🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് |13 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

അടുത്തുളള സത്യം കണ്ടെത്താം
————————————————-

ഒരു യുവാവ് സത്യം എന്താണെന്ന് അന്വേഷിച്ചിറങ്ങി. പക്ഷെ, സഞ്ചരിക്കേണ്ട വഴി അയാൾക്കറിയില്ലായിരുന്നു. ഒരു മരച്ചുവട്ടിൽ ഇരുന്നിരുന്ന വയോധികനോട് അയാൾ വഴി ചോദിച്ചു. അദ്ദേഹം പറഞ്ഞു: “ഇവിടെ നിന്നും വലത്തോട്ടു തിരിയുക. ഒരു മരം കാണുന്നതു വരെ നടക്കുക. ആ മരച്ചുവട്ടിൽ ഒരു വയോധികനുണ്ടാകും.
എന്നേപ്പോലെ തന്നെ ഒരാൾ. മരത്തിൻ്റെയും വയോധികൻ്റെയും പ്രത്യകകളെല്ലാം അയാൾ ചെറുപ്പക്കാരനു പറഞ്ഞു കൊടുത്തു.

യുവാവു യാത്ര തിരിച്ചു. ദിവസങ്ങൾ, മാസങ്ങൾ, വർഷങ്ങൾ കഴിഞ്ഞിട്ടും, ഒരുമരവും കണ്ടില്ല; വയോധികനെയും കണ്ടില്ല. അവസാനം അയാൾ തിരിച്ചു നടന്നു. വഴിയിൽ പഴയ മരവും വയോധികനും.
യുവാവു ക്ഷുഭിതനായിപ്പറഞ്ഞു: “നിങ്ങൾ എൻ്റെ മുപ്പതു വർഷം കളഞ്ഞു. വയോധികൻ പറഞ്ഞു: “അല്ല, നിങ്ങളാണ് എൻ്റെ മുപ്പതു വർഷങ്ങൾ കളഞ്ഞത്. അന്നു ഞാൻ മരത്തേക്കുറിച്ചും വയോധികനനേക്കുറിച്ചും പറഞ്ഞപ്പോൾ, നിങ്ങൾ വേണ്ടവണ്ണം ശ്രദ്ധിച്ചു കേട്ടില്ല. ആ മരവും വയോധികനും നിങ്ങൾ നിൽക്കുന്ന സ്ഥലത്തു തന്നെയാണെന്നു മനസ്സിലാക്കായതുമില്ല. ഞാൻ നിങ്ങൾക്കു വേണ്ടി മുപ്പതു വർഷങ്ങൾ കാത്തിരിക്കേണ്ടി വന്നു.

അകലങ്ങളിലേക്കു യാത്ര ചെയ്യാനറിയുന്ന പലർക്കും ആഴങ്ങളിലേക്കു യാത്ര ചെയ്യാനറിയില്ല. എല്ലാ ദൂരവും അളന്നു തിട്ടപ്പെടുത്താനാവില്ല. അടുത്തിരിക്കുന്നവർ തമ്മിലുള്ള അകലവും, അകന്നിരിക്കുന്നവർ തമ്മിലുള്ള അടുപ്പവും എതളവുകോൽ കൊണ്ടാണ് നിശ്ചയിക്കുക?

സ്വന്തം കർമ്മമണ്ഡലത്തിൽ കണ്ടെത്താത്ത ഒരു സത്യവും ഒരു തിർത്ഥയാത്രയിലും വെളിപ്പെടുകയില്ല. അതു കൊണ്ടാണ് പല സത്യാന്വേഷണ യാത്രകളും ആരംഭിച്ചിടത്തു തന്നെ അവസാനിക്കുന്നത്. സ്വന്തം ജീവിതയാത്രകൾതന്നെ സത്യാന്വേഷണ യാത്രകളായി രൂപാന്തരപ്പെടുമ്പോഴാണ് യഥാർത്ഥ സത്യം കണ്ടെത്താൻ നമുക്കാകുന്നത്

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര