📱വാർത്തകൾ ഒറ്റനോട്ടത്തിൽ📱 – 2026 | ജൂൺ 08 | തിങ്കൾ ✍️ കപിൽ ശങ്കർ

‎🔹കെ.എസ്.ആർ.ടി.സി ബസുകളിൽ സ്ത്രീകൾക്കുള്ള സൗജന്യ യാത്രാ പദ്ധതി ആദ്യഘട്ടത്തിൽ ഓർഡിനറി സർവീസുകളിൽ മാത്രം. ജൂൺ 15 മുതൽ പ്രാബല്യത്തിൽ വരുത്താൻ ലക്ഷ്യമിടുന്ന ഈ പദ്ധതി ആദ്യ 100 ദിനം പരീക്ഷണാടിസ്ഥാനത്തിൽ ഓർഡിനറിയിൽ നടപ്പാക്കും.

🔹പാചകവാതക ഗാര്‍ഹിക സിലിണ്ടറിന് 29 രൂപ വര്‍ധിപ്പിച്ചു. തിരുവനന്തപുരത്ത് സിലിണ്ടറിന് 951 രൂപയായി. മൂന്നു മാസത്തിനിടെ ഇത് രണ്ടാം തവണയാണ് ഗാര്‍ഹിക സിലിണ്ടറിന് വില കൂട്ടുന്നത്. മാര്‍ച്ച് ഏഴിന് 60 രൂപ വര്‍ധിപ്പിച്ചിരുന്നു.

🔹‎പിണറായി വിജയനെ പരിഹസിച്ച ജി സുധാകരനെതിരെ രൂക്ഷ വിമർശനവുമായി എച്ച് സലാം. കള്ളുവാങ്ങി കൊടുത്താൽ ആരെയും തെറിവിളിക്കുന്ന കോമാളിയായി സുധാകരൻ അധപതിച്ചുവെന്നും പിണറായിയുടെ ചെരുപ്പിന്റെ വാറഴിക്കാൻ പോലും യോഗ്യതയില്ലെന്നും സലാം പറഞ്ഞു.

🔹പേഴ്സണല്‍ സ്റ്റാഫിലെ ബന്ധു നിയമന വിവാദത്തിനൊടുവില്‍ രാജി. വൈദ്യുതി മന്ത്രി സണ്ണി ജോസഫിന്റ പേഴ്സണല്‍ സ്റ്റാഫില്‍നിന്ന് അളിയനും കോണ്‍ഗ്രസ് നേതാവുമായ ബെന്നി തോമസ് രാജിവച്ചു. രാജിക്കത്ത് മുഖ്യമന്ത്രി വിഡി സതീശന് കൈമാറി. ബന്ധു നിയമനച്ചൊല്ലി പ്രതിപക്ഷം പ്രതിഷേധം ഉയര്‍ത്തുകയും കെപിസിസി യോഗത്തില്‍ കടുത്ത വിമര്‍ശനം ഉയരുകയും ചെയ്തിരുന്നു.

🔹സംസ്ഥാനത്ത് 126 പേര്‍ക്ക് ഷിഗെല്ല ബാധിച്ചെന്ന് ആരോഗ്യ മന്ത്രി കെ മുരളീധരന്‍. കോഴിക്കോട് മൂന്നു കുട്ടികള്‍ക്ക് രോഗബാധയുണ്ടായിരുന്നു. ഇതില്‍ രണ്ടു കുട്ടികളെ ഡിസ്ചാര്‍ജ് ചെയ്തു.

🔹‎വിദേശത്തുനിന്നെത്തുന്ന യാത്രക്കാരനെ തട്ടിക്കൊണ്ടുപോയി സ്വർണ്ണവും പണവും കവർച്ച ചെയ്യാൻ പദ്ധതിയിട്ടെത്തിയ 13 അംഗ ക്രിമിനൽ സംഘത്തെ കരിപ്പൂർ വിമാനത്താവള പരിസരത്തുനിന്ന് പോലീസ് പിടികൂടി. പ്രതികൾ സഞ്ചരിച്ച രണ്ട് ഇന്നോവ കാറുകളും ഒരു സ്കൂട്ടറും പോലീസ് കസ്റ്റഡിയിലെടുത്തിട്ടുണ്ട്.

🔹2018 ല്‍ കോഴിക്കോട്ട് നടന്ന അഖിലേന്ത്യാ വോളിബോള്‍ ചാമ്പ്യന്‍ഷിപ്പില്‍ സി.പി.എം കോഴിക്കോട് ജില്ലാ സെക്രട്ടറി എം. മെഹബൂബ് അടക്കമുള്ളവര്‍ ലക്ഷങ്ങളുടെ സാമ്പത്തിക ക്രമക്കേട് നടത്തിയെന്ന് എഫ്.ഐ.ആര്‍. മുസ്ലിംലീഗ് നേതാവും പെരിന്തല്‍മണ്ണ മുനിസിപ്പല്‍ കൗണ്‍സിലറുമായ നാലകത്ത് ബഷീറാണ് ഒന്നാംപ്രതി. സി. സത്യന്‍, അഹമ്മദ് കുട്ടി, മൊയ്തീന്‍ കോയ തുടങ്ങിയവരാണ് മറ്റു പ്രതികള്‍. വിജിലന്‍സ് 2025-ല്‍ നല്‍കിയ റിപ്പോര്‍ട്ടിന്റെ അടിസ്ഥാനത്തില്‍ നടക്കാവ് പോലീസ് കേസ് രജിസ്റ്റര്‍ ചെയ്തു. 1.24 കോടിയോളം രൂപ ശേഖരിച്ച് ക്രമക്കേട് നടത്തിയെന്നാണ് ആരോപണം.

🔹ഇടുക്കി ജില്ലയില്‍ രാത്രിയാത്രയ്ക്ക് നിരോധനം ഏര്‍പ്പെടുത്തി. മലയോര മേഖലയില്‍ വൈകീട്ട് ഏഴു മുതല്‍ രാവിലെ ആറു വരെയാണ് യാത്രാ നിരോധനം.

🔹മുന്‍മുഖ്യമന്ത്രി ഉമ്മന്‍ചാണ്ടിയുടെ മകള്‍ അച്ചു ഉമ്മനെ സാമൂഹികമാധ്യമങ്ങളിലൂടെ അധിക്ഷേപിച്ച ഐ.എച്ച്.ആര്‍.ഡി. അഡ്മിനിസ്‌ട്രേറ്റീവ് ഓഫീസറും സി.പി.എം. സംഘടനാ നേതാവുമായ നന്ദകുമാര്‍ കൊളത്താപ്പിള്ളിയെ മാറ്റി. ഉമ്മന്‍ചാണ്ടി മുഖ്യമന്ത്രിയായിരിക്കേ അഡീഷണല്‍ പ്രൈവറ്റ് സെക്രട്ടറിയായിരുന്ന ലത പണിക്കരാണ് പുതിയ അഡ്മിനിസ്‌ട്രേറ്റീവ് ഓഫീസര്‍.

🔹എന്‍ജിനീയറിംഗ്, ഫാര്‍മസി കോഴ്‌സുകളിലേക്കുള്ള പ്രവേശനത്തിന് പ്ലസ് ടു മാര്‍ക്ക് സമര്‍പ്പിക്കാനുള്ള അവസാന തീയതി ജൂണ്‍ 14 വരെ നീട്ടി. കീം എന്‍ജിനിയറിങ് റാങ്ക് ലിസ്റ്റ് തയ്യാറാക്കാന്‍ പ്ലസ് ടു മാര്‍ക്ക് ലിസ്റ്റ് സമര്‍പ്പിക്കേണ്ട അവസാന തീയതി നീട്ടണമെന്ന് ആവശ്യപ്പെട്ട് കൗണ്‍സില്‍ ഓഫ് സിബിഎസ്ഇ സ്‌കൂള്‍സ് കേരള ഹൈക്കോടതിയെ സമീപിച്ചിരുന്നു.

🔹മുഖ്യമന്ത്രി വി ഡി സതീശന്‍ അവതരിപ്പിച്ച ധവളപത്രം എഐ നിര്‍മ്മിതമാണെന്ന തോമസ് ഐസക്കിന്റെ ആരോപണം അടിസ്ഥാനരഹിതമാണെന്ന് വിദഗ്ധസമിതി അധ്യക്ഷന്‍ ഡോ. ചന്ദ്രശേഖര്‍. ധവളപത്രം കേരളത്തിന്റെ യഥാര്‍ത്ഥ ധനസ്ഥിതിയാണ് കാണിക്കുന്നതെന്ന് അദ്ദേഹം വ്യക്തമാക്കി.

🔹നിയമസഭയില്‍ മുഖ്യമന്ത്രി വി ഡി സതീശന്‍ പ്രസംഗിക്കുമ്പോള്‍ മറുപടി പറയാന്‍ പ്രതിപക്ഷത്തെ ഒരാള്‍ക്കും കഴിയുന്നില്ലെന്ന് ജി സുധാകരന്‍ എംഎല്‍എ. പ്രതിപക്ഷ നേതാവ് പിണറായി വിജയന്‍ സഭയില്‍ നനഞ്ഞ കോഴിയാണെന്നും ജി സുധാകരന്‍ പറഞ്ഞു. ഇടത്തോട്ടു മുണ്ടുടുത്താല്‍ ഇടതുപക്ഷമാകില്ലെന്നും രാജ്യത്ത് കോണ്‍ഗ്രസിന്റെ ഊന്നുവടിയില്‍ നില്‍ക്കുന്ന പാര്‍ട്ടിയാണ് സിപിഎമ്മെന്നും അദ്ദേഹം പരിഹസിച്ചു.

🔹പാലക്കാട് കെഎസ്ആര്‍ടിസി ഡിപ്പോയില്‍നിന്നു ബസ് മോഷ്ടിച്ചു. ടൗണില്‍ കറങ്ങിയ ശേഷം പ്രതി ബസ് ഉപേക്ഷിച്ച് മുങ്ങി. ബസ് പലയിടത്തും ഇടിച്ചു. കെഎസ്ആര്‍ടിസി ജീവനക്കാര്‍ പിന്തുടര്‍ന്നതോടെ പാലക്കാട് നഗരത്തിലെ മംഗളം ടവറിന് സമീപം ഇയാള്‍ ബസ് ഉപേക്ഷിച്ച് മുങ്ങി.

🔹ശക്തമായ കാറ്റിലും മഴയിലും സ്‌കൂളിന്റെ മേല്‍ക്കൂര പറന്നുപോയി. തണ്ണിത്തോട് സെന്റ് ബെനഡിക്ട് എം.എസ്.സി.ഹൈസ്‌കൂളിന്റെ രണ്ടാംനില കെട്ടിടത്തിന്റെ മേല്‍ക്കൂരയാണ് പറന്നുപോയത്.

🔹കനത്ത മഴയെ തുടര്‍ന്ന് പൊന്മുടി ഇക്കോ ടൂറിസം കേന്ദ്രം അടച്ചു. കനത്ത മഴമൂലം പൊന്മുടിയില്‍ മണ്ണിടിച്ചില്‍ ഭീഷണിയുണ്ട്.

🔹ആലപ്പുഴയില്‍ വൈദ്യുതി ലൈന്‍ പുനഃസ്ഥാപിക്കുന്നതിനിടെ വൈദ്യുതാഘാതമേറ്റ് വൈദ്യുതി വകുപ്പ് കരാര്‍ തൊഴിലാളി മരിച്ചു. മണ്ണഞ്ചേരി പഞ്ചായത്ത് 13-ാം വാര്‍ഡ് നളന്ദ ജങ്ഷനു സമീപം കൊച്ചുതയ്യില്‍ പരേതനായ മണിയുടെ മകന്‍ എം രഞ്ജിത്ത് (42) ആണ് മരിച്ചത്.

🔹കൊച്ചി ശാസ്ത്ര സാങ്കേതിക സര്‍വകലാശാലയിലെ ജോയിന്റ് രജിസ്ട്രാര്‍ ഷോക്കേറ്റ് മരിച്ചു. മുഹമ്മദ് സലിം ടി.ബി. (54) ആണ് മരണപ്പെട്ടത്. ഇടപ്പള്ളിയിലുള്ള തന്റെ വീട്ടുപറമ്പില്‍ വെച്ചാണ് ഇദ്ദേഹത്തിന് ഷോക്കേറ്റത്.

🔹സിപിഎം സംസ്ഥാന ഓഫീസായ എകെജി സെന്ററില്‍ ജസ്റ്റിസ് ഫോര്‍ സിപിഎം എന്നു മുദ്രാവാക്യം എഴുതിയ ബോര്‍ഡുമായി ഒറ്റയാള്‍ സമരം. പത്തനംതിട്ട ലോക്കല്‍ കമ്മിറ്റി അംഗമെന്ന് അവകാശപ്പെട്ട ഇയാള്‍ ഏറെനേരം മുദ്രാവാക്യം വിളിച്ചു. ഒടുവില്‍ ഇപി ജയരാജന്‍ എത്തി അനുനയിപ്പിച്ച് ഇയാളെ തിരിച്ചയക്കുകയായി
രുന്നു.

🔹തൃശ്ശൂര്‍ മണ്ണുത്തിയില്‍ ഗൃഹനാഥനെ കെട്ടിയിട്ട് 40 പവന്‍ സ്വര്‍ണവും 50,000 രൂപയും കവര്‍ന്നു. പുലര്‍ച്ചെ മൂന്ന് മണിയോടെ ഒല്ലൂക്കര ഡോണ്‍ ബോസ്‌കോ സ്‌കൂളിനു സമീപത്ത് താമസിക്കുന്ന സോമശേഖരന്റെ വീട്ടിലാണ് കവര്‍ച്ച നടന്നത്. ഹിന്ദി സംസാരിക്കുന്ന മൂന്ന് പേര്‍ വീടിന് പിറകിലെ ഗ്രില്ല് കുത്തിത്തുറന്നാണ് വീടിനകത്തു കയറിയത്.

🔹പോക്സോ കേസില്‍ കുട്ടിയുടെ പ്രായം നിര്‍ണയിക്കുന്നതിന് എസ്എസ്എല്‍സി ബുക്കും സ്‌കൂള്‍ പ്രവേശന രജിസ്റ്ററും മതിയായ രേഖയാണെന്ന് ഹൈക്കോടതി വ്യക്തമാക്കി. മഞ്ചേരി പോക്സോ കോടതി പ്രതിയെ 10 വര്‍ഷം തടവിന് ശിക്ഷിച്ച വിധി ഹൈക്കോടതി ശരിവെച്ച ഉത്തരവിലാണ് ജസ്റ്റിസ് എ ബദറുദ്ദീന്‍ ഇക്കാര്യം വ്യക്തമാക്കിയത്.

🔹സര്‍ക്കാര്‍ സംവിധാനങ്ങളുടെ വീഴ്ചയില്‍ കൈ നഷ്ടപ്പെട്ട പാലക്കാട് സ്വദേശിനി വിനോദിനിക്ക് പ്രായപൂര്‍ത്തിയാകുമ്പോള്‍ സര്‍ക്കാര്‍ ജോലി നല്‍കാന്‍ ബാലാവകാശ കമ്മീഷന്‍ ഉത്തരവിട്ടു. കുട്ടിയുടെ തുടര്‍പഠനവും ചികിത്സാ ചെലവും സര്‍ക്കാര്‍ ഉറപ്പുവരുത്തണമെന്നും കമ്മീഷന്‍ ശുപാര്‍ശ ചെയ്തു. മാധ്യമവാര്‍ത്തയെ തുടര്‍ന്ന് കമ്മീഷന്‍ സ്വമേധയാ കേസെടുക്കുകയായിരുന്നു.

🔹പൈക്ക പദ്ധതി ഫണ്ട് തട്ടിപ്പ് ആരോപണത്തില്‍ അന്വേഷണം പ്രഖ്യാപിച്ച് കേന്ദ്ര സ്പോര്‍ട്സ് വകുപ്പ്. കേന്ദ്ര സര്‍ക്കാരിന്റെ പഞ്ചായത്ത് യുവക്രീഡ ഓര്‍ ഖേല്‍ അഭിയാന്‍ പദ്ധതിക്കായി അനുവദിച്ചതില്‍ 11.91 കോടി രൂപ തട്ടിപ്പ് നടത്തിയെന്ന ആരോപണത്തിലാണ് അന്വേഷണം.

🔹അയല്‍ രാജ്യങ്ങളെ അപേക്ഷിച്ച് ഇന്ധന വില കുറവ് ഇന്ത്യയിലാണെന്നാണ് പെട്രോളിയം മന്ത്രാലയത്തിന്റെ ന്യായീകരണം. ഉപഭോക്താക്കള്‍ക്ക് സബ്സിഡി പരിരക്ഷ തുടരുമെന്നും നിലവില്‍ രാജ്യത്ത് ഇന്ധന പ്രതിസന്ധിയില്ലെന്നും പെട്രോളിയം മന്ത്രാലയം.

🔹പാര്‍ട്ടി ഫണ്ടിലേക്ക് തമിഴ്‌നാട് സ്റ്റേറ്റ് മാര്‍ക്കറ്റിങ് കോര്‍പറേഷനില്‍ നിന്നും (ടാസ്മാക്) അനധികൃതമായി പിരിവ് നടത്തരുതെന്ന് മുഖ്യമന്ത്രി ജോസഫ് വിജയ്. മദ്യവില്‍പ്പനയിലൂടെ ലഭിക്കുന്ന പണം സംസ്ഥാന ഖജനാവിലേക്ക് എത്തുന്നുണ്ടെന്ന് ഉറപ്പാക്കണമെന്നും വിജയ് ഉദ്യോഗസ്ഥര്‍ക്ക് നിര്‍ദ്ദേശം നല്‍കി.

🔹തമിഴക വെട്രി കഴകം എംഎല്‍എ എംആര്‍. പല്ലവി തന്റെ നവജാത പുത്രന് പാര്‍ട്ടിയുടെ പേരിനു സമാനമായി പേരിട്ടു. കഴിഞ്ഞ ആഴ്ച പ്രസവിച്ച തന്റെ ആണ്‍കുഞ്ഞിന് ടിവികെ – തമിഴ് വെട്രി കൊണ്ടാന്‍’ എന്നാണ് പേരിട്ടത്.

🔹അംഗന്‍വാടിയില്‍ നിന്ന് ലഭിച്ച പോഷകാഹാരപ്പൊതിയില്‍ ചത്ത പാമ്പിന്‍കുഞ്ഞ്. മധ്യപ്രദേശിലെ പാണ്ഡുര്‍ണയില്‍ ഗര്‍ഭിണിക്കാണ് ഈ അനുഭവം. സംഭവത്തില്‍ ഗ്രാമവാസികള്‍ പ്രതിഷേധിച്ചതോടെ, അധികൃതര്‍ അന്വേഷണ സമിതിയെ നിയോഗിച്ചു.

‎🔹ഫിലിപ്പീൻസിലെ മിന്ദനാവോ ദ്വീപിൽ റിക്ടർ സ്കെയിലിൽ 8.1 തീവ്രത രേഖപ്പെടുത്തിയ ശക്തമായ ഭൂചലനമുണ്ടായി. ഭൂമിക്കടിയിൽ 10 കിലോമീറ്റർ മാത്രം ആഴത്തിലാണ് ഭൂചലനത്തിന്റെ പ്രഭവകേന്ദ്രം. ഭൂചലനത്തിൽ ഫിലിപ്പീൻസിൽ വലിയ നാശനഷ്ടങ്ങളുണ്ടായി.

🔹ദുബായിലെ പ്രമുഖ ആശുപത്രി അപ്രതീക്ഷിതമായി പൂട്ടിയതിനെത്തുടര്‍ന്ന് നിരവധി മലയാളി നഴ്സുമാര്‍ തൊഴില്‍രഹിതരായ സാഹചര്യത്തില്‍ പ്രധാനമന്ത്രി നരേന്ദ്ര മോദി അടിയന്തര ഇടപെടണമെന്ന് മുഖ്യമന്ത്രി വി.ഡി. സതീശന്‍. തൊഴില്‍ നഷ്ടപ്പെട്ട നഴ്സുമാര്‍ക്കും കുടുംബങ്ങള്‍ക്കും സുരക്ഷിതത്വം ഉറപ്പാക്കാന്‍ യു.എ.ഇ ഭരണകൂടവുമായി ചര്‍ച്ച നടത്തണമെന്ന് മുഖ്യമന്ത്രി ആവശ്യപ്പെട്ടു.

🔹ഇസ്രായേലില്‍ ഇറാന്റെ കനത്ത മിസൈല്‍ ആക്രമണം. വടക്കന്‍ മേഖലയില്‍ പലയിടത്തും സ്ഫോടനങ്ങളുണ്ടായി. സൈറണ്‍ മുഴങ്ങി. ആക്രമണത്തിന്റേയും നാശനഷ്ടങ്ങളുടേയും വ്യാപ്തി വ്യക്തമല്ല. ലബനനില്‍ ഇസ്രയേല്‍ നടത്തിയ ആക്രമണത്തിനു തിരിച്ചടിയായാണ് ഇറാന്‍ ഇസ്രയേലില്‍ ആക്രമണം നടത്തിയത്.

🔹ഇറാന്റെ ആണവശേഖരം നശിപ്പിക്കുന്നതിന് ആവശ്യമെങ്കില്‍ അമേരിക്കന്‍ സൈന്യത്തെ നേരിട്ട് അയക്കുമെന്ന് യു.എസ് പ്രസിഡന്റ് ഡോണള്‍ഡ് ട്രംപ്. ഇസ്രയേലുമൊന്നിച്ച് ഈ ദൗത്യം നിര്‍വ്വഹിക്കാനാണ് താന്‍ ആഗ്രഹിക്കുന്നതെന്നും അദ്ദേഹം കൂട്ടിച്ചേര്‍ത്തു.

🔹പശ്ചിമേഷ്യയിലെ യുഎസ് സൈനിക തന്ത്രങ്ങളുടെ സിരാകേന്ദ്രമായിരുന്ന ഖത്തറിലെ അല്‍ ഉദൈദ് വ്യോമതാവളം ഇറാനിയന്‍ മിസൈല്‍ ആക്രമണത്തില്‍ തകര്‍ന്നതായി യുഎസ് സ്ഥിരീകരിച്ചു. യുദ്ധം തുടങ്ങി ആദ്യ ആഴ്ചകളില്‍ തന്നെ ആക്രമണം നടന്നെങ്കിലും നാല് മാസങ്ങള്‍ക്ക് ശേഷമാണ് യുഎസ് ഈ വലിയ നഷ്ടം സമ്മതിക്കുന്നത്.

🔹ജര്‍മ്മന്‍ വിമാനത്താവളങ്ങള്‍ വഴി മറ്റൊരു രാജ്യത്തേക്ക് യാത്ര ചെയ്യുന്ന ഇന്ത്യന്‍ യാത്രക്കാര്‍ക്ക് ഇനി മുതല്‍ എയര്‍പോര്‍ട്ട് ട്രാന്‍സിറ്റ് വിസയുടെ ആവശ്യമില്ല.

🔹പസഫിക് സമുദ്രത്തില്‍ രൂപംകൊള്ളുന്ന ‘എല്‍ നിനോ’ പ്രതിഭാസം സെപ്റ്റംബര്‍ മാസത്തോടെ ചരിത്രത്തിലെ ഏറ്റവും ശക്തിപ്രാപിച്ച് ‘ഗോഡ്സില്ല എല്‍ നിനോ’ ആകുമെന്നു റിപ്പോര്‍ട്ട്. അമിതമായി ചൂടുതരംഗമുണ്ടാകുകയും കടുത്ത വരള്‍ച്ചയുണ്ടാക്കുകയും ചെയ്യുന്ന പ്രതിഭാസമാണിത്.

🔹അഫ്ഗാനിസ്താനെതിരായ ടെസ്റ്റില്‍ ഇന്ത്യ മികച്ച നിലയില്‍. 564 ന് 8 എന്ന നിലയില്‍ ഇന്ത്യ ഒന്നാം ഇന്നിംഗ്‌സ് ഡിക്ലയര്‍ ചെയ്ത മത്സരത്തിന്റെ രണ്ടാംദിനം സ്റ്റമ്പെടുക്കുമ്പോള്‍ അഫ്ഗാനിസ്താന്‍ അഞ്ച് വിക്കറ്റ് നഷ്ടത്തില്‍ 113 എന്ന നിലയിലാണ്. സെഞ്ച്വറി നേടിയ ശുഭ്മാന്‍ ഗില്ലിന്റേയും കെ.എല്‍.രാഹുലിന്റേയും അര്‍ദ്ധസെഞ്ച്വറി നേടിയ സായ് സുദര്‍ശന്റേയും റിഷഭ് പന്തിന്റേയും വാഷിംഗ്ടണ്‍ സുന്ദറിന്റേയും ഇന്നിംഗ്‌സുകളുടെ മികവിലാണ് ഇന്ത്യ കൂറ്റന്‍ സ്‌കോര്‍ സ്വന്തമാക്കിയത്.

🔹ഫിഫ ലോകകപ്പില്‍ പങ്കെടുക്കാനെത്തുന്ന ഇറാന്‍ ഫുട്ബോള്‍ ടീം അംഗങ്ങള്‍ക്ക് കര്‍ശന നിബന്ധനകളോടെ അമേരിക്ക വിസ അനുവദിച്ചു. മത്സരം നടക്കുന്ന ദിവസം മാത്രം രാജ്യത്ത് പ്രവേശിക്കാനും, മത്സരം കഴിഞ്ഞ ഉടന്‍ തന്നെ രാത്രിയില്‍ രാജ്യം വിടാനുമാണ് അമേരിക്ക ഇറാന്‍ കളിക്കാര്‍ക്കും ഒഫീഷ്യലുകള്‍ക്കും അനുമതി നല്‍കിയത്.

🔹ലോക കപ്പ് ഫുട്ബോളിനായി ആവേശാരവങ്ങളോടെ കാത്തിരിപ്പ്. 48 ടീമുകളാണു മല്‍സരിക്കുന്നത്. അമേരിക്ക, മെക്സിക്കോ, കാനഡ എന്നീ മൂന്നു രാജ്യങ്ങളിലെ 16 സ്റ്റേഡിയങ്ങളിലായി 104 മല്‍സരങ്ങള്‍. വ്യാഴാഴ്ച രാത്രി പന്ത്രണ്ടരയ്ക്ക് മെക്സിക്കോ സിറ്റ് സ്റ്റേഡിയത്തില്‍ മെക്സിക്കോയും ദക്ഷിണാഫ്രിക്കയും തമ്മിലാണ് ഉദ്ഘാടന മല്‍സരം. ജൂലൈ 19 ന് അമേരിക്കയിലെ ന്യൂജേഴ്സി മെറ്റ്ലൈഫ് സ്റ്റേഡിയത്തിലാണു ഫൈനല്‍.

🔹ലോക കപ്പ് ഫുട്ബോള്‍ മല്‍സരത്തിനുള്ള പന്തിനു പേര് ട്രിയോന്‍ഡ. മൂന്നു തിരമാലകള്‍ എന്നാണര്‍ത്ഥം. മല്‍സരങ്ങള്‍ക്ക് മൂന്നു രാജ്യങ്ങള്‍ ആതിഥേയരാകുന്ന ആദ്യ ലോകകപ്പ് എന്ന സവിശേഷതയുമുണ്ട്. സീ നെറ്റ് വര്‍ക്കിന്റെ യുണൈറ്റഡ് 8 സ്പോര്‍ട്സ് ചാനലില്‍ കളി തല്‍സമയം കാണാം.

🔹ഫ്രഞ്ച് ഓപ്പണ്‍ ടെന്നിസ് പുരുഷ സിംഗിള്‍സില്‍ കന്നി ഗ്രാന്‍ഡ് സ്ലാമില്‍ മുത്തമിട്ട് ജര്‍മന്‍ താരം അലക്സാണ്ടര്‍ സ്വരേവ്. ഫൈനലില്‍ ഇറ്റലിയുടെ ഫ്ളാവിയോ കൊബോളിയെ അഞ്ച് സെറ്റുകള്‍ക്ക് പരാജയപ്പെടുത്തിയാണ് ലോക മൂന്നാം നമ്പര്‍ താരം ചരിത്രനേട്ടം കൈവരിച്ചത്.

🔹ഇന്ദ്രജിത്തിനെ കേന്ദ്ര കഥാപാത്രമാക്കി നിതീഷ് കെ.ടി.ആര്‍ കഥയെഴുതി സംവിധാനം ചെയ്യുന്ന ‘കാലന്റെ തങ്കക്കുടം’ എന്ന ചിത്രത്തില്‍ നീതുകൃഷ്ണ. നിവിന്‍ പോളി നായകനായ പ്രതിഛായയില്‍ നായികയായ താരം ആണ് നീതുകൃഷ്ണ. പാലക്കാട് ചിത്രീകരണം പുരോഗമിക്കുന്ന ചിത്രത്തില്‍ ഇന്ദ്രജിത്തും അല്‍ത്താഫ് സലിമും ആണ് കേന്ദ്ര കഥാപാത്രത്തെ അവതരിപ്പിക്കുന്നത്. ഇന്ദ്രജിത്തിന്റെ 100 -ാമത്തെ ചിത്രം ഫാന്റസി കോമഡി ഗണത്തില്‍പ്പെടുന്നു. ചിത്രത്തില്‍ കാലന്റെ വേഷം ആണ് ഇന്ദ്രജിത്തിന്. ഇന്ദ്രന്‍സ്, പ്രശാന്ത് മുരളി, വിജയ് ബാബു, ജോമോന്‍ ജ്യോതിര്‍, പ്രമോദ് വെളിയനാട്, നയന എത്സ, ആനന്ദ് മന്‍മഥന്‍, സജിന്‍ ചെറുകയില്‍, വിനീത് തട്ടില്‍, അഖില്‍ കവലയൂര്‍, ഷൈജു ശ്രീധര്‍ എന്നിവരാണ് മറ്റു താരങ്ങള്‍. കള്ളനും ഭഗവതിയിലൂടെ ശ്രദ്ധ നേടിയ ബംഗാളി താരം മോക്ഷ അതിഥി വേഷത്തില്‍ എത്തുന്നു. ഫ്രൈഡേ ഫിലിം ഹൗസിന്റെ ബാനറില്‍ വിജയ് ബാബു, വിജയ് സുബ്രഹ്‌മണ്യം എന്നിവര്‍ ചേര്‍ന്നാണ് നിര്‍മ്മാണം.

🔹ജോജു ജോര്‍ജ് നായകനായി അഭിനയിച്ച് സംവിധാനം ചെയ്യുന്ന ‘പരിപാടി’ എന്ന ചിത്രത്തില്‍ ചിത്ര പ്രദീപ് നായിക. ഫെനി എന്ന വെബ് സീരിസിലും അറ്റ് വാര്‍ വിത്ത് ദ വേള്‍ഡ് തുടങ്ങി നിരവധി ഹ്രസ്വചിത്രങ്ങളിലും തിളങ്ങിയ താരം ആണ് ചിത്ര പ്രദീപ്. ചാലക്കുടിയില്‍ ചിത്രീകരണം പുരോഗമിക്കുന്ന ചിത്രത്തിന്റെ രചനയും ജോജു ജോര്‍ജ് ആണ്. ജോജു ജോര്‍ജിനൊപ്പം നൂറിലധികം പുതുമുഖങ്ങളും അണിനിരക്കുന്നു. സൈജു കുറുപ്പ് അതിഥി വേഷത്തില്‍ എത്തുന്നു. ഡീലക്സ് ബെന്നി എന്ന കഥാപാത്രത്തെയാണ് ജോജു ജോര്‍ജ് അവതരിപ്പിക്കുന്നത്. ബിഗ് ബഡ്ജറ്റില്‍ ഒരുങ്ങുന്ന ചിത്രം കാവ്യ ഫിലിം കമ്പനിയുടെ ബാനറില്‍ വേണു കുന്നപ്പിള്ളി ആണ് നിര്‍മ്മാണം. തമിഴ് സംഗീത സംവിധായകന്‍ യുവന്‍ ശങ്കര്‍ രാജ ആദ്യമായി മലയാളത്തില്‍ എത്തുന്ന ചിത്രം കൂടിയാണിത്.

🔹എല്ലാ വർഷവും ജൂൺ 8 ലോക സമുദ്ര ദിനമായി (World Oceans Day) ആചരിക്കുന്നു. ഭൂമിയിലെ ജീവന്റെ നിലനിൽപ്പിൽ സമുദ്രങ്ങൾക്കുള്ള പ്രാധാന്യത്തെക്കുറിച്ചും, അവ നേരിടുന്ന വെല്ലുവിളികളെക്കുറിച്ചും ജനങ്ങളിൽ അവബോധം സൃഷ്ടിക്കുകയാണ് ഈ ദിനാചരണത്തിന്റെ പ്രധാന ലക്ഷ്യം.

💦 ഗുരുജിയുടെ വാക്കുകൾ

വിശ്വാസം നൽകുമ്പോൾ വിവേകവും കൂടെ വേണം…
ജീവിതത്തിൽ നമ്മെ വേദനിപ്പിച്ച പല മുറിവുകളും ശത്രുക്കൾ നൽകിയതല്ല മറിച്ച്,
അമിതമായി വിശ്വസിച്ച ചിലർ നൽകിയതാണ്.
എല്ലാവരും ചിരിക്കുന്നതുകൊണ്ട് അവർ നമ്മെ സ്നേഹിക്കുന്നു എന്നില്ല,
എല്ലാവരും അടുത്തുവരുന്നതുകൊണ്ട് അവർ നമ്മുടെ നന്മ ആഗ്രഹിക്കുന്നു എന്നുമില്ല.
ഉപ്പിനും പഞ്ചസാരക്കും ഒരേ നിറമാണ്…
പക്ഷേ രുചി വ്യത്യസ്തമാണ്.
അതുപോലെ തന്നെ മനുഷ്യരെയും പുറംകാഴ്ച കൊണ്ടല്ല വിലയിരുത്തേണ്ടത്;
അവരുടെ സ്വഭാവവും പ്രവൃത്തികളും കൊണ്ടാണ് തിരിച്ചറിയേണ്ടത്.
മുറിവുകൾ നൽകുന്ന അനുഭവങ്ങൾ ജീവിതത്തിന്റെ അവസാനമല്ല,
അത് മനുഷ്യരെ തിരിച്ചറിയാനുള്ള ഒരു പാഠമാണ്.നിന്നെ വഞ്ചിച്ചവരെ ഓർത്ത് തകരരുത്…അവരിലൂടെ ലഭിച്ച പാഠങ്ങൾ ഓർത്ത് കൂടുതൽ ശക്തനാവുക.
വിശ്വസിക്കൂ,പക്ഷേ അന്ധമായി അല്ല.
സ്നേഹിക്കൂ,പക്ഷേ സ്വയം നഷ്ടപ്പെടുത്തി അല്ല.സഹായിക്കൂ,പക്ഷേ സ്വന്തം സമാധാനം ത്യജിച്ച് അല്ല.നിന്റെ ഹൃദയത്തിന്റെ വാതിൽ എല്ലാവർക്കും തുറക്കേണ്ടതില്ല.
നിന്റെ സമാധാനവും സന്തോഷവും സംരക്ഷിക്കാൻ പഠിക്കുമ്പോഴാണ് യഥാർത്ഥ മാനസിക പക്വത ആരംഭിക്കുന്നത്.
ചില ആളുകൾ ജീവിതത്തിലേക്ക് വരുന്നത് കൂടെയിരിക്കാനല്ല…
നമ്മെ കൂടുതൽ ബുദ്ധിമാനാക്കാൻ ഒരു പാഠമായി മാറാനാണ്.

തയ്യാറാക്കിയത്: കപിൽ ശങ്കർ

28 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 08 | തിങ്കൾ ✍️ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ലബനനിലെ ഇസ്രയേല്‍ ആക്രമണങ്ങള്‍ക്ക് മറുപടിയായി ഇസ്രയേലിനെ ലക്ഷ്യമാക്കി ഇറാൻ വൻ മിസൈല്‍ ആക്രമണം നടത്തി.

ഇറാൻ്റെ മിസൈലാക്രമണത്തിന് തിരിച്ചടി നൽകരുതെന്ന് ഇസ്രായേൽ പ്രധാനമന്ത്രിയോട് ഡൊണാൾഡ് ട്രംപ്

LEAVE A REPLY Cancel reply

Most Popular

കെഎസ്ആര്‍ടിസിയിലെ സ്ത്രീകളുടെ സൗജന്യ യാത്ര ഈ മാസം മുതൽ ; ആദ്യം ഓര്‍ഡിനറി ബസുകളില്‍ മാത്രം.

ഫുട്ബോൾ ആരാധകർക്ക് കർശന നിർദേശവുമായി KSEB; ആവേശം അപകടമാകരുത്.

സംസ്ഥാനത്ത് സ്വർണ്ണവില കുത്തനെ ഇടിഞ്ഞു; ഒരു മാസത്തെ ഏറ്റവും കുറഞ്ഞ നിരക്കിൽ.

Recent Comments

EDITOR PICKS

കെഎസ്ആര്‍ടിസിയിലെ സ്ത്രീകളുടെ സൗജന്യ യാത്ര ഈ മാസം മുതൽ ; ആദ്യം ഓര്‍ഡിനറി ബസുകളില്‍ മാത്രം.

ഫുട്ബോൾ ആരാധകർക്ക് കർശന നിർദേശവുമായി KSEB; ആവേശം അപകടമാകരുത്.

POPULAR POSTS

ലബനനിലെ ഇസ്രയേല്‍ ആക്രമണങ്ങള്‍ക്ക് മറുപടിയായി ഇസ്രയേലിനെ ലക്ഷ്യമാക്കി ഇറാൻ വൻ മിസൈല്‍ ആക്രമണം നടത്തി.

ഇന്ത്യ സഖ്യത്തിന്‍റെ ഭാവി എന്താകും എന്ന കാര്യത്തില്‍ ഇന്ന് നിർണായക ദിനം.

ഇറാന്‍- ഇസ്രയേല്‍ സംഘര്‍ഷം സൗദി അറേബ്യയില്‍ ജാഗ്രതാ നിര്‍ദേശം .

POPULAR CATEGORY

ABOUT US

FOLLOW US