📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 31 | ചൊവ്വ ✍ കപിൽ ശങ്കർ

🔹കൊല്ലത്തെ പൊതുയോഗങ്ങളിൽ പ്രതിപക്ഷത്തിനെതിരെയും ബിജെപിക്കെ
തിരെയും അതിരൂക്ഷ വിമർശനം ഉന്നയിച്ച് മുഖ്യമന്ത്രി. അവഗണനയിൽ കേരള വിരുദ്ധ മുന്നണിയായി പ്രതിപക്ഷം മാറിയെന്ന് മുഖ്യമന്ത്രി കുറ്റപ്പെടുത്തി.
പ്രകൃതി ദുരന്തങ്ങളിൽ പോലും കേന്ദ്രം കേരളത്തെ അവഗണിച്ചു. കടുത്ത സാമ്പത്തിക ഉപരോധത്തിന് ഇടയിലും കേരളം വികസനവും ക്ഷേമ പ്രവർത്തനങ്ങളുമായി മുന്നോട്ടുപോയി, എന്നും ഇടതു സർക്കാരിൻറെ ക്രിയാത്മകമായ ഇടപെടലാണ് നാടിൻറെ പുരോഗതിക്ക് വഴിവച്ചതെന്നും മുഖ്യമന്ത്രി യോഗങ്ങളിൽ ചൂണ്ടിക്കാട്ടി. വയനാട് പുനരധിവാസത്തിലും ജനങ്ങളെ കബളിപ്പിച്ച പ്രതിപക്ഷത്തെ പരിഹാസത്തോടെയാണ് മുഖ്യമന്ത്രി നേരിട്ടത്. അവസരവാദങ്ങളുടെ മൂർത്തീകരണങ്ങളെ കൊണ്ടുവന്ന് എൽഡിഎഫിനെ തകർത്തു കളയാം എന്നത് വ്യാമോഹം മാത്രമാണ്. എതിരാളികളുടെ കാര്യം ദയനീയം ജനം തിരിച്ചറിയുക തന്നെ ചെയ്യും എന്നും മുഖ്യമന്ത്രി പറഞ്ഞു.കനത്ത ചൂടിലും ചവറയിൽ കൊല്ലത്തും കൊട്ടാരക്കരയിലും വിപ്ലവ ഭുമിയായ ചടയമംഗലത്തെ കയ്ക്കലിലും പതിനായിരങ്ങൾ ഒഴുകിയെത്തി. ജനങ്ങൾ കലവറ ഇല്ലാത്ത സ്നേഹമാണ് എൽഡിഎഫിന് നൽകുന്നതെന്നും വീണ്ടും അത് തുടരുമെന്നാണ് പ്രതീക്ഷ എന്നും മുഖ്യമന്ത്രി യോഗങ്ങളിൽ പറഞ്ഞു. ഇന്ന് മുഖ്യമന്ത്രി തലസ്ഥാനത്തെ പൊതുയോഗങ്ങളിൽ ആയിരിക്കും പങ്കെടുക്കുക.

🔹മുഖ്യമന്ത്രി പിണറായി വിജയൻ ഇന്ന് തിരുവനന്തപുരം ജില്ലയിലെ തെരഞ്ഞെടുപ്പ് പ്രചാരണത്തിന് നേതൃത്വം നൽകും. രാവിലെ 10 മണിക്ക് വാർത്ത സമ്മേളനം നടത്തും. തുടർന്ന് അരുവിക്കര , വട്ടിയൂർക്കാവ്, നേമം, കഴക്കൂട്ടം മണ്ഡലങ്ങളിലെ തെരഞ്ഞെടുപ്പ് പ്രചാരണ പൊതു പരിപാടി മുഖ്യമന്ത്രി ഉദ്ഘാടനം ചെയ്യും. ഈ മാസം 23ന് പത്തനംതിട്ടയിൽ നിന്നാണ് മുഖ്യമന്ത്രിയുടെ തെരഞ്ഞെടുപ്പ് പ്രചാരണത്തിന് തുടക്കം ആയത്.

🔹 സംസ്ഥാനത്ത് ഹോം വോട്ടിംഗിന് ആരംഭിച്ചു. കഴിഞ്ഞ ദിവസം രാവിലെ എട്ടു മണിക്ക് ആരംഭിച്ച ഹോം വോട്ടിംഗ് രാത്രി എട്ട് വരെ തുടർന്നു. പ്രായമായവർക്കും അവശരായവർക്കും വേണ്ടിയാണ് സംസ്ഥാനത്ത് ഹോം വോട്ടിംഗ് സംവിധാനം ഒരുക്കിയത്. ഇന്നലെ മാത്രം 10,922 പേർ ഹോം വോട്ടിംഗ് ചെയ്തതായി തെരഞ്ഞെടുപ്പ് കമീഷൻ അറിയിച്ചു.നേരത്തെ പേര് നൽകിയവരുടെ വീടുകളിൽ തെരഞ്ഞെടുപ്പ് ഉദ്യോഗസ്ഥർ, സുരക്ഷ ഉദ്യോഗസ്ഥർ, വീഡിയോഗ്രാഫർ, മൈക്രോ ഒബ്സർവർ എന്നിവടരടങ്ങുന്ന സംഘം എത്തിയാണ് ഹോം വോട്ടിംഗ് രേഖപ്പെടുത്തുന്നത്. നാലാം തീയതി വരെയാണ് ഹോം വോട്ടിങ്ങിനുള്ള സൗകര്യം.

🔹കേരളത്തില്‍ വനിതാ മുഖ്യമന്ത്രിയുണ്ടാകണമെന്നും സ്ത്രീകളാണു കേരളത്തിന്‍റെ ഭാവിയെന്നും ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി.ജില്ലയില്‍ യുഡിഎഫിന്‍റെ തെരഞ്ഞെടുപ്പ് പ്രചാരണത്തിനു എത്തിയ രാഹുല്‍ പുതുപ്പള്ളി മണ്ഡലത്തിലെ പാമ്പാടിയിലും കോട്ടയം മണ്ഡലത്തിലെ കഞ്ഞിക്കുഴിയിലും ഏറ്റൂമാനൂര്‍ മണ്ഡലത്തിലെ അതിരമ്പുഴയിലും പ്രസംഗിക്കുകയായിരുന്നു.“കേരളത്തില്‍ ഒരു വനിതാ മുഖ്യമന്ത്രി ചുമതലയേല്‍ക്കുന്നത് താന്‍ സ്വപ്‌നം കാണാറുണ്ട്. ഇക്കാര്യം പറഞ്ഞപ്പോള്‍ പുരുഷ പ്രവര്‍ത്തകര്‍ കാര്യമായി കൈയടിച്ചില്ല. സ്ത്രീകള്‍ ആവേശത്തോടെ സ്വീകരിച്ചു. സ്ത്രീകളാണു കേരളത്തിന്‍റെ ഭാവി’’ അദ്ദേഹം പറഞ്ഞു. യുഡിഎഫ് സര്‍ക്കാര്‍ അധികാരത്തിലെത്തിയാല്‍ ആദ്യ മന്ത്രിസഭാ യോഗം റബറിന് 250 രൂപ അടിസ്ഥാന വിലയാക്കാന്‍ തീരുമാനിക്കും. തുടര്‍ന്ന് അത് 300 രൂപയായി ഉയര്‍ത്തും.യുഎസ് കരാർ പ്രകാരം ഇന്ത്യക്ക് എവിടെ നിന്ന് എണ്ണ മേടിക്കണമെങ്കില്‍ അതിനു പോലും ഡോണള്‍ഡ് ട്രംപിന്‍റെ അനുവാദം വേണമെന്നും രാഹുല്‍ പരിഹസിച്ചു. മോദിയെയും ബിജെപിയെും ആര്‍എസ്എസിനെയും ആക്രമിക്കുന്നതിനാല്‍ എനിക്കെതിരേ 33 കേസുകളാണുള്ളത്. ലോക്സഭാ അംഗത്വം റദ്ദാക്കി, വീട് വരെ ഇല്ലാതാക്കി, 55 മണിക്കൂർ ചോദ്യംചെയ്തു. മോദി കേരളത്തില്‍ എത്തിയപ്പോള്‍ സിപിഎമ്മിന്‍റെ ശബരിമല കൊള്ളയില്‍ മൗനം പാലിക്കുകയാണെന്നും രാഹുൽ പറഞ്ഞു.എഫ്‌സിആര്‍എ ഭേദഗതി ആര്‍എസ്എസിനുവേണ്ടിയാണു നടപ്പാക്കുന്നത്. ആര്‍എസ്എസിനും അദാനിക്കും മാത്രം വിദേശ ഫണ്ട് സ്വീകരിക്കാനാണ് നിയമ ഭേദഗതി. വിദേശപണം ആര്‍എസ്എസിനും നരേന്ദ്ര മോദിക്കും മാത്രം സ്വീകരിക്കാന്‍ ഈ ബില്ല് അനുവാദം നല്‍കുന്നു. അതിനായി പുതിയ നിയമങ്ങള്‍ ഉണ്ടാക്കുന്നുവെന്നും രാഹുല്‍ ആരോപിച്ചു.

🔹വിവാഹ വാഗ്ദാനം നൽകി യുവതിയെ പീഡിപ്പിച്ച കേസിൽ യുവാവ് അറസ്റ്റിൽ. ആലപ്പുഴ പാണാവള്ളി സ്വദേശി വിഷ്ണുവാണ് പിടിയിലായത്. യുവതിയെ പലതവണ പീഡനത്തിന് ഇരയാക്കി എന്നാണ് പരാതി.ഡ്രൈവിംഗ് സ്കൂൾ നടത്തിപ്പുകാരനാണ് പ്രതി. ഇവർ 2023 മുതൽ പരിചയക്കാരായിരുന്നു. വിവാഹ വാഗ്ദാനം നൽകിയാണ് അടുപ്പത്തിലാകുന്നത്. യുവതിയെ പല സ്ഥലങ്ങളിലെത്തിച്ച് പീഡിപ്പിച്ചു എന്നാണ് പരാതിയിൽ പറയുന്നത്. യുവതിയു‌ടെ അശ്ലീല ദൃശ്യങ്ങൾ ഫോണിൽ പകർത്തുകയും ചെയ്തു. ഇവ യുവതിയുടെ ഭർത്താവിന് അയച്ചു കൊടുക്കുമെന്ന് പറഞ്ഞ് ഭീഷണിപ്പെടുത്തുകയും ചെയ്തു. യുവതിയുടെ പരാതിയുടെ അടിസ്ഥാനത്തിൽ ഇയാളെ അറസ്റ്റ് ചെയ്ത് റിമാൻഡ് ചെയ്തിരിക്കുകയാണ്.

🔹കുറ്റിപ്പുറത്ത് ബൈക്കുകൾ കൂട്ടിയിടിച്ചുണ്ടായ അപകടത്തിൽ രണ്ട് യുവാക്കൾ മരിച്ചു. പൊന്നാന്നി സ്വദേശികളായ അസ്ലം (19) , അൻസിഫ് (19) എന്നിവരാണ് മരിച്ചത്. ഒരാൾക്ക് ഗുരുതരമായി പരിക്കേറ്റു.തിങ്കളാഴ്ച രാത്രി ഒമ്പതോടെയാണ് അപകടമുണ്ടായത്. പൊന്നാനി-കുറ്റിപ്പുറം ദേശീയപാതയിലെ സർവീസ് റോഡിൽ വച്ചാണ് ബൈക്കുകൾ കൂട്ടിയിടിച്ചത്. ഇടിയുടെ ആഘാതത്തിൽ ബൈക്കുകൾ രണ്ട് വശങ്ങളിലേയ്ക്ക് തെറിവീഴുകയായിരുന്നു. അപകടത്തിൽ അൻസിൽ എന്ന യുവാവിന് ഗുരുതരമായി പരിക്കേറ്റു. ഇയാൾ ആശുപത്രിയിൽ ചികിത്സയിൽ തുടരുകയാണ്.
മരിച്ച അസ്ലമും അൻസിഫും ഒരു ബൈക്കിലാണ് സഞ്ചരിച്ചിരുന്നത്. ഇവരുടെ മൃതദേഹങ്ങൾ പോസറ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകും.

🔹ചിറക്കൽ പഞ്ചായത്തിലെ രണ്ടാം വാർഡിൽ മന്ന പള്ളിക്ക് സമീപം മരം മുറിക്കുന്നതിനിടെ തൊഴിലാളി അബോധാവസ്ഥയിലായി മരത്തിൽ കുടുങ്ങി. ചിറക്കൽ സ്വദേശിയായ ജോസ് (48) ആണ് അപകടത്തിൽപ്പെട്ടത്. ഉടൻ സ്ഥലത്തെത്തിയ കണ്ണൂർ അഗ്നിരക്ഷാസേന അതിസാഹസികമായി ഇദ്ദേഹത്തെ താഴെയിറക്കി ആശുപത്രിയിലെത്തിച്ചു.തിങ്കളാഴ്ച ഉച്ചയോടെയാണ് സംഭവം. മന്ന പള്ളിക്ക് സമീപമുള്ള മരം മുറിക്കാനായി കയറിയ ജോസ് പാതിവഴിയിൽ വെച്ച് പെട്ടെന്ന് അബോധാവസ്ഥയിലാവുകയായിരുന്നു. മരക്കൊമ്പുകൾക്കിടയിൽ കുടുങ്ങിക്കിടന്ന ഇദ്ദേഹത്തെ കണ്ട് നാട്ടുകാർ ഉടൻ അഗ്നിരക്ഷാസേനയെ വിവരമറിയിച്ചു. കണ്ണൂർ സ്റ്റേഷനിൽ നിന്നും ഗ്രേഡ് അസിസ്റ്റന്‍റ് സ്റ്റേഷൻ ഓഫീസർ വി.കെ. അഫ്സലിന്‍റെ നേതൃത്വത്തിലുള്ള സംഘം സ്ഥലത്തെത്തി. തുടർന്ന് സേഫ്റ്റി ഹാർനെസ്സുകളും റോപ്പ് റെസ്ക്യൂ ഉപകരണങ്ങളും ഉപയോഗിച്ച് ഉദ്യോഗസ്ഥർ മരത്തിൽ കയറി ജോസിനെ സുരക്ഷിതമായി താഴെയിറക്കുകയായിരുന്നു. ഉടൻ തന്നെ ഇദ്ദേഹത്തെ സമീപത്തെ ആശുപത്രിയിൽ പ്രവേശിപ്പിച്ചു.

🔹 വലിയതുറയിൽ യുവാവിനെ സംഘം ചേർന്ന് മർദിച്ച് പണവും ഫോണും കവർന്നു. സംഭവത്തിൽ കേസെടുത്ത പോലീസ് രണ്ട് പേരെ അറസ്റ്റ് ചെയ്തു.ബീമാപള്ളി യു.പി സ്കൂളിന് സമീപം താമസക്കാരനായ അബ്ദുൾ ഖാദർ (32), വള്ളക്കടവ് എം.ആർ പാലസിന് സമീപം വലിയവിളാകം പുരയിടത്തിൽ സഹീർഖാൻ (25) എന്നിവരെയാണ് വലിയതുറ പോലീസ് അറസ്റ്റ് ചെയ്തത്. കഴിഞ്ഞ മാർച്ച് 17-ന് വലിയതുറ പാലത്തിന് സമീപമായിരുന്നു കേസിനാസ്പദമായ സംഭവം നടന്നത്.പരാതിക്കാരനായ യുവാവിനെ തടഞ്ഞുനിർത്തിയ പ്രതികൾ അസഭ്യം പറയുകയും ക്രൂരമായി മർദിക്കുകയും ചെയ്തു. തുടർന്ന് യുവാവിന്‍റെ കൈവശമുണ്ടായിരുന്ന മൊബൈൽ ഫോണും പോക്കറ്റിലുണ്ടായിരുന്ന 4000 രൂപയും ഇവർ കവർന്നു. കൂടാതെ, കത്തി കാട്ടി ഭീഷണിപ്പെടുത്തി യുവാവിനെക്കൊണ്ട് എം.ഡി.എം.എ ഉപയോഗിപ്പിക്കാൻ നിർബന്ധിച്ചതായും പരാതിയിൽ പറയുന്നു. സിറ്റി ഡാൻസാഫ് സംഘം ബീമാപള്ളി ഭാഗത്തുനിന്നാണ് പ്രതികളെ പിടികൂടിയത്. ഇവരെ പിന്നീട് വലിയതുറ സ്റ്റേഷന് കൈമാറി. സംഭവത്തിൽ കൂടുതൽ പേർ ഉൾപ്പെട്ടിട്ടുണ്ടോ എന്ന് പോലീസ് അന്വേഷിച്ചുവരികയാണ്.

🔹കൽപ്പറ്റയിൽ മകളെ പീഡിപ്പിച്ച് ഗർഭിണിയാക്കിയ പിതാവിന് ജീവപര്യന്തം തടവും 1,35,000 രൂപ പിഴയും ശിക്ഷ വിധിച്ചു.പടിഞ്ഞാറത്തറ സ്റ്റേഷൻ പരിധിയിൽ രജിസ്റ്റർ ചെയ്ത കേസിലാണ് പ്രതിയെ ഫാസ്റ്റ് ട്രാക്ക് കോടതി ജഡ്ജ് കെ. കൃഷ്ണകുമാർ ശിക്ഷിച്ചത്. 2023ലാണ് കേസിന് ആസ്പദമായ സംഭവം. പടിഞ്ഞാറത്തറ പോലീസ് ഇൻസ്പെക്ടറായിരുന്ന ആർ. ബിജുവാണ് കേസ് അന്വേഷിച്ച് കുറ്റപത്രം സമർപ്പിച്ചത്. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടർ ജി. ബബിത ഹാജരായി.

🔹നാദാപുരത്ത് വിദ്യാര്‍ഥിനിയെ ലൈംഗികാതിക്രമത്തിന് വിധേയയാക്കിയ കേസിലെ പ്രതിക്ക് ആറു വർഷം തടവും പതിനായിരം രൂപ പിഴയും ശിക്ഷ.ആവള സ്വദേശി തൈക്കണ്ടി ഹമീദ് (59 ) നെയാണ് നാദാപുരം ഫാസ്റ്റ് ട്രാക്ക് സ്പെഷ്യൽ കോടതി ജഡ്ജി ദേവൻ കെ മേനോൻ ശിക്ഷിച്ചത്.2024 ഡിസംബർ 14 തീയതിയാണ് കേസിന് ആസ്പദമായ സംഭവം . ആവളയിലെ ട്യൂഷൻ സെന്‍ററിൽ നിന്ന് ട്യൂഷൻ കഴിഞ്ഞ് ചായ കടയിലേക്ക് പോയ വിദ്യാര്‍ഥിനിയെ അതിക്രമിച്ചു മാനഭാഗപ്പെടുത്താൻ ശ്രമിച്ചെന്നാണ് കേസ് മേപ്പയ്യൂർ പോലീസ് സബ് ഇൻസ്‌പെക്ടർ വിനീത് വിജയൻ ആണ് കേസ് അന്വേഷിച്ചു കുറ്റപത്രംസമർപ്പിച്ചത്. പ്രോസിക്യൂഷൻഭാഗത്ത്‌നിന്ന് എട്ട് സാക്ഷികളെവിസ്‌തരിക്കുകയും11 രേഖകൾഹാജറാക്കുകയുംചെയ്തു.പ്രോസിക്യൂഷന് വേണ്ടി സ്പെഷ്യൽപബ്ലിക് പ്രോസീക്യൂട്ടർ മനോജ്‌ ഹാജരായി.

🔹 കളമശേരിയില്‍ യുവതിയെ ആക്രമിച്ച് സ്വര്‍ണാഭരണങ്ങളും മൊബൈല്‍ ഫോണും കവര്‍ന്ന കേസിലെ പ്രതിയുടെ ചിത്രം പോലീസ് പുറത്തുവിട്ടു. പാലക്കാട് അഗളി സ്വദേശിയായ അനീഷി(28)നെ കളമശേരി പോലീസ് കഴിഞ്ഞ ആഴ്ച പിടികൂടിയിരുന്നു. ഇയാളുടെ തിരിച്ചറിയല്‍ പരേഡും പൂര്‍ത്തിയാക്കിയിരുന്നു. തുടര്‍ന്ന് കസ്റ്റഡിയില്‍ വാങ്ങിയ പോലീസ് സംഭവ സ്ഥലത്തെത്തിച്ച് തെളിവെടുപ്പ് നടത്തി. കൂടുതല്‍ തെളിവെടുപ്പിനായി പാലക്കാട്ടേക്ക് കൊണ്ടുപോയി.യുവതിയെ പീഡിപ്പിക്കുകയെന്ന ലക്ഷ്യത്തോടെയാണ് ആക്രമണം നടത്തിയതെന്ന് പ്രതി പോലീസിന് മൊഴി നല്‍കിയിരുന്നു. സംഭവസമയം ഹെല്‍മറ്റ് ധരിച്ചെത്തിയ ഇയാള്‍ മദ്യലഹരിയിലായിരുന്നു.
യുവതിയുടെ ഫോണും കൃത്യത്തിന് ഉപയോഗിച്ച ഇയാളുടെ ബൈക്കും പോലീസ് കണ്ടെടുത്തിട്ടുണ്ട്. കെഎസ്ഇബി താല്‍ക്കാലിക ജീവനക്കാരനാണ് പ്രതി. ആക്രമണത്തില്‍ പരിക്കേറ്റ യുവതി ആശുപത്രിയില്‍ ചികിത്സ തേടിയിരുന്നു.
കഴിഞ്ഞ 15ന് രാത്രി 8.30ന് എച്ച്എംടി ജംഗ്ഷന് സമീപത്തെ റെയില്‍വേ ക്രോസിനോട് ചേര്‍ന്നായിരുന്നു സംഭവം. എച്ച്എംടി ജംഗ്ഷനിലെ സ്വകാര്യ സ്ഥാപനത്തിലെ ജീവനക്കാരിയാണ് യുവതി. ബൈക്കില്‍ യുവതിയെ പിന്തുടര്‍ന്നെത്തിയ പ്രതി യുവതി എച്ച്എംടി ബസ് സ്റ്റോപ്പിന് സമീപം റെയില്‍വേ ക്രോസ് ചെയ്ത് നടന്നു പോകുമ്പോള്‍ ആക്രമിക്കുകയും മൊബൈല്‍ ഫോണും മാലവും കവരുകയുമായിരുന്നു. 200ഓളം സിസിടിവികള്‍ കേന്ദ്രീകരിച്ച് നടത്തിയ അന്വേഷണത്തിനൊടുവില്‍ സാഹസികമായാണ് പ്രതിയെ അഗളിയില്‍ നിന്ന് കളമശേരി പോലീസ് പിടികൂടിയത്.

🔹ആലുവ റെയിൽവേ പ്ലാറ്റ്ഫോമിൽ നിന്നും അയ്യന്പുഴ ഒലിവ് മൗണ്ട് ഭാഗത്തുനിന്നുമായി 42 കിലോ കഞ്ചാവ് പിടികൂടി. ആലുവ റെയിൽവേ സ്റ്റേഷൻ പ്ലാറ്റ്ഫോമിൽ ഉപേക്ഷിക്കപ്പെട്ട നിലയിൽ 15 കിലോ കഞ്ചാവും അയ്യന്പുഴ ഒലിവ് മൗണ്ട് ഭാഗത്ത് ഇതര സംസ്ഥാന തൊഴിലാളികളുടെ കൈയിൽ നിന്ന് 27 കിലോ കഞ്ചാവുമാണ് കണ്ടെത്തിയത്. ഇതരസംസ്ഥാന തൊഴിലാളികളായ വെസ്റ്റ് ബംഗാൾ മൂർഷിദാബാദ് സ്വദേശികളായ സെന്‍റു സർക്കാർ (32), ഇനാമുൽ ഹഖ് (36) എന്നിവരെ അയ്യമ്പുഴ പോലീസ് അറസ്റ്റ് ചെയ്തു.ഒഡീഷയിൽ നിന്ന് ട്രെയിൻ മാർഗം എറണാകുളത്തെത്തി അവിടെനിന്ന് ഓട്ടോറിക്ഷയിൽ വരുന്ന വഴി യാണ് ഇതര സംസ്ഥാന തൊഴിലാളികൾ കഞ്ചാവുമായി പിടിയിലായത്. പോലീസിന്‍റെ നിരീക്ഷണത്തിലായിരുന്നു ഇരുവരും. ഒഡീഷയിൽ നിന്ന് കിലോയ്ക്ക് 3,000 രൂപ നിരക്കിൽ വാങ്ങുന്ന കഞ്ചാവ് 25,000 രൂപ നിരക്കിൽ വില്പന നടത്തി മടങ്ങുതായിരുന്നു ഇവരുടെ രീതി. ഇന്ത്യാ- ബംഗ്ലാദേശ് അതിർത്തി പ്രദേശത്താണ് ഇവർ താമസിക്കുന്നത്. ഇവർ കഞ്ചാവ് കൈമാറിയിരുന്നവരെക്കുറിച്ച് പോലീസ് അന്വേഷണം ആരംഭിച്ചു. ആലുവ റെയിൽവേ സ്റ്റേഷൻ പ്ലാറ്റ്ഫോമിൽ ഇന്നലെ രാത്രി 7.30ഓടെ ദിബ്രുഗഢ്-കന്യാകുമാരി വിവേക് എക്സ്പ്രസ് ട്രെയിൻ ആലുവ സ്റ്റേഷൻ വിട്ടതിന് പിന്നാലൊണ് രണ്ട് ബാഗുകളിലായി കഞ്ചാവ് കണ്ടെത്തിയത്. പിടികൂടിയ കഞ്ചാവിന് വിപണിയിൽ എട്ടു ലക്ഷം രൂപ വിലവരുമെന്ന് ഉദ്യോഗസ്ഥർ പറഞ്ഞു. പ്ലാറ്റ്ഫോമിൽ ഉണ്ടായിരുന്ന ഇതരസംസ്ഥാനക്കാരെ ഉദ്യോഗസ്ഥർ ചോദ്യം ചെയ്തെങ്കിലും പ്രതികളെ കണ്ടെത്താനായില്ല. പ്രതിക്കായുള്ള അന്വേഷണം ഊർജിതമാക്കി.

🔹സംസ്ഥാനത്തെ സ്കൂളുകളിലെ എസ്എസ്എൽസി പരീക്ഷകൾ ഇന്നലെ അവസാനിച്ചു.മധ്യവേനൽ അവധിക്കായി സ്കൂളുകൾ ഇന്ന് അടയ്ക്കും. ഇനിയുള്ള രണ്ടു മാസം കുട്ടികൾ അവധി ആഘോഷത്തിലാണ്.എസ്എസ്എൽസിക്ക് 4.17 ലക്ഷം വിദ്യാർഥികളാണ് ഇത്തവണ പരീക്ഷ എഴുതിയത്. പ്ലസ് ടു പരീക്ഷ എഴുതിയത് 4.52 ലക്ഷം വിദ്യാർഥികളും പ്ലസ് വണിന് 4.11 ലക്ഷം വിദ്യാർഥികളുമാണ്. പ്ലസ് ടു പരീക്ഷകൾ കഴിഞ്ഞ ആഴ്ച പൂർത്തിയായിരുന്നു.

🔹കേരള-കർണാടക അതിർത്തിക്കു സമീപം ദേശീയപാതയിലെ തൊക്കോട്ട് ഫ്ലൈ ഓവറിൽവച്ച് ഗുണ്ടാനേതാവിനെ വെട്ടിക്കൊന്നത് ആറംഗ സംഘം. കേരള രജിസ്ട്രേഷനുള്ള കാറിലാണ് കൊലയാളിസംഘമെത്തിയതെന്നും ഇതിൽ മൂന്നുപേരെ തിരിച്ചറിഞ്ഞതായും അന്വേഷണസംഘം അറിയിച്ചു.മംഗളൂരു കുദ്രോളി സ്വദേശിയായ ആരിഫ് ഹുസൈൻ എന്ന ടാബ്ലറ്റ് ആരിഫ് (42) ആണ് വെള്ളിയാഴ്ച പുലർച്ചെ ഫ്ലൈഓവറിനു മുകളിൽ വച്ചുണ്ടായ ഗുണ്ടാ ആക്രമണത്തിൽ കൊല്ലപ്പെട്ടത്. ആരിഫ് സഞ്ചരിച്ചിരുന്ന ബൈക്കിൽ കാറിടിച്ചു വീഴ്ത്തിയതിനു ശേഷം വെട്ടിക്കൊലപ്പെടുത്തുകയായിരുന്നു. ആക്രമണം ഫ്ലൈഓവറിനു മുകളിൽവച്ചായതിനാൽ യുവാവിന് ഓടി രക്ഷപ്പെടാൻപോലും കഴിഞ്ഞില്ല.നിരവധി കേസുകളിൽ പ്രതിയായ ആരിഫ് മംഗളൂരു പോലീസിന്‍റെ ഗുണ്ടാപ്പട്ടികയിൽ ഉൾപ്പെട്ടിരുന്നു. നാലുവർഷം മുമ്പ് തൊപ്പി നൗഫൽ എന്നയാളിന്‍റെ നേതൃത്വത്തിലുള്ള സംഘം നടത്തിയ വധശ്രമത്തിൽനിന്ന് രക്ഷപ്പെട്ടിരുന്നു.തൊപ്പി നൗഫലിനെ കഴിഞ്ഞ നവംബറിൽ ഉപ്പള റെയിൽവേ സ്റ്റേഷനു സമീപം ട്രെയിൻതട്ടി മരിച്ച നിലയിൽ കണ്ടെത്തുകയായിരുന്നു. ഈ സംഭവവും കൊലപാതകമാണെന്ന സംശയമുയർന്നിരുന്നു. ഇതിന്‍റെ പ്രതികാരമായാണ് ആരിഫിനു നേരെ ആക്രമണമുണ്ടായതെന്നാണ് സംശയം.കൊലയാളികൾ സഞ്ചരിച്ചിരുന്ന കേരള രജിസ്ട്രേഷനിലുള്ള ഇന്നോവ കാർ കർണാടകയിലെ വിട്ളയ്ക്കു സമീപം ഉപേക്ഷിക്കപ്പെട്ട നിലയിൽ കണ്ടെത്തി. ഇതിന്‍റെ ഉടമ മലയാളിയാണെന്നു തിരിച്ചറിഞ്ഞിട്ടുണ്ട്. സംഘത്തിന് പ്രാദേശികമായി സഹായങ്ങൾ ചെയ്തുനൽകിയ ഏതാനും പേരെ പോലീസ് കസ്റ്റഡിയിലെടുത്തിട്ടുണ്ട്. കൊലയിൽ നേരിട്ടു പങ്കെടുത്തവർ ബംഗളൂരുവിലേക്കു കടന്നതായാണു സൂചന.

🔹തമിഴ്നാട് നിയമസഭാ തെരഞ്ഞെടുപ്പിൽ മത്സരിക്കാനായി തിങ്കളാഴ്ചയാണ് വിജയ് നാമനിർദേശ പത്രിക സമർപ്പിച്ചത്. ഇപ്പോഴിതാ നാമനിര്‍ദേശ പത്രികയ്ക്ക് ഒപ്പം സമര്‍പ്പിച്ച സത്യവാംഗ്മൂലത്തിൽ പങ്കുവച്ചിരിക്കുന്ന ആസ്തി വിവരങ്ങളാണ് ശ്രദ്ധേയമാകുന്നത്.നാമനിര്‍ദേശ പത്രികയില്‍ അടങ്ങിയിരിക്കുന്ന വിവരങ്ങള്‍ പ്രകാരം വിജയ്ക്ക് 625കോടിയുടെ സ്വത്തുവകകളാണ് ഉളളതെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.
615 കോടി സ്വത്തില്‍ 405 കോടി സ്ഥാവര സ്വത്തും (ഭൂമി, കെട്ടിടങ്ങൾ എന്നിവ) 220 കോടി ജംഗമസ്വത്തുമായാണ് (പണം, വാഹനം, ആഭരണങ്ങൾ എന്നിവ) രേഖപ്പെടുത്തിയിരിക്കുന്നത് എന്നാണ് റിപ്പോര്‍ട്ടുകള്‍.ഇന്ത്യന്‍ ഓവര്‍സീസ് ബാങ്ക് ശാഖയില്‍ ഏകദേശം 213.36 കോടി രൂപ ബാലന്‍സായുണ്ട്. ആക്‌സിസ് ബാങ്കിന്‍റെ ഇന്ദിര നഗര്‍ ബ്രാഞ്ചില്‍ ഏകദേശം 5.79 കോടി രൂപയുടെ സ്ഥിര നിക്ഷേപവും വിജയ്ക്കുണ്ട്.
ഭാര്യ സംഗീതയുടെ പേരില്‍ ഏകദേശം 15.51 കോടി രൂപയുടെ ജംഗമ ആസ്തികളുണ്ടെന്നും സത്യവാംഗ്മൂലം വെളിപ്പെടുത്തുന്നു. സംഗീതയുടെ കൈവശമുള്ള പണം (ഒരു ലക്ഷം രൂപ), വിവിധ ബാങ്ക് നിക്ഷേപങ്ങൾ (ഏകദേശം 53 ലക്ഷം രൂപയിലധികം), സ്വർണ്ണ-വെള്ളി ആഭരണങ്ങൾ എന്നിവയുടെയെല്ലാം ആകെ തുകയാണിത്.
കാറുകളുടെ നീണ്ട നിരയും സത്യവാംഗ് മൂലത്തില്‍ വെളിപ്പെടുത്തുന്നുണ്ട്. ആറ് കോടിയാണ് കാറുകളുടെ ആകെ മൂല്യം. ബിഎംഡബ്ല്യു, 530, ടൊയോട്ട ലക്സസ് 350, ടൊയോട്ട വെൽഫയർ, BMW I7 എന്നിവ ഇതിൽ ഉൾപ്പെടുന്നു. കൂടാതെ മാരുതി സ്വിഫ്റ്റും ഒരു ടിവിഎസ് എക്സ് എൽ വാഹനവും ഉടമസ്ഥതയിലുണ്ട്.കാറുകള്‍ക്ക് പുറമേ, 1.20 കോടി രൂപ വിലമതിക്കുന്ന ഏകദേശം 883 ഗ്രാം ഭാരമുള്ള സ്വര്‍ണ്ണാഭരണങ്ങളും വിജയ്‍യുടെ പക്കലുണ്ട്. ഭാര്യ സംഗീതയ്ക്ക് 4.07 കോടി രൂപ വിലമതിക്കുന്ന ഏകദേശം 391 പവന്‍ സ്വര്‍ണ്ണാഭരണങ്ങള്‍ ഉള്‍പ്പെടെയുള്ള ആഭരണങ്ങളും കൈവശമുണ്ട്. ഏകദേശം ഒരു കോടി രൂപ വിലമതിക്കുന്ന വജ്രങ്ങളും കുടുംബത്തിന് സ്വന്തമായുണ്ട്. സ്വകാര്യ സ്വത്തുക്കള്‍ക്കും ബാങ്ക് നിക്ഷേപങ്ങള്‍ക്കും പുറമെ കമ്പനികളിലും ട്രസ്റ്റുകളിലും ബിസിനസ് സ്ഥാപനങ്ങളിലും വന്‍ നിക്ഷേപങ്ങളും വിജയ്ക്കുണ്ട്.ലോകമെമ്പാടുമായി ഒരു കോടിയിലധികം രൂപ ഇത്തരത്തില്‍ നിക്ഷേപമായി വിജയ്ക്കുണ്ട്. വിദ്യാഭ്യാസ, സാമൂഹിക സ്ഥാപനള്‍, കമ്പനികള്‍, വ്യക്തികള്‍ എന്നിവയിലായി 56 കോടി രൂപയുടെ നിക്ഷേപമാണ് സത്യവാംഗ് മൂലം സാക്ഷ്യപ്പെടുത്തുന്നത്.
വിജയ് തന്‍റെ പിതാവ് എസ്.എ. ചന്ദ്രശേഖറിന് 3.02 കോടി രൂപയും, അമ്മ ശോഭ ചന്ദ്രശേഖറിന് 87.12 ലക്ഷം രൂപയും, ഭാര്യയ്ക്ക് 12.6 കോടി രൂപയും, മകൻ ജേസൺ സഞ്ജയ്ക്ക് 8.78 ലക്ഷം രൂപയും, മകൾ ദിവ്യ ഷാഷയ്ക്ക് 4.6 ലക്ഷം രൂപയും ഉൾപ്പെടെ നിരവധി വ്യക്തികൾക്കും കമ്പനികൾക്കും വായ്പ നൽകിയിട്ടുണ്ടെന്ന് സത്യവാംഗ്മൂലത്തിൽ പറയുന്നു. കൂടാതെ, വിജയ് വിദ്യാശ്രമത്തിന്‍റെ കറസ്പോണ്ടന്‍റായും നാല് ട്രസ്റ്റുകളുടെ മാനേജിംഗ് ഡയറക്ടറായും ട്രസ്റ്റിയായും പ്രവർത്തിക്കുന്നതിനു പുറമെ, അദ്ദേഹത്തിന്‍റെ തൊഴിൽ സ്വയം തൊഴിൽ സംരംഭകനെന്നാണ് രേഖപ്പെടുത്തിയിരിക്കുന്നത്. സ്വയം തൊഴിൽ, പലിശ, ആസ്തികളിൽ നിന്നുള്ള വാടക എന്നിവയാണ് അദ്ദേഹത്തിന്‍റെ വരുമാന മാർഗങ്ങൾ.

🔹ഉത്തർപ്രദേശിലെ രത്തന്‍പുരിൽ പലചരക്ക് കടയില്‍ നിന്ന് മിഠായി പാക്കറ്റ് മോഷ്ടിച്ചതിന് 12 വയസുകാരിയെ പിതാവ് അടിച്ചുകൊന്നു. സംഭവത്തിൽ പുഷ്‌പേന്ദ്രയെ പോലീസ് അറസ്റ്റ് ചെയ്തതുകൊല്ലപ്പെട്ട പെൺകുട്ടിയുടെ മാതാവ് ആരതിയുടെ പരാതിയുടെ അടിസ്ഥാനത്തിലാണ് പോലീസ് കേസെടുത്തത്. മകള്‍ കടയില്‍ നിന്ന് ഒരു പാക്കറ്റ് മിഠായി മോഷ്ടിച്ചുവെന്ന് കടയുടമ പുഷ്‌പേന്ദ്രയോട് പറഞ്ഞിരുന്നു. തുടർന്ന് കോപാകുലനായ ഇയാൾ മകളെ വടികൊണ്ടടിച്ച് കൊലപ്പെടുത്തുകയായിരുന്നുവെന്ന് ആരതി പോലീസിനോട് പറഞ്ഞു. കുട്ടിയെ തല്ലാൻ ഉപയോഗിച്ച വടി കണ്ടെത്തിയിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും പോലീസ് പറഞ്ഞു.

🔹ഗൾഫ് രാജ്യങ്ങൾക്ക് നേരെയുള്ള ഇറാന്‍റെ ആക്രമണങ്ങൾ തുടരുന്നു. തിങ്കളാഴ്ച യുഎഇയിലെ ഷാർജയിൽ ഇറാൻ ഡ്രോൺ ആക്രമണം നടത്തി.തുറായ ടെലികോം കമ്പനി ആസ്ഥാനത്താണ് ആക്രമണം ഉണ്ടായത്. ആക്രമണത്തിൽ ആർക്കും പരിക്കില്ലെന്നാണ് റിപ്പോർട്ട്. അതേസമയം യുഎഇയിലെ സ്കൂളുകളിൽ ഓൺലൈൻ പഠനം ഏപ്രിൽ 17 വരെ നീട്ടി. മുഴുവൻ പൊതു-സ്വകാര്യ സ്കൂളുകൾക്കും, നഴ്സറികൾക്കും ഇത് ബാധകമായിരിക്കും.

🔹അമേരിക്കയുടെ നിർദേശങ്ങളിൽ നിലപാട് വ്യക്തമാക്കി ഇറാൻ. യുദ്ധം നിർത്തിയാൽ മാത്രം ചർച്ചയെന്നാണ് ഇറാന്‍റെ നിലപാട്.വിഷയത്തിൽ ഇറാൻ തുർക്കി വിദേശകാര്യമന്ത്രിമാർ തമ്മിൽ ചർച്ച നടത്തിയിരുന്നു. സമാധാന ശ്രമങ്ങളുടെ മറവിൽ ആക്രമിച്ച ചതി മറക്കില്ലെന്നും ഇറാൻ വ്യക്തമാക്കി. അതേസമയം ഇറാൻ സുരക്ഷ കൗൺസിൽ ഹോർമുസിൽ പുതിയ നടപടികൾ പ്രഖ്യാപിച്ചു. കപ്പലുകൾക്ക് പുതിയ മാർഗനിർദേശം ഏർപ്പെടുത്തി. നിയന്ത്രണത്തിന് കൂടുതൽ നടപടികൾ കൈക്കൊള്ളും. യുഎന്നുമായും തുർക്കി സംസാരിച്ചു.കടലിടുക്ക് കടന്ന രണ്ട് എൽപിജി ടാങ്കറുകൾ ഇന്ത്യയിലേക്ക് വൈകാതെ എത്തും. 18 കപ്പലുകൾക്ക് കൂടി ഉടൻ അനുമതി കിട്ടുമെന്ന് കേന്ദ്ര സ‍ർക്കാർ അറിയിച്ചു.

🔹ഐപിഎൽ 2026 സീസണിലെ തങ്ങളുടെ ആദ്യ മത്സരത്തിൽ അഞ്ചു തവണ ചാമ്പ്യന്മാരായ ചെന്നൈ സൂപ്പർ കിങ്സിനെ എട്ടു വിക്കറ്റുകൾക്ക് തകർത്ത് രാജസ്ഥാൻ റോയൽസ്. ഗുവാഹത്തിയിൽ നടന്ന മൽസരത്തിൽ ചെന്നൈ സൂപ്പർ കിങ്‌സ് ഉയർത്തിയ 128 റൺസ് വിജയലക്ഷ്യം പതിമൂന്നാം ഓവറിൽ തന്നെ രാജസ്ഥാൻ മറികടന്നു. ഓപ്പണർ വൈഭവ് സൂര്യവൻഷിയുടെ തകർപ്പൻ അർദ്ധസെഞ്ചുറിയാണ് രാജസ്ഥാന് മികച്ച വിജയം നൽകിയത്. വെറും 17 പന്തുകളിൽ നിന്നും 52 റൺസ് നേടിയ താരം നാല് ബൗണ്ടറികളും അഞ്ചു സിക്സറുകളും അടിച്ചുകൂട്ടി. ഐപിഎൽ ചരിത്രത്തിലെ മൂന്നാമത്തെ വേഗമേറിയ ഫിഫ്റ്റി ആണ് യുവതാരം അടിച്ചത്. ധ്രുവ് ജൂറെൽ 18 റൺസെടുത്ത് പുറത്തായപ്പോൾ ഓപ്പണർ യശസ്‌വി ജൈസ്വാളും (38) നായകൻ റയാൻ പരാഗും (14) പുറത്താകാതെ നിന്നു. രാജസ്ഥാന്റെ രണ്ട് വിക്കറ്റുകളും നേടിയത് അൻഷുൽ കാംബോജ് ആണ്.നേരത്തെ ടോസ് നഷ്ടപ്പെട്ട് ആദ്യം ബാറ്റ് ചെയ്ത ചെന്നൈയെ രാജസ്ഥാൻ ബൗളർമാർ എറിഞ്ഞിട്ടു. ചെന്നൈയ്ക്ക് വേണ്ടി ഓപ്പണർ ആയി അരങ്ങേറിയ സഞ്ജു സാംസണിനെ (6) രണ്ടാം ഓവറിൽ തന്നെ ബർഗർ വീഴ്ത്തിയപ്പോൾ അടുത്ത ഓവറിൽ നായകൻ റിതുരാജ് ഗെയ്ക്‌വാദും മടങ്ങി. ജേമി ഓവർട്ടൻ 43 റൺസുമായി പൊരുതി നോക്കിയെങ്കിലും ടീം 127 റൺസെടുത്ത് പുറത്തായി. രാജസ്ഥാന് വേണ്ടി ആർച്ചർ, ബർഗർ, ജഡേജ എന്നിവർ രണ്ടു വിക്കറ്റുകൾ വീതം വീഴ്ത്തി.

🔹തമിഴ്, മലയാളം ഭാഷകളിലായി ZEE5 ന്‍റെ പുതിയ ഒറിജിനൽ സീരീസ് കാക്കി സർക്കസിന്‍റെ റിലീസ് തീയതി പ്രഖ്യാപിച്ചു. അമീൻ ബാരിഫ് രചനയും സംവിധാനവും നിർവഹിച്ചിരിക്കുന്ന ഈ സീരീസ് റൈസ് ഈസ്റ്റ് എന്‍റർടെയ്ൻമെന്‍റ് ബാനറിൽ ശ്രീനിധി സാഗർ ആണ് നിർമിച്ചിരിക്കുന്നത്. ഏപ്രിൽ 10 മുതൽ ആണ് സീരീസ് സ്ട്രീമിംഗ് ആരംഭിക്കുന്നത്. നടൻ ജോജു ജോർജിന്‍റെ സോഷ്യൽ മീഡിയ പ്ലാറ്റ്ഫോം വഴിയാണ് സീരീസിന്‍റെ ട്രെയിലർ പുറത്തിറങ്ങിയത്. Once Upon a Time in Kayamkulam എന്ന പേരിൽ അറിയപ്പെട്ടിരുന്ന ഈ ഏഴ് എപ്പിസോഡ് സീരീസ്, ഇപ്പോൾ കാക്കി സർക്കസ് എന്ന പേരിൽ ആണ് എത്തുന്നത്. മുനിഷ്കാന്ത്, സുഭാഷ് സെൽവം, രാജേഷ് മാധവൻ, ഗൗതമി നായർ, അമൃത,അബ്ദുൾ ലീ, വിൻസു റേച്ചൽ, രാകേഷ് ഉഷാർ, സാവിത്രി, മരുതുപാണ്ടിയൻ, ചിത്തിരസേനൻ, അരുൺ, വിഘ്നേശ്വർ എന്നിവരടങ്ങുന്ന ഒരു വലിയ താരനിര തന്നെ സീരീസിൽ അണിനിരക്കുന്നുണ്ട്. ഒരു പട്ടണത്തിൽ നടക്കുന്ന വിചിത്രമായ ഒരു കുറ്റകൃത്യം സബ് ജയിലിനെ ആകെ കുഴപ്പത്തിലാക്കുന്നു. ടൈറ്റിൽ സൂചിപ്പിക്കുന്ന പോലെ തന്നെ ഒരു കോമഡി ത്രില്ലർ സീരീസ് ആണ് അണിയറയിൽ ഒരുങ്ങുന്നത്.കമ്മട്ടം, ഇൻസ്പെക്ഷൻ ബംഗ്ലാവ്,കാസർഗോഡ് എംബസി,എന്നി ഹിറ്റ് സീരിസിന് ശേഷം ഉള്ള ഒറിജിനൽ സീരീസ് ആണ് കാക്കി സർക്കസ്.

🔹സോഷ്യൽ മീഡിയയിലൂടെ പ്രശസ്തരായ ഹാഷിർ, അലൻ ബിൻ സിറാജ്, അജിൻ ജോയ്, വിനായക് എന്നിവരെ പ്രധാന കഥാപാത്രങ്ങളാക്കി നവാഗതനായ സവിൻ എസ്.എ സംവിധാനം ചെയ്യുന്ന വാഴ 2 ബയോപിക് ഓഫ് ബില്യണ്‍ ബ്രോസ് എന്ന ചിത്രത്തിന്‍റെ ട്രെയിലർ പുറത്തിറങ്ങി.സംവിധായകൻ വിപിന്‍ ദാസ് ആണ് ചിത്രത്തിന്‍റെ തിരക്കഥ, സംഭാഷണം ഒരുക്കുന്നത്. WBTS പ്രൊഡക്ഷൻസ്, ഇമാജിൻ സിനിമാസ്, സിഗ്നേച്ചർ സ്റ്റുഡിയോസ്, ഐക്കൺ സ്റ്റുഡിയോസ്, ഷൈൻ സ്ക്രീൻസ് എന്നീ ബാനറുകളിലായി വിപിൻ ദാസ്, ഹാരിസ് ദേശം, സാഹു ഗാരപാട്ടി, പി.ബി. അനീഷ്, ആദർശ് നാരായൺ എന്നിവർ ചേർന്നാണ് വാഴ II നിർമ്മിക്കുന്നത്. ഏപ്രില്‍ രണ്ടിനാണ് വാഴ II ആഗോളതലത്തില്‍ ചിത്രം തിയേറ്ററുകളില്‍ എത്തുന്നത്. വാഴ ബയോപിക് ഓഫ് ബില്യണ്‍ ബോയ്‌സ് എന്നായിരുന്നു ആദ്യ ഭാഗത്തിന്‍റെ പേര്.
വാഴയുടെ ആദ്യഭാഗ ചിത്രത്തിലെ യുവ താരങ്ങൾക്കൊപ്പം മലയാളത്തിലെ മറ്റു പ്രമുഖ താരങ്ങളും സോഷ്യൽ മീഡിയ വൈറൽ താരങ്ങളും ഈ ചിത്രത്തിൽ അഭിനയിക്കുന്നുണ്ട്.ഒരു കൂട്ടം യുവതാരങ്ങളോടൊപ്പം സുധീഷ്, വിജയ് ബാബു, അജു വർഗീസ്, അരുൺ, അൽഫോൻസ് പുത്രൻ, വിനോദ് കെടാമംഗലം, ബിജു കുട്ടൻ, രവീന്ദ്രൻ തുടങ്ങിയ പ്രമുഖരും ചിത്രത്തിൽ അഭിനയിക്കുന്നു.10 ഗാനങ്ങളും ഒൻപത് സംഗീത സംവിധായകരുമാണ് വാഴ II നു വേണ്ടി അണിനിരക്കുന്നത്. മലയാളി മങ്കിസ്, രജത് പ്രകാശ് (ഹാറ്റ്സ്മിത്ത് ), പാർവതീഷ് പ്രദീപ്‌, റമീസ് ആർസി, മുത്തു, ആർക്കഡോ, ജസിർ മുഹമ്മദ്‌, അശ്വിൻ ആര്യൻ & ഇലക്ട്രോണിക് കില്ലി എന്നിവരാണ് സംഗീതം ചെയ്യുന്നത്.
അതോടൊപ്പം അങ്കിത് മേനോനാണ് മ്യൂസിക് സൂപ്പർവിഷൻ കൈകാര്യം ചെയ്തിരിക്കുന്നത്. വാഴ ഒന്നാം ഭാഗത്തിലെ ഗാനങ്ങൾ ഇപ്പോഴും റീൽസുകളിൽ ട്രെൻഡിങ് ആണ്. തിങ്ക് മ്യൂസിക്കാണ് വാഴ IIവിന്‍റെ ഓഡിയോ റൈറ്സ് സ്വന്തമാക്കിയിരിക്കുന്നത്.
ഛായാഗ്രഹണം- അഖിൽ ലൈലാസുരൻ, എഡിറ്റർ – കണ്ണൻ മോഹൻ, എക്സിക്യൂട്ടീവ് പ്രൊഡ്യൂസർ – കനിഷ്ക ഗോപി ഷെട്ടി, പ്രൊഡക്ഷൻ കൺട്രോളർ – റിന്നി ദിവാകർ, കല – ബാബു പിള്ള, മേക്കപ്പ് – സുധി സുരേന്ദ്രൻ, കോസ്റ്റ്യൂംസ് – അശ്വതി ജയകുമാർ, സ്റ്റിൽസ് – ബിജിത്ത് ധർമ്മടം, പരസ്യകല – യെല്ലോ ടൂത്ത്‌സ്, ചീഫ് അസോസിയേറ്റ് ഡയറക്ടർ – രജിവൻ അബ്ദുൾ ബഷീർ, സൗണ്ട് ഡിസൈനർ – അരുൺ എസ്. മണി, ആക്ഷൻ – കലൈ കിംഗ്സൺ, വിക്കി നന്ദഗോപാൽ, ഡിഐ – ജോയ്നർ തോമസ്, ടൈറ്റിൽ ഡിസൈൻ – സർക്കാസനം, സൗണ്ട് ഡിസൈൻ-വിഷ്ണു സുജാതൻ, പ്രൊഡക്ഷൻ എക്സിക്യൂട്ടീവ് – അനീഷ് നന്തിപുലം, പ്രൊമോഷൻ കൺസൾട്ടന്‍റ്-വിപിൻ കുമാർ,വിതരണം-ഐക്കൺ സിനിമാസ്,പി ആർ ഒ-എ.എസ്. ദിനേശ്.

💦 ഗുരുജിയുടെ വാക്കുകൾ

സന്തോഷം തേടിയുള്ള പരക്കം പാച്ചിലിലാണ് മനുഷ്യര്‍…. പണവും പ്രശസ്തിയും ആഡംബര ജീവിതവുമെല്ലാം സന്തോഷം തരുമെന്നാണ് പ്രതീക്ഷ…. പക്ഷേ ചെറിയ കാര്യങ്ങളിൽ സംതൃപ്തി കണ്ടെത്തുന്നവരാണ് ഏറ്റവും സന്തുഷ്ടർ.
ശത്രു ആണെങ്കിൽ പോലും വീട്ടിൽ വന്നാൽ വേണ്ടപോലെ സൽക്കരിക്കണം ….. മുറിക്കുവാൻ സമീപിക്കുന്നവന്റെ അടുക്കൽ നിന്ന് പോലും വൃക്ഷം തണലിനെ പിൻവലിക്കുന്നില്ല …. വിദ്വേഷങ്ങളെ മനസ്സിൽ സൂക്ഷിക്കാതെ കഴിയുന്നത്ര സ്നേഹത്തോടും സന്തോഷത്തോടും എല്ലാവരോടും ഇടപെടുക .

തയ്യാറാക്കിയത്: കപിൽ ശങ്കർ

7 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 31 | ചൊവ്വ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ടെക്സാസിൽ വാഹനപരിശോധനയ്ക്കിടെ 20 പൗണ്ട് കൊക്കെയ്ൻ പിടികൂടി

അരുന്ധതി റോയിക്ക് അമേരിക്കയിൽ നാഷണൽ ബുക്ക് ക്രിട്ടിക്സ് സർക്കിൾ പുരസ്കാരം

ബിഷപ്പ് റോബർട്ട് പ്രൈസ് ഫാർമേഴ്‌സ് ബ്രാഞ്ച് സെന്റ് ആൻഡ്രൂസ് പള്ളിയിൽ ഓശാന ഞായർ ശുശ്രൂഷ നിർവഹിച്ചു

1 COMMENT

LEAVE A REPLY Cancel reply

Most Popular

ഖരമാലിന്യ പരിപാലന ചട്ടം: 2026 പ്രകാരമുള്ള മാറ്റങ്ങൾ 2026 ഏപ്രിൽ ഒന്നു മുതൽ നിലവിൽ വരും

നളന്ദയിലെ മാ ശീതള ക്ഷേത്രത്തില്‍ മേളയ്ക്കിടെ അപകടം; തിക്കിലും തിരക്കിലുംപെട്ട് എട്ട് പേർക്ക് ദാരുണാന്ത്യം.

ഗുരുനാഥനെ വീട്ടിൽക്കയറി തല്ലി മുൻശിഷ്യൻ; ഒന്നാം ക്ലാസുകാരനെ വഴക്കുപറഞ്ഞതിന് അധ്യാപകന് ക്രൂരമർദനം.

സ്ഥാനാര്‍ത്ഥികളുടെ വരവ്, ചെ ലവ് കണക്കുകളുടെ രണ്ടാം ഘട്ട പരിശോധന നാളെ മുതൽ ആരംഭിക്കും

Recent Comments

EDITOR PICKS

ഖരമാലിന്യ പരിപാലന ചട്ടം: 2026 പ്രകാരമുള്ള മാറ്റങ്ങൾ 2026 ഏപ്രിൽ ഒന്നു മുതൽ നിലവിൽ വരും

നളന്ദയിലെ മാ ശീതള ക്ഷേത്രത്തില്‍ മേളയ്ക്കിടെ അപകടം; തിക്കിലും തിരക്കിലുംപെട്ട് എട്ട് പേർക്ക് ദാരുണാന്ത്യം.

ഗുരുനാഥനെ വീട്ടിൽക്കയറി തല്ലി മുൻശിഷ്യൻ; ഒന്നാം ക്ലാസുകാരനെ വഴക്കുപറഞ്ഞതിന് അധ്യാപകന് ക്രൂരമർദനം.

POPULAR POSTS

ഖരമാലിന്യ പരിപാലന ചട്ടം: 2026 പ്രകാരമുള്ള മാറ്റങ്ങൾ 2026 ഏപ്രിൽ ഒന്നു മുതൽ നിലവിൽ വരും

നളന്ദയിലെ മാ ശീതള ക്ഷേത്രത്തില്‍ മേളയ്ക്കിടെ അപകടം; തിക്കിലും തിരക്കിലുംപെട്ട് എട്ട് പേർക്ക് ദാരുണാന്ത്യം.

ഏപ്രിലില്‍ 14 ദിവസം ബാങ്കുകള്‍ അവധി; ഏതൊക്കെ ദിവസമെന്ന് മുൻകൂട്ടി അറിഞ്ഞിരിക്കാം.

POPULAR CATEGORY

ABOUT US

FOLLOW US