🌹 ചിന്താ പ്രഭാതം 🌹 – 2024 | ജൂലൈ 31 | ബുധൻ ✍ ബേബി മാത്യു അടിമാലി

ഒരു സാമൂഹിക ജീവി എന്നുള്ള നിലയിൽ ഒരോ മനുഷ്യനും അന്തസ്സോടെയും ആത്മാഭിമാനത്തോടെയും നിർഭയമായും ജീവിക്കുവാനാണ് ഒരോ സമൂഹത്തിലും കാലത്തിന് അനുസരിച്ചുള്ള നിയമങ്ങൾ ഉണ്ടാക്കിയിട്ടുള്ളത്. എന്നാൽ എല്ലാ മനുഷ്യ പ്രശ്നങ്ങളെയും നിയമനിർമ്മണങ്ങളിലൂടെ പരിഹരിക്കാൻ കഴിയുമോ?

നിയമം കൊണ്ട്‌ തിരുത്താൻ കഴിയാത്ത പലതും നന്മ കൊണ്ട്‌ തിരുത്താൻ കഴിയും . നിർബന്ധിത നിയമ വ്യവസ്ഥകളിലൂടെ എല്ലാവരെയും അനുസരിപ്പിക്കാൻ. കഴിയുമായിരിക്കും. ഏന്നാൽ വിധേയപ്പെടേണ്ടി വരുന്നവർക്ക്‌ ഒന്നിനോടും പ്രതിപത്തി ഉണ്ടാകില്ല. നിയമാനുസൃതമായി ചെയ്യുന്നതെല്ലാം സംതൃപ്തിയോടെ ചെയ്യുന്നതാവില്ല. അനുസരണക്കേട്‌ കാട്ടിയാൽ ലഭിക്കാൻ സാധ്യതയുള്ള ശിക്ഷകൾ മുൻകൂട്ടി കണ്ട്‌ കൊണ്ടുള്ള സ്വയം വഴങ്ങൽ മാത്രമാകും . ഇവിടെ ഹൃദയം കവരാൻ നിയമത്തിന്‌ സാധിക്കുന്നില്ല.

എന്നാൽ നന്മയുടെ കാര്യം നേരെ തിരിച്ചാണ്‌. . ഏവറസ്റ്റ്‌ കീഴടക്കുന്നതിനെക്കാൾ ബുദ്ധിമുട്ടാണ്‌ ഹൃദയം കീഴടക്കാൻ. ഹൃദയത്തിന്‌ നിയമങ്ങൾ ഇല്ല. മൃദുല വികാരങ്ങൾ മാത്രമേ ഉള്ളു.

തലച്ചോറിന്റെ ശാസനകൾക്ക്‌ മുന്നിൽ ഹൃദയത്തിന്റെ ആർദ്ദ്രത പരാജയപ്പെട്ടാൽ അവിടെ അവസാനിക്കും എല്ലാ ബന്ധങ്ങളും. നിയമം കൊണ്ട്‌ അനുസരിക്കേണ്ടി വരുമ്പോഴും സ്നേഹം കൊണ്ട്‌ അനുസരിക്കേണ്ടി വരുമ്പോഴും ഉളവാകുന്നത്‌ രണ്ട്‌ വികാരങ്ങൾ ആണ്‌.

ഹൃദയം കീഴടക്കിയ ആളുടെ നിർദ്ദേശങ്ങളെ എങ്ങനെയാണ്‌ തിരസ്കരിക്കാനാവുക ? ഹൃദയത്തോട്‌ ചേർത്ത്‌ നിർത്തുന്ന ആളുകളുടെ മനസ്സ്‌ എത്ര ദൂരെ നിന്നും വായിച്ചെടുക്കാനാകും. ഇതിൻ്റെ അർത്ഥം സാമൂഹിക നിയമങ്ങൾ വേണ്ടയെന്ന് അല്ല.

ഒത്തിരി ഇഷ്ടത്തോടെ……🙏

🙏 ശുഭദിനാശംസകൾ 🙏

ബേബി മാത്യു അടിമാലി✍