🌹 “ഇന്നത്തെ ചിന്താവിഷയം” 🌹 – 2024 | നവംബർ 13 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

നമുക്കും യഥാർത്ഥ വിപ്ലവകാരികൾ ആകാം
————————————————————————-

അധികാരം തട്ടിയെടുക്കാനായി, ഗോത്ര മൂപ്പനെ വധിക്കാൻ, ചിലർ ഒരു വാടകക്കൊലയാളിയെ ഏർപ്പാടാക്കി. അയാൾ മൂപ്പനെ വധിക്കാൻ, നാടൻ തോക്കുമായി കാത്തിരുന്നു. മൂപ്പൻ ഒരു മരച്ചുവട്ടിൽ വിശ്രമിക്കുമ്പോൾ, കൊലയാളി അയാളുടെ നെഞ്ചു നോക്കി പലതവണ നിറയൊഴിച്ചു. ഒരു ഭാവമാറ്റവുമില്ലാതെ, മൂപ്പൻ അവിടത്തന്നെയിരുന്നു. കൊലയാളി അയാളുടെ തലനോക്കി വെടിയുതിർത്തു. എന്നിട്ടും, ഒന്നും സംഭവിച്ചില്ല. അവസാനം, സ്ഥലം വിടുന്നതിനു മുമ്പ് അയാളുടെ കിരീടം നോക്കി കൊലയാളി വെടിവച്ചു. മൂപ്പൻ തൽക്ഷണം മരിച്ചു വീണു.

അധികാരത്തിന് തലച്ചോറിനേക്കാൾ പ്രധാനം തലപ്പാവാണ്. തങ്ങൾക്കു ചാർത്തിക്കിട്ടിയ ചിഹ്നങ്ങളും, തങ്ങൾ കൈവശമാക്കിയ ചെങ്കോലും കൈവിടുവാൻ അധികമാരും തയ്യാറാകുകയില്ല. ആദരവും ആരാധനയും കിട്ടി ശീലിച്ചവർ, അതിനു പുറത്തെ സാധാരണ ജീവിതത്തിലേക്കു തിരിച്ചു പോകുന്നതിനേക്കുറിച്ച് ഒരിക്കലും ചിന്തിക്കുകയില്ല. അധികാരത്തിൽ തുടരണമെന്നതായിരിക്കും, അവരുടെ ഏക താൽപര്യം.

ആയുഷ്ക്കാല നേതൃത്വം എന്നതായിരിക്കും, കൊട്ടിൽ മുതൽ കൊട്ടാരം വരെയുള്ളവരുടെ നേതൃസങ്കല്പം. അധികാരഭ്രമം മൂത്ത് അധികാരത്തിലെത്തിയവരും, അധികാരത്തിലെത്തിയതിൻ്റെ ഫലമായി അധികാരഭ്രമം ബാധിച്ചവരും തമ്മിൽ, അധികാരത്തോടുള്ള അവരുടെ മനോഭാവത്തിൽ, കാര്യമായ വ്യത്യാസമൊന്നും കാണില്ല. നല്ല പ്രജകളിൽ നിന്നു മാത്രമേ, നല്ല അധികാരികൾ രൂപപ്പെടൂ.

ചിലർ അധികാരത്തിൽ വരുമ്പോൾ, ആ സ്ഥാനത്തിൻ്റെ മഹിമ കൊണ്ട് അവർ ശ്രദ്ധിക്കപ്പെടും. മറ്റു ചിലർ, ചില സ്ഥാനങ്ങളിലെത്തുമ്പോൾ, അവരുടെ മഹിമ കൊണ്ട് ആ സ്ഥാനങ്ങൾ ശ്രദ്ധിക്കപ്പെടും. ഒരാളുടെ യഥാർത്ഥ സ്വഭാവം അറിയാനുള്ള എളുപ്പമാർഗ്ഗം, അയാൾക്ക് അധികാരം നൽകുക എന്നതാണ്.

ചെങ്കോൽ വഹിക്കുന്നു എന്നതിനേക്കാൾ ചുമതലകൾ വിശ്വസ്തതയാടെ നിരവേറ്റുന്ന
വരാണ് ആദരണീയരായ ഭരണാധികാരികൾ. കാലത്തിനപ്പുറം സഞ്ചരിക്കാൻ തക്ക കാഴ്ചപ്പാടും, കർമ്മശേഷിയും, അവർക്കു മാത്രമേ കാണുകയുള്ളു. ഒരധികാരവും ഇല്ലാതിരിക്കൂമ്പോഴും, സമൂഹത്തിൻ്റെ നന്മ മാത്രം ലക്ഷ്യമാക്കി ജീവിക്കുന്നവർക്കു മാത്രമേ, മനുഷ്യോപകാരപ്രദമായി ജീവിക്കാനും, പ്രവർത്തിക്കാനുമാകൂ. അവരാണ് യഥാർത്ഥ വില്ലവകാരികൾ. യഥാർത്ഥ വിപ്ലവകാരികളാകാൻ നമുക്ക് യത്നിക്കാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര