👬👫കുട്ടീസ് കോർണർ 👬👫 (അറുപത്തിയഞ്ചാം വാരം)

ഹായ് കുട്ടീസ്!!
ഈ ആഴ്ച നമുക്ക് A)തീപ്പെട്ടി ചിത്രം കണ്ടൊരു വിശദീകരണം, B) പദ ലളിതം(വാക്കുകളെ കുറിച്ചൊരു വിശദീകരണം ),
C) സ്ഥലനാമ കഥകൾ പിന്നെ കുറച്ചു D)കടംകഥകളും,
കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ കുട്ടീസ് ഒഴിവു സമയങ്ങളിൽ അവ വരച്ചു നോക്കണെ ..

എന്ന് സ്വന്തം
ശങ്കരിയാന്റി.

A) തീപ്പെട്ടി ചിത്രം (10)

വാഴപ്പഴം

വാഴപ്പഴത്തിന്റെ ചിത്രമുള്ള തീപ്പെട്ടികൾ ചേർക്കുന്നു.

വാഴപ്പഴം ലോകത്തിലെ ഏറ്റവും ജനപ്രിയവും ആരോഗ്യകരവുമായ പഴങ്ങളിൽ ഒന്നാണ്. ഇത് ഹൃദ്യവും രുചികരവും തൽക്ഷണം ഊർജ്ജസ്വലവുമാണ്. മറ്റ് ഭക്ഷണങ്ങളെപ്പോലെ വാഴപ്പഴത്തിന്റെ ഗുണങ്ങളെ അവയുടെ രാസഘടനയാണ് പൂർണ്ണമായും നിർണ്ണയിക്കുന്നത്. പോഷകസമൃദ്ധവും ഊര്‍ജ്ജ ദായകവുമാണ് വാഴപ്പഴം . പ്രകൃതി മനുഷ്യന് കനിഞ്ഞു നല്‍കിയ മാന്ത്രിക ഫലം എന്നാണ് വാഴപ്പഴത്തെ വിശേഷിപ്പിക്കാറ്. പലതരം പഴങ്ങളാണ് മിക്ക ആളുകളുടെയും ഭക്ഷണക്രമത്തിൽ പ്രധാന ഭാഗം. ഏറെ പോഷക സമ്പുഷ്ടമാണ് പഴങ്ങൾ. അവയിൽ ഏറ്റവും പ്രധാനമാണ് വാഴപ്പഴത്തിന്റെ സ്ഥാനം.
തെക്കുകിഴക്കൻ ഏഷ്യ (മലായ് ദ്വീപസമൂഹം) ആണ് വാഴപ്പഴത്തിന്റെ ജന്മദേശം, ബിസി പതിനൊന്നാം നൂറ്റാണ്ട് മുതൽ വാഴപ്പഴം പ്രത്യക്ഷപ്പെട്ടു ,വാഴപ്പഴം ഏറ്റവും രുചികരവും മറ്റു പഴങ്ങളെ അപേക്ഷിച്ചു വിലക്കുറവും എല്ലാ സീസണിലും ലഭ്യമാകുന്നതുമാണ്. സാധാരണക്കാരൻ തന്റെ ആഹാരത്തിൽ ഒരു ദിവസം ഒരു പഴം ഉൾപ്പെടുത്താൻ പ്രധാനമായും തിരഞ്ഞെടുക്കുന്നത്.
പഴം പ്രകൃതിയുടെ ഒരു ഉത്തമ ഔഷധമാണ്. ആപ്പിളിനെക്കാൾ നാലിരട്ടി പ്രൊട്ടീനും രണ്ടു മടങ്ങു കാർബോഹൈഡ്രേറ്റും മൂന്നു മടങ്ങു ഫോസ്ഫറസും അഞ്ചിരട്ടി വിറ്റാമിൻ എയും ഇരുമ്പും ഇരട്ടി മറ്റു വിറ്റാമിനുകളും മിനറലുകളും വാഴപ്പഴത്തിൽ ഉണ്ട്.

B) പദ ലളിതം

കോഴി

കോഴി എന്ന പദം കേൾക്കാത്തവർ ചുരുക്കം. മനുഷ്യനുമായി ഇണങ്ങി ജീവിക്കുന്ന പക്ഷികളിൽ ഒന്ന്. കോഴിയെന്ന പേര് എങ്ങനെ ലഭിച്ചുയെന്ന് ചിന്തിച്ചിട്ടുണ്ടോ?.ആലോചിച്ചുനോക്കു അതിന്റെ രൂപം.കോടിയത് (വളഞ്ഞത്)_കോടി.കോട്ടം, കോടുക എന്നിപ്രയോഗങ്ങൾ ഭാഷയിൽ ഉണ്ട്. കോടി കോഴിയായതാവാം.ട_ഴ വിനിമയം ഉണ്ടായിരുന്നിരിക്കാം. അല്ലെങ്കിൽ ഉച്ചാരണത്തിലൂടെ.

C) സ്ഥലനാമ കഥകൾ

കുട്ടീസ് ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ

ചേലക്കര

പഴയകാലത്ത് ചേലക്കരയിലെ റോഡുകള്‍ക്കിരുവശവും ആല്‍ തുടങ്ങിയ ധാരാളം ചേലവൃക്ഷങ്ങള്‍ തിങ്ങിവളര്‍ന്നിരുന്നുവത്രെ. ചേലമരങ്ങളുള്ള കര എന്ന പ്രയോഗത്തില്‍ നിന്നാണ് ചേലക്കര എന്ന സ്ഥലനാമം ഉണ്ടായതെന്ന് കരുതുന്നു. പഴയ കൊച്ചിനാട്ടുരാജ്യത്തിന്റെ ഭാഗമായിരുന്നു ഈ പ്രദേശം.കുലശേഖരവര്‍മ്മയുടെ സഹോദരീപുത്രനും പെരുമ്പടപ്പ് സാമൂതിരിയുടെ മകനുമായ ഒരു രാജാവാണ് പെരുമ്പടപ്പ് സ്വരൂപത്തിന് രൂപം കൊടുത്തത്. അദ്ദേഹമായിരുന്നു കേരളത്തിലെ ഒടുവിലത്തെ ചേരമാന്‍ പെരുമാള്‍. പെരുമ്പടപ്പ് സ്വരൂപത്തിന്റെ ആസ്ഥാനം പൊന്നാനി താലൂക്കിലെ വന്നരിയിലുള്ള പെരുമ്പടപ്പില്‍ തന്നെ ആയിരുന്നു.

D) കടങ്കഥകൾ (21)

1)തേങ്ങാപ്പൂളൊരു തേങ്ങാമുറിയായ്.

ചന്ദ്രൻ

2)തേൻകുടത്തിലൊറ്റക്കണ്ണൻ.

ചക്കക്കുരു

3)തൊട്ടാൽ ചൊറിയൻ തിന്നാൻ രസികൻ.

ചേന

4)തൊട്ടാൽ പിണങ്ങും ചങ്ങാതി.

തൊട്ടാവാടി

5)തൊട്ടാൽ പൊട്ടും ഇംഗ്ലീഷ് മുട്ട.

കുമിള

6)തോളിൽ തൂങ്ങുന്ന തല്ലുകൊള്ളി.