ന്യൂഡൽഹി: യാത്രക്കാരുടെ സുരക്ഷ വർധിപ്പിക്കുന്നതിനുള്ള ശ്രമങ്ങളുടെ ഭാഗമായി ട്രെയിനുകളിൽ നിരോധിതമോ ആക്ഷേപകരമോ ആയ സാധനങ്ങൾ കൊണ്ടുപോയാലുള്ള പിഴ വർധിപ്പിച്ച് ഇന്ത്യൻ റെയിൽവേ. നിയമങ്ങൾ ലംഘിക്കുന്നതായി കണ്ടെത്തുന്ന യാത്രക്കാർക്ക് മേൽ കനത്ത പിഴ ചുമത്തിയാണ് റെയിൽവേ നിയമങ്ങൾ കർശനമാക്കിയിരിക്കുന്നത്.
റെയിൽവേ ആക്ട് 1989ലെ സെക്ഷൻ 67, 154, 164, 165 എന്നിവ പ്രകാരം ട്രെയിനുകളിൽ എളുപ്പത്തിൽ തീപിടിക്കുന്നതോ സ്ഫോടകവസ്തുക്കളോ ആയ സാധനങ്ങൾ കൊണ്ടുപോകുന്നത് ശിക്ഷാർഹമായ കുറ്റമാണ്. നിയമലംഘകർക്ക് മുൻപ് മൂന്ന് വർഷം വരെ തടവോ 1,000 രൂപ വരെ പിഴയോ അല്ലെങ്കിൽ ഇവ രണ്ടും കൂടിയോ ശിക്ഷയായി ലഭിക്കുമായിരുന്നു. ഇതിനുപുറമേ, ഈ കുറ്റം കാരണം സംഭവിക്കുന്ന ഏതൊരു നഷ്ടത്തിനും പരിക്കിനും അല്ലെങ്കിൽ നാശനഷ്ടങ്ങൾക്കും നഷ്ടപരിഹാരം നൽകാനും ഇവർ ബാധ്യസ്ഥരായിരുന്നു.
2026-ലെ ജൻ വിശ്വാസ് ആക്ടിലെ വ്യവസ്ഥകൾ പ്രകാരം, സെക്ഷൻ 165-ന് കീഴിൽ വരുന്ന കുറ്റകൃത്യങ്ങൾക്ക്, അതായത് റെയിൽവേ വഴി കൊണ്ടുപോകുന്നതിനായി ആക്ഷേപകരമോ നിരോധിതമോ ആയ സാധനങ്ങൾ കൊണ്ടുവരുന്നതിനോ കൈമാറുന്നതിനോ കുറഞ്ഞത് 10,000 രൂപ പിഴ നിശ്ചയിച്ചിട്ടുണ്ട്. കൂടാതെ, റെയിൽവേയ്ക്ക് ഉണ്ടാകുന്ന ഏതൊരു നഷ്ടത്തിനും നാശനഷ്ടത്തിനും ബന്ധപ്പെട്ട വ്യക്തി ഉത്തരവാദിയായിരിക്കും. പിഴ അടയ്ക്കാൻ വിസമ്മതിക്കുന്ന പക്ഷം, ഒരു വർഷം വരെ തടവോ അല്ലെങ്കിൽ കുറഞ്ഞത് 10,000 രൂപ പിഴയോ അല്ലെങ്കിൽ ഇവ രണ്ടും കൂടിയോ ലഭിക്കാനുള്ള വ്യവസ്ഥകളാണ് ഇതിൽ ഉൾപ്പെടുത്തിയിരിക്കുന്നത്.
റെയിൽവേയുടെ നിർദേശപ്രകാരം യാത്രാ കോച്ചുകളിൽ സ്റ്റൗ, ഗ്യാസ് സിലിണ്ടർ, മണ്ണെണ്ണ, പെട്രോൾ, പടക്കങ്ങൾ, തെരഞ്ഞെടുപ്പ് പോസ്റ്ററുകൾ, തീപ്പെട്ടി, സിഗരറ്റ് തുടങ്ങിയ എളുപ്പത്തിൽ തീപിടിക്കുന്ന സാധനങ്ങൾ കൊണ്ടുപോകുന്നതാണ് ട്രെയിനുകളിൽ തീപിടുത്തമുണ്ടാകാനുള്ള പ്രധാന കാരണങ്ങൾ.
