മലപ്പുറം: കല്യാണവീട്ടിലെ പായസ ചെമ്പിൽ അബദ്ധത്തിൽ വീണ് ഗുരുതരമായി പൊള്ളലേറ്റ താഴെ ചേളാരി പത്തൂർ കോളനിയിലെ പത്തൂർ അയ്യപ്പനാണ് ചികിത്സയിലിരിക്കെ മരിച്ചത്. കഴിഞ്ഞ ശനിയാഴ്ചയായിരുന്നു സംഭവം.
പാപ്പനൂർ ശിവക്ഷേത്രത്തിന് സമീപമുള്ള ബന്ധുവീട്ടിലെ വിവാഹത്തിനിടെയാണ് അയ്യപ്പൻ പായസ ചെമ്പിൽ വീണത്. വിവാഹ സത്കാരത്തിനായി തയാറാക്കുകയായിരുന്ന പായസം ഇളക്കുന്നതിനിടെ നിയന്ത്രണം തെറ്റി അബദ്ധത്തിൽ ചെമ്പിലേക്ക് വീഴുകയായിരുന്നു.
ഗുരുതരമായി പരിക്കേറ്റ അയ്യപ്പനെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ചികിത്സയിലിരിക്കെ ചൊവ്വാഴ്ച വൈകിട്ടോടെയാണ് മരണം സംഭവിച്ചത്. താഴെചേളാരി വെളിമുക്ക് എ യു പി സ്കൂളിലെ ബസ് ഡ്രൈവറാണ് അയ്യപ്പൻ. ഭാര്യ: സരസ്വതി.
