പ്രിയപ്പെട്ടവരേ,
ഓണം വീണ്ടും നമ്മുടെ വാതിൽക്കൽ എത്തുമ്പോൾ, മലയാളി മനസ്സിന്റെ അഞ്ചുവർഷത്തെ സ്നേഹയാത്രയിലേക്ക് ഒരു നിമിഷം തിരിഞ്ഞുനോക്കുകയാണ്.
2021 ജനുവരി ഒന്നിന് ഒരു ചെറിയ സ്വപ്നമായി ആരംഭിച്ച മലയാളി മനസ്സ് ഇന്ന് ആയിരക്കണക്കിന് വായനക്കാരുടെ സ്നേഹവും വിശ്വാസവും ഏറ്റുവാങ്ങി, ലോകത്തിന്റെ വിവിധ ഭാഗങ്ങളിലുള്ള മലയാളികളുടെ മനസ്സിൽ സ്വന്തമായൊരു ഇടം നേടിയ വലിയൊരു കുടുംബമായി വളർന്നിരിക്കുന്നു.
ഈ യാത്രയിൽ ഞങ്ങൾ നേടിയ ഏറ്റവും വലിയ സമ്പത്ത് എന്താണെന്ന് ചോദിച്ചാൽ, അതിന് ഒരേയൊരു ഉത്തരമേയുള്ളൂ—
“മലയാളി മനസ്സിനെ സ്വന്തം പത്രമായി ഏറ്റെടുത്ത നിങ്ങൾ ഓരോരുത്തരും.”
വാർത്തകൾ വായിച്ചും, അഭിപ്രായങ്ങൾ പങ്കുവച്ചും, മറ്റുള്ളവരുടെ രചനകളെ പ്രോത്സാഹിപ്പിച്ചും, ഓരോ പുതിയ ചുവടിലും ഒപ്പം നിന്നും, നിങ്ങൾ നൽകിയ സ്നേഹം ഒരിക്കലും മറക്കാനാവില്ല.
അതുപോലെ തന്നെ, മലയാളി മനസ്സിന്റെ താളുകളിൽ സ്വന്തം ഹൃദയം തുറന്നെഴുതുന്ന 50-ലധികം സ്ഥിരം എഴുത്തുകാരോട് എത്ര നന്ദി പറഞ്ഞാലും മതിയാകില്ല. അവർ എഴുതുന്നത് വെറും വാക്കുകളല്ല;
മലയാളി മനസ്സിന്റെ ഹൃദയമിടിപ്പുകളാണ്. വാർത്തകളും, രചനകളും മലയാളി മനസ്സിന്റെ വിവിധ വാട്ട്സ്ആപ്പ് ഗ്രൂപ്പുകളിൽ ഷെയർ ചെയ്തും, ആവശ്യമായ സഹായങ്ങൾ സമയാസമയങ്ങളിൽ ചെയ്തുകൊണ്ടുമിരിക്കുന്ന എല്ലാ നല്ലവരായ അഡ്മിൻസിനും, എഡിറ്റോറിയൽ അംഗങ്ങൾക്കും സ്നേഹത്തിന്റെ ഭാഷയിൽ നന്ദി.. ഒപ്പം, റിപ്പോർട്ടെഴ്സിനും, ഗ്രാഫിക് ഡിസൈനർക്കും നന്ദി.
കഥകളും കവിതകളും ലേഖനങ്ങളും യാത്രാവിവരണങ്ങളും, സിനിമയും, ആത്മീയതയും, പാചകവും, കൗതുകവും, ഓർമ്മക്കുറിപ്പുകളും, ആരോഗ്യവും, .. അങ്ങനെ വിവിധ വിഷയങ്ങളിലുള്ള സ്ഥിരം കോളങ്ങളുമായി ഓരോ ആഴ്ചയും മലയാളി മനസ്സിന്റെ വായനാലോകത്തെ സമ്പന്നമാക്കുന്ന ഓരോ എഴുത്തുകാരും ഞങ്ങളുടെ യാത്രയിലെ അമൂല്യമായ സാന്നിധ്യമാണ്.
പുതിയ എഴുത്തുകാർക്ക് അവസരം നൽകുക, അവരുടെ കഴിവുകളെ കണ്ടെത്തുക, പ്രോത്സാഹിപ്പിക്കുക, മത്സരങ്ങളിലൂടെ പ്രതിഭകളെ അംഗീകരിക്കുക—മാധ്യമ പ്രവർത്തനത്തിനപ്പുറം ഒരു സാംസ്കാരിക ഉത്തരവാദിത്വമായി ഞങ്ങൾ കാണുന്ന കാര്യങ്ങളാണിവ. ഇതോടൊപ്പം, സാമ്പത്തികമായി ബുദ്ധിമുട്ടനുഭവിക്കുന്നവരെ സഹായിക്കാനുള്ള ചാരിറ്റി പ്രവർത്തനങ്ങളിലൂടെയും സമൂഹത്തോടുള്ള ഞങ്ങളുടെ ഉത്തരവാദിത്വം നിറവേറ്റാൻ കഴിയുന്നതിൽ സന്തോഷമുണ്ട്.
വാർത്തകൾക്കപ്പുറം സാഹിത്യം, കല, സംസ്കാരം, വിനോദം, യാത്ര, ആരോഗ്യം, ആത്മീയത, സാമൂഹിക വിഷയങ്ങൾ തുടങ്ങി 15-ലധികം വിഭാഗങ്ങളിലൂടെ, 24 മണിക്കൂറും പുതുക്കപ്പെടുന്ന ഒരു സമ്പൂർണ്ണ ഓൺലൈൻ മാധ്യമമായി മലയാളി മനസ്സ് വളർന്നത് ഞങ്ങളുടേതായ നേട്ടം മാത്രമല്ല, നിങ്ങളുടെ സ്നേഹത്തിന്റെ ശക്തിയിലും കൂടിയാണ്.
നിങ്ങളുടെ ഓരോ ക്ലിക്കും ഞങ്ങൾക്ക് ഒരു പിന്തുണയായിരുന്നു;
ഓരോ അഭിപ്രായവും ഒരു പ്രചോദനമായിരുന്നു;
ഓരോ പങ്കുവെക്കലും ഒരു കരുത്തായിരുന്നു;
ഓരോ സ്നേഹവാക്കും മുന്നോട്ടുള്ള ഒരു വിളക്കായിരുന്നു.
അതുകൊണ്ടുതന്നെ ഈ ഓണം ഞങ്ങൾക്ക് ഒരു ആഘോഷം മാത്രമല്ല—
നന്ദി പറയാനുള്ള ഒരു അവസരം കൂടിയാണ്.
ഒരു മാധ്യമം വാർത്തകൾ നൽകുന്നതുകൊണ്ട് മാത്രം വലുതാകുന്നില്ല.
മനുഷ്യരോടൊപ്പം നിൽക്കുമ്പോഴാണ് അത് ഹൃദയങ്ങളിലേക്ക് എത്തുന്നത്.
അതാണ് മലയാളി മനസ്സ് എന്നും കാത്തുസൂക്ഷിക്കാൻ ആഗ്രഹിക്കുന്ന മൂല്യം.
ഈ ഓണം ഒരു നന്ദിയുടെ ഓണം കൂടിയാണ്.
എന്റെ സഹപ്രവർത്തകരോട്…
എഴുത്തുകാരോട്…
വായനക്കാരോട്…
അഭ്യുദയകാംക്ഷികളോട്…
ഞങ്ങളെ വിശ്വസിച്ച് കൂടെ നിൽക്കുന്ന ഓരോരുത്തരോടും…
ഹൃദയത്തിന്റെ ഭാഷയിൽ ഒരായിരം നന്ദി. 🙏
പൂക്കളത്തിലെ ഓരോ പൂവിനും അതിന്റേതായ നിറവും സൗന്ദര്യവുമുണ്ട്.
അതുപോലെ, മലയാളി മനസ്സിന്റെ പൂക്കളത്തിലെ ഓരോ പൂവും നിങ്ങൾ ഓരോരുത്തരാണ്.
ആ പൂക്കളാണ് മലയാളി മനസ്സിന്റെ സൗന്ദര്യം.
ആ കൂട്ടായ്മയാണ് ഞങ്ങളുടെ ശക്തി.
ആ സ്നേഹമാണ് ഞങ്ങളുടെ ഊർജം.
ആ വിശ്വാസമാണ് ഞങ്ങളുടെ മുന്നോട്ടുള്ള വഴി.
അഞ്ചുവർഷങ്ങൾ പിന്നിട്ടു…
ഓർമ്മകൾ ഒരുപാട്, സ്നേഹം അതിലേറെ.
ഇനി വരാനിരിക്കുന്ന വർഷങ്ങൾ—
കൂടുതൽ നല്ല വാർത്തകളുടെയും നല്ല എഴുത്തുകളുടെയും നല്ല പ്രവർത്തനങ്ങളുടെയും വർഷങ്ങളാകട്ടെ.
ഈ ഓണം ഓരോ കുടുംബത്തിനും സ്നേഹവും സമാധാനവും സന്തോഷവും ആരോഗ്യവും ഐശ്വര്യവും നിറഞ്ഞതാകട്ടെ.
നമ്മുടെ ബന്ധങ്ങൾ കൂടുതൽ ശക്തമാകട്ടെ.
നന്മയുടെ പൂക്കൾ ഓരോ മനസ്സിലും വിരിയട്ടെ.
അകലെയാണെങ്കിലും മനസ്സുകൊണ്ട് നമ്മൾ കൂടുതൽ അടുത്താകട്ടെ.
പുതിയ പ്രതീക്ഷകളോടെ, പുതിയ സ്വപ്നങ്ങളോടെ, നമുക്ക് ഒരുമിച്ച് മുന്നോട്ട് പോകാം.
മലയാളി മനസ്സിന്റെ കുടുംബത്തിലെ ഓരോരുത്തർക്കും എന്റെ ഹൃദയം നിറഞ്ഞ ഓണാശംസകൾ!
സ്നേഹപൂർവ്വം,
ഓണാശംസകൾ
മലയാളി മനസ്സിലെ പുതിയ ഒരംഗമായ എനിക്ക്, സാറിന്റെ ഈ എഴുത്തിലൂടെയും അഞ്ചാം വാർഷികത്തിന്റെ part 1 കണ്ടതിലൂടെയും എത്ര വിപുലമാണ് ഈ പത്രത്തിന്റെ പ്രവർത്തനങ്ങൾ എന്നു മനസ്സിലാക്കാൻ കഴിഞ്ഞു. ഈ പത്രത്തിൽ വരുന്ന ഓരോ പങ്ക്തിയും വളരെ വിലപ്പെട്ടതാണ്. ഇത്രയും ശക്തരായ എഴുത്തുക്കരുടെ ഒരു കൂട്ടയ്മയിൽ അംഗമാകാൻ കഴിഞ്ഞത് ഭാഗ്യമായി കരുതുന്നു. ഇനിയും വളരെ നല്ല പ്രവർത്തനങ്ങൾ കാഴ്ച വെക്കാൻ സാറിന്റെ കരങ്ങൾക്ക് ശക്തിയുണ്ടാകട്ടെ എന്ന് ജഗദീശ്വരനോട് പ്രാർത്ഥിക്കുന്നു. മലയാളി മനസ്സിലെ എല്ലാ കുടുംബങ്ങൾക്കും സ്നേഹപൂർവ്വം ഓണാശംസകൾ നേരുന്നു.
ഈ ഓണം എഴുത്തുകാർക്കായി മാറ്റിവെച്ച സ്നേഹത്തിന്റെ ഓണക്കോടി പോലെ… ❤️
എഴുത്തുകാരുടെ വാക്കുകളെ ചേർത്തുപിടിക്കുന്ന ഒരു ചീഫ് എഡിറ്ററുടെ മനസ്സിൽ നിന്നുള്ള ഈ സ്നേഹത്തിന് പകരം വയ്ക്കാൻ മറ്റൊരു സമ്മാനമില്ല.
മലയാളി മനസ്സിന്റെ ഈ സ്നേഹവും കൂട്ടായ്മയും ഇനിയും ഒരുപാട് വർഷങ്ങൾ പൂത്തുലയട്ടെ.
ഹൃദയം നിറഞ്ഞ ഓണാശംസകൾ… 🌸🌼
എല്ലാത്തിനും നന്ദി 🙏മലയാളി മനസ്സ് മലയാളികളുടെ മനസ്സിൽ എന്നെന്നും നിലനിൽക്കട്ടെ 🙏സ്നേഹത്തോടെ ഒത്തൊരുമ യോടെ മുന്നോട്ട്…. മുന്നോട്ട്…… മുന്നോട്ട്…… ഏവർക്കും സന്തോഷം സമാധാനം നല്ല ആരോഗ്യം നിറഞ്ഞ ഓണാശംസകൾ 😍🌸
ഹൃദ്യമായ വാക്കുകളിലൂടെ ഹൃദയത്തിലേക്ക് കടന്നു വരുന്ന ഞങ്ങളുടെ ചീഫ് എഡിറ്റർ ശ്രീ. രാജു ശങ്കരത്തിൽ സാറിനോട് ഉള്ള സ്നേഹവും നന്ദിയും നിസ്സീമമാണ്🙏 ആറാം വർഷത്തിൻ്റെ നിറവിലൂടെ യാത്ര ചെയ്യുന്ന നമ്മുടെ മലയാളി മനസ്സ് ന് സമ്പത് സമൃദ്ധമായ ഐശ്വര്യപൂർണ്ണമായ മുന്നേറ്റം എന്നും ഉണ്ടാവട്ടെ എന്ന് നിറഞ്ഞ സ്നേഹത്തോടെ ആശംസിക്കുന്നു💐🙏❤️🥰 സാർ നല്കിയ ഊഷ്മളമായ ഓനാശംസകൾക്ക് എൻ്റെ സ്നേഹാദരം🙏❤️🙏🥰
കൂട്ടായ്മയുടെ വിജയം…
സാറിന്റെ നേതൃത്വത്തിൽ എല്ലാവരെയും ചേർത്തു പിടിക്കൽ…
ഇതാണ് സ്നേഹം..
ഇനിയും ഉയരങ്ങളിലേക്ക് മലയാളി മനസ്സ് കുതിക്കും….
കൂട്ടായ്മയുടെ പേര് തന്നെയാണല്ലോ ഓണം
കുടുംബത്തിലെ എല്ലാവർക്കും ഓണാശംസകൾ