🌹 “ഇന്നത്തെ ചിന്താവിഷയം” 🌹 – 2024 | നവംബർ 03 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

പിറവിയല്ല മുഖ്യം, പ്രവൃത്തിയാണ്
———————————————————–

കുടുംബാംഗങ്ങൾ എല്ലാവരും കൂടി, കടൽ തീരത്ത് ഉല്ലസിക്കുകയായിരുന്നു. കുട്ടികളിൽ രണ്ടു പേർ, കടൽപ്പുറത്ത് കളിച്ചു കൊണ്ടിരുന്നു. വൃദ്ധയായ ഒരു സ്ത്രീ, ദൂരെ നിന്നു നടന്നു വരുന്നതവർ കണ്ടു.മുഷിഞ്ഞ വസ്ത്രമാണവർ ധരിച്ചിരുന്നത്. മണപ്പുറത്തു നിന്ന് എന്തൊക്കെയോ പെറുക്കി, അവർ കയ്യിലുണ്ടായിരുന്ന സഞ്ചിയിൽ ഇടുന്നുണ്ടായിരുന്നു.

മാതാപിതാക്കൾ കുട്ടികളെ ആ സ്ത്രീയുടെ അടുത്തേക്കു പോകുന്നതിൽ നിന്നും വിലക്കി. അവരുടെ അടുത്തെത്തിയപ്പോഴും അവർ എന്തോ പെറുക്കി തൻ്റെ സഞ്ചയിൽ ഇട്ടു. അവരെ നോക്കി ആ സ്ത്രീ ചിരിച്ചുവെങ്കിലും, മാതാപിതാക്കളുടെ വിലക്കു ഭയന്ന് അവർ മുഖം തിരിച്ചു കളഞ്ഞു.

ആഴ്ചകൾക്കുശേഷം അവർ പത്രത്തിൽ ഒരു മരണ വാർത്ത വായിച്ചു. കുപ്പിച്ചില്ലുകളും മറ്റും പെറുക്കിയെടുത്ത് കടൽത്തീരം വൃത്തിയാക്കിയിരുന്ന ഒരു സ്ത്രീയുടെ മരണ വാർത്തയായിരുന്നു അത്. വാർത്തയോടൊപ്പം കൊടുത്തിരുന്ന ഫോട്ടോ, അവർ അന്നു കണ്ട സ്ത്രീയുടേതായിരുന്നു!

ജീവിതം സമ്പന്നമാക്കാൻ, ജനനം ശ്രേഷ്ഠമായിരിക്കണമെന്നില്ല. ജനിച്ച ഇടം, പുൽക്കൂടാകാം മണി മാളികയാകാം. ജന്മം കൊണ്ട സ്ഥലമല്ല, ഒരാളെ സവിശേഷ പ്രതിഭയാക്കുന്നത്. അയാളുടെ പ്രവൃത്തിയാണതു നിശ്ചയിക്കുന്നത്. തിരുപ്പിറവിയുടെ കഥ, അതാണല്ലോ വിളിച്ചോതുന്നത് ! എവിടെ ജനിച്ചു എന്നതിനേക്കാൾ, എങ്ങനെ ജീവിച്ചു എന്നതാണു പ്രസക്തം. സ്വന്തം ജനനത്തിന് ആർക്കും ഉത്തരവാദിത്തമില്ലെങ്കിലും, കർമ്മത്തിന് എല്ലാവരും ഉത്തരം പറയേണ്ടി വരും. ഒരാളുടെ ചെയ്തികളാണ് അയാളുടെ ജന്മത്തെ സാധൂകരിക്കുന്നത് .

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര