തിരുവനന്തപുരം: സാമൂഹിക- പാരിസ്ഥിതിക ആഘാതങ്ങള് പഠിക്കാതെയും ഡി.പി.ആര് തയാറാക്കാതെയും നടപ്പാക്കാന് ഉദ്ദേശിക്കുന്ന തീരദേശ ഹൈവെ പദ്ധതിയില് നിന്നും സര്ക്കാര് പിന്മാറണമെന്ന് ആവശ്യപ്പെട്ട് പ്രതിപക്ഷ നേതാവ് വി ഡി സതീശന് മുഖ്യമന്ത്രിക്ക് കത്ത് നല്കി.
വികസന പ്രവര്ത്തനങ്ങള് ഒഴിവാക്കാനാകില്ലെന്നതില് തര്ക്കമില്ല. ആവാസ വ്യവസ്ഥ നിലനിര്ത്തിയും ജീവനോപാധികള് സംരക്ഷിച്ചും ജനങ്ങളെ വിശ്വാസത്തിലെടുത്തുമാണ് പദ്ധതികള് നടപ്പാക്കേണ്ടതെന്ന് പ്രതിപക്ഷ നേതാവ് കത്തിൽ ചൂണ്ടിക്കാണിക്കുന്നുണ്ട്.
വികസനത്തെയല്ല, വികസനത്തിന്റെ പേരില് പാവങ്ങളെ ചൂഷണം ചെയ്ത് ഉന്മൂലനം ചെയ്യാനുള്ള ഭരണകൂടത്തിന്റെ നടപടികളെയാണ് യുഡിഎഫ് എതിര്ക്കുന്നതെന്നും പ്രതിപക്ഷ നേതാവ് കത്തിൽ വ്യക്തമാക്കി. കടലില് നിന്നും 50 മീറ്റര് മുതല് 15 കിലോ മീറ്റര് വരെ ദൂരത്തില് കടന്നു പോകുന്ന എന് എച്ച് 66 എന്നത് തീരദേശ ഹൈവേ തന്നെയാണ്. ഈ പശ്ചാത്തലത്തില് മറ്റൊരു തീരദേശ ഹൈവേയുടെ ആവശ്യകത മനസിലാകുന്നില്ലെന്ന് കത്തില് ചൂണ്ടിക്കാട്ടി.
