ടെക്സസ്: അമേരിക്കയിലെ പ്രമുഖ സൂപ്പർമാർക്കറ്റ് ശൃംഖലയായ ‘ആൽഡി’ തങ്ങളുടെ ജനപ്രിയ ഉൽപ്പന്നമായ ‘ഫൂഷ്യ ഏഷ്യൻ ഇൻസ്പിരേഷൻസ് കിംച്ചി & ടോഫു കിംബാപ്’ (Fusia Asian Inspirations Kimchi & Tofu Kimbap) വിപണിയിൽ നിന്ന് തിരിച്ചുവിളിക്കുന്നു. പാക്കറ്റിൽ രേഖപ്പെടുത്താതെ മത്സ്യം (ട്യൂണ) അടങ്ങിയിട്ടുണ്ടെന്ന് കണ്ടെത്തിയതിനെ തുടർന്നാണ് യു.എസ്. ഫുഡ് ആൻഡ് ഡ്രഗ് അഡ്മിനിസ്ട്രേഷൻ ഈ നടപടി സ്വീകരിച്ചത്.
ട്യൂണ മത്സ്യം അടങ്ങിയിട്ടുണ്ടെന്ന് പാക്കറ്റിന് പുറത്ത് രേഖപ്പെടുത്താതിരുന്നത് ഗുരുതരമായ അലർജിക്ക് കാരണമായേക്കാം.
ന്യൂയോർക്ക്, ടെക്സസ്, ഒഹായോ, പെൻസിൽവേനിയ ഉൾപ്പെടെ യു.എസിലെ 20 സംസ്ഥാനങ്ങളിലെ തെരഞ്ഞെടുത്ത ആൽഡി സ്റ്റോറുകളിൽ ഈ ഉൽപ്പന്നം വിതരണം ചെയ്തിട്ടുണ്ട്.
ഒക്ടോബർ 8, 2027 എക്സ്പെയറി ഡേറ്റ് ഉള്ള 8.1 ഔൺസ് പാക്കറ്റുകളാണ് തിരിച്ചുവിളിക്കുന്നത്.
പാക്കിങ് സമയത്തുണ്ടായ സാങ്കേതിക പിഴവാണ് ഇതിന് കാരണമെന്നും ഇതുവരെ ആർക്കും ആരോഗ്യപ്രശ്നങ്ങൾ റിപ്പോർട്ട് ചെയ്തിട്ടില്ലെന്നും കമ്പനി അറിയിച്ചു. ഈ ഉൽപ്പന്നം വാങ്ങിയ ഉപഭോക്താക്കൾ ഇത് കളയാനോ അല്ലെങ്കിൽ സ്റ്റോറുകളിൽ തിരികെ നൽകി പണം കൈപ്പറ്റാനോ ആൽഡി നിർദ്ദേശിച്ചിട്ടുണ്ട്.
