🌹 “ഇന്നത്തെ ചിന്താവിഷയം” 🌹 – 2024 | നവംബർ 15 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

തെറ്റുകൾ ആവർത്തിക്കാതെ ഇരിക്കാം
————————————————————-

രണ്ടു വേട്ടക്കാർ, ഒരു ഹെലിക്കോപ്റ്റർ വാടകയ്ക്കെടുത്ത് വേട്ടയ്ക്കായി വനത്തിലേക്കു പോയി. അവരെ വനത്തിലാക്കി, പൈലറ്റു് മടങ്ങി. രണ്ടാഴ്ചയ്ക്കു ശേഷം, അവരെ തിരിച്ചു കൊണ്ടുപോകാൻ ഹെലിക്കോപ്റ്റർ വീണ്ടുമെത്തി. രണ്ടു വലിയ കാട്ടുപോത്തുകളെ അവർ വേട്ടയാടി പിടിച്ചിരുന്നു. ഒരു പോത്തിനെ മാത്രമേ കൊണ്ടുപോകാൻ കഴിയൂവെന്നു പൈലറ്റ് പറഞ്ഞുവെങ്കിലും, കഴിഞ്ഞ വർഷം വന്ന ഹെലിക്കോപ്റ്ററിൽ രണ്ടു പോത്തുകളെ കയറ്റി എന്നവർ പറഞ്ഞപ്പോൾ, പൈലറ്റ് മനസ്സില്ലാ മനസ്സോടെ, സമ്മതം മൂളി.

പറന്നുയർന്ന് അധികനേരം കഴിയുന്നതിനു മുമ്പേ തന്നെ ഹെലിക്കോപ്റ്റർ നിലംപതിച്ചു. വേട്ടക്കാരിലൊരാൾ ചോദിച്ചു: “നമ്മൾ ഇപ്പോൾ എവിടെയാണ് ?” അപരൻ പറഞ്ഞു: ” കഴിഞ്ഞ വർഷം വീണ അതേ സ്ഥലത്തു തന്നെ”.

സ്വന്ത ജീവിതം തകർത്തു കളഞ്ഞവരുടെ ആത്മകഥകളിൽ, തിരുത്തപ്പെടാത്ത തെറ്റുകളായിരിക്കും കുടുതൽ രേവപ്പെടുത്തിയിട്ടുണ്ടായിരിക്കുക. ഒരാൾ ആവർത്തിച്ചു ചെയ്യുന്ന ശരികൾ മറ്റുള്ളവർക്കു മാതൃകകളാകും. എന്നാൽ, അവർത്തിക്കപ്പെടുന്ന തെറ്റുകൾ, അവ ചെയ്യുന്ന ആളുകളുടെ ദുരന്തങ്ങളിലേക്കുള്ള എളുപ്പ വഴികളായിരിക്കും.

പതനങ്ങൾ മുന്നറിയിപ്പുകളാണ് : വഴിമാറാനോ, മുൻകരുതലെടുക്കാനോ,
കരുത്താർജ്ജിക്കാനോ ഉള്ള യഥാർത്ഥ ശാസനകൾ! നിലം പതിക്കുന്നതിൽ തെറ്റില്ല. പതനത്തിൻ്റെ കാരണം ഉൾക്കൊള്ളാതിരിക്കുന്നതും, പരിഹരിക്കാതിരിക്കുന്നതുമാണ് തെറ്റ്. വീണാൽ എഴുന്നേൽക്കണം. എഴുന്നേറ്റു കഴിഞ്ഞാൽ, നോക്കണം. വീണ സ്ഥലത്തേക്കല്ല. വീഴ്ചയ്ക്കു മുഖാന്തരമായ കാരണങ്ങളിലേക്ക് . വിവേകമുള്ളവർ ഒരു കാരണത്താൽ, ഒരുതവണ മാത്രമേ വീഴൂ.

അന്യരുടെ അബദ്ധങ്ങളിൽ നിന്നു കൂടി നാം പഠിക്കണം. എല്ലാത്തെറ്റുകളും സ്വയം വരുത്തി, സ്വയം പരിഹരിക്കാനുള്ള ആയുർ ദൈർഘം, ആർക്കുമുണ്ടാകില്ല. അപരൻ്റ പരാജയങ്ങളിൽ കയ്യടിക്കാനുള്ള താൽപര്യം, ആ പരാജയങ്ങളുടെ കാരണമന്വേഷിക്കാനായി ഉണ്ടായിരുന്നെങ്കിൽ, ഒരേ തെറ്റുകൾത്തന്നെ, പലർ ആവർത്തിക്കുമായിരുന്നില്ല.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര