👬👫കുട്ടീസ് കോർണർ 👬👫 (എഴുപത്തിയൊന്നാം) ✍അവതരണം: സൈമ ശങ്കർ, മൈസൂർ

ഹായ് കുട്ടീസ്!!
ഈ ആഴ്ച നമുക്ക് A) തീപ്പെട്ടി ചിത്രം കണ്ടൊരു വിശദീകരണം, B) പദ ലളിതം (വാക്കുകളെ കുറിച്ചൊരു വിശദീകരണം), C)സ്ഥലനാമ കഥകൾ പിന്നെ കുറച്ചു D)കടംകഥകളും, കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ കുട്ടീസ് ഒഴിവു സമയങ്ങളിൽ അവ വരച്ചു നോക്കണെ ..

എന്ന് സ്വന്തം
ശങ്കരിയാന്റി.

A) തീപ്പെട്ടി ചിത്രം (16)

തേൾ

തേളിന്റെ ചിത്രമുള്ള തീപ്പെട്ടി ചേർക്കുന്നു….

അറ്ത്രോപോട ഫൈലത്തിൽ, അരാക്നിഡ വർഗത്തിലെ സ്കോർപിയോനിഡ ഗോത്രത്തിൽ പെടുന്ന ഒരു ജീവിയാണ് തേൾ . എട്ട് കാലുകളുള്ള, ചിറകില്ലാത്ത തേളിന്റെ വാലറ്റത്തുള്ള സഞ്ചിയിലാണ് വിഷം ശേഖരിച്ചു വച്ചിരിക്കുന്നത്. പരിണാമ പ്രക്രിയയിൽ ഏറ്റവും കുറവ് മാറ്റങ്ങൾക്കു വിധേയരായ ഒരു ജീവിവർഗ്ഗമാണ് തേൾ എന്നതിനാൽ ഇവയെ ജീവിക്കുന്ന ഫോസിൽ എന്നും വിളിക്കാറുണ്ട്. തേളുകളുടെ പൂർവ്വികർ ഏതാണ്ട് 45 കോടി വർഷങ്ങൾക്കു മുൻപ് ജീവിച്ചിരുന്നു എന്നാണ് പഠനങ്ങൾ തെളിയിക്കുന്നത്.അന്റാർട്ടിക്ക ഒഴികെ എല്ലായിടത്തും തേളുകളെ കാണാറുണ്ട്.
ഉഷ്ണ-മിതോഷ്ണ മേഖലാ പ്രദേശങ്ങളിലാണ് തേളുകളെ സാധാരണ കാണപ്പെടുന്നത്. പകൽസമയങ്ങളിൽ മണലിനകത്തും കുഴികളിലും മരപ്പൊത്തുകളിലും അവശിഷ്ടങ്ങൾ, ജീർണിച്ച തടികൾ, കല്ലുകൾ എന്നിവയ്ക്കടിയിലും പാറക്കെട്ടുകൾക്കിടയിലും ഇവ ഒളിഞ്ഞിരിക്കുന്നു.13 മി.മീ. മുതൽ 20 സെ.മീ. വരെ നീളമുള്ള നിരവധി ഇനം തേളുകളുണ്ട്. മൈക്രോബുത്തസ് പസില്ലസിന് 13 മി.മീ. മാത്രം നീളമുള്ളപ്പോൾ പാൻഡിനസ് ഇംപെറേറ്റർ എന്നയിനത്തിന് 20 സെന്റിമീറ്ററോളം നീളമുണ്ട്. 15 സെ.മീ. നീളമുള്ള പലമ്മിയുസ് സ്വമ്മെർഡാമി ഇനമാണ് ഇന്ത്യയിൽ കാണപ്പെടുന്നതിൽ ഏറ്റവും വലിപ്പം കൂടിയ തേൾ ഇനം. വിവിധ നിറത്തിലുള്ള തേളുകളുണ്ട്. ഉഷ്ണമേഖലാ പ്രദേശങ്ങളിലുള്ളവയ്ക്ക് പൊതുവേ തിളക്കമുള്ള കറുപ്പുനിറമാണ്; വാലിന്റെ അവസാന ഖണ്ഡത്തിനു പിന്നിലായി ടെൽസൻ എന്നറിയപ്പെടുന്ന മുള്ള് കാണപ്പെടുന്നു. ഇതിന് ഒരു വീർത്ത ഭാഗവും അതിനുള്ളിലായി രണ്ട് വിഷസഞ്ചികളുമുണ്ട്. വിഷസഞ്ചികളിൽനിന്നുമുള്ള സൂക്ഷ്മനാളികൾ മുള്ളിന്റെ അറ്റത്തുള്ള ചെറിയ സുഷിരത്തിലൂടെയാണ് പുറത്തേക്കു തുറക്കുന്നത്. തേളുകൾ വാൽ ഉയർത്തിപ്പിടിച്ചാണ് സഞ്ചരിക്കുന്നത്.
രാത്രികാലങ്ങളിലാണ് തേളുകൾ ഇരതേടാനിറങ്ങുന്നത്. ചെറു പ്രാണികളും ചിലന്തികളുമാണ് ഇവയുടെ മുഖ്യ ആഹാരം. മറ്റ് ആർത്രോപോഡുകളിൽനിന്ന് വ്യത്യസ്തമായി പെൺ തേളുകൾ കുഞ്ഞുങ്ങളെ പ്രസവിക്കുകയാണു പതിവ് .ശത്രുക്കളിൽനിന്ന് രക്ഷ നേടാനായി മുള്ള് പ്രയോജനപ്പെടുന്നു. തേൾ കടിക്കുന്ന ഭാഗത്ത് വേദനയും തടിപ്പും നിറം മാറ്റവുമുണ്ടാകും. മരണത്തിന് വരെ കാരണമാകത്തക്ക വിഷമുള്ള തേൾ ഇനങ്ങളുമുണ്ട്.

B) പദ ലളിതം

1 ) പട്ടി

പട്ടിയെ കുറിച്ച് ചിന്തിച്ചാലോ?.മനുഷ്യനുമായി ഇണങ്ങി ജീവിക്കുന്ന മൃഗങ്ങളിൽ ഒന്നാംസ്ഥാനം പട്ടിയ്ക്ക് ആണ്. ഈ ജന്തുവിനെ എന്താണ് പട്ടിയെന്നു വിളിക്കാൻ കാരണം.പടിഞ്ഞുകിടക്കുന്ന ശിലം ഇതിന്റെ സ്വഭാവമാണ്. പടിഞ്ഞുകിടക്കുന്നത് പട്ടി. അപ്പോൾ പടിയെക്കുറിച്ച് കൂടി ചിന്തിച്ചു നോക്കൂ കുട്ടീസ്

C) സ്ഥലനാമ കഥകൾ

കുട്ടീസ് ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ

ചിന്നക്കട

കൊല്ലം ജില്ലയിൽ കൊല്ലത്തുള്ള പ്രസിദ്ധമായ വ്യവസായ കേന്ദ്രമാണ് ചിന്നക്കട.ഇത് ഒരു കാലത്ത് ചിനക്കടയായിരുന്നു.ചൈന(ചിന)യുമായുള്ള വാണിജ്യം ഇല്ലാതായപ്പോൾ ചിനക്കടയെ ജനങ്ങൾ ചിന്നക്കടയാക്കിയതാവാം.ചിന്നക്കടയുമായി യോജിക്കാനാവണം അടുത്തുള്ള അങ്ങാടിക്ക്‌ വലിയകട എന്ന് പേരിട്ടത്.

D) കടങ്കഥകൾ (27)

1)കൊക്കിരിക്കും കുളം വറ്റി വറ്റി.

നിലവിളക്ക്

2)കൊച്ചിയിൽ വിതച്ചത് കൊല്ലത്ത് കായ്ച്ചു.

വെള്ളരിക്ക

3)കോലിൽ തൂങ്ങും പൂമഴ വർഷം.

പൈപ്പുവെള്ളം

4)ചത്ത പോത്ത് കോലെടുത്താലോടും.

തോണി

5)ചത്തവന്റെ വയറ്റിൽ ചുട്ടവനെ കയറ്റി.

ചക്ക മുറിക്കുക

6)ചത്താലേ മിണ്ടുള്ളൂ ചങ്കൂച്ചാര്.

ശംഖ്

7)ചില്ലിക്കൊമ്പിൽ ഗരുഡൻതൂക്കം.

വവ്വാൽ

8)ചില്ലിക്കൊമ്പത്തെ മഞ്ഞപക്ഷി

മാമ്പഴം

9)ചുരുട്ടീട്ടും ചുരുട്ടീട്ടും തീരാത്ത പായ.

റോഡ്

10)ചുവന്നിരിക്കുന്നവൻ കറുത്തുവരുമ്പോൾ വെള്ളത്തിൽമുക്കിയൊരടി.

സ്വർണ്ണം