സംസ്ഥാനത്ത് കൊടും ചൂടും ഗ്യാസ് ക്ഷാമം മൂലം ഇൻഡക്ഷൻ കുക്കറിന്റെ ഉപയോഗം കൂടിയതും ഒരുമിച്ച് വന്നതോടെ വൈദ്യുതി ആവശ്യകത കുത്തനെ ഉയരുന്നു. കഴിഞ്ഞ ദിവസങ്ങളിലെ കണക്കുകൾ സൂചിപ്പിക്കുന്നത് പ്രത്യേകിച്ച് വൈകുന്നേരങ്ങളിലെ പീക്ക് സമയങ്ങളിൽ ഉപഭോഗം അപകടകരമായ നിലയിലേക്ക് നീങ്ങുന്നുവെന്നതാണ്. ഇതോടെ വൈദ്യുതി വിതരണത്തിൽ സമ്മർദ്ദം കൂടുകയും നിയന്ത്രണ നടപടികൾ അനിവാര്യമാകുന്ന സാഹചര്യം രൂപപ്പെടുകയും ചെയ്യുന്നു.
കഴിഞ്ഞ ഒരാഴ്ചയിലെ കണക്കുകൾ പ്രകാരം കേരളത്തിലെ പീക്ക് ടൈം വൈദ്യുതി ഉപയോഗം 5,000 മെഗാവാട്ട് പിന്നിട്ടു. ദിവസേന ശരാശരി 101 ദശലക്ഷം യൂണിറ്റ് വൈദ്യുതിയാണ് ഉപയോഗിച്ചത്. മാർച്ച് 12ന് ഉപഭോഗത്തിൽ വൻ വർധന രേഖപ്പെടുത്തി. അന്ന് ലോഡ് 5,352 മെഗാവാട്ട് ആയി ഉയർന്നു; 102 ദശലക്ഷം യൂണിറ്റ് വൈദ്യുതി ഉപയോഗിക്കുകയും ചെയ്തു. 4,800 – 4,900 മെഗാവാട്ട് നിരക്കിൽ നിന്നാണ് ഉപഭോഗം 5,000 മെഗാവാട്ട് കവിയാൻ തുടങ്ങിയത്.
ചൊവ്വാഴ്ച 5,176 മെഗാവാട്ടും ബുധനാഴ്ച 5,049 ഉം വ്യാഴാഴ്ച 5,069 ഉം മെഗാവാട്ട് ലോഡാണ് രേഖപ്പെടുത്തിയത്. എന്നാൽ ചിലയിടങ്ങളിൽ ലഭിച്ച മഴയുടെ സ്വാധീനത്തിൽ കഴിഞ്ഞ ദിവസം ഇത് 4,900 മെഗാവാട്ടിലേക്ക് താഴ്ന്നു. മുൻ വർഷങ്ങളിലെ കണക്കുകൾ നോക്കുമ്പോൾ 2025 മാർച്ചിൽ 5,347 മെഗാവാട്ട്, 2024 ൽ 5,150 മെഗാവാട്ട്, 2023 ൽ 4,494 മെഗാവാട്ട്, 2022 ൽ 4,380 മെഗാവാട്ട് എന്നിങ്ങനെയാണ് പരമാവധി ഉപയോഗം രേഖപ്പെടുത്തിയിരിക്കുന്നത്.
ഇപ്പോഴത്തെ ചൂട് തുടർന്നും ഗ്യാസ് ക്ഷാമം നിലനിൽക്കുകയാണെങ്കിൽ വൈദ്യുതി ഉപയോഗം 5,700 മെഗാവാട്ട് കടക്കാനുള്ള സാധ്യതയുണ്ട്. അത്തരമൊരു സാഹചര്യത്തിൽ ലോഡ് ഷെഡ്ഡിങ് ഏർപ്പെടുത്തേണ്ടിവരുമെന്ന് മുന്നറിയിപ്പുണ്ട്. 2024 മേയ് 2 നാണ് സംസ്ഥാനത്ത് ഇതുവരെ ഏറ്റവും ഉയർന്ന ഉപയോഗം രേഖപ്പെടുത്തിയത് 5,797 മെഗാവാട്ട്. അന്നേദിവസം 115.94 ദശലക്ഷം യൂണിറ്റ് വൈദ്യുതിയാണ് ഉപയോഗിച്ചത്; വിവിധ ജില്ലകളിൽ നിയന്ത്രണവും നടപ്പിലാക്കി.
കേരളത്തിൽ പ്രതിദിനം ഏകദേശം 1,600 മെഗാവാട്ട് വൈദ്യുതി മാത്രമാണ് ഉത്പാദിപ്പിക്കുന്നത്. ശേഷിക്കുന്ന വൈദ്യുതി പുറത്തുനിന്നാണ് ലഭ്യമാക്കുന്നത്. സാങ്കേതികമായി 6,000 മെഗാവാട്ട് വരെ എത്തിക്കാനുള്ള ശേഷിയുണ്ടെങ്കിലും കേന്ദ്ര വൈദ്യുതി അതോറിറ്റി 4,400 മെഗാവാട്ട് വരെ മാത്രമാണ് അനുവദിച്ചിട്ടുള്ളത്.
ഇതിനിടെ, പകൽ സമയത്ത് വൈദ്യുതി ഉപയോഗം വർധിപ്പിക്കണമെന്ന് വൈദ്യുതിവകുപ്പ് നിർദേശിച്ചിട്ടുണ്ട്. വാഹന ചാർജിങ്, ഇൻഡക്ഷൻ കുക്കർ ഉപയോഗം തുടങ്ങിയവ പകൽ സമയം മാറ്റുന്നതിലൂടെ പീക്ക് ടൈം സമ്മർദ്ദം കുറയ്ക്കാനാകുമെന്ന് വിലയിരുത്തുന്നു. ഇത് പാലിക്കുന്നവർക്ക് നിരക്കിൽ ഇളവ് നൽകുന്ന പദ്ധതിയും പരിഗണനയിലുണ്ട്.
ഇങ്ങനെ ഉപഭോഗം നിയന്ത്രിക്കാൻ പൊതുജനങ്ങളുടെ സഹകരണം നിർണായകമാകുമ്പോൾ, വൈദ്യുതി ഉപയോഗത്തിൽ ജാഗ്രത പാലിക്കേണ്ടത് കാലത്തിന്റെ ആവശ്യമായി മാറുകയാണ്.
