📱വാർത്തകൾ ഒറ്റനോട്ടത്തിൽ📱 – 2026 | ജൂൺ 18 | വ്യാഴം ✍️ കപിൽ ശങ്കർ

🔹സംസ്ഥാനത്ത് ഷിഗെല്ല ബാധിച്ച് ഒരാള്‍ കൂടി മരിച്ചു. മലപ്പുറം സ്വദേശിയായ 75 കാരിയാണ് മരിച്ചത്. 105 പേര്‍ക്കുകൂടി രോഗം സ്ഥിരീകരിച്ചു. സംസ്ഥാനത്ത് തൃശൂരിലും കണ്ണൂരിലും ഷിഗെല്ല രോഗബാധ സ്ഥിരീകരിച്ചു. തൃശൂര്‍ അരിമ്പൂരില്‍ രണ്ടുപേര്‍ക്കാണ് രോഗം സ്ഥിരീകരിച്ചത്. പ്രതിദിന ഡെങ്കി രോഗബാധ 100 കടന്നു. പനിയും ജലദോഷവുമുള്ള കുട്ടികളെ സ്‌കൂളിലേക്ക് അയക്കരുതെന്ന് ആരോഗ്യവകുപ്പ് മുന്നറിയിപ്പ് നല്‍കി.

🔹പകര്‍ച്ചവ്യാധി പ്രതിരോധത്തിന്റെ ഭാഗമായി സംസ്ഥാനത്ത് മൂന്നു ദിവസം ഡ്രൈ ഡേ പ്രഖ്യാപിച്ചു. വെള്ളി, ശനി, ഞായര്‍ ദിവസങ്ങളിലാണ് ഡ്രൈ ഡേ. വെള്ളിയാഴ്ച സ്‌കൂളുകളിലും ശനിയാഴ്ച ഓഫീസുകളിലും ഞായറാഴ്ച വീടുകളിലും ശുചീകരണ പ്രവര്‍ത്തനങ്ങള്‍ നടത്തും. ജില്ലാ മെഡിക്കല്‍ ഓഫീസര്‍മാരുമായുള്ള യോഗത്തിലാണ് നിര്‍ദേശം.

🔹വി.ഡി സതീശന്‍ സര്‍ക്കാരിന്റെ ആദ്യ ബജറ്റ് നാളെ. സാമ്പത്തിക പ്രതിസന്ധിയുണ്ടെന്നു വിലയിരുത്തിയ ധവളപത്രത്തിലെ വിദഗ്ധ നിര്‍ദേശങ്ങള്‍കൂടി പരിഗണിച്ചാകും ബജറ്റ്. വരുമാന വര്‍ധനയക്കുള്ള നടപടികളിലൂടെ സമ്പദ് വ്യവസ്ഥ ശക്തമാക്കാനും അടിസ്ഥാന സൗകര്യ വികസനത്തിനുമുള്ള പദ്ധതി പ്രഖ്യാപനങ്ങള്‍ക്കു സാധ്യത. കിഫ്ബിയുടെ പുന:സംഘടനയുമുണ്ടാകും.

🔹സംസ്ഥാനത്ത് വീണ്ടും വൈദ്യുതി നിയന്ത്രണം. ജൂണ്‍ 30 വരെ വൈകീട്ട് ആറു മുതല്‍ 12 വരെ മിതമായ നിയന്ത്രണം ഏര്‍പ്പെടുത്തുമെന്ന് കെഎസ്ഇബി അറിയിച്ചു. വൈദ്യുതി ലഭ്യതയില്‍ 900 മെഗാവാട്ടിന്റെ കുറവുണ്ടായതാണു കാരണം. പസഫിക് സമുദ്രത്തിലെ എല്‍നിനോ പ്രതിഭാസംമൂലം താപനില ഉയര്‍ന്നതും വൈദ്യുതി ഉപയോഗം വര്‍ധിച്ചതും പ്രതിസന്ധിക്ക് കാരണമായെന്നു കെഎസ്ഇബി.

🔹എല്‍ഡിഎഫ് സര്‍ക്കാര്‍ ഒപ്പുവച്ച പിഎം ശ്രീ വിദ്യാഭ്യാസ പദ്ധതിയുമായി മുന്നോട്ടുപോകുമെന്നു യുഡിഎഫ് സര്‍ക്കാര്‍. രണ്ട് ഉപാധികളോടെ പദ്ധതി നടപ്പാക്കാനാണു മന്ത്രിസഭാ തീരുമാനം. സ്‌കൂള്‍ പാഠ്യപദ്ധതി തീരുമാനിക്കാനും പിഎം ശ്രീ പദ്ധതി നടപ്പാക്കാനുള്ള സ്‌കൂളുകള്‍ തെരഞ്ഞെടുക്കാനുമുള്ള അധികാരം സംസ്ഥാന സര്‍ക്കാരിനു വേണമെന്നതാണ് ഉപാധി. സംസ്ഥാന സര്‍ക്കാരിന്റെ എതിര്‍പ്പ് കേന്ദ്രത്തെ അറിയിക്കാന്‍ മന്ത്രതല ഉപസമിതി രൂപീകരിച്ചിട്ടുണ്ട്. കേന്ദ്രത്തില്‍നിന്ന് എല്‍ഡിഎഫ് സര്‍ക്കാര്‍ 99 കോടി രൂപ വാങ്ങുകയും കേന്ദ്രം 106 കോടി രൂപകൂടി അനുവദിക്കുകയും ചെയ്തിട്ടുണ്ടെന്നും മുഖ്യമന്ത്രി വി.ഡി. സതീശന്‍ പറഞ്ഞു.

🔹മാസപ്പടി കേസില്‍ പ്രതിപക്ഷ നേതാവ് പിണറായി വിജയന്റെ മകള്‍ വീണയെ എന്‍ഫോഴ്സ്മെന്റ് ഒന്‍പതു മണിക്കൂറോളം ചോദ്യം ചെയ്തു. മാധ്യമങ്ങളുടെ ചോദ്യങ്ങളോടു വീണ പ്രതികരിച്ചില്ല. ഭര്‍ത്താവും മുന്‍മന്ത്രിയുമായ മുഹമ്മദ് റിയാസിനൊപ്പമാണ് വീണ എത്തിയത്.

🔹മാസപ്പടി കേസില്‍ പ്രതിപക്ഷ നേതാവ് പിണറായി വിജയന്‍റെ മകള്‍ വീണ ഹാജരാക്കിയ രേഖകള്‍ വിശദമായി പരിശോധിച്ച ശേഷം തുടര്‍ നടപടിയെന്ന് എന്‍ഫോഴ്സ്മെന്‍റ് ഡയറക്ടറേറ്റ് വൃത്തങ്ങള്‍. സിഎംആര്‍എല്‍ കമ്പനിയുമായി എക്സാലോജിക് ഉണ്ടാക്കിയ കരാറടക്കമുളള രേഖകള്‍ വീണ ഇഡിക്ക് കൈമാറിയെന്നാണ് സൂചന.

🔹കേരള കര്‍ഷക തൊഴിലാളി ക്ഷേമനിധി ബോര്‍ഡിന്റെ കാഞ്ഞങ്ങാട് അലാമിപ്പള്ളിയിലുള്ള ജില്ലാ ഓഫീസില്‍ സാമ്പത്തിക തിരിമറി. ഓഫീസിലെ രണ്ട് താല്‍ക്കാലിക ജീവനക്കാര്‍ക്കെതിരെ ഹൊസ്ദുര്‍ഗ് പോലീസ് കേസെടുത്തു. അജാനൂര്‍ അടോട്ട് വീട്ടില്‍ ജയന്‍ കെ. (49), കാഞ്ഞങ്ങാട് മൂവാരിക്കുണ്ട് ഐങ്ങോത്ത് വീട്ടില്‍ ഋത്വിക് വി. (29) എന്നിവര്‍ക്കെതിരെയാണ് കേസെടുത്തത്.

🔹തിരുവനന്തപുരം – ബെംഗളൂരു റൂട്ടിലോടുന്ന മൂന്നു സ്പെഷ്യല്‍ ട്രെയിനുകള്‍ ജൂലൈ മാസംകൂടി സര്‍വീസ് നടത്തും. യാത്രക്കാരുടെ തിരക്കുള്ളതിനാലാണ് 06523/06524, 06547/06548, 06555/06556 എന്നീ സ്പെഷ്യല്‍ ട്രെയിനുകള്‍ ഒരു മാസത്തേക്കുകൂടി നീട്ടിയത്.

🔹ആലപ്പുഴയില്‍ യൂത്ത് കോണ്‍ഗ്രസ് പ്രവര്‍ത്തകരെ മര്‍ദ്ദിച്ച കേസില്‍ പ്രതികളായ അഞ്ചു പോലീസുകാരുടെ മുന്‍കൂര്‍ ജാമ്യം റദ്ദാക്കാനുള്ള എസ്ഐടി അപ്പീല്‍ ഹൈക്കോടതി ഇന്ന് പരിഗണിക്കും. പിണറായി വിജയന്റെ ഗണ്‍മാന്‍മാര്‍ ആയിരുന്ന അനില്‍ കല്ലിയൂര്‍, സന്ദീപ് അടക്കമുള്ള അഞ്ച് പോലീസ് ഉദ്യോഗസ്ഥര്‍ക്കാണ് ആലപ്പുഴ ജില്ലാ ജഡ്ജി ഹണി എം വര്‍ഗീസ് ജാമ്യം അനുവദിച്ചത്.

🔹മഫ്തിയില്‍ എത്തിയ പോലീസുകാരോട് ഐഡി കാര്‍ഡ് ആവശ്യപ്പെട്ട യുവാവിനെ മര്‍ദ്ദിച്ച് കള്ളക്കേസില്‍ കുടുക്കിയെന്ന പരാതിയില്‍ സിഐ ഉള്‍പ്പെടെ നാലു പോലീസുകാര്‍ക്കെതിരെ കോടതി കേസെടുത്തു. കുണ്ടറ പോലീസ് സ്റ്റേഷനിലെ മുന്‍ എസ്എച്ച്ഒ രതീഷ്, എസ്ഐ അമ്പരീഷ്, പോലീസുകാരായ അരുണ്‍, മനു എന്നിവര്‍ക്കെതിരെയാണ് കൊല്ലം ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതി കേസെടുക്കാന്‍ ഉത്തരവിട്ടത്. 2023 ല്‍ നടന്ന മര്‍ദനത്തിന് കരിക്കോട് സ്വദേശി സനിലാല്‍ നല്‍കിയ പരാതിയിലാണു നടപടി.

🔹അവയവ കച്ചവടക്കേസില്‍ സംശയമുള്ള അഞ്ചിടങ്ങളില്‍ എന്‍ഫോഴ്‌സ്‌മെന്റിന്റെ പരിശോധന. കൊച്ചിയിലെ പ്രധാന സ്വകാര്യ ആശുപത്രി അടക്കമുള്ള സ്ഥലങ്ങളിലാണ് പരിശോധന നടത്തുന്നത്. കൊല്ലത്ത് ഇടനിലക്കാരന്റെ വീട്ടിലും പുളിയത്തുമുക്ക് സ്വദേശി ശ്രീജയുടെ വീട്ടിലും പരിശോധന നടത്തി.

🔹കോണ്‍ഗ്രസ് നേതാവും മൂവാറ്റുപുഴ എംഎല്‍എയുമായ മാത്യു കുഴല്‍നാടനെ കെപിസിസി പ്രസിഡന്റാക്കണമെന്ന് ആവശ്യപ്പെട്ട് പാലക്കാട് നഗരത്തില്‍ ഫ്‌ലെക്‌സ് ബോര്‍ഡുകള്‍. കോണ്‍ഗ്രസ് പുനഃസംഘടന ചര്‍ച്ചകള്‍ സജീവമായിരിക്കേയാണ് ഈ നീക്കം.

🔹മലപ്പുറം തിരൂരില്‍ 4,300 രൂപ കൈക്കൂലി വാങ്ങിയ നഗരസഭ ഹെല്‍ത്ത് ഇന്‍സ്‌പെക്ടര്‍ അറസ്റ്റിലായി. തിരുവനന്തപുരം നെയ്യാറ്റിന്‍കര വഴുതൂര്‍ സ്വദേശി ജി.വി. വിനോദ് കുമാറിനെ (47) യാണ് വിജിലന്‍സ് അറസ്റ്റ് ചെയ്തത്. തിരൂര്‍ കന്മനം സ്വദേശി നല്‍കിയ പരാതിയിലാണ് നടപടി.

🔹തിരുവനന്തപുരത്ത് വിൽപനയ്ക്കായി എത്തിച്ച 42 ഗ്രാം എംഡിഎംഎയുമായി പോത്തൻകോട് സ്വദേശിയായ യുവാവിനെ എക്സൈസ് സംഘം പിടികൂടി. രഹസ്യവിവരത്തെ തുടർന്ന് പത്താംകല്ലിന് സമീപം നടത്തിയ പരിശോധനയിലാണ് പ്രതി വലയിലായത്. ഷുക്കൂർ എന്നയാളുടെ നിർദ്ദേശപ്രകാരമാണ് മയക്കുമരുന്ന് കടത്തിയതെന്ന് പ്രതി സമ്മതിച്ചിട്ടുണ്ട്.

🔹പുനലൂര്‍ പോലീസ് സ്റ്റേഷനിലെത്തി സ്റ്റേഷന്‍ ഹൗസ് ഓഫീസറുടെ മൂക്കിടിച്ചു തകര്‍ത്ത യുവാവിനെ പോലീസ് അറസ്റ്റു ചെയ്തു. കരവാളൂര്‍ സ്വദേശി വിജോയിയാണ് പിടിയിലായത്. ആക്രമണത്തില്‍ പരിക്കേറ്റ എസ്എച്ച്ഒ സന്തോഷ് കുമാര്‍ പുനലൂര്‍ താലൂക്ക് ആശുപത്രിയില്‍ ചികിത്സ തേടി. കോടതി വാറന്റുള്ളതിനാല്‍ പോലീസ് കസ്റ്റഡിയിലെടുത്ത പുനലൂര്‍ സ്വദേശി ഷൈജുവിന്റെ വിവരങ്ങള്‍ അന്വേഷിക്കാനാണു വിജോയ് എത്തിയത്.

🔹ശരീര സൗന്ദര്യമത്സര വിജയി ഷിനു ചൊവ്വയെ പൊലീസ് ഇന്‍സ്പെക്ടറായി നിയമിച്ചതില്‍ ഡിജിപിയോട് റിപ്പോര്‍ട്ട് തേടിയെന്നും പരിശീലനം നീട്ടിവയ്ക്കാന്‍ ആവശ്യപ്പെട്ടിട്ടുണ്ടെന്നും ആഭ്യന്തര മന്ത്രി രമേശ് ചെന്നിത്തല. അനര്‍ഹര്‍ക്ക് നിയമനം നല്‍കാന്‍ പാടില്ല. റിപ്പോര്‍ട്ട് കിട്ടിയ ശേഷം തുടര്‍നടപടികളിലേക്ക് നീങ്ങുമെന്നും ചെന്നിത്തല വ്യക്തമാക്കി.

🔹കൊച്ചിയില്‍ നിരവധി ക്രിമിനല്‍ കേസുകളില്‍ പ്രതിയായ തിരുവനന്തപുരം സ്വദേശി രാധാകൃഷ്ണനെ കാപ്പ നിയമപ്രകാരം വീണ്ടും കരുതല്‍ തടങ്കലിലാക്കി. മുന്‍പ് കാപ്പ ചുമത്തി പുറത്തിറങ്ങിയ ശേഷവും കുറ്റകൃത്യങ്ങള്‍ തുടര്‍ന്നതിനെ തുടര്‍ന്നാണ് ഇയാളെ എറണാകുളം ജില്ലാ കളക്ടറുടെ ഉത്തരവ് പ്രകാരം വിയ്യൂര്‍ അതീവ സുരക്ഷാ ജയിലിലേക്ക് മാറ്റിയത്.

🔹ഗവിയില്‍ അങ്കണവാടി ജീവനക്കാരിയെന്നു സംശയിക്കുന്ന യുവതിയെ മരിച്ച നിലയില്‍ കണ്ടെത്തി. ബലാല്‍സംഗത്തിനിടെയുള്ള കൊലപാതകമെന്ന സംശയത്തിലാണ് പൊലീസ്. പ്രതിയെന്ന് സംശയിക്കുന്ന ഒരാളെ വണ്ടിപ്പെരിയാര്‍ പൊലീസ് പിടികൂടി ചോദ്യം ചെയ്തുവരികയാണ്.

🔹ആഭിചാരക്രിയകള്‍ക്കിടെ പതിനഞ്ചുകാരിയെ പീഡിപ്പിക്കാന്‍ ശ്രമിച്ച മുന്‍ ബിജെപി നേതാവ് പോക്‌സോ കേസില്‍ അറസ്റ്റില്‍. ബിജെപി കൊല്ലം ഈസ്റ്റ് ജില്ലാ കമ്മിറ്റിയംഗവും പോരുവഴി പഞ്ചായത്ത് സമിതി മുന്‍ പ്രസിഡന്റുമായിരുന്ന പോരുവഴി ഇടയ്ക്കാട് തെക്ക് കാഞ്ഞിരവിള വടക്കതില്‍ (അമ്പാടി) ടി. രഞ്ജു (52) ആണ് അടൂര്‍ പൊലീസിന്റെ പിടിയിലായത്.

🔹വടക്കാഞ്ചേരിയിൽ വിദ്യാർത്ഥികളെ ബസിൽ കയറ്റാത്ത സംഭവത്തിൽ കണ്ടക്ടർ രാമദാസിന്റെ ലൈസൻസ് സസ്പെൻസ് ചെയ്തു. മൂന്ന് മാസത്തേക്കാണ് സസ്പെൻഡ് ചെയ്തത്. കണ്ടക്ടർക്ക് ബോധവത്കരണം നൽകാനും മോട്ടോർ വാഹന വകുപ്പ് തീരുമാനിച്ചു. വടക്കാഞ്ചേരി ജോയിന്റ് ആർടിഓ ഓഫീസിലേക്ക് കണ്ടക്ടറെ വിളിച്ചു വരുത്തി വിശദീകരണം കേട്ട ശേഷമാണ് നടപടി.

🔹ശബരിമലയിലെ ശ്രീകോവിലിന്റെ സ്വര്‍ണം പൊതിഞ്ഞ മേല്‍ക്കൂരയില്‍ വീണത് നെയ്യാണെന്ന് സ്ഥിരീകരിച്ചു. മൂന്നിടത്തായിരുന്നു നിറ വൃത്യാസം ശ്രദ്ധയില്‍പ്പെട്ടത്. ഇവിടെ കഴുകി വൃത്തിയാക്കി. ഇതര സംസ്ഥാനത്തുനിന്നുള്ള തീര്‍ത്ഥാടകരാണ് മേല്‍ക്കൂരയിലേക്ക് നെയ്യൊഴിച്ചതെന്നും കണ്ടെത്തി.

🔹കോതമംഗലത്ത് കോളേജില്‍ മോഷണം. നെല്ലിമറ്റം മാര്‍ ബസേലിയസ് ഇന്‍സ്റ്റ്യൂട്ട് ഓഫ് ടെക്നോളജി ആന്‍ഡ് സയന്‍സിലാണ് മോഷണം നടന്നത്. ഡ്രോണും ലാപ്ടോപ്പും നഷ്ടമായതായി കോളേജ് അധികൃതര്‍ പറഞ്ഞു. ലോക്കര്‍ തകര്‍ത്ത് പണം കവരാന്‍ ശ്രമിച്ചെങ്കിലും പരാജയപ്പെടുകയായിരുന്നു.

🔹പോർച്ചുഗൽ, ജർമനി, സ്വിറ്റ്സർലൻഡ്, വിയറ്റ്നാം, ഈജ്പിത്, ഫ്രാൻസ്…..തുടങ്ങി….. 67 കാരനായ ജോസഫ് ഇതുവരെയെത്തിയത് 21 രാജ്യങ്ങളിൽ. ചായക്കട എന്നുപറഞ്ഞാൽ‌ ചായ, പുട്ട്, കറി… അത്രയേയുള്ളൂ..! ‌ എങ്കിലും 42 വർഷമായി പാലാരിവട്ടം സെന്‍റ് ജോൺ ദ ബാപ്റ്റിസ്റ്റ് പള്ളിക്കടുത്തുള്ള ‘ജോസഫേട്ടന്‍റെ ചായക്കട’ എല്ലാവർക്കും പ്രിയങ്കരം. ജോസഫും (ഏബ്രഹാം ചമ്മണി) ഭാര്യ സിസിലിയുമാണ് ചായക്കടയിലെ എല്ലാ ജോലികളും ചെയ്യുന്നത്. കടമുറി സ്വന്തം.2017ൽ സ്വന്തം ഇടവകയായ പാലാരിവട്ടം സെന്‍റ് ജോൺ ദ ബാപ്റ്റിസ്റ്റ് പള്ളിയിൽനിന്ന് ഇസ്രയേലിലേക്കായിരുന്നു ജോസഫിന്‍റെ വിദേശത്തേക്കുള്ള കന്നിയാത്ര.ജീവിതത്തിലും ചായക്കടയിലും സഹയാത്രികയായ ഭാര്യ സിസിലിയും മിക്ക യാത്രകളിലും ജോസഫിനൊപ്പമുണ്ട്. ഓഗസ്റ്റിൽ ഇരുവരും ചൈനയിലേക്ക് വിമാനം കയറും. വിവാഹിതയായ അമ്പിളിയും അധ്യാപിക അഞ്ജുവുമാണ് മക്കൾ.

🔹ഡല്‍ഹിയില്‍ വീണ്ടും ഭീകരവാദ മൊഡ്യൂള്‍ തകര്‍ത്തായി പൊലീസ്. അഞ്ചുപേരെ അറസ്റ്റ് ചെയ്തു. ഐഎസ്ഐ ഹാന്‍ഡ്‌ലര്‍ ഷഹ്സാദ് ഭട്ടിയുമായി ബന്ധമുള്ള സംഘമാണ് പിടിയിലായത്. ഡല്‍ഹിയിലും അയല്‍ സംസ്ഥാനങ്ങളിലുമുള്ള പൊലീസ് ഉദ്യോഗസ്ഥരെ ആക്രമിക്കുകയായിരുന്നു ഇവരുടെ ലക്ഷ്യം.

🔹നിരോധനത്തിനെതിരെ ടെലഗ്രാം നല്‍കിയ ഹര്‍ജിയില്‍ കേന്ദ്ര സര്‍ക്കാരിന് ഡല്‍ഹി ഹൈക്കോടതിയുടെ നോട്ടീസ്. കേസ് ഇന്നു രണ്ടരയ്ക്ക് വീണ്ടും പരിഗണിക്കും. കേട്ടു കേള്‍വി ഇല്ലാത്ത നടപടിയാണ് സര്‍ക്കാരിന്റേതെന്ന് കോടതി വിമര്‍ശിച്ചു. എന്നാല്‍ വ്യക്തമായ തെളിവുകളുടെ അടിസ്ഥാനത്തിലാണ് നിരോധനമെന്നും ഞെട്ടിപ്പിക്കുന്ന വിവരങ്ങള്‍ ഉണ്ടെന്നും കേന്ദ്രം പറഞ്ഞു.

🔹നീറ്റ് യുജി പുനപരീക്ഷയ്ക്ക് മുന്നോടിയായി ടെലഗ്രാമിന് നിയന്ത്രണം ഏര്‍പ്പെടുത്തിയ കേന്ദ്ര സര്‍ക്കാര്‍ നടപടിക്കെതിരെ പ്രതിപക്ഷ നേതാവ് രാഹുല്‍ ഗാന്ധി. കള്ളനെ പിടിക്കുന്നതിന് പകരം ഇരയുടെ വീടിന് പൂട്ടിടുക എന്ന് പറയുന്നതുപോലെ ആണ് കേന്ദ്രത്തിന്റെ നടപടിയെന്ന് രാഹുല്‍ പരിഹസിച്ചു.

🔹കര്‍ണാടക സര്‍ക്കാരിന് കീഴിലുള്ള ശ്രീ ജയദേവ ഇന്‍സ്റ്റിറ്റ്യൂട്ട് ഓഫ് കാര്‍ഡിയോ വാസ്‌കുലാര്‍ സയന്‍സസ് ആന്റ് റിസര്‍ച്ചില്‍ 11 രോഗികള്‍ മരിച്ചു. ഹൃദ്രോഗത്തിന് ചികിത്സ തേടിയെത്തിയ 77 രോഗികളില്‍ 11 പേരാണ് മരിച്ചത്. ആശുപത്രി അധികൃതരുടെ വീഴ്ചയാണ് കാരണമെന്ന് ആരോപിച്ച് രോഗികളുടെ കൂട്ടിരുപ്പുകാര്‍ രംഗത്തെത്തി.

🔹കോക്റോച്ച് ജനത പാര്‍ട്ടി സ്ഥാപകന്‍ അഭിജിത്ത് ദീപ്കെയെ കൈയേറ്റം ചെയ്ത കേസില്‍ ജാമ്യം ലഭിച്ച പ്രതികള്‍ക്ക് പൊലീസ് സ്റ്റേഷന് പുറത്ത് വന്‍ സ്വീകരണം. ആള്‍ക്കൂട്ടം പ്രതികളെ മുദ്രാവാക്യം വിളികളോടെ പൂമാലയിട്ട് സ്വീകരിക്കുന്ന ദൃശ്യങ്ങള്‍ സമൂഹമാധ്യമങ്ങളില്‍ വൈറലായി.

🔹തമിഴ്നാട് മുഖ്യമന്ത്രി വിജയ്ക്കും പ്രതിപക്ഷ നേതാവ് ഉദയനിധി സ്റ്റാലിനും ബിജെപി നേതാവ് തമിഴിസൈ സൗന്ദര്‍രാജനും എതിരായ ഹര്‍ജികള്‍ മദ്രാസ് ഹൈക്കോടതി തള്ളി. ആദായ നികുതി വകുപ്പിന്റെ അന്വേഷണം ആവശ്യപ്പെട്ടുള്ള ഹര്‍ജികളാണ് മദ്രാസ് ഹൈക്കോടതി തള്ളിയത്.

🔹ബിജെപി വിട്ട് ആരംഭിച്ച ‘വി ദ ലീഡേഴ്സ്’ മൂവ്മെന്റ് ജൂലൈ മാസത്തോടെ രാഷ്ട്രീയ പാര്‍ട്ടിയായി മാറുമെന്ന് കെ അണ്ണാമലൈ. ‘വി ദ ലീഡേഴ്സ്’ മൂവ്മെന്റ് ജൂലൈയോടെ രാഷ്ട്രീയ പാര്‍ട്ടിയായി പരിണമിക്കാനുള്ള യഥാര്‍ത്ഥ ട്രാക്കിലാണെന്നും 50 ലക്ഷം അംഗത്വം നേടുക എന്നത് ലക്ഷ്യമാണെന്നും ബിജെപി തമിഴ്നാട് മുന്‍ അധ്യക്ഷന്‍ അണ്ണാമലൈ പറഞ്ഞു.

🔹ഇന്ത്യ പാകിസ്ഥാനെതിരെ വീണ്ടും സൈനിക നീക്കത്തിന് തയ്യാറെടുക്കുന്നുവെന്ന് സാമൂഹ്യ മാധ്യമങ്ങളില്‍ വ്യാജ പ്രചരണം. ഓപ്പറേഷന്‍ സിന്ദൂറിനുള്ള തയ്യാറെടുപ്പുകള്‍ നിര്‍ദ്ദേശിച്ചുകൊണ്ട് പ്രതിരോധ സെക്രട്ടറി രാജേഷ് കുമാര്‍ സിംഗ് സൈനിക വിഭാഗങ്ങള്‍ക്ക് അയച്ച കത്തെന്ന പേരില്‍ പ്രചരിക്കുന്ന കത്തു വ്യാജമാണാന്ന് കേന്ദ്ര സര്‍ക്കാര്‍ അറിയിച്ചു.
ന്യൂയോർക്കിലെ സെൻട്രൽ പാർക്കിൽ നിയന്ത്രണം വിട്ട കുതിരവണ്ടി മറിഞ്ഞ് 18 വയസ്സുള്ള ഇന്ത്യൻ ടൂറിസ്റ്റ് രോമഞ്ച് മഹാജൻ മരിച്ചു. ഡ്രൈവർ കുതിരയുടെ അരികിൽ നിന്ന് മാറിയപ്പോൾ നിയന്ത്രണം വിട്ട കുതിര ഓടുകയും, വണ്ടിയിൽ നിന്ന് തെറിച്ചുവീണ രോമഞ്ചിന് തലയ്ക്ക് ഗുരുതരമായി പരിക്കേൽക്കുകയുമായിരുന്നു.

🔹ന്യൂയോർക്ക് ആകാശച്ചാട്ടത്തിനു പോയ ഇന്ത്യൻ ടെക്കിയടക്കം 12 പേർ വിമാനം തകർന്നു മരിച്ചു.ഞായറാഴ്ച അമേരിക്കയിലെ മിസൗറിയിലുണ്ടായ അപകടത്തിൽ കാൻസസ് സിറ്റിയിൽ ജോലി ചെയ്തിരുന്ന ആന്ധ്രപ്രദേശ് സ്വദേശി സായ് കാർത്തിക് വർമ (24) എന്ന സോഫ്റ്റ്‌വെയർ എൻജിനിയർ അടക്കമുള്ളവരാണ് മരിച്ചത്.പൈലറ്റും ആകാശച്ചാട്ടത്തിനു പോയ 11 പേരുമാണ് വിമാനത്തിലുണ്ടായിരുന്നത്. വിമാനത്താവളത്തിൽനിന്ന് പറന്നുയർന്ന വിമാനം നിമിഷങ്ങൾക്കകം നിയന്ത്രണംവിട്ട് പരിസരത്തുതന്നെ തകർന്നുവീഴുകയായിരുന്നു.

🔹പശ്ചിമേഷ്യന്‍ സംഘര്‍ഷം അവസാനിപ്പിക്കുന്നതില്‍ അമേരിക്കന്‍ പ്രസിഡന്റ് ഡോണാള്‍ഡ് ട്രംപ് സ്വീകരിച്ച നടപടികളില്‍ സന്തോഷമെന്ന് പ്രധാനമന്ത്രി നരേന്ദ്രമോദി. നാവികരുടെ സുരക്ഷ പ്രധാനമെന്ന് ഓര്‍മ്മപ്പെടുത്തിയ മോദി, ഹോര്‍മുസ് കടലിടുക്ക് തുറക്കുന്നത് ആഗോള സാമ്പത്തിക വളര്‍ച്ചയെ സഹായിക്കുമെന്നും ജി 7 ഉച്ചകോടിക്കിടെ ട്രംപുമായി നടത്തിയ കൂടിക്കാഴ്ചയില്‍ വ്യക്തമാക്കി. പരസ്പരം പുകഴ്ത്തിയാണ് മോദിയും ട്രംപും സംസാരിച്ചത്. മോദിയെ പോലെയാകാന്‍ തനിക്ക് കഴിയില്ലെന്നു ട്രംപ് പറഞ്ഞു.

🔹സമാധാന കരാറില്‍ ഒപ്പുവച്ചു. അമേരിക്ക – ഇറാന്‍ സമാധാന കരാര്‍ യാഥാര്‍ത്ഥ്യമായെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഫ്രാന്‍സില്‍വച്ചാണ് കരാറില്‍ ഒപ്പുവത്. ഉപരോധം അവസാനിപ്പിച്ച് ഹോര്‍മുസ് കടലിടുക്ക് തുറന്നതോടെ എണ്ണവില കുത്തനെ ഇടിഞ്ഞു. യുദ്ധകാലത്ത് 114 ഡോളറായി ഉയര്‍ന്ന ഡബ്ല്യുടിഐ ക്രൂഡ് വില ബാരലിന് 75.81 ഡോളറായി കുറഞ്ഞു. ഹോര്‍മൂസില്‍ മൂന്നു മാസമായി കുടുങ്ങിക്കിടന്ന ഇന്ത്യന്‍ കപ്പല്‍ 62,370 മെട്രിക് ടണ്‍ എല്‍എന്‍ജിയുമായി ഇന്ന് ഗുജറാത്തിലെ ദഹേജ് തുറമുഖത്ത് എത്തും. ഇന്ധനവും രാസവളവും അടങ്ങിയ 34 ഇന്ത്യന്‍ കപ്പലുകള്‍ കൂടി പിറകേ എത്തും.

🔹ലെബനനില്‍ ആക്രമണം നടത്തരുതെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് താക്കീതു നല്‍കിയതിനു പിറകേ, തെക്കന്‍ ലെബനനില്‍ വീണ്ടും ഇസ്രായേലിന്റെ വ്യോമാക്രമണം. മന്‍സൂരി, ആസിയേ എന്നീ നഗരങ്ങളില്‍ ഇസ്രായേല്‍ ബോംബിട്ടു. ബരാഷിത് എന്ന സ്ഥലത്തും ഇസ്രായേല്‍ ആക്രമണം നടത്തി.

🔹ഇന്ത്യയും ബ്രിട്ടനും തമ്മിലുള്ള സ്വതന്ത്ര വ്യാപാര കരാര്‍ ജൂലൈ 15 നു പ്രാബല്യത്തില്‍ വരുമെന്ന് യുകെ സര്‍ക്കാര്‍ അറിയിച്ചു. ലണ്ടനിലെ സ്റ്റീല്‍ താരിഫ് വ്യവസ്ഥകളുമായി ബന്ധപ്പെട്ട തര്‍ക്കങ്ങള്‍ കാരണം നടപ്പിലാക്കാന്‍ വൈകിയ കരാറാണ് ഇപ്പോള്‍ യാഥാര്‍ത്ഥ്യമാകുന്നത്. ബ്രെക്‌സിറ്റിന് ശേഷം യുകെ ഒപ്പുവക്കുന്ന ഏറ്റവും വലിയ ഉഭയകക്ഷി വ്യാപാര കരാറാണിത്.

🔹ക്രിസ്ത്യന്‍ പെണ്‍കുട്ടികളെ ബലാത്സംഗം ചെയ്ത ‘ഗ്രൂമിങ് ഗ്യാങി’നു പിന്നില്‍ പാകിസ്ഥാനികളാണെന്ന് ബ്രിട്ടീഷ് എംപി. യുകെയില്‍ പ്രവര്‍ത്തിക്കുന്ന ലൈംഗികപീഡന സംഘങ്ങളെ കുറിച്ച് ഗുരുതര വെളിപ്പെടുത്തലുകളാണ് റൂപര്‍ട്ട് ലോവ് നടത്തിയത്. യുകെയിലെ വിവാദമായ ‘ഗ്രൂമിംഗ് ഗ്യാങ്’ പീഡനങ്ങള്‍ക്ക് ഇരയായവരുടെ മൊഴികള്‍ അദ്ദേഹം സഭയില്‍ വായിച്ചു.

🔹അമേരിക്കയിലെ ദക്ഷിണ ടെക്‌സസിലുള്ള തിരക്കേറിയ ഹൈവേയില്‍ ചെറുകിട ജെറ്റ് വിമാനം തകര്‍ന്നു വീണ് ഒരു മരണം. അഞ്ചുപേര്‍ക്ക് പരിക്കേറ്റു. ഓടിക്കൂടിയ നാട്ടുകാരും യാത്രക്കാരും ജീവന്‍ പണയംവച്ച് നടത്തിയ രക്ഷാപ്രവര്‍ത്തനത്തെത്തുടര്‍ന്നാണ് അഞ്ചു ജീവനുകള്‍ രക്ഷപ്പെട്ടത്.

🔹വിയറ്റ്നാമില്‍ കശാപ്പിനായി കൂടുകളില്‍ സൂക്ഷിച്ച അഞ്ഞൂറോളം വളര്‍ത്തുപൂച്ചകളെ പൊലീസ് രക്ഷപ്പെടുത്തി. വളര്‍ത്തുമൃഗ കള്ളക്കടത്ത് സംഘത്തില്‍പ്പെട്ട ഒമ്പത് പേരെ പൊലീസ് പിടികൂടുകയും ചെയ്തു. മൂന്ന് വര്‍ഷമായി തെക്കന്‍ വിയറ്റ്നാമിലെ വിവിധ നഗരങ്ങളില്‍ നിന്ന് വളര്‍ത്തുപൂച്ചകളെ കെണിവെച്ച് പിടിച്ചതായി പ്രതികള്‍ പൊലീസിനോട് സമ്മതിച്ചു.

🔹ആഗോള റസ്റ്റോറന്റ് വ്യവസായത്തിലെ മുന്‍നിര ബ്രാന്‍ഡായ പിസ ഹട്ട് മുറിച്ചു വിറ്റു. കെ.എഫ്.സി, ടാകോ ബെല്‍ എന്നിവയുടെ കൂടി മാതൃകമ്പനിയായ യം ബ്രാന്‍ഡ്സാണ് ചൈനയില്‍ മാത്രം പിസ ഹട്ട് നിലനിര്‍ത്തി ബാക്കി മുഴുവനായി സ്വകാര്യ ഇക്വിറ്റി സ്ഥാപനമായ ലോംഗ്റേഞ്ച് ക്യാപിറ്റലിന് 150 കോടി ഡോളറിന് വിറ്റത്. 600 ഡോളറിന്റെ കടത്തില്‍ തുടങ്ങി 20,000 ഔട്ട്ലെറ്റുകളിലേക്ക് പടര്‍ന്നു പന്തലിച്ച ചരിത്രമാണ് പിസ ഹട്ടിന്റേത്. ഒടുവില്‍ 2.7 ബില്യണ്‍ ഡോളറിന്റെ വമ്പന്‍ ഇടപാടില്‍ പിസ്സ സാമ്രാജ്യം വിഭജിക്കപ്പെട്ടിരിക്കുന്നു. ഇപ്പോള്‍ യം ബ്രാന്‍ഡ്സ് പിസ്സ ഹട്ടിനെ രണ്ട് ഭാഗങ്ങളാക്കി വില്‍ക്കുകയാണ്. ചൈനയ്ക്ക് പുറത്തുള്ള 15,500-ത്തിലധികം റെസ്റ്റോറന്റുകളുള്ള ബിസിനസ് സ്വകാര്യ ഇക്വിറ്റി സ്ഥാപനമായ ലോംഗ്റേഞ്ച് ക്യാപിറ്റലിന് 1.5 ബില്യണ്‍ ഡോളറിന് കൈമാറും. ചൈനയിലെ 4,375 സ്റ്റോറുകളുള്ള ബിസിനസ് യം ചൈന 1.2 ബില്യണ്‍ ഡോളറിന് സ്വന്തമാക്കും. ആകെ ഇടപാട് മൂല്യം 2.7 ബില്യണ്‍ ഡോളര്‍.

🔹ലോകകപ്പ് ഫുട്ബോളില്‍ കരുത്തരായ പോര്‍ച്ചുഗലിന് അപ്രതീക്ഷിത തിരിച്ചടി. ദുര്‍ബലരായ കോംഗോ പോര്‍ച്ചുഗലിനെ ഓരോ ഗോള്‍ വീതമുള്ള സമനിലയില്‍ തളച്ചു. ക്രിസ്റ്റിയനോ റൊണാള്‍ഡോ ഉള്‍പ്പെടെയുള്ളവരുടെ പ്രകടനം മോശമായിരുന്നു. ആറാം മിനിറ്റില്‍ ജാവോ നെവസിലൂടെ പോര്‍ച്ചുഗല്‍ ലീഡെടുത്തു. എന്നാല്‍ ആദ്യ പകുതിയുടെ ഇഞ്ചുറി സമയത്ത് യോവാനെ വിസ്സ കോംഗോയ്ക്ക് സമനില സമ്മാനിക്കുകയായി
രുന്നു.

🔹രണ്ടിനെതിരേ നാലു ഗോളുകള്‍ക്ക് ഇംഗ്ലണ്ട് ക്രൊയേഷ്യയെ തകര്‍ത്തു. ക്യാപ്റ്റന്‍ ഹാരി കെയ്ന്‍ ഇരട്ട ഗോളുമായി തിളങ്ങിയ മത്സരത്തില്‍ ജൂഡ് ബെല്ലിങ്ങാമും മാര്‍ക്കസ് റാഷ്‌ഫോര്‍ഡും ഇംഗ്ലണ്ടിനായി ലക്ഷ്യം കണ്ടു. മാര്‍ട്ടിന്‍ ബട്ടുറിനയും പീറ്റര്‍ മുസയുമായിരുന്നു ക്രൊയേഷ്യയുടെ സ്‌കോറര്‍മാര്‍.

🔹വനിതാ ടി20 ലോകകപ്പില്‍ നെതര്‍ലന്‍ഡ്‌സിനെ 95 റണ്‍സിന്റെ വമ്പന്‍ മാര്‍ജിനില്‍ തകര്‍ത്ത് ഇന്ത്യന്‍ വനിതാ ടീം പോയിന്റ് പട്ടികയില്‍ ഒന്നാമതെത്തി. ആദ്യം ബാറ്റ് ചെയ്ത ഇന്ത്യ 20 ഓവറില്‍ 5 വിക്കറ്റ് നഷ്ടത്തില്‍ 209 റണ്‍സെന്ന കൂറ്റന്‍ സ്‌കോറാണ് പടുത്തുയര്‍ത്തിയത്. മറുപടി ബാറ്റിംഗിനിറങ്ങിയ നെതര്‍ലന്‍ഡ്‌സിനെ 17.3 ഓവറില്‍ വെറും 114 റണ്‍സിന് ഇന്ത്യ ഓള്‍ഔട്ടാക്കുകയായിരുന്നു. ഈ ജയത്തോടെ ഓസ്ട്രേലിയയെ മറികടന്ന് ഗ്രൂപ്പ് എ-യില്‍ ഇന്ത്യ ഒന്നാം സ്ഥാനം സ്വന്തമാക്കി.

🔹വനിതാ ടി20 ലോകകപ്പില്‍ നെതര്‍ലന്‍ഡ്‌സിനെതിരെ ഇന്ത്യ വിജയം ആഘോഷിച്ചെങ്കിലും, പ്രമുഖ യുവ സ്പിന്നര്‍ ശ്രേയങ്ക പാട്ടീലിനേറ്റ പരിക്ക് ഇന്ത്യക്കു തിരിച്ചടിയായി. കണങ്കാലിന് ഗുരുതരമായി പരിക്കേറ്റ താരത്തെ സ്‌ട്രെച്ചറിലാണ് മൈതാനത്തുനിന്നു പുറത്തേക്കു മാറ്റിയത്. ലോകകപ്പിലെ വരാനിരിക്കുന്ന നിര്‍ണായക മത്സരങ്ങളില്‍ ശ്രേയങ്കയ്ക്ക് കളിക്കാന്‍ സാധിക്കുമോ എന്നു സംശയമാണ്.

🔹അഫ്ഗാനിസ്ഥാനെതിരായ ഏകദിന പരമ്പര ഇന്ത്യക്ക്. ലക്‌നോവിലെ ഏകനാ സ്റ്റേഡിയത്തില്‍ നടന്ന രണ്ടാം മത്സരത്തില്‍ 170 റണ്‍സിന് ജയിച്ചതോടെയാണ് ഇന്ത്യ പരമ്പര സ്വന്തമാക്കിയത്. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഇന്ത്യ 49.5 ഓവറില്‍ 402 റണ്‍സ് എന്ന കൂറ്റന്‍ സ്‌കോറാണ് അടിച്ചുകൂട്ടിയത്. 154 റണ്‍സ് നേടിയ ശുഭ്മാന്‍ ഗില്ലിന്റേയും റണ്‍സ് നേടിയ ഇഷാന്‍ കിഷന്റേയും ഇന്നിംഗ്‌സുകളാണ് ഇന്ത്യയെ കൂറ്റന്‍ സ്‌കോറിലേക്ക് നയിച്ചത്. യുവതാരം ശുഭ്മാന്‍ ഗില്‍ പൂര്‍ണ്ണ ചുമതലയേറ്റെടുത്ത ശേഷമുള്ള ഇന്ത്യയുടെ ആദ്യ ഏകദിന പരമ്പര വിജയമാണിത്.

🔹അഫ്ഗാനിസ്ഥാന്‍ എ ടീമിനെ തകര്‍ത്ത് ഇന്ത്യ എ ത്രിരാഷ്ട്ര പരമ്പരയുടെ ഫൈനലില്‍ പ്രവേശിച്ചു. 101 റണ്‍സിന്റെ വമ്പന്‍ വിജയമാണ് ഇന്ത്യ സ്വന്തമാക്കിയത്. നായകന്‍ തിലക് വര്‍മയുടെ ബാറ്റിംഗ് (59) ഇന്ത്യക്ക് തുണയായി. തിങ്കളാഴ്ച ശ്രീലങ്ക എ ടീമിനോട് സൂപ്പര്‍ ഓവറില്‍ പരാജയപ്പെട്ടതോടെ ഇന്ത്യ എ ടീം കടുത്ത സമ്മര്‍ദ്ദത്തിലായിരുന്നു. ഈ വിജയത്തോടെ ഇന്ത്യ നാലു പോയിന്റോടെ പട്ടികയില്‍ ഒന്നാമതെത്തി.

🔹പുറത്തിറങ്ങി 37 വര്‍ഷത്തിനു ശേഷം മലയാളത്തിന്റെ പ്രിയ താരം മോഹന്‍ലാലിന്റെ ക്ലാസിക് ചിത്രം ‘കിരീടം’ റീ റിലീസിനൊരുങ്ങി. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ റിലീസ് ചെയ്തു. മോഹന്‍ലാല്‍ എന്ന നടന്റെ കരിയര്‍ ബ്രേക്കുകളില്‍ ഒന്നായ ചിത്രം ഏതെന്ന ചോദ്യം വരുമ്പോള്‍ തന്നെ ഉയര്‍ന്നു കേള്‍ക്കുന്ന പ്രധാന പേരായിരിക്കും ‘കിരീടം’. സേതുമാധവന്‍ എന്ന ആ കഥാപാത്രവും ചിത്രവും ഇന്നും മലയാളികള്‍ നെഞ്ചേറ്റുന്നവയാണ്. ചിത്രം ജൂണില്‍ എത്തുമെന്നാണ് അറിയിച്ചിരുന്നത്. എന്നാല്‍ പുതിയ പോസ്റ്റര്‍ സോഷ്യല്‍ മീഡിയയിലൂടെ പങ്കുവച്ചുകൊണ്ട് സിബി മലയില്‍ ഇപ്പോള്‍ അറിയിച്ചിരിക്കുന്നത് ചിത്രം ജൂലൈയില്‍ എത്തുമെന്നാണ്. എന്നാല്‍ റിലീസ് തീയതി ഇനിയും പ്രഖ്യാപിച്ചിട്ടില്ല. ലോഹിതദാസിന്റെ തിരക്കഥയില്‍ സിബി മലയില്‍ സംവിധാനം ചെയ്ത് 1989 ല്‍ തിയറ്ററുകളില്‍ എത്തിയ ചിത്രമാണ് ഇത്. 4 കെ, ഡോള്‍ബി അറ്റ്മോസില്‍ ആയിരിക്കും മലയാളികളുടെ പ്രിയ ചിത്രം വീണ്ടും തിയറ്ററുകളില്‍ എത്തുക.

🔹പ്രശാന്ത് മുരളിയെ നായകനാക്കി ജോമി ജോസ് കൈപ്പാറേട്ട് കഥയെഴുതി സംവിധാനം ചെയ്ത ‘കരുതല്‍’ ഒടിടിയിലേക്ക്. സാമൂഹിക പ്രസക്തിയുള്ള പ്രമേയത്തെ ഹൃദയസ്പര്‍ശിയായ രീതിയില്‍ അവതരിപ്പിച്ച ചിത്രം തിയറ്ററുകളിലും പ്രേക്ഷകശ്രദ്ധ പിടിച്ചു പറ്റിയിരുന്നു. ഒടിടി പ്ലാറ്റ്ഫോമായ ഫസ്റ്റ് ഷോസിലൂടെ ജൂണ്‍ 18 മുതല്‍ ചിത്രം സ്ട്രീമിങ് ആരംഭിക്കും. വിദേശത്തേക്ക് ജോലിക്കായി പോകുന്ന യുവതലമുറകളുടെ ആകുലതകളും അവരുടെ മാനസിക സംഘര്‍ഷങ്ങളുമാണ് ചിത്രം പറയുന്നത്. ഐശ്വര്യ നന്ദന്‍, കോട്ടയം രമേശ്, സുനില്‍ സുഗത, സിബി തോമസ് എന്നിവരും ചിത്രത്തില്‍ പ്രധാന വേഷങ്ങളിലെത്തുന്നുണ്ട്. മികച്ച സാമൂഹിക പ്രസക്തിയുള്ള സിനിമാ വിഭാഗത്തില്‍ ചിത്രത്തിന് ഫിലിം ക്രിട്ടിക്സ് അവാര്‍ഡും ലഭിച്ചിരുന്നു. സാബു ജെയിംസ് ആണ് ചിത്രത്തിന്റെ തിരക്കഥയും ഛായാഗ്രഹണവും ഒരുക്കിയിരിക്കുന്നത്. ഡ്രീംസ് ഓണ്‍ സ്‌ക്രീന്‍ പ്രൊഡക്ഷന്‍സിന്റെ ബാനറിലാണ് ചിത്രം നിര്‍മിച്ചിരിക്കുന്നത്.

💦 ഗുരുജിയുടെ വാക്കുകൾ
*****************************

അറിവും ഫലമുള്ള വൃക്ഷവും തമ്മിൽ ഒരു ബന്ധമുണ്ട്. ഫലമുള്ള വൃക്ഷം ഫലങ്ങളുടെ ആധിക്യത്താൽ അതിന്റെ ചില്ലകൾ ഭൂമിയിലേക്ക് താഴ് ത്തുന്നത് പോലെ ആകണം അറിവുള്ളവനും.
അറിവ്‌ മനുഷ്യന്റെ സഞ്ചാര വഴിയിൽ അന്ധകാരത്തിൽ നിന്നും പ്രകാശം പരത്തുന്ന തെരുവ് വിളക്കു പോലെയാണ്. അത് കൃത്യമായ ദിശ നൽകി അവനെ ലക്ഷ്യ സ്ഥാനത്തെത്തിക്കുന്നു.നാം അഭ്യസിച്ച ഓരോ അറിവും നമ്മെ ലാളിത്യത്തിൽ നിന്നും ലാളിത്യത്തിലേക്ക് നയിച്ച് മറ്റുള്ളവരുടെ കണ്ണീരൊപ്പാനുള്ള തൂവാലയാവണം.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 18

•അന്താരാഷ്ട്ര പിക്നിക് ദിനം (International Picnic Day): സുഹൃത്തുക്കളുമായും കുടുംബാംഗങ്ങളുമായും പ്രകൃതിയോട് ഇണങ്ങി സമയം ചിലവഴിക്കാനും ഒത്തുകൂടലുകൾ പ്രോത്സാഹിപ്പിക്കാനുമായി ഈ ദിവസം ആചരിക്കുന്നു.

•വെറുപ്പ് പരത്തുന്ന പ്രസംഗങ്ങൾക്കെതിരെയുള്ള അന്താരാഷ്ട്ര ദിനം (International Day for Countering Hate Speech): വെറുപ്പും വിദ്വേഷവും പടർത്തുന്ന പ്രസംഗങ്ങൾക്കെതിരെ ആഗോളതലത്തിൽ അവബോധം വളർത്താൻ ⁠ഐക്യരാഷ്ട്രസഭ ആചരിക്കുന്ന ദിനം.

•ഓട്ടിസം സ്വാഭിമാനദിനം (Autistic Pride Day): ഓട്ടിസം ബാധിതരായ വ്യക്തികളുടെ അവകാശങ്ങളെ മാനിക്കാനും അവരെ സമൂഹത്തിന്റെ മുഖ്യധാരയിലേക്ക് കൊണ്ടുവരാനും ഈ ദിവസം മാറ്റിവെച്ചിരിക്കുന്നു.

•സുസ്ഥിര പ്രകൃതിസൗഹൃദ ഭക്ഷണദിനം (Sustainable Gastronomy Day): പരിസ്ഥിതിക്ക് ദോഷം വരാത്ത രീതിയിലുള്ള ഭക്ഷണ സംസ്കാരവും കൃഷിയും പ്രോത്സാഹിപ്പിക്കുന്നതിനായി യു.എൻ ആചരിക്കുന്ന ദിനം.

•അന്താരാഷ്ട്ര സുഷി ദിനം (International Sushi Day): ലോകപ്രശസ്തമായ ജാപ്പനീസ് വിഭവമായ ‘സുഷി’യെ ആദരിക്കുന്നതിനായുള്ള ഭക്ഷണപ്രിയരുടെ ദിനം.

•ഗോവ ക്രാന്തി ദിനം / വിപ്ലവ ദിനം (Goa Revolution Day): 1946 ജൂൺ 18-ന് ഡോ. രാം മനോഹർ ലോഹ്യയുടെ നേതൃത്വത്തിൽ പോർച്ചുഗീസ് ഭരണത്തിനെതിരെ ഗോവയിൽ നടന്ന ആദ്യ സത്യാഗ്രഹ സമരത്തിന്റെ ഓർമ്മ പുതുക്കുന്ന ദിവസം.

•ഝാൻസി റാണി വീരാഹുതി ദിനം: ഇന്ത്യൻ സ്വാതന്ത്ര്യ സമരത്തിലെ ധീരവനിതയായ ⁠റാണി ലക്ഷ്മി ബായി ബ്രിട്ടീഷ് സൈന്യത്തോടുള്ള പോരാട്ടത്തിൽ വീരമൃത്യു വരിച്ച ദിവസം (1858 ജൂൺ 18)

•അയ്യങ്കാളി ചരമദിനം: കേരളത്തിലെ മഹാനായ സാമൂഹിക പരിഷ്കർത്താവ് മഹാത്മാ അയ്യങ്കാളി അന്തരിച്ച ദിവസം (1941 ജൂൺ 18).

•എ.ആർ. രാജരാജവർമ്മ ചരമദിനം: ‘കേരളപാണിനി’ എന്നറിയപ്പെടുന്ന പ്രശസ്ത വ്യാകരണപണ്ഡിതനും സാഹിത്യകാരനുമായ എ.ആർ. രാജരാജവർമ്മ അന്തരിച്ച ദിവസം (1918 ജൂൺ 18).

തയ്യാറാക്കിയത്: കപിൽ ശങ്കർ

11 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 18 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 18

തയ്യാറാക്കിയത്: കപിൽ ശങ്കർ

അപ്പൻ തന്ന സമ്മാനവും പിതാവ് തരുന്ന നല്ല ദാനങ്ങളും.✍ ബാബു പി. സൈമൺ, ഡാളസ്

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 20 | ശനി ✍️ കപിൽ ശങ്കർ

“ട്രംപ് പിന്മാറിയതാണ് ഇറാനെ വളർത്തിയത്! താൽക്കാലിക വെടിനിർത്തലിനിടെ നിലപാട് വ്യക്തമാക്കി ഒബാമ”

LEAVE A REPLY Cancel reply

Most Popular

അപ്പൻ തന്ന സമ്മാനവും പിതാവ് തരുന്ന നല്ല ദാനങ്ങളും.✍ ബാബു പി. സൈമൺ, ഡാളസ്

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 20 | ശനി ✍️ കപിൽ ശങ്കർ

“ട്രംപ് പിന്മാറിയതാണ് ഇറാനെ വളർത്തിയത്! താൽക്കാലിക വെടിനിർത്തലിനിടെ നിലപാട് വ്യക്തമാക്കി ഒബാമ”

എഐ കോഡിങ് പ്ലാറ്റ്‌ഫോമായ ‘കഴ്‌സർ’ ന്റെ മാതൃകമ്പനിയായ ‘ആനിസ്ഫിയർ’ സ്‌പേസ് എക്‌സ് സ്വന്തമാക്കുന്നു

Recent Comments

EDITOR PICKS

അപ്പൻ തന്ന സമ്മാനവും പിതാവ് തരുന്ന നല്ല ദാനങ്ങളും.✍ ബാബു പി. സൈമൺ, ഡാളസ്

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 20 | ശനി ✍️ കപിൽ ശങ്കർ

“ട്രംപ് പിന്മാറിയതാണ് ഇറാനെ വളർത്തിയത്! താൽക്കാലിക വെടിനിർത്തലിനിടെ നിലപാട് വ്യക്തമാക്കി ഒബാമ”

POPULAR POSTS

ടിക്കറ്റില്ലാ ട്രെയിൻ യാത്ര ഇനി നടക്കില്ല; കീശ കീറും പിഴയുമായി റെയിൽവേ

നീറ്റ് പുനഃപരീക്ഷയ്ക്ക് മുന്നോടിയായി ഇന്ന് രാജ്യവ്യാപക മോക് ഡ്രിൽ നടത്താൻ നാഷണൽ ടെസ്റ്റിംഗ് ഏജൻസി

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 18 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂൺ 18

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************