🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 12 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

നമുക്കു നമ്മളായിത്തന്നെ ജീവിക്കാം
……………………………….. ………

സാധു എന്ന പേരിൽ അറിയപ്പെട്ടിരുന്ന ഒരു ഗുരു, മരണശയ്യയിലായിരുന്നു. അറിവുണ്ടായിരുന്നെങ്കിലും അധികം അറിയപ്പെടാത്ത ആളായിരുന്നു അദ്ദേഹം.
അടുത്തിരുന്ന ശിഷ്യരിൽ ഒരാൾ അദ്ദേഹത്തോടു ചോദിച്ചു: “ഗുരോ, അങ്ങ് എപ്പോഴെങ്കിലും ദൈവത്തോടു പ്രാർത്ഥിച്ചിരുന്നോ, അങ്ങയെ പ്രശസ്തനാക്കണമെന്ന് ?” ഗുരു പറഞ്ഞു: “ഈ സമയത്ത് ഇങ്ങനെയൊന്നും സംസാരിക്കരുത്. കാരണം, ദൈവം എന്നോടു ചോദിക്കയില്ല നീയെന്തു കൊണ്ടു പ്രശസ്തനായില്ല എന്ന് . പക്ഷെ, അദ്ദേഹം എന്നോടു ചോദിക്കുമായിരിക്കും: സാധു, നീ എന്തുകൊണ്ട് യഥാർത്ഥ സാധു ആയില്ല എന്ന് “.

ആരായിത്തീരണം എന്ന ചോദ്യത്തിന് ഏതെങ്കിലും ഒരു തൊഴിൽ മേഖലയുടെ പേരു പറയാനും, ആ വഴിയിലൂടെ സഞ്ചരിക്കാനും മാത്രം പരിശീലനം നേടിയവരാണ് നാമേവരും. ആരെങ്കിലുമായിത്തീരുന്നതിനേക്കാൾ, അവനവൻ ആയിതീരുന്നതാണ് പ്രധാനം. എന്തെങ്കിലുമായിത്തീർന്നോ എന്നതിനേക്കാൾ ഏറെ പ്രധാനം, ആകേണ്ടതു്ത് ആകാൻ കഴിഞ്ഞോ എന്നതാണ് .

ഓരോ സൃഷ്ടിയിലും, അനന്യതയുടെ പ്രമാണം സൃഷ്ടിതാവ് എഴുതിച്ചേർത്തിരിക്കുന്നു. എന്നാൽ മനുഷ്യനിൽ നിന്നു മാത്രം തനിക്കു കേൾക്കേണ്ടി വരുന്നത് തുല്യത നൽകാഞ്ഞതിനേക്കുറിച്ചുള്ള പരാതികളാണ്. അപരനേക്കാൾ സമ്പത്തും, സ്ഥാനമാനങ്ങളും, സമൃദ്ധിയും സ്വന്തമാക്കാനാണ് എല്ലാവർക്കും താൽപര്യം. മറ്റുള്ളവരെ മറികടക്കാൻ വേണ്ടി മാത്രം ജീവിക്കുന്നവർക്ക് സ്വന്തം മുഖവും മുദ്രയുമാണ് നഷ്ടമാകുന്നത്. സ്വന്തം ജീവിതത്തോടു നമുക്കു നീതി പുലർത്താനാകണമെങ്കിൽ, നമുക്കു നമ്മുടെ നിയോഗം തിരിച്ചറിയാനാകണം.

അറിയപ്പെടുന്നവരെല്ലാം അറിവുള്ളവരാകണമെന്നില്ല; പ്രത്യേകിച്ച്, ആത്മജ്ഞാനമുള്ളവർ. അജ്ഞാതരെല്ലാം അജ്ഞരാകണമെന്നുമില്ല. സ്വയം അറിയുന്നവനു ചുറ്റും ഒരു തേജോ വലയമുണ്ടായിരിക്കും. അതിൻ്റെ വെളിച്ചെത്തിൽ, അനേകർ വെളിച്ചമുള്ളവരായിത്തീർന്നു എന്നു വരാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര