കൊല്ലം: കൊല്ലം ജില്ലയിൽ ഇന്ന് വിദ്യാഭ്യാസ വന്ദിന് ആഹ്വാനം ചെയ്ത് കെഎസ്യു. കോളേജ് യൂണിയൻ തെരഞ്ഞെടുപ്പുമായി ബന്ധപ്പെട്ട് നടന്ന സംഘർഷത്തിന്റെ പശ്ചാത്തലത്തിലാണ് വിദ്യാഭ്യാസ ബന്ദിന് ആഹ്വാനം ചെയ്തിരിക്കുന്നത്. കൊട്ടാരക്കര എസ് ജി കോളേജ് മുൻ യൂണിറ്റ് പ്രസിഡന്റും കെഎസ്യു നേതാവുമായ എബിനെ എസ്എഫ്ഐ പ്രവർത്തകർ മർദ്ദിച്ചതിൽ പ്രതിഷേധിച്ചാണ് വിദ്യാഭ്യാസ ബന്ദിന് ആഹ്വാനം ചെയ്തതെന്ന് കമ്മിറ്റി അറിയിച്ചു.
യാതൊരു കാരണവും കൂടാതെയാണ് തെരഞ്ഞെടുപ്പ് പ്രവർത്തനങ്ങൾക്ക് നേതൃത്വം നൽകിയെന്നതിന്റെ വൈരാഗ്യത്തിൽ എസ്എഫ്ഐ പ്രവർത്തകർ സംഘം ചേർന്ന് മർദിക്കുകയായിരുന്നെന്നും തെന്നും കെഎസ്യു ആരോപിച്ചു.
കൊട്ടാരക്കര എസ്.ജി കോളേജ് മുൻ യൂണിറ്റ് പ്രസിഡന്റും KSU ഭാരവാഹിയുമായ എബിനെ യാതൊരു കാരണവും കൂടാതെ തെരഞ്ഞെടുപ്പ് പ്രവർത്തനങ്ങൾക്ക് നേതൃത്വം നൽകിയതിന്റെ വൈരാഗ്യം മൂലം SFI ഗുണ്ടകൾ സംഘം ചേർന്ന് മർദിച്ചതിൽ പ്രതിഷേധിച്ച് കൊല്ലം ജില്ലയിൽ (29-10-2024) KSU വിദ്യാഭ്യാസ ബന്ദിന് ആഹ്വാനം ചെയ്തതായി അറിയിക്കുന്നു.’ കെഎസ്യു കൊല്ലം ജില്ലാ കമ്മിറ്റി അറിയിച്ചു.
കഴിഞ്ഞ ചൊവ്വാഴ്ച ആലപ്പുഴ, ഇടുക്കി ജില്ലകളിലും കെഎസ്യു വിദ്യാഭ്യാസ ബന്ദ് നടത്തിയിരുന്നു. എസ്എഫ്ഐ പ്രവർത്തകർ മർദ്ദിച്ചെന്നാരോപിച്ചായിരുന്നു ഈ പ്രതിഷേധവും. ഇതിന് പിന്നാലെയാണ് കൊല്ലത്തും പഠിപ്പുമടക്ക് സമരത്തിന് ആഹ്വാനം ചെയ്തത്.
കോളേജ് യൂണിയൻ തെരഞ്ഞെടുപ്പ് ഫലം വന്നതിന് പിന്നാലെ എസ്എഫ്ഐ നടത്തുന്ന അതിക്രമം പ്രതിഷേധാർഹമാണ്. വിഷയത്തെ രാഷ്ട്രീയമായും നിയമപരമായും നേരിടും കെഎസ്യു കൊല്ലം ജില്ലാ പ്രസിഡന്റ് അൻവർ സുൽഫിക്കർ പറഞ്ഞു.
ഈ മാസം 22നായിരുന്ന ആലപ്പുഴ, ഇടുക്കി ജില്ലകളിലെ കെഎസ്യു വിദ്യാഭ്യാസ ബന്ദ്. എസ്എഫ്ഐ – ഡിവൈഎഫ്ഐ അതിക്രമങ്ങളിൽ പ്രതിഷേധിച്ചായിരുന്നു അന്നത്തെ പ്രതിഷേധം. ഇടുക്കി കട്ടപ്പന ഗവ. കോളേജിൽ മാരക ആയുധങ്ങൾ ഉപയോഗിച്ച് എസ്എഫ്ഐ പ്രവർത്തകർ തങ്ങളുടെ പ്രവർത്തകരെ അതിക്രൂരമായി ആക്രമിച്ചു എന്നായിരുന്നു കെഎസ്യു ആരോപണം. ആലപ്പുഴ അമ്പലപ്പുഴ ഗവ. കോളേജിൽ കെഎസ്യു വിജയാഘോഷത്തിനിടയിൽ ജില്ലാ ഭാരവാഹികളെ ഉൾപ്പെടെ ആക്രമിച്ചതിൽ പ്രതിഷേധിച്ചായിരുന്നു പഠിപ്പുമുടക്ക് സമരം നടത്തിയത്.
