🌹 “ഇന്നത്തെ ചിന്താവിഷയം” 🌹 – 2024 | മെയ് 29 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

നിലനില്പിൻ്റെ ഇടം നില നിർത്താൻ ആകണം

ഒരു വാനനിരീക്ഷകൻ ദിവസവും ആകാശത്തു നോക്കി, നക്ഷത്രങ്ങളേക്കുറിച്ചു പഠിച്ച് കണ്ടെത്തലുകൾ എഴുതി വന്നിരുന്നു. ഒരു ദിവസം, തൻ്റെ പതിവു വാന നിരീക്ഷണത്തിനിടെ, കാൽതെറ്റി അദ്ദേഹം കുഴിയിൽ വീണു. നിലവിളി കേട്ടെത്തിയ വഴിപോക്കൻ അദ്ദേഹത്തെ പിടിച്ചു കയറ്റിയിട്ടു ചോദിച്ചു: “താങ്കൾ എങ്ങനെയാണു കുഴിയിൽ വീണത്?” “ഞാൻ വാനനിരീക്ഷണത്തിൽ മുഴുകിയിരുന്നതിനാൽ, കുഴി കണ്ടേതേയില്ല”, അയാൾ പറഞ്ഞു. കുറച്ചു ദേഷ്യത്തോടെ വഴിപോക്കൻ ചോദിച്ചു: “സ്വന്തം കാൽച്ചുവട്ടിലെ കാര്യങ്ങൾ കാണാത്ത താങ്കൾ, എങ്ങനെയാണു നക്ഷത്രങ്ങളെക്കുറിച്ചുള്ള കാര്യങ്ങൾ കണ്ടെത്തുന്നത്?” അന്നു മുതൽ അയാൾ, തൻ്റെ ചുവടുവയ്പുകളും ശ്രദ്ധിക്കാൻ തുടങ്ങി. വേരുകളെ മറന്നിട്ട് ശിഖരങ്ങൾക്കു നിലനില്ക്കാൻ ആകില്ല. തങ്ങളുടെ പ്രാഥമിക സഞ്ചാരവഴികളെ സുരക്ഷിതമാക്കിയിട്ടുവേണം, ഓരോരുത്തരും മുമ്പോട്ടു ഗമിക്കാൻ. ഒരിക്കൽ തിരിച്ചെത്തേണ്ടതുണ്ട്. അപ്പോൾ നിൽക്കാനും, നിലനിൽക്കാനും, ഒരിടം ആവശ്യമാണ്. അടിസ്ഥാന തലങ്ങളെ അവഗണിച്ചു മുമ്പോട്ടു പോകുന്നത് അവിവേകത്തിൻ്റെയും അഹങ്കാരത്തിൻ്റെയും, അകമ്പടിയോടെ ആയിരിക്കും. അതിരറ്റ സ്വപ്നങ്ങൾ കാണുന്നതിലോ, അവയെ പിന്തുടരുന്നതിലോ തെറ്റില്ല. പക്ഷെ, അപായ സാദ്ധ്യതകൾ കാണാനും, മുൻകരുതലുകൾ എടുക്കാനുമുള്ള ബാദ്ധ്യത മറന്നു പോകരുത്. എല്ലാ യാത്രയ്കളും പുറത്തേക്കു മാത്രമാകുമ്പോൾ, ആത്മാംശം നഷ്ടപ്പെടാതെ നോക്കണം. ഓരോ അന്വേഷണവും ആത്മാവിഷ്ക്കാരം കൂടിയാകണം; ഓരോ ബാഹ്യ പര്യടനവും, ആന്തരിക പ്രയാണത്തിൻ്റെ മറുപുറവും.

എത്ര വലുതായാലും, ഒരാൾ ശ്രദ്ധിക്കേണ്ട ചെറിയ കാര്യങ്ങളുണ്ടാകും; മറക്കരുതാത്ത ആളുകളും വഴികളും. അടിസ്ഥാന കർമ്മങ്ങളെയും, ആത്മബന്ധങ്ങളെയും മറന്നുള്ള തേരോട്ടങ്ങൾക്കു നിലനില്പുണ്ടാകില്ല. കാറ്റിനോടുള്ള പ്രണയം മൂലം നൂലുമായുള്ള ബന്ധം ഉപേക്ഷിച്ചാൽ പട്ടം താനേ നിലംപതിക്കും. കാൽച്ചുവട്ടിലെ മണ്ണു ചോർന്നു പോകുന്നതറിയാത്തവർക്ക് ആകാശത്തിലെ നക്ഷത്രങ്ങൾ അകന്നു പോകുന്നതു കണ്ടത്താൻ ആകില്ല.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍