📱വാർത്തകൾ ഒറ്റനോട്ടത്തിൽ📱 – 2026 | ജൂൺ 25 | വ്യാഴം ✍️ കപിൽ ശങ്കർ

🔹വിദേശസംഭാവന സ്വീകരിക്കുന്ന സന്നദ്ധസംഘടനകള്‍ക്ക്നിയന്ത്രണങ്ങള്‍ ഏര്‍പ്പെടുത്തിക്കൊണ്ട് കേന്ദ്രസര്‍ക്കാര്‍ 2011-ലെ വിദേശസംഭാവന നിയന്ത്രണ ചട്ടത്തില്‍ ഭേദഗതി വരുത്തി. മതപരം, സാംസ്‌കാരികം, സാമ്പത്തികം, വിദ്യാഭ്യാസപരം, സാമൂഹികം എന്നിങ്ങനെ അഞ്ച് പ്രധാന വിഭാഗങ്ങളിലായി 105 പ്രവര്‍ത്തനങ്ങള്‍ക്ക് മാത്രമാണ് ഇനി വിദേശ ഫണ്ട് ഉപയോഗിക്കാന്‍ അനുമതി.

🔹വീര്യം കുറഞ്ഞ മദ്യത്തിന് നികുതി കുറച്ചത് ധനബില്ലില്‍ ഉള്‍പ്പെടുത്താനുറച്ച് മുഖ്യമന്ത്രി വി ഡി സതീശന്‍. ധനബില്ല് ജൂലൈ ഒന്നിന് നിയമസഭ പാസാക്കും. മുസ്ലീം ലീഗ് ഉള്‍പ്പെടെയുള്ള ഘടകക്ഷികളും വി എം സുധീരന്‍ ഉള്‍പ്പെടെയുള്ള മുതിര്‍ന്ന നേതാക്കളും വിമര്‍ശനത്തില്‍ ഉറച്ച് നില്‍ക്കുന്നതിനിടയിലാണ് വി ഡി സതീശന്റെ ഈ നീക്കം.മുഖ്യമന്ത്രിയുടെ പ്രൊഫൈൽ

‎‎🔹ആരോഗ്യവകുപ്പിൽ 57,000-ത്തിൽപ്പരം ജീവനക്കാരുണ്ടെന്നും അവരിൽ ഓരോരുത്തരുടെയും ചോദ്യങ്ങൾക്കും പരാതികൾക്കും മറുപടി പറയുകയല്ല ആരോഗ്യമന്ത്രിയുടെ ജോലിയെന്നും ആരോഗ്യവകുപ്പ് മന്ത്രി കെ. മുരളീധരൻ. ഡോ. കെ.ജെ. റീന നടത്തുന്ന നിയമപോരാട്ടത്തിൽ പ്രതികരിക്കുകയായിരുന്നു അദ്ദേഹം.

🔹ഹൈക്കോടതി വിധിയുടെ അടിസ്ഥാനത്തില്‍ തിരുവനന്തപുരം നഗരസഭയിലെ 20 ബിജെപി കൗണ്‍സിലര്‍മാരില്‍ 19 പേരും ഈശ്വരനാമത്തില്‍ സത്യപ്രതിജ്ഞ ചെയ്തു. ദേവിദേവന്മാരുടെയും ബലിദാനികളുടെയും ഭാരതാംബയുടെയും നാമത്തില്‍ തിരുവനന്തപുരം കോര്‍പറേഷനിലെ 20 ബിജെപി കൗണ്‍സിലര്‍മാര്‍ സത്യപ്രതിജ്ഞ ചെയ്തത് അസാധുവാണെന്ന് ഹൈക്കോടതി വിധിച്ചതിനു പിറകേ വീണ്ടും സത്യപ്രതിജ്ഞ ചെയ്യുകയായിരുന്നു.

🔹പൊതുമേഖല സ്ഥാപനങ്ങള്‍ സ്വകാര്യവല്‍ക്കരിക്കുമെന്ന ഒരു വാചകംപോലും ബജറ്റില്‍ ഇല്ലെന്ന് മുഖ്യമന്ത്രി വി.ഡി. സതീശന്‍. കെഎസ്ആര്‍ടിസിയെ സ്വയം പര്യാപ്തമാക്കും. സപ്ലൈ കോയെ ലാഭത്തിലാക്കും. ലാഭത്തിലായിരുന്ന കെഎസ്ഇബിയെ എല്‍ഡിഎഫ് കടത്തിലാക്കി. കൂടിയ വിലക്ക് വൈദ്യുതി വാങ്ങിയതടക്കം കോടികളാണ് പ്രതിദിന നഷ്ടം. ജനങ്ങള്‍ക്കു ഭീമമായ ബാധ്യതയാണ് എല്‍ഡിഎഫ് സര്‍ക്കാരുണ്ടാക്കിയതെന്നും സതീശന്‍ കുറ്റപ്പെടുത്തി.

🔹കരിമണല്‍ സ്വകാര്യവത്കരിക്കുകയാണെന്ന പ്രചാരണം തെറ്റെന്ന് മുഖ്യമന്ത്രി വ.ിഡി. സതീശന്‍ നിയമസഭയില്‍ പറഞ്ഞു. ബജറ്റില്‍ അങ്ങനൊരു പരാമര്‍ശമില്ല. പ്രതിപക്ഷം ഇല്ലാ കഥകള്‍ പ്രചരിപ്പിക്കുകയാണ്. കേന്ദ്ര സംസ്ഥാന സംയുക്ത സംരംഭമാണ് ലക്ഷ്യമെന്നും സതീശന്‍ പറഞ്ഞു.

🔹ജനങ്ങള്‍ക്ക് നല്‍കിയ വാഗ്ദാനം നിറവേറ്റുന്ന ബജറ്റാണു താന്‍ അവതരിപ്പിച്ചതെന്നു മന്ത്രി വി.ഡി സതീശന്‍ നിയമസഭയില്‍. ജനസംഖ്യാപരമായ മാറ്റങ്ങളെ കണ്ടില്ലെന്ന് നടിക്കാനാകില്ല. നാടുവിട്ടു പോകാന്‍ ആഗ്രഹിക്കുന്ന യുവാക്കള്‍ക്കു മികച്ച കോഴ്‌സുകളും പ്രോഗ്രാമുകളും തൊഴിലവസരങ്ങളും സൃഷ്ടിക്കണം. കേരളം വയോജന സംസ്ഥാനമായി മാറുകയാണ്. വയോജനങ്ങളെ സംരക്ഷിക്കണം. നന്നായി പഠിച്ചിട്ടാണ് വയോജനങ്ങള്‍ക്കായി വകുപ്പ് രൂപീകരിച്ചതെന്നും മുഖ്യമന്ത്രി പറഞ്ഞു.

🔹നിയമസഭയില്‍ മുഖ്യമന്ത്രി വിഡി സതീശനും പ്രതിപക്ഷ നേതാവ് പിണറായി വിജയനും തമ്മില്‍ വാക്‌പോര്. പിന്‍വലിക്കാനാണോ പദ്ധതിയില്‍ ഒപ്പിട്ടതെന്ന് മുഖ്യമന്ത്രി ചോദിച്ചു. ആര്‍എസ്എസിന്റെ വിഷ സര്‍പ്പങ്ങള്‍ക്കു മുന്നില്‍ വിളക്കു കൊളുത്തിയത് ഇടത് സര്‍ക്കാരാണെന്നും സതീശന്‍ പറഞ്ഞു. ഇപ്പോള്‍ പിഎം ശ്രീ നടപ്പായിട്ടില്ലെന്നായിരുന്നു പിണറായിയുടെ മറുപടി. സാമ്പത്തിക നില സംബന്ധിച്ചു മുഖ്യമന്ത്രി വിശദീകരിക്കുന്നതിനിടെയും തര്‍ക്കമുണ്ടായി. മുന്‍ ധനമന്ത്രി കെ.എന്‍. ബാലഗോപാല്‍ ഇടപെടാന്‍ ശ്രമിച്ചപ്പോള്‍ സ്പീക്കര്‍ വിലക്കി. പ്രസംഗം തടസപ്പെടുത്താന്‍ അധികാരമില്ലെന്ന് മുഖ്യമന്ത്രിയും പറഞ്ഞു. പ്രതിപക്ഷത്തെ നേരിടേണ്ടത് ഇങ്ങനെയല്ലെന്ന് പ്രതിപക്ഷ നേതാവ് പിണറായി വിജയന്‍ ക്ഷുഭിതനായി.

🔹കേരളത്തിന്റെ 51 ാം ചീഫ് സെക്രട്ടറിയായി ആഭ്യന്തര വകുപ്പ് അഡീഷണല്‍ ചീഫ് സെക്രട്ടറി ബിശ്വനാഥ് സിന്‍ഹയെ നിയമിക്കാന്‍ മന്ത്രിസഭാ യോഗം തീരുമാനിച്ചു.

🔹സംസ്ഥാനത്ത് വ്യാജ കള്ളിന്റെ ഉല്‍പാദനവും വിതരണവും തടയാന്‍ കള്ളുഷാപ്പുകളില്‍ പരിശോധനയുമായി എക്‌സൈസ് വകുപ്പ്. ‘ഓപ്പറേഷന്‍ ശുദ്ധി’ എന്നാണ് ഈ പദ്ധതിയ്ക്ക് എക്സൈസ് പേരിട്ടിരിക്കുന്നത്.

🔹ഗവ. പ്ലീഡര്‍മാരെ നിയമിച്ചുകൊണ്ട് പുതിയ പട്ടിക ഇറങ്ങി. 17 സീനിയര്‍ ഗവണ്‍മെന്റ് പ്ലീഡര്‍മാര്‍, 24 ഗവ. പ്ലീഡര്‍മാര്‍, നാല് സ്‌പെഷ്യല്‍ ഗവ. പ്ലീഡര്‍മാര്‍ എന്നിവരെയാണു നിയമിച്ചത്. ലോയേഴ്‌സ് കോണ്‍ഗ്രസ് പ്രതിനിധികളെ കൂടി ചേര്‍ത്താണ് പുതിയ പട്ടിക. സര്‍ക്കാര്‍ അഭിഭാഷകരുടെ വിവാദ നിയമനങ്ങളില്‍ ലോയേഴ്‌സ് കോണ്‍ഗ്രസ് അതൃപ്തി പ്രകടിപ്പിച്ചിരുന്നു.

🔹മുന്‍ മുഖ്യമന്ത്രി പിണറായി വിജയന്റെ ഗണ്‍മാന്‍മാര്‍ നടത്തിയ രക്ഷാപ്രവര്‍ത്തനം മൂലമാണ് താന്‍ എംഎല്‍എ ആയതെന്ന് എഡി തോമസ് നിയമസഭയില്‍. ആയിരക്കണക്കിന് അമ്മമാരുടെ ശാപം എല്‍ഡിഎഫ് നേതാക്കളെ വിടാതെ പിന്തുടരുമെന്നും തോമസ് പറഞ്ഞു.

🔹സിഎംആര്‍എല്‍ എക്‌സാലോജിക് മാസപ്പടി കേസില്‍ വീണ വിജയനുമായി ബന്ധപ്പെട്ട എസ്എഫ്‌ഐഒ യുടെ കസ്റ്റഡിയിലുണ്ടായിരുന്ന രേഖകള്‍ എന്‍ഫോഴ്‌സ്‌മെന്റിനു കൈമാറി. കുറ്റപത്രത്തിന്റെ ഭാഗമായുള്ള 134 രേഖകളാണ് കോടതി ഉത്തരവനുസരിച്ച് ഇഡിക്ക് ലഭിച്ചത്. ഈ രേഖകള്‍ കൂടി പരിശോധിച്ച് തിങ്കളാഴ്ച വീണയുടെ മൊഴിയെടുക്കും.

🔹വീണാ വിജയന്‍ പ്രതിയായ മാസപ്പടിക്കേസില്‍ റെയ്ഡിനെത്തിയ ഇഡി ഉദ്യോഗസ്ഥരെ ആക്രമിച്ച കേസിലെ പ്രതി വിദേശത്തേക്കു കടന്നു. സിപിഎം പ്രവര്‍ത്തകനായ പാളയം സന്തോഷാണ് വിദേശത്തേക്കു കടന്നത്. സന്തോഷിനെതിരെ ലുക്ക് ഔട്ട് നോട്ടീസിറക്കി.

🔹മുഖ്യമന്ത്രിയുടെ മകള്‍ വീണാ വിജയന്‍ ഉള്‍പ്പെട്ട മാസപ്പടി കേസുമായി ബന്ധപ്പെട്ട് ഇഡി ഉദ്യോഗസ്ഥരെ ആക്രമിച്ച കേസില്‍ ഒരു പ്രതിക്ക് ജാമ്യം. ഒമ്പതാം പ്രതിയായ ഹരീഷ് കുമാറിനാണ് കോടതി ജാമ്യം അനുവദിച്ചത്.

🔹റവന്യൂ വകുപ്പിലെ 181 തഹസീല്‍ദാര്‍, സീനിയര്‍ സൂപ്രണ്ടുമാര്‍ എന്നിവരുടെ സ്ഥലംമാറ്റം കേരള അഡ്മിനിസ്‌ട്രേറ്റീവ് ട്രിബൂണല്‍ സ്റ്റേ ചെയ്തു. ലാന്‍ഡ് റവന്യൂ കമ്മീഷണര്‍ ഇറക്കിയ ഉത്തരവാണ് ട്രിബൂണലിലെ അഡ്മിനിസ്‌ട്രേറ്റീവ് മെമ്പര്‍ എന്‍ വാസുദേവന്‍ സ്റ്റേ ചെയ്തത്. മാനദണ്ഡങ്ങള്‍ പാലിക്കാതെയുള്ള സ്ഥലം മാറ്റ ഉത്തരവെന്ന് ട്രിബൂണലിന്റെ നിരീക്ഷണം.

🔹പശ്ചിമഘട്ടത്തിലെ ജനവാസ പ്രദേശങ്ങളെ പരിസ്ഥിതി ലോല മേഖലകളുടെ പട്ടികയില്‍ ഉള്‍പ്പെടുത്താനുള്ള നീക്കത്തില്‍ നിന്ന് കേന്ദ്ര സര്‍ക്കാര്‍ പിന്മാറണമെന്ന് സിപിഎം സംസ്ഥാന സെക്രട്ടറിയേറ്റ് ആവശ്യപ്പെട്ടു. ഇടുക്കി, വയനാട് ജില്ലകളിലെ 31 വില്ലേജുകളെ പൂര്‍ണമായും മറ്റ് ജില്ലകളിലെ 92 വില്ലേജുകളെ ഭാഗികമായും പരിസ്ഥിതി ലോല മേഖലകളില്‍ നിന്ന് ഒഴിവാക്കണമെന്ന കേരളത്തിന്റെ ആവശ്യമാണ് കേന്ദ്രസര്‍ക്കാര്‍ തള്ളിയത്.

🔹ശബരിമല എക്‌സിക്യൂട്ടീവ് ഓഫീസര്‍ സ്ഥാനത്തുനിന്ന് ഒ.ജി. ബിജുവിനെ മാറ്റി. തുടരാന്‍ താല്‍പര്യമില്ലെന്ന് ഉദ്യോഗസ്ഥനില്‍നിന്ന് എഴുതി വാങ്ങുകയായിരുന്നു. ആടിയ ശിഷ്ടം നെയ്യ്, അഷ്ടാഭിഷേകം അഴിമതിയില്‍ ബിജുവിനെതിരായ ഹൈക്കോടതി പരാമര്‍ശത്തിന് പിറകേയാണ് ബോര്‍ഡ് തീരുമാനം.

🔹ചാനല്‍ ചര്‍ച്ചകള്‍ക്കെതിരെ രൂക്ഷവിമര്‍ശനവുമായി എസ്എന്‍ഡിപി ജനറല്‍ സെക്രട്ടറി വെള്ളാപ്പള്ളി നടേശന്‍. കാര്യങ്ങള്‍ പഠിക്കാതെ ഇഷ്ടമുള്ളത് വിളിച്ചു പറയുന്നുവെന്നു വെള്ളാപ്പള്ളി പറഞ്ഞു. തനിക്ക് ലഭിച്ച പത്മ പുരസ്‌കാരം ഗുരുവിനു സമര്‍പ്പിക്കുന്നുവെന്നും വെള്ളാപ്പള്ളി പറഞ്ഞു.

🔹കൊട്ടാരക്കര നീലേശ്വരത്ത് വാഹനാപകടത്തില്‍ മരിച്ചവരുടെ കുടുംബത്തിന് 5 ലക്ഷം രൂപ ധനസഹായം പ്രഖ്യാപിച്ച് സംസ്ഥാന സര്‍ക്കാര്‍. പരിക്കേറ്റ് കഴിയുന്നവരുടെ ചികിത്സാ ചെലവ് സര്‍ക്കാര്‍ ഏറ്റെടുക്കും.

🔹ഭിന്നശേഷിക്കാരനായ വില്ലേജ് ഓഫീസറെ സ്ഥലം മാറ്റിയ തഹസില്‍ദാര്‍ അടക്കമുള്ള ഉദ്യോഗസ്ഥരോട് റിപ്പോര്‍ട്ട് തേടി ജില്ലാ കളക്ടര്‍. പന്മന വില്ലേജ് ഓഫീസര്‍ രാധാകൃഷ്ണ പിള്ളയെ സ്ഥലം മാറ്റിയ നടപടിയിലാണ് ജില്ലാ കളക്ടര്‍ റിപ്പോര്‍ട്ട് തേടിയിരിക്കുന്നത്.

🔹തൃശൂര്‍ ജില്ലയിലെ ഇരുന്നൂറോളം ബസുകള്‍ ജൂലൈ ഒന്നോടെ സര്‍വീസ് നിര്‍ത്തിവയ്ക്കാന്‍ ‘ജി ഫോം’ സമര്‍പ്പിക്കുന്നു. കനത്ത നഷ്ടം സഹിച്ച് ബസ് സര്‍വീസ് നടത്താനാവില്ലെന്ന് കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്‌സ് ഓര്‍ഗനൈസേഷന്‍ ജില്ലാ ജനറല്‍ സെക്രട്ടറി വി.എസ്.പ്രദീപ് പറഞ്ഞു..

🔹പുത്തൂര്‍ സുവോളജിക്കല്‍ പാര്‍ക്കിലേക്ക് വിദേശരാജ്യങ്ങളില്‍നിന്ന് കൊണ്ടുവരാനിരുന്ന പക്ഷിമൃഗാദികളുടെ ടെന്‍ഡര്‍ പണമില്ലാത്തതിനാല്‍ കഴിഞ്ഞ എല്‍.ഡി.എഫ് സര്‍ക്കാര്‍ റദ്ദാക്കി. 15 കോടിയോളം രൂപ ചെലവുവരുന്ന ടെന്‍ഡറാണ് റദ്ദായത്. ജിറാഫ്, ഗ്രീന്‍ അനാക്കോണ്ട, സീബ്ര, എലാന്റ, മക്കൗ, കൊക്കാറ്റ് തുടങ്ങിയ ഇനങ്ങളെ കൊണ്ടുവരാനായിരുന്നു പരിപാടി.

🔹എല്‍ഡിഎഫിന്റെ പരാജയത്തിന് നിരവധി കാരണങ്ങള്‍ ഉണ്ടെന്ന് റാപ്പര്‍ വേടന്‍. പരാജയ കാരണങ്ങള്‍ ഒരു ക്യാന്‍വാസ് പോലെയാണ്. പുതിയ സര്‍ക്കാരിന് സമയം നല്‍കണം. ജനാധിപത്യപരമായി തെരഞ്ഞെടുക്കപ്പെട്ട സര്‍ക്കാരാണ് ഇത്. ജനങ്ങള്‍ക്ക് ചോദ്യം ചെയ്യാനുള്ള പ്ലാറ്റ്‌ഫോമുകളും ഉണ്ടെന്നും കാത്തിരുന്ന് കാണാമെന്നും വേടന്‍ പറഞ്ഞു.

🔹പാലക്കാട്ടെ കോണ്‍ഗ്രസ് അംഗത്തിന്റെ സത്യപ്രതിജ്ഞ ഹൈക്കോടതി റദ്ദാക്കി. വടക്കഞ്ചേരി പന്നിയങ്കര 21-ാം വാര്‍ഡ് മെമ്പറാണ് സുനില്‍. ‘ഈശ്വരാനുഗ്രഹത്താല്‍ ഉമ്മന്‍ ചാണ്ടിയുടെ നാമത്തില്‍ സത്യപ്രതിജ്ഞ’ എന്നായിരുന്നു സുനില്‍ പ്രതിജ്ഞ ചെയ്തത്. മറ്റൊരു വാര്‍ഡ് മെമ്പറാണ് കോടതിയെ സമീപിച്ചത്.

🔹കാര്‍ തടഞ്ഞുനിര്‍ത്തി 16.25 ലക്ഷം രൂപയും ഐഫോണും കവര്‍ന്ന കേസിലെ മുഖ്യ സൂത്രധാരനായ കട്ടിങ് നബീലിനെ ബാഗ്ലൂരില്‍നിന്നു പിടികൂടി. കാമുകിയുമൊത്ത് ദുബായിലേക്ക് കടക്കാന്‍ ശ്രമിക്കവെയാണ് പ്രതി പിടിയിലായത്. കുറഞ്ഞ നിരക്കില്‍ യു.എസ്. ഡോളര്‍ തരാമെന്നു വിശ്വസിപ്പിച്ച് പാലക്കാടുനിന്ന് നാലുപേരെ വിളിച്ചുവരുത്തി അവരുടെ കാറിന്റെ ചില്ല് തല്ലിപ്പൊളിച്ച് കാറിലുള്ളവരെ വെട്ടിപ്പരിക്കേല്‍പ്പിച്ചാണു കവര്‍ച്ച നടത്തിയത്.

🔹തിരുവനന്തപുരം ചാന്നാങ്കരയില്‍ ഐസ് ഫാക്ടറിയില്‍ അമോണിയചോര്‍ച്ച. ഇതേത്തുടര്‍ന്ന് അസ്വസ്ഥത അനുഭവപ്പെട്ട അസം സ്വദേശിയെ ആശുപത്രിയിലേക്ക് മാറ്റി.

🔹മധ്യപ്രദേശ് മുഖ്യമന്ത്രി മോഹന്‍ യാദവിനെതിരെ കൂടുതല്‍ ആരോപണങ്ങളുമായി കോണ്‍ഗ്രസ്. അയോധ്യയിലെയും ഉജ്ജയിനിലെയും കൊള്ളയ്ക്കു പിന്നില്‍ ബിജെപിയാണെന്ന് മധ്യപ്രദേശ് പിസിസി അധ്യക്ഷന്‍ ജിത്തു പട്വാരി ആരോപിച്ചു. 500 കോടി രൂപ വിലമതിക്കുന്ന ഭൂമി മോഹന്‍ യാദവിന്റെ ഉപദേശകന്റെ ട്രസ്റ്റ് വാങ്ങിയത് വെറും ഒരു രൂപയ്ക്കാണെന്നും കോണ്‍ഗ്രസ് ആരോപിച്ചു.

🔹അയോധ്യ രാമക്ഷേത്ര സംഭാവന തട്ടിപ്പില്‍ വിഎച്ച്പി ഉപാധ്യക്ഷനും ട്രസ്റ്റ് ജനറല്‍ സെക്രട്ടറിയുമായ ചമ്പത് റായിക്കെതിരെ കേസെടുത്തേക്കും. കടുത്ത സമ്മര്‍ദ്ദത്തെ തുടര്‍ന്നാണ് ചമ്പത് റായിക്കെതിരെ നടപടി സ്വീകരിക്കാന്‍ ഒരുങ്ങുന്നത്. ട്രസ്റ്റ് അംഗം ഡോ. അനില്‍ മിശ്രയും അന്വേഷണ ഏജന്‍സിയുടെ നിരീക്ഷണത്തിലാണ്.

🔹2025 ല്‍ രാജ്യത്ത് വിതരണം ചെയ്തത് 1.39 കോടി പാസ്‌പോര്‍ട്ടുകള്‍. ദുരുപയോഗം തടയുന്നതിനുള്ള ചിപ്പ് ഘടിപ്പിച്ച പാസ്‌പോര്‍ട്ടാണ് കഴിഞ്ഞ വര്‍ഷം വിതരണം ചെയ്തതെന്ന് വിദേശകാര്യമന്ത്രാലയ ഉദ്യോഗസ്ഥര്‍ അറിയിച്ചു.

🔹യുഎസ് അംബാസഡര്‍ സെര്‍ജിയോ ഗോര്‍ ഹോട്ടലില്‍ വെച്ച് കൂടിക്കാഴ്ച നടത്താന്‍ മുന്നോട്ടുവച്ച നിര്‍ദേശം തമിഴ്‌നാട് മുഖ്യമന്ത്രി ജോസഫ് വിജയ് നിരസിച്ചു. സെക്രട്ടറിയേറ്റിലെ തന്റെ ഓഫീസില്‍ വെച്ച് കാണുന്നതാണ് ഉചിതമെന്ന് അദ്ദേഹം അറിയിച്ചതിനെ തുടര്‍ന്ന്, അംബാസഡര്‍ ഓഫീസിലെത്തി മുഖ്യമന്ത്രിയെ സന്ദര്‍ശിച്ചു.

🔹കൊല്‍ക്കത്തയില്‍ നിര്‍മ്മാണത്തിലിരുന്ന കെട്ടിടം തകര്‍ന്ന് വീണ് മൂന്ന് മരണം. തരതല ബ്രേസ് ബ്രിഡ്ജ് റെയില്‍വേ സ്റ്റേഷന് സമീപമുള്ള ഗോഡൗണിന്റെ മേല്‍ക്കൂരയാണ് തകര്‍ന്ന് വീണത്. കെട്ടിടത്തിന്റെ ഉള്ളില്‍ കുടുങ്ങിയ 7 തൊഴിലാളികളെ രക്ഷപ്പെടുത്തി.

🔹എയര്‍ ഇന്ത്യ വിമാനം അബദ്ധത്തില്‍ പാകിസ്താന്‍ വ്യോമാതിര്‍ത്തിയില്‍ പ്രവേശിച്ചു. ഡല്‍ഹിയില്‍ നിന്ന് പഞ്ചാബിലെ അമൃത്സറിലേക്ക് പോയ വിമാനമാണ് അന്താരാഷ്ട്ര അതിര്‍ത്തി ലംഘിച്ചത്. സാങ്കേതിക കാരണങ്ങളാല്‍ ദിശ നഷ്ടപ്പെട്ടതെന്നാണ് പ്രാഥമിക വിവരം.

🔹തെക്കന്‍ അമേരിക്കന്‍ രാജ്യമായ ഉറുഗ്വേയിലെ ഇന്ത്യന്‍ അംബാസഡറായി മലയാളിയായ ബിനോയ് ജോര്‍ജിനെ നിയമിച്ചു. തിരുവല്ല സ്വദേശിയായ ബിനോയ് ജോര്‍ജ് നിലവില്‍ വിദേശകാര്യമന്ത്രാലയത്തിലെ കോണ്‍സുലാര്‍, പാസ്‌പോര്‍ട്ട്, വീസ വിഭാഗത്തിലെ ജോയിന്റ് സെക്രട്ടറിയാണ്.

🔹ഇറാന്റെ പരമോന്നത നേതാവ് ആയത്തുള്ള അലി ഖമനേയിയുടെ സംസ്‌കാര ചടങ്ങുകളില്‍ പങ്കെടുക്കുന്നതിനായി ഇന്ത്യന്‍ പ്രധാനമന്ത്രി നരേന്ദ്ര മോദിയെ ഇറാന്‍ പ്രസിഡന്റ് മസൂദ് പെസെഷ്‌കിയാന്‍ ക്ഷണിച്ചു. സംസ്‌കാര ചടങ്ങുകള്‍ ജൂലൈ ഒമ്പതിന് ഖമനേയിയുടെ ജന്മനാടായ മഷാദിലെ ഇമാം റെസ തീര്‍ത്ഥാടന കേന്ദ്രത്തില്‍ നടക്കും. ഫെബ്രുവരി 28-ന് യുഎസും-ഇസ്രയേലും ഇറാനുനേരെ ആരംഭിച്ച സംയുക്ത ആക്രമണത്തിലാണ് അദ്ദേഹം കൊല്ലപ്പെട്ടത്.

🔹പാകിസ്ഥാനിലെ ബലൂചിസ്താനില്‍ ദൂരൂഹ സാഹചര്യത്തിലുള്ള തിരോധാനങ്ങള്‍ക്കും മനുഷ്യാവകാശ ലംഘനങ്ങള്‍ക്കും എതിരെ വര്‍ഷങ്ങളായി പോരാടുന്ന മനുഷ്യാവകാശ പ്രവര്‍ത്തക ഡോ. മാഹ്‌റംഗ് ബലോച്ചിന് ജീവപര്യന്തം തടവ്. 2024-ല്‍ ഒരു പ്രതിഷേധ പ്രകടനത്തിനിടയില്‍ അര്‍ദ്ധസൈനിക വിഭാഗത്തിലെ ഉദ്യോഗസ്ഥന്‍ കൊല്ലപ്പെട്ട കേസിലാണ് ക്വറ്റയിലെ തീവ്രവാദ വിരുദ്ധ കോടതി ശിക്ഷ വിധിച്ചത്.

🔹യൂറോപ്യന്‍ രാജ്യങ്ങളില്‍ കടുത്ത ഉഷ്ണതരംഗം. ഫ്രാന്‍സില്‍ റെക്കോര്‍ഡു ചൂടാണ്. ചൊവ്വാഴ്ച ഫ്രാന്‍സില്‍ ശരാശരി താപനില 29.8 ഡിഗ്രി സെല്‍ഷ്യസായിരുന്നു. ഫ്രാന്‍സിലെ പകുതിയിലധികം പ്രദേശങ്ങളിലും ബുധനാഴ്ച അതീവ ജാഗ്രതാ നിര്‍ദ്ദേശമായ റെഡ് അലര്‍ട്ട് പ്രഖ്യാപിച്ചു.

🔹ഇസ്രയേല്‍ സൈന്യം ഗാസയില്‍ രണ്ട് വര്‍ഷത്തിനിടെ കൊന്നുകളഞ്ഞത് 20,000 കുട്ടികളെയാണെന്ന് ഐക്യരാഷ്ട്രസഭയുടെ അന്വേഷണ സമിതി.

🔹ഏകദിന ബാറ്റിങ് റാങ്കിങ്ങില്‍ ഇന്ത്യന്‍ ക്യാപ്റ്റന്‍ ശുഭ്മന്‍ ഗില്ലിന് വമ്പന്‍ കുതിപ്പ്. മൂന്ന് സ്ഥാനങ്ങള്‍ മെച്ചപ്പെടുത്തിയ ഗില്‍ കരിയറിലെ മികച്ച റാങ്കായ രണ്ടാം സ്ഥാനത്തെത്തി. ഇന്ത്യന്‍ നായകനെന്ന നിലയില്‍ തന്റെ ആദ്യ ഏകദിന പരമ്പര വിജയം സ്വന്തമാക്കിയതിന് തൊട്ടുപിന്നാലെയാണ് ഗില്ലിന്റെ ഈ നേട്ടം.

🔹ലോകകപ്പ് ഫുട്‌ബോളിന്റെ ഗ്രൂപ്പ് ബി മല്‍സരത്തില്‍ ഒന്നിനെതിരേ രണ്ടു ഗോളുകള്‍ക്കു കാനഡയെ തോല്‍പിച്ച് സ്വിറ്റ്‌സര്‍ലന്‍ഡ് നോക്കൗട്ടിലെത്തി. ഗ്രൂപ്പു ചാമ്പ്യന്മാരായ സ്വിറ്റസര്‍ലന്‍ഡിനു പിറകേ, രണ്ടാം സ്ഥാനത്തുള്ള കാനഡയും 32 ടീമുകളടങ്ങുന്ന അടുത്ത ഘട്ടത്തിനു യോഗ്യതനേടി. രണ്ടാം പകുതിയിലെ ആദ്യ മിനിറ്റില്‍ സ്വിസ് താരം മന്‍സാംബി നല്‍കിയ ക്രോസ് എംബോളോ വാര്‍ഗാസി ഗോളാക്കി. 11 മിനിറ്റിനകം മന്‍സാംബി രണ്ടാമത്തെ ഗോളും നേടി.

🔹ലോകകപ്പ് ഫുട്‌ബോളിന്റെ ഗ്രൂപ്പ് ബി മല്‍സരത്തില്‍ ഖത്തറിനെ ഒന്നിനെതിരേ മൂന്നു ഗോളുകള്‍ക്ക് ബോസ്‌നിയ പരാജയപ്പെടുത്തി നോക്കൗട്ടിലെത്തി.

🔹ലോകകപ്പിലെ ഗ്രൂപ്പ് സി മത്സരത്തില്‍ സ്‌കോട്ട്ലാന്‍ഡിനെ എതിരില്ലാത്ത മൂന്ന് ഗോളുകള്‍ക്ക് തകര്‍ത്ത് ബ്രസീല്‍. വിനീഷ്യസ് ജൂനിയറാണ് ബ്രസീലിനായി രണ്ടു ഗോളുകളും സ്‌കോര്‍ ചെയ്തത്. മാത്യുസ് കുന്യ ഒരു ഗോള്‍ നേടി. നെയ്മര്‍ 76-ാം മിനിറ്റില്‍ പകരക്കാരനായി ഇറങ്ങിയെങ്കിലും ഗോളുകളൊന്നും നേടാനായില്ല.

🔹ലോകകപ്പിലെ ഗ്രൂപ്പ് സി യില്‍ നടന്ന മറ്റൊരു മത്സരത്തില്‍ ഹെയ്തിയെ രണ്ടിനെതിരെ നാലു ഗോളുകള്‍ക്ക് തകര്‍ത്ത് മൊറോക്കോ. കളിയുടെ പത്താം മിനിറ്റില്‍ സെല്‍ഫ് ഗോളിലൂടെ ഹെയ്തി മുന്നിലെത്തിയെങ്കിലും 39-ാം മിനിറ്റില്‍ മൊറോക്കോ സമനിലപിടിച്ചു. എന്നാല്‍ മൊറോക്കോയെ ഞെട്ടിച്ച് 43-ാം മിനിറ്റില്‍ ഹെയ്തി രണ്ടാമത്തെ ഗോള്‍ നേടി. ആദ്യ പകുതിയുടെ ഇഞ്ചുറി ടൈമില്‍ ഗോള്‍ തിരിച്ചടിച്ച് മൊറോക്കോ വീണ്ടും സമനില പിടിച്ചു. രണ്ടാം പകുതിയില്‍ 78, 89 മിറ്റുകളില്‍ ഗോളുകള്‍ നേടി മൊറോക്കോ ആധികാരിക വിജയം നേടി.

🔹പുണര്‍തം പ്രൊഡക്ഷന്‍സിന്റെ ബാനറില്‍ പ്രദീപ് രാജ് നിര്‍മിച്ച് അഭിലാഷ് വാര്യര്‍ തിരക്കഥയെഴുതി സംവിധാനം ചെയ്യുന്ന അരൂപി എന്ന ചിത്രത്തിന്റെ ട്രെയ്‌ലര്‍ റിലീസായി. ജൂലൈ മൂന്നിന് പ്രദര്‍ശനത്തിനെത്തുന്ന ഈ ഹൊറര്‍ ചിത്രത്തില്‍ വൈശാഖ് രവി, ബോളിവുഡ് ഫെയിം നേഹാ ചൗള, സാക്ഷി ബദാല, ജോയ് മാത്യു, സിന്ധു വര്‍മ്മ, അഭിലാഷ് വാര്യര്‍, കിരണ്‍ രാജ്, ആദിത്യ രാജ്, മാത്യു രാജു, കണ്ണന്‍ സാഗര്‍, എ കെ വിജുബാല്‍, നെബു എബ്രഹാം, വിനയ്, ആന്റണി ഹെന്റി, വിഷ്ണു കാന്ത്, വൈഷ്ണവ്, ജോജോ ആന്റണി, സുജ റോസ്, ആന്‍ മരിയ, അഞ്ജന മോഹന്‍, രേഷ്മ, സംഗീത തുടങ്ങിയവര്‍ പ്രധാന കഥാപാത്രങ്ങളെ അവതരിപ്പിക്കുന്നു. അമല്‍ ഛായാഗ്രഹണം നിര്‍വഹിക്കുന്നു. ബി കെ ഹരിനാരായണന്‍ എഴുതിയ വരികള്‍ക്ക് ഗോപി സുന്ദര്‍ സംഗീതം പകരുന്നു.

🔹ദിലീപിനെ നായകനാക്കി ജഗന്‍ ഷാജി കൈലാസ് സംവിധാനം ചെയ്യുന്ന ‘നീക്കം’ എന്ന ചിത്രത്തിന്റെ റിലീസ് തടഞ്ഞ് മദ്രാസ് ഹൈക്കോടതി. നിര്‍മാതാവ് എ വി അനൂപിന്റെ ഹര്‍ജിയിലാണ് ജസ്റ്റിസ് കെ കുമരേഷ് ബാബുവിന്റെ ഇടക്കാല ഉത്തരവ്. നിര്‍മാണ കരാറുമായി ബന്ധപ്പെട്ട തര്‍ക്കങ്ങള്‍ മധ്യസ്ഥതയിലൂടെ പരിഹരിക്കുന്നത് വരെ ഹര്‍ജിക്കാരന്റെ താല്പര്യങ്ങള്‍ സംരക്ഷിക്കാന്‍ സ്റ്റേ അനിവാര്യമാണെന്ന് കോടതി വിലയിരുത്തി. ‘നീക്കം’ നിര്‍മാതാവ് സന്ദീപ് സേനനുമായുള്ള സാമ്പത്തിക തര്‍ക്കമാണ് ഹര്‍ജിക്ക് ആധാരം. നിര്‍മാണക്കരാര്‍ ലംഘനവും സന്ദീപ് സേനന്‍ നല്‍കിയ ചെക്ക് മടങ്ങിയതും ഹര്‍ജിയില്‍ ചൂണ്ടിക്കാട്ടുന്നു. അശോകന്‍, ബിനു പപ്പു, കലാഭവന്‍ ഷാജോണ്‍, സിദ്ദിഖ്, വീണ നന്ദകുമാര്‍, ബിലാസ് ചന്ദ്രഹാസന്‍, സിറാജ്, ശാരി, രമ്യ സുരേഷ്, ദിയ ദീപന്‍ തുടങ്ങി വന്‍ താരനിരയാണ് ചിത്രത്തില്‍ അണിനിരക്കുന്നത്. വിബിന്‍ ബാലചന്ദ്രന്‍ തിരക്കഥയൊരുക്കുന്നു. ജഗന്‍ ഷാജി കൈലാസിന്റെ സംവിധാന അരങ്ങേറ്റ ചിത്രവും ദിലീപിന്റെ 152-ാമത്തെ ചിത്രവുമാണിത്.

💦 ഗുരുജിയുടെ വാക്കുകൾ
*****************************

പക… അത് വീട്ടാനുള്ളതാണോ?
അല്ലായെന്നാണ് എന്റെ അഭിപ്രായം. സ്നേഹം പോലെ തന്നെ മനുഷ്യസഹജമായ ഒരു വികാരമാണ് വെറുപ്പും. ആ വെറുപ്പ് പലപ്പോഴും ജനിക്കുന്നത് നമ്മളിലുണ്ടായ ആഴത്തിലുള്ള മുറിവുകളിൽ നിന്നാണ്.
നമ്മളെ വേദനിപ്പിച്ചവരോട്, കബളിപ്പിച്ചവരോട്, പറഞ്ഞു പറ്റിച്ചവരോട്, വിശ്വാസവഞ്ചന കാട്ടിയവരോട്, പരിഹസിച്ച് കോമാളിയാക്കിയവരോട്, ശാരീരികമായും മാനസികമായും തകർത്തവരോട് ഒക്കെ പക തോന്നുക സ്വാഭാവികമാണ്.
”ഒരു കനൽ കഷണത്തെ കൈവെള്ളയിൽ ഒതുക്കിപ്പിടിച്ച് മറ്റൊരാൾക്ക് നേരെ എറിയാൻ കാത്തിരിക്കുന്നത് പോലെയാണ് പക. മറ്റൊരാൾ പൊള്ളുന്നതിന് മുൻപ് അത് നമ്മെത്തന്നെയാണ് ചാരമാക്കുന്നത്.”
സത്യത്തിൽ, നമ്മളെ തകർത്തവരോട് തോന്നേണ്ടത് പകയോ ദേഷ്യമോ അല്ല. മറിച്ച്, ഒരു വലിയ ‘നന്ദി’ ആണ്! കാരണം, ജീവിതത്തിലെ ഏറ്റവും വലിയ ‘യൂണിവേഴ്സിറ്റി’ ഇത്തരം കയ്പ്പേറിയ അനുഭവങ്ങളാണ്. ആ വീഴ്ചകൾ ഇല്ലായിരുന്നെങ്കിൽ, ഒരുപക്ഷേ നമ്മൾ ഇത്രയധികം കരുത്തരാകില്ലായിരുന്നു. ആര് കൂടെയുണ്ടാകും, ആര് ചതിക്കും എന്നൊക്കെയുള്ള വലിയ പാഠങ്ങൾ ഈ അനുഭവങ്ങളാണ് നമുക്ക് പഠിപ്പിച്ചു തരുന്നത്.
”ചില വാതിലുകൾ അടയുന്നത് ഒരു തടസ്സമല്ല, മറിച്ച് ശരിയായ ദിശയിലേക്ക് മാറാനുള്ള പ്രകൃതിയുടെ സൂചനയാണ്.”
ആ വഞ്ചനകളോ പരിഹാസങ്ങളോ ഇല്ലായിരുന്നെങ്കിൽ, ഒരുപക്ഷേ നമ്മൾ പഴയ ആ സാഹചര്യത്തിൽ തന്നെ തളച്ചിടപ്പെടുമായി
രുന്നു. പ്രതികാരം ചെയ്യാൻ നടക്കുമ്പോൾ നമ്മുടെ മനസ്സിന്റെ സമാധാനമാണ് ആദ്യം ഇല്ലാതാകുന്നത്. അവരെ എങ്ങനെ തകർക്കാം എന്ന് ആലോചിക്കുന്ന സമയം നമ്മുടെ സ്വന്തം വളർച്ചയ്ക്കായി ഉപയോഗിക്കാം.
”ക്ഷമിക്കുക എന്നത് അവരോടുള്ള ഉദാരതയല്ല, മറിച്ച് നമ്മുടെ സമാധാനത്തിന് വേണ്ടി സ്വന്തം മനസ്സിന് നൽകുന്ന വലിയൊരു സമ്മാനമാണ്.”
ഏറ്റവും വലിയ പ്രതികാരം എന്നത് പക വീട്ടലല്ല, മറിച്ച് നിങ്ങളെ തകർക്കാൻ നോക്കിയവർക്ക് മുന്നിൽ അതിശയിപ്പിക്കുന്ന രീതിയിൽ ജീവിച്ചു കാണിക്കലാണ്.
നിങ്ങളെ തകർക്കാൻ അവർ എറിഞ്ഞ കല്ലുകൾ കൊണ്ട് തന്നെ നിങ്ങളുടെ വിജയത്തിന്റെ കോട്ട കെട്ടുക.”എന്റെ തകർച്ചയിൽ കൂടെനിന്നവർക്ക് നന്ദി, അതിലും വലിയ നന്ദി എന്നെ തകർക്കാൻ നോക്കിയവരോട്… കാരണം നിങ്ങളാണ് എന്നെ ഒരു ‘പോരാളി’യാക്കിയത്. കബളിപ്പിക്കപ്പെട്ട നിമിഷങ്ങളാണ് എനിക്ക് യഥാർത്ഥ കാഴ്ച നൽകിയത്.ഒറ്റപ്പെട്ട നിമിഷങ്ങളാണ് എനിക്ക് പറക്കാനുള്ള ചിറകുകൾ തന്നത്.”നമ്മുടെ ജീവിതത്തിലെ വില്ലന്മാർ /വില്ലത്തികളോടും നമ്മുക്ക് നന്ദിയും കടപ്പാടും ഉണ്ടായിരിക്കണം,
കാരണം അവരാണ് നമ്മെ
നമ്മുടെ ജീവിത കഥയിലെ നായകൻ / നായിക ആക്കി മാറ്റിയത്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 25

•ഇന്ത്യയിൽ ജൂൺ 25 ഇനിമുതൽ ⁠ഭരണഘടനാ ഹത്യാ ദിനമായി ആചരിക്കാൻ കേന്ദ്രസർക്കാർ തീരുമാനിച്ചിട്ടുണ്ട്. 1975 ജൂൺ 25-നാണ് അന്നത്തെ പ്രധാനമന്ത്രി ഇന്ദിരാഗാന്ധി രാജ്യത്ത് അടിയന്തരാവസ്ഥ (Emergency) പ്രഖ്യാപിച്ചത്. ജനാധിപത്യത്തിന്റെ ആത്മാവിനെ ഞെരുക്കിയ ആ കറുത്ത നാളുകളിൽ പീഡനമനുഭവിച്ചവരോടുള്ള ആദരസൂചകമായാണ് ഈ ദിനാചരണം.

•അന്താരാഷ്ട്ര നാവിക ദിനം (Day of the Seafarer)ആഗോള സമ്പദ്‌വ്യവസ്ഥയ്ക്കും അന്താരാഷ്ട്ര വ്യാപാരത്തിനും നാവികർ നൽകുന്ന സംഭാവനകളെ മാനിച്ച് എല്ലാ വർഷവും ജൂൺ 25 ⁠അന്താരാഷ്ട്ര നാവിക ദിനമായി ആചരിക്കുന്നു. ഇന്റർനാഷണൽ മാരിടൈം ഓർഗനൈസേഷന്റെ (IMO) നേതൃത്വത്തിലാണ് ഈ ദിനാചരണം നടക്കുന്നത്.

•ലോക വിറ്റിലിഗോ ദിനം (World Vitiligo Day)ത്വക്കിന്റെ നിറം നഷ്ടപ്പെടുന്ന ‘വിറ്റിലിഗോ’ (വെള്ളപ്പാണ്ട്) എന്ന അവസ്ഥയെക്കുറിച്ച് ജനങ്ങളിൽ അവബോധം വളർത്തുന്നതിനായി ജൂൺ 25 ⁠ലോക വിറ്റിലിഗോ ദിനമായി ആചരിക്കുന്നു. ഈ രോഗാവസ്ഥയുള്ളവരോടുള്ള വിവേചനം അവസാനിപ്പിക്കാനും ആത്മവിശ്വാസം നൽകാനും ഈ ദിവസം ലക്ഷ്യമിടുന്നു.

•ആഗോള ബീറ്റിൽസ് ദിനം (Global Beatles Day)ലോകപ്രശസ്ത മ്യൂസിക് ബാൻഡായ ‘ദി ബീറ്റിൽസ്’ (The Beatles) സമൂഹത്തിലും സംഗീത ലോകത്തും ചെലുത്തിയ സ്വാധീനത്തെ ഓർമ്മിക്കാൻ ആരാധകർ ജൂൺ 25 ⁠ആഗോള ബീറ്റിൽസ് ദിനമായി ആഘോഷിക്കുന്നു. 1967-ൽ ഇതേ ദിവസം അവർ തങ്ങളുടെ പ്രശസ്തമായ “All You Need Is Love” എന്ന ഗാനം ലോകമെമ്പാടുമുള്ള ദശലക്ഷക്കണക്കിന് ആളുകൾക്കായി തത്സമയം സംപ്രേഷണം ചെയ്തതിന്റെ ഓർമ്മയ്ക്കാണിത്.

തയ്യാറാക്കിയത്: കപിൽ ശങ്കർ

12 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 25 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 25

തയ്യാറാക്കിയത്: കപിൽ ശങ്കർ

യു.എസ് ഗ്രീൻ കാർഡ് ഉടമകൾക്ക് തിരിച്ചടിയായി സുപ്രീം കോടതി വിധി

ടെസ്‌ല കാർ വീടിനുള്ളിലേക്ക് ഇടിച്ചുകയറി വയോധിക മരിച്ച സംഭവത്തിൽ കമ്പനിക്കെതിരെ കേസ്

വെനസ്വേലയിൽ ഉണ്ടായ ശക്‌തമായ ഇരട്ട ഭൂകമ്പത്തിൽ മരണ സംഖ്യ ലക്ഷം കവിയുമെന്ന് സൂചന.

LEAVE A REPLY Cancel reply

Most Popular

നീണ്ട ഇടവേളയ്ക്ക് ശേഷം മഞ്ഞക്കുപ്പായത്തിലേക്ക്; 981 ദിവസത്തിനുശേഷം വികാരാധീനമായ തിരിച്ചുവരവ്.

ആർത്തവ ശുചിത്വം പാലിക്കാൻ സാധിക്കുന്നില്ല; 23കാരിയായ യുവതിയുടെ ഗർഭപാത്രം നീക്കം ചെയ്യാൻ ഹൈക്കോടതി അനുമതി.

2030 ലോകകപ്പിൽ കളിക്കുമോ? ആരാധകരുടെ ചോദ്യത്തിന് മറുപടിയുമായി ലയണൽ മെസ്സി.

Recent Comments

EDITOR PICKS

നീണ്ട ഇടവേളയ്ക്ക് ശേഷം മഞ്ഞക്കുപ്പായത്തിലേക്ക്; 981 ദിവസത്തിനുശേഷം വികാരാധീനമായ തിരിച്ചുവരവ്.

ആർത്തവ ശുചിത്വം പാലിക്കാൻ സാധിക്കുന്നില്ല; 23കാരിയായ യുവതിയുടെ ഗർഭപാത്രം നീക്കം ചെയ്യാൻ ഹൈക്കോടതി അനുമതി.

POPULAR POSTS

ആർത്തവ ശുചിത്വം പാലിക്കാൻ സാധിക്കുന്നില്ല; 23കാരിയായ യുവതിയുടെ ഗർഭപാത്രം നീക്കം ചെയ്യാൻ ഹൈക്കോടതി അനുമതി.

വെനസ്വേലയിൽ ഉണ്ടായ ശക്‌തമായ ഇരട്ട ഭൂകമ്പത്തിൽ മരണ സംഖ്യ ലക്ഷം കവിയുമെന്ന് സൂചന.

വാതിൽ അടയ്ക്കുന്നതിനെച്ചൊല്ലി തർക്കം; ഓടുന്ന ട്രെയിനിൽ യുവാവിനെ കുത്തിക്കൊന്നു, വീഡിയോ പുറത്ത്.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 25 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂൺ 25

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************