സംസ്ഥാനത്തെ പി.എസ്.സി പരീക്ഷാ മൂല്യനിർണയവുമായി ബന്ധപ്പെട്ട് ഉയർന്നുവന്ന ഗുരുതരമായ ക്രമക്കേടുകളിൽ സംസ്ഥാന പോലീസ് നേരിട്ട് അന്വേഷണത്തിന് ഇറങ്ങുന്നു. പി.എസ്.സി ആസൂത്രണ ബോർഡ് ചീഫ് പരീക്ഷയിലെ വീഴ്ചകൾ ഉൾപ്പെടെയുള്ള പരാതികൾ വിജിലൻസിന് കൈമാറാനാണ് സർക്കാർ ആലോചിക്കുന്നത്.
ഭരണഘടനാ സ്ഥാപനമായ പി.എസ്.സിക്ക് എതിരെ അന്വേഷണം നടത്തുന്നതിൽ എന്തെങ്കിലും നിയമതടസ്സങ്ങളുണ്ടോ എന്ന് പരിശോധിക്കാൻ ആഭ്യന്തരവകുപ്പ് നിയമോപദേശം തേടിയിട്ടുണ്ട്. വരാനിരിക്കുന്ന മന്ത്രിസഭായോഗത്തിൽ ഇത് സംബന്ധിച്ച അന്തിമ തീരുമാനമുണ്ടാകും.
അന്വേഷണം അട്ടിമറിക്കാൻ ശ്രമം; പ്രതിക്കൂട്ടിൽ പി.എസ്.സി
നിലവിൽ പി.എസ്.സി ചെയർമാന് കീഴിലുള്ള ഒരു ഉദ്യോഗസ്ഥയ്ക്കാണ് വകുപ്പുതല അന്വേഷണച്ചുമതല നൽകിയിരിക്കുന്നത്. എന്നാൽ, ഇത് കേസ് അട്ടിമറിക്കാനും കുറ്റക്കാരെ രക്ഷിക്കാനുമുള്ള നീക്കമാണെന്ന ആക്ഷേപം ശക്തമാണ്. പി.എസ്.സിയുടെ ആഭ്യന്തര അന്വേഷണം സുതാര്യമല്ലെന്ന വിലയിരുത്തലിലാണ് അന്വേഷണം വിജിലൻസിന് വിടാൻ സർക്കാർ ആലോചിക്കുന്നത്.
