🌹 “ഇന്നത്തെ ചിന്താവിഷയം” 🌹 – 2024 | ജൂലൈ 18 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

ഒന്നും അവസാനമല്ല
———————————

കപ്പലപകടത്തിൽ നിന്ന് കഷ്ടിച്ചാണ് അയാൾ രക്ഷപെട്ടത്. ഒരു തടിക്കഷണത്തിൽ പിടിച്ചു കിടന്ന അയാൾ ജനവാസമില്ലാത്ത ഒരു ദ്വീപിലെത്തി. ഒരു കുടിൽ പണിത് അയാൾ അതിൽ താമസമായി. ദിവസവും പഴങ്ങളും വെള്ളവും തേടിപ്പിടിച്ചാണയാൾ ജീവിച്ചത്. ഒരു ദിവസം തിരിച്ചു വന്നപ്പോൾ അയാൾ കണ്ടത്, തൻ്റെ കുടിൽ കത്തിയെരിയുന്നതാണ്. നിരാശനായി പൊട്ടിക്കരഞ്ഞുകൊണ്ട് , അയാൾ നിലത്തിരുന്നു. ഏറെ നേരത്തിനു ശേഷം ആരോ തോളിൽ സ്പർശിച്ചപ്പോൾ, അയാൾ തിരിഞ്ഞു നോക്കി. ഒരു പറ്റം മനുഷ്യർ. “ഞാനിവിടെ ഉണ്ടെന്ന് എങ്ങനെ മനസ്സിലായി”, അയാൾ ചോദിച്ചു. “ഞങ്ങൾ ഈ ദ്വീപിനരികിലൂടെ സഞ്ചരിക്കുമ്പോൾ, ആകാശത്തേക്കു തീയും പുകയുമുയരുന്നതു കണ്ടു. അത് ആരുടേയോ സഹായാഭ്യർത്ഥന ആണെന്നന്നു മനസ്സിലായി”, അപരിചിതർ പറഞ്ഞു.

തീ എല്ലാം തീർത്തുകളയുമെന്നു കരുതേണ്ട. ചാരത്തിൽ നിന്നാണ് ഫിനിക്സ് പക്ഷി രൂപം കൊള്ളുന്നതെന്ന സാങ്കൽപിക കഥ ഉള്ളതുകൊണ്ടു മാത്രമല്ല. ചാരത്തിനള്ളിൽ ഒളിപ്പിച്ചു വെച്ച തീയിൽ നിന്നാണ് ഓരോ ദിവിസവും അടുക്കളയ്ക്കു ജീവൻ വയ്ക്കുന്നത് എന്ന യാഥാർത്ഥ്യം ഉള്ളതു കൊണ്ടും. കത്തി തീരുന്നതു മുഴുവൻ സ്വപ്നങ്ങളാണെന്നു കരുതുകയും വേണ്ട. അപ്രതീക്ഷിതമായിട്ടാകാം പ്രതീക്ഷയുടെ പുതു മുകുളങ്ങൾ വിരിയുന്നത്. ഉള്ളതു കത്തുമ്പോഴും ഉളളം ജ്വലിക്കണം. ഒന്നും അവസാനമല്ലെന്നു കരുതാനാകയും വേണം.

ആരുമില്ലാത്തവരായി ആരുമുണ്ടാകില്ല. കൂടപ്പിറപ്പുകളെയും കൂടെയുള്ളവരെയും കാണാതാകുമ്പോൾ ഒറ്റപ്പെടുന്നതല്ല ജീവിതം. ഏത് ആപത്ഘട്ടത്തിലും സഹായിക്കുന്ന ചില അദൃശ്യകരങ്ങൾ എപ്പോഴുമുണ്ടാകും കൂടെ; നമ്മൾ പോലും അറിയാതെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര