📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 12 | ബുധൻ ✍️ കപിൽ ശങ്കർ

🔹സംസ്ഥാനത്തിന്റെ ‘കേരള’ എന്ന പേര് ‘കേരളം’ എന്നു മാറ്റാനുള്ള ബില്‍ ലോക്സഭ പാസാക്കി. പ്രതിപക്ഷ ബഹളത്തിനിടയിലാണ് ബില്‍ പാസായത്. രാജ്യസഭയുടെ അംഗീകാരം കൂടി ലഭിച്ച് രാഷ്ട്രപതി ഒപ്പുവക്കുന്നതോടെ പേരുമാറ്റം ഔദ്യോഗികമായി നിലവില്‍ വരും.

🔹 പിതൃസ്മരണയില്‍ ഇന്ന് കര്‍ക്കടകവാവ്. തിരുവനന്തപുരത്തെ തിരുവല്ലം ശ്രീ പരശുരാമക്ഷേത്രം, വര്‍ക്കല പാപനാശം, ആലുവ മണപ്പുറം, തിരുനാവായ നവാമുകുന്ദക്ഷേത്രം, തിരുനെല്ലി പാപനാശിനി, ഉള്‍പ്പെടെയുള്ള സംസ്ഥാനത്തെ പ്രധാന ക്ഷേത്രങ്ങളിലെല്ലാം ബലിതര്‍പ്പണ ചടങ്ങുകള്‍ നടന്നു.

🔹എസ്എന്‍ഡിപി യോഗം മൈക്രോഫിനാന്‍സ് തട്ടിപ്പില്‍ വെള്ളാപ്പള്ളി നടേശനടക്കമുള്ളവര്‍ക്കെതിരായ കേസുകളില്‍ കുറ്റപത്രം വൈകുന്നതിനു ഹൈക്കോടതി വിശദീകരണം തേടി. അന്വേഷണ ഉദ്യോഗസ്ഥനായ എസ്പി ശശിധരനോട് വെള്ളിയാഴ്ച നേരിട്ട് ഹാജരാകാന്‍ ഹൈക്കോടതി നിര്‍ദ്ദേശിച്ചു. കോടതിയില്‍ സമര്‍പ്പിച്ച റിപ്പോര്‍ട്ട് അപൂര്‍ണമെന്നും കോടതി നിരീക്ഷിച്ചു.

🔹ക്വട്ടേഷന്‍ പ്രവര്‍ത്തനങ്ങള്‍ക്കായി റിസോര്‍ട്ടില്‍ ഒത്തുചേര്‍ന്ന കേസില്‍ പ്രതിയായ അര്‍ജുന്‍ ആയങ്കിയുടെ ജാമ്യം കോതമംഗലം മജിസ്‌ട്രേറ്റ് കോടതി റദ്ദാക്കി. കേസില്‍ ജാമ്യത്തില്‍ കഴിയുകയായിരുന്ന അര്‍ജുന്‍ ആയങ്കി വ്യവസ്ഥകള്‍ ലംഘിച്ചതായി ചൂണ്ടിക്കാട്ടി പൊലീസ് നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് കോടതിയുടെ ഈ നിര്‍ണായക നടപടി.

🔹അര്‍ജുന്‍ ആയങ്കിയുടെ മൊബൈല്‍ ഫോണ്‍ കണ്ടെത്തിയതായി പൊലീസ്. ആഭ്യന്തരമന്ത്രിക്കും പോലീസിനുമെതിരെ പോസ്റ്റിടാന്‍ ഉപയോഗിച്ചെന്ന് കരുതുന്ന ഫോണാണ് കണ്ടെത്തിയത്. അര്‍ജുന്‍ ആയങ്കിയെ പിടികൂടിയ അഭിഭാഷകയുടെ അപ്പാര്‍ട്ട്മെന്റിനു സമീപത്തു നിന്നാണ് ഫോണ്‍ കണ്ടെത്തിയത്.

🔹മെസിയെ കേരളത്തിലേക്കു കൊണ്ടുവരുമെന്നു പ്രചരിപ്പിച്ച് മുന്‍ സ്പോര്‍ട്സ് മന്ത്രിയും റിപ്പോര്‍ട്ടര്‍ ടിവി ഉടമയും നടത്തിയ ഇടപാടുകള്‍ സര്‍ക്കാരിന് സാമ്പത്തിക നഷ്ടവും മറ്റു ബാധ്യതകളും ഉണ്ടാക്കിയെന്ന് അന്വേഷണ റിപ്പോര്‍ട്ട്. കായികരംഗത്ത് കേരളത്തിനു ചീത്തപ്പേരുണ്ടാക്കി. കേന്ദ്ര ഏജന്‍സികളുടെ ഇടപെടല്‍ ക്ഷണിച്ചുവരുത്തുന്ന നടപടികള്‍ ഉണ്ടായി. സര്‍ക്കാര്‍ സംവിധാനങ്ങള്‍ ചട്ടം മറികടന്ന് കൈമാറിയെന്നും റിപ്പോര്‍ട്ടില്‍ പറയുന്നു. മുന്‍ മന്ത്രിയുടെ വിദേശയാത്രയ്ക്ക് 14 ലക്ഷത്തോളം രൂപ ചെലവാക്കിയെന്ന് കായികമന്ത്രി ഒജെ ജെനീഷ്.

🔹മെസിയെ കേരളത്തില്‍ കൊണ്ടുവരാന്‍ നടത്തിയ ഇടപാടുകളില്‍ ഒരു ക്രമക്കേടുും നടന്നിട്ടില്ലെന്ന് മുന്‍ മുഖ്യമന്ത്രി പിണറായി വിജയന്‍. എന്ത് അന്വേഷണം നടത്താനാണ്. മന്ത്രിക്ക് സ്പെയിനില്‍ പോകാന്‍ കരാര്‍ വേണ്ട. ചില കാര്യങ്ങള്‍ മാത്രമേ തനിക്കറിയൂ. അന്നത്തെ കായിക മന്ത്രി കാര്യങ്ങള്‍ വിശദീകരിക്കുമെന്നും പിണറായി വിജയന്‍ പറഞ്ഞു.

🔹മെസി വരുമെന്ന് പറഞ്ഞ് പിണറായി സര്‍ക്കാരിന്റെ ഒത്താശയോടെ നടന്നത് വന്‍ കള്ളപ്പണ ഇടപാടെന്ന് എറണാകുളം ഡിസിസി പ്രസിഡന്റ് മുഹമ്മദ് ഷിയാസ് എംഎല്‍എ. കലൂര്‍ സ്റ്റേഡിയം ഈ രീതിയിലെങ്കിലും തിരികെ ലഭിച്ചത് ഭാഗ്യമാണെന്നും ഷിയാസ് പരിഹസിച്ചു.

🔹കാലവര്‍ഷക്കെടുതിയിലെ രക്ഷാപ്രവര്‍ത്തനത്തില്‍ സംസ്ഥാന സര്‍ക്കാരിനു ഗുരുതര വീഴ്ച സംഭവിച്ചെന്ന് പ്രതിപക്ഷ നേതാവ് പിണറായി വിജയന്‍. 33 പേര്‍ക്ക് ജീവന്‍ നഷ്ടമാവുകയും മൂന്നു പേരെ കടലില്‍ കാണാതാവുകയും ചെയ്തിട്ടും സര്‍ക്കാര്‍ വേണ്ടത്ര ഗൗരവത്തോടെ ഇടപെടുന്നില്ലെന്ന് അദ്ദേഹം പറഞ്ഞു.

🔹പിണറായി വിജയന്റെ വീട്ടില്‍ റെയ്ഡിനെത്തിയ ഇ ഡി ഉദ്യോഗസ്ഥരെ ആക്രമിച്ച കേസില്‍ അന്വേഷണ സംഘം വിപുലീകരിച്ചു. ഗൂഢാലോചന അന്വേഷിക്കുന്നതിന്റെ ഭാഗമായി എം വി ഗോവിന്ദന്‍ ഉള്‍പ്പെടെയുള്ള പ്രമുഖ സി പി എം നേതാക്കളെ ചോദ്യം ചെയ്യും.

🔹നാല് സംസ്ഥാനങ്ങളിലായുള്ള 15 കോടി രൂപയുടെ നിക്ഷേപ തട്ടിപ്പ് കേസില്‍ കാസര്‍കോട് സ്വദേശി ജമാലുദ്ദീന്‍ ഫൈസി മുഖ്യസൂത്രധാരനാണെന്ന് ഡല്‍ഹി പൊലീസ്. ഇയാളുടെ സഹായി മുസമ്മില്‍ തയ്ബിനെ പൊലീസ് പിടികൂടി.

🔹ഗുരുവായൂര്‍ ക്ഷേത്രത്തില്‍ വീണ്ടും ഒരു ദിവസം 250 ലേറെ വിവാഹങ്ങള്‍. ഓഗസ്റ്റ് 23 ന് 377, ഓഗസ്റ്റ് 30 ന് 295 എന്നിങ്ങനെ വിവാഹങ്ങള്‍ ഇതിനകം ശീട്ടാക്കിയിട്ടുണ്ട്. ഈ സാഹചര്യത്തില്‍ ദര്‍ശനവും വിവാഹ ചടങ്ങുകളും സുഗമമായി നടത്താന്‍ ഗുരുവായൂര്‍ ദേവസ്വം പ്രത്യേക ക്രമീകരണങ്ങള്‍ ഒരുക്കും.

🔹നീണ്ടകരയില്‍ വള്ളം മറിഞ്ഞ് കാണാതായ ഗൗതം കൃഷ്ണന്റെ കുടുംബത്തെ സന്ദര്‍ശിച്ച് പ്രതിപക്ഷ നേതാവ് പിണറായി വിജയന്‍. അപകടത്തില്‍ ആദ്യഘട്ടത്തില്‍ നടന്ന തിരച്ചിലില്‍ കാലതാമസമുണ്ടായത് നിര്‍ഭാഗ്യകരമാണെന്നും അങ്ങനെ സംഭവിക്കാന്‍ പാടില്ലായിരുന്നുവെന്നും അദ്ദേഹം പറഞ്ഞു.

🔹മുന്‍മന്ത്രി വി ശിവന്‍കുട്ടിയുടെ മുന്‍ ഗണ്‍മാനായിരുന്ന പ്രജീഷ് എസ് നായര്‍ക്ക് സസ്പെന്‍ഷന്‍. ബസില്‍ യാത്രക്കാരിയായ പെണ്‍കുട്ടിക്കെതിരെ ലൈംഗിക അതിക്രമം നടത്തിയതിനാണ് നടപടി. മോശം പെരുമാറ്റത്തിന്റെ വീഡിയോ പെണ്‍കുട്ടി തന്നെ പകര്‍ത്തിയാണ് പുറത്തുവിട്ടത്.

🔹ലഹരിക്കേസില്‍ പിടിയിലായത് മുഖ്യമന്ത്രിയുടെ സോഷ്യല്‍മീഡിയ കോ ഓര്‍ഡിനേറ്ററാണെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍. സംഭവം ഗൗരവമുള്ളതാണെന്നും ആരാണെന്ന് മനസ്സിലാക്കിയിരുന്നെങ്കില്‍ പിടിക്കില്ലായിരുന്നുവെന്നും അദ്ദേഹം പറഞ്ഞു. ദൃശ്യങ്ങള്‍ സഹിതമായിരുന്നു വാര്‍ത്താസമ്മേളനം.

🔹ലഹരി കേസില്‍ അറസ്റ്റിലായ പ്രവര്‍ത്തകനെ പാര്‍ട്ടിയില്‍നിന്ന് പുറത്താക്കിയതായി യൂത്ത് കോണ്‍ഗ്രസ്. പെരുമ്പാവൂര്‍ വലിയകുളം യൂണിറ്റ് അംഗമായ മുഹമ്മദ് ഹുസൈനെ അറസ്റ്റുചെയ്ത ഒമ്പതാം തീയതി തന്നെ പ്രാഥമിക അംഗത്വത്തില്‍ നിന്ന് പുറത്താക്കിയതായാണ് പാര്‍ട്ടി വിശദീകരണം.

🔹ക്ഷേത്രത്തിലെ ശ്രീകോവിലിൽ നിന്ന് സ്വർണപതക്കം മോഷ്ടിച്ച കേസിൽ ശാന്തിക്കാരൻ പിടിയിൽ. കാർത്തികപ്പള്ളി മഹാദേവികാട് വലിയവീട് ഭഗവതി ക്ഷേത്രത്തിലെ ശ്രീകോവിലിൽ നിന്നാണ് നാല് ഗ്രാം തൂക്കം വരുന്ന പതക്കം മോഷണം പോയത്.കേസിൽ മുൻ ശാന്തിക്കാരൻ ഒ.വി. വിഷ്ണു (36) ആണ് പിടിയിലായത്. പകരം ശാന്തിക്കാരനായി ഇയാൾ ക്ഷേത്രത്തിൽ മുമ്പ് ജോലി ചെയ്തിട്ടുണ്ട്. കഴിഞ്ഞ ഒന്നിന് പുലർച്ചെ നടന്ന മോഷണം, രാവിലെ ശാന്തിക്കാരൻ ക്ഷേത്രം തുറന്നപ്പോഴാണ് അറിയുന്നത്.

🔹അലിമുക്കിൽ പിടികൂടിയ പുലിയെ അച്ചൻകോവിൽ വനത്തിൽ തുറന്നുവിട്ടതിൽ വനം വകുപ്പിനെതിരെ വ്യാപക പ്രതിഷേധം. അലിമുക്കിൽ പിടികൂടിയ പുലിയെ റാന്നി ഉൾവനത്തിൽ തുറന്നുവിടാനായിരുന്നു തീരുമാനം.എന്നാൽ കനത്ത മഴയും മൂടൽമഞ്ഞും കാരണം ശ്രമം ഉപേക്ഷിച്ചു. തുടർന്ന് കഴിഞ്ഞ ദിവസം അർധരാത്രിയോടെ വനപാലക സംഘം പുലിയെ രഹസ്യമായി അച്ചൻകോവിൽ ഉൾവനത്തിലെത്തിച്ച് തുറന്നു വിടുകയായിരുന്നു.ഇതിനുശേഷം തൊട്ടടുത്ത ദിവസം ഉച്ചയോടെ പുലിക്കൂടുമായി വനപാലകരുടെ വാഹനങ്ങൾ തിരികെ വരുന്നതു കണ്ടതോടെയാണു പുലിയെ വനത്തിൽ തുറന്നു വിട്ടതായ് നാട്ടുകാർ മനസിലാക്കിയത്. തുടർന്ന് നാട്ടുകാർ സംഘടിച്ച് ശക്തമായ പ്രതിഷേധം ഉയർത്തുകയായിരുന്നു.

🔹മദ്യപിക്കാൻ പണം നൽകാത്തതിന് അമ്മയെ ക്രൂരമായി മർദിച്ച പ്രതി പിടിയിൽ. റാന്നി കരികുളം പഴവങ്ങാടിയിൽ ജോബി ജേക്കബ് ജോർജ് (43) ആണ് പിടിയിലായത്. ജോബിയുടെ ആക്രമണത്തിൽ അമ്മയുടെ കൈവിരലിന് പൊട്ടലുണ്ട്.സ്ഥിരം മദ്യപാനിയായ ജോബി മദ്യപിക്കുന്നതിനായി പണം നൽകാത്തതിന് അമ്മയെ ഉപദ്രവിക്കുന്നത് പതിവായിരുന്നു. മുൻപും ഇയാൾ അമ്മയെ ഉപദ്രവിച്ചതിന് പോലീസിന് പരാതികൾ ലഭിച്ചിരുന്നു.ഞായറാഴ്ച ഇയാൾ അമ്മയെ പശുത്തൊഴുത്തിൽ നിന്നും വലിച്ച് പുറത്തിടുകയും തല ഭിത്തിയിൽ ഇടിപ്പിക്കുകയും ചെയ്തു. സംഭവത്തിൽ പിടിയിലായ പ്രതിയെ പോലീസ് കോടതിയിൽ ഹാജരാക്കി റിമാൻഡ് ചെയ്തു.

🔹ഓണത്തിനു നാട്ടിലേക്ക് യാത്ര ചെയ്യുന്നവര്‍ക്കായി കെഎസ്ആര്‍ടിസി പ്രത്യേക അന്തര്‍സംസ്ഥാന സര്‍വീസുകള്‍ തുടങ്ങുന്നു. ഓഗസ്റ്റ് 18 മുതല്‍ സെപ്റ്റംബര്‍ 2 വരെ കേരളത്തിലെ വിവിധ കേന്ദ്രങ്ങളില്‍ നിന്ന് ബെംഗളൂരു, മൈസൂരു, ചെന്നൈ എന്നിവിടങ്ങളിലേക്കും തിരിച്ചും സര്‍വീസുകള്‍ ഉണ്ടാകും.

🔹മല്‍സ്യത്തൊഴിലാളികളുടെ രക്ഷാപ്രവര്‍ത്തനത്തിന് എല്‍ഡിഎഫ് ഭരണകാലത്തു 18.9 കോടി രൂപ മുടക്കി വാങ്ങിയ മൂന്ന് മറൈന്‍ ആംബുലന്‍സുകള്‍ കട്ടപ്പുറത്ത്. റഡാര്‍, ജിപിഎസ് പിഴവുകള്‍മൂലം ഐആര്‍എസ് സര്‍ട്ടിഫിക്കേഷന്‍ ലഭിക്കാത്തതാണ് കട്ടപ്പുറത്താകാന്‍ കാരണം. 2022 ല്‍ ആറേകാല്‍ കോടി രൂപ മുടക്കിയാണ് ഓരോ ആംബുലന്‍സ് ബോട്ടുകള്‍ വാങ്ങിയത്.

🔹 കല്ലമ്പലം നാവായിക്കുളത്ത് കിടപ്പുരോഗിയെ വീട്ടിൽ കയറി വെട്ടിപ്പരിക്കേൽപ്പിച്ച ശേഷം കവർച്ച നടത്തിയ സംഭവത്തിൽ മൂന്ന് പേർ പിടിയിൽ. കല്ലമ്പലം സ്വദേശികളായ ബിജു, മനീഷ്, പാരിപ്പള്ളി സ്വദേശി പ്രസാദ് ജോസ് എന്നിവരാണ് പിടിയിലായത്.നാവായിക്കുളം ചിറ്റായിക്കോട് കഴിഞ്ഞ ദിവസം പുലർച്ചെ ഒരു മണിയോടെയായിരുന്നു സംഭവം. ഒരു വർഷമായി അരയ്ക്ക് താഴെ തളർന്നുകിടക്കുന്ന അനിൽ കുമാറിനെയാണ് പ്രതികൾ ആക്രമിച്ചത്. വീട്ടിനുള്ളിൽ കടന്ന പ്രതികൾ അനിൽ കുമാറിനോട് പണം ആവശ്യപ്പെടുകയും പണം നൽകാൻ വിസമ്മതിച്ചതിനെ തുടർന്ന് വെട്ടിപ്പരിക്കേൽപ്പിക്കുക‍യായിരുന്നു.

🔹ആകാശചൂഴിയില്‍ അകപ്പെട്ട എയര്‍ ഇന്ത്യ വിമാനത്തിന്റെ പൈലറ്റ് കഞ്ചാവ് ഉപയോഗിച്ചിരുന്നതായി സംശയം. പൈലറ്റിന്റെ രണ്ടാം ലഹരി പരിശോധനയും പോസിറ്റീവ് എന്ന് റിപ്പോര്‍ട്ട്. ഫൂകെറ്റ്- ഡല്‍ഹി വിമാനത്തിന്റെ പൈലറ്റിന്റെ ആദ്യ പരിശോധനയിലും ഫലം പോസിറ്റീവ് ആയിരുന്നു. അപകടത്തിനു കാരണം ആകാശ ചുഴിയാണോയെന്ന് എഎഐബി പരിശോധിക്കും.

🔹ഹിമാചല്‍ പ്രദേശില്‍ കാലവര്‍ഷം മൂലം 260 റോഡുകള്‍ ഗതാഗത യോഗ്യമല്ലാതായി. ഉരുള്‍പൊട്ടലിലും മഴക്കെടുതിയിലുമായി 157 പേര്‍ക്ക് ജീവന്‍ നഷ്ടപ്പെട്ടു. ഏകദേശം 886 കോടി രൂപയുടെ നഷ്ടമാണുണ്ടായത്.

🔹അരുണാചല്‍ പ്രദേശിലെ 27 സ്ഥലങ്ങള്‍ക്ക് പേരിട്ട് ഇന്ത്യ ഭൂപടത്തില്‍ ഉള്‍പ്പെടുത്തിയതിനെതിരെ ചൈന. എന്നാല്‍ ചൈനയുടെ പ്രതിഷേധം അനാവശ്യമാണെന്നും അരുണാചല്‍ പ്രദേശ് ഇന്ത്യയുടെ അവിഭാജ്യ ഘടകമാണെന്നും വിദേശകാര്യ മന്ത്രാലയം വ്യക്തമാക്കി.

🔹ബൈക്കില്‍ നിന്ന് വീണു പരിക്കേറ്റ 19 കാരിയെ കൂട്ടബലാത്സംഗം ചെയ്ത ആറു പേരില്‍ മൂന്നു പേരെ അറസ്റ്റു ചെയ്തു. മഹാരാഷ്ട്രയില്‍ പാല്‍ഘറിലെ തല്‍സാരിയിലാണ് സംഭവം. അപകടത്തില്‍ പരിക്കേറ്റ യുവതിയെ സഹായിക്കാനെത്തിയവരാണ് പീഡിപ്പിച്ചത്. സുഹൃത്തിനൊപ്പം ഗുജറാത്തില്‍ നിന്ന് മടങ്ങിവരുമ്പോഴായിരുന്നു അപകടം.

🔹ചെങ്കടലിലെ ബാബ് അല്‍-മന്ദേബ് കടലിടുക്കില്‍ ഹൂതികള്‍ ചരക്കു കപ്പല്‍ ആക്രമിച്ചു. ആറ് പേര്‍ കൊല്ലപ്പെട്ടു. ഹോര്‍മുസ് തുറക്കണമെങ്കില്‍ അമേരിക്ക ഇറാന്റെ മരവിപ്പിച്ച ആസ്തികള്‍ വിട്ടുനല്‍കണമെന്ന് ഇറാന്റെ പുതിയ സുപ്രീം നാഷണല്‍ സെക്യൂരിറ്റി കൗണ്‍സില്‍ സെക്രട്ടറി മൊഹ്‌സിന്‍ റെസായി.

🔹ഇറാനില്‍ നിന്നുള്ള കടുത്ത ആക്രമണ ഭീഷണിയെ തുടര്‍ന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ് തുര്‍ക്കിയില്‍ നിന്ന് കേറ്ററിംഗ് ട്രക്കില്‍ ഒളിച്ച് രഹസ്യമായി കടന്നെന്ന് റിപ്പോര്‍ട്ട്. എയര്‍ഫോഴ്‌സ് വണ്ണില്‍ കയറിയതായി തെറ്റിദ്ധരിപ്പിച്ച ശേഷം, മറ്റൊരു സൈനിക വിമാനത്തിലാണ് ട്രംപ് സുരക്ഷിതമായി അമേരിക്കയിലേക്കു മടങ്ങിയത്.

🔹സിറിയയുടെ മുന്‍ പ്രസിഡന്റ് ബഷാര്‍ അല്‍ അസദിന് വധശിക്ഷ വിധിച്ച് ക്രിമിനല്‍ കോടതി. മാനവികതയ്ക്ക് എതിരായ കുറ്റകൃത്യങ്ങള്‍, യുദ്ധക്കുറ്റങ്ങള്‍, കൊലപാതകങ്ങള്‍, അനധികൃതമായി ആളുകളെ തടങ്കലില്‍ വയ്ക്കുക അടക്കമുള്ള കുറ്റങ്ങള്‍ ചുമത്തിയാണ് ശിക്ഷ വിധിച്ചത്.

🔹കൊളംബിയയിലുണ്ടായ ഭൂചലനത്തില്‍ 169 പേര്‍ കൊല്ലപ്പെട്ടു. ആയിരത്തിലധികം പേര്‍ക്ക് പരിക്കേറ്റു. കെട്ടിടാവശിഷ്ടങ്ങള്‍ക്കിടയില്‍ രക്ഷാപ്രവര്‍ത്തനം തുടരുന്നു. രാജ്യത്ത് അടിയന്തരാവസ്ഥ പ്രഖ്യാപിച്ചു. ഇന്നലെ വൈകുന്നേരം ആറുമണിയോടെ റിക്ടര്‍ സ്‌കെയിലില്‍ 7.4 തീവൃത രേഖപ്പെടുത്തിയ ഭൂകമ്പത്തില്‍ നിരവധി കെട്ടിടങ്ങള്‍ തകര്‍ന്നു.

🔹അന്താരാഷ്ട്ര ഹോക്കി ഫെഡറേഷന്‍ പുരുഷ, വനിതാ ഹോക്കി ലോകകപ്പ് മല്‍സരങ്ങള്‍ക്ക് ക്വാര്‍ട്ടര്‍ ഫൈനല്‍ ഘട്ടം ഒഴിവാക്കി. ഒന്നാം ഘട്ടം 16 ടീമുകളെ വീതം നാല് പൂളുകളായി തിരിച്ചുള്ള ഗ്രൂപ്പ് മത്സരങ്ങളാണ്. ടീമുകള്‍ മുമ്പ് കളിക്കാത്ത എതിരാളികളുമായി മൂന്ന് മത്സരങ്ങള്‍ കൂടി കളിക്കും. പുരുഷ-വനിതാ ലോകകപ്പുകള്‍ ഒരേസമയമാണ് നടക്കുക. നെതര്‍ലന്‍ഡ്സിലെ ആംസ്റ്റല്‍വീലിലും ബെല്‍ജിയത്തിലെ വാവ്രെയിലുമായി ഓഗസ്റ്റ് 15 മുതല്‍ 30 വരെയാണ് ചാമ്പ്യന്‍ഷിപ്പ്.

🔹സാല്‍സ്ബര്‍ഗ് (ഓസ്ട്രിയ): ക്ലബ് ഫുട്‌ബോള്‍ പോരാട്ടങ്ങളുടെ പുതുസീസണിനു സൂപ്പര്‍ തുടക്കം. 2026 യുവേഫ സൂപ്പര്‍ കപ്പ് കിരീടപോരാട്ടത്തില്‍ ഫ്രഞ്ച് ക്ലബ്ബായ പാരീസ് സെന്‍റ് ജെര്‍മെയ്‌നും ഇംഗ്ലീഷ് സംഘമായ ആസ്റ്റണ്‍ വില്ലയും ഏറ്റുമുട്ടും.ഇന്ത്യന്‍ സമയം ഇന്ന് അര്‍ധരാത്രി 12.30നാണ് പിഎസ്ജി x ആസ്റ്റണ്‍ വില്ല സൂപ്പര്‍ ഫൈനലിന്‍റെ കിക്കോഫ്. നിലവിലെ യുവേഫ ചാമ്പ്യന്‍സ് ലീഗ്, യൂറോപ്പ ലീഗ് കിരീട ജേതാക്കളാണ് ഇരുടീമും.

🔹ഗ്രാമീണ പശ്ചാത്തലത്തില്‍ രസകരമായ മുഹൂര്‍ത്തങ്ങളിലൂടെ കഥ പറയുന്ന നിവിന്‍ പോളി- മമിത ബൈജു ചിത്രം ‘ബെത്‌ലഹേം കുടുംബ യൂണിറ്റി’ലെ ഗാനം പുറത്തിറങ്ങി. ചിത്രം ഓഗസ്റ്റ് 21-ന് തിയേറ്ററുകളിലെത്തും. വിഷ്ണു വിജയ് ഈണമിട്ട് സുഹൈല്‍ കോയയുടെ വരികളുമായി എത്തിയിരിക്കുന്ന ഗാനം ആലപിച്ചിരിക്കുന്നത് കപില്‍ കപിലനാണ്. ഗിരീഷ് എ.ഡിയാണ് സിനിമ ഒരുക്കുന്നത്. ഭാവന സ്റ്റുഡിയോസിന്റെ ബാനറില്‍ ദിലീഷ് പോത്തന്‍, ഫഹദ് ഫാസില്‍, ശ്യാം പുഷ്‌കരന്‍ എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്. സംഗീത് പ്രതാപ്, സുരേഷ് കൃഷ്ണ, ബിന്ദു പണിക്കര്‍, വിനയ് ഫോര്‍ട്ട്, റോഷന്‍ ഷാനവാസ്, ശ്യാം മോഹന്‍, ഷമീര്‍ ഖാന്‍, ശ്രിന്ദ, പാര്‍വതി അയ്യപ്പദാസ്, മീനാക്ഷി രവീന്ദ്രന്‍ തുടങ്ങി വലിയൊരു താരനിര തന്നെയാണ് ചിത്രത്തിലുള്ളത്.

🔹ആക്ഷന്‍ സൂപ്പര്‍ സ്റ്റാര്‍ വിശാല്‍ നായകനാകുന്നതും സംവിധാനം ചെയ്യുന്നതുമായ ‘മകുടം’ എന്ന ചിത്രത്തിന്റെ ട്രെയിലര്‍ പുറത്തിറങ്ങി. ഇതില്‍ വിശാല്‍ മൂന്ന് വ്യത്യസ്ത വേഷങ്ങളില്‍ പ്രത്യക്ഷപ്പെടുന്നു. സൂപ്പര്‍ ഗുഡ് ഫിലിംസ് നിര്‍മ്മിക്കുന്ന 99-ാമത്തെ ചിത്രവും വിശാലിന്റെ 35-ാമത്തെ സിനിമയുമായ ഇത്, കടല്‍ പശ്ചാത്തലത്തിലുള്ള ചേസിംഗുകള്‍, തീ പാറുന്ന സംഘട്ടനങ്ങള്‍, ശക്തമായ സംഭാഷണങ്ങള്‍ എന്നിവയോടെയുള്ള ഒരു ആക്ഷന്‍ ത്രില്ലര്‍ ആയിരിക്കും. ദുഷാരാ വിജയന്‍, അഞ്ജലി എന്നിവരാണ് മറ്റ് പ്രധാന താരങ്ങള്‍. ജി. വി. പ്രകാശ് കുമാര്‍ സംഗീതം നല്‍കിയ ചിത്രത്തിന്റെ ഛായാഗ്രഹണം റിച്ചാര്‍ഡ് എം നാഥന്‍ നിര്‍വഹിക്കുന്നു. ചെന്നൈ, ഊട്ടി, പാലക്കാട് എന്നിവിടങ്ങളിലായി ചിത്രീകരണം പൂര്‍ത്തിയായി, ഓഗസ്റ്റ് 14ന് ചിത്രം റിലീസ് ചെയ്യും.

🔹വ്യത്യസ്തമായ ടൈറ്റിലിലൂടെ പ്രേക്ഷകരില്‍ കൗതുകമുണര്‍ത്തിയ മലയാളം ടൈം ട്രാവല്‍ ത്രില്ലര്‍ ‘ഒറിജിനല്‍’ ചിത്രത്തിന്റെ ടീസര്‍ പുറത്തിറങ്ങി. ശ്രീനാഥ് ഭാസിയുടെ രണ്ട് വ്യത്യസ്ത രൂപങ്ങളെയാണ് ടീസറില്‍ കാണുന്നത്. ‘ഇനി നമ്മുടെ സമയാ’ എന്ന ശ്രീനാഥ് ഭാസിയുടെ ഡയലോഗും ടീസറിലെ ശ്രദ്ധേയമായ നിമിഷമാണ്. സമയവും യാഥാര്‍ഥ്യവും തമ്മിലുള്ള അതിരുകളെ ചോദ്യം ചെയ്യുന്ന അവതരണമാണ് ചിത്രത്തിന്റേത്. റമീസ് എഴുതി സംവിധാനം ചെയ്യുന്ന ചിത്രത്തിന് സംഗീതം ഒരുക്കുന്നത് ഇലക്ട്രോണിക് കിളിയാണ്. ശ്രീനാഥ് ഭാസിക്കൊപ്പം അഭിരാം രാധാകൃഷ്ണന്‍, രാജേഷ് മാധവന്‍, സാഫ് ബോയ്, ബിനു പപ്പു, ഫെമിന ജോര്‍ജ്, ശ്രീകാന്ത് വെട്ടിയാര്‍, ഗോകുലന്‍, അനീഷ് ജി, സലീം ഹസന്‍, ദിനേശ് പ്രഭാകര്‍, രാജേഷ് പറവൂര്‍, ഷമീര്‍ (ചൂരല്‍), സുബിന്‍ ടാര്‍സന്‍, അരുണ്‍ പ്രദീപ്, ലാല മലപ്പുറം, സ്റ്റിനി ഫ്രാന്‍സിസ്, ഹാരിസ് സലീം, വിരു വിവേക് എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു.

💦 ഗുരുജിയുടെ വാക്കുകൾ
*****************************

ചില പിടിവാശി ഇഷ്ടം കൊണ്ടാണെന്നും..
ചില പരിഭവങ്ങൾ സ്നേഹം ആണെന്നും ..
ചില വഴക്കുകൾ പ്രണയം ആണെന്നും …
ചില വിലക്കുകൾ കരുതലുകൾ ആണെന്നും ..
ചില പിണക്കങ്ങൾ കൂടുതൽ ഇണക്കത്തിനാണെന്നും ..
ചില മൗനങ്ങൾ ആഴത്തിൽ മിണ്ടാൻ ആണെന്നും
ചില ഇഷ്ടങ്ങൾ ഇങ്ങനെ ഒക്കെ ആണെന്നും ഉൾകൊള്ളാൻ കഴിഞ്ഞാൽ ആ ബന്ധങ്ങൾ അതി മനോഹരമായി തോന്നുകയും ദൃഢമായി നില നിൽക്കുകയും ചെയ്യും.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 12

•അന്താരാഷ്ട്ര യുവജന ദിനം (International Youth Day)യുവജനങ്ങളുടെ പ്രശ്നങ്ങൾ അന്താരാഷ്ട്ര സമൂഹത്തിന്റെ ശ്രദ്ധയിൽപ്പെടുത്തുന്നതിനും സമൂഹത്തിന് അവർ നൽകുന്ന സംഭാവനകളെ മുൻനിർത്തിയും ഐക്യരാഷ്ട്രസഭ (UN) 1999 മുതലാണ് ഈ ദിനാചരണം ആരംഭിച്ചത്.യുവാക്കളുടെ ശാക്തീകരണം, വിദ്യാഭ്യാസം, തൊഴിലവസരങ്ങൾ ഉറപ്പാക്കൽ എന്നിവയെക്കുറിച്ച് ബോധവൽക്കരണം നടത്തുക.(ശ്രദ്ധിക്കുക: ഇന്ത്യയിൽ ദേശീയ യുവജനദിനം ആഘോഷിക്കുന്നത് ജനുവരി 12-നാണ്).

•ലോക ആന ദിനം (World Elephant Day)ഭൂമിയിലെ ഏറ്റവും വലിയ കരജീവിയായ ആനകളുടെ സംരക്ഷണാർത്ഥം ആചരിക്കുന്ന സുപ്രധാന ദിനമാണിത്.ഏഷ്യൻ, ആഫ്രിക്കൻ ആനകൾ നേരിടുന്ന വംശനാശ ഭീഷണി, വേട്ടയാടൽ, ആവാസവ്യവസ്ഥയുടെ നാശം എന്നിവയ്‌ക്കെതിരെ ജനങ്ങളിൽ അവബോധം വളർത്തുക.

•വിക്രം സാരാഭായി ജന്മദിനം: ഇന്ത്യൻ ബഹിരാകാശ ഗവേഷണത്തിന്റെ പിതാവായ ഡോ. വിക്രം സാരാഭായി ജനിച്ചത് 1919 ഓഗസ്റ്റ് 12-നാണ്.

•ഐ.ബി.എം പി.സി (IBM PC) ജന്മദിനം: സാങ്കേതികവിദ്യയുടെ ചരിത്രത്തിൽ ആദ്യമായി ഐ.ബി.എം കമ്പനി പേഴ്സണൽ കമ്പ്യൂട്ടറുകൾ (PC) വിപണിയിൽ ഇറക്കിയത് 1981 ഓഗസ്റ്റ് 12-നാണ്

തയ്യാറാക്കിയത്: കപിൽ ശങ്കർ

12 Likes

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 12 | ബുധൻ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 12

തയ്യാറാക്കിയത്: കപിൽ ശങ്കർ

ട്രേസിംഗ് ഷാഡോ.ഒമാനിലെ ആദ്യ പ്രദർശനത്തിൽ മികച്ച അഭിപ്രായം.

നേപ്പാൾ മിന്നൽ പ്രളയം; മരണസംഖ്യ 538 ആയി

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 28 | വെള്ളി ✍️ കപിൽ ശങ്കർ

LEAVE A REPLY Cancel reply

Most Popular

ട്രേസിംഗ് ഷാഡോ.ഒമാനിലെ ആദ്യ പ്രദർശനത്തിൽ മികച്ച അഭിപ്രായം.

ഓണക്കാലത്ത് സംസ്ഥാനത്ത് വിലക്കയറ്റവും പൂഴ്ത്തിവയ്പ്പും തടയാനായി: കൃഷി മന്ത്രി ടി സിദ്ദിഖ്

നേപ്പാൾ മിന്നൽ പ്രളയം; മരണസംഖ്യ 538 ആയി

Recent Comments

EDITOR PICKS

ട്രേസിംഗ് ഷാഡോ.ഒമാനിലെ ആദ്യ പ്രദർശനത്തിൽ മികച്ച അഭിപ്രായം.

ഓണക്കാലത്ത് സംസ്ഥാനത്ത് വിലക്കയറ്റവും പൂഴ്ത്തിവയ്പ്പും തടയാനായി: കൃഷി മന്ത്രി ടി സിദ്ദിഖ്

POPULAR POSTS

ക്രിക്കറ്റ് ഉൾപ്പെടെ ഏതാനും കായിക ഇനങ്ങളിൽ മാത്രം ശ്രദ്ധ കേന്ദ്രീകരിക്കുന്ന പ്രവണത മാറണം’; പ്രധാനമന്ത്രി.

നേപ്പാൾ പ്രളയം; മരണസംഖ്യ ഉയരുന്നു, 290 ഇന്ത്യക്കാർ ഉൾപ്പെടെ 1500 പേരെക്കുറിച്ച് വിവരമില്ല

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 12 | ബുധൻ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ഓഗസ്റ്റ് 12

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************