📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 17 | ചൊവ്വ ✍ കപിൽ ശങ്കർ

ഭൂമി ഏറ്റെടുത്തതിനു നഷ്ടപരിഹാരം നല്‍കാന്‍ ഹൈക്കോടതി വിധിച്ചിട്ടും സര്‍ക്കാര്‍ നല്‍കാത്തതിനെ തുടര്‍ന്ന് കൊല്ലം കളക്ടറേറ്റ് കെട്ടിടവും രണ്ട് ഏക്കറോളം സ്ഥലവും കൊല്ലം സബ് കോടതി ജപ്തി ചെയ്തു. ഏറ്റെടുത്ത ഭൂമിയ്ക്കു കോടതി വിധി ഉണ്ടായിട്ടും നഷ്ടപരിഹാരം കോടതിയില്‍ കെട്ടിവയ്ക്കാത്തതിനെ തുടര്‍ന്നാണ് കോടതി നടപടി.2003ല്‍ കൊല്ലം കോര്‍പറേഷന്‍ നഗരസഭ ആയിരുന്ന ഘട്ടത്തില്‍ ബസ് ടെര്‍മിനല്‍ കം ഷോപ്പിംഗ് കോംപ്ലക്‌സ് പദ്ധതി നടപ്പാക്കാന്‍ റെയിവേ ഭൂമി ഏറ്റെടുത്തിരുന്നു. ഇതിനു പകരം ചിന്നക്കട ഉപാസന ആശുപത്രിക്കുസമീപം കൊല്ലം – തിരുമംഗലം പാതയുടെ വശത്തുള്ള വിജയലക്ഷ്മി കാഷ്യു ഫാക്ടറി ഉടമ പരേതനായ കെ.രവീന്ദ്രന്‍ നായരുടെ 1.23 ഏക്കര്‍ ഏെറ്റടുത്തിരുന്നു.അന്ന് 1.13 കോടി രുപയാണ് സര്‍ക്കാര്‍ നഷ്ടപരിഹാരം നിശ്ചയിച്ചത്. എന്നാല്‍ തുക കുറഞ്ഞു പോയതിനെ തുടര്‍ന്ന് സ്ഥലം ഉടമ കോടതിയെ സമീപിച്ചു. കൊല്ലം സബ് കോടതി നഷ്ടപരിഹാരം എട്ടു കോടിയായി ഉയര്‍ത്തി ഉത്തരവിട്ടു. എന്നാല്‍ സബ് കോടതി വിധിച്ച നഷ്ടപരിഹാരം കുറവാണെന്നു കാട്ടി ഭൂവുടമയും കൂടുതലാണെന്ന് കാട്ടി കോര്‍പറേഷനും ഹൈക്കോടതിയെ സമീപിച്ചു.ഹൈക്കോടതി കോര്‍പറേഷന്‍റെ ഹർജി തള്ളി നഷ്ടപരിഹാരം 12.43 കോടിയായി ഉയര്‍ത്തി വിധി പ്രസ്താവിച്ചു. ഭൂവുടമ ഹൈക്കോടതി വിധി നടപ്പാക്കണമെന്ന് ആവശ്യപ്പെട്ട് കൊല്ലം സബ് കോടതിയില്‍ ഹർജി ഫയല്‍ ചെയ്തു. എന്നാൽ നഷ്ടപരിഹാര തുക കോടതിയില്‍ കെട്ടി വയ്ക്കാന്‍ സര്‍ക്കാര്‍ തയാറായില്ല.
ഇതേ തുടര്‍ന്നാണ് കളക്ടറ്റേും സ്ഥലവും കോടതി ജപ്തി ചെയ്ത് പണം ഈടാക്കാനുള്ള നപടി സ്വീകരിച്ചത്. അതിനിടെ ജപ്തി നടപടി പിന്‍വലിക്കാനും ഹൈക്കോടതി വിധി സ്‌റ്റേ ചെയ്യാനുമുള്ള നിയമ നടപടി സര്‍ക്കാര്‍ ആരംഭിച്ചിട്ടുണ്ട്.

🔹2024-25 വർഷം മികച്ച പ്രവർത്തനം കാഴ്ചവച്ച തദ്ദേശ സ്വയംഭരണ സ്ഥാപനങ്ങൾക്ക് സംസ്ഥാന സർക്കാർ നൽകുന്ന സ്വരാജ് ട്രോഫി, മഹാത്മാ, മഹാത്മാ അയ്യങ്കാളി, ലൈഫ് മിഷൻ പുരസ്‌കാരങ്ങൾ പ്രഖ്യാപിച്ചു. മികച്ച ജില്ലാ പഞ്ചായത്തുകൾക്കുള്ള സ്വരാജ് ട്രോഫി കൊല്ലം കരസ്ഥമാക്കി. കണ്ണൂർ ജില്ലാ പഞ്ചായത്ത് രണ്ടാം സ്ഥാനവും നേടി.ബ്ലോക്ക് പഞ്ചായത്തുകളിൽ സംസ്ഥാനതലത്തിൽ നേമം ബ്ലോക്ക് പഞ്ചായത്ത് (തിരുവനന്തപുരം) ഒന്നാം സ്ഥാനവും കൊടകര ബ്ലോക്ക് പഞ്ചായത്ത് (തൃശൂർ) രണ്ടാം സ്ഥാനവും കരസ്ഥമാക്കി. പെരുമ്പടപ്പ് ബ്ലോക്ക് പഞ്ചായത്ത് (മലപ്പുറം), ഉഴവൂർ ബ്ലോക്ക് പഞ്ചായത്ത് (കോട്ടയം) എന്നിവ മൂന്നാം സ്ഥാനം പങ്കിട്ടു.ഗ്രാമ പഞ്ചായത്തുകളിൽ സംസ്ഥാനതലത്തിൽ ഉഴമലയ്ക്കൽ പഞ്ചായത്ത് (തിരുവനന്തപുരം) ഒന്നാം സ്ഥാനവും എളവള്ളി പഞ്ചായത്ത് (തൃശൂർ) രണ്ടാം സ്ഥാനവും മാണിയൂർ പഞ്ചായത്ത് (കോഴിക്കോട്) മൂന്നാം സ്ഥാനവും നേടി.മുനിസിപ്പാലിറ്റികളിൽ സംസ്ഥാനതലത്തിൽ ഗുരുവായൂർ മുനിസിപ്പാലിറ്റി (തൃശൂർ) ഒന്നാം സ്ഥാനവും മട്ടന്നൂർ മുനിസിപ്പാലിറ്റി (കണ്ണൂർ) രണ്ടാം സ്ഥാനവും കുന്നംകുളം മുനിസിപ്പാലിറ്റി (തൃശൂർ) മൂന്നാം സ്ഥാനവും നേടി. മുനിസിപ്പൽ കോർപറേഷൻ വിഭാഗത്തിൽ തിരുവനന്തപുരം കോർപറേഷൻ ഒന്നാം സ്ഥാനം നേടി.

🔹തിരുവനന്തപുരം വിഴിഞ്ഞത്ത് രണ്ടു പേർ മരിച്ചത് ഭക്ഷ്യവിഷബാധയെത്തുടർന്നെന്ന് സംശയം. കൊല്ലം നിലമേൽ സ്വദേശികളായ റഷീദാ ബീവി, മരുമകൻ ഷാജി എന്നിവരാണ് മരിച്ചത്. ഇന്നലെ തിരുവനന്തപുരം എത്തിയ ഇവരുടെ കുടുംബം വിഴിഞ്ഞത്തെ സായാഹ്ന ഹോട്ടലിൽനിന്ന് ഭക്ഷണം കഴിച്ചിരുന്നു. പിന്നാലെ അസ്വസ്ഥതകൾ അനുഭവപ്പെട്ട് ഇവർ ചികിത്സ തേടിയെങ്കിലും ജീവൻ രക്ഷിക്കാനായില്ല.
വിഴിഞ്ഞത്ത് വൈകിട്ട് മാത്രം തുറക്കുന്ന ഹോട്ടലിൽ നിന്നാണ് ഇവർ ഭക്ഷണം കഴിച്ചത്. ഈ ഹോട്ടൽ പോലീസ് പൂട്ടിച്ചു.
മരിച്ച രണ്ട് പേരും നിലവിൽ ആശുപത്രിയിലുള്ളയാളും മീൻ മുട്ട കൊണ്ടുള്ള വിഭവം കഴിച്ചതായാണ് വിവരം. ഒപ്പമുണ്ടായിരുന്ന ഒരാൾ ചികിത്സയിൽ കഴിയുകയാണ്. ഇവർക്കൊപ്പം ഭക്ഷണം കഴിച്ചത് ആറ് പേരിൽ നാല് പേർക്കാണ് അസ്വസ്ഥത അനുഭവപ്പെട്ടത്.
ഷാജിയുടെ ഭാര്യ സജീന പാരിപ്പള്ളി ആശുപത്രിയിലെ ഐസിയുവിൽ ഗുരുതരാവസ്ഥയിലാണ്. സജീന ഉൾപ്പെടെ നാല് പേരാണ് ചികിത്സയില്‍ കഴിയുന്നത്. തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയ്ക്കിടെയാണ് ഷാജി മരിച്ചത്. നിലമേൽ ആശുപത്രിയിൽ ചികിത്സയ്ക്കിടെയാണ് റഷീദ ബീവി മരിക്കുന്നത്.

🔹തൊടുപുഴ മുതലക്കോടത്ത് റോഡരികിലെ കുഴിയിൽ വീണ് ബൈക്ക് യാത്രികനായ യുവാവ് മരിച്ചു. മുതലക്കോടം സ്വദേശി ജെയ്സ് ബെന്നി (27) ആണ് മരിച്ചത്. തിങ്കളാഴ്ച രാത്രിയാണ് സംഭവം.കലുങ്ക് നിർമാണത്തിനായി റോഡരികിൽ എടുത്ത കുഴിയിൽ വീണാണ് അപകടം. ഒരു മാസത്തിലേറെയായി കുഴി മൂടാതെ അപകടാവസ്ഥയിൽ തുടരുകയായിരുന്നു.

🔹പുറമേരിയിലെ ഭക്ഷണശാലയിൽ നൽകിയ പൊറോട്ടയ്ക്ക് ചൂട് കുറവാണെന്നാ
രോപിച്ച് ഫാസ്റ്റ് ഫുഡ് കട ആക്രമിച്ച് യുവാവ്. കടയുടമ വെള്ളിക്കുളങ്ങര സ്വദേശി സാദിഖിനെയും യുവാവ് ആക്രമിച്ചു.കടയുടെ ചില്ല് അടിച്ച് തകർക്കുകയും ചെയ്തു. തിങ്കളാഴ്ച രാത്രി ഏഴോടെയാണ് സംഭവം. പുറമേരിയിലെ ബിരിയാണി ഡേയ്‌സ് എന്ന ഫാസ്റ്റ് ഫുഡ് കടയ്ക്കു നേരെയായിരുന്നു ആക്രമണം.
കടയിൽ പതിവായി വരാറുള്ള, എല്ലാവർക്കും പരിചിതനായ ഒരാളാണ് ഇത്തരത്തിൽ പ്രകോപനമില്ലാതെ അതിക്രമം നടത്തിയ
തെന്ന് ഉടമ മൊഴി നൽകിയിട്ടുണ്ട്. തിങ്കളാഴ്ച വൈകീട്ടോടെ ഇയാൾ കടയിൽ വന്ന് പൊറോട്ടയും ബീഫ് റോസ്റ്റും ഓർഡർ ചെയ്തിരുന്നു. പിന്നാലെ വിളമ്പിയ പൊറോട്ടയ്ക്ക് ചൂട് കുറവാണെന്നും ഭക്ഷണത്തിന് രുചിയില്ലെന്നും പറഞ്ഞ് ഇയാൾ കടയിൽ ബഹളമുണ്ടാക്കാൻ തുടങ്ങി.വളരെ മോശം ഭക്ഷണമാണെന്ന് ഇയാൾ ആരോപിച്ചു. ഈ സമയത്ത് കടയുടമയായ സാദിഖ് ഇയാളെ അനുനയിപ്പിക്കാൻ ശ്രമിച്ചു. ഭക്ഷണം ഇഷ്ടപ്പെട്ടില്ലെങ്കിൽ അത് തിരികെ എടുക്കാമെന്നും അല്ലെങ്കിൽ പണം തിരിച്ചു നൽകാമെന്നും സാദിഖ് പറഞ്ഞു. എന്നാൽ കടയിൽ നിന്ന് പുറത്തുപോയ ഇയാൾ പിന്നീട് തിരിച്ചെത്തി ആക്രമണം നടത്തുകയായിരുന്നു.

🔹 വീടിനുള്ളിൽ അസ്ഥികൂടം കണ്ടെത്തിയ സംഭവത്തിൽ പോലീസ് അന്വേഷണം ഊർജിതമാക്കി. ചിറമനേങ്ങാട് നെല്ലിക്കുന്നിലെ വീട്ടിൽ നിന്ന് കണ്ടെത്തിയത് 42-45 വയസിനിടയിൽ പ്രായമുള്ള സ്ത്രീയുടേതാണെന്നും അസ്ഥികൂടത്തിന് 152 സെന്‍റിമീറ്റർ ഉയരമുണ്ടെന്നും ഫോറൻസിക് വിഭാഗത്തിന്‍റെ പരിശോധനയിൽ വ്യക്തമായി. അസ്ഥികൂടത്തിലുണ്ടായിരുന്ന ഏലസിൽ ഖുറാൻലിഖിതവും ഉള്ളതായി കണ്ടെത്തിയിട്ടുണ്ട്.ചിറമനേങ്ങാട് നെല്ലിക്കുന്ന് പാടശേഖരത്തിനുസമീപം ആൾത്താമസമില്ലാത്ത വീടിന്‍റെ വരാന്തയിലാണ് കുഴിച്ചിട്ടനിലയിൽ തലയോട്ടിയും അസ്ഥികളും കണ്ടെത്തിയത്. മൂന്നുവർഷം മുമ്പാണ് ഈ വീട്ടിൽ താമസമുണ്ടായിരുന്നത്. ആലപ്പുഴയിലുള്ള സ്ത്രീകളടക്കമുള്ള ഒരു കുടുംബവും ഇതരസംസ്ഥാന തൊഴിലാളികളുമാണ് ഇവിടെ താമസിച്ചിരുന്നതെന്നു നാട്ടുകാർ പറയുന്നു.അടഞ്ഞുകിടന്നിരുന്ന വീട് പഴയ ഉടമസ്ഥന്‍റെ കൈയിൽനിന്നു രണ്ടുവർഷംമുമ്പ് മറ്റൊരാൾ വാങ്ങിയിരുന്നു. ഞായറാഴ്ച വൈകുന്നേരും വീടിന്‍റെ പിന്നിലെ ചായ്പിന്‍റെ നിലം പൊളിക്കുന്നതിനിടയിലാണ് അസ്ഥികൂടം കണ്ടെത്തിയത്. തുണികളിലും പായയിലും പൊതിഞ്ഞനിലയിലാണ് മൃതദേഹം കുഴിച്ചിട്ടിരുന്നത്.

🔹കുന്നത്തു പടിയിൽ കാട്ടു തേനീച്ചയുടെ കുത്തേറ്റ് നിരവധി പേർക്ക് പരിക്ക്.ഇന്നലെ ഉച്ചയ്ക്ക് 12 മുതലാണ് ഇളകിയ തേനീച്ചകൂട്ടം ആളുകളെ കുത്താൻ തുടങ്ങിയത്.കോടഞ്ചേരി സ്വദേശികളായ ജോസ് കുന്നത്ത്, അതുൽ സണ്ണി ഇളയിടത്ത്, ബിജു വളയത്തിൽ, ബാബു പുളിമൂട്ടിൽ, മക്കോളിൽ ഷീന, മകൻ ജിയോസ്, ചെറുപുഴ സ്വദേശി കെ.ജെ. സംഗീത്, മീനങ്ങാടി സ്വദേശി എം.കെ. സുനിൽ, ചെമ്പുകടവ് സ്വദേശി കളപ്പുരക്കൽ ഷാജി എന്നിവർക്കാണ് തേനീച്ചയുടെ കുത്തേറ്റത്.
പരിക്കേറ്റവരെ കോടഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു.
പരുന്തിന്‍റെ ആക്രമണത്തിൽ കാട്ടുതേനീച്ചക്കൂട്ടം ഇളകിയതാണെന്ന് സംശയിക്കുന്നു.

🔹നാല് വർഷത്തിനുള്ളിൽ വിജയകരമായി അയ്യായിരം തിമിര ശസ്ത്രക്രിയകൾ പൂർത്തിയാക്കി നെടുമങ്ങാട് ജില്ലാ ആശുപത്രിയിലെ നേത്രരോഗ വിഭാഗം. ശാസ്തമംഗലം സ്വദേശിനി രാഗലതികയ്ക്ക് (70) ശസ്ത്രക്രിയ നടത്തിയാണ് റിക്കാർഡ് തികച്ചത്.
ഡോ. ദീപ്തിലാൽ നേതൃത്വം നൽകുന്ന വിപുലമായ ടീമാണ് നേട്ടത്തിന് പിന്നിൽ. കഴിഞ്ഞ രണ്ടു വർഷം ഏറ്റവും കൂടുതൽ തിമിര ശസ്ത്രക്രിയകൾ ചെയ്തതിനു ഡോ. ദീപ്തിലാലിന് സംസ്ഥാന ആരോഗ്യവകുപ്പ് മികവിനുള്ള അവാർഡും കെജിഎംഒഎ സ്പെഷാലിറ്റി കേഡറിലെ മികച്ച ഡോക്ടർക്കുള്ള പുരസ്കാരവും ലഭിച്ചിരുന്നു.
വേദനയോ മുറിവോ ഇല്ലാത്ത “ടോപ്പിക്കൽ ഫേക്കോ’ ശസ്ത്രക്രിയയാണ് നെടുമങ്ങാട് ആശുപത്രിയിൽ ചെയ്യുന്നത്. ഇഞ്ചക്ഷൻ ആവശ്യമില്ലാത്ത ഈ രീതിയിലൂടെ നൂറിലധികം ശസ്ത്രക്രിയ ഓരോമാസവും നടക്കുന്നുണ്ട്. ലേസർ ചികിത്സ, ഇൻട്രാവിട്രിയൽ ഇൻജക്‌ഷൻ, ഗ്ലോക്കോമ ചികിത്സ എന്നിവയും ലഭ്യമാണ്. സർക്കാർ, ജില്ലാ പഞ്ചായത്ത്, നഗരസഭ എന്നിവയുടെ സഹായത്തോടെ മൂന്നു കോടി രൂപയുടെ അത്യാധുനിക ഉപകരണങ്ങളാണു സജ്ജീകരിച്ചിരിക്കുന്നത്. ടീം വർക്കിന്‍റെ ഫലമാണ് നേത്രരോഗ വിഭാഗം കൈവരിച്ച നേട്ടത്തിന് പിന്നിലെന്നു ഡോ. ദീപ്തിലാൽ പറഞ്ഞു.

🔹കൃഷിക്കും മനുഷ്യജീവനും ഭീഷണിയാകുന്ന കാട്ടുപന്നികളെ വെടിവച്ച് കൊല്ലുന്നതില്‍ ഷൂട്ടര്‍മാര്‍ക്കും തോക്കിനും ഏര്‍പ്പെടുത്തിയ നിയന്ത്രണം സര്‍ക്കാര്‍ മരവിപ്പിച്ചെങ്കിലും കൊന്നു മറവുചെയ്യുന്നതിനുള്ള പ്രതിഫലത്തിന് വര്‍ധനവില്ല.
തോക്കും ലൈസന്‍സുമുള്ള ഷൂട്ടറുടെ ഓണറേറിയം 1500 രൂപ. യാത്രച്ചെലവിനുപോലും ഈ തുക മതിയാവില്ല. ചില ജില്ലകളില്‍ ഷൂട്ടര്‍മാരുടെ ടീം വേട്ടനായ്ക്കള്‍ക്കൊപ്പമാണ് ഓപ്പറേഷനെത്തുക. മണ്ണെണ്ണ ഒഴിച്ച് പന്നിയെ ആഴത്തില്‍ മറവു ചെയ്യാന്‍ അനുവദിക്കുന്നതാവട്ടെ രണ്ടായിരം രൂപ.നാട്ടില്‍ കാട്ടുപന്നികളെ ഇല്ലായ്മ ചെയ്യാന്‍ ഗ്രാമ പഞ്ചായത്തുകള്‍ക്ക് അധികാരം നല്‍കിയതിനുശേഷം സംസ്ഥാനത്ത് അയ്യായിരത്തോളം പന്നികളെ കൊന്നിട്ടുണ്ട്. പാലക്കാട്ടാണ് കൂടുതല്‍ കൊന്നത് -1500. രണ്ടാമത് മലപ്പുറം-850, മൂന്നാമത് തിരുവനന്തപുരം -800.തുടക്കത്തില്‍ കാട്ടുപന്നികളെ കൊല്ലാനുള്ള ചെലവ് അതാത് പഞ്ചായത്ത് തനത് ഫണ്ടില്‍നിന്ന് വിനിയോഗിക്കുകയായിരുന്നു. ഇത് ഗ്രാമപഞ്ചായത്തുകള്‍ക്കു അധികബാധ്യതയായതോടെ സംസ്ഥാന ദുരന്ത നിവാരണ ഫണ്ടില്‍ നിന്നു നല്‍കാന്‍ സര്‍ക്കാര്‍ തീരുമാനിച്ചിരുന്നു. എന്നാല്‍ പഞ്ചായത്തുകള്‍ക്ക് സമയബന്ധിതമായി ഈ തുക ലഭിക്കുന്നില്ല.

🔹സംസ്ഥാനത്ത് ചൂട് കൂടുന്ന സാഹചര്യത്തിൽ അൾട്രാവയലറ്റ് രശ്മികളെയും സൂക്ഷിക്കണമെന്ന മുന്നറിയിപ്പുമായി ദുരന്തനിവാരണ അതോറിറ്റി.
സംസ്ഥാന ദുരന്ത നിവാരണ അതോറിറ്റി സ്ഥാപിച്ച 14 സ്റ്റേഷനുകളിലെ തത്സമയ അൾട്രാവയലറ്റ് സൂചിക പ്രകാരം കഴിഞ്ഞ 24 മണിക്കൂറിൽ ഏറ്റവും കൂടുതൽ പതിച്ചത് ആറു ജില്ലകളിലാണ്. അൾട്രാവയലറ്റ് സൂചികയിൽ ആറ് രേഖപ്പെടുത്തിയ ഇവിടങ്ങളിൽ യെല്ലോ അലർട്ടാണ് പ്രഖ്യാപിച്ചിരിക്കുന്നത്.
കൊല്ലം ജില്ലയിലെ കൊട്ടാരക്കര (ആറ്), പത്തനംതിട്ട ജില്ലയിലെ കോന്നി (ആറ്), ആലപ്പുഴ ജില്ലയിലെ ചെങ്ങന്നൂർ (ആറ്), കോട്ടയം ജില്ലയിലെ ചങ്ങനാശേരി (ആറ്), ഇടുക്കി ജില്ലയിലെ മൂന്നാർ (ആറ്), വയനാട് ജില്ലയിലെ മാനന്തവാടി (ആറ്) എന്നിവിടങ്ങളിലാണ് യെല്ലോ അലർട്ടുള്ളത്.
അൾട്രാവയലറ്റ് സൂചിക 11ന് മുകളിലാണെങ്കിൽ റെഡ് അലർട്ടും എട്ടുമുതൽ 10 വരെ ഓറഞ്ച് അലർട്ടും ആറു മുതൽ ഏഴുവരെ യെല്ലോ അലർട്ടുമാണ് നല്കുന്നത്.
തുടർച്ചയായി കൂടുതൽ സമയം അൾട്രാവയലറ്റ് രശ്മികൾ ശരീരത്തിൽ ഏൽക്കുന്നത് സൂര്യാതപത്തിനും ത്വക്ക് രോഗങ്ങൾക്കും നേത്രരോഗങ്ങൾക്കും മറ്റ് ആരോഗ്യ പ്രശ്നങ്ങൾക്കും കാരണമായേക്കാം. പൊതുജനങ്ങൾ സുരക്ഷാമുൻകരുതലുകൾ സ്വീകരിക്കണം.
പകൽ 10 മണി മുതൽ മൂന്നു മണി വരെയുള്ള സമയങ്ങളിലാണ് ഉയർന്ന അൾട്രാവയലറ്റ് സൂചിക രേഖപ്പെടുത്തപ്പെടുന്നത്. ആയതിനാൽ ആ സമയങ്ങളിൽ കൂടുതൽ നേരം ശരീരത്തിൽ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കുക.പുറം ജോലികളിൽ ഏർപ്പെടുന്നവർ, കടലിലും ഉൾനാടൻ മത്സ്യബന്ധനത്തിലും ഏർപ്പെടുന്ന മത്സ്യത്തൊഴിലാളികൾ, ജലഗതാഗതത്തിലേർപ്പെടുന്നവർ, ബൈക്ക് യാത്രക്കാർ, വിനോദസഞ്ചാരികൾ, ചർമരോഗങ്ങളുള്ളവർ, നേത്രരോഗങ്ങളുള്ളവർ, കാൻസർ രോഗികൾ, മറ്റ് രോഗപ്രതിരോധശേഷി കുറഞ്ഞ വിഭാഗങ്ങൾ തുടങ്ങിയവർ പ്രത്യേകം ജാഗ്രത പാലിക്കണം.

🔹തമിഴ്നാട് വെല്ലൂരിൽ രഥഘോഷയാത്രയ്ക്കിടെ രഥം മറിഞ്ഞ് ഏഴ് പേർക്ക് ഗുരുതര പരിക്ക്. വെല്ലൂരിൽ ശിവരാത്രിക്കു പിറ്റേന്നു നടത്തുന്ന ഒരു പ്രധാനപ്പെട്ട പ്രാദേശിക ഉത്സവമായ മായാന കൊല്ലൈയ്ക്കിടെയാണ് അപകടം.വെല്ലൂർ, കാട്പാടി പ്രദേശത്ത് 60 അടി ഉയരമുള്ള രഥം ഭക്തർ വലിച്ചുകൊണ്ടുപോകുന്നതിനിടെമറിയുകയായി
രുന്നു. അടിയിൽ കുടുങ്ങിയ ഏഴുപേരെയും ഏറെ ബുദ്ധിമുട്ടിയാണ് പുറത്തെടുത്തത്. പരിക്കേറ്റവരെ ആശുപത്രിയിലേക്ക് മാറ്റിയിട്ടുണ്ട്. ഇവരുടെ നില ഗുരുതരമാണ്.

🔹വീട്ടിൽ ആളില്ലാത്ത തക്കം നോക്കി 20 പവനും അരലക്ഷം രൂപയും കവർന്ന് മോഷ്ടാക്കൾ. ഗ്രാമത്തിലുള്ളവർ ഇന്ത്യ – പാകിസ്ഥാൻ ക്രിക്കറ്റ് മത്സരത്തിന്‍റെ ആഘോഷത്തിൽ മുഴുകുകയും വീട്ടുകാർ ശിവരാത്രി ചടങ്ങുകൾക്ക് ക്ഷേത്രത്തിൽ സംബന്ധിക്കുകയും ചെയ്ത അവസരം മുതലെടുത്താണ് മോഷ്ടാക്കൾ കവർച്ച നടത്തിയത്.കർണാടകയിലെ വിജയപുരയിലാണ് സംഭവം. ശാരദ നഗറിലുള്ള സോമശേഖര ഗാനിയുടെ വീട്ടിലാണ് കള്ളന്മാർ കയറിയത്. 270 ഗ്രാം വെള്ളി ആഭരണങ്ങളും മോഷ്ടാക്കൾ കവർന്നു. ശിവരാത്രി ആഘോഷത്തിന് ശേഷം കുടുംബം തിരിച്ച് വീട്ടിലെത്തിയപ്പോഴാണ് മോഷണം വിവരം പുറത്തറിയുന്നത്.

🔹 അന്തർസംസ്ഥാന ബന്ധമുള്ള 209 കോടിയുടെ ഓൺലൈൻ നിക്ഷേപ തട്ടിപ്പ് സംഘം ജമ്മുകാഷ്മീർ പോലീസിന്‍റെ പിടിയിൽ.സംഘത്തലവനായ ഡൽഹി സ്വദേശി ഉൾപ്പെടെ ഒന്പതുപേരാണ് അറസ്റ്റിലായത്. പോലീസ് ഇതുവരെ 835 അക്കൗണ്ടുകൾ പരിശോധിച്ചു.290 അക്കൗണ്ടുകളിൽനിന്നുള്ള പണമിടപാടുകളും കണ്ടെത്തി. രാജ്യമെന്പാടുംനിന്നായി 209 കോടിരൂപയുടെ ഇടപാടാണു നടന്നിരിക്കുന്നത്. ഇത് 400 കോടിവരെ എത്തിയേക്കാമെന്നു പോലീസ് പറഞ്ഞു.

🔹 റഫാൽ വിമാനങ്ങൾ ഇന്ത്യയിൽ നിർമിക്കുന്നതിന് പങ്കാളികളെ കണ്ടെത്താൻ ഫ്രാൻസ്. ടാറ്റ അടക്കം കമ്പനികൾ ഇതിനായി പരിഗണനയിലുണ്ട്. പ്രധാനമന്ത്രി നരേന്ദ്ര മോദിയും ഫ്രഞ്ച് പ്രസിഡന്‍റ് ഇമ്മാനുവൽ മക്രോണും ഇന്ന് നടത്തുന്ന ചർച്ചയിൽ ഇക്കാര്യം ഉയർന്നു വരുമെന്നാണ് വിവരം. റഫാലിനു പുറമെ കൂടുതൽ യുദ്ധ വിമാനങ്ങൾ ഇന്ത്യയിൽ നിർമിക്കാനുള്ള ഒരുക്കത്തിലാണ് വ്യോമസേന.നാല് ദിവസത്തെ സന്ദ‌ർശനത്തിനായി ഇന്നലെ രാത്രിയാണ് ഫ്രഞ്ച് പ്രസി‍‍ഡന്‍റ് ഇമാനുവൽ മക്രോൺ ഇന്ത്യയിലെത്തിയത്. വൈകുന്നേരം 4.30ന് 114 പുതിയ റഫാൽ വിമാനങ്ങൾ വാങ്ങാനുള്ള മൂന്നേകാൽ ലക്ഷം കോടി രൂപയുടെ കരാറിൽ ഇരു രാജ്യങ്ങളും ഒപ്പുവയ്ക്കും. കരാർ പ്രകാരം ഭൂരിഭാഗം വിമാനങ്ങളും ഇന്ത്യയിൽ തന്നെ നിർമിക്കാനാണ് ധാരണ. നാളെ രാവിലെ ഡൽഹിയിൽ എത്തുന്ന മക്രോൺ എഐ സമ്മിറ്റിന്‍റെ പ്ലീനറി സെഷനിൽ പങ്കെടുക്കും.

🔹81-ാമത് ഫാ. ബര്‍ത്തലോമിയോ മെമ്മോറിയല്‍ ഇന്‍റര്‍ കൊളീജിയറ്റ് ബാസ്‌കറ്റ്‌ബോള്‍ ടൂര്‍ണമെന്‍റ് ഫൈനലില്‍ ഇരിങ്ങാലക്കുട ക്രൈസ്റ്റ് കോളജ് ആതിഥേയരായ എസ്‌എച്ച് തേവരയെ നേരിടും.സേക്രഡ് ഹാര്‍ട്ട് കോളജ് തേവര 104-91നു തിരുവന്തപുരം മാര്‍ ഇവാനിയോസ് കോളജിനെ പരാജയപ്പെടുത്തിയാണ് ഫൈനലില്‍ പ്രവേശിച്ചത്.എസ്ബി ചങ്ങനാശേരിയെ 59-73നു മറികടന്ന് ക്രൈസ്റ്റ് ഇരിങ്ങാലക്കുട ഫൈനല്‍ ടിക്കറ്റ് എടുത്തു.

🔹 സീനിയര്‍ വനിതാ ഏകദിന ടൂര്‍ണമെന്‍റില്‍ കേരളത്തിന്‍റെ വിജയക്കുതിപ്പിനു തടയിട്ട് ഡല്‍ഹി.
കേരളത്തെ 98 റണ്‍സിനു ഡല്‍ഹി തോല്‍പ്പിച്ചു. സ്‌കോര്‍: ഡല്‍ഹി 50 ഓവറില്‍ 318/4. കേരളം 50 ഓവറില്‍ 220/9.

🔹തുടരും എന്ന ചിത്രത്തിന് ശേഷം തരുൺ മൂർത്തി- മോഹൻലാൽ കൂട്ടുകെട്ടിലൊരുങ്ങുന്ന ചിത്രത്തിൽ മീര ജാസ്മിൻ നായികയാകുന്നു. മീര ജാസ്മിന്‍റെ ക്യാരക്ടർ പോസ്റ്ററും പുറത്തുവന്നു. താരത്തിന്‍റെ ജന്മദിനത്തോടനുബന്ധിച്ചാണ് പോസ്റ്റർ.
നൈസി എന്നാണ് മീരയുടെ കഥാപാത്രത്തിന്‍റെ പേര്. ‘ലൗലജന്‍റെ നൈസി’ എന്ന അടിക്കുറിപ്പോടെയാണ് തരുൺ മൂർത്തിയുടെ പോസ്റ്റ്.ലേഡീസ് ആൻഡ് ജെന്‍റിൽമാൻ എന്ന സിനിമയിലാണ് മോഹൻലാലിനൊപ്പം മുഴുനീള വേഷത്തിൽ മീര ജാസ്മിൻ ഏറ്റവും ഒടുവിൽ അഭിനയച്ചത്. 13 വർഷങ്ങൾക്കു ശേഷമാണ് പ്രേക്ഷകരുടെ പ്രിയതാരങ്ങൾ വീണ്ടും ഒന്നിച്ചെത്തുന്നത്. ഹൃദയപൂർവം സിനിമയിൽ മോഹൻലാലിനൊപ്പം അതിഥി വേഷത്തിൽ മീര ജാസ്മിൻ എത്തിയിരുന്നു.ആഷിഖ് ഉസ്മാൻ പ്രൊഡക്ഷൻസിന്‍റെ ബാനറിൽ ആഷിഖ് ഉസ്മാൻ ആണ് നിർമാണം. ചിത്രത്തിന്‍റെ തിരക്കഥ ഒരുക്കുന്നത് രതീഷ് രവി.
തുടരും സിനിമയിലെ പല അണിയറ പ്രവർത്തകരും ഈ സിനിമയിലും ആവർത്തിക്കുന്നു. തുടരും ഉൾപ്പെടെ മോഹൻലാലിന്‍റെ സൂപ്പർഹിറ്റ് സിനിമകൾക്ക് കാമറ ചലിപ്പിച്ച ഷാജി കുമാറാണ് ഛായാഗ്രഹണം നിർവഹിക്കുന്നത്.
സംഗീതം ജേക്‌സ് ബിജോയ്, സഹസംവിധാനം ബിനു പപ്പു, എഡിറ്റിംഗ് വിവേക് ഹര്‍ഷന്‍, സൗണ്ട് ഡിസൈൻ വിഷ്ണു ഗോവിന്ദ്, ആർട്ട്‌ ഡയറക്ടർ ഗോകുല്‍ദാസ്, കോസ്റ്റും മഷാര്‍ ഹംസ, പ്രൊഡക്‌ഷൻ കൺട്രോളർ സുധര്‍മന്‍, രചന രതീഷ് രവി, മേക്കപ്പ് റോണെക്‌സ് സേവിയര്‍.

💦 ഗുരുജിയുടെ വാക്കുകൾ

ഓരോ കാത്തിരിപ്പും പ്രതീക്ഷയാണ്. സ്വപ്‌നമാണ്. സ്‌നേഹമാണ്. എല്ലാവരും കാത്തിരിക്കുകയാണ്. തിരികെ വിളിക്കാനുള്ള ഒരു വിളിക്കു വേണ്ടി.
‘ചാർളി’ എന്ന സിനിമയിൽ നെടുമുടി വേണു പറയുന്നതു പോലെ ‘‘കാത്തിരിപ്പിന്റെ ഒരു വേദന ഇല്ലേ, അതൊരു സുഖാ.’’
അതെ തീര്‍ച്ചയായും എല്ലാവരും തിരികെ വരും. നഷ്ടപ്പെട്ടുപോയ പ്രണയത്തിലേക്കും ലാഭനഷ്ടങ്ങളുടെ കണക്കെടുപ്പില്‍ പരാജയപ്പെട്ടുപോയ സൗഹൃദങ്ങളിലേക്കും അതുപോലെ പ്രതീക്ഷയുടെ മറ്റൊരു കാത്തിരിപ്പിലേക്കും.

തയ്യാറാക്കിയത്: കപിൽ ശങ്കർ

113 Likes

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 17 | ചൊവ്വ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ആഗോള സാമൂഹിക നീതിദിനം . ✍️അഫ്സൽ ബഷീർ തൃക്കോമല

🌹 “ഇന്നത്തെ ചിന്താവിഷയം” 🌹 – 2026 | ഫെബ്രുവരി 20 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഫെബ്രുവരി 20 | വെള്ളി ✍ ബേബി മാത്യു അടിമാലി

1 COMMENT

LEAVE A REPLY Cancel reply

Most Popular

ആഗോള സാമൂഹിക നീതിദിനം . ✍️അഫ്സൽ ബഷീർ തൃക്കോമല

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ഫെബ്രുവരി 20 | വെള്ളി ✍തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | ഫെബ്രുവരി 20 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഫെബ്രുവരി 20 | വെള്ളി ✍ ബേബി മാത്യു അടിമാലി

Recent Comments

EDITOR PICKS

ആഗോള സാമൂഹിക നീതിദിനം . ✍️അഫ്സൽ ബഷീർ തൃക്കോമല

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ഫെബ്രുവരി 20 | വെള്ളി ✍തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | ഫെബ്രുവരി 20 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

POPULAR POSTS

ശശി തരൂര്‍ രചിച്ച “ഹിന്ദുമതത്തെ പുനരാവിഷ്കരിച്ച ‍ജ്ഞാനി: പുസ്തകം പ്രകാശനം ചെയ്തു

ഗാർഹികപീഡനം നിയമാനുസൃതമാക്കാനുള്ള നീക്കവുമായി താലിബാൻ.

POPULAR CATEGORY

ABOUT US

FOLLOW US