🌹 “ഇന്നത്തെ ചിന്താവിഷയം” 🌹 – 2024 | ജൂലൈ 28 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

ജീവിക്കാൻ മറക്കന്നു പോകരുത്
—————————————————-

കഠിനാധ്വാനിയായിരുന്നു ആ ഗൃഹനാഥൻ രാവിലെ ജോലിക്കു പോകും. സ്ഥാനക്കയറ്റം കിട്ടാൻ സാധ്യതയുണ്ടായിരുന്നതിനാൽ, വൈകുന്നേരം പരീക്ഷാ പരിശീലനത്തിനു പോകും. വീട്ടിൽ സമയം ചെലവഴിക്കുന്നില്ലെന്നു ഭാര്യയും മക്കളും പരാതി പറയുമ്പോൾ, അദ്ദേഹം ചോദിക്കും: “എല്ലാം നിങ്ങൾക്കു വേണ്ടിയല്ലെ?”

കഷ്ടപ്പാടിൻ്റെ വർഷങ്ങൾ തുടർന്നു. അദ്ദേഹം ഉയർന്ന തസ്തികയിലെത്തി. വിരമിച്ചപ്പോൾ കിട്ടിയ പണം കൊണ്ട് വിദേശത്തൊരു വീടു വാങ്ങി. കുടുംബാംഗങ്ങളെയെല്ലാം അടുത്തു വിളിച്ച്, അദ്ദേഹം പറഞ്ഞു: “ഇനി മുഴുവൻ സമയവും ഞാൻ നിങ്ങളുടെ കൂടെയാണ്. നമ്മൾ നാളെ ഒരു വിദേശയാത്രയ്ക്കു പോകുകയാണ് “. അന്നു രാത്രി ഉറങ്ങാൻ കിടന്ന അദ്ദേഹം പിന്നെ ഉണർന്നതേയില്ല.

ജീവിക്കാനുള്ള വക കണ്ടെത്തുന്നതിനിടെ, ജീവിക്കാൻ മറന്നു പോകരുത്. സാമ്പാദിക്കുന്നതിനിടയിൽ, സന്തോഷിക്കാനും. ജീവിക്കാൻ വേണ്ടി സമ്പാദിക്കുന്നവരും, സമ്പാദിക്കാൻ വേണ്ടി ജീവിക്കുന്നവരും തമ്മിൽ ഏറെ അന്തരമുണ്ട്.

കഷ്ടപ്പാടിൻ്റെയും കഠിനാദ്ധ്വാനത്തിൻ്റെയും അളവ്, അതിൻ്റെ പ്രതിഫലവുമായി ബന്ധപ്പെട്ടാണിരിക്കുന്നത് അലഞ്ഞു തിരിയുന്നവർക്ക് അധിക നേട്ടങ്ങൾക്ക് അർഹതയില്ല. വീട്ടിൽ നിന്നിറങ്ങി തിരികെ വീട്ടിലെത്തുന്നതു വരെയോ, വീടിൻ്റെ ചുറ്റുമതിലിനുള്ളിലോ നടത്തുന്ന ഓട്ടപ്രദിക്ഷണങ്ങൾക്കിടയിൽ, ചില ചോദ്യങ്ങൾ സ്വയം ചോദിക്കണം: “എന്തിനു വേണ്ടിയാണ് ഈ ഓട്ടമെല്ലാം. ഓട്ടം കഴിഞ്ഞ് എന്തു ബാക്കിയുണ്ട് ?”

അദ്ധ്വാനത്തോടൊപ്പം ആസ്വാദനവുംകൂടി ചേരുമ്പോഴാണ് ജീവിതം സമ്പൂർണ്ണമാകുന്നത്. നിലവിലുള്ള കൊച്ചു സന്തോഷങ്ങൾ, വരാനിരിക്കുന്ന ഉത്സവങ്ങൾക്കു വേണ്ടി മാറ്റി വയ്ക്കരുത്. അവ വരുമോ, വരികയില്ലയോ, ആർക്കറിയാം?

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര