👬👫കുട്ടീസ് കോർണർ 👬👫 (എഴുപത്തിരണ്ടാം വാരം) ✍അവതരണം: സൈമ ശങ്കർ, മൈസൂർ

ഹായ് കുട്ടീസ്!!
ഈ ആഴ്ച നമുക്ക് A) തീപ്പെട്ടി ചിത്രം കണ്ടൊരു വിശദീകരണം, B) പദ ലളിതം (വാക്കുകളെ കുറിച്ചൊരു വിശദീകരണം) C) സ്ഥലനാമ കഥകൾ പിന്നെ കുറച്ചു D)കടംകഥകളും, കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ കുട്ടീസ് ഒഴിവു സമയങ്ങളിൽ അവ വരച്ചു നോക്കണെ ..

എന്ന് സ്വന്തം
ശങ്കരിയാന്റി.

A) തീപ്പെട്ടി ചിത്രം (17)

ടെന്നീസ് റാക്കറ്റ്

ടെന്നീസ് റാക്കറ്റിന്റെ ചിത്രമുള്ള തീപ്പെട്ടി ചേർക്കുന്നു ….

ഒരു നെറ്റിന് മുകളിലൂടെ റാക്കറ്റ് ഉപയോഗിച്ച് പന്ത് അടിച്ചുകളിക്കുന്ന കളിയാണ് ടെന്നിസ്. ഫ്രാൻസ് ടെന്നീസിന്റെ ജന്മനാടായി കണക്കാക്കുന്നു.1872ൽ ആദ്യ ടെന്നീസ് ക്ലബ് ആയ ലാമിങ്ടൺ നിലവിൽ വന്നു.

ലോകത്തെ ഏറ്റവും പ്രധാനപ്പെട്ട ടെന്നീസ് മത്സര പരമ്പരകളെയാണ് ഗ്രാന്റ്സ്ലാം എന്ന് വിളിക്കുന്നത്. താഴെപ്പറയുന്ന നാല് ഗ്രാൻ‌റ്സ്ലാം ടൂർണ്ണമെൻ‌റുകൾ ആണ് ഇപ്പോഴുള്ളത്. ഓസ്‌‌ട്രേലിയൻ ഓപ്പൺ , ഫ്രഞ്ച് ഓപ്പൺ, യു എസ് ഓപ്പൺ, വിംബിൾഡൺ എന്നിവയാണ്.

എല്ലാ വർഷവും നടക്കുന്ന നാലു ഗ്രാൻസ്ലാം ടെന്നീസ് ടൂർണമെന്റുകളിൽ ആദ്യത്തേതാണ്‌ ഓസ്ട്രേലിയൻ ഓപ്പൺ. എല്ലാ വർഷവും ജനുവരിയിൽ മെൽബൺ പാർക്കിലാണ്‌ ഈ മത്സരം നടക്കുന്നത്. 1905-ൽ ആരംഭിച്ച ഈ ടൂർണമെന്റ് 1905 മുതൽ 1987- വരെ പുൽ മൈതാനത്തായിരുന്നു നടത്തിയിരുന്നത്. എന്നാൽ 1988 മുതൽ മെൽബൺ പാർക്കിലെ ഹാർഡ് കോർട്ടിലാണ്‌ ഈ മത്സരങ്ങൾ നടത്തപ്പെടുന്നത്.

എല്ലാ വർഷവും നടക്കുന്ന നാലു ഗ്രാൻസ്ലാം ടെന്നീസ് ടൂർണമെന്റുകളിൽ രണ്ടാമത്തേത് ആണ്‌ ഫ്രഞ്ച് ഓപ്പൺ. പാരീസിലെ റോളണ്ട് ഗാരോസ് സ്റ്റേഡിയത്തിലാണ് ഈ ടെന്നീസ് ടൂർണമെന്റ് നടത്തുന്നത്. ഇന്ന് കളിമൺ കോർട്ട് ഉപയോഗിക്കുന്ന ഏക ഗ്രാൻ‌റ്സ്ലാം ടൂർണ്ണമെന്റാണ് ഇത്. മെയ്, ജൂൺ മാസങ്ങളിലെ ഏതെങ്കിലും രണ്ട് ആഴ്ചകളിലാണ് ഫ്രഞ്ച് ഓപ്പൺ നടത്തുന്നത്.
എല്ലാ വർഷവും നടക്കുന്ന നാലു ഗ്രാൻസ്ലാം ടെന്നീസ് ടൂർണമെന്റുകളിൽ മൂന്നാമത്തെത് ആണ് വിംബിൾഡൺ.വിംബിൾഡൺ ആരംഭിച്ചത് 1877-ൽ ആണ്. 1884-ൽ ഡബിൾസും 1913-ൽ മിക്സഡ് ഡബിൾസും ആരംഭിച്ചു. എല്ലാ വർഷവും ജൂൺ മാസത്തിലെ അവസാനത്തെയും ജൂലൈ മാസത്തിലെ ആദ്യത്തേയും ആഴ്ചകളിലായിട്ടാണ്‌ മത്സരം നടക്കുക. പുൽമൈതാനത്താണ് വിംബിൾഡൺ മത്സരങ്ങൾ നടക്കുന്നത്. പുല്ലിൽ കളിക്കുന്ന ഒരേയൊരു ഗ്രാന്റ്സ്ലാം മത്സരവും ഇതാണ്.

എല്ലാ വർഷവും നടക്കുന്ന നാലു ഗ്രാൻസ്ലാം ടെന്നീസ് ടൂർണമെന്റുകളിൽ അവസാനത്തേ താണ് യു.എസ്. ഓപ്പൺ.എല്ലാ കൊല്ലവും ഓഗസ്റ്റ്/സെപ്റ്റംബർ മാസങ്ങളിലെ രണ്ടാഴ്ചയായാണ് ഈ ടൂർണമെന്റ് നടക്കുന്നത്.1978 മുതൽ ഈ ടൂർണമെന്റ് നടത്തുന്നത് .ഏറ്റവും കൂടുതൽ സമ്മാനത്തുകയുള്ള ഗ്രാൻ‌റ്സ്ലാം ടൂർണമെൻ‌റ് ആണ് യു.എസ്. ഓപ്പൺ.

ഏറ്റവും കൂടുതൽ ഗ്രാൻസ്ലാം കിരീടങ്ങൾ നേടിയത് റോജർ ഫെഡററാണ്. 1976 മുതൽ 1980 വരെ തുടർച്ചയായി വിംബിൾഡൺ ചാമ്പ്യനായിരുന്നത് ബ്യോൺ ബോർഗ് (സ്വീഡൻ) ആണ്. വിംബിൾഡൺ ജൂനിയർ കിരീടം നേടിയ ആദ്യ ഏഷ്യാക്കാരനാണ് രാമനാഥൻ കൃഷ്ണൻ. 1954ൽ ആണത്. ഇന്ത്യൻ ടെന്നിസിന്റെ അടുത്ത യുഗം ആരംഭിച്ചത് അമൃതരാജ് സഹോദരന്മാർ എന്നറിയപ്പെട്ട വിജയ് അമൃതരാജ്, ആനന്ദ് അമൃതരാജ് എന്നിവരിലൂടെയാണ്. പിന്നീട് മഹേഷ്ഭൂപതി – ലിയാൻഡർ പെയ്സ് സഖ്യം ഇന്ത്യൻ ടെന്നിസിന്റെ നടുനായകത്വം വഹിക്കുന്നവരായി. ഗ്രാൻറ്സ്ലാം ടൂർണമെൻ‌‌റിന്റെ ഒന്നാം റൌണ്ട് കടന്ന ആദ്യ ഇന്ത്യൻ വനിതയാണ് നിരുപമാ വൈദ്യനാഥൻ.

B) പദ ലളിതം

തുണി

വസ്ത്രമെന്നർഥത്തിൽ ഉപയോഗിക്കുന്ന പദമാണല്ലോ തുണി. എങ്ങനെയാണ് തുണിയെന്നപേര് ഉണ്ടായതെന്ന് ആലോചിക്കാം. തുണയെന്ന പദത്തിന് സഹായിക്കുകയെന്നാണല്ലോ അർത്ഥം. അപ്പോൾ തുണയ്ക്കുന്നത് തുണി. ശരീരം മറയ്ക്കാനാണല്ലോ തുണി ഉപയോഗിക്കുന്നത്. അതു കൊണ്ടാവാം ഈ പേര് ലഭിച്ചത്.

C) സ്ഥലനാമ കഥകൾ

കുട്ടീസ് ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ

കടപ്പാക്കട

കൊല്ലം നഗരത്തിന്റെ ഒരു പ്രധാനഭാഗമാണ് കടപ്പാക്കട.കൊല്ലം തുറമുഖത്ത് അനേകം പായ്ക്കപ്പലുകൾ വന്നുകൊണ്ടിരുന്ന പ്രദേശമാണ്.അപ്പോൾ തുറമുഖത്തിന് അടുത്തതായി കപ്പൽ പായ്കൾ നിർമ്മിച്ചിരുന്നുവെന്നു ചിന്തിക്കാം.അത് ഒരു കച്ചവടവും ആയിരുന്നു. കടൽ പായ്, കപ്പൽ പായ്‌ എന്നി പേരുകളിൽ ഇവ അറിയപ്പെട്ടു.ഇവ നിർമ്മിക്കുന്ന,കിട്ടുന്ന സ്ഥലം കടപ്പാകട.കടൽപ്പാകട ലോപിച്ച് കടപ്പാകടയായത് ആവാം.

D) കടങ്കഥകൾ (28)

1)ചുള്ളിക്കൊമ്പിൽ മഞ്ഞക്കിളി.

പറങ്കിമാങ്ങ

2)ചെടിയിൽ കായ, കായയിൽ ചെടി.

കൈതച്ചക്ക

3)ചെറുതിരിയൊന്നിൽ ചെറുമണി കുരുമണി.

കുരുമുളക്

4)ചോപ്പൻ കുളിച്ചാൽ കരിമ്പനാകും.

തീക്കട്ട

5)ജനനം ജലത്തിൽ, സഞ്ചാരം വായുവിൽ.

കൊതുക്

6)ജീവനില്ല, കാവൽക്കാരൻ.

സാക്ഷ

7)ഞാൻ തിന്നും വെള്ളാരങ്കല്ലിനെന്തു രസം.

കൽക്കണ്ടം

8)ഞാൻ പെറ്റകാലം മീൻ പെറ്റപോലെ വാലറ്റകാലം ഞാൻ പെറ്റകാലം.

തവള

9)തടയാം, നീക്കാം, ബന്ധിക്കാനൊക്കില്ല.

പുക

10)തല വട്ടിയിൽ, തടി തൊട്ടിയിൽ.

നെല്ല്