🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് |14 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ഹൃദയം ഒരു ദേവാലയം ആകട്ടെ
——————————————————–

എപ്പോഴും സന്തോഷവാനായിരുന്നു ആ ഗുരു. അദ്ദേഹത്തിൻ്റെ മുഖത്ത് എപ്പോഴും സംതൃപ്തി കളിയാടിയിരുന്നു. ചിരി ആ മുഖത്തെ സ്ഥിരം ഭാവമായിരുന്നു. പ്രത്യേക പ്രാർത്ഥനയൊന്നും നടത്താറില്ലായിരുന്നു. ദൈവമുണ്ടോ എന്ന ചോദ്യത്തിനുത്തരം ഒരു പുഞ്ചിരി മാത്രമായിരുന്നു. ഒരിക്കൽ ദൈവം പ്രത്യക്ഷപ്പെട്ട് അദ്ദേഹത്തോടു പറഞ്ഞു: “വേണ്ട വരം ചോദിച്ചു കൊള്ളു. ഞാൻ നിന്നിൽ പ്രസാദിച്ചിരിക്കുന്നു”. അദ്ദേഹം പറഞ്ഞു: “എനിക്കാവശ്യത്തിനുളളതെല്ലാം ഉണ്ട് . ഇനിയും കിട്ടിയാൽ, വയ്ക്കാൻ സ്ഥലമില്ല”. ദൈവം പറഞ്ഞു: “അങ്ങനെയെങ്കിൽ, ഞാൻ നിനക്ക്
അത്ഭുതം പ്രവർത്തിക്കാനുള്ള കഴിവു തരാം . അതു മറ്റുള്ളവർക്കു വേണ്ടി നിനക്ക് ഉയോഗിക്കാമല്ലോ?” ഗുരു പറഞ്ഞു: ”ഒരു വ്യവസ്ഥയുണ്ട് അതു ചെയ്യുന്നതു ഞാനാണെന്ന് ആരും മനസ്സിലാക്കരുത് “.
ആ ദിവസം മുതൽ ഏതോ ഒരദൃശ്യ ശക്തിയേക്കുറിച്ച്, ആ പ്രദേശത്തുള്ളവർ സംസാരിച്ചു തുടങ്ങി. താമസിയാതെ അവരെല്ലാവരും വിശ്വാസികളായി മാറി.

ദേവാലയത്തിൽ മാത്രം ദൈവത്തെ കാണുകയും, പ്രാർത്ഥിക്കാൻ വേണ്ടി മാത്രം ദേവാലയത്തിൽ പോകുകയും ചെയ്യുന്നത് കൊടിയ ദൈവനിഷേധമാണ്. നിശ്ചിത സമയത്ത് ദൈവ മുമ്പിൽ സമർപ്പിക്കുന്ന ആവശ്യങ്ങളുടെ പട്ടികയല്ല പ്രാർത്ഥന. അതൊരു ജീവിത വീക്ഷണമാണ്; മാനസ്സീക ഭാവമാണ് . ഒരു മണിക്കൂർ പ്രാർത്ഥിക്കുകയും, ബാക്കി ഇരുപത്തിമൂന്നു മണിക്കൂറും പ്രതികാരവും പ്രലോഭനവുമായി നടക്കുകയും ചെയ്യുന്നവരുടെ പ്രാർത്ഥന കൊണ്ട് എന്തു ഫലം? പ്രാർത്ഥനയ്ക്കു മുൻപും പിൻപും എന്തു ചെയ്യുന്നുവെന്നത്, പ്രാർത്ഥിക്കുന്നു എന്നതിനേക്കാൾ ഏറെ പ്രധാനമാണ്‌. പ്രാർത്ഥിക്കാൻ ഒരു കാരണമുണ്ടാകുന്നതു വരെ കാത്തിരിക്കരുത്. ഹൃദയം തന്നെ ഒരു ദേവാലയമാകണം.

താൻ പോലുമറിയാതെ ചെയ്യുന്ന നന്മകളാണ്, യഥാർത്ഥ പ്രാർത്ഥന. ദൈവമുണ്ടോ, ഇല്ലയോ എന്ന ചോദ്യത്തിന് തൃപ്തികരമായ ഒരു മറുപടി, ബുദ്ധികൊണ്ടു നൽകാനാവില്ല. മറ്റുള്ളവർ നമ്മിൽ ഈശ്വരനെ ദർശിക്കാൻ കഴിയുംവിധം, വിശുദ്ധമായി ജീവിക്കുന്നതിനേക്കാൾ കൂടിയ പ്രാർത്ഥനയില്ല.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര