📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 18 | ചൊവ്വ ✍️ കപിൽ ശങ്കർ

🔹നിയമസഭയില്‍ വനിതാ എംഎല്‍എമാരെ കൈയേറ്റം ചെയ്‌തെന്ന് ആരോപിച്ച് യുഡിഎഫ് എംഎല്‍എമാര്‍ക്കെതിരെ നല്‍കിയ പരാതിയിലെ അവസാന കേസും ഹൈക്കോടതി റദ്ദാക്കി. യുഡിഎഫ് എംഎല്‍എമാരായിരുന്ന ശിവദാസന്‍ നായര്‍, ഡൊമനിക് പ്രസന്റേഷന്‍, എംഎ വാഹിദ്, എടി ജോര്‍ജ് എന്നിവര്‍ക്കെതിരേ സിപിഐയുടെ ഗീതാഗോപി എംഎല്‍എ നല്‍കിയ കേസാണു തള്ളിയത്. എല്‍ഡിഎഫ് എംഎല്‍എമാര്‍ നിയമസഭാ ഹാള്‍ തല്ലിത്തകര്‍ക്കുകയും കൈയാങ്കളി നടത്തുകയും ചെയ്തെന്ന കേസ് അട്ടിമറിക്കാന്‍ നല്‍കിയ കേസാണ് തള്ളിയത്. ഇതോടെ നിയമസഭ തല്ലിത്തകര്‍ക്കല്‍ കേസിന്റെ നടപടികള്‍ സിജെഎം കോടതിയില്‍ തുടരും.

🔹ലോകത്തിലേക്ക് കേരളത്തിന്റെ വികസന കവാടം തുറന്നെന്ന് മുഖ്യമന്ത്രി വി.ഡി. സതീശന്‍. അമേരിക്കയിലേക്കും യൂറോപ്പിലേക്കുമടക്കം 107 രാജ്യങ്ങളിലേക്ക് സര്‍വീസുള്ള വിഴിഞ്ഞം രാജ്യാന്തര തുറമുഖത്തെ എക്സിം പ്രവര്‍ത്തനങ്ങളുടെ ഉദ്ഘാടനം ഇന്നു രാവിലെ 10.45ന് മുഖ്യമന്ത്രി വി ഡി സതീശന്‍ നിര്‍വഹിച്ചു.ബിജെപിയും ഇടതുനേതാക്കളും ചടങ്ങ് ബഹിഷ്‌കരിച്ചു. മുഖ്യാതിഥിയായ കേന്ദ്ര തുറമുഖ മന്ത്രി സര്‍ബാനന്ദ് സോനോവാളും തിരുവനന്തപുരം മേയര്‍ വി.വി. രാജേഷും ചടങ്ങില്‍ പങ്കെടുത്തില്ല.

🔹മാസപ്പടി കേസില്‍ എന്‍ഫോഴ്സ്മെന്റിന്റെ അന്വേഷണം മുഹമ്മദ് റിയാസിന്റെ സുഹൃത്തുക്കളിലേക്കും. സിപിഎം കോഴിക്കോട് ജില്ലാ കമ്മിറ്റി അംഗവും സൊലൈസ് കമ്പനി ഉടമയുമായ നിഖിലിന്റെയും റിയാസിന്റെ അടുത്ത സുഹൃത്ത് ഡിടിപിസി ഡെസ്റ്റിനേഷന്‍ കോഓര്‍ഡിനേറ്റര്‍ നന്ദുലാലിന്റെയും ഫ്ളാറ്റുകളില്‍ അടക്കം എട്ടിടത്ത് റെയ്ഡ്. ഷൈജല്‍, ഫൈജാസ് എന്നിവരുടെ വീടുകളിലും ഇഡി പരിശോധന നടത്തുന്നുണ്ട്. റിയാസാണ് ഇഡിയുടെ ലക്ഷ്യമെന്നാണു റിപ്പോര്‍ട്ട്.

🔹സംസ്ഥാനത്തിന്റെ പേര് ഔദ്യോഗികമായി ‘കേരളം’ എന്നു മാറ്റുന്നതിനുള്ള ബില്ലിന് രാഷ്ട്രപതി ദ്രൗപദി മുര്‍മു അംഗീകാരം നല്‍കി. പാര്‍ലമെന്റിന്റെ ഇരുസഭകളും നേരത്തെ ബില്‍ പാസാക്കിയിരുന്നു. രാഷ്ട്രപതിയുടെ അനുമതി ലഭിച്ചതോടെ ഇനി മുതല്‍ എല്ലാ ഔദ്യോഗിക രേഖകളിലും സംസ്ഥാനത്തിന്റെ പേര് ‘കേരളം’ എന്നാകും രേഖപ്പെടുത്തുക.

🔹എല്‍ഡിഎഫ് ഭരണകാലത്ത് പിഎസ് സി നിയമനത്തിനായി നടത്തിയ ആസൂത്രണബോര്‍ഡ് പരീക്ഷാ ക്രമക്കേടുമായി ബന്ധപ്പെട്ട് ക്രൈംബ്രാഞ്ച് പിഎസ്സി ഓഫീസില്‍ റെയ്ഡ് നടത്തി. പരീക്ഷയുമായി ബന്ധപ്പെട്ട രേഖകള്‍ പിടിച്ചെടുത്തു. രണ്ടു സംഘങ്ങളായാണ് പരിശോധന നടത്തിയത്. പരീക്ഷ ഡേറ്റകള്‍ പിഎസ്സി കമ്പ്യൂട്ടറില്‍ നിന്നും പൊലിസ് ശേഖരിച്ചു. അടുത്ത ആഴ്ച ഉദ്യോഗസ്ഥരെ ചോദ്യം ചെയ്യും. പരീക്ഷയില്‍ 58 മാര്‍ക്കിന്റെ 10 ചോദ്യങ്ങള്‍ ഒഴിവാക്കിയതോടെയാണ് ഉദ്യോഗാര്‍ത്ഥികള്‍ പരാതിയുമായി രംഗത്തു വന്നത്.

🔹വിമാന സമാനമായ സൗകര്യങ്ങളുമായി കെ.എസ്.ആര്‍.ടി.സി.യുടെ എക്‌സിക്യുട്ടീവ് ക്ലാസ് ബസ് തിരുവനന്തപുരം -എറണാകുളം പാതയില്‍ വ്യാഴാഴ്ച ഓടിത്തുടങ്ങും. 671 രൂപയാണ് ടിക്കറ്റ് നിരക്ക്. യാത്രാസമയം 4.15 മണിക്കൂര്‍. തിരുവനന്തപുരത്തുനിന്ന് രാവിലെ 5.30-ന് പുറപ്പെട്ട് 9.45-ന് എറണാകുളത്തെത്തും. എറണാകുളത്തുനിന്ന് വൈകീട്ട് 5.30-ന് പുറപ്പെട്ട് രാത്രി 9.45-ന് തലസ്ഥാനത്തെത്തും. വന്ദേഭാരതില്‍ ചെയര്‍കാറിന് 690 രൂപയാണ് ടിക്കറ്റ്‌നിരക്ക്.

🔹തൃശൂരിലെ പുലിക്കളി സംഘങ്ങള്‍ക്ക് പ്രഖ്യാപിച്ചിരുന്ന ധനസഹായം വൈകിപ്പിച്ചത് മുന്‍ ടൂറിസം സെക്രട്ടറിയും മുന്‍ കളക്ടറുമാണെന്ന് കേന്ദ്രമന്ത്രി സുരേഷ് ഗോപി. പുലിക്കളി സംഘങ്ങള്‍ക്കുള്ള ധനസഹായം കൈമാറുന്ന ചടങ്ങിലാണ് വിമര്‍ശനം. ചെയ്യാത്ത തെറ്റിന് രാഷ്ട്രീയത്തിന്റെ പേരില്‍ അധമപ്രവര്‍ത്തനം നടത്തി. മോദിയുടെയും അമിത്ഷായുടെയും സുരേഷ് ഗോപിയുടെയും വീട്ടില്‍ നിന്നല്ല പണം കൊടുക്കുന്നത്. ഇന്ത്യയുടെ ഖജനാവില്‍നിന്നാണ് കൊടുക്കുന്നത്. സുരേഷ് ഗോപി പറഞ്ഞു.

🔹റോഡപകടങ്ങള്‍ കുറയ്ക്കാനുള്ള കേരള പോലീസിന്റെ എ ഐ ട്രാക്ക് ഉള്‍പ്പെടെ മൂന്ന് പദ്ധതികള്‍ ആഭ്യന്തരമന്ത്രി രമേശ് ചെന്നിത്തല ഉദ്ഘാടനം ചെയ്തു. എ ഐ ട്രാക്ക് വഴി റോഡിലെ വിവരങ്ങള്‍ മുന്‍കൂട്ടി ആളുകളെ അറിയിക്കാനാകും. സൈബര്‍ കുറ്റകൃത്യങ്ങള്‍ തടയാനുള്ള സൈബര്‍ വാള്‍ പദ്ധതിയും ആഭ്യന്തരമന്ത്രി ഉദ്ഘാടനം ചെയ്തു.

🔹കരുവാറ്റയില്‍ വയോധികനെ കൊലപ്പെടുത്തി സ്വര്‍ണവും പണവും കവര്‍ന്ന കേസില്‍ എട്ടാം ക്ലാസുകാരിയായ പേരക്കുട്ടിയും മൂന്ന് സുഹൃത്തുക്കളും പൊലീസ് കസ്റ്റഡിയില്‍. നാലു പ്രതികളും പ്രായപൂര്‍ത്തിയാകാത്തവരാണ്. പതിമൂന്നുകാരിയായ പേരക്കുട്ടിയുടെ ക്വട്ടേഷനിലാണ് കൊലപാതകമെന്നാണു പൊലീസ് പറയുന്നത്. കരുവാറ്റയില്‍ വാടകയ്ക്ക് താമസിക്കുന്ന കൊല്ലം പരവൂര്‍ നെടുങ്ങോലം കൊച്ചാലും കൂട് സരസ്വതി നിവാസില്‍ ശിവന്‍കുട്ടി ചെട്ടിയാര്‍ (65) ആണ് കൊല്ലപ്പെട്ടത്. പെണ്‍കുട്ടിക്ക് ഐഫോണും ആണ്‍കുട്ടികള്‍ക്ക് ബൈക്കും വാങ്ങാനായിരുന്നു സ്വര്‍ണവും പണവും കവര്‍ന്നതെന്ന് പോലീസ്.

🔹ശബരിമലയിലെ മില്‍മ നെയ്യ് വിതരണ ക്രമക്കേടില്‍ പഴുതടച്ച അന്വേഷണം വേണമെന്ന് ഹൈക്കോടതി എസ്പി എം ജെ സോജന് നിര്‍ദേശം നല്‍കി. കേസില്‍ മില്‍മ തിരുവനന്തപുരം, പത്തനംതിട്ട മേഖലകളിലെ ഓഫീസില്‍ നിന്ന് രേഖകള്‍ കസ്റ്റഡിയിലെടുത്തെന്നും സാക്ഷികളെ ചോദ്യം ചെയ്തെന്നും എസ്പി എം ജെ സോജന്‍ കോടതിയെ അറിയിച്ചു.

🔹തെരഞ്ഞെടുപ്പിന് മുമ്പ് മുന്‍ സര്‍ക്കാര്‍ സംഘടിപ്പിച്ച നവകേരള സര്‍വേയില്‍ കെഎസ്എഫ്ഇയ്ക്കും നഷ്ടം. സര്‍വേയ്ക്ക് ഇറങ്ങിയ സന്നദ്ധ പ്രവര്‍ത്തകര്‍ക്ക് ബുക്കും പേനയും നല്‍കാനുള്ള ചെലവിനായി 46 ലക്ഷം രൂപ കെഎസ്എഫ്ഇ കുടുംബശ്രീക്ക് നല്‍കിയെന്നാണ് വിവരാവകാശ രേഖ.

🔹എന്‍എസ്എസ് ജനറല്‍ സെക്രട്ടറി സുകുമാരന്‍ നായര്‍ കേരളത്തിന്റെ സ്വത്താണെന്ന് ചാണ്ടി ഉമ്മന്‍ എംഎല്‍എ. അദ്ദേഹത്തെ അപമാനിക്കാന്‍ നീചമായ ശ്രമം നടക്കുന്നുവെന്നും ഗണേഷ്‌കുമാറിന്റെ പേരു പരാമര്‍ശിക്കാതെ ചാണ്ടി ഉമ്മന്‍ പറഞ്ഞു.

🔹വിദ്യാര്‍ത്ഥികള്‍ കുറഞ്ഞതിനാല്‍ സംസ്ഥാനത്ത് ഈ വര്‍ഷം 850 ഗവണ്‍മെന്റ് സ്‌കൂളുകളിലെ എല്‍പി, യുപി തസ്തികകള്‍ നഷ്ടപ്പെടുമെന്ന് പൊതുവിദ്യാഭ്യാസ വകപ്പു ഡയറക്ടറുടെ റിപ്പോര്‍ട്ട്. ഹൈസ്‌കൂളുകളിലെ കണക്കെടുപ്പ് ആരംഭിച്ചിട്ടുണ്ട്.

🔹നിതിന്‍ രാജിന്റെ മരണത്തില്‍ ഡോ. റാമിന്റെ അറസ്റ്റില്‍ വീഴ്ച വരുത്തിയതിന് അന്വേഷണ ഉദ്യോഗസ്ഥന്‍ ഡിവൈഎസ്പി സുധീര്‍ കല്ലെനെ സസ്‌പെന്‍ഡ് ചെയ്യാത്തത് എന്തുകൊണ്ടാണെന്ന് ഹൈക്കോടതി. ഇത് ആഭ്യന്തര വകുപ്പിന്റെ പരാജയമാണ്. സവര്‍ക്കറിനെ കുറിച്ച് ചോദ്യം തയ്യാറാക്കിയ അധ്യാപകനെ സസ്‌പെന്‍ഡ് ചെയ്തു,. തിരുവനന്തപുരം കോര്‍പ്പറേഷനില്‍ കത്ത് നല്‍കിയ ഉദ്യോഗസ്ഥയെ സസ്‌പെന്‍ഡ് ചെയ്തു. വിജിലന്‍സില്‍ പരാതി നില്‍ക്കെ എഡിജിപിയെ ഡിജിപിയാക്കിയെന്നും കോടതി സര്‍ക്കാര്‍ നയത്തെ വിമര്‍ശിച്ചു.

🔹നിയന്ത്രണം വിട്ട ബൈക്കില്‍നിന്ന് തെറിച്ചുവീണ് സുഹൃത്ത് ഓടിച്ചിരുന്ന ടിപ്പര്‍ ലോറി കയറി ടിപ്പര്‍ ഡ്രൈവര്‍ മരിച്ചു. കല്ലറ മരുതമണ്‍ കാവ്വിള വീട്ടില്‍ അനില്‍ കുമാറിന്റെയും ലളിതയുടെയും മകനും ടിപ്പര്‍ ഡ്രൈവറുമായ അരുണ്‍ കുമാറാണ് (31) മരിച്ചത്.

🔹കായംകുളം കായലില്‍ മത്സ്യബന്ധനത്തിനിടെ വള്ളം മറിഞ്ഞ് കായലില്‍ വീണ് തൊഴിലാളിക്ക് ദാരുണാന്ത്യം. ആറാട്ടുപുഴ വലിയഴീക്കല്‍ ശ്രീമന്ദിരത്തില്‍ പ്രദീപ് (58) ആണ് മരിച്ചത്.

🔹നാലു വയസുള്ള മകനും 34കാരനുമായ അച്ഛനും വീട്ടില്‍ മരിച്ച സംഭവത്തില്‍ ഭാര്യ അറസ്റ്റിലായി. നോര്‍ത്ത് ബെംഗളൂരുവിലെ ചിക്കഭവനയിലെ വീട്ടില്‍ 34കാരനായ അഭിനന്ദനും മകനുമാണു മരിച്ചത്. അഭിനന്ദന്റെ ഭാര്യയായ ഹരിണിയെ കാണാതായിരുന്നു. പിന്നീട് ഇവരെ പിടികൂടി ചോദ്യം ചെയ്തപ്പോഴാണ് കുടുംബവഴക്കിനിടെ കൊലപാതകം നടത്തിയെന്നു സമ്മതിച്ചതെന്നു പോലീസ് പറഞ്ഞു.

🔹മെസിയുടെ പേരില്‍ തട്ടിപ്പ് നടത്തിയ സംഭവത്തില്‍ ജി എസ് റ്റി കമ്മീഷണര്‍ ശ്രീവത്സ, ജോയിന്റ് കമ്മീഷണര്‍ സജിത്, ഡെപ്യൂട്ടി കമ്മീഷണര്‍ സജിനി എന്നിവര്‍ക്ക് ചാര്‍ജ് മെമ്മോ അയച്ചു. കാഞ്ഞങ്ങാട് ഓഫീസിലെ ഇന്റലിജന്‍സ് ഓഫീസര്‍ക്ക് ഉള്‍പ്പെടെ മെമ്മോ ലഭിച്ചു. ജിഎസ്ടി ഈടാക്കുന്നതില്‍ വീഴ്ച്ച വരുത്തിയതിനാണ് നീക്കം. പ്രാഥമിക പരിശോധനയില്‍ എസ്.ഐ.ടി ജി.എസ്.ടി വെട്ടിപ്പ് സ്ഥിരീകരിച്ചെന്നാണ് വിവരം.

🔹സര്‍ക്കാര്‍ ആശുപത്രികളിലെ ഡോക്ടര്‍മാരുടെ വിവരങ്ങള്‍ പൊതുജനങ്ങള്‍ക്ക് അറിയാന്‍ പ്രദര്‍ശിപ്പിക്കണമെന്ന് ആരോഗ്യ മന്ത്രി കെ മുരളീധരന്‍ നിര്‍ദ്ദേശം നല്‍കി. ഡോക്ടര്‍മാരുടെ പേരും ഒ.പി ദിവസവും സമയവും കൃത്യമായി പ്രദര്‍ശിപ്പിക്കണമെന്നാണു നിര്‍ദേശം.

🔹അടിമാലി മണ്ണിടിച്ചില്‍ ദുരന്തബാധിതരായ 14 കുടുംബങ്ങള്‍ക്ക് 10 ലക്ഷം രൂപ വീതം സര്‍ക്കാര്‍ നഷ്ടപരിഹാരം പ്രഖ്യാപിച്ചു. ഓണത്തിനു മുമ്പ് മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് തുക നല്‍കാന്‍ ധാരണയായി. നഷ്ടപരിഹാര പാക്കേജില്‍നിന്ന് പുറത്തായതിനാല്‍ ഒരുമാസത്തോളമായി ദുരന്തബാധിതര്‍ സമരത്തിലായിരുന്നു.

🔹പ്രതിപക്ഷ നേതാവ് പിണറായി വിജയന്‍റെ മകൾ വീണാ വിജയൻ പ്രതിയായ മാസപ്പടി കേസിൽ അന്വേഷണം കൂടുതൽ ശക്തമാക്കി എൻഫോഴ്‌സ്‌മെന്‍റ് ഡയറക്ടറേറ്റ്. കോഴിക്കോട് ഉൾപ്പെടെ എട്ടിടങ്ങളിലാണ് ഇഡി ഇന്ന് വ്യാപക പരിശോധന നടത്തുന്നത്. കേസിൽ ഇഡി നടത്തുന്ന മൂന്നാമത്തെ വലിയ പരിശോധനയാണിത്.

🔹കിടപ്പറ ദൃശ്യങ്ങൾ അശ്ലീല വെബ്സൈറ്റുകൾക്ക് വിറ്റതായി ഭർത്താവിനെതിരെ യുവതിയുടെ പരാതി. തനിക്ക് കാണാനെന്ന വ്യാജേനയാണ് ഭർത്താവ് ദൃശ്യങ്ങൾ പകർത്തിയത്. പിന്നീട് ഈ ദൃശ്യങ്ങൾ സൈറ്റുകൾക്ക് വിൽക്കുകയായിരുന്നു.
ഫോൺ സംഭാഷണങ്ങൾ ഉൾപ്പെടെയുള്ള ശക്തമായ തെളിവുകൾ സഹിതമാണ് കൊല്ലം സ്വദേശിയായ യുവതി പോലീസിൽ പരാതി നൽകിയിട്ടുള്ളത്. ക്രൂരമർദനത്തിന് ഇരയായ യുവതി നിലവിൽ ആശുപത്രിയിൽ ചികിത്സയിലാണ്. സംഭവത്തിൽ പോലീസ് അന്വേഷണം ഊർജിതമാക്കിയിട്ടുണ്ട്.

🔹തിരുവനന്തപുരം ബീമാപള്ളിയിൽ ഓപറേഷൻ തൂഫാന്‍റെ ഭാഗമായ പരിശോധനയിൽ രണ്ട് ലക്ഷം രൂപയുടെ നിരോധിത പുകയില ഉത്പന്നങ്ങൾ പിടിച്ചെടുത്തു. സംഭവത്തിൽ രണ്ട് പേർ പിടിയിലായി. ബീമാപള്ളി സ്വദേശി മാഹീൻകണ്ണ്(42), ബീമാപള്ളി മിൽക്ക് കോളനി സ്വദേശി നസീർ(51) എന്നിവരാണ് പിടിയിലായത്.

🔹കുട്ടിക്കര്‍ഷകന്‍ ആലപ്പുഴ അരീപ്പറമ്പ് സ്വദേശി ആദിത്യന് വീടു നിര്‍മിച്ചു നല്‍കുമെന്ന് കൃഷി മന്ത്രി ടി. സിദ്ധിഖ്. ആറാം ക്ലാസുകാരന്‍ ആദിത്യന്റെ കൃഷി മികവിനെകുറിച്ചും ഒറ്റമുറി ഷെഡിലെ ജീവിതത്തെക്കുറിച്ചും അറിഞ്ഞാണ് ഇടപെടല്‍. എറണാകുളത്ത് മുഖ്യമന്ത്രി ഉദ്ഘാടനം ചെയ്ത കാര്‍ഷിക ദിനാഘോഷ ചടങ്ങിലാണ് അവാര്‍ഡ് ദാനവും, വീട് പ്രഖ്യാപനവും നടത്തിയത്.

🔹സ്വാതന്ത്ര്യദിനത്തോടനുബന്ധിച്ച് രാജ്യത്ത് അട്ടിമറി നടത്താന്‍ പദ്ധതിയിട്ട പാകിസ്ഥാനി ഭീകര ശൃംഖലയിലെ ഇരുന്നൂറിലേറെ ഭീകരരെ ഇന്ത്യന്‍ സുരക്ഷാസേന പിടികൂടി. കേരളത്തില്‍നിന്നു രണ്ടു പേരെ പിടികൂടിയിട്ടുണ്ട്. പാക് ചാരസംഘടനയായ ഐ.എസ്.ഐയുടെ പിന്തുണയോടെ പ്രവര്‍ത്തിക്കുന്ന ‘ഷഹസാദ് ഭട്ടി നെറ്റ് വര്‍ക്കിന്റെ’ പ്രവര്‍ത്തകരെയാണ് 14 സംസ്ഥാനങ്ങളില്‍നിന്നായി പിടികൂടിയതെന്ന് കേന്ദ്ര ആഭ്യന്തര മന്ത്രി അമിത് ഷാ വെളിപെടുത്തി. ഉത്തര്‍പ്രദേശില്‍നിന്ന് 62 പേരാണു പിടിയിലായത്.

🔹തമിഴ്നാട്ടില്‍ 6,220 കോടി രൂപയുടെ കാര്‍ഷിക വായ്പ എഴുതിത്തള്ളുമെന്ന് മുഖ്യമന്ത്രി സി ജോസഫ് വിജയ്. സംസ്ഥാന സര്‍ക്കാര്‍ അധികാരത്തില്‍ 100 ദിവസം പൂര്‍ത്തിയാക്കുന്നതിന്റെ ഭാഗമായാണ് സുപ്രധാന പ്രഖ്യാപനം നടത്തിയത്. ഇതനുസരിച്ച്, സഹകരണ ബാങ്കുകളില്‍നിന്ന് 75,000 രൂപ വരെ വായ്പയെടുത്തവരുടെ കടം പൂര്‍ണമായും എഴുതിത്തള്ളും.

🔹ഇറാനുമായി രഹസ്യ ചര്‍ച്ചകള്‍ നടത്തുന്നുണ്ടെന്ന യുഎസ് പ്രസിഡന്റ് ഡോണാള്‍ഡ് ട്രംപിന്റെ അവകാശവാദം യുദ്ധത്തോല്‍വിയില്‍നിന്നുള്ള മനോവിഭ്രാന്തിയാണെന്ന് ഇറാന്റെ സൈന്യമായ ഇസ്ലാമിക് റെവല്യൂഷനറി ഗാര്‍ഡ് കോര്‍പ്സ്. ഒരു ചര്‍ച്ചയും നടക്കുന്നില്ലെന്ന് സൈനിക വക്താവ് ഹുസൈന്‍ മൊഹേബി പറഞ്ഞതായി ഇറാനിലെ തസ്നിം വാര്‍ത്താ ഏജന്‍സി റിപ്പോര്‍ട്ട് ചെയ്തു.

🔹ഗള്‍ഫിലെ പ്രവാസി ഇന്ത്യക്കാര്‍ക്ക് ഖത്തറില്‍ നിന്ന് ഇന്ത്യയിലെ ബാങ്ക് അക്കൗണ്ടുകളിലേക്ക് യുപിഐ വഴി അതിവേഗം പണമയക്കാനുള്ള പുതിയ സംവിധാനം നിലവില്‍ വന്നു. ഇന്ത്യ പോസ്റ്റ്, ഖത്തര്‍ പോസ്റ്റ്, യൂണിവേഴ്സല്‍ പോസ്റ്റല്‍ യൂണിയന്‍, എന്‍.പി.സി.ഐ, ഇന്റര്‍നാഷണല്‍ പേയ്‌മെന്റ്സ് ലിമിറ്റഡ് എന്നിവ സംയുക്തമായാണ് ഈ സേവനം ആരംഭിച്ചത്. ഖത്തറിലെ ഇന്ത്യന്‍ പ്രവാസി സമൂഹത്തിന്, പ്രത്യേകിച്ച് ചെറുകിട വരുമാനക്കാര്‍ക്കും തൊഴിലാളികള്‍ക്കും, നാട്ടിലേക്ക് ഏറ്റവും ലളിതമായും കുറഞ്ഞ നിരക്കിലും പണമയക്കാന്‍ ഇത് സഹായകമാവും. നാട്ടില്‍ പണം സ്വീകരിക്കാന്‍ ബാങ്ക് അക്കൗണ്ട് നമ്പറോ ഐ.എഫ്.എസ്.സി കോഡോ ആവശ്യമില്ല; യുപിഐ ഐഡി മാത്രം മതിയാകും. ഒരു ഇടപാടിന് ഫ്ലാറ്റ് നിരക്കായി 15 ഖത്തര്‍ റിയാല്‍ മാത്രമാണ് സര്‍വീസ് ചാര്‍ജ്. അയക്കാന്‍ സാധിക്കുന്ന കുറഞ്ഞ തുക 10 റിയാല്‍, കൂടിയ തുക 4,000 റിയാല്‍.

🔹ഡ്യൂറന്‍ഡ് കപ്പിലെ ആവേശകരമായ ക്വാര്‍ട്ടര്‍ പോരാട്ടത്തില്‍ ജാംഷെഡ്പൂര്‍ എഫ്സിയെ പെനാല്‍റ്റി ഷൂട്ടൗട്ടില്‍ എട്ടിനെതിരേ ഒമ്പതു ഗോളുകള്‍ക്കു കീഴടക്കി മോഹന്‍ ബഗാന്‍ സൂപ്പര്‍ ജയന്റ്സ് സെമിയിലെത്തി. നിശ്ചിത സമയത്ത് ഇരുടീമുകളും 1-1 സമനില പാലിച്ചതിനെത്തുടര്‍ന്നാണ് മത്സരം പെനാല്‍റ്റി ഷൂട്ടൗട്ടിലേക്ക് നീണ്ടത്. ഷൂട്ടൗട്ടിലും ഒപ്പത്തിനൊപ്പം സമനില പാലിച്ചതിനെതുടര്‍ന്ന് സഡന്‍ ഡെത്തിലായിരുന്നു ബഗാന്റെ ജയം.

🔹ശ്രീലങ്കക്കെതിരായ ഒന്നാം ക്രിക്കറ്റ് ടെസ്റ്റില്‍ ഇന്ത്യക്ക് മൂന്നാം ദിനത്തില്‍ 178 റണ്‍സിന്റെ ഒന്നാം ഇന്നിംഗ്സ് ലീഡ്. ഇന്ത്യയുടെ ഒന്നാം ഇന്നിംഗ്സ് സ്‌കോറായ 462 റണ്‍സിന് മറുപടിയായി ശ്രീലങ്ക 284 റണ്‍സെടുത്ത് ഓള്‍ ഔട്ടായി. തുടക്കത്തിലെ കൂട്ടത്തകര്‍ച്ചക്കുശേഷം സെഞ്ചുറിയുമായി പൊരുതിയ സൊനാല്‍ ദിനുഷയുടെയും(100), അര്‍ധസെഞ്ചുറി നേടിയ നിരോഷന്‍ ഡിക്വെല്ലയുടെയും ബാറ്റിംഗ് മികവിലാണ് ശ്രീലങ്ക ഫോളോ ഓണ്‍ ഒഴിവാക്കിയത്. മൂന്നാം ദിനം ശ്രീലങ്കന്‍ ഇന്നിംഗ്സ് അവസാനിച്ച ഉടന്‍ മഴയും വെളിച്ചക്കുറവും മൂലം കളി നിര്‍ത്തിവച്ചു.

🔹ലോക ബാഡ്മിന്റണില്‍ ചാമ്പ്യന്‍ഷിപ്പില്‍ നിലവിലെ ലോക ചാമ്പ്യന്‍ ചൈനയുടെ ഷി യുക്കിയെ അട്ടിമറിച്ച് ഇന്ത്യയുടെ 21-കാരന്‍ ആയുഷ് ഷെട്ടി. ലോക റാങ്കിങ്ങില്‍ 22ാം സ്ഥാനത്തുള്ള ആയുഷ് മൂന്ന് ഗെയിം നീണ്ട പോരാട്ടത്തിനൊടുവിലാണ് ഒന്നാം റാങ്കുകാരനായ ഷി യുക്കിയെ തോല്‍പ്പിച്ചത്. സ്‌കോര്‍: 21-14, 13-21, 21-19.

🔹ലോക ബാഡ്മിന്റണ്‍ ചാമ്പ്യന്‍ഷിപ്പിന്റെ ആദ്യ റൗണ്ട് അനായാസം കടന്ന് ഇന്ത്യയുടെ പി.വി സിന്ധു. വനിതാ സിംഗിള്‍സില്‍ അയര്‍ലന്‍ഡിന്റെ സോഫിയ നോബ്‌ളിനെ നേരിട്ടുള്ള ഗെയിമുകള്‍ക്ക് ഇന്ത്യന്‍ താരം കീഴടക്കി. സ്‌കോര്‍: 21-7, 21-11.

🔹പുരുഷ ഹോക്കി ലോകകപ്പില്‍ ശക്തരായ ഇംഗ്ലണ്ടിനോട് ഇന്ത്യ രണ്ടിനെതിരേ നാലു ഗോളുകള്‍ക്കു പരാജയപ്പെട്ടു. മത്സരത്തിന്റെ ആദ്യ പകുതിയില്‍ ഇന്ത്യ 2-1 എന്ന നിലയില്‍ മുന്നിട്ടുനിന്നതായിരുന്നു. രണ്ടാം പകുതിയിലെ പ്രതിരോധത്തിലെ പിഴവുകള്‍ മൂലമാണ് ഇന്ത്യ തോല്‍വി വഴങ്ങിയത്.

🔹ദുല്‍ഖര്‍ സല്‍മാന്‍ ചിത്രം ‘ഐ ആം ഗെയി’മിലെ ആദ്യ ഗാനത്തിന് യൂട്യൂബില്‍ 10 മില്യണിലധികം കാഴ്ചക്കാര്‍. ഏതാനും ദിവസങ്ങള്‍ക്ക് മുന്‍പ് പുറത്ത് വന്ന ‘മഴവില്ലായേ’ എന്ന പ്രണയ ഗാനമാണ് ഇപ്പോള്‍ സമൂഹ മാധ്യമങ്ങളില്‍ സൂപ്പര്‍ ഹിറ്റായി മുന്നേറുന്നത്. ചിത്രം 2026 സെപ്റ്റംബര്‍ 3 ന് ആഗോള തലത്തില്‍ വമ്പന്‍ റിലീസായി എത്തും. അര്‍മാന്‍ മാലിക് ആലപിച്ച ഈ ഗാനത്തിന് വരികള്‍ രചിച്ചത് ഷര്‍ഫു ആണ്. ദുല്‍ഖര്‍ സല്‍മാന്‍, കയദു ലോഹര്‍ എന്നിവര്‍ അവതരിപ്പിക്കുന്ന കഥാപാത്രങ്ങളുടെ പ്രണയ നിമിഷങ്ങളാണ് ഈ ഗാനത്തിലൂടെ പ്രേക്ഷകരുടെ മുന്നിലെത്തിക്കുന്നത്. സീ മ്യൂസിക് ആണ് ചിത്രത്തിന്റെ മ്യൂസിക് അവകാശം സ്വന്തമാക്കിയത്. ഈ ബിഗ് ബഡ്ജറ്റ് ഫാന്റസി ത്രില്ലറില്‍, ആന്റണി വര്‍ഗീസ്, തമിഴ് നടനും സംവിധായകനുമായ മിഷ്‌കിന്‍, കായദു ലോഹര്‍, കതിര്‍, പാര്‍ത്ഥ് തിവാരി, തമിഴ് നായികാ താരം സംയുക്ത വിശ്വനാഥന്‍ തുടങ്ങി വമ്പന്‍ താരനിരയാണ് അണിനിരക്കുന്നത്.

🔹ശേഖര്‍ മേനോന്‍, വിജയകുമാര്‍ പ്രഭാകരന്‍, ബാബു തളിപ്പറമ്പ്, സ്പാനിഷ് താരം ആന്‍ഡ്രിയ റവേര, പാരീസ് ലക്ഷ്മി, ദിവ്യ ഗോപിനാഥ് എന്നിവരെ പ്രധാന കഥാപാത്രങ്ങളാക്കി നവാഗതരായ അര്‍ജുന്‍ ലാല്‍, അജിത് കുമാര്‍ രവീന്ദ്രന്‍ എന്നിവര്‍ കഥയെഴുതി സംവിധാനം ചെയ്യുന്ന ചിത്രമാണ് ‘രണ്ട് രഹസ്യങ്ങള്‍’. അതീവ ത്രില്ലര്‍ സ്വഭാവമുള്ള ചിത്രം നിര്‍മ്മിക്കുന്നത് വാമ എന്റര്‍ടെയിന്‍മെന്റിന്റെ ബാനറില്‍ സാക്കിര്‍ അലി ആണ്. മലയാളത്തില്‍ ആദ്യമായി ഒരു സ്പാനിഷ് താരം കേന്ദ്ര കഥാപാത്രമാകുന്ന ചിത്രംകൂടിയാണ് രണ്ട് രഹസ്യങ്ങള്‍. ചിത്രത്തിന്റെ പുതിയ പോസ്റ്റര്‍ റിലീസായി. സംവിധായകര്‍ തന്നെയാണ് തിരക്കഥയും സംഭാഷണവും തയ്യാറാക്കിയിരിക്കുന്നത്. ജോമോന്‍ തോമസ്, അബ്ദുള്‍ റഹീം എന്നിവരാണ് ക്യാമറ കൈകാര്യം ചെയ്തിരിക്കുന്നത്. റഫീക്ക് അഹമ്മദിന്റെ വരികള്‍ക്ക് സംഗീതം നല്‍കുന്നത് വിശ്വജിത്ത് ആണ്. ചിത്രം സെപ്റ്റംബര്‍ മാസത്തോടെ ഹൈസിന്‍ ഗ്ലോബല്‍ വെഞ്ചേഴ്സ് തീയേറ്ററുകളില്‍ പ്രദര്‍ശനത്തിനെത്തിക്കും

🔹മലയാളത്തിലെ സൂപ്പര്‍ഹിറ്റ് ചിത്രമായ ‘പ്രേമലു’വിന്റെ ഹിന്ദി റീമേക്ക് ടീസര്‍ എത്തി. ‘പ്രേം കീടാണു’ എന്നു പേരിട്ടിരിക്കുന്ന സിനിമയില്‍ വീര്‍ പഹാരിയ, ആഫിയ സയിദ്, അപര്‍ശക്തി ഖുറാന എന്നിവരാണ് പ്രധാന വേഷങ്ങളിലെത്തുന്നത്. ‘പ്രേമലു’വിന്റെ അതേ കഥയല്ല ഹിന്ദിയില്‍ എത്തുമ്പോള്‍ ഒരുക്കിയിരിക്കുന്നത്. കഥയില്‍നിന്നുള്ള പ്രധാന ചില ഭാഗങ്ങള്‍ മാത്രം അടര്‍ത്തിയെടുത്ത് ഒരുക്കിയ റീമേക്ക് ആണിത്. ഭാവന സ്റ്റുഡിയോസ് നിര്‍മാണ പങ്കാളികളാണ്. ‘പ്രേമലു’വില്‍ ഐടി കമ്പനിയിലെ സുഹൃദ്ബന്ധം ഹിന്ദിയിലെത്തുമ്പോള്‍ കോളജ് സൗഹൃദമാകുന്നു. കോളജ് പശ്ചാത്തലമാക്കിയുള്ള റൊമാന്റിക് കോമഡി എന്റര്‍ടെയ്നര്‍ ആകും ‘പ്രേം കീടാണു’. ചിത്രം ഒക്ടോബര്‍ രണ്ടിനു തിയറ്ററുകളിലെത്തും. ഈ സിനിമ റിലീസ് ചെയ്യുന്ന സമയം വരെ ഹോട്ട്സ്റ്റാറില്‍ നിന്നും ‘പ്രേമലു’ സിനിമ നീക്കം ചെയ്തു വച്ചിരിക്കുന്നുവെന്നതാണ് മറ്റൊരു ശ്രദ്ധേയമായ കാര്യം.

💦 ഗുരുജിയുടെ വാക്കുകൾ
*****************************

ഒന്നിനോടും അളവിൽ കൂടുതൽ അടുക്കരുത്, കാറ്റിന്റെ കുളിരിനെ നമുക്ക് ആസ്വദിക്കാൻ കഴിയും, പക്ഷേ കൊടുംകാറ്റിന്റെ ഭയാനതയെ പേടിച്ചേ മതിയാവു…..എന്ത് കിട്ടി എന്നതിനേക്കാൾ അതിന് വേണ്ടി നാം എന്ത് ചെയ്തു എന്നതാണ് പ്രധാനം. നേടാൻ ഒരുപാടുള്ളപ്പോൾ നഷ്ട്ടങ്ങളെ കുറിച്ചോർത്ത് വിഷമിക്കരുത്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

•ലോക ‘ഒരിക്കലും കൈവിടരുത്’ ദിനം (World Never Give Up Day): പ്രതിസന്ധികളിലും പരാജയങ്ങളിലും തളരാതെ, ലക്ഷ്യത്തിലേക്ക് മുന്നേറാനുള്ള ദൃഢനിശ്ചയത്തെയും മാനസിക കരുത്തിനെയും ആദരിക്കുന്നതിനാണ് ഓഗസ്റ്റ് 18 ഈ ദിനമായി ആചരിക്കുന്നത്.

•ഹീലിയം കണ്ടെത്തിയ ദിനം (Helium Discovery Day): 1868 ഓഗസ്റ്റ് 18-ലെ സൂര്യഗ്രഹണ നിരീക്ഷണത്തിനിടെ ഫ്രഞ്ച് ജ്യോതിശാസ്ത്രജ്ഞനായ പിയറി ജാൻസെൻ ‘ഹീലിയം’ (Helium) എന്ന മൂലകം കണ്ടെത്തി. ശാസ്ത്രലോകത്ത് ഈ ദിവസം വളരെ പ്രാധാന്യത്തോടെ ഓർമ്മിക്കപ്പെടുന്നു.

•മോശം കവിതാ ദിനം (Bad Poetry Day): കവിത എഴുതാൻ ആഗ്രഹിക്കുന്ന ആർക്കും തെറ്റുകളെക്കുറിച്ച് ആകുലപ്പെടാതെ തമാശരൂപേണ കവിതകൾ എഴുതി നോക്കാനും ആസ്വദിക്കാനുമുള്ള ഒരു രസകരമായ ദിനമാണിത്.

•നേതാജി സുഭാഷ് ചന്ദ്രബോസിന്റെ അന്ത്യം (1945): ഇന്ത്യയുടെ സ്വാതന്ത്ര്യസമര ചരിത്രത്തിലെ ജ്വലിക്കുന്ന നക്ഷത്രമായ നേതാജി സുഭാഷ് ചന്ദ്രബോസ് തായ്‌വാനിൽ ഉണ്ടായ വിമാനാപകടത്തിൽ മരണപ്പെട്ടതായി പറയപ്പെടുന്നത് 1945 ഓഗസ്റ്റ് 18-നാണ്. (ഇതുമായി ബന്ധപ്പെട്ട് ഇപ്പോഴും നിരവധി തർക്കങ്ങൾ നിലനിൽക്കുന്നുണ്ട്).

•ചില പശ്ചിമ ബംഗാൾ അതിർത്തി പ്രദേശങ്ങളിലെ സ്വാതന്ത്ര്യദിനം (1947): ഇന്ത്യയ്ക്ക് ഓഗസ്റ്റ് 15-ന് സ്വാതന്ത്ര്യം ലഭിച്ചെങ്കിലും, അതിർത്തി നിർണ്ണയത്തിലെ (Radcliffe Line) ചില പിഴവുകൾ കാരണം പശ്ചിമ ബംഗാളിലെ നാദിയ (Nadia), മാൽഡ (Malda) തുടങ്ങിയ ജില്ലകളിലെ ചില ഭാഗങ്ങൾ താൽക്കാലികമായി പാകിസ്താന്റെ ഭാഗമായി രേഖപ്പെടുത്തപ്പെട്ടിരുന്നു. പിന്നീട് പ്രതിഷേധങ്ങളെ തുടർന്ന് തെറ്റ് തിരുത്തുകയും, ഓഗസ്റ്റ് 17 രാത്രിയോടെ ഈ പ്രദേശങ്ങൾ ഇന്ത്യയുടെ ഭാഗമാണെന്ന് ഉറപ്പിക്കുകയും ചെയ്തു. തുടർന്ന് ഓഗസ്റ്റ് 18-നാണ് ഈ പ്രദേശങ്ങളിൽ ഇന്ത്യൻ ദേശീയ പതാക ആദ്യമായി ഉയർത്തിയത്. അതിനാൽ ഇവിടങ്ങളിൽ ഇന്നും ഓഗസ്റ്റ് 18 ഒരു രണ്ടാം സ്വാതന്ത്ര്യദിനമായി പ്രാദേശികമായി ആഘോഷിക്കാറുണ്ട്.

•അമേരിക്കയിലെ വനിതാ വോട്ടവകാശം (1920): യു.എസ് ഭരണഘടനയുടെ 19-ാം ഭേദഗതിയിലൂടെ അമേരിക്കയിലെ സ്ത്രീകൾക്ക് വോട്ടവകാശം ഔദ്യോഗികമായി അംഗീകരിക്കപ്പെട്ടത് 1920 ഓഗസ്റ്റ് 18-നാണ്.

തയ്യാറാക്കിയത്: കപിൽ ശങ്കർ

16 Likes

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 18 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

തയ്യാറാക്കിയത്: കപിൽ ശങ്കർ

കുവൈത്തിലെ മലയാളി നഴ്സ് ദിവ്യ പ്രശാന്ത് വിടവാങ്ങി

ഫീനിക്സ് ക്ലബ്ബിന്റെ ‘ഓണം പൊന്നോണം 2026’ ഓഗസ്റ്റ് 30ന്

ഫൊക്കാനാ വേദിയിൽ യുവപ്രതിഭകളുടെ കലാവസന്തം; ദേവിക പദ്മകുമാർ കലാതിലകം, ജേസൺ മാത്യു കലാപ്രതിഭ

LEAVE A REPLY Cancel reply

Most Popular

കുവൈത്തിലെ മലയാളി നഴ്സ് ദിവ്യ പ്രശാന്ത് വിടവാങ്ങി

ഫീനിക്സ് ക്ലബ്ബിന്റെ ‘ഓണം പൊന്നോണം 2026’ ഓഗസ്റ്റ് 30ന്

ഫൊക്കാനാ വേദിയിൽ യുവപ്രതിഭകളുടെ കലാവസന്തം; ദേവിക പദ്മകുമാർ കലാതിലകം, ജേസൺ മാത്യു കലാപ്രതിഭ

ഓർമ്മ അന്താരാഷ്ട്ര പ്രസംഗമത്സരം സീസൺ 4: ഫിലാഡൽഫിയായിൽ ഓഗസ്റ്റ് 19ന് കിക്കോഫ്

Recent Comments

EDITOR PICKS

കുവൈത്തിലെ മലയാളി നഴ്സ് ദിവ്യ പ്രശാന്ത് വിടവാങ്ങി

ഫീനിക്സ് ക്ലബ്ബിന്റെ ‘ഓണം പൊന്നോണം 2026’ ഓഗസ്റ്റ് 30ന്

ഫൊക്കാനാ വേദിയിൽ യുവപ്രതിഭകളുടെ കലാവസന്തം; ദേവിക പദ്മകുമാർ കലാതിലകം, ജേസൺ മാത്യു കലാപ്രതിഭ

POPULAR POSTS

ബിജെപിയിൽ വൻ അഴിച്ചുപണി; കെ. സുരേന്ദ്രൻ ദേശീയ സെക്രട്ടറി; എ പി. അബ്ദുല്ലക്കുട്ടി പുറത്ത്.

ഇന്ത്യൻ റെയിൽവേ എൻജിനീയർ തസ്തികയിലേക്കുള്ള റിക്രൂട്ട്‌മെൻ്റിന് ഇപ്പോൾ അപേക്ഷിക്കാം

സോഷ്യൽ മീഡിയ നിയന്ത്രണം കടുപ്പിച്ച് കേന്ദ്രം; അഞ്ച് മാസത്തിനിടെ നൽകിയത് 1.95 ലക്ഷം ബ്ലോക്കിംഗ് ഓർഡറുകൾ

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 18 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************