂൺ 24 | ബുധൻ ✍️തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹“ഇന്നത്തെ ചിന്താവിഷയം” 🌹 – 2026 | ജൂൺ 24 | ബുധൻ ✍️ പ്രൊഫസ്സർ എ.വി. ഇട്ടി മാവേലിക്കര

POPULAR POSTS

ഇടി മിന്നല്‍ എംബാപ്പെ; ഇറാഖിനെ തകര്‍ത്ത് ഫ്രാന്‍സ് നോക്കൗട്ടില്‍.

ക്ഷേത്ര ഫണ്ട് ക്ഷേത്രങ്ങൾക്കായി മാത്രം വിനിയോഗിക്കുക: 246 കോടിയുടെ പദ്ധതികൾ റദ്ദാക്കി മുഖ്യമന്ത്രി വിജയ്

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 12 | വെള്ളി ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************