😴😴സ്ലീപ്പിങ് ബ്യൂട്ടി 😴😴 (കഥ) മേരി ജോസി മലയിൽ, തിരുവനന്തപുരം.

കൊല്ലത്തെ പ്രാഥമിക ആരോഗ്യകേന്ദ്രത്തിൽ ആണ് ഡോക്ടർ ഇന്ദുവിന് ഇപ്പോൾ ഡ്യൂട്ടി. രോഗികളിൽ അധികംപേരും പാവപ്പെട്ടവരാണ്. ചെയ്യാൻ പറയുന്ന ടെസ്റ്റുകൾ ഒന്നും ചെയ്യാതെയും എഴുതുന്ന മരുന്നുകളൊക്കെ മുഴുവൻ കഴിക്കാതെയും ഒക്കെയാണ് 10 രൂപയുടെ ഒ. പി. ടിക്കറ്റും എടുത്ത് വീണ്ടും വീണ്ടും ഡോക്ടറെ കാണാൻ രോഗികൾ വരിക. ഒന്നുകിൽ ആശുപത്രിയിലെ മെഷീൻ കേട് ആയിരിക്കും, ഫാർമസിയിൽ ആവശ്യത്തിന് മരുന്നുകൾ ഇല്ലായിരിക്കും. ആരോട് പറയാൻ? ഏതു സർക്കാര് ഭരിച്ചാലും “കോരന് കഞ്ഞി കുമ്പിളിൽ തന്നെ” എന്ന് പറഞ്ഞതുപോലെത്തെ അവസ്ഥയാണ്. പിന്നെ ഡോക്ടർ ഇന്ദുവിന് കുടുംബവും കുട്ടിയും പരാധീനതകളും ഒന്നുമില്ലാത്തതുകൊണ്ട് സർക്കാർ തരുന്ന ശമ്പളത്തിൽ നിന്ന് പകുതിയും ഈ രോഗികൾക്ക് വേണ്ടി തന്നെ ചെലവാക്കും. അതുകൊണ്ട് “മദർ ഇന്ദു” എന്ന് ഒരു ഇരട്ടപ്പേര് കൂടിയുണ്ട് ഡോക്ടർക്ക്.ചെറുപ്പത്തിലേ വിവാഹം കഴിച്ച് ഡോക്ടറായ ഭർത്താവ് ഒരു വർഷം എത്തുന്നതിനു മുമ്പേ ഒരു ആക്സിഡന്റിൽ മരണപ്പെട്ടിരുന്നു. ഇനി തനിക്ക് മറ്റൊരു ജീവിതം വേണ്ട എന്ന് ഡോക്ടർ ഇന്ദു അന്ന് ഒരു തീരുമാനമെടുത്തു. പലരും നിർബന്ധിച്ചെങ്കിലും ഡോക്ടർ രാഹുലിന്റെ സ്ഥാനത്ത് ആരെയും കാണാൻ പറ്റില്ല എന്ന തീരുമാനത്തിൽ തന്നെ ഉറച്ചു നിന്നു. ഇപ്പോൾ വയസ്സ് 37. പലരും പല ആലോചനകളുമായി വരാറുണ്ടെങ്കിലും ഇന്ദു ആരെയും അടുപ്പിക്കില്ല. കുട്ടികളുടെ ഡോക്ടറായ ഇന്ദു ഒന്നു തൊട്ടാൽ മതി കുഞ്ഞുങ്ങളുടെ അസുഖം മാറും എന്നാണ് കുഞ്ഞുങ്ങളുടെ അമ്മമാരുടെ വിചാരം. ആശുപത്രിയിൽ ഇല്ലാത്ത മരുന്ന് ഫാർമസിസ്റ്റിനെ വിട്ട് സ്വന്തം കയ്യിൽ നിന്ന് കാശ് എടുത്ത് കൊടുത്ത് വാങ്ങിച്ച മരുന്ന് കയ്യിൽ കൊടുത്തു മാത്രമേ ഡോക്ടർ ഇന്ദു രോഗികളെ വിടുകയുള്ളൂ.

നാല് ദിവസത്തെ ലീവ് ആപ്ലിക്കേഷൻ എഴുതികൊടുത്ത് ഇന്ദു സ്വന്തം ക്വാർട്ടേഴ്സിൽ എത്തി ആകെ ഉള്ള ചേച്ചിയുടെ വീട്ടിലേക്ക് പോകാൻ ബാഗ് ഒരുക്കാൻ തുടങ്ങി. ഇന്ദുവിന് ആകെ ഒരു ചേച്ചിയേ ഉള്ളൂ. ബിന്ദു. അവളെ കല്യാണം കഴിച്ച് അയച്ചിരിക്കുന്നത് തിരുവനന്തപുരതത്തെ ധനാഢ്യരായ ഒരു ബിസിനസുകാരുടെ കുടുംബത്തിലേക്കാണ്. ചേച്ചിയുടെ മൂത്ത മകൾ സീത പ്രസവിച്ചിട്ട് ഇന്ന് പതിനെട്ടു ദിവസം കഴിഞ്ഞു. ഇതുവരെ ഔദ്യോഗിക തിരക്ക് കാരണം ഒന്നു പോയി കാണാനൊത്തില്ല. കുഞ്ഞിനു വാങ്ങിയ കുഞ്ഞുടുപ്പും പൗഡറും സോപ്പും എല്ലാം ഭദ്രമായി ഒരു കവറിൽ ആക്കി പിറ്റേദിവസം അതിരാവിലെ ഉള്ള ട്രെയിനിൽ പോകാൻ തയ്യാറെടുക്കുകയാണ് ഇന്ദു. തിരികെ വരുമ്പോഴേക്കും പരാതികളുടെ ഒരു കൂമ്പാരം തന്നെ ഉണ്ടാകുമെന്ന് അറിയാവുന്നതുകൊണ്ട് ഫാർമസിസ്റ്റിനെ വിളിച്ച് കുറച്ച് കാശും ഏൽപ്പിച്ചിട്ട് ആണ് പോകാൻ തയ്യാറെടുത്തത്.

ഏതായാലും രാവിലെ തന്നെ ചേച്ചിയുടെ വീട്ടിൽ എത്തി. കല്യാണം കഴിഞ്ഞു മൂന്നു വർഷം കൂടി ഗർഭിണിയായപ്പോൾ സീത ആദ്യം ഗുഡ്ന്യൂസ് വിളിച്ചുപറഞ്ഞത് തന്നോടായിരുന്നു എന്നിട്ട് ഇപ്പോഴാണല്ലോ വന്നതെന്ന അവളുടെ പരിഭവം ഒരു കെട്ടിപ്പിടുത്തം കൊണ്ട് കുഞ്ഞമ്മ തീർത്തു കൊടുത്തു.രണ്ടു ദിവസം എല്ലാവരും കൂടി അവിടെ അർമാദിച്ചു സന്തോഷിച്ചു. കുട്ടികളുടെ ഡോക്ടർ ആയതുകൊണ്ടുതന്നെ ഇന്ദു കുഞ്ഞിനെ തിരിച്ചുംമറിച്ചും സ്റ്റെതസ്കോപ്പ് വച്ച് ആവശ്യത്തിലധികം നേരം പരിശോധിക്കുന്നത് കണ്ടു എല്ലാവർക്കും പരിഭ്രമമായി. “എൻറെ കുഞ്ഞുവാവ നല്ല സുന്ദരിയല്ലേ കുഞ്ഞമ്മേ, എപ്പോഴും ഉറക്കമാണ്. ഒരു ശല്യവുമില്ല. പകല് മാത്രമേ പാല് കൊടുക്കുകയുള്ളു. രാത്രി 10 മണിക്ക് സ്നഗ്ഗി കെട്ടിച്ച് കിടത്തിയാൽ പിന്നെ രാവിലെ 7 മണിയ്ക്കേ ഉണരൂ “ എന്ന് അവൾ അഭിമാനത്തോടെ പറഞ്ഞു.വേനൽക്കാലം ആയതുകൊണ്ട് എസി ഓൺ ചെയ്ത് അവളും കുഞ്ഞും കുഞ്ഞിനെ നോക്കാൻ ഏജൻസിയിൽ നിന്ന് ഏർപ്പാടാക്കിയ കാർത്ത്യാനിയമ്മയും കൂർക്കം വലിച്ച് കിടന്നുറങ്ങും അത്രേ!

ഇത് അവിശ്വസനീയമാണ്. എത്ര വലിയ സ്ലീപ്പിങ് ബ്യൂട്ടി ആണെങ്കിലും രാത്രി അലാം വച്ച് മൂന്ന് മണിക്കൂർ ഇടവിട്ട് കുഞ്ഞിനെ തട്ടിയുണർത്തി ഫീഡ് ചെയ്യണം എന്ന് പറഞ്ഞു ഡോക്ടർ ഇന്ദു. ഇന്ന് രാത്രി ഞാൻ കൂടി ഈ മുറിയിൽ കിടക്കാം എന്ന് പറഞ്ഞു ഇന്ദു. ഈ പ്ലാനിങ് ഒന്നും കാർത്ത്യാനിയമ്മ അറിഞ്ഞിരുന്നില്ല. രാത്രി 10 മണിയോടെ എല്ലാവരും ഉറക്കം തുടങ്ങി.ഡോക്ടർ ഇന്ദു കൃത്യം ഒരു മണിക്ക് അലാം വെച്ചിരുന്നു. അതുകൊണ്ട് ആ സമയത്ത് എണീറ്റ് എല്ലാവരെയും ഉണർത്തി. കുഞ്ഞിനെയും ഉണർത്താൻ നോക്കിയിട്ട് എന്ത് ചെയ്താലും കുഞ്ഞു ഉണരുന്നില്ല. മയങ്ങി മയങ്ങി കിടപ്പാണ് കുഞ്ഞ്. കണ്ണിൽ വെള്ളം ഒഴിച്ചിട്ട് പോലും കുഞ്ഞു കണ്ണ് തുറക്കുന്നില്ല. കണ്ണു പതുക്കെ തുറന്നുവരും അപ്പൊ തന്നെ കിടന്നുറങ്ങും. ഇത് എന്തൊരു അത്ഭുത ശിശു! ഇന്ദു നിർബന്ധമായി കുഞ്ഞിനെ ഉണർത്തി കരയിപ്പിച്ച് വാ തുറന്നു നോക്കിയപ്പോൾ കാര്യം പിടികിട്ടി. കാർത്ത്യാനിയമ്മയുടെ വിളറി വെളുത്ത മുഖം കണ്ടപ്പോൾ “സത്യം പറഞ്ഞോ അല്ലെങ്കിൽ ഞാൻ നിങ്ങളെ ഈ രാത്രി തന്നെ പോലീസിൽഏല്പിക്കും”എന്ന് പറഞ്ഞതോടെ കാർത്ത്യാനിയമ്മയുടെ കള്ളി വെളിച്ചത്തായി. ചെയ്ത ക്രൂരകൃത്യം അവർ തന്നെ വിശദീകരിച്ചു.അവർ ഉച്ചയ്ക്കും രാത്രിയും ഊണു കഴിഞ്ഞാൽ നന്നായി ഒന്ന് മുറുക്കും. രാത്രി കുറച്ച് പുകയില നനച്ച് ഞരടി കുഞ്ഞിൻറെ വായിൽ ഇറ്റിച്ചു കൊടുക്കും എന്ന്. കാർത്ത്യാനിയമ്മയുടെ ചെകിട് മൂളിക്കുന്ന രീതിയിൽ “ടപ്പേ”എന്ന ഒരൊറ്റ അടി ഡോക്ടർ ഇന്ദു കൊടുത്തു. അവർ അലറിക്കരഞ്ഞു.ശബ്ദം കേട്ട് ബാക്കി കുടുംബാംഗങ്ങൾ എല്ലാവരും ഉണർന്നു വന്നു. ഈ കുഞ്ഞിനെ നോക്കാൻ വന്ന അന്നുതൊട്ട് ചെയ്യുന്ന പണിയായിരുന്നു അത്രേ ഇത്.ഇപ്പോൾ തന്നെ കാർ ഇറക്കി മൾട്ടി സ്പെഷ്യാലിറ്റി ഹോസ്പിറ്റലിൽ പോകണം എന്ന് പറഞ്ഞു ഡോക്ടർ ഇന്ദു. കാർത്തിയാനിയമ്മയോടും കാറിൽ കയറാൻ പറഞ്ഞു. ഡോക്ടർ ഇന്ദുവിന്റെ ആജ്ഞാശക്തിക്കു മുമ്പിൽ ആർക്കും പിടിച്ചുനിൽക്കാനായില്ല. അന്നേരം തന്നെ കുഞ്ഞിനെ ആശുപത്രിയിൽ അഡ്മിറ്റ് ചെയ്ത് ട്രീറ്റ്മെൻറ് തുടങ്ങി. 18 ദിവസത്തോളം പുകയിലയുടെ നീര് കുഞ്ഞിൻറെ വയറ്റിൽ എത്തിയിരിക്കുന്നു.

നേരം വെളുത്ത് 10 മണിയായപ്പോൾ മൂന്നുമാസത്തേക്ക് നല്ലൊരു റേറ്റ് അഡ്വാൻസ് കൊടുത്ത് ഏജൻസിയിൽ നിന്ന് കൊണ്ടുവന്ന ഏജൻസി ഉടമയെ വിവരമറിയിച്ചു. കാർത്ത്യാനിയമ്മയേയും ഏജൻസി ഉടമയെയും പോലീസ് അറസ്റ്റ് ചെയ്തു. മുമ്പ് നിന്നിരുന്ന എല്ലാ വീടുകളിലും കാർത്തിയാനിയമ്മയുടെ സ്ഥിരം നമ്പർ ആയിരുന്നത്രേ ഇത്. കാരണം 60 വയസ്സായ കാർത്ത്യാനിയമ്മയ്ക്ക് രാത്രി ഉറക്കമിളയ്ക്കുന്നത് ഇഷ്ടമല്ല. പകല് പിന്നെ പ്രശ്നം അല്ലത്രേ!

ഏതായാലും നമ്മൾ രക്ഷപ്പെട്ടല്ലോ കാർത്ത്യാനിയമ്മയേയും ഏജൻസിക്കാരനെയും പോലീസ് സ്റ്റേഷനിലെത്തിക്കണോ എന്നൊരു സംശയം കുടുംബാംഗങ്ങൾക്ക് എല്ലാവർക്കും ഉണ്ടായിരുന്നു.
“ഇന്ന് ഇപ്പോൾ ഞാൻ കണ്ടു പിടിച്ചത് കൊണ്ട് തക്കസമയത്ത് നമ്മൾ കുഞ്ഞിനെ ആശുപത്രിയിൽ എത്തിച്ച് രക്ഷപ്പെടുത്തി എടുത്തു. നമ്മളെ ബാധിക്കുമ്പോൾ മാത്രം പ്രതികരിക്കാൻ ഇരിക്കാത്തതുകൊണ്ടാണ് ഇതുപോലുള്ള കള്ളികൾ ഇവിടെ പെരുകുന്നത്. ഇനി ഏജൻസിക്കാരനും ഇക്കാര്യത്തിൽ ഉത്തരവാദിത്വം കാണിച്ചോളും”. Dr ഇന്ദു കൂട്ടി ചേർത്തു.
പോലീസിൻറെ ചോദ്യംചെയ്യലിൽ ഇതുപോലെ പന്ത്രണ്ടോളം കുട്ടികൾക്ക് കാർത്ത്യായാനിയമ്മ ഇതേ ഡോസ് കൊടുത്തിട്ടുണ്ട് എന്ന് മനസ്സിലാക്കി അവരെയൊക്കെ എത്രയും പെട്ടെന്ന് ഏജൻസി ഉടമയെ കൊണ്ട് ഫോൺ ചെയ്യിച്ചു പോലീസ്.പിറ്റേദിവസം വെണ്ടയ്ക്ക അക്ഷരത്തിൽ പത്രവാർത്തയും ചാനലിൽ ന്യൂസും വന്നതോടെ കാർത്ത്യായാനിയമ്മ പരിചരിച്ച കുഞ്ഞുങ്ങളെയും കൊണ്ട് അമ്മമാർ ഡോക്ടർമാരുടെ അടുത്തേക്ക് ഓടി.

നവജാതശിശുക്കളുടെ വയറ്റിൽ പുകയില നീര് എത്തിയാൽ എന്ത് സംഭവിക്കും എന്ന് ഗൂഗിളിൽ സെർച്ച് ചെയ്യാൻ ഡോക്ടർ ഇന്ദു എല്ലാവരോടും ആവശ്യപ്പെട്ടു. ഇതൊരു ലഹരി വസ്തുവാണ്. പുകയിലയിലെ നിക്കോട്ടിൻ മനുഷ്യ ജീവന് തന്നെ ഭീഷണി ഉയർത്തുന്ന ഒന്നിലധികം രോഗങ്ങൾക്ക് കാരണമാകുന്നു. ഇതിൻറെ ഉപയോഗം കാൻസറിനും ഹൃദ്രോഗത്തിനും കാരണമാകും. ഇത് ഉപയോഗിക്കുന്ന ആൾ ഇതിനു അടിമയായി തീരും.പുകയില കഷായം ഒരു കീടനാശിനിയായി ഉപയോഗിക്കുന്ന സാധനം ആണ്. ഇത്രയും കാര്യങ്ങൾ ഗൂഗിളിൽ നിന്ന് അറിഞ്ഞതോടെ കാർത്ത്യായാനിയമ്മയുടെ വിവരം ടിവിയിലും പത്രത്തിലും ഒക്കെ വായിച്ചതിന്റെ വിഷമം എല്ലാവരുടെയും മാറികിട്ടി. 18 ദിവസം താമസിച്ചെങ്കിലും കുഞ്ഞമ്മ അന്ന് എത്തിയില്ലായിരുന്നെങ്കിൽ തൻറെ കുഞ്ഞിൻറെ ഗതി എന്താകുമായിരുന്നു എന്ന് ഓർത്തിട്ട് സീതയ്ക്ക് ഒരു എത്തും പിടിയും കിട്ടിയില്ല.

ജീവിതത്തിൽ ക്ഷമിക്കാൻ പഠിക്കണം….. എന്ന് വച്ച് പ്രതികരിക്കേണ്ടത് പ്രതികരിക്കണം.
അവിടെ ക്ഷമയും താങ്ങിപ്പിടിച്ച് നടക്കരുത്.

മേരി ജോസി മലയിൽ,✍️ തിരുവനന്തപുരം.

(മികച്ച രചന: സംസ്‌കൃതി & ആർഷഭാരതി)