📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 08 | ഞായർ ✍ കപിൽ ശങ്കർ

🔹 കഴിഞ്ഞ ശബരിമല തീർഥാടന കാലത്ത് സന്നിധാനത്ത് നിയോഗിച്ചിരുന്ന ദിവസവേതനക്കാർ പലതവണയായി ലക്ഷങ്ങള്‍ വീട്ടിലേക്ക് അയച്ച സംഭവത്തിൽ ദേവസ്വം വിജിലൻസ് അന്വേഷണം തുടങ്ങി. എല്ലാ ദിവസവേതനക്കാരുടെയും മുഴുവൻ അക്കൗണ്ട് വിവരങ്ങളും പരിശോധിക്കുകയാണ് വിജിലൻസ്.
സന്നിധാനത്തെ രണ്ട് ബാങ്കും പോസ്റ്റ് ഓഫീസ് വഴിയും ജീവനക്കാർ ദിവസവും പണം അയച്ചു എന്നാണ് കണ്ടെത്തൽ. ദിവസവേതനക്കാർക്കുള്ള പണം സീസണ്‍ കഴിഞ്ഞ് അക്കൗണ്ടിലേക്ക് നേരിട്ടാണ് ദേവസ്വം നൽകുന്നത്. അതിനു മുൻപുതന്നെ വലിയ തുക അയച്ചെങ്കിൽ അത് അനധികൃത സമ്പാദ്യമെന്നാണ് വിജിലൻസ് വിലയിരുത്തൽ.

🔹പത്തനംതിട്ട തിരുവല്ലയിലെ സ്പാ കൂട്ടബലാത്സംഗ കേസിൽ ‌‌‌‌കൂടുതൽ പേർ പ്രതാകളായേക്കുമെന്ന് സൂചന. സ്പായിലെ സഹപ്രവർത്തകയും ക്രൂര പീഡനത്തിന് ഒത്താശ ചെയ്തെന്ന് അതിജീവിത നേരത്തെ വെളിപ്പെടുത്തിയിരുന്നു.ഒത്താശ ചെയ്ത സഹപ്രവർത്തകയിലേക്കും ഇവരുടെ ആൺസുഹൃത്തിലേക്കും അന്വേഷണം വ്യാപിപ്പിക്കാനാണ് പോലീസ് തീരുമാനം. കേസിൽ കൂടുതൽ പേർ പ്രതികളാകാനും സാധ്യതയുണ്ട്.
അതേസമയം പിടിയിലാകാനുള്ള പ്രതികൾ സംസ്ഥാനംവിട്ടെന്നാണ് സൂചന.കേസിൽ ഇതുവരെ രണ്ട് പ്രതികൾ മാത്രമാണ് പിടിയിലായത്. ഒന്നാംപ്രതി മരണ സുബിൻ, കൂട്ടുപ്രതി ബർലിൻ ദാസ് എന്നിവരാണ് പിടിയിലായത്. മറ്റ് നാല് പേർ ഒളിവിൽ തുടരുകയാണ്. പോലീസുകാർ മാസപ്പടി പറ്റുന്നുണ്ടെന്ന ആക്ഷേപത്തിൽ വിജിലൻസും പ്രാഥമിക അന്വേഷണം തുടങ്ങി.

🔹 കിളിമാനൂരിൽ ഇരുചക്ര വാഹനം പാർക്ക് ചെയ്യുന്നതിനെ ചൊല്ലിയുള്ള തർക്കത്തിനിടെ യുവതിയെ വെട്ടിപ്പരിക്കേൽപ്പിച്ച പ്രതി പിടിയിൽ. പോങ്ങനാട് സ്വദേശിയായ മണിക്കുട്ടൻ(60) ആണ് പിടിയിലായത്.പോങ്ങനാട് പഴയചന്ത തട്ടാക്കുന്നിൽ വീട്ടിൽ സിന്ധുവിന് നേരെയാണ് ആക്രമണമുണ്ടായത്. യുവതിയുടെ ഇരുകൈകൾക്കും ആക്രമണത്തിൽ പരിക്കേറ്റിരുന്നു. സിന്ധുവിന്‍റെ അമ്മാവനും അയൽവാസിയുമാണ് പ്രതിയായ മണിക്കുട്ടൻ.ഇക്കഴിഞ്ഞ വെള്ളിയാഴ്ച രാവിലെ 6.30ഓടെ ആയിരുന്നു സംഭവം. മകളെ ട്യൂഷന് കൊണ്ടുവിട്ടശേഷം സിന്ധു വീട്ടിലേക്ക് കയറുന്ന വഴിയിൽ സ്‌കൂട്ടർ പാർക്ക് ചെയ്തതാണ് പ്രകോപനത്തിന് കാരണം. ഇതേ തുടർന്നുണ്ടായ തർക്കത്തിനിടെയാണ് പ്രതി യുവതിയെ വെട്ടിപ്പരിക്കേൽപ്പിച്ചത്.വാഹനം പാർക്ക് ചെയ്യുന്നതുമായി ബന്ധപ്പെട്ട് ഇരുവരും തമ്മിൽ നേരത്തെയും വഴക്കുണ്ടായിരുന്നതായി നാട്ടുകാർ പറയുന്നു. സംഭവത്തിന് ശേഷം ഒളിവിൽ പോയ പ്രതിയെ ആറ്റിങ്ങൽ കെഎസ്ആർടിസി ബസ് സ്റ്റാൻഡ് പരിസരത്ത് നിന്നാണ് പോലീസ് പിടികൂടിയത്.

🔹ജില്ലാ ആശുപത്രിക്കു മുന്നിൽ നിർമാണപ്രവൃത്തികൾക്കായി ദേശീയപാത അടച്ചതോടെ മാവുങ്കാൽ ഭാഗത്തുനിന്ന് ആശുപത്രിയിലേക്കുള്ള യാത്രക്കാർക്ക് വഴിമുട്ടി.
അര കിലോമീറ്ററോളം കറങ്ങി ചെമ്മട്ടംവയലിലെയോ കൂളിയങ്കാലിലെയോ അടിപ്പാത വഴി മാത്രമേ ജില്ലാ ആശുപത്രിയിലേക്ക് കയറാൻ സാധിക്കൂ എന്ന നിലയായതോടെ രോഗികളുൾപ്പെടെ വലഞ്ഞു.കൂളിയങ്കാൽ ഭാഗത്തുനിന്നുള്ള വാഹനങ്ങൾക്കു മാത്രമാണ് ജില്ലാ ആശുപത്രിക്ക് മുന്നിലൂടെയുള്ള സർവീസ് റോഡിലൂടെ പോകാൻ വഴിതുറന്നത്.ജനങ്ങൾ അനുഭവിക്കുന്ന പ്രയാസങ്ങൾ ചൂണ്ടിക്കാട്ടി ജില്ലാ പഞ്ചായത്ത് പ്രസിഡന്‍റ് സാബു ഏബ്രഹാം, നഗരസഭ ചെയർമാൻ വി.വി. രമേശൻ, കോൺഗ്രസ് നേതാവ് പ്രവീൺ തോയമ്മൽ തുടങ്ങിയവർ അധികൃതരുമായി ചർച്ച നടത്തി. ഇതിന്‍റെ അടിസ്ഥാനത്തിൽ ഇരുവശങ്ങളിലേക്കുമുള്ള വാഹനങ്ങളെ ഇപ്പോൾ താത്കലികമായി കടത്തിവിടാൻ തുടങ്ങിയിട്ടുണ്ട്.

🔹ജില്ലാ പഞ്ചായത്ത് ഹരിതകേരളം മിഷനുമായി സഹകരിച്ച് ജില്ലയിലെ 12 സര്‍ക്കാര്‍ ഹയര്‍ സെക്കന്‍ഡറി സ്‌കൂളുകളില്‍ ഒരുക്കിയ ജലപരിശോധന ലാബുകളിൽ ഇതുവരെ പരിശോധിച്ചത് 1192 സാമ്പിളുകള്‍.പൊതുജനങ്ങള്‍ക്ക് കുറഞ്ഞ ചെലവില്‍ തങ്ങളുടെ വീടുകളിലെയും സ്ഥാപനങ്ങളിലെയും കിണര്‍ വെള്ളം പരിശോധിക്കാന്‍ അവസരമൊരുക്കുകയാണ് പദ്ധതിയിലൂടെ ലക്ഷ്യമിടുന്നത്.ജല ഗുണനിലവാര പരിശോധനയില്‍ ഒന്നാംസ്ഥാനത്തു നിൽക്കുന്ന കയ്യൂര്‍ ജിവിഎച്ച്എസ്എസിൽ 208 സാമ്പിളുകള്‍ ഇതുവരെ പരിശോധിച്ചു. മടിക്കൈ ജിവിഎച്ച്എസ്എസിൽ 171 സാമ്പിളുകളും ബളാല്‍ ജിഎച്ച്എസ്എസിൽ 140 സാമ്പിളുകളും പരിശോധിച്ചു. പട്‌ള, പിലിക്കോട്, ഉദുമ സ്‌കൂളുകളിലും നൂറിധികം സാമ്പിളുകള്‍ പരിശോധിച്ചു. ഇ കോളി ബാക്ടീരിയയുടെ സാന്നിധ്യമാണ് പ്രധാനമായും പരിശോധിക്കുന്നത്.

🔹രണ്ടു വര്‍ഷം മുന്‍പ് നഷ്ടപ്പെട്ട ഐഫോണ്‍ കണ്ടുപിടിച്ച് ഉടമയ്ക്ക് കൈമാറി ഗാന്ധിനഗര്‍ പോലീസ്. 2024 ജൂണ്‍ മാസത്തില്‍ നഷ്ടപ്പെട്ട ഒരു ലക്ഷത്തി അറുപതിനായിരം രൂപ വില വരുന്ന ഐഫോണാണ് അന്വേഷണത്തിലൂടെ രണ്ടു വര്‍ഷത്തിനുശേഷം കണ്ടെത്തി ഉടമയായ സംക്രാന്തി സ്വദേശി ഷബനാസിന് കൈമാറിയത്.രണ്ടു വര്‍ഷത്തിനു ശേഷം ഫോണ്‍ അടുത്തിടെയാണ് ഓണായത്. തുടര്‍ന്ന് ഗാന്ധിനഗര്‍ പോലീസ് നടത്തിയ അന്വേഷണത്തില്‍ ഫോണ്‍ മറ്റൊരാളില്‍നിന്നു കണ്ടെത്തുകയായിരുന്നു. ഇയാള്‍ ഫോണ്‍ ഒരു കടയില്‍നിന്നാണ് വാങ്ങിയത്. കടക്കാരന് ഫോണ്‍ കൈമറിഞ്ഞു കിട്ടിയതാണ്.

🔹മണക്കാട് തെക്കേക്കോട്ട തമ്മനം സ്ട്രീറ്റ് ഹൗസ് നമ്പര്‍ 57ല്‍ വേണുകുമാറിന്‍റെ മകന്‍ വൈഷ്ണവിനെ (21) കാണാനില്ലെന്നു പരാതി. 2025 ഓഗസ്റ്റ് 30ന് ഉച്ചയ്ക്ക് 12 മുതലാണ് യുവാവിനെ കാണാതായത്. രക്ഷിതാക്കള്‍ നല്‍കിയ പരാതിയില്‍ പോലീസ് നടത്തിയ അന്വേഷണത്തില്‍ വട്ടപ്പാറയിലുള്ള ഒരു ആശുപത്രിയില്‍ ഇയാള്‍ ചികിത്സയിലുള്ളതായി അറിയാന്‍ കഴിഞ്ഞു.
ചെറിയ രീതിയില്‍ മാനസികാസ്വാസ്ഥ്യമുള്ളയാളാണ് വൈഷ്ണവെന്ന് പോലീസ് പറഞ്ഞു. ചികിത്സ കഴിഞ്ഞശേഷം യുവാവ് വീണ്ടും അപ്രത്യക്ഷമാകുകയായിരുന്നു. മാസങ്ങളായി ഫോര്‍ട്ട് പോലീസ് വൈഷ്ണവിനെ അന്വേഷിക്കുന്നുണ്ടെങ്കിലും ഇതുവരെ യാതൊരു വിവരവും ലഭിച്ചിട്ടില്ല. ഇയാളെക്കുറിച്ച് എന്തെങ്കിലും വിവരം ലഭിക്കുന്നവര്‍ 9497987010, 9497980044, 04712461105 എന്നീ നമ്പരുകളില്‍ ബന്ധപ്പെടണം.

🔹തമിഴ്‌നാട്ടില്‍ നിന്ന് മൂന്നു മാസം മുമ്പ് കാണാതായ വനിതാ ഡോക്ടറെ കൊച്ചിയില്‍ കണ്ടെത്തി. തമിഴ്‌നാട് പോലീസ് മാസങ്ങളായി അന്വേഷിച്ചിട്ടും കണ്ടെത്താന്‍ കഴിയാതെ പോയ നാഗര്‍കോവില്‍ സ്വദേശിയായ ഡോ. ശ്രീവിദ്യ(39)യെയാണ് കൊച്ചി സിറ്റി വനിതാ പോലീസ് സ്റ്റേഷനിലെ എസ്‌ഐ സിബി കെ. ദാസിന്‍റെ നേതൃത്വത്തിലുള്ള പോലീസ് സംഘം മാതാപിതാക്കളെ ഏല്പിച്ചത്.ഇക്കഴിഞ്ഞ ഫെബ്രുവരി ഒന്നിന് രാത്രി പത്തോടെ വൈറ്റില ഹബ്ബില്‍ ഒരു യുവതി ഇരുന്ന് കരയുന്നത് ശ്രദ്ധയില്‍പ്പെട്ട പട്രോളിംഗ് സംഘം കണ്‍ട്രോള്‍ റൂം വാഹനത്തില്‍ ഇവരെ വനിതാ പോലീസ് സ്റ്റേഷനില്‍ എത്തിക്കുകയായിരുന്നു. സ്വന്തം പേരും താമസിച്ചിരുന്ന പേയിംഗ് ഗസ്റ്റ് സ്ഥാപനത്തിന്‍റെ പേരും മാത്രമേ ഇവര്‍ക്ക് ഓര്‍മയുണ്ടായിരുന്നുള്ളൂ.
ഇവരെ താത്കാലികമായി താമസിപ്പിക്കുന്നതിനായി വനിതാ പോലീസ് കാക്കനാട്ടെ സഖിയില്‍ എത്തിച്ചെങ്കിലും യുവതിക്ക് മാനസിക പ്രശ്‌നമുണ്ടെന്ന് പറഞ്ഞ് അവര്‍ കൈയൊഴിഞ്ഞു. തുടര്‍ന്ന് കാക്കനാടെ സ്‌നേഹിതയില്‍ താത്കാലിക അഭയം നല്‍കി. എഎസ്‌ഐ ശര്‍മിളയുടെ മേല്‍ നോട്ടത്തില്‍ സിപിഒമാരായ അമൃത, വീണ എന്നിവര്‍ നടത്തിയ അന്വേഷണത്തിനൊടുവില്‍ സൗത്ത് ജനതാ റോഡില്‍ വനിതാ ഡോക്ടര്‍ താമസിച്ചിരുന്ന പേയിംഗ് ഗസ്റ്റ് സ്ഥാപനം കണ്ടെത്തി.
അവിടെ പരിശോധന നടത്തിയപ്പോള്‍ ഡോക്ടറുടെ ബാഗും ഐഫോണും ആധാര്‍ കാര്‍ഡ് ഉള്‍പ്പെടെയുള്ള രേഖകളും കണ്ടെത്തുകയായിരുന്നു. എന്നാല്‍ ഐ ഫോണിന്‍റെ ലോക്ക് തുറക്കാന്‍ കഴിഞ്ഞില്ല. തുടര്‍ന്ന് കൊച്ചി സിറ്റി പോലീസ് കമ്മീഷണര്‍ കാളിരാജ് മഹേഷ്‌കുമാര്‍ ഫോണ്‍ ലോക്ക് മാറ്റുന്നതിന് സൈബര്‍ സെല്ലിന് നിര്‍ദേശം നല്‍കി.പോലീസ് സംഘം ഫോണിലുണ്ടായിരുന്ന നമ്പറില്‍ ബുധനാഴ്ച ബന്ധപ്പെട്ടപ്പോള്‍ അത് വനിതാ ഡോക്ടറുടെ മുന്‍ ഭര്‍ത്താവിന്‍റേതായിരുന്നു. സൈക്യാട്രിസ്റ്റായ ഇദ്ദേഹവും വനിതാ ഡോക്ടറും ഇപ്പോള്‍ പിരിഞ്ഞു താമസിക്കുകയാണ്. സൈക്യാട്രിസ്റ്റ് നല്‍കിയ മൊബൈല്‍ ഫോണ്‍ നമ്പറില്‍ യുവതിയുടെ മാതാപിതാക്കളെ പോലീസ് ബന്ധപ്പെട്ടു. അപ്പോഴാണ് മൂന്നു മാസം മുമ്പ് നാഗര്‍കോവില്‍ പോലീസ് ഡോക്ടറുടെ തിരോധാനവുമായി ബന്ധപ്പെട്ട് മിസിംഗ് കേസ് എടുത്തിട്ടുള്ളതാണെന്ന വിവരം ലഭിച്ചത്.

🔹 ഉത്തർപ്രദേശിലെ ലളിത്പുർ ജില്ലയിൽ മൂന്ന് സ്ത്രീകളെ വിവാഹം കഴിച്ച യുവാവിനെതിരെ കേസെടുത്ത് പോലീസ്. സ്ത്രീധനം ലക്ഷ്യമിട്ടാണ് ഇയാൾ മൂന്ന് വിവാഹം കഴിച്ചതെന്ന് പോലീസ് പറഞ്ഞു. സംഭവത്തിൽ മൂന്ന് സ്ത്രീകളും ഒരുമിച്ചെത്തി സുനിൽ കുമാർ എന്ന യുവാവിനെതിരെ പരാതി നൽകുകയായിരുന്നു.ശിവാനി, രാഖി, ജ്യോതി എന്നിവരാണ് പരാതിക്കാർ. ഇവർ മൂന്നുപേരെയും 2019, 2021, 2023 വർഷങ്ങളിലാണ് സുനിൽ വിവാഹം ചെയ്തത്. അവിവാഹിതനെന്നു പറഞ്ഞായിരുന്നു വിവാഹം. പോലീസ് നൽകുന്ന വിവരപ്രകാരം ലളിത്പുർ ജില്ലയിൽ താമസിക്കുന്ന സുനിൽ സ്ത്രീധനം മോഹിച്ചാണ് ഒന്നിലേറെ വിവാഹം കഴിച്ചത്. വിവാഹത്തിനു ശേഷം കൂടുതൽ സ്ത്രീധനത്തിനായി ഭാര്യയെ പീഡിപ്പിക്കുകയും വിവാഹമോചനത്തിനു പ്രേരിപ്പിക്കുകയും ചെയ്യും.
ശേഷം അടുത്ത ഗ്രാമത്തിൽ പോയി വേറെ വിവാഹം കഴിച്ചു കുറച്ചു നാൾ ജീവിക്കും. ഇത്തരത്തിൽ നാലാമത്തെ വിവാഹത്തിനു തയാറെടുക്കുമ്പോഴാണ് മുൻഭാര്യമാർ പോലീസിൽ പരാതിയുമായി എത്തിയത്.

🔹പാടത്ത് ജോലി ചെയ്യുമ്പോൾ ആക്രമിക്കാനെത്തിയ പുള്ളിപ്പുലിയെ കർഷകൻ കോടാലി കൊണ്ടു വെട്ടിക്കൊലപ്പെടുത്തി. രാജസ്ഥാനിലെ ബെഹ്‌റോർ ജില്ലയിലെ ഖാർകാഡി ഗ്രാമത്തിലാണ് സംഭവം. ഇവിടെ വനത്തോടു ചേർന്നുള്ള പാടത്ത് ആടിനു തീറ്റ ശേഖരിക്കാനെത്തിയ ശ്രാവൺ ഗുർജാർ (48) എന്ന കർഷകനെയാണ് പുള്ളിപ്പുലി ആക്രമിച്ചത്.
ആടുകൾക്ക് തീറ്റ ശേഖരിക്കുന്നതിനിടെ ശ്രാവണിനെ കുറ്റിക്കാട്ടിൽ പതുങ്ങിനിന്ന പുള്ളിപ്പുലി ആക്രമിക്കുകയായിരുന്നു. കോടാലി കൊണ്ടു മരക്കൊമ്പുകൾ മുറിക്കുന്നതിനിടെയായിരുന്നു ആക്രമണം. പുള്ളിപ്പുലിയുടെ ആക്രമണത്തിൽ പരിക്കേറ്റെങ്കിലും സ്വയം രക്ഷയ്ക്കായി ശ്രാവൺ പുലിയെ കോടാലികൊണ്ടു അടിച്ചുകൊല്ലുകയായിരുന്നു.

🔹ജപ്പാനിൽ മഞ്ഞുവീഴ്ചയുമായി ബന്ധപ്പെട്ട് 45 പേർ മരിച്ചു. ജനുവരി 20 മ ുതലുള്ള കണക്കാണിത്. ഇക്കാലയളവിൽ അഞ്ഞൂറിലധികം പേർക്കു പരിക്കേൽക്കുകയുമുണ്ടായി. വടക്കുപടിഞ്ഞാറ് നിഗാത്ത പ്രവിശ്യയിൽ മാത്രം 17 മരണങ്ങളുണ്ടായി.170 പേർക്ക് പരിക്കേൽക്കുകയും ചെയ്തു. വരുംദിവസങ്ങളിൽ ജപ്പാന്‍റെ വടക്ക് പടിഞ്ഞാറ് തീരപ്രദേശങ്ങളിൽ മഞ്ഞുവീഴ്ച ശക്തിപ്പെടുമെന്നാണ് കാലാവസ്ഥാ പ്രവചനം.

🔹ടി20 ലോകകപ്പിൽ അമേരിക്കയ്ക്കെതിരെ ഇന്ത്യയ്ക്ക് ജയത്തുടക്കം. ആദ്യ മത്സരത്തിൽ 29 റൺസിന്‍റെ ജയമാണ് നീലപ്പട സ്വന്തമാക്കിയത്. ഇന്ത്യ ഉയർത്തിയ 162 റൺസ് വിജയലക്ഷ്യം പിന്തുടർന്ന യുഎസ്എയ്ക്ക് എട്ടു വിക്കറ്റ് നഷ്‌ടത്തിൽ 132 റൺസ് നേടാനെ കഴിഞ്ഞൊള്ളൂ.
സ്കോർ: ഇന്ത്യ 161/9 യുഎസ്എ 132/8. ഇന്ത്യയ്ക്കായി മുഹമ്മദ് സിറാജ് മൂന്ന്, അർഷ്ദീപ് സിംഗ്, അക്ഷർ പട്ടേൽ എന്നിവർ രണ്ടും വരുൺ ചക്രവർത്തി ഒരു വിക്കറ്റുമെടുത്തു. 162 റൺസ് ലക്ഷ്യത്തിലേക്ക് ബാറ്റെടുത്ത യുഎസിൻ്റെ തുടക്കവും തകർച്ചയോടെയായിരുന്നു.
3.2 ഓവറിൽ 13 റൺസിനിടെ അവർക്ക് ആൻഡ്രിസ് ഗസ് (ആറ്), ക്യാപ്റ്റൻ മൊണാങ്ക് പട്ടേൽ (0), സായ്തേജ മുക്കാമല്ല (രണ്ട്) എന്നിവരെ നഷ്‌ടമായി. എന്നാൽ നാലാം വിക്കറ്റിൽ 58 റൺസിന്‍റെ കൂട്ടുകെട്ടുണ്ടാക്കിയ മിലിന്ദ് കുമാർ – സഞ്ജയ് കൃഷ്‌ണമൂർത്തി സഖ്യം സ്കോർ 71ൽ എത്തിച്ചു.12-ാം ഓവറിൽ മിലിന്ദിനെ മടക്കി വരുൺ ചക്രവർത്തി ഈ സഖ്യം പൊളിച്ചു. 34 പന്തിൽ നിന്ന് ഒരു സിക്‌സും മൂന്ന് ഫോറുമടക്കം 34 റൺസായിരുന്നു താരത്തിന്‍റെ സമ്പാദ്യം. പിന്നാലെ 27 റൺസ് ചേർ
ക്കുന്നതിനിടെ സഞ്ജയുടെ വിക്കറ്റും അവർക്ക് നഷ്ടമായി. 31 പന്തിൽ നിന്ന് 37 റൺസെടുത്ത താരത്തെ അക്ഷർ പട്ടേലാണ് വീഴ്ത്തിയത്.തൊട്ടടുത്ത പന്തിൽ ഹർമീത് സിങ്ങിനെയും (0) അക്ഷർ പുറത്താക്കി. 22 പന്തിൽ നിന്ന് 37 റൺസുമായി ശുഭം രഞ്ജാനെ പൊരുതി നോക്കിയെങ്കിലും ഫലമുണ്ടായില്ല. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയെ തുടക്കത്തിൽ തന്നെ യുഎസ്എ ബൗളർമാർ ഞെട്ടിച്ചു. രണ്ടാ ഓവറിലെ രണ്ടാം പന്തിൽ ഓപ്പണർ അഭിഷേക് ശർമയെ ഗോൾഡ് ഡക്കായി അലി ഖാൻ മടക്കുകയായിരുന്നു.ഒരറ്റത്ത് വിക്കറ്റുകൾ വീഴുമ്പോഴും പിടിച്ചുനിന്ന ക്യാപ്റ്റൻ സൂര്യകുമാർ യാദവിന്‍റെ ഇന്നി‌‌ംഗ്സാണ് ഇന്ത്യൻ ടീമിനെ മാന്യമായ സ്‌കോറിലെത്തിച്ചത്. 49 പന്തുകൾ നേരിട്ട സൂര്യ നാല് സിക്സും 10 ഫോറുമടക്കം 84 റൺസോടെ പുറത്താകാതെ നിന്നു. യുഎസിനായി പേസർ ഷാഡ്‌ലി വാൻ ഷാൽക്വിക്ക് നാലു വിക്കറ്റ് വീഴ്ത്തി.

🔹രഞ്ജിത്ത് സജീവ് നായകനാകുന്ന ഹാഫ് എന്ന ചിത്രത്തിന്‍റെ സെക്കന്‍റ് ലുക്ക് പുറത്തിറങ്ങി. മലയാളം, തമിഴ്, തെലുങ്ക്. കന്നഡ, ഹിന്ദി, ഇംഗ്ലീഷ്, അറബിക്ക് എന്നീ ഏഴു ഭാഷകളിലായിട്ടാണ് പോസ്റ്റർ ഇറങ്ങിയത്.ഫ്രാഗ്രനന്‍റ് നേച്ചർ ഫിലിം ക്രിയേഷൻസിന്‍റെ ബാനറിൽ ആൻ സജീവും സജീവ് പി.കെയും നിർമിക്കുന്ന ഈ ചിത്രം സംജാദ് സംവിധാനം ചെയ്യുന്നു. മികച്ച വിജയം നേടിയ ഗോളം എന്ന ചിത്രത്തിനു ശേഷം സംജാദ് സംവിധാനം ചെയ്യുന്ന ചിത്രമാണിത്.മലയാള സിനിമയിൽ ആദ്യമായി വാമ്പയർ ആക്ഷൻ ജോണറിൽ അവതരിപ്പിക്കുന്ന ചിത്രം കൂടിയാണ്.റിവഞ്ച്, സർവൈവൽ, ഐഡിന്‍റിറ്റി എന്നീ പ്രമേയങ്ങളുടെ പശ്ചാത്തലത്തിലൂടെയാണ് ചിത്രത്തിന്‍റെ കഥാവികസനം.
രാജസ്ഥാനിലെ ജയ്സാൽമീറാണ് ഈ ചിത്രത്തിന്‍റെ പ്രധാന ലൊക്കേഷൻ. പീരുമേടും, റഷ്യയുമാണ് മറ്റു ലൊക്കേഷനുകൾ. വിശാലമായ ക്യാൻവാസിൽ വമ്പൻ ബഡ്ജറ്റിൽ ഒരുക്കുന്ന ഈ ചിത്രത്തിൽ മികച്ച സാങ്കേതിക പ്രവർത്തകരുടെ നിറ സാന്നിധ്യമുണ്ട്.
അമലപോൾ ശ്രദ്ധേയമായ കഥാപാത്രത്തെ അവതരിപ്പിക്കുന്ന ഈ ചിത്രത്തിൽ ഐശ്വര്യാ രാജ്ആണ് നായിക. ശ്രീകാന്ത് മുരളി, അബ്ബാസ്, റോക്കി മഹാജൻ, ജോജി ജോൺ, മണികണ്ഠൻ, സത്യജിത്ത്, ഷർമ്മി രാജ്, ആഗ്നേഷ്, ആവണി, അഞ്ജലി നായർ, സന്താനം, പ്രവീൺ, കൃഷ്ണൻ, നിധേഷ്, പരമേശ്, അഭിനേഷ്, സഞ്ജയ്, ഇജാസ്, കല്യാൺ വീരാള, വീരൻ, ഇദയകുമാർ, ദേവേന്ദ്രനാഥ്, ജയ് കുമാർ എന്നിവരും പ്രധാന താരങ്ങളാണ്.സംജാദും പ്രവീൺ വിശ്വനാഥുമാണ് ഈ ചിത്രത്തിന്‍റെ തിരക്കഥ രചിച്ചിരിക്കുന്നത്. ആക്ഷന് ഏറെ പ്രാധാന്യമുള്ള ഈ ചിത്രത്തിലെ ആക്ഷൻ കോറിയോഗ്രാഫർ പ്രശസ്തനായ ഇന്തോനേഷ്യക്കാരൻ വെരിട്രി യൂലിസ്മൻ ആണ്. റെയ്ഡ്2, ദിനൈറ്റ് കംസ് ഫോർ അസ്(, the night comes for us ) തുടങ്ങിയ ലോകപ്രശസ്ത ചിത്രങ്ങൾക്ക് ആക്ഷൻ നിർവഹിച്ച കോറിയോഗ്രാഫറാണ് വെരിട്രി യുലിസ്മൻ.
സംഗീതം – മിഥുൻ മുകുന്ദ്. ഛായാഗ്രഹണം- പാപ്പിനു. എഡിറ്റിംഗ് – മഹേഷ് ഭുവനന്ദ്. ലൂസിഫർ എമ്പുരാൻ എന്നീ ചിത്രങ്ങളിലൂടെ ശ്രദ്ധേയനായ മോഹൻദാസ് ആണ് പ്രൊഡക്ഷൻ ഡിസൈനർ. കോസ്റ്റ്യും ഡിസൈൻ-ധന്യ ബാലകൃഷ്ണൻ. മേക്കപ്പ്-നരസിംഹ സ്വാമി. സ്റ്റിൽസ് – സിനറ്റ് സേവ്യർ. ചീഫ് അസോസിയേറ്റ് ഡയറക്ടർ – രാജേഷ് കുമാർ. അസോസിയേറ്റ് ഡയറക്ടർ – ജിബിൻ ജോയ്. പ്രൊഡക്ഷൻ മാനേജർ സജയൻ ഉദയൻകുളങ്ങര, പ്രൊഡക്ഷൻ എക്സിക്യൂട്ടീവ് – അബിൻ എടവനക്കാട്, പ്രൊഡക്ഷൻ കൺട്രോളർ – ബിനു മുരളി. പിആർഒ-വാഴൂർ ജോസ്.

💦 ഗുരുജിയുടെ വാക്കുകൾ

ജീവിതത്തിലെ ഓരോ സംഭവങ്ങളും നമ്മുടെ ചിന്ത തന്നെയാണ്. ജീവിതം ദുരിതമാണെന്ന് കണക്കാക്കുമ്പോൾ വന്നുചേരുന്ന എല്ലാം ദുരിതമയമായി തീരുന്നു. സുഖമാണെന്ന് കരുതുമ്പോൾ ജീവിതയാത്രയിൽ വരുന്ന എന്തിനെയും സുഖമാക്കി മാറ്റുകയാണ് ചെയ്യുന്നത് ..മറ്റുള്ളവർക്ക് പലപ്പോഴും നമ്മുടെ ജീവിതം ദുരിതമാണെന്ന് തോന്നാറുണ്ട് .പക്ഷേ നാം ജീവിതത്തെ ആസ്വദിക്കുകയാണെന്ന് അവർ അറിയാറില്ല. ജീവിതത്തെ നാം എപ്പോൾ ആസ്വദിക്കുന്നുവോ അപ്പോഴൊക്കെ ജീവിതം സുഖമായി തീരുകയാണ്. സമ്പത്തുള്ള പലരും ദുരിത പൂർണ്ണമായ ജീവിതം നയിക്കുന്നത് കണ്ടിട്ടുണ്ട്. അവരെ സംബന്ധിച്ചിടത്തോളം ജീവിതത്തിൻെറ കാഴ്ചപ്പാട് വേറെയാണ്. ചില ചിന്തകൾ നമുക്ക് തന്നെ വിപത്താവാറുണ്ട്. സദ്ചിന്തയിൽ നിന്നേ നല്ല ജീവിതം നയിക്കാൻ സാധിക്കുകയുള്ളൂ. എന്നാൽ എല്ലായ്പ്പോഴും സദ്ചിന്ത മനസ്സിൽ വരണമെന്നില്ല. അതിനുള്ള വിദ്യ നാം പഠിക്കേണ്ടിയിരിക്കുന്നു

തയ്യാറാക്കിയത്: കപിൽ ശങ്കർ

56 Likes

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 08 | ഞായർ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

രാജ്യാന്തര ബഹിരാകാശ നിലയത്തിലെത്തുന്ന ആദ്യ മലയാളിയാകാനൊരുങ്ങി യുഎസ് സ്പേസ് ഫോഴ്സ് കേണല്‍ ഡോ. അനില്‍ മേനോൻ.

ഹോർമുസ് കടലിടുക്കിൽ യുദ്ധസമാന സാഹചര്യം; ഇറാനിൽ അമേരിക്കൻ ആക്രമണം ശക്തം; ഒരാൾ മരിച്ചു.

LEAVE A REPLY Cancel reply

Most Popular

സംസ്ഥാനത്ത് സ്വർണവിലയിൽ തുടർച്ചയായ മൂന്നാം ദിവസവും ഇടിവ്.

പെട്ടിക്കടയില്‍ മിനറല്‍ വാട്ടര്‍ കുപ്പിയില്‍ വാറ്റുചാരായം നിറച്ച് വില്‍പന നടത്തിയ രണ്ടുപേര്‍ അറസ്റ്റില്‍

Recent Comments

EDITOR PICKS

സംസ്ഥാനത്ത് സ്വർണവിലയിൽ തുടർച്ചയായ മൂന്നാം ദിവസവും ഇടിവ്.

POPULAR POSTS

രാജ്യാന്തര ബഹിരാകാശ നിലയത്തിലെത്തുന്ന ആദ്യ മലയാളിയാകാനൊരുങ്ങി യുഎസ് സ്പേസ് ഫോഴ്സ് കേണല്‍ ഡോ. അനില്‍ മേനോൻ.

ഹോർമുസ് കടലിടുക്കിൽ യുദ്ധസമാന സാഹചര്യം; ഇറാനിൽ അമേരിക്കൻ ആക്രമണം ശക്തം; ഒരാൾ മരിച്ചു.

മൂന്ന് ലക്ഷം രൂപയ്ക്ക് ആഡംബര സലൂൺ കോച്ച്; ഓടുന്ന ട്രെയിനിൽ പൂജ നടത്തിയതിൽ വിശദീകരണവുമായി റെയിൽവേ.

POPULAR CATEGORY

ABOUT US

FOLLOW US