അഡിസ് അബാബ: ലോകപ്രശസ്ത എത്യോപ്യൻ ദീർഘദൂര ഓട്ടക്കാരി യെബർഗ്വാൾ മെലെസെ (36) അന്തരിച്ചു. ചൊവ്വാഴ്ച തലസ്ഥാനമായ അഡിസ് അബാബയിൽ പതിവ് പരിശീലനത്തിനിടെ പെട്ടെന്നുണ്ടായ ശാരീരിക അസ്വസ്ഥതയെത്തുടർന്നായിരുന്നു അന്ത്യം. ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
അന്താരാഷ്ട്ര മാരത്തൺ വേദികളിൽ എത്യോപ്യയുടെ അഭിമാനമായിരുന്ന മെലെസെ നിരവധി വമ്പൻ വിജയങ്ങൾ സ്വന്തമാക്കിയിട്ടുണ്ട്.
ഹൂസ്റ്റൺ, പ്രാഗ്, ഷാങ്ഹായ് മാരത്തണുകളിൽ ഒന്നാം സ്ഥാനം. 2015-ലെ ചിക്കാഗോ മാരത്തണിൽ രണ്ടാം സ്ഥാനം നേടി ലോകശ്രദ്ധ പിടിച്ചുപറ്റി.
അവസാന തയ്യാറെടുപ്പ്: മെയ് 24-ന് ഒട്ടാവയിൽ നടക്കാനിരുന്ന മത്സരത്തിനായി കഠിനപരിശീലനത്തിലായിരുന്നു താരം.
മെലെസെയുടെ അപ്രതീക്ഷിത വിയോഗത്തിൽ എത്യോപ്യൻ അത്ലറ്റിക്സ് ഫെഡറേഷൻ ആഴത്തിലുള്ള ദുഃഖം രേഖപ്പെടുത്തി. “രാജ്യത്തിന്റെ വീരനായകയായ അത്ലറ്റിന്റെ വേർപാടിൽ നടുങ്ങുന്നു” എന്ന് ഫെഡറേഷൻ പ്രസ്താവനയിൽ അറിയിച്ചു. ലോകമെമ്പാടുമുള്ള കായിക പ്രേമികളും സഹതാരങ്ങളും പ്രിയ താരത്തിന് അനുശോചനം രേഖപ്പെടുത്തി.
