🌹 ചിന്താ പ്രഭാതം 🌹 – 2024 | ഓഗസ്റ്റ് 17 | ശനി ✍ ബേബി മാത്യു അടിമാലി

ഭൂമിയിൽ ജനിച്ച എല്ലാ മനുഷ്യരിലും ശരിയും തെറ്റും ഉണ്ട്. നന്മയും തിന്മയുമുണ്ട്. ആരും പരിപൂർണ്ണരല്ല. ക്ഷമിക്കാനുള്ള മനസ് സ്വന്തമാക്കുന്നവര്‍ ഭാഗ്യവാന്മാരാണ്. ക്ഷമിക്കുവാൻ കഴിവില്ലാത്ത ഒരുവന് സ്നേഹിക്കാനുള്ള കഴിവുമുണ്ടാകില്ല.

ഏറ്റവും തിന്മ നിറഞ്ഞ വ്യക്തിയായാലും അയാളിൽ ചില നന്മകളും ഉണ്ടാകും. അതുപോലെ ഏറ്റവും നന്മനിറഞ്ഞ വ്യക്തികളിലും ചില തിന്മകളും കണ്ടെന്നുവരാം.

സ്വന്തം സ്വഭാവ രീതികളോടൊപ്പം അപരന്റെ നിസ്സഹായതയെയും ബഹുമാനിക്കണം. എതിർക്കാനോ പിടിച്ചുനിൽക്കാനോ ശേഷിയില്ലാത്തവരുടെ സഹനം ഏത് ഇടത്തെയും അരക്ഷിതവും ഭയാനകവുമാക്കും.

തെറ്റു ചെയ്യുന്ന മനുഷ്യരെയല്ല എതിർക്കേണ്ടത് തെറ്റിനെയാണ് . തെറ്റിലൂടെ സഞ്ചരിക്കുന്നവർ ആ പാത ഉപേക്ഷിച്ച് ശരിയുടെ പക്ഷം ചേരുമ്പോൾ അവരെ ചേർത്തു പിടിക്കാൻ നമുക്കാവണം. ഒരിക്കൽ ചെയ്ത തെറ്റിന് ജീവിതാന്ത്യം വരെയും ആരേയും ശിക്ഷിക്കരുത്.

തെറ്റു പറ്റുക എന്നത് മനുഷ്യ സഹജവും ക്ഷമിക്കുക എന്നുള്ളത് ദൈവീകവുമാണ്. നാമറിയാതെ ഏതുനിമിഷവും കെട്ടുപോകാവുന്ന ഒരു വിളക്കാണ്‌ നമ്മുടെ ജീവിതം. അതിനാൽ സ്ഥായിയായ വിരോധം ആരോടും വെച്ചുപുലർത്താതിരിക്കുക.

ഒത്തിരി ഇഷ്ടത്തോടെ……🙏

🙏 ശുഭദിനാശംസകൾ 🙏

ബേബി മാത്യു അടിമാലി