📱വാർത്തകൾ ഒറ്റനോട്ടത്തിൽ📱 – 2026 | മെയ് 12 | ചൊവ്വ ✍️ കപിൽ ശങ്കർ

🔹മെയ് 12 പ്രധാനമായും അന്താരാഷ്ട്ര നഴ്സസ് ദിനമായി (International Nurses Day) ആചരിക്കുന്നു.ആധുനിക നഴ്സിംഗിന്റെ സ്ഥാപകയായ ഫ്ലോറൻസ് നൈറ്റിംഗേലിന്റെ ജന്മദിനത്തോടനുബന്ധിച്ചാണ് ഈ ദിനം ആചരിക്കുന്നത്.സമൂഹത്തിന് നഴ്സുമാർ നൽകുന്ന മികച്ച സേവനങ്ങളെ ആദരിക്കുന്നതിനും അവരുടെ ത്യാഗനിർഭരമായ പ്രവർത്തനങ്ങളെ സ്മരിക്കുന്നതിനുമായാണ് ഈ ദിനം.
•അന്താരാഷ്ട്ര സസ്യ ആരോഗ്യ ദിനം (International Day of Plant Health): സസ്യങ്ങളുടെ ആരോഗ്യത്തെക്കുറിച്ചും, അത് വഴി പട്ടിണി കുറയ്ക്കുന്നതിനെക്കുറിച്ചും അവബോധം വളർത്താൻ.
•അന്താരാഷ്ട്ര ME/CFS അവബോധ ദിനം: മൈൽജിയക് എൻസെഫലോമൈലിറ്റിസ് / ക്രോണിക് ഫാറ്റിഗ് സിൻഡ്രോം (ME/CFS) എന്ന അസുഖത്തെക്കുറിച്ചുള്ള ബോധവൽക്കരണ ദിനം.

🔹മുഖ്യമന്ത്രിയെ കാത്ത് കാത്ത് ക്ഷമകെട്ട് കേരളം. തെരഞ്ഞെടുപ്പ് ഫലമറിഞ്ഞ് എട്ട് ദിവസമായിട്ടും മുഖ്യമന്ത്രിയെ തീരുമാനിക്കാന്‍ സാധിക്കാത്ത ഹൈക്കമാന്‍ഡിന്റെ പിടിപ്പുകേടില്‍ നാണംകെട്ട് നില്‍ക്കുകയാണ് കോണ്‍ഗ്രസ് അണികള്‍. പ്രതിഷേധം പരസ്യമാക്കാനാകാതെ സഹികെട്ട് യുഡിഎഫ് ഘടകക്ഷികളും. എന്നാല്‍ കോണ്‍ഗ്രസിലെ തര്‍ക്കത്തില്‍ പുതുജീവന്‍ കിട്ടിയത് 35 സീറ്റ് മാത്രം ലഭിച്ച എല്‍ഡിഎഫിനാണ്. എന്നിട്ടും 2021 ലെ തിരഞ്ഞെടുപ്പില്‍ തകര്‍ന്നടിഞ്ഞ കോണ്‍ഗ്രസിന് തന്റെ നിലപാടുകളിലൂടെ മികച്ച വിജയം നേടികൊടുത്ത പ്രതിപക്ഷ നേതാവ് വി.ഡി.സതീശനെ മുഖ്യമന്ത്രി സ്ഥാനം വിട്ടുകൊടുക്കില്ലെന്ന വാശിയില്‍ സീനിയോറിറ്റിയുടെ പേര് പറഞ്ഞ് രമേശ് ചെന്നിത്തലയും ഹൈക്കമാന്‍ഡിന്റെ ഭാഗമായ കെ.സി.വേണുഗോപാലും ഉറച്ചു നില്‍ക്കുകയാണ്.

🔹സര്‍ക്കാര്‍ രൂപവത്കരണം വൈകുന്നത് കേരളത്തലെ ദൈനംദിന പ്രവര്‍ത്തനങ്ങള്‍ക്ക് അപ്പുറമുള്ള ഭരണനടപടികള്‍ അവതാളത്തിലാക്കുന്നുവെന്ന് റിപ്പോര്‍ട്ടുകള്‍. സര്‍ക്കാര്‍ അധികാരമേല്‍ക്കാത്തതിനാല്‍ വകുപ്പ് സെക്രട്ടറിമാരും കാര്യമായ തീരുമാനങ്ങള്‍ എടുക്കുന്നില്ല. സ്‌കൂള്‍ തുറക്കാന്‍ ദിവസങ്ങള്‍ മാത്രമുള്ളപ്പോള്‍ പാഠപുസ്തക വിതരണത്തിന്റെ കാര്യത്തിലും കാര്യമായ പുരോഗതിയുണ്ടായിട്ടില്ലെന്നതും ആശങ്കയുളവാക്കുന്നു.

🔹‎കേരളത്തിന്റെ പുതിയ മുഖ്യമന്ത്രി ആരെന്ന കാത്തിരിപ്പിന് ഇന്ന് അവസാനമായേക്കും. വൈകിട്ട് ഏഴ് മണിക്ക് മുഖ്യമന്ത്രിയെ കോൺഗ്രസ് ദേശീയ നേതൃത്വം പ്രഖ്യാപിക്കുമെന്നാണ് വിവരം. കേരളത്തിൽ നിന്നുള്ള മുതിർന്ന നേതാക്കളെ ചർച്ചയ്ക്കായി ദില്ലിയിലേക്ക് വിളിപ്പിച്ചിരുന്നു.

🔹കേരളത്തിലെ പുതിയ മുഖ്യമന്ത്രിയെ തീരുമാനിക്കുന്നതിനുള്ള തുടര്‍ ചര്‍ച്ചകളുടെ ഭാഗമായി സംസ്ഥാനത്തെ മുതിര്‍ന്ന നേതാക്കളെ കോണ്‍ഗ്രസ് ഹൈക്കമാന്‍ഡ് ഡല്‍ഹിയിലേക്ക് വിളിപ്പിച്ചു. മുല്ലപ്പള്ളി രാമചന്ദ്രന്‍, എം എം ഹസന്‍, കെ സുധാകരന്‍, കെ മുരളീധരന്‍, വി എം സുധീരന്‍ തുടങ്ങിയ മുന്‍ കെപിസിസി അധ്യക്ഷന്മാരെയാണ് ചര്‍ച്ചയ്ക്കായി ഹൈക്കമാന്‍ഡ് വിളിപ്പിച്ചത്. വര്‍ക്കിംഗ് പ്രസിഡന്റുമാരുമായും ചര്‍ച്ച നടത്തും. ഘടകകക്ഷി നേതാക്കളുമായി വീണ്ടും സംസാരിക്കാനും തീരുമാനമായിട്ടുണ്ട്.

‎🔹മുഖ്യമന്ത്രി തീരുമാനം ഇതിനെക്കാൾ വൈകിയ കാലമുണ്ടായിട്ടുണ്ടെന്ന് ഡൽഹിയിലെത്തിയ മുതിർന്ന കോൺഗ്രസ് നേതാവ് തിരുവഞ്ചൂർ രാധാകൃഷ്ണൻ. ചർച്ച വൈകുന്നതിൽ പ്രശ്നമില്ല തീരുമാനമാണ് പ്രധാനമെന്നും അദ്ദേഹം പറഞ്ഞു. അതേ സമയം മുഖ്യമന്ത്രി പ്രഖ്യാപനം വൈകീട്ടില്ലെന്നും ഇനി വൈകാൻ പാടില്ലെന്നും എം എം ഹസൻ വ്യക്തമാക്കി.

🔹ആരാകും കേരളത്തിലെ മുഖ്യമന്ത്രിയെന്ന് 48 മണിക്കൂറിനകം പ്രഖ്യാപനമെന്ന് കെ മുരളീധരന്‍. ദീപ ദാസ് മുന്‍ഷി വിളിച്ചെന്നും ദില്ലിയില്‍ എത്തണമെന്ന് നേതൃത്വം ആവശ്യപ്പെട്ടതായും മുരളീധരന്‍ പറഞ്ഞു. മുഖ്യമന്ത്രി ചര്‍ച്ചയ്ക്ക് ആയിരിക്കാമെന്നും ഉടന്‍ തീരുമാനം ഉണ്ടാകുമെന്നും മുരളീധരന്‍ കൂട്ടിച്ചേര്‍ത്തു.

🔹മുഖ്യമന്ത്രി സ്ഥാനത്തേക്ക് കെ.സി വേണുഗോപാലിനുള്ള പിന്തുണയില്‍ കോണ്‍ഗ്രസ് എംഎല്‍എ മാര്‍ക്ക് നേരെ പരസ്യ പ്രതിഷേധവുമായി പ്രവര്‍ത്തകര്‍. നാദാപുരം എംഎല്‍എ കെ.എ. അഭിജിത്തിനെ പ്രതിഷേധം അറിയിച്ച് പ്രവര്‍ത്തകര്‍. നാദാപുരത്തെ സ്വകാര്യ പരിപാടിയിലാണ് എതിര്‍പ്പ് അറിയിച്ചത്. അതേസമയം, പ്രതിഷേധം ഉണ്ടായിട്ടില്ലെന്ന് അഭിജിത് അറിയിച്ചു.

🔹കോണ്‍ഗ്രസ് മുഖ്യമന്ത്രിയെ തീരുമാനിക്കുന്നത് അനിശ്ചിതമായി നീളുന്നതില്‍ പരസ്യവിമര്‍ശനവുമായി മുസ്ലിംലീഗ് മലപ്പുറം ജില്ലാ ജനറല്‍ സെക്രട്ടറിയും മുന്‍ എംഎല്‍എയുമായ പി. അബ്ദുള്‍ഹമീദ്. മുഖ്യമന്ത്രിയെ തീരുമാനിക്കുന്നത് വൈകുന്നത് തിരഞ്ഞെടുപ്പ് വിജയത്തിന്റെ ശോഭ കെടുത്തിയെന്നും അണികള്‍ക്കെല്ലാം വലിയ നിരാശയുണ്ടെന്നും അദ്ദേഹം പറഞ്ഞു.

🔹കേരളത്തിലെ തിരഞ്ഞെടുപ്പ് തോല്‍വിയുടെ ഉത്തരവാദിത്വം പിണറായി വിജയന് മാത്രമല്ലെന്നും അത് കൂട്ടായതാണെന്നും സിപിഎം ജനറല്‍ സെക്രട്ടറി എം എ ബേബി വ്യക്തമാക്കി. തോല്‍വിയുടെ കാരണങ്ങള്‍ വിശദമായി പരിശോധിച്ച് തിരുത്തല്‍ നടപടികള്‍ സ്വീകരിക്കുമെന്നും അദ്ദേഹം ദില്ലിയില്‍ പറഞ്ഞു. പിണറായി പ്രതിപക്ഷ നേതാവാകുമോ എന്ന ചോദ്യത്തിന് അദ്ദേഹം ചിരിയില്‍ മറുപടി ഒതുക്കി.

🔹പുസ്തക വിവാദത്തില്‍ പ്രതികരണവുമായി കെവി തോമസ്. പത്മജയെ വേദനിപ്പിക്കാന്‍ താന്‍ ഉദ്ദേശിക്കുന്നില്ലെന്നും അവര്‍ പുസ്തകം മുഴുവന്‍ വായിക്കണമെന്നും കെവി തോമസ് പറഞ്ഞു. പുസ്തകത്തിന്റെ ഒരു ഭാഗം മാത്രം വായിച്ചു വിമര്‍ശിക്കരുത്. പറഞ്ഞതെല്ലാം സത്യമാണ്. ഇത് ആദ്യമായല്ല പ്രസിദ്ധീകരിക്കുന്നത്. ആഴ്ച പതിപ്പില്‍ വന്നിട്ടുണ്ട്. തന്റെ ഡയറിയില്‍ ഉള്ളതാണ് പുസ്തകത്തിലും ഉള്ളതെന്നും കെവി തോമസ് പറഞ്ഞു.

🔹തുടര്‍ഭരണം നഷ്ടമായതിനെ തുടര്‍ന്ന് പിണറായി വിജയന്‍ തിരുവനന്തപുരത്ത് പുതിയ വാടക വീട്ടിലേക്ക് താമസം മാറുന്നു. ബേക്കറി ജങ്ഷനില്‍ ആര്‍ബിഐക്ക് സമീപത്താണ് വാടകയ്ക്ക് എടുത്തത്. ഡല്‍ഹിയില്‍ നിന്ന് നാട്ടിലേക്ക് എത്തിയപിണറായി വിജയന്‍ വാടക വീട്ടിലേക്ക് താമസം മാറ്റി.

🔹ചെട്ടികുളങ്ങര ബൈക്കിടിച്ച് കാല്‍നടയാത്രികനായ വയോധികനും ബൈക്ക് യാത്രികനായ യുവാവിനും ദാരുണാന്ത്യം. ചെട്ടികുളങ്ങര ചെറുകരതെക്കതില്‍ ചെല്ലപ്പന്‍ നായര്‍ (82), ഫെഡറല്‍ ബാങ്ക് ജീവനക്കാരനായ പത്തിയൂര്‍ മങ്ങാട്ടുശേരില്‍ കെ എസ് അനന്തന്‍ (26) എന്നിവരാണ് മരിച്ചത്.

🔹സ്‌കൂളില്‍ നിന്ന് ലാപ്ടോപ്പും ക്യാമറകളും മോഷ്ടിച്ച് കടന്ന പ്രതിയെ പാറശാല പൊലീസ് അറസ്റ്റ് ചെയ്തു. ഷൈജു (30) എന്ന ഹെല്‍മെറ്റ് ഷൈജു ആണ് അറസ്റ്റിലായത്. പാറശാല ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ കഴിഞ്ഞ മാസം 20-നാണ് മോഷണം നടന്നത്.

🔹കേരളത്തില്‍ മുഖ്യമന്ത്രി സ്ഥാനത്തേക്ക് കോണ്‍ഗ്രസ് എന്തുകൊണ്ട് വനിതകളെ പരിഗണിക്കുന്നില്ലെന്ന ചോദ്യവുമായി സി.പി.ഐ നേതാവ് ആനി രാജ. രാഷ്ട്രീയത്തില്‍ പരിചയസമ്പത്തുള്ള ഒട്ടേറെ സ്ത്രീകള്‍ വിജയിച്ചു വന്നിട്ടുണ്ടെന്നും മുഖ്യമന്ത്രി പദത്തെക്കുറിച്ചുള്ള ചര്‍ച്ചകള്‍ വെറും രണ്ടോ മൂന്നോ പുരുഷന്മാരെ മാത്രം കേന്ദ്രീകരിച്ച് നടക്കുന്നത് ജനാധിപത്യത്തിന് ചേര്‍ന്നതല്ലെന്നും അവര്‍ മാധ്യമങ്ങളോട് പറഞ്ഞു.

🔹താമരശേരി പഞ്ചായത്ത് ഓഫീസിന്‍റെ ഗോവണിപ്പടിയിൽ ഓട്ടോ ഡ്രൈവർ തൂങ്ങിമരിച്ച നിലയിൽ.താമരശേരി സ്വദേശി മുരളീധരൻ (56) ആണ് മരിച്ചത്. ഓട്ടോ സമീപത്ത് നിർത്തിയിട്ടിട്ടുണ്ട്. മുരളീധരന്‍റെ ഓട്ടോയുടെ വായ്പാ തിരിച്ചടവ് മുടങ്ങിയിരുന്നു.
തിങ്കളാഴ്ച ബജാജ് ഫൈനാൻസിൽ നിന്നും ജീവനക്കാർ ഓട്ടോ സ്റ്റാൻഡിൽ എത്തിയിരുന്നതായി സുഹൃത്തുക്കൾ പറയുന്നു. പണം ഉടൻ അടയ്ക്കാമെന്ന് പറഞ്ഞെങ്കിലും ജീവനക്കാർ ഭീഷണി മുഴക്കിയാണ് മടങ്ങിയതെന്നും ആരോപണമുണ്ട്.
പഞ്ചായത്ത് ഓഫീസിന് തൊട്ടുമുൻപിലാണ് ഓട്ടോ സ്റ്റാൻഡ്. ഭീഷണിയിൽ മനംനൊന്താണ് മരണം എന്നാണ് സുഹൃത്തുക്കൾ പറയുന്നത്. ആരോപണം പരിശോധിക്കുമെന്ന് പോലീസ് അറിയിച്ചു. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റുമോർട്ടത്തിനായി കോഴിക്കോട് മെഡിക്കൽ കോളജിലേക്ക് മാറ്റി.

🔹കോട്ടയം മെഡിക്കൽ കോളജ് ആശുപത്രിയിൽ പ്രസവത്തിനിടെ യുവതി മരിച്ച സംഭവത്തിൽ ചികിത്സാപ്പിഴവ് ആരോപിച്ചു ബന്ധുക്കൾ രംഗത്ത്.
ആലപ്പുഴ ഓമനപ്പുഴ പൊള്ളയിൽ സ്വദേശി അനീഷിന്‍റെ ഭാര്യ ഫേബ (27) ആണ് മരിച്ചത്. ആശുപത്രി അധികൃതരുടെ ഭാഗത്തുനിന്നുണ്ടായ അനാസ്ഥയാണ് മരണകാരണമെന്ന് ആരോപിച്ച് ബന്ധുക്കൾ പോലീസിലും ആശുപത്രി സൂപ്രണ്ടിനും പരാതി നൽകി.ആലപ്പുഴയിൽ നിന്ന് റഫർ ചെയ്തതിനെ തുടർന്നാണ് കഴിഞ്ഞ ശനിയാഴ്ചയാണ് ഇവരെ കോട്ടയം മെഡിക്കൽ കോളജിൽ അഡ്മിറ്റ് ചെയ്തത്.പ്രസവവേദന അനുഭവപ്പെട്ടതിനെ തുടർന്ന് തിങ്കളാഴ്ച പുലർച്ചെ ലേബർ റൂമിലേക്ക് മാറ്റി. ആദ്യഘട്ടത്തിൽ സുഖപ്രസവം നടക്കുമെന്ന് ഡോക്ടർമാർ അറിയിച്ചിരുന്നെങ്കിലും പിന്നീട് സ്ഥിതി വഷളാവുകയും ശസ്ത്രക്രിയയിലൂടെ കുഞ്ഞിനെ പുറത്തെടുക്കുകയുമായിരുന്നു.ശസ്ത്രക്രിയയ്ക്ക് പിന്നാലെ യുവതിക്ക് ഹൃദയസ്തംഭനം ഉണ്ടായതായാണ് ഡോക്ടർമാർ ബന്ധുക്കളെ അറിയിച്ചത്. എന്നാൽ, ശസ്ത്രക്രിയ നടത്താൻ വൈകിയതാണ് മരണത്തിന് കാരണമായതെന്നും ഡോക്ടർമാരുടെ ഭാഗത്തുനിന്ന് ഗുരുതരമായ വീഴ്ചയുണ്ടായെന്നുമാണ് ബന്ധുക്കളുടെ പ്രധാന ആരോപണം. നിലവിൽ യുവതിയുടെ മൃതദേഹം ചേർത്തലയിലെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംഭവത്തിൽ വിശദമായ അന്വേഷണം വേണമെന്നാണ് കുടുംബത്തിന്‍റെ ആവശ്യം.

🔹ചമ്പക്കര കനാലില്‍ അജ്ഞാത മൃതദേഹം കണ്ടെത്തി. 30നും 40 നും ഇടയില്‍ പ്രായമുള്ള പുരുഷന്‍റെ മൃതദേഹമാണ് കണ്ടെത്തിയത്.ഇന്ന് രാവിലെയാണ് കറുത്ത ട്രാക്ക് സ്യൂട്ടും ടീഷര്‍ട്ടും ധരിച്ച ചെറുപ്പക്കാരന്‍റെ മൃതദേഹം നാട്ടുകാരുടെ ശ്രദ്ധയില്‍പ്പെട്ടത്. ചമ്പക്കര കനാലിന്‍റെ തൈക്കൂടം ഭാഗത്താണ് മൃതദേഹം ഒഴുകി നടന്നത്. പോലീസ് സ്ഥലത്തെത്തിയാണ് മൃതദേഹം കരയ്ക്കടുപ്പിച്ചത്.മൃതദേഹത്തിന് മൂന്നോ നാലോ ദിവസത്തെ പഴക്കം ഉണ്ടെന്നാണ് പോലീസിന്‍റെ നിഗമനം. ആളെ തിരിച്ചറിയുന്നതിനായി നഗരത്തിലെയും സമീപപ്രദേശങ്ങളിലെയും മിസിംഗ് കേസുകള്‍ പോലീസ്
പരിശോധിക്കുന്നുണ്ട്. പോസ്റ്റ്‌മോര്‍ട്ടത്തിന് ശേഷമേ മരണകാരണം വ്യക്തമാകൂ.

🔹 കവടിയാറിൽ വീട്ടുവാടക ചോദിച്ചതിലുള്ള വൈരാഗ്യത്തിൽ വീട്ടുടമസ്ഥനെ തടിക്കഷണം കൊണ്ട് അടിച്ച് കൊലപ്പെടുത്താൻ ശ്രമം. സംഭവത്തിൽ പ്രതിയെ പോലീസ് അറസ്റ്റ് ചെയ്തു.വലിയമല സരോവരത്തിൽ പ്രേംകുമാർ (49) ആണ് അറസ്റ്റിലായത്. മ്യൂസിയം പോലീസ് ആണ് ഇയാളെ അറസ്റ്റ് ചെയ്തത്. കവടിയാർ നന്ദൻകോട് സ്വദേശിയായ വീട്ടുടമസ്ഥനാണ് ആക്രമണത്തിന് ഇരയായത്. കഴിഞ്ഞ ദിവസം രാത്രി പത്തോടെയാണ് കേസിനാസ്പദമായ സംഭവം നടന്നത്. വാടക ചോദിച്ചതിലുള്ള വിരോധം കാരണം വീട്ടുടമസ്ഥൻ താമസിക്കുന്ന വീട്ടിൽ അതിക്രമിച്ചു കയറിയ പ്രതി, അദ്ദേഹത്തെ അസഭ്യം പറയുകയും കൈയിൽ കരുതിയിരുന്ന തടിക്കഷണം കൊണ്ട് ക്രൂരമായി മർദ്ദിക്കുകയുമായിരുന്നെന്ന് പോലീസ് പറയുന്നു.

🔹നീറ്റ് യുജി പരീക്ഷയിലെ ക്രമക്കേടുമായി ബന്ധപ്പെട്ട പരാതികള്‍ കേന്ദ്രത്തിനെതിരെ ആയുധമാക്കി പ്രതിപക്ഷം. യുവാക്കളോട് പ്രധാനമന്ത്രി മറുപടി പറയണമെന്ന് പ്രിയങ്ക ഗാന്ധി ആവശ്യപ്പെട്ടു. വിദ്യാര്‍ത്ഥികളെ ദ്രോഹിക്കുകയാണ് മോദി സര്‍ക്കാര്‍ എന്നാണ് ആം ആദ്മി പാര്‍ട്ടി നേതാവ് അരവിന്ദ് കെജ്രിവാള്‍ പ്രതികരിച്ചു.

🔹കേരളത്തിലെ തെരഞ്ഞെടുപ്പില്‍ പരമ്പരാഗത ഇടത് വോട്ടുകളില്‍ ചോര്‍ച്ചയുണ്ടായതായി സിപിഐ ദേശീയ കൗണ്‍സില്‍. വോട്ട് ചോര്‍ച്ച ആശങ്കാജനകമാണെന്നാണ് വിലയിരുത്തല്‍. കൂടാതെ തമിഴ്നാട്ടില്‍ ജോസഫ് വിജയ്യുടെ സത്യപ്രതിജ്ഞ ചടങ്ങില്‍ തമിഴ് തായ് വാഴ്ത്ത് അവസാനം ആലപിച്ചതിനെതിരെയും കൗണ്‍സിലില്‍ പ്രമേയം പാസാക്കി.

🔹വടക്കന്‍ ശ്രീലങ്കന്‍ തീരത്തിന് സമീപം തെക്കു പടിഞ്ഞാറന്‍ ബംഗാള്‍ ഉള്‍ക്കടലില്‍ ന്യൂനമര്‍ദം രൂപപ്പെട്ടെന്നും അടുത്ത 48 മണിക്കൂറിനുള്ളില്‍ ഇത് കൂടുതല്‍ ശക്തിപ്പെടാന്‍ സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ്. സംസ്ഥാനത്ത് വരുന്ന 14, 15 ദിവസങ്ങളില്‍ ഒറ്റപ്പെട്ട ശക്തമായ മഴയ്ക്കും സാധ്യതയുണ്ട്.

🔹യാത്രക്കാര്‍ക്ക് ടോള്‍ ബൂത്തുകളില്‍ വാഹനം നിര്‍ത്താതെ യാത്ര തുടരാം. ദില്ലി-എന്‍സിആറിലെ ആദ്യ ബാരിയര്‍ ലെസ് ടോളിങ് സംവിധാനം കേന്ദ്ര ഉപരിതല ഗതാഗത വകുപ്പ് മന്ത്രി നിതിന്‍ ഗഡ്കരി ഉദ്ഘാടനം ചെയ്തിരിക്കുകയാണ്. മുണ്ട്ക-ബക്കര്‍വാല ടോള്‍ പ്ലാസയിലാണ് ആദ്യ മള്‍ട്ടി ലെയ്ന്‍ ഫ്രീ ഫ്ലോ ടോളിങ് സംവിധാനം നടപ്പിലായത്.

🔹തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്തതിനു പിന്നാലെ മദ്യശാലകൾക്ക് പൂട്ടിട്ട് വിജയ്. ആരാധനാലയങ്ങൾ, സ്കൂളുകൾ, ബസ് സ്റ്റാൻഡുകൾ എന്നിവയുടെ 500 മീറ്റർ അടുത്തുള്ള മദ്യശാലകൾ അടച്ചുപൂട്ടാൻ മുഖ്യമന്ത്രി ഉത്തരവിട്ടു.തീരുമാനം നടപ്പിലാകുന്നതോടെ 717 ടാസ്മാക് ഔട്ട്‍ലെറ്റുകൾ അടച്ചുപൂട്ടും. സ്കൂളുകൾക്ക് സമീപമുള്ള 186, ആരാധനാലയങ്ങൾക്ക് സമീപമുള്ള 276, ബസ് സ്റ്റാൻഡിനടുത്തുള്ള 255 മദ്യശാലകളാണ് അടച്ചുപൂട്ടുന്നത്.ഉത്തരവ് രണ്ടാഴ്ചയ്ക്കകം നടപ്പിലാക്കണമെന്നാണ് നിർദേശം. തമിഴ്നാട്ടിൽ ആകെ 4765 ടാസ്മാക് ഔട്ട്‌ലെറ്റുകൾ ഉണ്ട്. പൊതുജനതാല്പര്യാർഥമുള്ള നടപടി എന്നാണ് ഉത്തരവിൽ പറയുന്നത്.

🔹തമിഴ്നാട് രാഷ്ട്രീയത്തില്‍ പുതിയ ശൈലിയുമായി മുഖ്യമന്ത്രി വിജയ്. മുതിര്‍ന്ന നേതാക്കളുടെ വീടുകളില്‍ വിജയ് സന്ദര്‍ശനം നടത്തി. സ്റ്റാലിന് പിന്നാലെ വൈക്കോയെയും എസ് രാമദാസിനെയും ആണ് വീടുകളിലെത്തി കണ്ടത്. വൈക്കോയുടെ വീട്ടില്‍ ഹൃദ്യമായ രംഗങ്ങളാണ് അരങ്ങേറിയത്. വീട്ടിലെ ജീവനക്കാരായ സ്ത്രീകള്‍ വിജയ് യുടെ അടുത്തെത്തി വിസിലിനാണ് വോട്ട് ചെയ്തതെന്ന് പറഞ്ഞു. വിജയ് അവര്‍ക്ക് നന്ദി പറയുകയും ചെയ്തു.

🔹ഗാര്‍ഹിക പീഡനക്കേസിലെ പ്രതിയുടെ മുന്‍കൂര്‍ ജാമ്യാപേക്ഷ തള്ളിക്കൊണ്ട് സുപ്രീംകോടതി സുപ്രധാന നിരീക്ഷണം നടത്തി. ഭാര്യയെ മൃഗത്തെപ്പോലെ പരിഗണിക്കരുതെന്നും സ്ത്രീകള്‍ക്ക് അന്തസ്സോടെ ജീവിക്കാന്‍ അവകാശമുണ്ടെന്നും ജസ്റ്റിസുമാരായ അരവിന്ദ് കുമാര്‍, പി ബി വരാലെ എന്നിവരടങ്ങിയ ബെഞ്ച് വ്യക്തമാക്കി.

🔹ഈ വര്‍ഷത്തെ സിബിഎസ്ഇ പ്ലസ്ടു പരീക്ഷാ ഫലം ഉടന്‍ പ്രസിദ്ധീകരിച്ചേക്കും. മെയ് 12 ചൊവ്വാഴ്ചയ്ക്കകം ഫലം പ്രസിദ്ധീകരിച്ചേക്കുമെന്ന് ദേശീയ മാധ്യമങ്ങളുടെ റിപ്പോര്‍ട്ട്. സിബിഎസ്ഇ പ്ലസ്ടു ഫലം ഉടന്‍ ഉണ്ടാകുമെന്ന് ഡിജിലോക്കര്‍ തിങ്കളാഴ്ച ഉച്ചകഴിഞ്ഞ് എക്സിലൂടെ അറിയിച്ചിട്ടുണ്ട്.

🔹പശ്ചിമേഷ്യന്‍ സംഘര്‍ഷം മൂലം ആഗോള ക്രൂഡ് ഓയില്‍ വില കുതിച്ചുയരുന്ന സാഹചര്യത്തില്‍ ഇന്ത്യയിലും എണ്ണ വില വര്‍ധിച്ചേക്കും. എണ്ണക്കമ്പനികളുടെ നഷ്ടം ഒരുലക്ഷം കോടി കടന്നതിനാല്‍ പെട്രോളിനും ഡീസലിനും ലിറ്ററിന് അഞ്ച് രൂപ വരെയും ഗാര്‍ഹിക എല്‍പിജിക്ക് 50 രൂപ വരെയും വില വര്‍ധിപ്പിക്കാന്‍ കേന്ദ്രം അനുമതി നല്‍കുമെന്നാണ് റിപ്പോര്‍ട്ട്.

🔹രാജ്യത്ത് നിലവില്‍ എല്‍പിജി, ഇന്ധന ക്ഷാമം ഇല്ലെന്ന് കേന്ദ്ര സര്‍ക്കാര്‍. ഇന്ത്യയില്‍ 60 ദിവസത്തെ അസംസ്‌കൃത എണ്ണയും 60 ദിവസത്തെ പ്രകൃതിവാതകവും 45 ദിവസത്തെ എല്‍പിജിയും സ്റ്റോക്കുണ്ടെന്ന് മന്ത്രി രാജ്നാഥ് സിങ് അറിയിച്ചു. പശ്ചിമേഷ്യന്‍ പ്രതിസന്ധിയുമായി ബന്ധപ്പെട്ട് ജനങ്ങള്‍ക്ക് നല്‍കിയത് ജാഗ്രതക്കുള്ള സന്ദേശം മാത്രമാണെന്ന് രാജ്നാഥ് സിങ് പറഞ്ഞു.

🔹തമിഴ്നാട് നിയമസഭയിലെ എംഎല്‍എമാരുടെ സത്യപ്രതിജ്ഞാ ചടങ്ങില്‍ ടിവികെയുടെ നിയുക്ത മന്ത്രി എസ് കീര്‍ത്തനയ്ക്ക് സത്യപ്രതിജ്ഞ ചെയ്യാന്‍ കഴിഞ്ഞില്ല. തെരഞ്ഞെടുപ്പ് സര്‍ട്ടിഫിക്കറ്റ് ഹാജരാക്കാന്‍ കഴിയാത്തതിനെത്തുടര്‍ന്നാണ് സത്യപ്രതിജ്ഞ ചെയ്യാന്‍ കഴിയാഞ്ഞത്.

🔹ഹരായാനയില്‍ ഗുരുഗ്രാമിലെ സോഹ്ന റോഡ് എക്സ്പ്രസ് വേയുടെ നടുക്ക് വീണ്ടും വന്‍ ഗര്‍ത്തം. സുഭാഷ് ചൗക്കിന് സമീപാണ് സോഹ്ന റോഡ് എക്സ്പ്രസ് വേയുടെ പ്രധാന ഭാഗത്ത് വലിയ ഗര്‍ത്തം രൂപപ്പെട്ടത്. ഏകദേശം 15 അടിയോളം താഴ്ചയുള്ള ഗര്‍ത്തമാണ് രൂപപ്പെട്ടത്. ഡ്രെയിനേജ് സംവിധാനം കൃത്യമായി ആസൂത്രണം ചെയ്യാത്തതിലുള്ള വീഴ്ചയാണ് റോഡ് ഇടിഞ്ഞ് താഴാന്‍ കാരണമെന്നാണ് നിഗമനം.

🔹പശ്ചിമ ബംഗാള്‍ മുഖ്യ തിരഞ്ഞെടുപ്പ് ഓഫീസറായിരുന്ന മനോജ് അഗര്‍വാളിനെ സംസ്ഥാനത്തെ പുതിയ ചീഫ് സെക്രട്ടറിയായി നിയമിച്ചു. അടുത്തിടെ നടന്ന നിയമസഭാ തിരഞ്ഞെടുപ്പിന് മേല്‍നോട്ടം വഹിച്ച ഉദ്യോഗസ്ഥനാണ് ഇദ്ദേഹം.

🔹പശ്ചിമബംഗാള്‍ മുന്‍മന്ത്രിയും ടിഎംസി നേതാവുമായ സുജിത് ബോസിനെ എന്‍ഫോഴ്‌സ്‌മെന്റ് ഡയറക്ടറേറ്റ് അറസ്റ്റ് ചെയ്തു. മുന്‍സിപ്പാലിറ്റി റിക്രൂട്ട്‌മെന്റ് തട്ടിപ്പുമായിബന്ധപ്പെട്ട കള്ളപ്പണക്കേസിലാണ് നടപടി.

🔹യുഎഇയിലെ ഇന്ത്യന്‍ പ്രവാസികളെ ഫുജൈറ തുറമുഖം വഴി ഒഴിപ്പിക്കാന്‍ ഇന്ത്യയും യുഎഇയും തമ്മില്‍ ധാരണയായെന്ന തരത്തില്‍ പ്രചരിക്കുന്ന വാര്‍ത്തകള്‍ അടിസ്ഥാനരഹിതമാണെന്ന് കേന്ദ്ര വിദേശകാര്യ മന്ത്രാലയം അറിയിച്ചു. ഇത്തരം വ്യാജവാര്‍ത്തകള്‍ വിശ്വസിക്കരുതെന്നും ഔദ്യോഗിക ചാനലുകളില്‍ നിന്നുള്ള വിവരങ്ങള്‍ മാത്രം സ്വീകരിക്കണമെന്നും അധികൃതര്‍ നിര്‍ദ്ദേശിച്ചു.

🔹ഹാന്റ വൈറസ് രോഗം റിപ്പോര്‍ട്ട് ചെയ്ത ക്രൂയിസ് കപ്പലില്‍ ഉണ്ടായിരുന്ന ഒരു യാത്രക്കാരന് കൂടി രോഗം സ്ഥിരീകരിച്ചു. അമേരിക്കന്‍ പൗരനായ യാത്രക്കാരനാണ് രോഗം സ്ഥിരീകരിച്ചത്. ഇയാളെ കപ്പലില്‍നിന്ന് ഒഴിപ്പിച്ച് അമേരിക്കയിലേക്ക് എത്തിച്ചിരിക്കുകയാണ്.

🔹അമേരിക്കന്‍ പ്രസിഡന്റ് ഡോണള്‍ഡ് ട്രംപ് പുറത്തിറക്കിയ ഗോള്‍ഡ് കാര്‍ഡ് പ്രോഗ്രാമിനോട് താല്‍പര്യം കാട്ടാതെ സമ്പന്നരും ഇമിഗ്രേഷന്‍ അഭിഭാഷകരും. കഴിഞ്ഞ വര്‍ഷം സെപ്റ്റംബറില്‍ പ്രാബല്യത്തില്‍ വന്ന വിസ പ്രോഗ്രാമിന്റെ ഭാവി സംബന്ധിച്ച് അനിശ്ചിതത്വം നിലനില്‍ക്കുന്നതായി അഭിഭാഷകര്‍ പറയുന്നു.

🔹മണ്ണിനടിയിലെ അവശിഷ്ടങ്ങള്‍ക്കിടയില്‍ ഒളിപ്പിച്ചിരിക്കുന്ന ഇറാന്റെ സമ്പുഷ്ടീകരിച്ച യുറേനിയം ശേഖരം യുഎസ് സ്പേസ് ഫോഴ്‌സിന്റെ നിരീക്ഷണത്തിലാണെന്നും ആരെങ്കിലും അതിന് അടുത്തേക്ക് പോകാന്‍ ശ്രമിച്ചാല്‍ അവരെ തകര്‍ക്കുമെന്നും അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ മുന്നറിയിപ്പ്. മാധ്യമപ്രവര്‍ത്തക ഷെറില്‍ അറ്റ്കിസണുമായുള്ള അഭിമുഖത്തിലാണ് ട്രംപ് ഈ കടുത്ത നിലപാട് വ്യക്തമാക്കിയത്.

‎🔹ഇറാൻ്റെ സൈനിക വിമാനങ്ങൾക്ക് പാകിസ്ഥാൻ്റെ വ്യോമതാവളത്തിൽ അഭയം നൽകിയെന്ന് റിപ്പോർട്ട്. അമേരിക്കയുടെയും ഇസ്രായേലിൻ്റെയും ആക്രമണമുണ്ടാകാനുള്ള സാധ്യതയുണ്ടെന്നിരിക്കെ ആണ് പാകിസ്ഥാൻ്റെ നൂർ ഖാൻ വ്യോമതാവളത്തിൽ ഇറാൻ്റെ വിമാനങ്ങൾ പാർക്ക് ചെയ്യാൻ അനുമതി നൽകിയത്.

‎

🔹ഐപിഎല്ലില്‍ പഞ്ചാബ് കിങ്സിനെതിരെ ഡല്‍ഹി ക്യാപിറ്റല്‍സിന് മൂന്ന് വിക്കറ്റിന്റെ വിജയം. ആദ്യം ബാറ്റ് ചെയ്ത പഞ്ചാബ് 33 പന്തില്‍ 56 റണ്‍സ് നേടിയ പ്രിയാന്‍ഷ് ആര്യയുടേയും 36 പന്തില്‍ 59 റണ്‍സ് നേടിയ ക്യാപ്റ്റന്‍ ശ്രേയസ് അയ്യരുടേയും കരുത്തില്‍ 5 വിക്കറ്റ് നഷ്ടത്തില്‍ 210 റണ്‍സെടുത്തു. മറുപടി ബാറ്റിംഗിനിറങ്ങിയ ഡല്‍ഹി 30 പന്തില്‍ 56 റണ്‍സെടുത്ത അക്സര്‍ പട്ടേലിന്റേയും 28 പന്തില്‍ 51 റണ്‍സെടുത്ത ഡേവിഡ് മില്ലറുടേയും മികവില്‍ 7 വിക്കറ്റ് നഷ്ടത്തില്‍ ഒരോവര്‍ ബാക്കിനില്‍ക്കെ വിജയലക്ഷ്യത്തിലെത്തി. സീസണിലെ ആദ്യ പകുതിയില്‍ തോല്‍വിയറിയാതെ മുന്നേറിയ പഞ്ചാബ് കിങ്‌സ് തുടര്‍ച്ചയായ നാല് തോല്‍വിയോടെ പോയിന്റ് പട്ടികയില്‍ നാലാം സ്ഥാനത്തേക്ക് വീണിരിക്കുകയാണ്.

🔹സൂര്യ ആരാധകര്‍ ഏറെ ആകാംക്ഷയോടെ കാത്തിരുന്ന ‘കറുപ്പ്’ ചിത്രത്തിന്റെ ഗംഭീര ട്രെയിലര്‍ റിലീസായി. ആര്‍.ജെ. ബാലാജി സംവിധാനം ചെയ്യുന്ന ചിത്രം മെയ് 14-ന് ലോകമെമ്പാടുമുള്ള തിയേറ്ററുകളില്‍ എത്തും. കേരളത്തിലെ ചിത്രത്തിന്റെ അഡ്വാന്‍സ് ബുക്കിങ് ഇന്ന് രാത്രി 9 മണി മുതല്‍ ആരംഭിക്കും. രണ്ട് പതിറ്റാണ്ടുകള്‍ക്ക് ശേഷം സൂര്യയും തൃഷയും വീണ്ടും ഒന്നിക്കുന്നതാണ് ചിത്രത്തിന്റെ പ്രധാന ആകര്‍ഷണം. ഇരുവരും ഇതുവരെ ചെയ്ത വേഷങ്ങളില്‍ നിന്ന് വ്യത്യസ്തമായ ഗെറ്റപ്പിലും മേക്കോവറിലുമായാണ് കറുപ്പില്‍ എത്തുന്നത്. വൈറല്‍ ഹിറ്റുകളിലൂടെ ശ്രദ്ധേയനായ യുവ സംഗീത സംവിധായകന്‍ സായ് അഭ്യാങ്കറാണ് ചിത്രത്തിന് സംഗീതം ഒരുക്കുന്നത്. ഇന്ദ്രന്‍സ്, നാട്ടി, സ്വാസിക, അനഘ മായ രവി, ശിവദ, സുപ്രീത് റെഡ്ഡി തുടങ്ങിയ പ്രമുഖ താരങ്ങളും ചിത്രത്തില്‍ പ്രധാന വേഷങ്ങളില്‍ എത്തുന്നു.

🔹ടൊവിനോ തോമസും നസ്രിയയും ഒന്നിക്കുന്ന പുതിയ ചിത്രം ‘ഗ്രാസ്യാസ് എല്‍ ക്ലാസിക്കോ’ ടൈറ്റില്‍ ലുക്ക് പുറത്ത്. ബാഴ്സയുടെ ഹോം ഗ്രൗണ്ടായ ക്യാമ്പ് നൗവില്‍ റയല്‍ – ബാഴ്സ എല്‍ ക്ലാസിക്കോ മത്സരത്തിന്റെ കിക്കോഫിനൊപ്പമാണ് സ്റ്റേഡിയത്തില്‍ നിന്നും കാണികള്‍ക്കൊപ്പമിരുന്ന് തത്സമയം തങ്ങളുടെ പുതിയ ചിത്രത്തിന്റെ ടൈറ്റില്‍ ലോഞ്ച് ടൊവിനോയും നസ്രിയയും ചേര്‍ന്ന് നിര്‍വ്വഹിച്ചത്. സ്പാനിഷ് ലാ ലിഗയില്‍ കിരീടം നിര്‍ണ്ണയിക്കുന്ന നിര്‍ണ്ണായകമായ എല്‍ ക്ലാസിക്കോ പോരാട്ടത്തിന്റെ കിക്കോഫ് ടൈമില്‍ ഒരു മലയാളം സിനിമയുടെ ടൈറ്റില്‍ ലോഞ്ച് തത്സമയം നിര്‍വ്വഹിക്കപ്പെടുന്നു എന്ന അപൂര്‍വ്വതയും ഇതിനുണ്ട്. ഒട്ടേറെ ഹിറ്റ് സിനിമകളുടെ തിരക്കഥാകൃത്തും സംവിധായകനും ഗാനരചയിതാവുമായ മുഹ്‌സിന്‍ പരാരിയാണ് സിനിമയുടെ സംവിധായകന്‍. പ്രേക്ഷക പ്രശംസ നേടിയ ‘സുഡാനി ഫ്രം നൈജീരിയ’യുടെ സംവിധായകന്‍ സക്കരിയയുമായി ചേര്‍ന്നാണ് മുഹ്സിന്‍ പരാരി ഈ പുതിയ ചിത്രത്തിന് തിരക്കഥ ഒരുക്കുന്നത് എന്ന പ്രത്യേകതയുമുണ്ട്.

💦 ഗുരുജിയുടെ വാക്കുകൾ

ലളിതജീവിതം, ആഡംബരത്തിനായി വെമ്പല്‍കൊള്ളുന്ന ലോകത്തിന് അസ്വീകാര്യമാണെങ്കിലും ഭാവാത്മകവും, ജീവിതത്തെ ഉറപ്പാക്കുന്നതുമായ ഒന്നായി അതിനെ ശുപാര്‍ശ ചെയ്യുന്നു.. ലാളിത്യം ജീവിതത്തിന്റെ രസം ഇല്ലാതെയാക്കുകയോ, ശുഷ്കമാക്കുകയോ ഇല്ല. മറിച്ച് പൂര്‍ണ്ണതയുടെ നവവും ആഴവുമായ അര്‍ത്ഥം കണ്ടെത്താന്‍ അത് നമ്മെ സഹായിക്കും. ലാളിത്യം ജീവിതത്തിനു സൗന്ദര്യവും സ്വാതന്ത്ര്യവും പ്രദാനം ചെയ്യുന്നു. ജീവിതത്തിന്റെ എല്ലാ സങ്കീര്‍ണതകളിലും ജീവൻ്റെ സൗന്ദര്യവും വിശുദ്ധിയും ആഘോഷിക്കണമെങ്കിൽ ലാളിത്യം കൂടിയെ തീരു. എളിയവനാകുമ്പോൾ, ലാളിത്യം പുലർത്തുമ്പോൾ നാം നന്മയിലേക്ക് കൂടുതൽ അടുക്കുകയാണ് ചെയ്യുന്നത്.

തയ്യാറാക്കിയത്: കപിൽ ശങ്കർ

23 Likes

📱വാർത്തകൾ ഒറ്റനോട്ടത്തിൽ📱 – 2026 | മെയ് 12 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 27 | തിങ്കൾ ✍️ കപിൽ ശങ്കർ

യുഎസ്-ഇറാൻ സംഘർഷം: വ്യോമാക്രമണങ്ങൾക്ക് താൽക്കാലിക വിരാമം; ചർച്ചകൾക്ക് സാധ്യത പ്രഖ്യാപിച്ച് ട്രംപ് ഭരണകൂടം

കാലിഫോർണിയയിൽ 9-വയസ്സുള്ള ഇരട്ടക്കുട്ടികളെ പിതാവ് തട്ടിയെടുത്തു; തിരച്ചിൽ ഊർജിതം

LEAVE A REPLY Cancel reply

Most Popular

തിരുവനന്തപുരത്ത് വാഹനാപകടം: ജനം ടി.വി. ക്യാമറാമാൻ അഭിജിത്ത് ശ്രീകുമാർ അന്തരിച്ചു.

വിശാഖ് കൊലക്കേസ്: മുഖ്യപ്രതി പ്രദീപ് ഉൾപ്പെടെ നാല് പേർ പിടിയിൽ.

പോക്സോ കേസിൽ അതിജീവിതയെ കാണാനില്ല; വിദ്യാർഥിനി പ്രതിക്കൊപ്പം കടന്നു കളഞ്ഞതായി പോലീസ്.

പരീക്ഷ പരിഷ്‌കരണത്തിന് ടാസ്‌ക്‌ഫോഴ്‌സ് പ്രഖ്യാപിച്ച് പ്രധാനമന്ത്രി.

Recent Comments

EDITOR PICKS

തിരുവനന്തപുരത്ത് വാഹനാപകടം: ജനം ടി.വി. ക്യാമറാമാൻ അഭിജിത്ത് ശ്രീകുമാർ അന്തരിച്ചു.

വിശാഖ് കൊലക്കേസ്: മുഖ്യപ്രതി പ്രദീപ് ഉൾപ്പെടെ നാല് പേർ പിടിയിൽ.

പോക്സോ കേസിൽ അതിജീവിതയെ കാണാനില്ല; വിദ്യാർഥിനി പ്രതിക്കൊപ്പം കടന്നു കളഞ്ഞതായി പോലീസ്.

POPULAR POSTS

പരീക്ഷ പരിഷ്‌കരണത്തിന് ടാസ്‌ക്‌ഫോഴ്‌സ് പ്രഖ്യാപിച്ച് പ്രധാനമന്ത്രി.

പൊതുപരീക്ഷാ ഭേദഗതി ബിൽ ലോക്‌സഭയിൽ അവതരിപ്പിച്ചു.

POPULAR CATEGORY

ABOUT US

FOLLOW US