📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 17 | വെള്ളി ✍ കപിൽ ശങ്കർ

🔹ഏപ്രിൽ 17 ലോക ഹീമോഫീലിയ ദിനമായി (World Hemophilia Day) ആചരിക്കുന്നു. രക്തം കട്ടപിടിക്കാത്ത ജനിതക രോഗമായ ഹീമോഫീലിയയെക്കുറിച്ച് അവബോധം വളർത്താനും, രോഗികൾക്ക് മെച്ചപ്പെട്ട ചികിത്സ ഉറപ്പാക്കാനും ഈ ദിനം സഹായിക്കുന്നു.
•ലോക ബാറ്റ് അപ്രീസിയേഷൻ ഡേ (World Bat Appreciation Day): വവ്വാലുകളുടെ സംരക്ഷണത്തെക്കുറിച്ചും അവ പ്രകൃതിക്ക് നൽകുന്ന സേവനങ്ങളെക്കുറിച്ചും ഓർമ്മിപ്പിക്കുന്ന ദിനം.

🔹വനിതാ സംവരണ ബില്ലിനോടനുബന്ധിച്ചുള്ള മണ്ഡല പുനര്‍നിര്‍ണയത്തില്‍ നിലവിലുള്ള അനുപാതം പാലിക്കുമെന്ന് ലോക്സഭയില്‍ പ്രധാനമന്ത്രി നരേന്ദ്രമോദി. ഇക്കാര്യത്തില്‍ ഗ്യാരന്റി നല്‍കാം. ഒരു സംസ്ഥാനത്തോടും പക്ഷപാതമില്ല. വടക്കേ ഇന്ത്യയായും തെക്കേ ഇന്ത്യയായും രാജ്യത്തെ വിഘടിച്ചു കാണുന്നത് അനുവദിക്കില്ല. വനിതാ സംവരണ ബില്ല് ഈ കാലത്തിന്റെ അനിവാര്യതയാണ്. ബില്ല് ഇന്നു പാസാക്കിയാല്‍ ക്രെഡിറ്റ് പ്രതിപക്ഷത്തിനു നല്‍കാം. തനിക്കു ക്രെഡിറ്റു വേണ്ടെന്നും മോദി പറഞ്ഞു.

🔹എല്ലാ സംസ്ഥാനങ്ങള്‍ക്കും 50 ശതമാനം സീറ്റ് വര്‍ദ്ധന ഉണ്ടാകുമെന്ന് കേന്ദ്രമന്ത്രി അമിത് ഷാ. മണ്ഡല പുനര്‍നിര്‍ണയ നിയമമനുസരിച്ച് തെക്കേ ഇന്ത്യന്‍ സംസ്ഥാനങ്ങളിലെ എം പിമാരുടെ എണ്ണം 129 ല്‍ നിന്ന് 195 ആയി ഉയരും. കേരളത്തിലെ എം പിമാരുടെ എണ്ണം ഇരുപതില്‍ നിന്ന് മുപ്പതാകും. തമിഴ്നാട്ടിലേത് 39 ല്‍ നിന്ന് 59 ആകും. കര്‍ണാടകയുടെ സീറ്റ് 28 ല്‍ നിന്ന് 42 ആയി ഉയരുമെന്നും അമിത് ഷാ വ്യക്തമാക്കി.

🔹ഹയര്‍സെക്കണ്ടറി പരീക്ഷാഫലം മെയ് 25 നും എസ്എസ്എല്‍സി ഫലം മെയ് മൂന്നാംവാരത്തിലും പ്രസിദ്ധീകരിക്കുമെന്ന് മന്ത്രി വി ശിവന്‍കുട്ടി. ഇന്നലെ ആരംഭിച്ച എസ്എസ്എല്‍സി മൂല്യനിര്‍ണയം മെയ് രണ്ടു വരെ തുടരും. ഇലക്ഷനും മറ്റ് അവധികളും മൂലമാണ് മൂല്യനിര്‍ണയം വൈകിയത്. 4,17,417 വിദ്യാര്‍ത്ഥികള്‍ പരീക്ഷയ്ക്ക് രജിസ്റ്റര്‍ ചെയ്തു. യുദ്ധംമൂലം ഗള്‍ഫില്‍ പരീക്ഷ നടത്താനായില്ല.

🔹സിബിസിഇ പത്താം ക്ലാസ് പരീക്ഷയില്‍ അഞ്ഞൂറില്‍ അഞ്ഞൂറ് മാര്‍ക്കും നേടി അഖിലേന്ത്യാ തലത്തില്‍ ഒന്നാം സ്ഥാനത്തെത്തി ദേവഗിരി സിഎംഐ പബ്ലിക് സ്‌കൂളിലെ ഡാനിയേല്‍ ജേക്കബ് ബാസ്റ്റിന്‍. നല്ല മാര്‍ക്ക് നേടണമെന്നേ ആഗ്രഹിച്ചിരുന്നുള്ളുവെന്നും ഇത്രയും മികച്ച നേട്ടം പ്രതീക്ഷിച്ചില്ലെന്നും ഡാനിയേല്‍ പ്രതികരിച്ചു.

🔹സസ്യാധിഷ്ഠിതമാണെന്ന് അവകാശപ്പെടുന്ന കുപ്പികള്‍ ശബരിമലയില്‍ വില്ക്കാന്‍ അനുമതി തേടിയ ഹര്‍ജി ഹൈക്കോടതി തള്ളി. ചോളം, കരിമ്പ്, മരച്ചീനി എന്നിവ ഉപയോഗിച്ച് നിര്‍മിച്ചതും പുനരുപയോഗിക്കാവുന്നതും മണ്ണില്‍ ലയിക്കുന്നതുമായ കുപ്പികള്‍ക്ക് അധികൃതര്‍ അനുമതി നിഷേധിച്ചതിനെതിരെയായിരുന്നു ഹര്‍ജി. 100 ശതമാനം സസ്യാധിഷ്ഠിതമാണെന്ന അവകാശവാദം ശരിയല്ലെന്ന് കോടതി നിരീക്ഷിച്ചു.

🔹ഇടുക്കി വട്ടവടയിലെ ചിലന്തിയാര്‍ ചെക്ക് ഡാം നിര്‍മാണ നടപടികള്‍ തടഞ്ഞ ദേശീയ ഹരിത ട്രിബ്യൂണലിന്റെ ഉത്തരവ് സുപ്രീം കോടതി സ്റ്റേ ചെയ്തു. എതിര്‍കക്ഷികള്‍ക്ക് അടക്കം നോട്ടീസും അയച്ചു. വട്ടവടയിലെ ചിലന്തിയാര്‍ ചെക്ക് ഡാം നിര്‍മാണത്തില്‍ ദേശീയ ഹരിത ട്രിബ്യൂണല്‍ ഇടപെടുന്നതിനെതിരേ കേരളം ഇക്കഴിഞ്ഞ മാര്‍ച്ച് 25 നാണ് സുപ്രീം കോടതിയെ സമീപിച്ചത്.

🔹പത്തനംതിട്ട യൂത്ത് കോണ്‍ഗ്രസ് പ്രവര്‍ത്തകനു മര്‍ദ്ദനം. റാന്നി വെച്ചൂച്ചിറ പരുവയില്‍ യൂത്ത് കോണ്‍ഗ്രസ് യൂണിറ്റ് പ്രസിഡന്റ് ജെറിനും സുഹൃത്തും സഞ്ചരിച്ച ഇരുചക്രവാഹനം തടഞ്ഞുനിര്‍ത്തിയായിരുന്നു മര്‍ദിച്ചത്. ഡിവൈഎഫ്ഐ പ്രവര്‍ത്തകരാണ് മര്‍ദ്ദിച്ചതെന്ന് യൂത്ത് കോണ്‍ഗ്രസ് ആരോപിച്ചു.

🔹കാഞ്ഞങ്ങാട് 13 കാരനായ വിദ്യാര്‍ത്ഥിക്ക് സൂര്യാഘാതമേറ്റു. അജാനൂരിലെ അബ്ദുള്‍ റഹ്‌മാന്‍ പാണത്തൂരിന്റെ മകന്‍ മുഹമ്മദ് ജുബൈറിനാണ് സൂര്യാഘാതമേറ്റത്. ഇഖ്ബാല്‍ ഹയര്‍ സെക്കന്‍ഡറി സ്‌കൂള്‍ ഗ്രൗണ്ടില്‍ കൂട്ടുകാര്‍ക്കൊപ്പം കളിക്കുന്നതിനിടെയാണ് സംഭവം. വിദ്യാര്‍ത്ഥിയെ ആശുപത്രിയില്‍ പ്രവേശിപ്പിച്ചു.

🔹വിഴിഞ്ഞത്ത് ബാറിന് മുന്നില്‍ തല്ലിക്കൊന്ന യുവാവിന്റെ വാരിയെല്ല് ഒടിഞ്ഞ് ഉള്ളിലേക്ക് തറച്ചുകയറിയെന്നു പോസ്റ്റുമോര്‍ട്ടം റിപ്പോര്‍ട്ട്. കൊല്ലപ്പെട്ട വിഴിഞ്ഞം സ്വദേശി സുമന് ആന്തരികമായി നിരവധി പരിക്കുകളുള്ളതായും നെഞ്ചില്‍ രക്തസ്രാവമുണ്ടായെന്നും പോസ്റ്റ് മോര്‍ട്ടം റിപ്പോര്‍ട്ടിലുണ്ട്.

🔹പതിനെട്ടു വയസായി വിവാഹിതയായ തനിക്കു മധ്യപ്രദേശ് പോലീസിന്റെ ഭീഷണിയില്‍നിന്നു സംരക്ഷണം ആവശ്യപ്പെട്ട് കുംഭമേള വൈറല്‍ താരം മുഖ്യമന്ത്രിക്കു പരാതി നല്‍കി. പെണ്‍കുട്ടിക്ക് പ്രായപൂര്‍ത്തിയായിട്ടില്ലെന്ന പരാതിയിലെടുത്ത പോക്സോ കേസില്‍ മധ്യപ്രദേശ് പൊലീസ് മൊഴി രേഖപ്പെടുത്താന്‍ കൊച്ചിയിലെത്തിയതിനു പിറകേയാണ് പെണ്‍കുട്ടി കേരള പൊലീസിന്റെ സംരക്ഷണം തേടിയത്. കേസിലെ പ്രതിയുടെ അറസ്റ്റ് കോടതി തടഞ്ഞിട്ടുണ്ട്.

🔹റെയില്‍വേ ട്രാക്ക് മുറിച്ചുകടക്കുന്നതിനിടെ വയോധിക ട്രെയിനിടിച്ച് മരിച്ചു. കോഴിക്കോട് എലത്തൂര്‍ പടിഞ്ഞാറെ തെക്കിടുത്താം വീട്ടില്‍ സുമിത്ര(68) യാണ് മരിച്ചത്. രാവിലെ പത്തോടെ കോരപ്പുഴ സ്‌കൂളിന് സമീപത്തെ റെയില്‍വേ ട്രാക്കിലാണ് അപകടം നടന്നത്. ഇതുവഴി എത്തിയ സുമിത്ര റെയില്‍ പാളം മുറിച്ചുകടക്കുന്നതിനിടെ ട്രെയിനിടിക്കുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. പോലീസ് സ്ഥലത്തെത്തി ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം കോഴിക്കോട് മെഡിക്കല്‍ കോളജ് ആശുപത്രി മോര്‍ച്ചറിയിലേക്ക് മാറ്റി.

🔹ഇടുക്കി ആൽപ്പാറയിൽ യുവാവിനെ കുത്തിക്കൊന്നു. രാജൻ ആണ് കൊല്ലപ്പെട്ടത്. വ്യാഴാഴ്ച രാത്രി പത്തിനായിരുന്നു സംഭവം. ബന്ധുവായ അനൂപാണ് രാജനെ കൊലപ്പെടുത്തിയത്. ഇതിനു പിന്നാലെ ഒളിവിൽ പോയ അനൂപിനെ ഇന്ന് പുലർച്ചെ നാലോടെ കഞ്ഞിക്കുഴി പോലീസ് പിടികൂടി. ഇയാളെ ചോദ്യം ചെയ്തുവരികയാണ്.
ഇരുവരും തമ്മിലുണ്ടായ വാക്കുതർക്കമാണ് കൊലപാതകത്തിൽ എത്തിച്ചതെന്നാണ് പ്രാഥമിക വിവരം. രാജന്‍റെ മൃതദേഹം ഇടുക്കി മെഡിക്കൽ കോളജ് ആശുപത്രിയിലേക്ക് മാറ്റി.

🔹കൊല്ലം അഞ്ചലില്‍ കരാട്ടെ പരിശീലനത്തിനിടെ 11 കാരി മരിച്ചു. വാളകം പുത്തന്‍വിള സ്വദേശി അഹന്നയാണ് മരിച്ചത്. അഞ്ചലിലെ കരാട്ടെ പരിശീലനത്തിനിടെ അഹന്നയ്ക്ക് ദേഹാസ്വാസ്ഥ്യം ഉണ്ടാവുകയായിരുന്നു. ഉടന്‍ തന്നെ അഹന്നയെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

🔹ജോലിക്കിടെ കെഎസ്ഇബി കരാര്‍ ജീവനക്കാരന്‍ കുഴഞ്ഞുവീണു മരിച്ചു. തിരുവനന്തപുരം അമ്പൂരി സ്വദേശി സന്തോഷ് (40) ആണ് മരിച്ചത്. ജോലി ചെയ്യുന്നതിനിടെ കുഴഞ്ഞുവീണ സന്തോഷിനെ ഉടന്‍ തന്നെ പാറശ്ശാലയിലെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

🔹കോഴിക്കോട് ഈസ്റ്റ് മൂഴിക്കലില്‍ 16 കാരിയെ കൊലപ്പെടുത്തി യുവാവ് ആത്മഹത്യ ചെയ്ത സംഭവത്തില്‍ ഇരുവരുടെയും ഫോണുകള്‍ കിണറ്റില്‍ നിന്നും കണ്ടെത്തി. കൊല്ലപ്പെട്ട നസ്രീനയുടെ രണ്ട് ഫോണും ജീവനൊടുക്കിയ അദ്നാന്റെ ഒരു ഫോണുമാണ് കിണറ്റില്‍ നിന്ന് കണ്ടെത്തിയത്. ഫൊറന്‍സിക് പരിശോധനയ്ക്ക് അയച്ചിട്ടുണ്ട്.

🔹വിജയ് നായകനായ ജനനായകന്‍ സിനിമ ചോര്‍ന്ന സംഭവത്തില്‍ മുഖ്യപ്രതിയടക്കം മൂന്നുപേര്‍ പിടിയില്‍. ഫ്രീലാന്‍സ് എഡിറ്ററായ യുവാവ് ആണ് കേസിലെ മുഖ്യപ്രതി. ചെന്നൈ പൊലീസ് സൈബര്‍ ക്രൈം വിഭാഗമാണ് പ്രതികളെ അറസ്റ്റ് ചെയ്തത്. ദൃശ്യങ്ങള്‍ പ്രചരിപ്പിച്ച ആറുപേരെ നേരത്തെ പിടികൂടിയിരുന്നു. ഇതോടെ കേസില്‍ ഒന്‍പത് പേരാണ് ഇതുവരെ അറസ്റ്റിലായത്.

🔹ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ വിമാനങ്ങള്‍ തമ്മില്‍ കൂട്ടിയിടിച്ചു. വിമാനത്താവളത്തില്‍ വ്യാഴാഴ്ച ഉച്ചയോടെ ടാക്സി ചെയ്യുന്നതിനിടെ സ്പൈസ് ജെറ്റ് വിമാനത്തിന്റെ ചിറക് അവിടെ നിര്‍ത്തിയിട്ടിരുന്ന അകാശ എയര്‍ വിമാനത്തില്‍ തട്ടിയാണ് അപകടമുണ്ടായത്. വിമാനത്തിലുണ്ടായിരുന്ന യാത്രക്കാരെയും ജീവനക്കാരെയും സുരക്ഷിതമായി പുറത്തിറക്കി.

🔹ശ്രീനഗറില്‍ നടന്ന ഒരു പ്രദര്‍ശനത്തിന്റെ ഉദ്ഘാടന ചടങ്ങിനിടെ, ദേശീയ പതാകയുടെ നിറങ്ങളുള്ള റിബണ്‍ മുറിക്കാന്‍ ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ള വിസമ്മതിച്ചു. ദേശീയ പതാകയോടുള്ള ആദരസൂചകമായി റിബണ്‍ അഴിച്ചുമാറ്റി സൂക്ഷിക്കാന്‍ അദ്ദേഹം നിര്‍ദ്ദേശിച്ചു.

🔹ബംഗളൂരു എക്സ്പ്രസില്‍ കോച്ചില്‍ പൂജ നടത്തി രണ്ടു പേര്‍. കെ. സന്തോഷ് കുമാര്‍ എന്ന യാത്രക്കാരനാണ് വീഡിയോ സഹിതം ഫേസ്ബുക്കിലൂടെ ഇക്കാര്യം അറിയിച്ചത്. പൂജ നിര്‍ത്താന്‍ ടി.ടി.ഇ മൂന്നു തവണ പറഞ്ഞിട്ടും അവര്‍ പൂജ തുടര്‍ന്നു. ഒടുവില്‍ ആര്‍.പി.എഫിനെ വിളിക്കുമെന്ന് പറഞ്ഞപ്പോഴാണ് പൂജ അവസാനിപ്പിച്ചതെന്നും കുറിപ്പില്‍ പറയുന്നു.

🔹പെണ്‍കുട്ടികള്‍ ഷോര്‍ട്സ് ധരിക്കരുതെന്ന വിവാദ നിര്‍ദേശവുമായി തിരുച്ചിറപ്പള്ളി തമിഴ്നാട് ദേശീയ നിയമ സര്‍വകലാശാല വൈസ് ചാന്‍സലര്‍. അനുചിതമായ വസ്ത്രധാരണം ലൈംഗിക അതിക്രമത്തിന് വഴിവയ്ക്കും. അധ്യാപകരുടെ ശ്രദ്ധ മാറുന്നതിന് കാരണമാകുമെന്നും വൈസ് ചാന്‍സലര്‍ പറഞ്ഞു.

🔹പ്രധാനമന്ത്രി നരേന്ദ്ര മോദി ഫ്രഞ്ച് പ്രസിഡന്റ് ഇമ്മാനുവല്‍ മാക്രോണുമായി സംസാരിച്ചു. പശ്ചിമേഷ്യയിലെ സ്ഥിതിഗതികളും ഹോര്‍മൂസ് കടലിടുക്കിലൂടെയുള്ള സ്വതന്ത്ര സഞ്ചാരത്തിന്റെ പ്രാധാന്യവും ചര്‍ച്ച ചെയ്തുവെന്ന് മോദി എക്സില്‍ കുറിച്ചു.

🔹ഉറുമ്പുകളെ ഒളിപ്പിച്ച ലഗേജുമായെത്തിയ ചൈനീസ് പൗരന്‍ കെനിയന്‍ വിമാനത്താവളത്തില്‍ പിടിയിലായി. ഇയാളുടെ പെട്ടിയില്‍നിന്ന് 2200 ഗാര്‍ഡന്‍ ഉറുമ്പുകളെ പിടിച്ചെടുത്തു. കേസ് പരിഗണിച്ച കെനിയന്‍ കോടതി ഇയാള്‍ക്ക് ഒരു വര്‍ഷം തടവു ശിക്ഷയും 7,746 ഡോളര്‍ പിഴയും വിധിച്ചു.

🔹ഇറാന്‍ ഇനി ഒരിക്കലും അണ്വായുധങ്ങള്‍ നിര്‍മ്മിക്കില്ലെന്നും ഭൂമിക്കടിയില്‍ സൂക്ഷിച്ചിരിക്കുന്നവ കൈമാറാനും ധാരണയായെന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. രണ്ടു മാസം മുന്‍പ് വരെ വിസമ്മതിച്ചിരുന്ന പല കാര്യങ്ങളിലും വിട്ടുവീഴ്ച ചെയ്യാന്‍ ഇറാന്‍ തയ്യാറായി. ഇറാനുമായുള്ള തര്‍ക്കത്തില്‍ ഒത്തുതീര്‍പ്പിന് സാധ്യത തെളിഞ്ഞതായും വൈറ്റ് ഹൗസില്‍ മാധ്യമപ്രവര്‍ത്തകരോട് അദ്ദേഹം പറഞ്ഞു. എന്നാല്‍ ഇറാന്‍ പ്രതികരിച്ചിട്ടില്ല.

🔹ഐപിഎല്ലില്‍ മുംബൈ ഇന്ത്യന്‍സിന് തുടര്‍ച്ചയായ നാലാം തോല്‍വി. പഞ്ചാബ് കിംഗ്‌സിനെതിരായ മത്സരത്തില്‍ ഏഴ് വിക്കറ്റിനാണ് മുംബൈ തോറ്റത്. വാംഖഡെ സ്റ്റേഡിയത്തില്‍ ടോസ് നഷ്ടപ്പെട്ട് ബാറ്റിംഗിനെത്തിയ മുംബൈ ആറ് വിക്കറ്റ് നഷ്ടത്തില്‍ 195 റണ്‍സാണ് നേടിയത്. ക്വിന്റണ്‍ ഡി കോക്ക് 60 പന്തില്‍ പുറത്താവാതെ 112 റണ്‍സുമായി സെഞ്ചുറി നേടിയിരുന്നു. മറുപടി ബാറ്റിംഗില്‍ പഞ്ചാബ് 16.3 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ ലക്ഷ്യം മറികടന്നു. 39 പന്തില്‍ പുറത്താവാതെ 80 റണ്‍സ് നേടിയ പ്രഭ്‌സിമ്രാന്‍ സിംഗും 35 പന്തില്‍ 66 റണ്‍സ് നേടിയ ക്യാപ്റ്റന്‍ ശ്രേയസ് അയ്യരും ചേര്‍ന്നാണ് പഞ്ചാബിനെ അനായാസം വിജയത്തിലേക്ക് നയിച്ചത്. ഇതുവരെ തോല്‍വിയറിയാത്ത പഞ്ചാബ് 9 പോയിന്റോടെ ഒന്നാം സ്ഥാനത്താണ്.

🔹അജിത് വിനായക ഫിലിംസിന്റെ ബാനറില്‍ വിനായക അജിത് നിര്‍മ്മിക്കുന്ന ഫാമിലി റൊമാന്റിക് കോമഡി എന്റര്‍ടൈനറായ ‘മധുവിധു’ ട്രെയിലര്‍ പുറത്ത്. ചിത്രം ഏപ്രില്‍ 23 ന് ആഗോള തലത്തില്‍ തീയേറ്ററുകളിലെത്തും. ഷറഫുദീന്‍ നായകനായി എത്തുന്ന ചിത്രം സംവിധാനം ചെയ്യുന്നത് വിഷ്ണു അരവിന്ദ്. പൊട്ടിച്ചിരിയും പ്രണയവും എല്ലാം ഉള്‍പ്പെടുത്തി ഒരുക്കിയ ഒരു പക്കാ ഫണ്‍ ഫാമിലി കോമഡി എന്റെര്‍റ്റൈനെര്‍ ആണ് ചിത്രം. അഞ്ച് ആണുങ്ങള്‍ മാത്രമുള്ള, പെണ്ണില്ലാത്ത ഒരു കുടുംബത്തിന്റെ പശ്ചാത്തലത്തിലാണ് ചിത്രം കഥ പറയുന്നത്. നായികാ വേഷം ചെയ്യുന്നത് പ്രശസ്ത നടി ബിന്ദു പണിക്കരുടെ മകള്‍ കല്യാണി പണിക്കര്‍ ആണ്. കല്യാണി പണിക്കര്‍ ബിഗ് സ്‌ക്രീനില്‍ നായികയായി അരങ്ങേറ്റം കുറിക്കുന്ന ചിത്രം കൂടിയാണ്. ജഗദീഷ്, അസീസ് നെടുമങ്ങാട്, സായ്കുമാര്‍ , ശ്രീജയ , അമല്‍ ജോസ് , സഞ്ജു മധു, എന്നിവരാണ് ചിത്രത്തിലെ മറ്റ് പ്രധാന താരങ്ങള്‍.

🔹തമിഴ് ദയാലന്‍ സംവിധാനം ചെയ്ത ‘ഗെവി’ എന്ന ചിത്രത്തിന്റെ ട്രെയിലറില്‍ ഉള്‍പ്പെടുത്തിയ ‘സെറ്റ് മി ഫ്രീ’ എന്ന ഗ്ലോബല്‍ ഫീച്ചര്‍ ഗാനം സോഷ്യല്‍ മീഡിയയില്‍ വന്‍ അഭിപ്രായം നേടി മുന്നേറുന്നു. നിലവില്‍ നെറ്റ്ഫ്ളിക്സില്‍ ലഭ്യമായ ചിത്രം വരും ദിനങ്ങളിലായി ആമസോണ്‍ പ്രൈമില്‍ കൂടി റിലീസ് ചെയ്യും. വെള്ള ഗെവ എന്ന ഗ്രാമത്തെ ആസ്പദമാക്കിയാണ് ചിത്രം കഥ പറയുന്നത്. സെറ്റ് മി ഫ്രീ ഗാനത്തെ ആഗോളതലത്തില്‍ എത്തിക്കാന്‍, മൂന്ന് തവണ ഗ്രാമിഅവാര്‍ഡ് നേടിയ സംഗീതജ്ഞനായ റിക്കി കെജ് ഗെവി സിനിമയിലേക്കു ഭാഗമായി മാറി. വാനില്‍ വെയ്ഗാസാണ് മ്യൂസിക് കോ പ്രൊഡ്യൂസര്‍. ശിവരാജ് നടരാജ്, ലോറ ഡിക്കിന്‍സണ്‍, ടബിത റോസ് എന്നിവരാണ് ഗാനം ആലപിച്ചിരിക്കുന്നത്. ഇന്ത്യന്‍ ശാസ്ത്രീയ സംഗീതവും ആധുനിക ഗ്ലോബല്‍ ശബ്ദങ്ങളും ചേര്‍ന്നാണ് ഈ സംഗീതം ഒരുക്കിയിരിക്കുന്നത് എന്നതാണ് ഒരു വലിയ പ്രത്യേകത.

💦 ഗുരുജിയുടെ വാക്കുകൾ

ഒറ്റക്കു നിൽക്കുന്നതു പോലെയല്ല ഒപ്പം ജീവിക്കുന്നത്‌. ഒരേയാളിൽനിന്ന് പിന്നെയും പിന്നെയും മുറിവേൽക്കേണ്ടി വന്നേക്കാം. മറ്റൊരാൾക്കും തരാനാവാത്ത പരിക്കുകൾ സ്നേഹിച്ചവർക്കു തരാൻ കഴിയും. പക്ഷേ, ആയുസ്സിന്റെ കൊടുംതണുപ്പിനെ മുറിച്ചുകടക്കാൻ ചില കൈകളെ മുറുകെപ്പിടിച്ചേ പറ്റൂ. ‘ഇഷ്ടമല്ലാത്ത ചിലതുണ്ടെങ്കിലും ഇഷ്ടപ്പെടുത്തുന്ന ചിലതുമില്ലേ’യെന്ന് ബോധ്യം ഉണ്ടാവണം. . ഇഷ്ടകരമല്ലാത്തതൊന്നും വരുത്താത്ത, എല്ലാം തികഞ്ഞ മനുഷ്യരെ സ്നേഹിക്കാനും ഒപ്പം ജീവിക്കാനും ഏറെ എളുപ്പമായിരിക്കും. പക്ഷേ, അങ്ങനെയുള്ളോരെ ഭൂമിയിൽ നിന്ന് കിട്ടാൻ സാധ്യത കുറവാണ്‌. ചങ്ങമ്പുഴയുടെ പാട്ടുപോലെ; ‘കുറ്റപ്പെടുത്തുവാനില്ലതിൽ നാമെല്ലാം എത്രയായാലും മനുഷ്യരല്ലേ.’

തയ്യാറാക്കിയത്: കപിൽ ശങ്കർ

8 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 17 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

📱വാർത്തകൾ ഒറ്റനോട്ടത്തിൽ📱 – 2026 | മെയ് 31 | ഞായർ ✍️ കപിൽ ശങ്കർ

നോർത്ത് അമേരിക്ക മാർത്തോമാ ഭദ്രാസനം 2026-2028 കൗൺസിൽ തെരഞ്ഞെടുപ്പ് ഫലം പ്രഖ്യാപിച്ചു; ട്രഷററായി ഷാജു സാം

വേൾഡ് മലയാളി കൗൺസിൽ അമേരിക്ക റീജിയന് പുതിയ ദിശാബോധവുമായി പിന്റോ കണ്ണമ്പള്ളി

LEAVE A REPLY Cancel reply

Most Popular

അഷ്കർ കൊടുംക്രൂരൻ; ആദ്യ ഭാര്യയെ മർദിച്ച് കോമയിലാക്കി, സഹോദരന്റെ മരണത്തിലും സംശയം.

ഇ ഡി ഉദ്യോഗസ്ഥരെ അക്രമിച്ച കേസ്: എസ്എഫ്ഐ തിരുവനന്തപുരം ജില്ലാ പ്രസിഡന്റ്‌ വിജയ് വിമൽ പിടിയിൽ.

നവീന്‍ ബാബുവിന്റെ മരണം; സിബിഐ അന്വേഷണത്തിൽ ആശ്വാസമെന്ന് കുടുംബം.

ആര്‍ത്തവ അവധിയില്‍ സ്ത്രീ സമൂഹത്തിന് പരാതിയുണ്ടെങ്കില്‍ പുനഃപരിശോധിക്കും: എന്‍ ഷംസുദ്ദീന്‍.

Recent Comments

EDITOR PICKS

അഷ്കർ കൊടുംക്രൂരൻ; ആദ്യ ഭാര്യയെ മർദിച്ച് കോമയിലാക്കി, സഹോദരന്റെ മരണത്തിലും സംശയം.

ഇ ഡി ഉദ്യോഗസ്ഥരെ അക്രമിച്ച കേസ്: എസ്എഫ്ഐ തിരുവനന്തപുരം ജില്ലാ പ്രസിഡന്റ്‌ വിജയ് വിമൽ പിടിയിൽ.

നവീന്‍ ബാബുവിന്റെ മരണം; സിബിഐ അന്വേഷണത്തിൽ ആശ്വാസമെന്ന് കുടുംബം.

POPULAR POSTS

സാധാരണക്കാർക്ക് വീണ്ടും തിരിച്ചടി! രാജ്യത്ത് ഇന്ധന വില വീണ്ടും കൂട്ടി, സിഎൻജിക്ക് കിലോയ്ക്ക് 2 രൂപ കൂടി.

എബോള: ആദ്യ രോഗമുക്തി സ്ഥിരീകരിച്ച് ഡബ്ല്യു.എച്ച്.ഒ.

POPULAR CATEGORY

ABOUT US

FOLLOW US