🌹 “ഇന്നത്തെ ചിന്താവിഷയം” 🌹 – 2024 | ജൂലൈ 01 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

ലക്ഷ്യം പോലെ പ്രധാനമാണ് മാർഗവും
————————————————————

ഒരു ക്ലാസ്സിൽ മതബോധനം നൽകിയിരുന്ന അദ്ധ്യാപകൻ ചോദിച്ചു: “ഒരു രൂപയ്ക്കു വേണ്ടി നിങ്ങളിലാരെങ്കിലും കള്ളം പറയുമോ?” കുട്ടികളെല്ലാം ഏക സ്വരത്തിൽ പറഞ്ഞു: “ഇല്ല സാർ”. ” പത്തു രൂപ കിട്ടാൻ ആരെങ്കിലും കള്ളം പറയുമോ?”, അധ്യാപകൻ വീണ്ടും ചോദിച്ചു.. ഇല്ല എന്നു തന്നെ മറുപടി വന്നു. “നൂറു രൂപ കിട്ടാൻ കള്ളം പറയുമോ?” ഇല്ല എന്നു കുട്ടികൾ പറഞ്ഞെങ്കിലും, ശബ്ദത്തിൻ്റെ ശക്തി കുറഞ്ഞിരുന്നു. “ആയിരം രൂപയ്ക്കു വേണ്ടി കള്ളം പറയുമോ?” എന്ന ചോദ്യത്തിന് നിശബ്ദതയായിരുന്നു മറുപടി.

ഒരാൾ സമ്പാദിക്കുന്ന പണം പെട്ടെന്നു തീർന്നുവെന്നു വരാം. പക്ഷെ, അതു സമ്പാദിച്ച മാർഗവും അതിനവലംബിച്ച രീതിയും എന്നും നിലനിൽക്കും. മാർഗം മാത്രമായിരിക്കേണ്ട പലതും ലക്ഷ്യമായി മാറുമ്പോൾ, മാർഗം അവിശുദ്ധമാകും. പണം ഒരു മാർഗം മാത്രമാണ്. ലക്ഷ്യമല്ല. എന്തിനു സമ്പാദിക്കുന്നു എന്ന ചോദ്യത്തിനുള്ള മറുപടിയിൽ നന്മയുടെ അംശമുണ്ടെങ്കിൽ, സമ്പാദ്യത്തിനു നേരുണ്ടാകും. ലക്ഷ്യം മാർഗത്തേയും, മാർഗം ലക്ഷ്യത്തേയും സാധൂകരിക്കുന്നതായിരിക്കണം. അപ്പോൾ,ലക്ഷ്യം അവസാനിച്ചാലും മാർഗം അവശേഷിക്കും.

മൂല്യങ്ങൾക്കെങ്ങനെയാണ് വില നിശ്ചയിക്കുക. സത്യവും, സ്നേഹവും, സാഹോദര്യവും ഏതളവുകോലു കൊണ്ടാണ് അളക്കാനാകുക? വില വിവരപ്പട്ടികയിൽ സ്ഥാനം കണ്ടെത്താനാവാത്തതെല്ലാം വിലയില്ലാത്തതല്ല. ധാർമിക പാഠങ്ങൾ പരീക്ഷയെഴുതി പാസ്സാകേണ്ടതല്ല; ജീവിതത്തിൽ പരീക്ഷിച്ചറിയേണ്ടവയാണ്. തലച്ചോറിനു വിലയിട്ടാലും, മനസ്സാക്ഷിക്കു വിലയിടാതിരിക്കാൻ നാം പഠിക്കണം. മൂല്യങ്ങൾക്ക് അതിൽ തന്നെ വിലയുണ്ട്. ഉപയോഗിക്കുന്ന ആളുകൾക്കനുസരിച്ച് അതിൻ്റെ വില മാറുകയില്ല. എന്നാൽ, ഉപയോഗിക്കുന്നവൻ്റെ വില കൂടുകയും ചെയ്യും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര