📱വാർത്തകൾ ഒറ്റനോട്ടത്തിൽ📱 – 2026 | ജൂൺ 23 | ചൊവ്വ ✍️ കപിൽ ശങ്കർ

🔹വീര്യം കുറഞ്ഞ മദ്യത്തിന് നികുതി കുറച്ചുള്ള ബജറ്റ് പ്രഖ്യാപനത്തില്‍ സര്‍ക്കാരിനെതിരെ നിയമസഭയില്‍ അഴിമതി ആരോപണമുയര്‍ത്തി പ്രതിപക്ഷം. മദ്യ കമ്പനിയായ ബക്കാര്‍ഡിയ്ക്ക് വേണ്ടിയാണ് നികുതി പരിഷ്‌കരണമെന്ന് പ്രതിപക്ഷനേതാവ് പിണറായി വിജയന്‍ ആരോപിച്ചു.

🔹‎സർക്കാരിനെതിരെ പ്രതിപക്ഷം ഉന്നയിച്ച അഴിമതി ആരോപണം രേഖകളിൽ നിന്ന് നീക്കണമെന്ന് മുഖ്യമന്ത്രി വി ഡി സതീശനും ആഭ്യന്തര മന്ത്രി രമേശ് ചെന്നിത്തലയും. അഴിമതി ആരോപണം പ്രതിപക്ഷം ഉന്നയിച്ചത് നോട്ടീസിൽ പറയാതെയാണെന്ന് രമേശ് ചെന്നിത്തല പറഞ്ഞു. പ്രതിപക്ഷ ആരോപണം ഒരു കാരണവശാലും രേഖയിൽ കാണരുതെന്ന് മുഖ്യമന്ത്രി വി ഡി സതീശനും പറഞ്ഞു. പരിശോധിക്കും എന്നായിരുന്നു സ്പീക്കർ തിരുവഞ്ചൂർ രാധാകൃഷ്ണന്‍റെ മറുപടി.

🔹സര്‍ക്കാരിനെതിരെ എഐഎസ്എഫ്, എഐവൈഎഫ് പ്രവര്‍ത്തകര്‍ നടത്തിയ നിയമസഭാ മാര്‍ച്ചിനെതിരേ പൊലീസ് ജലപീരങ്കി പ്രയോഗിച്ചത് മലിനജലം കൊണ്ടാണെന്ന് പ്രതിപക്ഷ നേതാവ് പിണറായി വിജയന്‍. മലിനജലം നിറച്ച കുപ്പി സഭയില്‍ ഉയര്‍ത്തിക്കാണിച്ചാണ് ആരോപണം ഉന്നയിച്ചത്. ഗുരുതര രോഗങ്ങളുണ്ടാക്കുന്ന മലിനജലം ജലപീരങ്കിയില്‍ പ്രയോഗിച്ചത് ഗൗരവമായി കാണണമെന്നും ആഭ്യന്തര മന്ത്രി മറുപടി പറയണമെന്നും പിണറായി വിജയന്‍ ആവശ്യപ്പെട്ടു. കേരളത്തില്‍ ആദ്യമായിട്ടല്ലല്ലോ ജലപീരങ്കി എന്നായിരുന്നു ആഭ്യന്തര മന്ത്രി രമേശ് ചെന്നിത്തലയുടെ മറുപടി.

🔹ആലപ്പുഴയില്‍ പിണറായി വിജയന്റെ വാഹനവ്യൂഹത്തിനു കരിങ്കൊടി കാണിച്ചതിനു ഗണ്‍മാന്‍മാര്‍ നടത്തിയ ‘രക്ഷാപ്രവര്‍ത്തന’കേസ് അട്ടിമറിച്ചതു സംബന്ധിച്ച് പ്രത്യേക അന്വേഷണ സംഘത്തിന്റെ അന്വേഷണ റിപ്പോര്‍ട്ട് എസ് പി ഷൗക്കത്തലി ഡിജിപിക്കു കൈമാറി. അന്വേഷണത്തില്‍ അട്ടിമറി നടന്നുവെന്നാണ് എസ്ഐടിയുടെ കണ്ടെത്തല്‍. കേസ് ഡയറി തിരുത്തിയെന്നതടക്കം എം ആര്‍ അജിത് കുമാറിനെതിരായ ഉദ്യോഗസ്ഥരുടെ മൊഴിയും രേഖകളും റിപ്പോര്‍ട്ടിലുണ്ട്.

‎🔹മയക്കുമരുന്ന് മാഫിയക്കെതിരെയുള്ള ഓപ്പറേഷൻ തൂഫാൻ ശക്തമായി നടപ്പിലാക്കുകയാണെന്ന് ആഭ്യന്തര മന്ത്രി രമേശ് ചെന്നിത്തല നിയമസഭയെ അറിയിച്ചു. ഇതിന്റെ ഭാഗമായി സംസ്ഥാനത്താകെ ഇതുവരെ 2954 കേസുകൾ രജിസ്റ്റർ ചെയ്യുകയും 3176 പേരെ അറസ്റ്റ് ചെയ്യുകയും ചെയ്തിട്ടുണ്ടെന്നും അദ്ദേഹം കൂട്ടിച്ചേർത്തു.

‎🔹സിനിമക്കാരെന്നോ സാധാരണക്കാരെന്നോ നോക്കില്ല കാരവാൻ ആണെങ്കിലും, ഡിജെ പാർട്ടിയാണെങ്കിലും ഫൈവ്സ്റ്റാർ ആണെങ്കിലും മയക്കുമരുന്നിനെതിരെ ശക്തമായ നടപടിയെടുക്കുമെന്ന് രമേശ് ചെന്നിത്തല നിയമസഭയിൽ പറഞ്ഞു.

🔹മാസപ്പടി കേസില്‍ സിഎംആര്‍എലിന്റെ ചീഫ് ഫിനാന്‍സ് ഓഫീസര്‍ കെ എസ് സുരേഷ് കുമാറിനെ ഇഡി ചോദ്യം ചെയ്ത് വിട്ടയച്ചു. ബിസിനസ് സുഗമമായി മുന്നോട്ട് പോകാന്‍ വ്യക്തികള്‍ക്കും രാഷ്ട്രീയ നേതാക്കള്‍ക്കും കരിമണല്‍ കമ്പനി പണം നല്‍കിയ്യട്ടുണ്ടെന്ന് സുരേഷ് കുമാര്‍ മൊഴി നല്‍കി.

🔹മുപ്പതു ദിവസത്തിനകം സംസ്ഥാനത്ത് പനി ബാധിച്ചു മരിച്ചത് 87 പേരാണെന്ന് മുന്‍ ആരോഗ്യമന്ത്രി വീണ ജോര്‍ജ്. ആരോഗ്യമന്ത്രി മുരളീധരന്‍ വിടുവായത്തം നിര്‍ത്തി വകുപ്പിനെ മുന്നോട്ടു നയിക്കണമെന്ന് വീണ ഫേസ് ബുക്കില്‍ കുറിച്ചു.

🔹ജനങ്ങള്‍ വീട്ടിലിരുത്തിയവര്‍ക്ക് ആരു മറുപടി നല്‍കാനാണ്, പോയി പണി നോക്കൂവെന്നു കെ മുരളീധരന്‍. മുന്‍ ആരോഗ്യമന്ത്രി വീണ ജോര്‍ജിന്റെ ഉപദേശത്തിനാണ് മന്ത്രിയുടെ പരിഹാസം.

🔹ശബരിമല തീര്‍ത്ഥാടന ഡ്യൂട്ടിക്കു ഡോക്ടര്‍മാരെ ആവശ്യപ്പെട്ട് ദേവസ്വം വകുപ്പ് ആരോഗ്യ വകുപ്പിനു നല്‍കിയ കത്തിനു പ്രതികൂല മറുപടി നല്‍കി ആരോഗ്യ വകുപ്പ്. കത്തുകള്‍ അയച്ച് തര്‍ക്കിക്കുന്ന ദേവസ്വം വകുപ്പിന്റെയും ആരോഗ്യ വകുപ്പിന്റെയും മന്ത്രി ഒരാളാണ്. കെ. മുരളീധരന്‍. വകുപ്പുകള്‍ തമ്മില്‍ യാതൊരുവിധ ആശയവിനിമയമോ ഏകോപനമോ നടക്കുന്നില്ലെന്നതിനു തെളിവാണിതെന്ന് സിഐടിയു.

🔹എസ്എന്‍ഡിപി യോഗം മൈക്രോഫിനാന്‍സ് മുന്‍ കോര്‍ഡിനേറ്റര്‍ മഹേശന്റെ ആത്മഹത്യയെക്കുറിച്ച് അന്വേഷിക്കണമെന്ന് ആവശ്യപ്പെട്ട് കോണ്‍ഗ്രസ് നേതാവ് വി.എം സുധീരന്‍ മുഖ്യമന്ത്രിക്കു കത്തയച്ചു. കത്തിന്റെ പകര്‍പ്പ് ആഭ്യന്തര മന്ത്രി രമേശ് ചെന്നിത്തലയ്ക്കും കൈമാറി. വെള്ളാപ്പള്ളി നടേശന്‍ നിയമസംവിധാനത്തെ പരസ്യമായി വെല്ലുവിളിക്കുകയാണെന്നും ഭരണസംവിധാനം ഉണര്‍ന്നു പ്രവര്‍ത്തിക്കണമെന്നും സുധീരന്‍ ആവശ്യപ്പെട്ടു.

🔹‎കുന്നത്തുനാട് മുന്‍ എംഎല്‍എയും സിപിഎം നേതാവുമായ പി.വി.ശ്രീനിജന് എതിരെ വിജിലൻസ് അന്വേഷണം. സ്ലേറ്റ് എന്ന പേരില്‍ കുന്നത്തുനാട് മണ്ഡലത്തിലെ സര്‍ക്കാര്‍ എയ്ഡഡ് സ്കൂളുകളില്‍ നടപ്പാക്കിയ വിദ്യാഭ്യാസ പദ്ധതിയാണ് വിജിലന്‍സ് അന്വേഷണത്തിന്‍റെ പരിധിയിലേക്ക് വരുന്നത്. യൂത്ത് കോണ്‍ഗ്രസ് നേതാവ് ജെയ്സല്‍ ജബ്ബാറാണ് പരാതിക്കാരൻ.

🔹നീലേശ്വരത്ത് നിയന്ത്രണം വിട്ട ടിപ്പർ ലോറി ബസ് സ്റ്റോപ്പിലേക്ക് പാഞ്ഞുകയറി മൂന്ന് പേരുടെ മരണത്തിന് ഇടയാക്കിയ സംഭവത്തിൽ കടുത്ത നിയമലംഘനങ്ങൾ നടന്നതായി ട്രാൻസ്പോർട്ട് കമ്മീഷണർ അറിയിച്ചു. ഡ്രൈവർക്ക് ടിപ്പർ ഓടിക്കാനുള്ള ലൈസൻസ് ഉണ്ടായിരുന്നില്ല. അപകടസമയത്ത് വാഹനത്തിന്റെ ജിപിഎസ് സംവിധാനം ഓഫാക്കിയ നിലയിലായിരുന്നുവെന്നും അമിതവേഗതയാണ് അപകടത്തിന് കാരണമായതെന്നും ട്രാൻസ്പോർട്ട് കമ്മീഷണർ വ്യക്തമാക്കി.

🔹മാട്രിമോണിയല്‍ സൈറ്റും സമൂഹമാധ്യമങ്ങളും വഴി പരിചയപ്പെടുന്ന യുവാക്കളെ പങ്കാളിയാക്കാമെന്നും, ബിസിനസ് പാര്‍ട്ണര്‍ ആക്കാമെന്നും പറഞ്ഞ് വിശ്വസിപ്പിച്ച് കോടികള്‍ തട്ടിയെടുത്ത യുവതി പിടിയിലായി. ആലുവ എടത്തല സ്വദേശിനി ഷംല ഷമീര്‍ (29) ആണ് പെരുമ്പാവൂര്‍ പൊലീസിന്റെ പിടിയിലായത്. വാഴക്കുളം മഞ്ഞപ്പെട്ടി സ്വദേശിയായ യുവാവില്‍ നിന്നും 50 ലക്ഷം രൂപ തട്ടിയെടുത്ത കേസിലാണ് അറസ്റ്റ്.

🔹തൊണ്ടര്‍നാട് തൊഴിലുറപ്പ് തട്ടിപ്പുകേസ് വിജിലന്‍സ് അന്വേഷിക്കും. ക്രൈംബ്രാഞ്ചാണു കേസ് അന്വേഷിച്ചിരുന്നത്. പഞ്ചായത്തിലെ തൊഴിലുറപ്പ് പദ്ധതിയുടെ മറവില്‍ മൂന്നു കോടിയിലധികം രൂപയുടെ തട്ടിപ്പ് നടന്നെന്നാണ് ക്രൈംബ്രാഞ്ചിന്റെ കണ്ടെത്തല്‍.

🔹കോട്ടയം റബര്‍ബോര്‍ഡ് ആസ്ഥാനത്ത് 43 ലക്ഷം രൂപയുടെ സ്വര്‍ണാഭരണങ്ങള്‍ മോഷ്ടിച്ച കേസില്‍ ഒരു പ്രതി പിടിയില്‍. മധ്യപ്രദേശ് അലിരാജ്പുര്‍ സ്വദേശി ദല്‍സിംഗ് മണ്ഡേലോയ് ആണ് പിടിയിലായത്. ജനുവരി 19 ന് അഞ്ചു പേരുടെ സംഘമാണ് മോഷണം നടത്തിയത്.

🔹കൊട്ടാരക്കര നീലേശ്വരത്ത് അമിതവേഗത്തിലെത്തിയ ടിപ്പർ ലോറി നിയന്ത്രണം വിട്ട് ബസ് സ്റ്റോപ്പിലേക്ക് പാഞ്ഞുകയറി മൂന്നുപേർ മരിച്ച വാർത്ത ഞെട്ടലോടെയാണ് കേരളം കണ്ടത്. ബസ് കാത്തിരുന്നവരുടെ മുകളിലേക്ക് മണ്ണും കെട്ടിടാവശിഷ്ടങ്ങളും പാറക്കഷണങ്ങളുമടക്കമാണ് വീണത്.ഇന്ന് രാവിലെ ഏഴുമണിയോടെയാണ് നാടിനെ നടുക്കിയ ഈ ദാരുണമായ സംഭവം നടന്നത്. സ്കൂളിലേക്ക് പോകാനായി മുക്കോളി മുക്കിലെ ബസ് കാത്തിരിപ്പ് കേന്ദ്രത്തിൽ നിന്ന കുട്ടികളുടെ മുകളിലേക്കാണ് മണ്ണുകയറ്റി വന്ന ടിപ്പർ ലോറി മറിഞ്ഞത്. അഞ്ചിലധികം പേർക്ക് ഗുരുതരമായി പരിക്കേൽക്കുകയും ചെയ്തു.അപകടം നടന്നയുടൻ തന്നെ ഫയർഫോഴ്സും പോലീസും നാട്ടുകാരും ചേർന്ന് ടിപ്പറിനടിയിലെ മണ്ണുമാറ്റിയാണ് കുട്ടികളെ പുറത്തെടുത്തത്.

🔹ഇടുക്കി കരിമ്പനില്‍ വീടിനുള്ളിൽ ഗ്യാസ് സിലിണ്ടര്‍ പൊട്ടിത്തെറിച്ച് രണ്ട് പേർക്ക് ഗുരുതര പരിക്ക്. കരിമ്പന്‍ സ്വദേശികളായ കൊട്ടാരത്തില്‍ ജസ്റ്റിന്‍ ജോസ്(37), അമ്മ ജോളി ജോസ് എന്നിവര്‍ക്കാണ് അപകടത്തിൽ പരിക്കേറ്റത്.തിങ്കളാഴ്ച രാത്രി 9.15 ഓടെ ആയിരുന്നു അപകടം സംഭവിച്ചത്. പുതിയ സിലിണ്ടര്‍ കണക്ട് ചെയ്യുന്നതിനിടെ തീ പടരുകയായിരുന്നുവെന്നാണ് പ്രാഥമിക നിഗമനം. അപകടത്തെ തുടർന്ന് പരിക്കേറ്റ ഇരുവരെയും കോട്ടയം മെഡിക്കല്‍ കോളജ് ആശുപത്രിയിൽ പ്രവേശിപ്പിച്ചു. അപകടത്തിൽ വീടിനും സാരമായ കേടുപാടുകൾ സംഭവിച്ചു. വീടിന്‍റെ അടുക്കളയും മറ്റൊരു മുറിയും പൂര്‍ണമായും തകര്‍ന്നു.

🔹സംസ്ഥാനത്ത് ജനജീവിതത്തിന് കാട്ടുപന്നി വളരെ പ്രതിസന്ധി സൃഷ്ടിക്കുന്നതായും 50,000 കാട്ടുപന്നികളാണ് വനത്തിനു പുറത്തു ജനവാസ മേഖലകളിൽ ഉള്ളതെന്നും വനം മന്ത്രി മന്ത്രി ഷിബു ബേബി ജോണ്‍.പഴകുളം മധുവിന്‍റെ ശ്രദ്ധക്ഷണിക്കലിനു മറുപടിയായാണ് മന്ത്രി ഇക്കാര്യം അറിയിച്ചത്. വൻതോതിൽ പന്നികൾ പെറ്റുപെരുകുന്ന സാഹചര്യത്തിൽ പന്നികളെ കൊല്ലാനുള്ള ഒരു ഡ്രൈവ് നിലവിലുള്ള നിയമത്തിന്‍റെ അടിസ്ഥാനത്തിൽ നടത്തും. പല പഞ്ചായത്തുകളിലും പന്നികളെ കൊല്ലുന്നതിനു ഷൂട്ടർമാരില്ല. ഇവിടങ്ങളിൽ ഷൂട്ടർമാരെ നിയമിക്കും.ജൂലൈ മുതൽ ഓഗസ്റ്റ് വരെ ഡ്രൈവ് നടത്തും. കർഷകരെ വിശ്വാസത്തിലെടുത്തുള്ള പ്രവർത്തനങ്ങളാവും വനം വകുപ്പ് നടത്തുക.

🔹കേരളത്തില്‍ ഒറ്റപ്പെട്ടയിടങ്ങളില്‍ ഇന്നും നാളെയും ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ്. ആലപ്പുഴ, എറണാകുളം, തൃശൂര്‍, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളില്‍ ഇന്ന് യെല്ലോ അലര്‍ട്ടാണ്.

🔹നിർത്തിയിട്ട കാറിന്‍റെ ഡിക്കി തുറക്കുന്നതിനിടെ കണ്ടെയ്നർ ഇടിച്ചുണ്ടായ അപകടത്തിൽ യുവാവ് മരിച്ചു. കോയമ്പത്തൂർ ആണ്ടൂർ കുന്നത്തൂരമ്പാളയം സഞ്ജയ് രാജ് (25) ആണ് മരിച്ചത്.വടക്കഞ്ചേരിയിൽ ദേശീയപാതയ്ക്കരികിൽ ഇന്ന് രാവിലെ 7.20 ഓടെയാണ് അപകടം.ദേശീയപാതയിൽ പാലക്കാട് ദിശയിൽ അണക്കപ്പാറ എക്സൈസ് ഓഫീസിന് എതിർവശത്ത് റോഡരികിൽ കാർ നിർത്തിയ ശേഷം മൊബൈൽ ഫോൺ ചാർജർ എടുക്കാനായി ഡിക്കി തുറന്നപ്പോഴാണ് ഇതേ ദിശയിൽ വന്ന കണ്ടെയ്നർ ലോറി നിയന്ത്രണം വിട്ട് ഇടിച്ചത്.

🔹തമിഴ്‌നാട്, കര്‍ണാടക തുടങ്ങിയ ദക്ഷിണേന്ത്യന്‍ സംസ്ഥാനങ്ങളില്‍ നിന്നുള്ള അധിക വൈദ്യുതി ലഭ്യമായതിനെത്തുടര്‍ന്ന് ശനി, ഞായര്‍ ദിവസങ്ങളില്‍ സംസ്ഥാനത്ത് വൈദ്യുതി നിയന്ത്രണം ഒഴിവായി. കേരളത്തിലേക്ക് വൈദ്യുതി എത്തിക്കാനുള്ള പവര്‍ കോറിഡോറില്‍ നിയന്ത്രണം ഇല്ലാത്തതും കെഎസ്ഇബിക്ക് സഹായകമായി.

🔹ഉത്തര്‍ പ്രദേശിലെ ലഖ്നൗവില്‍ കോച്ചിങ് സെന്ററില്‍ ഉണ്ടായ തീപിടിത്തത്തില്‍ 15 പേര്‍ മരിച്ചു. സംഭവത്തില്‍ നാലുപേര്‍ അറസ്റ്റില്‍. ഏഴുപേര്‍ക്കെതിരെ കേസെടുത്തു. ഒളിവില്‍ പോയ രണ്ടുപേരെ കണ്ടെത്താനായി അന്വേഷണം നടക്കുകയാണ്. കോച്ചിങ് സെന്റര്‍ ഉള്‍പ്പെടുന്ന കെട്ടിടത്തിലെ മറ്റ് സ്ഥാപനങ്ങളുടെ ഉടമകളും നടത്തിപ്പുകാരുമാണ് അറസ്റ്റിലായത്.

🔹പാര്‍ട്ടി സ്ഥാപകയും മുന്‍ മുഖ്യമന്ത്രിയുമായ മമത ബാനര്‍ജിയെ തൃണമൂല്‍ കോണ്‍ഗ്രസ് അധ്യക്ഷ സ്ഥാനത്തു നിന്ന് നീക്കിയെന്ന് വിമതപക്ഷം. അരൂപ് റോയ് ആണ് പുതിയ അധ്യക്ഷനെന്ന് വിമതപക്ഷം പ്രഖ്യാപിച്ചു. തെരഞ്ഞെടുപ്പ് കമ്മീഷനെ ഉടന്‍ ഈ വിവരം അറിയിക്കുമെന്ന് പ്രതിപക്ഷ നേതാവ് ഋതബ്രത ബാനര്‍ജി പറഞ്ഞു.

🔹അയോധ്യ ശ്രീരാമക്ഷേത്രത്തിലെ സംഭാവന തട്ടിപ്പുമായി ബന്ധപ്പെട്ട ഹര്‍ജിയില്‍ ഇടപെടാതെ അലഹബാദ് ഹൈക്കോടതി. കേസെടുത്ത് കേന്ദ്ര ഏജന്‍സി അന്വേഷിക്കണമെന്ന് ആവശ്യപ്പെട്ട ഹര്‍ജിയില്‍ അലഹബാദ് ഹൈക്കോടതി വാദം കേള്‍ക്കാന്‍ വിസമ്മതിച്ചു. ഉത്തര്‍പ്രദേശ് സര്‍ക്കാര്‍ വിഷയത്തില്‍ ഇടപെട്ടിട്ടുണ്ടെന്ന് ചൂണ്ടിക്കാട്ടി ലഖ്‌നൗ ബഞ്ചാണ് ഹര്‍ജി കേള്‍ക്കാന്‍ വിസമ്മതിച്ചത്.

🔹ജോലിയില്ലാത്ത ബിരുദധാരികള്‍ക്ക് പ്രതിമാസം 3000 രൂപ ധനസഹായം നല്‍കുമെന്ന് പശ്ചിമ ബംഗാളിലെ ബിജെപി സര്‍ക്കാരിന്റെ ആദ്യ ബജറ്റ് നിര്‍ദേശം. ധനമന്ത്രി സ്വപന്‍ ദാസ് ഗുപ്തയാണ് ബജറ്റ് അവതരിപ്പിച്ചത്. സാമൂഹിക ക്ഷേമ പദ്ധതികള്‍ക്കും അടിസ്ഥാന സൗകര്യ വികസനത്തിനും തൊഴിലിനും ഊന്നല്‍ നല്‍കിയ പ്രഖ്യാപനങ്ങളാണ് ബജറ്റിലുള്ളത്.

🔹തമിഴ്നാട് മുഖ്യമന്ത്രി വിജയ് ചലച്ചിത്ര നിര്‍മാതാവ് ജഗദീഷ് പളനിസാമിയെ പ്രൈവറ്റ് സെക്രട്ടറിയായി നിയമിച്ചു. മാസ്റ്റര്‍, ലിയോ സിനിമകളുടെ സഹനിര്‍മാതാവായ ജഗദീഷിന്റെ റൂട്ട് കമ്പനിയാണ് വിജയ്യുടെ പിആര്‍ നിയന്ത്രിക്കുന്നത്.

🔹ദക്ഷിണ ലെബനനില്‍ ഇസ്രായേല്‍ അതിര്‍ത്തിയോട് ചേര്‍ന്ന് ഹിസ്ബുള്ള നിര്‍മ്മിച്ച വന്‍ ഭൂഗര്‍ഭ ഡ്രോണ്‍ ഫാക്ടറിയും വിക്ഷേപണ കേന്ദ്രവും കണ്ടെത്തിയതായി ഇസ്രായേല്‍ പ്രതിരോധ സേന. ഇസ്രായേല്‍ അതിര്‍ത്തിയില്‍ നിന്ന് ആറ് കിലോമീറ്റര്‍ അകലെയുള്ള മജ്ദല്‍ സൗണ്‍ ഗ്രാമത്തിന് താഴെയാണ് അതിനൂതന സൗകര്യങ്ങളുള്ള ഭൂഗര്‍ഭ അറ കണ്ടെത്തിയത്.

🔹ഖത്തറിലെ പ്രമുഖ പ്രകൃതിവാതക കയറ്റുമതി കേന്ദ്രമായ റാസ് ലഫാന്‍ വ്യവസായ മേഖലയിലുണ്ടായ സ്‌ഫോടനത്തില്‍ 13 പേര്‍ കൊല്ലപ്പെട്ടു. ബാര്‍സാന്‍ ഗ്യാസ് സപ്ലൈ കേന്ദ്രത്തിലുണ്ടായ സ്ഫോടനത്തില്‍ 18 തൊഴിലാളികളെ കാണാതായി. 66 പേര്‍ക്കു പരിക്കേറ്റു.

🔹അമേരിക്കയും ഇറാനും തമ്മിലുളള സമാധാന ചര്‍ച്ചകളില്‍ വന്‍ പുരോഗതി. അന്താരാഷ്ട്ര ആണവോര്‍ജ ഏജന്‍സിയുടെ പരിശോധനയ്ക്കു വിധേയമാകാമെന്ന് ഇറാന്‍ സമ്മതിച്ചെന്നും ഇറാനെതിരായ ഉപരോധത്തില്‍ ഇളവു പ്രഖ്യാപിച്ചെന്നും യുഎസ് വൈസ് പ്രസിഡന്റ് ജെ ഡി വാന്‍സ്. ഇറേനിയന്‍ എണ്ണയുടെ ഉത്പാദനത്തിനും വിതരണത്തിനും വില്‍പ്പനയ്ക്കും യുഎസ് ട്രഷറി വകുപ്പ് അനുമതി നല്‍കി. സ്വിറ്റ്സര്‍ലന്‍ഡില്‍ നടന്ന ചര്‍ച്ചയിലാണു ധാരണ. ചര്‍ച്ചയുടെ പുരോഗതി ലോകം ഉറ്റുനോക്കുകയായിരുന്നു.

🔹ഓസ്ട്രിയയെ എതിരില്ലാത്ത രണ്ടു ഗോളുകള്‍ക്കു തകര്‍ത്ത് നിലവിലെ ചാമ്പ്യന്‍മാരായ അര്‍ജന്റീന ലോകകപ്പ് ഫുട്ബോളിന്റെ നോക്കൗട്ടിലെത്തി. ലോകകപ്പ് ചരിത്രത്തില്‍ ഏറ്റവും കൂടുതല്‍ ഗോള്‍ നേടുന്ന താരമെന്ന ജര്‍മ്മനിയുടെ ഇതിഹാസതാരം മിറോസ്ലാവ് ക്ലോസെയുടെ റെക്കോര്‍ഡു തകര്‍ത്താണ് ഇരട്ട ഗോളോടെ മെസി അര്‍ജന്റീനക്ക് നോക്കൗട്ട് വിജയം സമ്മാനിച്ചത്. എട്ടാം മിനിറ്റിലെ പെനാല്‍റ്റി മെസിക്കു പിഴച്ചു. എന്നാല്‍ 36 ാം മിനിറ്റില്‍ മെസി ആദ്യ ഗോള്‍ നേടി. ഈ ഗോളോടെ ലോകകപ്പിലെ മെസിയുടെ പതിനേഴാം ഗോളായി. ജര്‍മനിയുടെ ക്ലോസെ നേടിയ 16 ഗോളിനെ മറികടന്നു. ഇഞ്ചുറി ടൈമിലാണ് മെസി ഓസ്ട്രയക്കെതിരേ രണ്ടാമത്തെ ഗോള്‍ നേടിയത്.

🔹ലോകകപ്പില്‍ ആദ്യമായി കനത്ത മഴയും ഇടിമിന്നലും മൂലം മല്‍സരം മാറ്റിവച്ചു. ഫിലാഡല്‍ഫിയയില്‍ നടന്ന ഫ്രാന്‍സ്- ഇറാഖ് മത്സരമാണു മാറ്റിയത്. മല്‍സരം തുടങ്ങി അരമണിക്കൂറിനു ശേഷം മഴ കനത്തു. ആദ്യ പകുതിയില്‍ കിലിയന്‍ എംബാപ്പെയുടെ ഗോളിലൂടെ ഫ്രാന്‍സ് 1-0 ന് മുന്നിട്ടുനില്‍ക്കുമ്പോഴാണ് ഇടിമിന്നലുണ്ടായത്. ആദ്യ പകുതിക്കുശേഷം താരങ്ങള്‍ക്കു ഗ്രൗണ്ടിലേക്ക് ഇറങ്ങാനായില്ല.

🔹കേരള ക്രിക്കറ്റ് അസോസിയേഷന്‍ സംഘടിപ്പിക്കുന്ന എന്‍എസ്‌കെ ടി20 ക്രിക്കറ്റ് ട്രോഫിയുടെ നാലാം സീസണ്‍ മത്സരങ്ങള്‍ ജൂണ്‍ 25 മുതല്‍ ജൂലൈ 3 വരെ നടക്കും. ടൂര്‍ണമെന്റില്‍ മൂന്ന് ഗ്രൂപ്പുകളിലായി 15 ടീമുകളാണ് പങ്കെടുക്കുന്നത്.

🔹ഇന്ത്യയ്ക്കെതിരായ ടി20 പരമ്പരയ്ക്കുള്ള 17 അംഗ ഇംഗ്ലണ്ട് ടീമിനെ ഹാരി ബ്രൂക്ക് നയിക്കും. ടീമില്‍ യുവ ഓള്‍റൗണ്ടര്‍ ജെയിംസ് കോള്‍സിന്റെ സാന്നിധ്യമാണ് പ്രധാന ആകര്‍ഷണം. അഞ്ച് ടി20 മത്സരങ്ങളാണ് ഇന്ത്യക്കെതിരെ കളിക്കുക. ജൂലൈ ഒന്നിന് ആരംഭിക്കുന്ന പരമ്പര ജൂലൈ 11-ന് സൗത്താംപ്ടണില്‍ സമാപിക്കും.

🔹ജോജു ജോര്‍ജ്- ഷാജി കൈലാസ് കൂട്ടുകെട്ടില്‍ ഒരുങ്ങുന്ന മാസ്സ് ആക്ഷന്‍ ചിത്രം ‘വരവ് ‘ സെന്‍സര്‍ ചെയ്തു. ചിത്രത്തിന് യു/എ സര്‍ട്ടിഫിക്കറ്റ് ആണ് ലഭിച്ചിരിക്കുന്നത്. ഉടന്‍ റിലീസിനെത്തും. ബിഗ് ബഡ്ജറ്റില്‍ 98 ദിവസങ്ങള്‍ എടുത്ത് ചിത്രീകരണം പൂര്‍ത്തിയാക്കിയ ‘വരവ് ‘ഹൈറേഞ്ച് പശ്ചാത്തലത്തില്‍ പ്ലാന്റര്‍മാര്‍ക്കിടയിലെ കുടിപ്പകയും അതിജീവനവുമാണ് പ്രമേയമാക്കുന്നത്. എ.കെ. സാജന്‍ ആണ് തിരക്കഥയൊരുക്കുന്നത്. വാണി വിശ്വനാഥ്, സുകന്യ, മുരളി ഗോപി, അര്‍ജുന്‍ അശോകന്‍, ദീപക് പറമ്പോല്‍, ബാബുരാജ്, അസീസ് നെടുമങ്ങാട്, ബൈജു സന്തോഷ്, അഭിമന്യു തിലകന്‍, ബോബി കുര്യന്‍, അശ്വിന്‍ കുമാര്‍, ശ്രീജിത്ത് രവി, കോട്ടയം രമേശ്, ബാലാജി,ബിജു പപ്പന്‍,ചാലി പാല, ഷാജി ഷാഹിദ്, ആന്‍ഡ്രായ് ബ്ലിറ്റസ് നെറ്റ്‌സോവ്, സാനിയ അയ്യപ്പന്‍, വിന്‍സി അലോഷ്യസ്, വീണ നായര്‍, മെറ്റില്‍ഡ പെട്രോവിക് എന്നിങ്ങനെ വലിയൊരു താരനിര തന്നെ ചിത്രത്തില്‍ അണിനിരക്കുന്നു.

🔹സൂര്യയെ നായകനാക്കി വെങ്കി അറ്റ്‌ലൂരി ഒരുക്കുന്ന ‘വിശ്വനാഥ് ആന്‍ഡ് സണ്‍സ്’ എന്ന ചിത്രത്തിലെ ആദ്യഗാനം ജനശ്രദ്ധനേടുന്നു. റിലീസ് ചെയ്ത് രണ്ട് ദിവസത്തില്‍ 6 മില്യണിലധികം കാഴ്ചക്കാരെയാണ് ഗാനം സ്വന്തമാക്കിയിരിക്കുന്നത്. ദേശീയ അവാര്‍ഡ് ജേതാവായ ജി വി പ്രകാശ് കുമാര്‍ ആണ് പട്ടാംമ്പൂച്ചി എന്ന ഗാനത്തിന് സംഗീതം ഒരുക്കിയത്. സുബ്ലഷിണി ആലപിച്ച ഗാനത്തിന് വരികള്‍ രചിച്ചത് അരുണ്‍രാജ കാമരാജ് ആണ്. ഏറെ രസകരമായ, ഒരേ സമയം ചടുലവും മെലഡി നിറഞ്ഞതുമായ താളത്തില്‍ ഒരുക്കിയ ഒരു റൊമാന്റിക് ഗാനമാണ് പട്ടാംമ്പൂച്ചി. നായികയായ മമിത ബൈജുവിന്റെ നൃത്തമാണ് ഗാനത്തിന്റെ ഹൈലൈറ്റ്. വിജയ് ബിന്നി ആണ് ഗാനത്തിന് നൃത്തം ഒരുക്കിയത്. നായകനായ സൂര്യയും മമിതയും ഒരുമിച്ചുള്ള രസകരമായ രംഗങ്ങളും ഈ ഗാനത്തിന്റെ ആകര്‍ഷണമാണ്. ചിത്രം 2026 ഓഗസ്റ്റ് 14ന് റിലീസ് ചെയ്യും. രവീണ ടണ്ഡന്‍, രാധിക ശരത്കുമാര്‍, ഭവാനി ശ്രീ എന്നിവരാണ് ചിത്രത്തിലെ മറ്റു താരങ്ങള്‍.

💦 ഗുരുജിയുടെ വാക്കുകൾ
*****************************

നമ്മെ വിലമതിക്കാത്തതോ അപമാനിക്കുന്നതോ ആയ ഇടങ്ങളിൽ നമ്മൾ നിൽക്കരുത്.
നമ്മൾ പറയുന്നത് ശ്രദ്ധിക്കാനോ മനസ്സിലാക്കാനോ താല്പര്യമില്ലാത്ത ആളുകൾക്ക് മുന്നിൽ കാര്യങ്ങൾ വിശദീകരിച്ച് സമയം കളയരുത്.
നമ്മുടെ മനസ്സിന് ഉൾക്കൊള്ളാൻ കഴിയാത്ത നെഗറ്റീവ് ചിന്തകളും കാര്യങ്ങളും നമ്മൾ സ്വീകരിക്കരുത്.
തെറ്റുകൾ ചൂണ്ടിക്കാണിക്കുമ്പോഴോ യഥാർത്ഥ സത്യം പറയുമ്പോഴോ ദേഷ്യപ്പെടുന്ന ഒരാളെ ഒന്നും ബോധ്യപ്പെടുത്താൻ ശ്രമിക്കരുത്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ

ജൂൺ 23

അന്താരാഷ്ട്രതലത്തിൽ നിരവധി പ്രധാനപ്പെട്ട ദിനാചരണങ്ങൾക്ക് സാക്ഷ്യം വഹിക്കുന്ന ഒരു ദിവസമാണ് ജൂൺ 23.
അവയിൽ ഏറ്റവും പ്രധാനപ്പെട്ടവ താഴെ പറയുന്നവയാണ്:

•അന്താരാഷ്ട്ര ഒളിമ്പിക് ദിനം (International Olympic Day): കായികരംഗത്തെ പ്രോത്സാഹിപ്പിക്കുന്നതിനും ഒളിമ്പിക്സ് മൂല്യങ്ങൾ പ്രചരിപ്പിക്കുന്നതിനുമായി ഈ ദിനം ആചരിക്കുന്നു. 1894 ജൂൺ 23-നാണ് അന്താരാഷ്ട്ര ഒളിമ്പിക് കമ്മിറ്റി (IOC) രൂപീകൃതമായത്.

•ഐക്യരാഷ്ട്രസഭ പബ്ലിക് സർവീസ് ദിനം (UN Public Service Day): സമൂഹത്തിന്റെ വികസനത്തിന് പൊതുസേവകർ നൽകുന്ന സംഭാവനകളെ അംഗീകരിക്കുന്നതിനും യുവാക്കളെ ഈ രംഗത്തേക്ക് ആകർഷിക്കുന്നതിനുമായി ഐക്യരാഷ്ട്രസഭ ഈ ദിവസം ആചരിക്കുന്നു.

•അന്താരാഷ്ട്ര വിധവാ ദിനം (International Widows’ Day): ലോകമെമ്പാടുമുള്ള വിധവകൾ നേരിടുന്ന ദാരിദ്ര്യവും അനീതിയും ഇല്ലാതാക്കാനും അവരുടെ അവകാശങ്ങളെക്കുറിച്ച് ബോധവൽക്കരണം നടത്താനുമായി യു.എൻ (UN) ആചരിക്കുന്ന ദിനം.

•അന്താരാഷ്ട്ര വനിതാ എഞ്ചിനീയറിംഗ് ദിനം (International Women in Engineering Day): എഞ്ചിനീയറിംഗ് മേഖലയിലെ വനിതകളുടെ നേട്ടങ്ങളെ ആഘോഷിക്കാനും കൂടുതൽ പെൺകുട്ടികളെ ഈ രംഗത്തേക്ക് കൊണ്ടുവരാനുമായി ഈ ദിനം മാറ്റിവച്ചിരിക്കുന്നു.

•ഡോ. ശ്യാമപ്രസാദ് മുഖർജി സ്മരണാർത്ഥം: ഭാരതീയ ജനസംഘത്തിന്റെ സ്ഥാപകനായ ഡോ. ശ്യാമപ്രസാദ് മുഖർജി 1953 ജൂൺ 23-നാണ് അന്തരിച്ചത്. ഈ ദിവസം അദ്ദേഹത്തിന്റെ രക്തസാക്ഷിത്വ ദിനമായി ആചരിക്കാറുണ്ട്.

•ഇന്ത്യൻ ക്രിക്കറ്റ് ചരിത്രം: 2013 ജൂൺ 23-നാണ് എം.എസ്. ധോണിയുടെ നേതൃത്വത്തിലുള്ള ഇന്ത്യൻ ക്രിക്കറ്റ് ടീം ഇംഗ്ലണ്ടിനെ തോൽപ്പിച്ച് ഐ.സി.സി ചാമ്പ്യൻസ് ട്രോഫി (ICC Champions Trophy) സ്വന്തമാക്കിയത്.

തയ്യാറാക്കിയത്: കപിൽ ശങ്കർ

15 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 23 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ

ജൂൺ 23

തയ്യാറാക്കിയത്: കപിൽ ശങ്കർ

🌹 ചിന്താ പ്രഭാതം 🌹 – 2026 | ജൂൺ 24 | ബുധൻ ✍️ ബേബി മാത്യു അടിമാലി

യു.എസ്. പൗരത്വത്തിനായുള്ള അപേക്ഷാ ഫീസ് ട്രംപ് ഭരണകൂടം 75% വർദ്ധിപ്പിക്കാൻ ഒരുങ്ങുന്നു

LEAVE A REPLY Cancel reply

Most Popular

🌹 ചിന്താ പ്രഭാതം 🌹 – 2026 | ജൂൺ 24 | ബുധൻ ✍️ ബേബി മാത്യു അടിമാലി

ആരോഗ്യവകുപ്പിലെ ഒഴിവുകൾ അടിയന്തരമായി റിപ്പോർട്ട് ചെയ്യാൻ മന്ത്രി കെ. മുരളീധരന്റെ നിർദ്ദേശം

സംസ്ഥാനത്തു 10 പേർക്ക് കൂടി ഷിഗെല്ല സ്ഥിരീകരിച്ചു

എബോള: സംസ്ഥാനത്ത് ശക്തമായ പ്രതിരോധ നടപടികൾ സ്വീകരിച്ചു: മന്ത്രി കെ. മുരളീധരൻ

Recent Comments

EDITOR PICKS

🌹 ചിന്താ പ്രഭാതം 🌹 – 2026 | ജൂൺ 24 | ബുധൻ ✍️ ബേബി മാത്യു അടിമാലി

ആരോഗ്യവകുപ്പിലെ ഒഴിവുകൾ അടിയന്തരമായി റിപ്പോർട്ട് ചെയ്യാൻ മന്ത്രി കെ. മുരളീധരന്റെ നിർദ്ദേശം

സംസ്ഥാനത്തു 10 പേർക്ക് കൂടി ഷിഗെല്ല സ്ഥിരീകരിച്ചു

POPULAR POSTS

ഇടി മിന്നല്‍ എംബാപ്പെ; ഇറാഖിനെ തകര്‍ത്ത് ഫ്രാന്‍സ് നോക്കൗട്ടില്‍.

ക്ഷേത്ര ഫണ്ട് ക്ഷേത്രങ്ങൾക്കായി മാത്രം വിനിയോഗിക്കുക: 246 കോടിയുടെ പദ്ധതികൾ റദ്ദാക്കി മുഖ്യമന്ത്രി വിജയ്

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 23 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ

ജൂൺ 23

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************