📱വാർത്തകൾ ഒറ്റനോട്ടത്തിൽ📱 – 2024 | ജൂൺ 09 | ഞായർ ✍ കപിൽ ശങ്കർ

🔹മൂന്നാം മോദി സര്‍ക്കാരിന്റെ സത്യപ്രതിജ്ഞ ഇന്ന് വൈകിട്ട് 7.15ന് രാഷ്ട്രപതി ഭവനില്‍. പ്രധാനമന്ത്രി നരേന്ദ്ര മോദിക്കൊപ്പം 30ഓളം മന്ത്രിമാരും സത്യപ്രതിജ്ഞ ചെയ്യുമെന്നാണ് സൂചന. ശ്രീലങ്ക, മാലിദ്വീപ്, എന്നിവിടങ്ങളിലെ പ്രസിഡന്റുമാരും ബംഗ്ലാദേശ്, മൗറീഷ്യസ്, നേപ്പാള്‍, ഭൂട്ടാന്‍ എന്നീ രാജ്യങ്ങളിലെ പ്രധാനമന്ത്രിമാരും ചടങ്ങില്‍ അതിഥികളായി പങ്കെടുക്കും. പുതിയ മന്ത്രിസഭയില്‍ ചന്ദ്രബാബു നായിഡുവിന്റെ ടിഡിപിക്ക് നാലും ജെഡിയുവിന് രണ്ടും മന്ത്രി സ്ഥാനങ്ങള്‍ ലഭിക്കുമെന്നാണ് സൂചന.

🔹ഇടുക്കി വാഗമണ്ണില്‍ ഒറ്റമുറി വീട്ടില്‍ കഴിയുന്ന വയോധികയ്ക്ക് അന്‍പതിനായിരം രൂപയുടെ വൈദ്യുതി ബില്‍ ലഭിച്ച സംഭവത്തില്‍ അന്വേഷണം നടത്തുമെന്ന് വൈദ്യുതി വകുപ്പ് മന്ത്രി കെ കൃഷ്ണന്‍കുട്ടി. അന്വേഷണത്തിന് ശേഷം ആവശ്യമെങ്കില്‍ തുടര്‍നടപടി സ്വീകരിക്കുമെന്നും മന്ത്രി വ്യക്തമാക്കി. വാഗമണ്‍ വട്ടപ്പതാല്‍ സ്വദേശി അന്നമ്മയ്ക്കാണ് കെ എസ് ഇ ബി യുടെ ബില്ല് ലഭിച്ചത്. ഭീമമായ ബില്‍ ഒഴിവാക്കാന്‍ പീരുമേട് സെക്ഷന്‍ ചെന്ന് ഓഫീസില്‍ വിശദീകരണം നല്‍കിയെങ്കിലും ഒറ്റമുറി വീട്ടിലെ വൈദ്യുതി ബന്ധം വിശ്ചേദിക്കുയാണ് കെ എസ് ഇ ബി ചെയ്തത്.

🔹വാഹനപരിശോധനക്കിടെ കണ്ണൂരില്‍ എക്സൈസ് ഉദ്യോഗസ്ഥനെ തട്ടിക്കൊണ്ടുപോയി. കണ്ണൂര്‍ കൂട്ടുപുഴ ചെക്പോസ്റ്റില്‍ വെച്ച് കാറിനുള്ളില്‍ കയറി പരിശോധിക്കുമ്പോഴാണ് ഉദ്യോഗസ്ഥനുമായി കാര്‍ കടന്നു കളഞ്ഞത്. മൂന്ന് കിലോമീറ്റര്‍ അപ്പുറത്ത് ഉദ്യോഗസ്ഥനെ ഇറക്കിവിട്ടു. മറ്റൊരു ഉദ്യോഗസ്ഥനെ തളളിയിട്ട ശേഷമാണ് ഇവര്‍ ഉദ്യോഗസ്ഥനെയും കൊണ്ട് പോയത്.മയക്കുമരുന്ന് സംഘത്തിലെ കണ്ണിയായ കാര്‍ ഓടിച്ചിരുന്ന ബേപ്പൂര്‍ സ്വദേശി യാസര്‍ അറഫാത്തിനെ പൊലീസ് കസ്റ്റഡിയിലെടുത്തിട്ടുണ്ട്.

🔹അവയവക്കടത്ത് കേസില്‍ കാണാതായ പാലക്കാട് സ്വദേശി ഷമീറിനെ പൊലീസ് കസ്റ്റഡിയിലെടുത്തു. ഇറാനില്‍ പോയി വൃക്ക നല്‍കിയ ശേഷം ഇയാളെ കാണാതായിരുന്നു. അവയവ വില്‍പന നടത്തിയശേഷം ഇയാളുടെ ആരോഗ്യ സ്ഥിതി മോശമായിരുന്നു. ഷമീറിനെ പൊലീസ് ചോദ്യം ചെയ്യുകയാണ്. ഇയാളെ പ്രതിയാക്കണോ സാക്ഷിയാക്കണോ എന്നുള്ളത് അന്വേഷണ സംഘം പിന്നീട് തീരുമാനിക്കും.

🔹ലോട്ടറി വില്പനക്ക് അനുമതി കൊടുത്താല്‍ ലാഭവിഹിതത്തിന്റെ പകുതി നല്‍കാമെന്ന സിക്കിം സര്‍ക്കാറിന്റെ വാഗ്ദാനം തള്ളി കേരളം. ലോട്ടറി തട്ടിപ്പിനെതിരെ സിബിഐ അന്വേഷണം നടക്കുന്നതിനാല്‍ അനുമതി നല്‍കാനാകില്ലെന്ന് കേരളം കേന്ദ്ര ആഭ്യന്തര മന്ത്രാലയത്തെ അറിയിച്ചു.

🔹തിരുവനന്തപുരത്തെ കെഎസ്ഇബി ചെയര്‍മാന്റെ ഓഫീസിലെ പ്യൂണ്‍ ആള്‍മാറാട്ടം നടത്തി പണം തട്ടിയതായി പരാതി. വിജിലന്‍സ് റിപ്പോര്‍ട്ടിന്റെ അടിസ്ഥാനത്തില്‍ പ്യൂണ്‍ വിപി വിനീത് കൃഷ്ണനെ കെഎസ്ഇബി സര്‍വീസില്‍ നിന്ന് സസ്പെന്‍ഡ് ചെയ്തു. ഇയാള്‍ക്കെതിരെ വട്ടിയൂര്‍ക്കാവ് പൊലീസ് കേസെടുത്തു, അറസ്റ്റ് രേഖപ്പെടുത്തിയ ശേഷം പ്രതിയെ ജാമ്യത്തില്‍ വിട്ടയച്ചു.

🔹തിരുവനന്തപുരം മെഡിക്കല്‍ കോളേജ് ആശുപത്രിയില്‍ സെക്യൂരിറ്റി ജീവനക്കാര്‍ രോഗിയെ മര്‍ദിച്ച സംഭവത്തില്‍ സര്‍ജന്റിനെ അന്വേഷണ വിധേയമായി സസ്‌പെന്‍ഡ് ചെയ്തു. സംഭവത്തില്‍ അന്വേഷിച്ച് നടപടിയെടുക്കാന്‍ ആരോഗ്യ വകുപ്പ് മന്ത്രി വീണാ ജോര്‍ജ്, മെഡിക്കല്‍ കോളേജ് പ്രിന്‍സിപ്പാളിന് നിര്‍ദേശം നല്‍കിയിരുന്നു.

🔹മലപ്പുറം: തിരൂരങ്ങാടി എക്സൈസ് സർക്കിൾ ഓഫിസിൽ നിന്നും കൈവിലങ്ങുമായി രക്ഷപ്പെട്ട കഞ്ചാവ് കേസ് പ്രതി എം.ഡി.എം.എയുമായി എക്സൈസിന്റെ പിടിയിലായി. പള്ളിക്കൽ ജവാൻസ് നഗർ പുൽപറമ്പ് കളത്തൊടി വീട്ടിൽ വാഹിദ് (29) ആണ് വീണ്ടും പിടിയിലായത്. മെയ് 22ന് 1.120 കി ലോഗ്രാം കഞ്ചാവ് പിടിച്ചെടുത്ത കേസിൽ അറസ്റ്റ് ചെയ്യപ്പെട്ട പ്രതി നടപടികൾക്കിടെ എക്സൈസ് ഉദ്യോഗസ്ഥരെ തള്ളി മാറ്റിയാണ് കൈവിലങ്ങുമായി രക്ഷപ്പെട്ടത്.
നിലവിൽ 15 ഗ്രാം എം.ഡി.എം.എയുമായിട്ടാണ് തിരൂരങ്ങാടി എക്സൈസ് സർക്കിൾ ഇൻസ്പെക്ടർ മധുസൂദനൻ പിള്ളയും സംഘവും അറസ്റ്റ് ചെയ്തത്. പരപ്പനങ്ങാടി ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ മുഹമ്മദ് വാഹിദിനെ റിമാൻഡ് ചെയ്തു. ഈ കേസിൽ കൂടുതൽ പ്രതികൾ ഉണ്ടെന്നും വരും ദിവസങ്ങളിൽ പ്രതിയുടെ കൂട്ടാളികൾക്കെതിരേ കർശന നിയമനടപടി സ്വീകരിക്കുമെന്നും എക്സൈസ് സർക്കിൾ ഇൻസ്പെക്ടർ മധുസൂദനൻ പിള്ള അറിയിച്ചു. അസിസ്റ്റൻറ് എക്സൈസ് ഇൻസ്പെക്ടർമാരായ സുർജിത്ത്, പ്രഗേഷ്, പ്രവന്റീവ് ഓഫിസർമാരായ ദിലീപ്‌കുമാർ, രജീഷ്, സിവിൽ എക്സൈസ് ഓഫിസർ ശിഹാബുദ്ദീൻ, വനിതാ സിവിൽ ഓഫിസർ സിന്ധു പട്ടേരി വീട്ടിൽ, എക്സൈസ് ഡ്രൈവർ അഭിലാഷ് എന്നിവരാണ് പരിശോധനാ സംഘത്തിൽ ഉണ്ടായിരുന്നത്.

🔹കോഴിക്കോട് വടകര ഇരിങ്ങല്‍ തെക്കേവളപ്പില്‍ ശൈലേഷ് (40) ബഹ്‌റൈനില്‍ അന്തരിച്ചു. കഴിഞ്ഞ 12 വര്‍ഷമായി ബഹ്‌റൈനില്‍ ജോലിചെയ്തുവരികയായിരുന്നു. നാണു-രാധ ദമ്പതികളുടെ മകനാണ്. അവധിക്കുശേഷം വ്യാഴാഴ്ചയാണ് നാട്ടില്‍നിന്ന് മടങ്ങിയെത്തിയത്. സല്‍മാനിയ ആശുപത്രി മോര്‍ച്ചറിയിലുള്ള മൃതദേഹം നാട്ടിലെത്തിക്കുന്നതിനുള്ള നടപടിക്രമങ്ങള്‍ ബി.കെ.എസ്.എഫിന്റെ നേതൃത്വത്തില്‍ നടന്നുവരുന്നു.

🔹അങ്കമാലി ടൗണിൽ ഓടിക്കൊണ്ടിരുന്ന കാറിന് തീപിടിച്ചു. ഇന്ന് പുലർച്ചെ അഞ്ചരയോടെയാണ് സംഭവം. അപകടത്തിൽ ആളപായമില്ല. ക്യാബിനിൽ നിന്ന് പുക ഉയരുന്നത് കണ്ട് യാത്രക്കാർ ഇറങ്ങി ഓടുകയായിരുന്നു. 3 പേരാണ് കാറിലുണ്ടായിരുന്നത്. അങ്കമാലി ഫയർഫോഴ്സ് സ്ഥലത്തെത്തി തീയണച്ചു.

🔹കങ്കണ റണാവത്തിനെ തല്ലിയ സിഐഎസ്എഫ് കോണ്‍സ്റ്റബിളിന് പരിതോഷികം പ്രഖ്യാപിച്ച് തമിഴ്‌നാട്ടിലെ സംഘടന. പെരിയാറിന്റെ ചിത്രം പതിപ്പിച്ച സ്വര്‍ണമോതിരം നല്‍കുമെന്നാണ് ദ്രാവിഡ സംഘടനയായ ടിഡിപികെ പ്രഖ്യാപനം നടത്തിയത്. കങ്കണയെ തല്ലിയ സിഐഎസ്എഫ് വനിതാ കോണ്‍സ്റ്റബിള്‍ കുല്‍വീന്ദര്‍ കൗറിന്റെ വീട്ടിലേക്ക് സമ്മാനം അയച്ചുകൊടുക്കുമെന്നാണ് പ്രഖ്യാപനം.

🔹കോഴിക്കോട്: കൊടുംകാടിന് നടുവില്‍ കെ.എസ്.ആര്‍.ടി.സി. ബസ് ‘തടഞ്ഞ്’ കടുവ. ശനിയാഴ്ച രാത്രി ബന്ദിപ്പുരിലാണ് സംഭവം. ബെംഗളൂരുവില്‍നിന്ന് രാത്രി എട്ടുമണിക്ക് കോഴിക്കോട്ടേക്ക് പുറപ്പെട്ട സ്വിഫ്റ്റ് സൂപ്പര്‍ ഫാസ്റ്റ് ബസ്സിലെ യാത്രക്കാര്‍ക്കാണ് അപ്രതീക്ഷിതമായി അപൂര്‍വ ദൃശ്യത്തിന് സാക്ഷിയാകാന്‍ സാധിച്ചത്. ബസ്സിലുണ്ടായിരുന്ന ഒരാള്‍ പകര്‍ത്തിയ കടുവയുടെ ദൃശ്യം പുറത്തുവന്നിട്ടുണ്ട്. കാടിന് നടുവിലൂടെയുള്ള റോഡിന്റെ നടുവില്‍ കിടന്ന് ഇരയെ ഭക്ഷിക്കുകയായിരുന്ന കടുവയുടെ സമീപത്തേക്ക് വേഗത കുറച്ചാണ് ബസ് എത്തുന്നത്. കടുവ കിടക്കുന്നതിന് തൊട്ടുമുമ്പായി ഒരു സ്പീഡ് ബ്രേക്കര്‍ ഉണ്ടായിരുന്നതിനാല്‍ യാത്രക്കാര്‍ക്ക് കടുവയെ വ്യക്തമായി ദീര്‍ഘസമയം കാണാന്‍ കഴിഞ്ഞു.
സ്വിഫ്റ്റ് ബസ് തനിക്ക് പറ്റിയ ‘ഇര’യല്ല എന്ന് തോന്നിയതുകൊണ്ടാകാം ബസ് വരുന്നതുകണ്ട് കടുവ റോഡില്‍നിന്ന് എഴുന്നേറ്റ് വശത്തേക്ക് മാറിക്കിടന്ന് ബസ്സിന്‍റെ മാർഗതടസ്സം നീക്കി. വളരെ പതുക്കെയാണ് ബസ് കടുവയെ കടന്നുപോയത്.
സ്വസ്ഥമായി കിടന്ന് അത്താഴം കഴിക്കുകയായിരുന്ന തന്നെ ‘ഡിസ്റ്റര്‍ബ്’ ചെയ്തതിന്റെ പരിഭവമൊന്നും കടുവ കാണിച്ചില്ല. റോഡിന്റെ വശത്തേക്ക് മാറിക്കിടന്ന് കടുവ തന്റെ ഭക്ഷണത്തില്‍ ശ്രദ്ധ കേന്ദ്രീകരിച്ചു. ഇതിനിടെ ബസ്സിലെ യാത്രക്കാര്‍ പരിചയക്കാരനോടെന്നപോലെ ‘ഹലോ’ എന്നെല്ലാം വിളിച്ച് കടുവയുടെ ശ്രദ്ധ ക്ഷണിക്കാന്‍ ശ്രമിക്കുന്നതും വീഡിയോയില്‍ കേള്‍ക്കാം. കെ.എസ്.ആര്‍.ടി.സി. കോഴിക്കോട് എന്ന ഫേസ്ബുക്ക് പേജാണ് കടുവയുടെ ദൃശ്യം പുറത്തുവിട്ടത്.

🔹ടി20 ലോകകപ്പില്‍ ഇന്നലെ 4 കളികള്‍. ആദ്യ മത്സരത്തില്‍ അഫ്ഗാനിസ്ഥാന്‍ ന്യൂസിലാണ്ടിനെ 84 റണ്‍സിന് അട്ടിമറിച്ചു. ആദ്യം ബാറ്റ് ചെയ്ത അഫ്ഗാനിസ്ഥാന്‍ 6 വിക്കറ്റ് നഷ്ടത്തില്‍ 159 റണ്‍സെടുത്തു. മറുപടി ബാറ്റിംഗിനിറങ്ങിയ ന്യൂസിലാണ്ട് 15.2 ഓവറില്‍ 75 റണ്‍സിന് എല്ലാവരും പുറത്തായി. ടി20 ലോകകപ്പിലെ രണ്ടാമത്തെ മത്സരത്തില്‍ ശ്രീലങ്കയെ ബംഗ്ലാദേശ് 2 വിക്കറ്റിന് തകര്‍ത്തു. ആദ്യം ബാറ്റ് ചെയ്ത ശ്രീലങ്ക 9 വിക്കറ്റ് നഷ്ടത്തില്‍ 124 റണ്‍സെടുത്തു. മറുപടി ബാറ്റിംഗിനിറങ്ങിയ ബംഗ്ലാദേശ് ഒരോവവര്‍ ബാക്കി നില്‍ക്കേ 8 വിക്കറ്റ് നഷ്ടത്തില്‍ ലക്ഷ്യത്തിലെത്തി.
ടി20 ലോകകപ്പിലെ മൂന്നാമത്തെ മത്സരത്തില്‍ നെതര്‍ലണ്ട്സിനെതിരെ ദക്ഷിണാഫ്രിക്കക്ക് 4 വിക്കറ്റിന്റെ വിജയം. ആദ്യം ബാറ്റ് ചെയ്ത നെതര്‍ലണ്ട്സിന് 9 വിക്കറ്റ് നഷ്ടത്തില്‍ 103 റണ്‍സെടുക്കാനേ സാധിച്ചുള്ളു. മറുപടി ബാറ്റിംഗിനിറങ്ങിയ ദക്ഷിണാഫ്രിക്ക 7 ബോളുകള്‍ ശേഷിക്കേ ആറ് വിക്കറ്റ് നഷ്ടത്തില്‍ ലക്ഷ്യത്തിലെത്തി. ടി20 ലോകകപ്പിലെ നാലാമത്തെ മത്സരത്തില്‍ ഓസ്ട്രേലിയക്ക് ഇംഗ്ലണ്ടിനെതിരെ 36 റണ്‍സിന്റെ വിജയം. ആദ്യം ബാറ്റ് ചെയ്ത ഓസ്ട്രേലിയ 7 വിക്കറ്റ് നഷ്ടത്തില്‍ 201 റണ്‍സെടുത്തു. മറുപടി ബാറ്റിംഗിനിറങ്ങിയ ഇംഗ്ലണ്ടിന് 6 വിക്കറ്റ് നഷ്ടത്തില്‍ 165 റണ്‍സെടുക്കാനേ സാധിച്ചുള്ളൂ. ടി20 ലോകകപ്പില്‍ ഇന്ന് ഇന്ത്യാ – പാക് മത്സരം. വൈകീട്ട് 8 മണിക്കാണ് മത്സരം ആരംഭിക്കുക.

🔹കുഞ്ചാക്കോ ബോബന്‍, സുരാജ് വെഞ്ഞാറമൂട് എന്നിവരെ പ്രധാന കഥാപാത്രങ്ങളാക്കി ജയ് കെ സംവിധാനം ചെയ്യുന്ന ‘ഗ്ര്ര്‍ര്‍’ എന്ന ചിത്രത്തിന്റെ ട്രെയ്‌ലര്‍ പുറത്ത്. ജൂണ്‍ 14 നാണ് ചിത്രം തിയേറ്ററുകളില്‍ എത്തുന്നത്. തിരുവനന്തപുരത്തെ ഒരു മൃഗശാലയില്‍ സിംഹത്തിന്റെ കൂട്ടില്‍ ഒരു യുവാവ് കുടുങ്ങുന്നതും അയാളെ രക്ഷിക്കാന്‍ വാച്ച്മാന്‍ ചാടുന്നതും തുടര്‍ന്നുണ്ടാവുന്ന സംഭവവികാസങ്ങളുമാണ് ചിത്രത്തിന്റെ പ്രമേയം. പൃഥ്വിരാജ് നായകനായെത്തിയ ഹൊറര്‍ ചിത്രം ‘എസ്ര’ എന്ന ചിത്രത്തിന്റെ സംവിധായകനാണ് ജയ് കെ. മദ്യപാനിയായ ഒരു യുവാവ് മൃഗശാലയിലെ സിംഹത്തിന് മുന്നില്‍ വീഴുന്നതും സെക്യൂരിറ്റി ഗാര്‍ഡ് കൂടെ ചാടുന്നതും തുടര്‍ന്നുണ്ടാകുന്ന സംഭവ വികാസങ്ങളുമാണ് കോമഡി- എന്റര്‍ടൈന്‍മെന്റ് ഴോണറില്‍ പുറത്തിറങ്ങുന്ന ചിത്രത്തിന്റെ പ്രമേയം. അനഘ എല്‍ കെ, ശ്രുതി രാമചന്ദ്രന്‍, രാജേഷ് മാധവന്‍, ഷോബി തിലകന്‍, ധനേഷ് ആനന്ദ് എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. ആഗസ്റ്റ് സിനിമാസിന്റെ ബാനറില്‍ ഷാജി നടേശന്‍, ആര്യ എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.

തയ്യാറാക്കിയത്:
കപിൽ ശങ്കർ