👬👫കുട്ടീസ് കോർണർ 👬👫 (എഴുപത്തിയഞ്ചാം വാരം) ✍അവതരണം: സൈമ ശങ്കർ, മൈസൂർ

ഹായ് കുട്ടീസ്!!
ഈ ആഴ്ച നമുക്ക് A) തീപ്പെട്ടി ചിത്രം കണ്ടൊരു വിശദീകരണം, B) പദ ലളിതം (വാക്കുകളെ കുറിച്ചൊരു വിശദീകരണം), C) സ്ഥലനാമ കഥകൾ പിന്നെ കുറച്ചു D) കടംകഥകളും, കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ കുട്ടീസ് ഒഴിവു സമയങ്ങളിൽ അവ വരച്ചു നോക്കുണ്ടല്ലോ… അല്ലെ .

എന്ന് സ്വന്തം
ശങ്കരിയാന്റി.

A) തീപ്പെട്ടി ചിത്രം (20)

ഹനുമാൻ

ഹനുമാൻ ചിത്രമുള്ള തീപ്പെട്ടികൾ ചേർക്കുന്നു.

ഹനുമാൻ അല്ലെങ്കിൽ ആഞ്ജനേയൻ, രാമായണത്തിലെ പ്രധാന കഥാപാത്രമായ ഒരു വാനരൻ ആണ് ഹനുമാൻ. ഹൈന്ദവ വിശ്വാസമനുസരിച്ച് സപ്തചിരംജീവികളിൽ (മരണമില്ലാത്തവർ) ഒരാളുമാണ് ഹനുമാൻ. പരമശിവൻ തന്നെയാണ് ഹനുമാനായി അവതരിച്ചത് എന്ന് ശിവപുരാണവും ദേവീഭാഗവതവും പറയുന്നു. മഹാബലവാനായ വായൂപുത്രനാണ് ഹനുമാൻ എന്നാണ് വിശ്വാസം. ശ്രീരാമസ്വാമിയുടെ പരമഭക്തനും, ആശ്രിതനുമായ ഹനുമാൻ രാമനാമം ചൊല്ലുന്നിടത്തെല്ലാം പ്രത്യക്ഷനാകുമെന്ന് വിശ്വസിച്ചുവരുന്നു.

രാക്ഷസരാജാവായ രാവണന്റെ തടവിൽ നിന്നും രാമന്റെ ഭാര്യ ആയ സീതയെ കണ്ടെടുക്കാനുള്ള ദൗത്യത്തിൽ രാമനു വേണ്ടി ദൂതു പോയതാണ് ഹനുമാൻ ചെയ്ത കൃത്യങ്ങളിൽ പ്രധാനപ്പെട്ടത്. രാമ-രാവണയുദ്ധത്തിൽ ദാരുണമായി മുറിവേറ്റ രാമന്റെ സഹോദരൻ ലക്ഷ്മണനെ സുഖപ്പെടുത്തുന്നതിനായി ഹനുമാൻ ഹിമാലയത്തിലേക്കു പറക്കുകയും, ഔഷധസസ്യങ്ങൾ നിറഞ്ഞ മരുത്വാമല വഹിച്ചുകൊണ്ട് തിരികെ വരികയും ചെയ്തു. സംശയാതീതമായ ദൃഢഭക്തിയുടെ ഉത്തമോദാഹരണമായി ഹനുമാൻ പരക്കെ അംഗീകരിക്കപ്പെടുന്നു. ഒരു വാനരരൂപത്തിൽ ആരാധിക്കപ്പെടുന്ന ഇദ്ദേഹം, തന്റെ ബുദ്ധിശക്തികൊണ്ടും, രാമനോടുള്ള വിശ്വാസ്യതകൊണ്ടും ഹിന്ദു വിശ്വാസത്തിൽ പ്രധാനപ്പെട്ടൊരു ദേവനായി അറിയപ്പെടുന്നു.

തിരുവനന്തപുരത്തെ പാളയം OTC ഹനുമാൻ ക്ഷേത്രം, മലപ്പുറം ജില്ലയിലെ തിരൂരിനടുത്തുള്ള ആലത്തിയൂർ ഹനുമാൻ ക്ഷേത്രം, പാലക്കാട്‌ കോട്ട ഹനുമാൻ ക്ഷേത്രം, എറണാകുളം ശിവക്ഷേത്രത്തിനടുത്തുള്ള ഹനുമാൻ ക്ഷേത്രം, എറണാകുളം ആലുവയിലുള്ള ദേശം ഹനുമാൻ ക്ഷേത്രം, പത്തനംതിട്ട ജില്ലയിലെ കവിയൂർ മഹാദേവ-ഹനുമാൻക്ഷേത്രം, കൊല്ലം ബീച്ച്റോഡ് കർപ്പൂരപ്പുരയിടം ദ്രൗപദിയമ്മൻ-ഹനുമാൻ ക്ഷേത്രം, തൃശ്ശൂർ ജില്ലയിലെ നാട്ടികയിലുള്ള ഹനുമാൻസ്വാമിക്ഷേത്രം എന്നിവ കേരളത്തിലെ പ്രധാനപെട്ട ഹനുമാൻ ക്ഷേത്രങ്ങൾ ആണ്.

B) പദ ലളിതം

പറ

പഴയകാലത്ത് ഉപയോഗിച്ചിരുന്ന ഒരു അളവ് ഉപകരണമാണ് പറ. നെല്ല് അളക്കുന്നതിന് ഇത് ഉപയോഗിച്ചിരുന്നു.ഈ പദത്തെ കുറിച്ച് ചിന്തിച്ചിട്ടുണ്ടോ.എന്താണ് ഇതിന്റെ അർത്ഥം.പറയുന്നത് പറ എന്നർഥം പറയാം.പറച്ചിൽ ഒരു അളവ് ആണ്. ഇത്ര നെല്ല് എന്ന് പറയുന്നത് അളവ് ആണ്. ഒരു പറ നെല്ല് എന്ന് പറയുമ്പോൾ അത് നെല്ലിന്റെ അളവിനെയാണ് കാണിക്കുന്നത്.അളവ് അളക്കാൻ,പറയാൻ ഉപയോഗിക്കുന്ന ഉപകരണമാണ് പറ.

C) സ്ഥലനാമ കഥകൾ

കുട്ടീസ്
ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ

കലയപുരം

കൊല്ലം ജില്ലയിൽ കൊട്ടാരക്കരയ്ക്ക് അടുത്തു സ്ഥതി ചെയ്യുന്നു.”കലേശ പുര”മാവാം കലയപുരമായത്.കലേശൻ ചന്ദ്രൻ ആണെങ്കിലും കലയെ ചൂടുന്നവൻ എന്ന അർത്ഥത്തിൽ ശിവൻ ആണ്.കലയ പുരത്തു നിന്ന് അന്തമണ്ണിനു പോകുന്ന വഴിയിൽ “തളിക്കലി”ൽ പുരാതനമായ ശിവക്ഷേത്രം ഉണ്ട്.അങ്ങനെ കലേശന്റെ പുരം കലയപുരമായതാവാം.മറ്റൊരാർത്ഥത്തിൽ ചിന്തിച്ചാൽ കലയം=ഉതി(ഒരു വ്യക്ഷം)മരം ധാരാളമുള്ള സ്ഥലമായിരിക്കാം.കലയപൂരം (ഉതിമരക്കൂട്ടം)കലയപുരമായതാവാം.”കലയരാജാക്ക”ന്മാരുടെ ആധിവാസ സ്ഥലമായിരുന്നു കലയ പുരമെന്നൊരഭിപ്രായവും ഉണ്ട്.

D) കടങ്കഥകൾ (31)

1)പലകക്കീഴെ പച്ചയിറച്ചി.

നഖം

2)പാടാനറിയാം പറയാനറിയാം, ചെയ്യാനൊന്നുമറിയില്ല.

റേഡിയോ

3)പാടുന്നുണ്ട് പറക്കുന്നുണ്ട്, കണ്ണിൽക്കാണാനൊക്കില്ല.

കാറ്റ്

4)പാതാളം പോലെ വായ്, കോലുപോലെ നാവ്.

മണി

5)പാൽമൊന്തയിൽ കരിമീൻ.

കണ്ണ്

6)പിടിച്ചാൽ ഒരു പിടി, അരിഞ്ഞാൽ ഒരു മുറം.

ചീര

7)പിടിച്ചാൽ പിടികിട്ടില്ല, വെട്ടിയാൽ വെട്ടേൽക്കില്ല.

വെള്ളം

8)പുക തുപ്പുന്ന പാമ്പ്.

തീവണ്ടി

9)പുറം പരപരാ, അകം മിനുമിനാ.

ചക്ക

10)പൂട്ടാനെളുപ്പം തുറക്കാനാവില്ല.

തൊട്ടാവാടി