📱വാർത്തകൾ ഒറ്റനോട്ടത്തിൽ📱 – 2026 | മെയ് 07 | വ്യാഴം ✍️ കപിൽ ശങ്കർ

🔹2026 മെയ് 7-ലെ പ്രധാന ദിനാചരണങ്ങളും പ്രത്യേകതകളും താഴെ പറയുന്നവയാണ്.

•ലോക പാസ്‌വേഡ് ദിനം (World Password Day): 2026 മെയ് 7-ന് (മെയ് മാസത്തിലെ ആദ്യ വ്യാഴാഴ്ച) ഡിജിറ്റൽ സുരക്ഷയുടെ ഭാഗമായി ലോകമെമ്പാടും പാസ്‌വേഡ് ദിനം ആചരിക്കുന്നു.
•നാഷണൽ ടൂറിസം ഡേ (ഇന്ത്യ): 1952-ൽ ടൂറിസം, സിവിൽ ഏവിയേഷൻ മന്ത്രാലയം സ്ഥാപിതമായതിനെ അനുസ്മരിച്ച് ഇന്ത്യയിൽ മെയ് 7-ന് നാഷണൽ ടൂറിസം ദിനമായി ആചരിക്കുന്നു.
•നാഷണൽ ചിൽഡ്രൻസ് മെന്റൽ ഹെൽത്ത് അവയർനസ് ഡേ (USA): കുട്ടികളുടെ മാനസികാരോഗ്യത്തെക്കുറിച്ചുള്ള ബോധവൽക്കരണത്തിനായി മെയ് മാസത്തിലെ ആദ്യ ആഴ്ചയിലെ വ്യാഴാഴ്ച (2026 മെയ് 7) ഈ ദിനം ആചരിക്കുന്നു.
•നാഷണൽ ഡേ ഓഫ് പ്രയർ & റീസൺ: അമേരിക്കയിൽ മെയ് 7-ന് (മെയ് മാസത്തിലെ ആദ്യ വ്യാഴാഴ്ച) നാഷണൽ ഡേ ഓഫ് പ്രയറും, അതിനൊരു മതേതര ബദലായി നാഷണൽ ഡേ ഓഫ് റീസണും ആചരിക്കുന്നു.
•നാഷണൽ കോസ്മോപൊളിറ്റൻ ഡേ, നാഷണൽ ഹോംബ്രൂ ഡേ (ഹോംബ്രൂയിംഗ് അവബോധം) എന്നിവയും മെയ് 7-ന് ആചരിക്കുന്നു.

🔹തോല്‍വിയെക്കുറിച്ച് സഖാക്കള്‍ക്കു നിര്‍ഭയമായി അഭിപ്രായം പറയാന്‍ അവസരം ഒരുക്കുമെന്ന് സിപിഎം സംസ്ഥാന സെക്രട്ടേറിയറ്റ്. പാര്‍ട്ടി ഘടകങ്ങളേയും ജനങ്ങളേയും വിശ്വാസത്തിലെടുത്ത് തുടര്‍ നടപടിയെടുക്കും. പാര്‍ട്ടി അണികളിലെ വോട്ടുചോര്‍ച്ച തിരിച്ചറിയാനായില്ല. സ്ഥാനാര്‍ത്ഥി നിര്‍ണ്ണയത്തിലെ പാളിച്ച, കണ്ണൂര്‍ പാര്‍ട്ടിയിലെ പ്രശ്നങ്ങള്‍, സംഘടനാ വീഴ്ച എന്നിവയാണു പരാജയകാരണമെന്നാണു വിലയിരുത്തല്‍. സെക്രട്ടേറിയറ്റ് യോഗ തീരുമാനങ്ങള്‍ അറിയിക്കാന്‍ വിളിച്ച വാര്‍ത്താസമ്മേളനത്തില്‍ മാധ്യമപ്രവര്‍ത്തകരുടെ ചോദ്യങ്ങള്‍ക്കു മറുപടി പറയാതെ സംസ്ഥാന സെക്രട്ടറി എം.വി. ഗോവിന്ദന്‍ ഇറങ്ങിപ്പോയി. രാവിലെ പത്തിന് ആരംഭിച്ച് 13 മണിക്കൂര്‍ നീണ്ടുനിന്ന മാരത്തണ്‍ ചര്‍ച്ച രാത്രി 11 നാണ് അവസാനിച്ചത്.

🔹ദേശീയഗാനമായ ‘ജനഗണമന’യ്ക്കു തുല്യമായ പദവി ദേശീയഗീതമായ ‘വന്ദേമാതര’ത്തിന് നല്‍കാന്‍ കേന്ദ്ര മന്ത്രിസഭ അംഗീകരിച്ചു. പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന മന്ത്രിസഭാ യോഗത്തിലാണ് ഈ തീരുമാനം.

🔹പ്രതിപക്ഷ നേതാവ് സ്ഥാനത്തേക്കു പിണറായി വിജയന്‍ വേണ്ടെന്നു സിപിഐ. സിപിഐ നേതൃയോഗത്തിലാണ് നേതാക്കള്‍ അഭിപ്രായം അറിയിച്ചത്. പ്രതിപക്ഷ നേതൃസ്ഥാനത്തേക്ക് പുതിയ ആള്‍ വരണമെന്നും പിണറായി ശൈലി തോല്‍വിക്ക് ആക്കം കൂട്ടിയെന്നുമാണ് സിപിഐ ഉയര്‍ത്തുന്ന വിമര്‍ശനം.

🔹ഫസല്‍ വധക്കേസിലെ വിചാരണയ്ക്കു ഹാജരാകുന്നതില്‍ നിന്ന് തലശ്ശേരിയിലെ എംഎല്‍എയായി തെരഞ്ഞെടുക്കപ്പെട്ട കാരായി രാജന് സിബിഐ കോടതി അവധി നല്‍കി. സത്യപ്രതിജ്ഞയില്‍ പങ്കെടുക്കണമെന്ന് ആവശ്യപ്പെട്ട് എട്ടാം പ്രതിയായ കാരായി രാജന്‍ അപേക്ഷ നല്‍കിയിരുന്നു. ശിക്ഷിക്കപ്പെട്ടാല്‍ അയോഗ്യത ഉള്‍പ്പെടെയുള്ള നടപടികള്‍ കാരായി രാജന്‍ നേരിടേണ്ടി വരും. 2006 ല്‍ എന്‍ഡിഎഫ് പ്രവര്‍ത്തകനായ മുഹമ്മദ് ഫസല്‍ കൊല്ലപ്പെട്ട കേസില്‍ കൊടി സുനിയാണ് ഒന്നാംപ്രതി.

🔹ഓടിക്കൊണ്ടിരിക്കുന്ന വണ്ടിയില്‍ കയറരുതെന്നും ഓടുന്ന വണ്ടിയില്‍ സമാധാനമായി ഇരിക്കുകയാണു വേണ്ടതെന്നും കോണ്‍ഗ്രസ് നേതാവ് വി ഡി സതീശന്‍. വണ്ടി നിര്‍ത്തുമ്പോള്‍ ഇറങ്ങുക. മുഖ്യമന്ത്രി ചര്‍ച്ചയോടുള്ള ചോദ്യത്തിനാണ് വിഡി സതീശന്റെ പ്രതികരണം.

🔹ഷിബു ബേബി ജോണ്‍ ആര്‍എസ്പിയുടെ മന്ത്രിയാവും. പാര്‍ലമെന്ററി പാര്‍ട്ടി നേതാവായി ഷിബു ബേബി ജോണിനെ പാര്‍ട്ടി സംസ്ഥാന സെക്രട്ടറിയേറ്റ് തെരഞ്ഞെടുത്തു.

🔹സിപിഎമ്മുകാര്‍ ബിജെപിക്ക് വോട്ടു ചെയ്തെന്ന് കോഴിക്കോട് നോര്‍ത്ത് മണ്ഡലം സിപിഎം സ്ഥാനാര്‍ഥിയായിരുന്ന തോട്ടത്തില്‍ രവീന്ദ്രന്‍. ഈ പോക്കാണെങ്കില്‍ സംസ്ഥാനത്ത് ബിജെപി കൂടുതല്‍ മുന്നേറ്റം നടത്തും. കഴിഞ്ഞ തവണത്തേക്കാള്‍ ഒമ്പതിനായിരത്തോളം വോട്ടുകള്‍ ബിജെപി അധികമായി നേടിയെന്നും അദ്ദഹം പറഞ്ഞു.

🔹യുഡിഎഫില്‍ മല്‍സരിച്ചു ജയിച്ച ടി.കെ ഗോവിന്ദനെ വര്‍ഗവഞ്ചകനെന്ന് വിളിക്കില്ലെന്നും, താന്‍ ആര്‍ക്കും അടിമയല്ലെന്നും കോടിയേരി ബാലകൃഷ്ണന്റെ ഭാര്യ വിനോദിനി. കോടിയേരിയോട് ഇഷ്ടമുളളവര്‍ വീട്ടില്‍ വരുമ്പോള്‍ സ്വീകരിക്കുമെന്നും അതില്‍ ഒരു പേടിയുമില്ലെന്നും വിനോദിനി.

🔹യുഡിഎഫ് സ്ഥാനാര്‍ത്ഥിയായി ജയിച്ച ജി സുധാകരന്‍ കുടുംബസമേതം സഹോദരന്‍ ഭുവനേശ്വരന്റെ രക്തസാക്ഷി മണ്ഡപത്തിലെത്തി പുഷ്പാര്‍ച്ചന നടത്തി. ചാരുംമൂട് ഏരിയ കമ്മിറ്റിയുടെ കീഴിലാണ് രക്തസാക്ഷി മണ്ഡപം.

🔹രാഷ്ട്രീയത്തിന്റെ പേരില്‍ തന്നെ വെറുക്കരുതെന്നും ചീത്ത പറയരുതെന്നും തൃശൂരില്‍ തോറ്റ ബിജെപി സ്ഥാനാര്‍ഥി പത്മജ വേണുഗോപാല്‍. താന്‍ ഒരു സാധാരണ മനസ്സുള്ള, എല്ലാവരോടും സ്നേഹവും ദയയുമുള്ള സ്ത്രീയാണ്. തന്നെ സ്നേഹിക്കുന്ന കുറെ പേര്‍ ഇപ്പോഴും തൃശൂരില്‍ ഉണ്ട്. അതുകൊണ്ട് താന്‍ തൃശൂരില്‍നിന്ന് പോകാന്‍ ആഗ്രഹിക്കുന്നില്ലെന്നും പത്മജ പറഞ്ഞു.

🔹കണ്ണൂര്‍ അഞ്ചരക്കണ്ടി ഡെന്റല്‍ കോളേജ് വിദ്യാര്‍ഥി നിതിന്‍ രാജിന്റെ മരണത്തില്‍ ദേശീയ പട്ടികജാതി കമ്മീഷന്‍ കേസെടുത്തു. സംഭവവുമായി ബന്ധപ്പെട്ട് കണ്ണൂര്‍ ജില്ലാ കളക്ടര്‍ക്കും എസ് പിക്കും കമ്മീഷന്‍ നോട്ടീസ് അയച്ചു.

🔹ജനങ്ങളെ ബുദ്ധിമുട്ടിച്ചു കൊണ്ടാകരുത് പുതിയ മുഖ്യമന്ത്രിയുടെ യാത്രയെന്ന അഭ്യര്‍ത്ഥനയുമായി തുറന്ന കത്ത്. ടൂറിസം വകുപ്പ് മുന്‍ ഡെപ്യൂട്ടി ഡയറക്ടര്‍ പ്രശാന്ത് വാസുദേവാണ് ഈ ആവശ്യം ഉന്നയിച്ചത്. മുഖ്യമന്ത്രി പോകുന്ന വഴികളില്‍ ട്രാഫിക് ലൈറ്റുകള്‍ ഓഫാക്കുന്ന പതിവ് അവസാനിപ്പിക്കണം. ജനങ്ങളുടെ സഞ്ചാരസ്വാതന്ത്ര്യത്തെ നിഷേധിച്ചു കൊണ്ടാകരുത് മുഖ്യമന്ത്രിയുടെ യാത്രയെന്നും അദ്ദേഹം ആവശ്യപ്പെടുന്നു.

🔹കാരണവര്‍ വധക്കേസിലെ പ്രതി ഷെറിന് ജയിലില്‍ വിഐപി പദവി ലഭിച്ചിരുന്നതും ജയില്‍ ഡിഐജിയും മുന്‍മന്ത്രി കെ.ബി. ഗണേഷ്‌കുമാറുമായുമുള്ള വഴിവിട്ട ബന്ധങ്ങളെക്കുറിച്ചും വെളിപ്പെടുത്തിയ യുവതി കൊല്ലപ്പെട്ടു. ബംഗളൂരുവില്‍ മര്‍ദ്ദനത്തിന് ഇരയായി തൃശൂരിലെ ആശുപത്രിയില്‍ ചികില്‍സയിലായിരുന്ന വാടാനപ്പിള്ളി സ്വദേശിനി സുനിത എന്ന നാല്‍പത്തേഴുകാരിയാണു മരിച്ചത്. മര്‍ദിച്ച മലയാളി ദീപക് കൃഷ്ണയെ പോലീസ് തെരയുന്നു.

🔹റാന്നിയിലെ കീക്കൊഴൂര്‍ രഞ്ജിത കൊലക്കേസില്‍ പ്രതി അതുല്‍ സത്യന് ജീവപര്യന്തം കഠിനതടവ്. പത്തനംതിട്ട ജില്ലാ സെഷന്‍സ് കോടതിയാണ് ശിക്ഷ വിധിച്ചത്. രഞ്ജിതയ്‌ക്കൊപ്പം താമസിച്ചിരുന്ന അതുല്‍ സത്യന്‍ കുറ്റക്കാരനാണെന്ന് കോടതി നേരത്തെ കണ്ടെത്തിയിരുന്നു. 2023 ജൂണ്‍ 24 നായിരുന്നു കൊലപാതകം നടന്നത്. രഞ്ജിതയുടെ അച്ഛനെയും അമ്മയെയും പ്രതി വെട്ടിപ്പരിക്കേല്‍പ്പിച്ചിരുന്നു.

🔹ചെറുതുരുത്തിയില്‍ പേ വിഷബാധയേറ്റ് ഏഴുവയസുകാരി മരിച്ചു. വെട്ടിക്കാട്ടിരി സ്‌കൂളിലെ വിദ്യാര്‍ഥിയായിരുന്ന സന്‍ഹ മെഹ്റിന്‍ആണ് ബന്ധുവീട്ടിലേക്കുള്ള യാത്രയ്ക്കിടെ കുഴഞ്ഞുവീണു മരിച്ചത്.

🔹ചേര്‍ത്തല മുന്‍സിഫ് മജിസ്‌ട്രേറ്റ് റോബിന്‍ റോഡ്രിഗ്സിനു പാമ്പുകടിയേറ്റു. കോടതിക്ക് സമീപമുള്ള ക്വാര്‍ട്ടേഴ്‌സിലാണു കടിയേറ്റത്.

🔹മൂന്നര കിലോ കഞ്ചാവുമായി മലപ്പുറം എടവണ്ണയില്‍ അരീക്കോട് തെരട്ടമ്മല്‍ സ്വദേശി റഹീസ് എടവണ്ണ പൊലീസിന്റെ പിടിയിലായി. തെലങ്കാന, ഹൈദരാബാദ്, ഊട്ടി എന്നിവിടങ്ങളില്‍ ബേക്കറി കച്ചവടം നടത്തിവരുന്ന ആളാണ് പ്രതി.

🔹വീട്ടുകാരെ വിറപ്പിച്ചു കുളിമുറിയിൽ കൂറ്റൻ രാജവെമ്പാല. ആറളം പുനരധിവാസ മേഖലയിലെ ബ്ലോക്ക് 10 ലെ പുലിക്കരി ഷിജുവിന്‍റെ വീട്ടിലെ ബാത്ത് റൂമിലാണ് രാജവെമ്പാലയെ കണ്ടത്. ആർആർടിയുടെ സഹായത്തോടെ ഇരിട്ടി സെക്ഷൻ വാച്ചറും മാർക്ക്‌ പ്രവർത്തകനുമായ ഫൈസൽ വിളക്കോട്, മിറാജ് പേരാവൂർ എന്നിവർ ചേർന്നാണ് രാജവെമ്പാലയെ പിടികൂടിയത്.

🔹ഇടുക്കി പൂപ്പാറയില്‍ പന്നിയാര്‍ പുഴ കൈയേറി നിര്‍മിച്ച കെട്ടിടങ്ങള്‍ പൊളിച്ചു നീക്കി തുടങ്ങി. സുപ്രീംകോടതിയുടെയും ഹൈക്കോടതി ഉത്തരവിനെയും തുടര്‍ന്നാണ് നടപടി. 88 കെട്ടിടങ്ങളാണ് പൊളിച്ചു നീക്കേണ്ടത്.ഇതില്‍ 56 കെട്ടിടങ്ങള്‍ ഉടമകള്‍ പൊളിച്ചു നീക്കും. ബാക്കിയുള്ളവ റവന്യു വകുപ്പ് പൊളിച്ചു നീക്കും. സംഘര്‍ഷ സാധ്യത കണക്കിലെടുത്ത് സ്ഥലത്തു വന്‍ പോലീസ് സന്നാഹം ഏര്‍പ്പെടുത്തിയിട്ടുണ്ട്. ശാന്തന്‍പാറ പോലീസ് സ്റ്റേഷന്‍ പരിധിയില്‍ നിരോധനാജ്ഞയും പ്രഖ്യാപിച്ചിട്ടുണ്ട്.

🔹ഇടുക്കി ശങ്കരപാണ്ഡ്യമെട്ടിൽ ജഗൻ മോഹന്‍റെ ഭാര്യ ശാന്തിയെ മരിച്ച നിലയിൽ കണ്ടെത്തിയ സംഭവം കൊലപാതകമാണെന്ന് സ്ഥിരീകരിച്ച് പോലീസ്. സംഭവത്തിൽ ശാന്തിയുടെ ഭർത്താവിന്‍റെ സഹോദരി ഭർത്താവായ രാമകൃഷ്ണനെ ശാന്തൻപാറ പോലീസ് കസ്റ്റഡിയിലെടുത്തു. കഴിഞ്ഞ മേയ് 4-ാം തീയതി ഉച്ചയോടെ ശാന്തിയുടെ വീട്ടിൽ വെച്ചാണ് കൊലപാതകം നടന്നത്. രാമകൃഷ്ണനും ശാന്തിയും തമ്മിലുണ്ടായ തർക്കമാണ് കൊലപാതകത്തിൽ കലാശിച്ചത്. തോർത്ത് ഉപയോഗിച്ച് കഴുത്ത് മുറുക്കി ശ്വാസം മുട്ടിച്ചാണ് ശാന്തിയെ കൊലപ്പെടുത്തിയതെന്ന് പോസ്റ്റ്‌മോർട്ടം റിപ്പോർട്ടിൽ വ്യക്തമാകുന്നു.

🔹സംസ്ഥാനത്ത് വേനല്‍ മഴ ശക്തമാകുമെന്ന് കേന്ദ്ര കാലാവസ്ഥാ വകുപ്പ്. മഴ ശക്തമാവുന്ന സാഹചര്യത്തില്‍ 10 ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്‍, കോഴിക്കോട്, വയനാട് ജില്ലകളിലാണ് യെല്ലോ അലര്‍ട്ട് പ്രഖ്യാപിച്ചിരിക്കുന്നത്.

🔹സാധാരണക്കാരിയായി ബസ് സ്റ്റാൻഡിലെത്തിയ പോലീസ് കമ്മീഷണ‍റെ ശല്യം ചെയ്തത് 40 ഓളം പുരുഷന്മാർ. മൂന്ന് മണിക്കൂറിനുള്ളിലാണ് 40 ഓളം പുരുഷന്മാർ ശല്യം ചെയ്തത്. ഹൈദരബാദിലാണ് സംഭവം. നഗരത്തിലെ സ്ത്രീസുരക്ഷയുടെ യഥാർഥ അവസ്ഥ നേരിട്ട് മനസിലാക്കാനാണ് കമ്മീഷണർ വേഷം മാറിയെത്തിയത്.മൽക്കാജ്ഗിരി പോലീസ് കമ്മീഷണർ വി. സുമതി ആണ് വേറിട്ട പരീക്ഷണം നടത്തിയത്. മേയ് ഒന്നിന് അർധരാത്രിയിൽ ഹൈദരബാദ് നഗരത്തിലെ തിരക്കേറിയ ദിൽസുഖ്‌നഗർ ബസ് സ്റ്റാൻഡിന് സമീപം സാധാരണ വസ്ത്രം ധരിച്ച് ഒരു യാത്രക്കാരിയെന്ന വ്യാജേന ഇവർ മൂന്ന് മണിക്കൂറോളമാണ് ചെലവഴിച്ചത്.അർധരാത്രി 12.30 മുതൽ പുലർച്ചെ 3.30 വരെയായിരുന്നു കമ്മീഷണറുടെ ഈ പരിശോധന. തന്‍റെ ഔദ്യോഗിക പദവിയോ സുരക്ഷാ അകമ്പടിയോ ഇല്ലാതെ, മുഖം മറയ്ക്കാതെ ഒരു സാധാരണ യാത്രക്കാരിയെന്ന നിലയിലാണ് അവർ ബസ് സ്റ്റോപ്പിൽ നിന്നത്. ഇവർ കമ്മീഷണറാണെന്ന് തിരിച്ചറിയാതെ സമീപിച്ച പുരുഷന്മാർ അശ്ലീല ചുവയോടെ സംസാരിക്കുകയും അനാവശ്യ ചോദ്യങ്ങൾ ചോദിക്കുകയും ചെയ്തു. ലഹരിമരുന്നിന് അടിമപ്പെട്ടവർ മുതൽ ഉന്നത വിദ്യാഭ്യാസം നേടിയ യുവാക്കൾ വരെ ഇക്കൂട്ടത്തിലുണ്ടായിരുന്നു.

🔹ആന്ധ്രാപ്രദേശിലെ ശ്രീ സത്യസായി ജില്ലയിൽ എടിഎം. മെഷീൻ കാറിൽ കെട്ടിവലിച്ച് കടത്തിക്കൊണ്ടുപോകാൻ മോഷ്ടാക്കളുടെ ശ്രമം. ധർമാവരം ടൗണിൽ ബുധനാഴ്ച പുലർച്ചെയാണ് ഐഡിഎഫ്സി. ബാങ്കിന്‍റെ എ‌ടിഎമ്മിൽ ഈ വിചിത്രമായ മോഷണശ്രമം നടന്നത്.ബൊലേറോ കാറിലെത്തിയ മുഖംമൂടി ധരിച്ച മൂന്നംഗ സംഘം ആദ്യം കമ്പിപ്പാര ഉപയോഗിച്ച് മെഷീൻ കുത്തിപ്പൊളിക്കാൻ ശ്രമിച്ചു. എന്നാൽ ഇത് പരാജയപ്പെട്ടതോടെയാണ് അവർ വ്യത്യസ്തമായ മാർഗം സ്വീകരിച്ചത്. മോഷ്ടാക്കൾ കൊണ്ടുവന്ന കാറിന്‍റെ പിൻവശത്ത് കയറുപയോഗിച്ച് എടിഎം. മെഷീൻ ബന്ധിപ്പിച്ച ശേഷം കാർ ഓടിച്ച് മെഷീൻ പുറത്തേക്ക് വലിച്ചെടുക്കുകയായിരുന്നു.വിവരമറിഞ്ഞ് പോലീസ് ഉടൻ സ്ഥലത്തെത്തിയെങ്കിലും മോഷ്ടാക്കൾ രക്ഷപ്പെട്ടു. കവർച്ചാശ്രമത്തിന്‍റെ മുഴുവൻ ദൃശ്യങ്ങളും സിസിടിവി. ക്യാമറയിൽ പതിഞ്ഞിട്ടുണ്ട്.

🔹തമിഴ്നാട്ടില്‍ മന്ത്രിസഭ രൂപീകരിക്കാന്‍ വിജയ് കേവല ഭൂരിപക്ഷമായ 118 പേരുടെ പിന്തുണ ഉറപ്പാക്കിയുള്ള കത്ത് ഹാജരാക്കണമെന്നു ഗവര്‍ണര്‍ രാജേന്ദ്ര അര്‍ലേക്കര്‍. കോണ്‍ഗ്രസ് പിന്തുണയോടെ 113 എം എല്‍ എമാര്‍ ഒപ്പിട്ട കത്താണ് വിജയ് നല്‍കിയത്. ഇനി അഞ്ചുപേരുടെ പിന്തുണകൂടി വേണമെന്നാണ് ഗവര്‍ണര്‍ അറിയിച്ചത്.

🔹ടിവികെ-കോണ്‍ഗ്രസ് സഖ്യത്തിനെതിരെ ഡിഎംകെയും എഐഎഡിഎംകെയും സഖ്യമുണ്ടാക്കുന്നു. ഇതിനായി പ്രാഥമിക ചര്‍ച്ചകള്‍ നടന്നു. ഇതിനിടെ എഐഎഡിഎംകെ എംഎല്‍എമാരെ പുതുച്ചേരിയിലെ റിസോര്‍ട്ടിലേക്ക് മാറ്റി. എംഎല്‍എമാര്‍ ആരുമായും ബന്ധപ്പെടാതിരിക്കാന്‍ കര്‍ശന നിയന്ത്രണങ്ങളാണ് റിസോര്‍ട്ടില്‍ ഏര്‍പ്പെടുത്തിയിരിക്കുന്നത്.

🔹തമിഴ്നാട്ടില്‍ കോണ്‍ഗ്രസ് ഡിഎംകെ സഖ്യം വിട്ട് ടിവികെയ്ക്കു പിന്തുണ പ്രഖ്യാപിച്ചതിനു പിറകേ, മുന്നണി വിട്ട് ആര്‍ക്കും പോകാമെന്ന് ഡിഎംകെ നേതാവ് എംകെ സ്റ്റാലിന്‍. ടിവികെയെ പിന്തുണയ്ക്കണമെന്നാണ് സിപിഐയുടെ പൊതുവികാരം. കുറച്ചുകൂടി ആലോചിക്കണമെന്നാണ് സിപിഎം നിലപാട്. ഭാവി തെരഞ്ഞെടുപ്പുകളിലും ടിവികെയുമായി സഖ്യം നിലനിര്‍ത്താനാണു കോണ്‍ഗ്രസ് തീരുമാനം.

🔹തമിഴ്നാട്ടില്‍ പുതിയ സര്‍ക്കാര്‍ രൂപീകരണത്തിന് തിരക്കിട്ട നീക്കങ്ങള്‍ നടക്കുന്നതിനിടെ വിജയ്യുടെ ടിവികെയെ പിന്തുണയ്ക്കില്ലെന്ന് എഐഎഡിഎംകെ. ഒരു സാഹചര്യത്തിലും ടിവികെയ്ക്ക് പിന്തുണ നല്‍കില്ലെന്ന് എഐഎഡിഎംകെ ഡെപ്യൂട്ടി ജനറല്‍ സെക്രട്ടറി കെ പി മുനുസാമി അറിയിച്ചു.

🔹ടിവികെ നേതാവും നടനുമായ വിജയ്ക്ക് നല്‍കിയ പൊലീസിന്റെ പ്രത്യേക വാഹനവ്യൂഹം പിന്‍വലിച്ചു. മുഖ്യമന്ത്രിയായി ചുമതലയേറ്റ ശേഷം കോണ്‍വോയ് മതിയെന്ന് വിജയ് പറഞ്ഞെന്നു പൊലീസ്.

🔹പഞ്ചാബിലെ ഇരട്ട സ്ഫോടനത്തില്‍ എന്‍ഐഎ അന്വേഷണം ആരംഭിച്ചു. അന്വേഷണ ഉദ്യോഗസ്ഥര്‍ സ്ഫോടന സ്ഥലം സന്ദര്‍ശിച്ചു. സ്ഫോടനം നടന്ന അമൃത്സറില്‍ ഫോറന്‍സിക് തെളിവുകളടക്കം എന്‍ഐഎ സംഘം ശേഖരിച്ചു. ജലന്ധറിലെ സ്ഫോടനത്തില്‍ പരിക്കേറ്റ ഡെലിവറി ജീവനക്കാരനെ അന്വേഷണസംഘം ചോദ്യം ചെയ്യും.

🔹ആസാം മുഖ്യമന്ത്രി ഹിമന്ത ബിശ്വ ശര്‍മ ഗവര്‍ണര്‍ ലക്ഷ്മണ്‍ പ്രസാദ് ആചാര്യയ്ക്കു രാജിക്കത്തു സമര്‍പ്പിച്ചു. നിയമസഭാ തെരഞ്ഞെടുപ്പില്‍ ഹിമന്ത ബിശ്വ ശര്‍മയുടെ നേതൃത്വത്തില്‍ ബിജെപി സഖ്യം വന്‍ വിജയം നേടിയിരുന്നു.

🔹പശ്ചിമ ബംഗാളിലെ മൂര്‍ഷിദാബാദില്‍ ബിജെപി പ്രവര്‍ത്തകര്‍ ലെനിന്‍ പ്രതിമ തകര്‍ത്തു. സംഭവത്തില്‍ സിപിഎം പ്രവര്‍ത്തകര്‍ നല്‍കിയ പരാതിയെ തുടര്‍ന്ന് അഞ്ചുപേരെ പോലീസ് അറസ്റ്റു ചെയ്തു.

🔹ബിസിനസ് തകര്‍ന്നു ജീവിതം പ്രതിസന്ധിയിലായപ്പോള്‍ അഭയം നല്‍കിയ ഉറ്റ ബന്ധുവായ മന്ത്രിയുടെ വീട്ടില്‍ മോഷണം. 2003 മുതല്‍ മന്ത്രിയുടെ വീട്ടില്‍നിന്ന് ഒരു കോടിയിലേറെ രൂപ വില വരുന്ന 1.3 കിലോഗ്രാം സ്വര്‍ണം അപഹരിച്ചെന്ന കേസില്‍ മന്ത്രിയുടെ അമ്മയുടെ അടുത്ത ബന്ധുവായ സയ്യിദ് അമീറും കൂട്ടാളിയുമായ അമിര്‍ അഹമ്മദും അറസ്റ്റിലായി. കര്‍ണാടകയിലെ ഭവന ന്യൂനപക്ഷ വികസന മന്ത്രിയായ സമീര്‍ അഹമ്മദ് ഖാന്റെ ബന്ധുവാണ് സയ്യിദ് അമീര്‍.

🔹ഇറാന്‍ തീരത്തേക്കു പോയ കപ്പല്‍ അമേരിക്കന്‍ സേന ആക്രമിച്ചു. ഇറാന്‍ പതാക വഹിക്കുന്ന എംടി ഹസ്ന എന്ന കപ്പലിനു നേരെയാണ് ആക്രമണമുണ്ടായത്. കപ്പല്‍ നാവിക ഉപരോധം മറികടക്കാന്‍ ശ്രമിച്ചതിനാലാണ് ആക്രമണമെന്ന് അമേരിക്കയുടെ സെന്‍ട്രല്‍ കമാന്‍ഡിന്റെ നിലപാട്.

🔹സി എന്‍ എന്‍ വാര്‍ത്താ മാധ്യമ സ്ഥാപകന്‍ ടെഡ് ടെര്‍ണര്‍ അന്തരിച്ചു. 87 -ാം വയസായിരുന്നു. ലോകത്താദ്യമായി 24 മണിക്കൂര്‍ വാര്‍ത്താ സംപ്രേഷണം എന്ന ആശയം നടപ്പിലാക്കിയത് ഇദ്ദേഹമാണ്.

🔹യുഎസില്‍ 231 യാത്രക്കാരുമായി ലാന്‍ഡ് ചെയ്യുന്നതിനിടെ വിമാനം വൈദ്യുത പോസ്റ്റ് ഇടിച്ചു തെറിപ്പിച്ചു. വിമാനത്താവളത്തിലെ ഒരു ട്രക്കിലിടിച്ചും തകരാറുണ്ടാക്കി. വിമാനം അപകടത്തില്‍പ്പെട്ടെങ്കിലും യാത്രക്കാര്‍ക്കാര്‍ക്കു പരിക്കില്ലെന്ന് റിപ്പോര്‍ട്ടുകള്‍.

🔹സിറിയയില്‍നിന്ന് ഇസ്ലാമിക് സ്റ്റേറ്റ് ഭീകരരുടെ കുടുംബാംഗങ്ങള്‍ മാതൃരാജ്യമായ ഓസ്ട്രേലിയയിലേക്കു മടങ്ങുന്നു. സിറിയയിലെ ഐഎസ് ക്യാമ്പില്‍ വര്‍ഷങ്ങളോളം കഴിഞ്ഞ സ്ത്രീകളും കുട്ടികളുമടങ്ങുന്ന 13 അംഗ സംഘമാണു മടങ്ങാന്‍ ടിക്കറ്റ് ബുക്ക് ചെയ്തതായി ഓസ്ട്രേലിയന്‍ ഭരണകൂടം വെളിപെടുത്തിയത്.

🔹ഐപിഎല്ലില്‍ പഞ്ചാബ് കിംഗ്‌സിനെതിരായ മത്സരത്തില്‍ സണ്‍റൈസേഴ്‌സ് ഹൈദരാബാദിന് 33 റണ്‍സിന്റെ വിജയം. ഹൈദരാബാദില്‍ നടന്ന മത്സരത്തില്‍ 236 റണ്‍സ് വിജയലക്ഷ്യം പിന്തുര്‍ന്ന പഞ്ചാബിന് ഏഴ് വിക്കറ്റ് നഷ്ടത്തില്‍ 202 റണ്‍സെടുക്കാനേ സാധിച്ചുള്ളൂ. ടോസ് നഷ്ടപ്പെട്ട് ബാറ്റിംഗിനെത്തിയ ആതിഥേയരെ 63 റണ്‍സടിച്ച ഹെന്‍ട്രിച്ച് ക്ലാസനും 55 റണ്‍സടിച്ച ഇഷാന്‍ കിഷനും ചേര്‍ന്ന് കൂറ്റന്‍ സ്‌കോറിലേക്ക് നയിച്ചു. മറുപടി ബാറ്റിംഗില്‍ കൂപ്പര്‍ കൊണോലി 59 പന്തില്‍ 107 റണ്‍സ് നേടിയെങ്കിലും ടീമിനെ വിജയത്തിലേക് നയിക്കാന്‍ സാധിച്ചില്ല. ഈ ജയത്തോടെ 11 മത്സരങ്ങല്‍ 14 പോയിന്റുമായി ഹൈദരാബാദ് ഒന്നാമതെത്തി. പഞ്ചാബിന് 10 മത്സരങ്ങളില്‍ 13 പോയിന്റാണുള്ളത്.

🔹ബേസില്‍ ജോസഫ്, ടൊവിനോ തോമസ്, വിനീത് ശ്രീനിവാസന്‍ എന്നിവര്‍ കേന്ദ്ര കഥാപാത്രങ്ങളായി എത്തുന്ന മള്‍ട്ടിസ്റ്റാര്‍ ചിത്രം ‘അതിരടി’യിലെ പുതിയ ഗാനം പുറത്ത്. വിഷ്ണു വിജയ് സംഗീതം നല്‍കിയ ഗാനം രചിച്ചത് സുഹൈല്‍ കോയ, അറിവ് എന്നിവര്‍ ചേര്‍ന്നാണ്. ‘പട്ടി ഷോ’ എന്ന വരികളോടെ ശ്രദ്ധ നേടുന്ന ഗാനം ആലപിച്ചത് ഡബ്സി, അറിവ്, സുഹൈല്‍ കോയ എന്നിവര്‍ ചേര്‍ന്നാണ്. ഗാനത്തിന്റെ ലിറിക് വീഡിയോ ആണ് പുറത്തു വിട്ടിരിക്കുന്നത്. ചിത്രം മേയ് 14-നാണ് ആഗോള റിലീസായി തിയേറ്ററുകളിലെത്തുക. സാംകുട്ടി എന്ന കഥാപാത്രമായാണ് ബേസില്‍ ജോസഫ് ചിത്രത്തിലെത്തുന്നത്. റിയ ഷിബു, സരിന്‍ ഷിഹാബ് എന്നിവരാണ് ചിത്രത്തിലെ പ്രധാന സ്ത്രീ കഥാപാത്രങ്ങളെ അവതരിപ്പിക്കുന്നത്. മിന്നല്‍ മുരളിക്ക് ശേഷം ടൊവിനോ തോമസ്, ബേസില്‍ ജോസഫ്, സമീര്‍ താഹിര്‍, അരുണ്‍ അനിരുദ്ധന്‍ എന്നിവര്‍ വീണ്ടും ഒന്നിക്കുന്ന ചിത്രം എന്ന പ്രത്യേകതയും ഇതിനുണ്ട്. തമിഴ്, തെലുങ്കു, കന്നഡ ഭാഷകളിലും ചിത്രം പ്രദര്‍ശനത്തിനെത്തും.

🔹സൂര്യ നായകനായി ഇനി വരാനിരിക്കുന്ന ‘കറുപ്പ്’ ചിത്രത്തിന്റെ പുതിയൊരു പോസ്റ്റര്‍ പുറത്തിറക്കി. ആര്‍ ജെ ബാലാജിയാണ് ചിത്രം സംവിധാനം ചെയ്യുന്നത്. മെയ് 14-ന് ലോകമെമ്പാടുമുള്ള തിയേറ്ററുകളില്‍ എത്തും. കറുപ്പ് ഒരു മാസ് കൊമേഴ്സ്യല്‍ എന്റര്ടെയ്നര് ആയിരിക്കും. നെറ്റ്ഫ്ലിക്സിനാണ് കറുപ്പിന്റെ ഒടിടി റൈറ്റ്സ്. സീ തമിഴിനാണ് സാറ്റലൈറ്റ് റൈറ്റ്സ്. രണ്ട് പതിറ്റാണ്ടുകള്‍ക്ക് ശേഷം സൂര്യയും തൃഷ കൃഷ്ണനും വീണ്ടും ഒന്നിക്കുന്നതും ഈ ചിത്രത്തിന്റെ പ്രത്യേകതയാണ്. സൂര്യയെയും തൃഷയെയും അവരുടെ മുന്‍ സംരംഭങ്ങളില്‍ നിന്ന് വ്യത്യസ്തമായ ഒരു മേക്കോവറില്‍ കറുപ്പ് അവതരിപ്പിക്കും. ഇന്ദ്രന്‍സ്, നാട്ടി, സ്വാസിക, അനഘ മായ രവി, ശിവദ, സുപ്രീത് റെഡ്ഡി തുടങ്ങി മികച്ച താര നിരയാണ് കറുപ്പിലുള്ളത്. സായ് അഭ്യാങ്കറാണ് കറുപ്പിനായി സംഗീതം ഒരുക്കുന്നത്. മൂന്ന് സ്റ്റണ്ട് കോര്‍ഡിനേറ്റര്‍മാരായ അന്‍ബറിവ്, വിക്രം മോര്‍ ജോഡികളാണ് കറുപ്പിലെ ഉയര്‍ന്ന നിലവാരമുള്ള ആക്ഷന്‍ സീക്വന്‍സുകള്‍ നിര്‍വഹിച്ചിരിക്കുന്നത്.

💦 ഗുരുജിയുടെ വാക്കുകൾ

ചില മനുഷ്യരൊക്കെ നമ്മളൊന്നു വിളിച്ചാൽ ഉടനെ ഫോണെടുക്കും …
അല്ലെങ്കിൽ ഒരു നിമിഷത്തിനകം അവർ തിരികെ വിളിക്കും ..
അവർക്കൊരു സന്ദേശമയച്ചാൽ നൊടിയിടയിൽ മറുപടി തരും ..
നമ്മൾ കരുതും അവർക്ക് തിരക്കില്ലാത്തതു കൊണ്ടാണ് അങ്ങനെ ചെയ്യുന്നതെന്ന് !!
അതുകൊണ്ട് നമ്മൾ അവരെ വിലവയ്ക്കില്ല !!
പക്ഷേ,എല്ലായ്പ്പോഴും ഒരാൾക്ക് തിരക്കില്ലാതിരിക്കില്ലല്ലോ. തിരക്കില്ലഞ്ഞിട്ടോ, തിരക്കിലാണെന്ന് കളവുപറയാൻ അവർക്കറിയാഞ്ഞിട്ടോ അല്ല,അവർ നമുക്കു നൽകുന്ന പരിഗണനയാണത് …!! അങ്ങനെയുള്ള മനുഷ്യരെ തിരിച്ചറിയാൻ മറക്കും നമ്മൾ ..ഏതു തിരക്കിനിടയിലും ഒരു തിരക്കുമില്ലെടോ എന്ന് സ്നേഹത്തോടെ കളവു പറഞ്ഞ് നമുക്കുവേണ്ടി കാത്തുനിൽക്കും ആ മനുഷ്യർ നമ്മുടെ തിരക്കിനിടയിൽ നമ്മൾ കാണാൻ മറന്നുപോയ ചില പാവം മനുഷ്യർ !!
നമ്മൾ അവരെ അവഗണിച്ചിട്ടും ഒരു പരാതിയും പറയാതെ നമുക്കുവേണ്ടി മാത്രം
എല്ലാ തിരക്കുകളും മാറ്റിവയ്ക്കുന്ന ചിലർ !!
അവരെ ആദ്യമേ തിരിച്ചറിയാൻ
നമ്മൾ എപ്പോഴും മറന്നുപോകും !!
അവിടെയാണ് നമ്മൾ പരാജയപ്പെടുന്നതും !!

തയ്യാറാക്കിയത്: കപിൽ ശങ്കർ

17 Likes

📱വാർത്തകൾ ഒറ്റനോട്ടത്തിൽ📱 – 2026 | മെയ് 07 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

യുഎസ്-ഇറാൻ യുദ്ധം അവസാനിക്കുന്നു: എണ്ണവിലയിൽ വൻ ഇടിവ്, ഓഹരി വിപണിയിൽ കുതിപ്പ്

ഇസ്രായേൽ വിരുദ്ധ പ്രതിഷേധങ്ങളെ പിന്തുണച്ച് മേയർ സോഹ്‌റാൻ മംദാനി.

ലോസ് ആഞ്ചലസ് മേയർ സ്ഥാനത്തേക്ക് കാരൻ ബാസിനെ പിന്തുണച്ച് കമല ഹാരിസ്

LEAVE A REPLY Cancel reply

Most Popular

സംസ്ഥാനത്ത് ഇന്നും മഴയ്ക്ക് സാധ്യത; നാല് ജില്ലകളിൽ യെല്ലോ അലർട്ട്.

ഉറങ്ങിക്കിടന്നവരുടെ ദേഹത്തേക്ക് അമിതവേഗത്തിലെത്തിയ കാർ പാഞ്ഞുകയറി; സ്ത്രീകളടക്കം ഏഴുപേർക്ക് പരിക്ക്.

ഓടുന്ന ട്രെയിനുകളില്‍ ഇനി ഈ ശീലങ്ങൾ വേണ്ട; കര്‍ശന നിര്‍ദേശവുമായി റെയില്‍വേ.

Recent Comments

EDITOR PICKS

സംസ്ഥാനത്ത് ഇന്നും മഴയ്ക്ക് സാധ്യത; നാല് ജില്ലകളിൽ യെല്ലോ അലർട്ട്.

ഉറങ്ങിക്കിടന്നവരുടെ ദേഹത്തേക്ക് അമിതവേഗത്തിലെത്തിയ കാർ പാഞ്ഞുകയറി; സ്ത്രീകളടക്കം ഏഴുപേർക്ക് പരിക്ക്.

POPULAR POSTS

കുടുംബതർക്കത്തെത്തുടർന്ന് 52-കാരനെ ഇരുമ്പുവടികൊണ്ട് അടിച്ചുകൊന്നു, മരുമകളുടെ ബന്ധുക്കൾ പിടിയിൽ.

2024-ലിൽ ഇന്ത്യയിലെ കുറ്റകൃത്യങ്ങളിൽ 6 ശതമാനം കുറവുണ്ടായതായി നാഷണൽ ക്രൈം റെക്കോർഡ്‌സ് ബ്യൂറോ റിപ്പോർട്ട് ചെയ്തു

POPULAR CATEGORY

ABOUT US

FOLLOW US