സെൻ്റ് ജോർജ് അവന്യൂ (ന്യൂ ജേഴ്സി): നാമം സ്പെഷ്യൽ ജൂറി ബഹുമതികൾ, ജോർജ് ജോസഫ്, സുനിൽ ട്രൈസ്റ്റാർ, ഗുരു ടി.എസ്. നന്ദകുമാർ എന്നീ നിസ്തുല പ്രതിഭകൾക്ക് സമർപ്പിക്കുതായി നാമം ഫൗണ്ടറും ചീഫ് പേട്രണുമായ മാധവൻ ബി നായർ, പ്രസിഡൻ്റ് പ്രദീപ് മേനോൻ, സെക്രട്ടറി ബിന്ദു സത്യ, ട്രഷറാർ സിറിയക് എബ്രഹാം എന്നിവർ അറിയിക്കുന്നു.
ഗുരു ടി.എസ്. നന്ദകുമാർ (പെർഫോമിംഗ് ആർട്സ്) :
ഇന്ത്യാ ഗവണ്മെ ൻ്റിൻ്റെ സംഗീത നാടക അക്കാദമി അവാർഡ് (2025) നേടിയ കലാ നിപുണൻ, അന്താരാഷ്ട്ര പ്രശസ്തനായ മൃദംഗസംഗീതജ്ഞൻ, അധ്യാപകൻ, സാംസ്കാരിക അംബാസഡർ എന്നീ നിലകളിൽ പുകളറിഞ്ഞ ഗുരു ടി. എസ്. നന്ദകുമാർ, കർണാടക സംഗീതകലകളുടെ സമ്പന്നമായ പാരമ്പര്യങ്ങൾ ആഗോളതലത്തിൽ സംരക്ഷിക്കുന്നതിനും, പഠിപ്പിക്കുന്നതിനുമായി അഞ്ചിലേറെ പതിറ്റാണ്ടുകൾ, കർമ നിരതമാക്കി. ന്യൂ ജേഴ്സി ആസ്ഥാനമായുള്ള “ ടി എസ് എൻ പെർക്കസീവ് ആർട്സ് സെന്ററിന്റെ “ സ്ഥാപകനായും, ഗുരു എന്ന നിലയിലും, ഇന്ത്യയ്ക്ക് പുറത്ത്, ക്ലാസിക്കൽ ഇന്ത്യൻ താളവാദ്യങ്ങൾ പഠിപ്പിക്കുന്ന ശൈലികളിൽ, ടി.എസ്. നന്ദകുമാർ, വിപ്ലവം സൃഷ്ടിച്ചു, ദേശാതിർത്തികൾ കടന്ന്, എണ്ണമറ്റ വിദ്യാർത്ഥികളെ, കലോപാസനയിൽ വ്യാ പൃതരാക്കി. ആത്മാർത്ഥമായ ലയവും സമർത്ഥമായ പ്രകടനവും, ഗുരു ടി.എസ്. നന്ദകുമാറിനെ, ഇതിഹാസ കർണാടക വയലിൻ ത്രിമൂർത്തികൾ, ഗായകർ എന്നിവരോടൊപ്പം, സഹയാത്രികനായി മാറ്റി. മൃദംഗത്തിന്റെ ആധികാരികവും സങ്കീർണ്ണവുമായ ഭാഷ, പാശ്ചാത്യലോകത്തു പോലും, തലമുറകളിലുടനീളം, അഭിവൃദ്ധി പ്രാപിക്കുന്നുവെന്ന്, അദ്ദേഹത്തിന്റെ ആജീവനാന്ത പ്രതിബദ്ധത ഉറപ്പാക്കുന്നു. ക്ഷേത്രകലാ പാരമ്പര്യങ്ങൾ വേരൂന്നിയ, അമ്പലപ്പുഴയിലാണ് ടി.എസ്. നന്ദകുമാർ ജനിച്ചത്. പരമ്പരാഗത സംഗീതത്തോട് ആഴമായ ആദരവുള്ള കുടുംബത്തിൽ ജനിച്ച അദ്ദേഹം, വളരെ ചെറുപ്പത്തിൽ തന്നെ, കൈതമന മാധവൻ നമ്പൂതിരിയുടെ മാർഗനിർദേശപ്രകാരം, മൃദംഗം പഠിക്കാൻ തുടങ്ങി. കരിയറിന്റെ പ്രധാന ഭാഗം മുംബൈയിൽ ചെലവഴിച്ചു, തുടർന്ന് അമേരിക്കയിലേക്കും യുണൈറ്റഡ് കിംഗ്ഡത്തിലേക്കും അദ്ധ്യാപനം വ്യാപിപ്പിച്ചു.
ജോർജ് ജോസഫ് (പത്രപ്രവർത്തനം):
അമേരിക്കൻ മലയാള “മാദ്ധ്യമ മോശസ്” എന്ന വിളിപ്പേരിന് അർഹനായ ജോർജ് ജോസഫ്, അമേരിക്കൻ മാദ്ധ്യമ കുലപതികളിലെ തുല്യരിൽ ഒന്നാമനാണ്. മുതിർന്ന പത്രപ്രവർത്തകനും മാധ്യമ നേതാവുമായ “ഈ മലയാളി ജോർജ് ജോസഫ്”, പത്രപ്രവർത്തനത്തിലെ നാലരപ്പതിറ്റാണ്ടിൻ്റെ തങ്കത്തിളക്കത്തിലാണ്. അമേരിക്കൻ മലയാളികളുടെ വാർത്താ ദാഹത്തെ ഏതു നേരവും തൃപ്തിപ്പെടുത്തി, “ഈ മലയാളി” എന്ന അത്ഭുത വാർത്താ സംവിധാനത്തിലൂടെ, പൗരബോധത്തിൻ്റെ ആർജ്ജവതലത്തിലേയ്ക്ക് ജോർജ്ജ് ജോസഫ് അനുസ്യൂതം ആനയിക്കുന്നു.
ഇന്ത്യൻ-അമേരിക്കൻ സംസ്കൃതിയിൽ, പ്രിന്റ്/ഡിജിറ്റൽ ജേണലിസത്തിന്റെ അടിസ്ഥാന സ്തംഭംങ്ങളിൽ സ്വർണ്ണ നാമം ജോർജ്ജ് ജോസഫിൻ്റേതാണ്. അമേരിക്കയിലുടനീളമുള്ള മലയാളികൾക്കും ഇന്ത്യൻ പത്രപ്രവർത്തകർക്കും വേണ്ടി വാദിക്കുന്ന, അവശ്യ പ്ലാറ്റ്ഫോമായ, ഇന്ത്യ പ്രസ് ക്ലബ് ഓഫ് നോർത്ത് അമേരിക്കയുടെ (IPCNA), സ്ഥാപക പ്രസിഡന്റാണ് അദ്ദേഹം. 1977-ൽ മലയാള മനോരമയിൽ എഡിറ്റോറിയൽ ട്രെയിനിയായി ജോർജ്ജ് ജോസഫ് വിപുലമായ കരിയർ ആരംഭിച്ചു, കോഴിക്കോടും കോട്ടയത്തും നിർണായക വാർത്താ ഡെസ്കുകൾ കൈകാര്യം ചെയ്യുന്നതിൽ ഒരു ദശാബ്ദത്തിലേറെ ചെലവഴിച്ച ശേഷം മുംബൈയിൽ സീനിയർ കറസ്പോണ്ടന്റ് റോളിലേക്ക് ഉയർന്നു. അമേരിക്കയിലേക്ക് താമസം മാറിയതിനുശേഷം, ചീഫ് സബ് എഡിറ്ററായും പ്രമുഖ റിപ്പോർട്ടറായും അദ്ദേഹം തന്റെ പാത പിന്തുടർന്നു, അമേരിക്കൻ മലയാളികളുടെയും ഇന്ത്യൻ അമേരിക്കക്കാരുടെയും ചരിത്ര നാഴികക്കല്ലുകൾ രേഖപ്പെടുത്തി. ജോർജ് ജോസഫിൻ്റെ പോഡ്കാസ്റ്റുകൾ/റീലുകൾ ശക്തമായ അഭിപ്രായ അലകളാണ് സൃഷ്ടിക്കുന്നത്. “ഈ മലയാളി” യിലൂൂടെയാണ് അമേരിക്കൻ മലയാളി എഴുത്തുകാർ അസ്തിത്വ ദു:ഖം മറക്കുന്നത്.
സുനിൽ ട്രൈസ്റ്റാർ (വിഷ്വൽ മീഡിയ):
പരിചയ സമ്പന്നനായ ബ്രോഡ്കാസ്റ്റർ, ഡിജിറ്റൽ ജേണലിസ്റ്റ്, എന്നീ തലങ്ങളിൽ അമേരിക്കൻ മലയാളികളിൽ കീർത്തിതനായ സുനിൽ ട്രൈസ്റ്റാർ, വിഷ്വൽ മീഡിയയിലെ മൂന്ന് പതിറ്റാണ്ടുകളുടെ മികവു കൊണ്ട് ധന്യനാണ്. അമേരിക്കയിലെ മലയാള ദൃശ്യ പ്രക്ഷേപണത്തിലും, ഡിജിറ്റൽ ജേണലിസത്തിലും പയനിയറിംഗ് ഫോഴ്സും പര്യായ പദവുമാണ് സുനിൽ ട്രൈസ്റ്റാർ. നൂതനമായ വിഷ്വലൈസേഷൻ, അത്യാധുനിക പ്രക്ഷേപണ സാങ്കേതിക വിദ്യകൾ, കഠിനാദ്ധ്വാനം എന്നിവയിലൂടെ, ഭൂഖണ്ഡങ്ങളിലുടനീളം മലയാളം നെറ്റ്വർക്ക് ടെലിവിഷന്റെ വ്യാപ്തി വികസിപ്പിക്കുന്നതിൽ സുനിൽ ട്രൈസ്റ്റാർ നിർണായക പങ്കുവഹിച്ചു. ഉയർന്ന നിലവാരമുള്ള സാംസ്കാരിക, വാർത്താ ഉള്ളടക്കം വാഗ്ദാനം ചെയ്തുകൊണ്ട്, സർവരാജ്യ മലയാളി സമൂഹങ്ങൾക്കായി രൂപകൽപ്പന ചെയ്ത ഏഷ്യാനെറ്റ് അമേരിക്ക, പ്രവാസി ചാനൽ എന്നിവയെല്ലാം സുനിൽ ട്രൈസ്റ്റാറിൻ്റെ വിരളടയാളം പതിഞ്ഞ ആഗോള ദൃശ്യ മാദ്ധ്യമങ്ങളാണ്. സുനിൽ ട്രൈസ്റ്റാറിൻ്റെ വീഡിയോ ശേഖരം അമേരിക്കൻ മലയാളികളുടെ ചരിത്ര നിക്ഷേപ നിധിയാണ്, വീഡിയോ ശേഖരം കൈമോശം വരാതിരുന്നെങ്കിൽ!!
വികലമായ അനുകരണ ദോഷം ബാധിക്കാതെ, 2010 മുതൽ പ്രവർത്തിയ്ക്കുന്ന, സാംസ്കാരിക ക്ഷേമ- സന്നദ്ധ സേവന- സംഘടനയായ, ‘നാമത്തിൻ്റെയും (NAMAM ), എം.ബി.എൻ ഫൗണ്ടേഷന്റെയും സംയുക്താഭിമുഖ്യത്തിൽ, 2026, ഓഗസ്റ്റ് 2, ഞായറാഴ്ച, വൈകുന്നേരം, അഞ്ചു മണിക്ക്, ന്യൂജേഴ്സി റോയൽ ആൽബർട് പാലസിൽ, (Royal Albert’s Palace, 1050 King Georges Post Rd, Fords, NJ 08863) ഹൃദയം ത്രസിപ്പിക്കുന്ന കലാ സാംസ്കാരിക പരിപാടികളോടെ ആഘോഷപ്പൂരം വിരിച്ച്, “നാമം എക്സലൻസ് അവാർഡുകൾ, ജേതാക്കളെ പൂർണ്ണ സൂര്യ തേജസ്സണിയിക്കും.
കൂടുതൽ വിവരങ്ങൾക്ക്: നാമം ഫൗണ്ടറും ചീഫ് പേട്രണുമായ മാധവൻ ബി നായർ, പ്രസിഡൻ്റ് പ്രദീപ് മേനോൻ (516)450-8155), സെക്രട്ടറി ബിന്ദു സത്യ (732)213-5346, ട്രഷറാർ സിറിയക് എബ്രഹാം (732)259-1037.
https://www.namam.org,www.mbnfoundation.org, (732)333-3952,
Email:namamawards@gmail.com
