🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് | 06 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

സൗഹൃദം ബാദ്ധ്യതയല്ല, സാദ്ധ്യതയാകണം
—————————————————————–

മുല്ല നസിറുദ്ദീൻ്റെ സുഹൃത്ത് ഏറെ നാളുകൾക്കു ശേഷം അദ്ദേഹത്തെ കാണാനെത്തി. ഏറെ സന്തോഷം തോന്നിയ മുല്ല, തൻ്റെ വീട്ടിലുണ്ടായിരുന്ന താറാവിനെ കൊന്നു സൂപ്പുണ്ടാക്കി കൂട്ടുകാരനെ സൽക്കരിച്ചു. വൈകുന്നേരം അദ്ദേഹം തിരികെ പോകുകയും ചെയ്തു.

പിറ്റേ ദിവസം രാവിലെ ഒരാളെത്തി മുല്ലായോടു പറഞ്ഞു: “ഞാൻ ഇന്നലെ വന്ന സുഹൃത്തിൻ്റെ സുഹൃത്താണ് ”. മുല്ല അയാൾക്കും സുപ്പു നൽകി. പിന്നീടുള്ള ഓരോ ദിവസവും സുഹൃത്തിൻ്റെ സുഹൃത്തുക്കളും, അവരുടെ സുഹൃത്തുക്കളും വന്നു കൊണ്ടിരുന്നു. സൂപ്പു വയ്ക്കാൻ വേറേ താറാവുകളെ വാങ്ങേണ്ടി വന്നു മുല്ലയ്ക്കു്.
ഒരു മാസം കഴിഞ്ഞും പഴയ സുഹൃത്തിൻ്റെ ഏതോ ഒരു സുഹൃത്തു വന്നു. മുല്ല അയാൾക്ക് ഒരു പാത്രം ചൂടു വെള്ളം കൊടുത്തു. ദേഷ്യം വന്ന അയാൾ ചോദിച്ചു: “ഇതു സൂപ്പല്ലല്ലോ?” മുല്ല പറഞ്ഞു: ” ഇത് = അന്നുണ്ടാക്കിയ സൂപ്പിൻ്റെ, സൂപ്പിൻ്റെ സൂപ്പാണ് “.

ദാനം നൽകുന്നവൻ്റെ അപദാനങ്ങൾ നാടെങ്ങും വ്യാപിക്കും. അപ്പോൾ, അനർഹർ വരെ ദാനമന്വേഷിച്ച് എത്തി എന്നും വരാം. അർഹതപ്പെട്ടത് അളന്നു വാങ്ങുന്നതിൽ തെറ്റില്ല. പക്ഷെ, കണക്കു പറഞ്ഞു ദാനങ്ങൾ പിടിച്ചുപറ്റാൻ നോക്കരുത്.

സൗഹൃദം ഒരു സാദ്ധ്യതയാണ് — പുതിയ സൗഹൃദങ്ങൾ നേടാനും നിലനിർത്താനുമുള്ള സാദ്ധ്യത. എന്നാൽ, അതൊരു ബാദ്ധ്യതയായി മാറരുത്. സുഹൃത്തിലൂടെ സാധിച്ചെടുക്കാനാകാത്ത കാര്യങ്ങളെക്കുറിച്ചുള്ള ആവലാതികളും,
അളന്നുതുക്കി ദാനങ്ങൾ നൽകാഞ്ഞതിനെക്കുറിച്ചുള്ള പരിഭവങ്ങളും, സൗഹൃദങ്ങളെ അനാകർഷമാക്കും. പ്രയോജനപ്രദം, ഉപയോഗപ്രദം എന്നീ വിശേഷണങ്ങൾ ഒരിക്കലും സൗഹൃദങ്ങൾക്കു ചാർത്തിക്കൊടുക്കരുതു്. അപ്പാൾ മാത്രമേ, സൗഹൃദങ്ങൾ ബാദ്ധ്യതയാകാതെ, സാദ്ധ്യതയായി നിലനിൽക്കൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര