📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 23 | തിങ്കൾ ✍ കപിൽ ശങ്കർ

🔹പെരളശ്ശേരിയിൽ നടന്ന എകെജി ദിനാചരണ ചടങ്ങിൽ മുഖ്യമന്ത്രി പിണറായി വിജയൻ നടത്തിയ പ്രസംഗത്തിൽ അന്തർദേശീയവും ദേശീയവുമായ വിഷയങ്ങളിൽ ശക്തമായ പ്രതികരിച്ചു. കമ്മ്യൂണിസ്റ്റ് പ്രസ്ഥാനത്തിന് ഊർജം പകർന്ന നേതാവായിരുന്നു എ.കെ.ജിയെന്ന് അദ്ദേഹം അനുസ്മരിച്ചു. ലോകം ഇന്ന് ഭീതിയിലാണ് കഴിയുന്നതെന്നും അമേരിക്ക നടത്തുന്ന ഏകപക്ഷീയമായ ആക്രമണങ്ങൾ എല്ലാ അതിരുകളും ലംഘിച്ചുവെന്നും മുഖ്യമന്ത്രി പറഞ്ഞു. എല്ലാ രാഷ്ട്രങ്ങൾക്കും സ്വതന്ത്രമായ നിലപാടുകൾ ഉണ്ടാകേണ്ടതുണ്ടെങ്കിലും അമേരിക്ക ലോക പൊലീസ് ചമയുന്നുവെന്നും മറ്റു രാജ്യങ്ങളുടെ പരമാധികാരം അംഗീകരിക്കാൻ തയ്യാറല്ലെന്നും അദ്ദേഹം ആരോപിച്ചു.ഇറാന്റെ പരമോന്നത നേതാവിനെയും കുടുംബത്തെയും വധിച്ചതായി ചൂണ്ടിക്കാട്ടി, ഇത് ലോക സമാധാനത്തിന് ഗുരുതരമായ ഭീഷണിയാണെന്നും അദ്ദേഹം അഭിപ്രായപ്പെട്ടു. ഈ വിഷയത്തിൽ ഇന്ത്യ സ്വീകരിച്ച നിലപാട് നിർഭാഗ്യകരമാണെന്നും വിമർശിച്ചു. ഇറാനിൽ നിന്ന് പ്രകൃതിവാതകം എത്തിക്കുന്നതിന് കരാർ ഉണ്ടായിരുന്നുവെങ്കിലും അമേരിക്കയുടെ സമ്മർദ്ദത്തെ തുടർന്ന് അത് തടയപ്പെട്ടുവെന്നും പിന്നീട് മൻമോഹൻ സർക്കാർ ആ പദ്ധതി ഉപേക്ഷിച്ചതായും അദ്ദേഹം പറഞ്ഞു. അന്ന് അത് നടപ്പാക്കിയിരുന്നുവെങ്കിൽ രാജ്യത്ത് ഗ്യാസ് സിലിണ്ടർ ക്ഷാമം ഉണ്ടായിരിക്കില്ലായിരുന്നുവെന്നും അദ്ദേഹം കൂട്ടിച്ചേർത്തു.അമേരിക്കയുടെ സമ്മതം തേടേണ്ട ഗതികേടിലേക്ക് രാജ്യം നീങ്ങിയതായും, ഇന്ത്യയുടെ പരമാധികാരം എവിടെ പോയെന്ന ചോദ്യം അദ്ദേഹം ഉയർത്തുകയും ചെയ്തു. ഈ വിധേയത്വം കാരണം ഇന്ത്യ ലോകത്തിന് മുമ്പിൽ ഒറ്റപ്പെട്ടിരിക്കുകയാണെന്നും മുഖ്യമന്ത്രി വിമർശിച്ചു. കേന്ദ്ര സർക്കാർ ജനങ്ങൾക്ക് എതിരായ തീരുമാനങ്ങളാണ് എടുക്കുന്നതെന്നും, ബിജെപിയും കോൺഗ്രസും ഒരേ സാമ്പത്തിക നയമാണ് പിന്തുടരുന്നതെന്നും അദ്ദേഹം ആരോപിച്ചു. ഇതിന്റെ ഫലമായി പണക്കാർ കൂടുതൽ സമ്പന്നരാകുകയാണെന്നും, ഇതിനെതിരെ രാജ്യത്ത് പ്രതിഷേധങ്ങൾ ഉയർന്ന് വരുന്നതായും അദ്ദേഹം പറഞ്ഞു. വർഗീയതയുടെ പേരിൽ വിദ്വേഷം പടർത്താനുള്ള ശ്രമങ്ങൾ നടക്കുന്നുവെന്നും അദ്ദേഹം മുന്നറിയിപ്പ് നൽകി.

🔹ഏപ്രിൽ ഒമ്പതിന് നടക്കാനിരിക്കുന്ന നിയമസഭാ തെരഞ്ഞെടുപ്പിൽ വോട്ട് രേഖപ്പെടുത്താൻ നാട്ടിലെത്താൻ ഒരുങ്ങുന്ന വോട്ടർമാർ കടുത്ത യാത്രാക്ലേശത്തിൽ. വോട്ടെടുപ്പിന്റെ തലേദിവസമായ ഏപ്രിൽ എട്ടിന് തിരുവനന്തപുരത്തുനിന്ന് മംഗളൂരുവിലേക്കുള്ള ട്രെയിനുകളിലൊന്നും ടിക്കറ്റുകൾ ലഭ്യമല്ലാത്ത അവസ്ഥയാണ്. ബംഗളൂരു, ചെന്നൈ, ഹൈദരാബാദ് തുടങ്ങിയ നഗരങ്ങളിൽ നിന്ന് കേരളത്തിലേക്കുള്ള ട്രെയിനുകളുടെ സ്ഥിതിയും സമാനമാണ്.
വേനലവധിയും വിഷു ആഘോഷങ്ങളും ഒത്തുചേരുന്നതിനാൽ ഇത്തവണ തിരക്ക് ഇരട്ടിയായിരിക്കുകയാണ്. ഏപ്രിൽ ഒമ്പത് വ്യാഴാഴ്ച വോട്ടെടുപ്പ് കഴിഞ്ഞാൽ വെള്ളി, തിങ്കൾ ദിവസങ്ങൾ മാത്രമാണ് വിഷുവിന് മുൻപുള്ള പ്രവൃത്തി ദിനങ്ങൾ എന്നതിനാൽ ഭൂരിഭാഗം പേരും ഈ ആഴ്ച മുഴുവൻ നാട്ടിൽ ചെലവഴിക്കാൻ തീരുമാനിച്ചതാണ് തിരക്ക് വർധിക്കാൻ കാരണം. എന്നാൽ യാത്രക്കാരുടെ ഈ ദുരിതം കണക്കിലെടുത്ത് അധിക സ്പെഷ്യൽ ട്രെയിനുകൾ അനുവദിക്കാൻ റെയിൽവേ തയ്യാറായിട്ടില്ല.
തിരക്ക് വർധിച്ച സാഹചര്യത്തിലും വോട്ടെടുപ്പിന്റെ തലേന്ന് വന്ദേഭാരത് എക്സ്‌പ്രസ് സർവീസ് നടത്തുന്നില്ല എന്നത് യാത്രക്കാർക്ക് വലിയ തിരിച്ചടിയായി. റേക്ക് അറ്റകുറ്റപ്പണിയുടെ പേരിൽ രാവിലെ മംഗളൂരുവിൽ നിന്ന് തിരുവനന്തപുരത്തേക്കും വൈകിട്ട് തിരുവനന്തപുരത്തുനിന്ന് മംഗളൂരുവിലേക്കുമുള്ള സർവീസുകളാണ് റദ്ദാക്കിയത്. നിലവിൽ മാവേലി, മലബാർ, തിരുവനന്തപുരം എക്‌സ്‌പ്രസുകളിൽ വെയ്റ്റിങ് ലിസ്റ്റ് നൂറിന് മുകളിലാണ്.റെയിൽവേ വികസനത്തിൽ കേരളത്തോടുള്ള വിവേചനം ഇത്തവണത്തെ തെരഞ്ഞെടുപ്പ് പ്രചാരണങ്ങളിലും സജീവ ചർച്ചയാവുകയാണ്. മറ്റ് സോണുകളിൽ പ്രതിവാര ട്രെയിനുകൾ ദിവസേനയുള്ള സർവീസുകളാക്കി മാറ്റുമ്പോഴും ദക്ഷിണ റെയിൽവേ കേരളത്തിന്റെ ആവശ്യങ്ങൾ അവഗണിക്കുകയാണെന്ന പരാതി ശക്തമാണ്. പുതിയ സൗകര്യങ്ങൾ ഏർപ്പെടുത്തുന്നു എന്ന പ്രതീതിയുണ്ടാക്കാൻ കേന്ദ്രമന്ത്രി സുരേഷ് ഗോപി നടത്തിയ നീക്കങ്ങൾ പോലും വലിയ ജനപ്രതിഷേധത്തിന് കാരണമായിട്ടുണ്ട്.ട്രെയിൻ യാത്ര ദുഷ്കരമായതോടെ വോട്ടർമാർക്കും വിഷു യാത്രക്കാർക്കും ഏക ആശ്വാസം കെഎസ്ആർടിസിയാണ്. തെരഞ്ഞെടുപ്പ് പ്രമാണിച്ച് ബംഗളൂരു, മൈസൂരു, ചെന്നൈ തുടങ്ങിയ സ്ഥലങ്ങളിൽ നിന്ന് കേരളത്തിലെ പ്രധാന നഗരങ്ങളിലേക്ക് കൂടുതൽ സ്പെഷ്യൽ ബസുകൾ കെഎസ്ആർടിസി ഏർപ്പെടുത്തിയിട്ടുണ്ട്. കേരളത്തിനകത്തും തിരക്കിനനുസരിച്ച് അധിക സർവീസുകൾ നടത്താൻ കെഎസ്ആർടിസി തയ്യാറെടുപ്പുകൾ പൂർത്തിയാക്കി കഴിഞ്ഞു. ട്രെയിനുകളിലെ ടിക്കറ്റ് ലഭ്യത കുറഞ്ഞതോടെ വോട്ടർമാരിൽ ഭൂരിഭാഗവും ഇപ്പോൾ കെഎസ്ആർടിസി അധിക സർവീസുകളെയാണ് ആശ്രയിക്കുന്നത്.

🔹പാചകവാതക ക്ഷാമത്തിന് പുറമേ ബംഗാളിൽ തിരഞ്ഞെടുപ്പും വന്നതോടെ ഹോട്ടൽ വ്യവസായം പ്രതിസന്ധിയിൽ. പെരുന്നാൾ പ്രമാണിച്ച് പോയ ഒരു വിഭാഗം തൊഴിലാളികൾ ഇതുവരെ തിരിച്ചെത്തിയിട്ടില്ല. വോട്ട് ചെയ്യാൻ നാട്ടിൽ പോകാൻ ഒട്ടേറെ തൊഴിലാളികൾ സന്നദ്ധരായിട്ടുണ്ട്. ഇവർ തിരിച്ചു വരുമെന്ന് ഉറപ്പില്ലാത്തത് ഹോട്ടലുടമകളെ വെട്ടിലാക്കുന്നു. ജില്ലയിൽ നൂറിലെറെ ഹോട്ടലുകളാണ് അടച്ചത്. അതിലേറെ ഹോട്ടലുകൾ പൂട്ടലിന്റെ വക്കിലാണ്. പെരുന്നാൾ ആഘോഷത്തിനായി കഴിഞ്ഞ ദിവസം അടച്ച ഹോട്ടലുകളിൽ പലതും തുറന്നില്ല. ബദൽ മാർഗം കണ്ടെത്തി തുറക്കാമെന്നാണ് ഉടമകളുടെ കണക്കുകൂട്ടൽ. എന്നാൽ തൊഴിലാളികളെ കിട്ടുമോയെന്നതാണ് ആശങ്ക. മലയാളികൾ ഈ മേഖലയിൽ കുറവാണ്. ഏറെയും അന്യസംസ്ഥാനക്കാർ. സ്ഥിരമായി ഒരു സ്ഥലത്ത് ജോലിയ്ക്ക് നിൽക്കുന്ന പതിവില്ലാത്തതാണ് പ്രശ്നം. ഹോട്ടലുകൾ പൂട്ടിയെങ്കിലും ശമ്പളവും ചെലവും നൽകി ഇവരെ പിടിച്ചു നിറുത്തുന്ന ഉടമകളുമുണ്ട്.

🔹ആഭ്യന്തര വിമാന ടിക്കറ്റുകൾക്ക് കഴിഞ്ഞ വർഷം അവസാനം മുതൽ താത്കാലികമായി ഏർപ്പെടുത്തിയിരുന്ന നിരക്കുപരിധി വ്യോമയാന മന്ത്രാലയം പിൻവലിച്ചു. തീരുമാനം ഇന്നു പ്രാബല്യത്തിൽ വരും. പശ്ചിമേഷ്യൻ സംഘർഷം നിമിത്തം വിമാന കന്പനികൾ നേരിടുന്ന സാന്പത്തികഭാരം ലഘൂകരിക്കുന്നതിനാണു നീക്കം. നിരക്കുപരിധി മാറ്റുന്നതോടെ ഡിമാന്‍റും വിപണി സാഹചര്യങ്ങളും അനുസരിച്ച് വരുംദിവസങ്ങളിൽ വിമാന ടിക്കറ്റ് നിരക്ക് ഉയർന്നേക്കാം.ഇൻഡിഗോ വിമാന സർവീസുകൾക്ക് കഴിഞ്ഞ വർഷം ഡിസംബറിൽ തടസം നേരിട്ടപ്പോൾ മറ്റ് വിമാന കന്പനികളുടെയടക്കം ടിക്കറ്റിൽ അനിയന്ത്രിത നിരക്ക് വർധന ഉണ്ടായതോടെയാണ് കേന്ദ്ര സർക്കാർ ആഭ്യന്തര സർവീസുകൾക്ക് നിരക്കുപരിധി ഏർപ്പെടുത്തിയത്.എന്നാൽ അന്ന് നേരിട്ട തടസം ഇപ്പോൾ മാറിയതും പരിധി എടുത്ത് കളയുന്നതിന് കാരണമായി. 500 കിലോമീറ്റർ വരെയുള്ള വിമാനയാത്രയ്ക്ക് 7500 രൂപയും 1000 മുതൽ 1500 കിലോമീറ്റർ വരെയുള്ള യാത്രകൾക്ക് 15,000 രൂപ വരെയുമായിരുന്നു നിരക്കുപരിധി.ഇറാൻ യുദ്ധത്തെ തുടർന്ന് എണ്ണ വിലയിലുണ്ടായ മാറ്റം വിമാന കന്പനികളെ സാരമായി ബാധിച്ചു. പ്രവർത്തനച്ചെലവ് വർധിച്ചതിനാൽ നിരക്കുപരിധി ഉയർത്തണമെന്ന് വിമാന ക്കന്പനികൾ കേന്ദ്ര സർക്കാരിനോട് ആവശ്യപ്പെട്ടതായാണ് സൂചന.
അതേസമയം ഇന്ധനവിലയിലെ ഒരു ഡോളർ മാറ്റം ഇൻഡിഗോയുടെ മുഴുവൻ വർഷത്തെ ഇന്ധന ബില്ലിൽ ഏകദേശം 300 കോടി രൂപയുടെ മാറ്റം ഉണ്ടാക്കുമെന്നാണ് വിലയിരുത്തൽ. എന്നാൽ വിമാന കമ്പനികൾ ഇത് സംബന്ധിച്ച വിവരങ്ങൾ പുറത്തു വിട്ടിട്ടില്ല.

🔹നിയന്ത്രണം വിട്ട സ്വകാര്യ ബസ് വീട്ടിലേക്ക് ഇടിച്ചു കയറി. തിങ്കളാഴ്‌ച രാവിലെ ഏഴിന് ഫറോക്ക് അഴിഞ്ഞിലം കരുമകൻകാവിനു സമീപത്തുണ്ടായ അപകടത്തിൽ പരിക്കേറ്റ ഡ്രൈവറെ ആശുപത്രിയിൽ പ്രവേശിപ്പിച്ചു.ഫാറുഖ് കോളജിൽ നിന്നു കാരാടേക്ക് പോകുകയായിരുന്നു ബസാണ് അപകടത്തിൽപ്പെട്ടത്. സംഭവ സമയത്ത് ബസിൽ യാത്രക്കാർ ഉണ്ടായിരുന്നില്ല. മേത്തിൽതൊടി പ്രദീപിന്‍റെ വീടിന്‍റെ ചുറ്റുമതിൽ തകർത്താണ് ബസ് വീട്ടിലേക്ക് ഇടിച്ചു കയറിയത്.അപകടത്തെ തുടർന്ന് അഴിഞ്ഞിലത്ത് ചെറിയ രീതിയിൽ ഗതാഗതക്കുരുക്ക് അനുഭവപ്പെട്ടു. പോലീസും ഫയർഫോഴ്സും സ്ഥലത്തെത്തി മേൽ നടപടികൾ സ്വീകരിച്ചു.

🔹വീടിന് തീപിടിച്ച് വയോധികൻ മരിച്ചു. വയനാട് സുൽത്താൻ ബത്തേരിയിലുണ്ടായ ദാരുണ സംഭവത്തിൽ പുത്തൻവീട്ടിൽ കൃഷ്ണൻകുട്ടിയാണ് മരിച്ചത്. ഗുരുതരമായി പൊള്ളലേറ്റ കൃഷ്ണൻകുട്ടിയുടെ ഭാര്യയെ സുൽത്താൻ ബത്തേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു.ഞായറാഴ്ച രാത്രിയിലായിരുന്നു സംഭവം. അപകടമുണ്ടായ ഉടൻ തന്നെ ഇരുവരെയും ആശുപത്രിയിൽ പ്രവേശിപ്പിച്ചെങ്കിലും കൃഷ്ണൻകുട്ടിയുടെ ജീവൻ രക്ഷിക്കാനായില്ല. ഷോര്‍ട്ട് സര്‍ക്യൂട്ടാകാം തീപിടിത്തത്തിന് കാരണമെന്നാണ് പ്രാഥമിക നിഗമനം.
പോലീസും ഫയർഫോഴ്സും സ്ഥലത്തെത്തി മേൽ നടപടികൾ സ്വീകരിച്ചു. വീടിന്‍റെ കിടപ്പു മുറിയടക്കം പൂര്‍ണമായും കത്തിനശിച്ച നിലയിലാണ്. സംഭവത്തിൽ പോലീസ് അന്വേഷണം ആരംഭിച്ചു.

🔹 വടുതലയിലെ വാടക വീട്ടിൽ ജീവനൊടുക്കിയ തിരുവനന്തപുരം സ്വദേശികളുടെ മൃതദേഹങ്ങൾ‌ ഏറ്റെടുക്കാൻ ബന്ധുക്കളെത്തിയില്ല. ഇതേ തുടർന്ന് അഞ്ചു പേരുടെയും സംസ്‌കാരം പച്ചാളം വൈദ്യുത ശ്മശാനത്തിൽ നടത്തി. ‌
പോലീസ് വിവരം അറിയിച്ചതിനെ തുടർന്ന് മരിച്ച ശ്രീകുമാരിയുടെ സഹോദരനും മറ്റ് ബന്ധുക്കളും വിളപ്പില്‍ശാലയില്‍ നിന്നും എറണാകുളത്ത് എത്തിയിരുന്നു. ഇവരുടെ നിര്‍ദേശത്തോടെയായിരുന്നു സംസ്‌കാര ചടങ്ങ് എറണാകുളത്ത് നടത്താന്‍ തീരുമാനിച്ചത്.വിളപ്പില്‍ശാല കാരോട് കാവുവിള പരേതനായ ജി സുരേന്ദ്രന്‍ നായരുടെ ഭാര്യ വൈ. ശ്രീകുമാരി, മകള്‍ അശ്വതി എസ്. നായര്‍, അശ്വതിയുടെ മക്കളായ കാര്‍ണിവന്‍, കീര്‍ത്തിവന്‍, അക്ഷിത എന്നിവരാണ് മരിച്ചത്. ശ്രീകുമാരിയും മകളും തൂങ്ങിമരിച്ച നിലയിലും കുട്ടികള്‍ വിഷം ഉള്ളില്‍ ചെന്നു മരിച്ച നിലയിലുമായിരുന്നു. രണ്ടു മാസം മുമ്പാണ് അഞ്ചംഗ കുടുംബം വടുതലയിലെ വീട് വാടകയ്ക്കെടുത്തത്. അശ്വതിയുടെ മകന്‍റെ ചികിത്സാർഥമായിരുന്നു കുടുംബം എറണാകുളത്തേക്കു താമസം മാറിയത്. അശ്വതിയുടെ ഭര്‍ത്താവ് അശ്വത്ത് ഇക്കഴിഞ്ഞ ജൂലൈയിൽ ജീവനൊടുക്കിയിരുന്നു.

🔹കൊല്ലം കടയ്ക്കലിൽ ഒൻപതാം ക്ലാസുകാരിയെ വീടിനുള്ളിൽ മരിച്ച നിലയിൽ കണ്ടെത്തി. ഫാത്തിമ മുബഷിറയെയാണ് വീടിനുള്ളിലെ കിടപ്പുമുറിയിൽ അബോധാവസ്ഥയിൽ കണ്ടെത്തിയത്. ഉടൻതന്നെ കുട്ടിയെ കടയ്ക്കലിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.ഇൻക്വസ്റ്റ് നടപടികൾ പൂർത്തിയാക്കി മൃതദേഹം പാരിപ്പള്ളി മെഡിക്കൽ കോളജ് ആശുപത്രിയിലേക്ക് മാറ്റി. പോസ്റ്റ്മോർട്ടത്തിന് ശേഷമേ കുട്ടിയുടെ മരണകാരണം വ്യക്തമാകൂ എന്ന് പോലീസ് അറിയിച്ചു.

🔹ഭക്ഷണാവശിഷ്ടം ശ്വാസകോശത്തില്‍ കയറി മുന്‍ പ്രവാസി മരിച്ചു. പെരിയ ബസാര്‍ അടുക്കം വീരന്മാര്‍കാവിലെ സി.പി. അപ്പക്കുഞ്ഞി (66) ആണ് മരിച്ചത്. ഇന്നലെ രാവിലെ ആറോടെ ഉറക്കമുണര്‍ന്ന അപ്പക്കുഞ്ഞി നിര്‍ത്താതെ ചുമയ്ക്കുകയും പിന്നാലെ ശ്വാസതടസം അനുഭവപ്പെടുകയുമായിരുന്നു.അവശനായ അപ്പക്കുഞ്ഞിയെ ഉടൻ കാഞ്ഞങ്ങാട്ടെ സ്വകാര്യാശുപത്രിയില്‍ എത്തിച്ചു. പരിശോധനയില്‍ ഭക്ഷണാവശിഷ്ടം ശ്വാസകോശത്തില്‍ കുടുങ്ങിയതാണ് ശ്വാസതടസത്തിനു കാരണമെന്ന് മനസിലായി. അവശിഷ്ടങ്ങള്‍ നീക്കം ചെയ്‌തെങ്കിലും ജീവന്‍ രക്ഷിക്കാനായില്ല. ഭാര്യ: ദേവകി. മക്കള്‍: സ്വാതി, ശ്വേത, സനല്‍.

🔹കോഴിക്കോട്ടു നിന്ന് ബംഗളൂരുവിലേക്ക് പോയ സ്വകാര്യ ബസ് ഡിവൈഡറിലേക്ക് ഇടിച്ചുകയറിയുണ്ടായ അപകടത്തിൽ നാലുപേർക്ക് ദാരുണാന്ത്യം. മൈസൂരു എക്‌സ്പ്രസ് ഹൈവേയിൽ മദ്ദൂരിനും ചന്നപട്ടണയ്ക്കും ഇടയിലായിരുന്നു അപകടം.തിങ്കളാഴ്‌ച പുലർച്ചെ 4.10 നുണ്ടായ സംഭവത്തിൽ കൊയിലാണ്ടി സ്വദേശി മുഹമ്മദ് ഫർഹാൻ (22), റഫീസ് (45), റഷീദ് (45), മാഹി സ്വദേശി സാക്കിർ (27) എന്നിവരാണ് മരിച്ചത്. ഡ്രൈവർ ഉറങ്ങിപ്പോയതാണ് അപകടകാരണമെന്നാണ് പ്രാഥമിക നിഗമനം.
പരിക്കേറ്റ രണ്ടുപേരെ ആശുപത്രിയിൽ പ്രവേശിപ്പിച്ചു. പി.കെ. ട്രാവൽസിന്‍റെ സ്ലീപ്പർ ബസാണ് അപകടത്തിൽപ്പെട്ടത്. ബസിലുണ്ടായിരുന്ന കൂടുതൽപ്പേരും മലയാളികളാണെന്ന് പോലീസ് പറഞ്ഞു. മൃതദേഹങ്ങൾ ചന്നപട്ടണ സർക്കാർ ആശുപത്രിയിലേക്ക് മാറ്റി.

🔹ഗുരുഗ്രാമില്‍ ഭാര്യയെ ഭർത്താവ് വിഷം കൊടുത്ത് കൊലപ്പെടുത്തി. സ്ത്രീധനത്തെ ചൊല്ലിയുള്ള തർക്കത്തെത്തുടർന്നാണ് നഴ്സായായ കാജലിനെ (23) റേഡിയോളജിസ്റ്റായ ഭർത്താവ് അരുൺ ശർമ കൊലപ്പെടുത്തിയത്. സംഭവത്തിൽ ഭർത്താവിനെ പോലീസ് അറസ്റ്റ് ചെയ്തു.
ഗാസിയാബാദിലെ ബെഹ്ത ഹാജിപൂർ സ്വദേശിയാണ് അരുൺ. ഗുരുഗ്രാമിലെ നഴ്സിംഗ് ഹോമിൽ ഒന്നിച്ച് ജോലി ചെയ്തവരായിരുന്നു അരുണും കാജലും. ആദ്യം ഇരുവരും തമ്മിലൽ സൗഹൃദമായിരുന്നു. പിന്നീടത് പ്രണയമായി മാറി. അവസാനം ഇരുവരും വിവാഹം കഴിക്കാനും തീരുമാനിച്ചു. കഴിഞ്ഞ നവംബറിലായിരുന്നു ഇവരുടെ വിവാഹം. വിവാഹം കഴിഞ്ഞ് കുറച്ചുനാൾ സന്തോഷപൂർണമായ ജീവിതമായിരുന്നു.
എന്നാൽ പിന്നീട് അരുൺ നിസാര കാര്യങ്ങളുടെ പേരിൽ ഭാര്യയെ ഉപദ്രവിക്കാൻ തുടങ്ങി. സ്ത്രീധനത്തിന്‍റെ പേരിൽ ശല്യപ്പെടുത്താനും പണം ആവശ്യപ്പെട്ട് ഉപദ്രവിക്കാനും തുടങ്ങി. മാർച്ച് നാലിന് ഹോളി ആഘോഷത്തിനായി കാജലും അരുണും കാജലിന്‍റെ വീട്ടിലേക്ക് പോയിരുന്നു. 17ന് രാത്രി അരുൺ മ‌ദ്യപിച്ചാണ് കാജലിന്‍റെ വീട്ടിലെത്തിയത്. മദ്യലഹരിയിൽ അരുണ്‍ കാജലിനെ മർദിക്കുകയും ചെയ്തു.
അടുത്ത ദിവസം അതിനെപ്പറ്റി സംസാരിക്കുന്നതിനിടയിലും ഇരുവരും തമ്മിൽ വീണ്ടും തർക്കമുണ്ടായി. പിന്നാലെയാണ് കാജലിനെ അബോധാവസ്ഥയിൽ കണ്ടെത്തിയത്. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പിന്നീട് വീട്ടിലെ ശുചിമുറിയിൽ നിന്ന് ഒരു സിറിഞ്ച് കണ്ടെത്തിയതായി കാജലിന്‍റെ കുടുംബം പോലീസിനെ അറിയിച്ചു.
തുടർന്ന് അരുൺ മകളെ വിഷം കുത്തിവച്ച് കൊലപ്പെടുത്തിയതാണെന്ന് സംശയമുണ്ടെന്ന് അവർ പോലീസിനോട് പറഞ്ഞതോടെ അരുണിനെ പോലീസ് കസ്റ്റഡിയിലെടുക്കുകയായിരുന്നു. ചോദ്യം ചെയ്യലിൽ താൻ ഭാര്യയെ വിഷം കുത്തിവച്ച് കൊലപ്പെടുത്തിയതാണെന്ന് പ്രതി സമ്മതിച്ചു.

🔹ഹൈദരാബാദിൽ വീട്ടുകാർ പൂച്ചയെ വളർത്താൻ അനുവദിക്കാത്തതിനെ തുടർന്ന് യുവ ഡോക്ടർ ജീവനൊടുക്കി. അൽവാൽ സ്വദേശി പ്രിൻസി(23) ആണ് ജീവനൊടുക്കിയത്. മാർച്ച് 20ന് ആയിരുന്നു സംഭവം.ആഴ്ചകൾക്ക് മുൻപ് പ്രിൻസി വീട്ടിലേക്ക് ഒരു പൂച്ചയെ കൊണ്ടുവന്നിരുന്നു. പിന്നാലെ പ്രിൻസിക്ക് ചുമയും കഫക്കെട്ടും കലശലായിരുന്നു. ഇതോടെ വീട്ടുകാർ പൂച്ചയെ വളർത്തുന്നത് എതിർക്കുകയും പ്രിൻസിയും വീട്ടുകാരും തമ്മിൽ നിരന്തരം തർക്കത്തിലേർപ്പെടുകയും ചെയ്തു.അമ്മയ്ക്കും മുത്തശിക്കും ഒപ്പമാണ് പ്രിൻസി താമസിച്ചിരുന്നത്. വെള്ളിയാഴ്ച അമ്മയും മുത്തശിയും പുറത്തുപോയ സമയത്താണ് പ്രിൻസി ജീവനൊടുക്കിയത്. മുറിയിലെ ഫാനിൽ തൂങ്ങിനിൽക്കുന്ന നിലയിലാണ് മൃതദേഹം കണ്ടെത്തിയത്. പ്രിൻസിയുടെ അമ്മയുടെ പരാതിയിൽ പോലീസ് അസ്വാഭാവിക മരണത്തിന് കേസ് രജിസ്റ്റർ ചെയ്തു.

🔹ഒമാനിലുണ്ടായ ശക്തമായ മിന്നൽ പ്രളയത്തിൽ രണ്ട് മലയാളികൾ മരിച്ചു. തൃത്താല സ്വദേശികളായ യൂസഫ്, ഷംല എന്നിവരാണ് മരിച്ചത്. ഇവർക്കൊപ്പം ഉണ്ടായിരുന്ന റംല എന്ന സ്ത്രീയെ പ്രളയത്തിൽ കാണാതായി. ഒമാനിലെ അൽ ബാത്തിന ഗവർണറേറ്റിൽ ശനിയാഴ്ചയായിരുന്നു അപകടം. ഇവർ സഞ്ചരിച്ചിരുന്ന വാഹനം പെട്ടെന്നുണ്ടായ മിന്നൽ പ്രളയത്തിൽ ഒഴുക്കിൽപ്പെടുകയായിരുന്നു.ശക്തമായ മഴയെത്തുടർന്ന് വാഹനം ഒഴുക്കിൽപ്പെട്ടാണ് അപകടമുണ്ടായത്. മരിച്ചവർ പാലക്കാട് തൃത്താല സ്വദേശികളാണെന്ന് സ്ഥിരീകരിച്ചിട്ടുണ്ട്. കാണാതായ റംലയ്ക്കായി ഒമാൻ സിവിൽ ഡിഫൻസ് ആൻഡ് ആംബുലൻസ് അതോറിറ്റി തിരച്ചിൽ ശക്തമാക്കിയിട്ടുണ്ട്.സംഭവത്തിൽ അടിയന്തരമായി ഇടപെടണമെന്ന് ആവശ്യപ്പെട്ട് പ്രതിപക്ഷ നേതാവ് വി.ഡി. സതീശൻ പ്രധാനമന്ത്രി നരേന്ദ്ര മോദിക്ക് കത്തയച്ചു. ഒമാൻ അധികൃതരുമായി ഏകോപനം നടത്തി തിരച്ചിൽ ശക്തമാക്കണമെന്നും ബാധിക്കപ്പെട്ട കുടുംബങ്ങൾക്ക് ആവശ്യമായ എല്ലാ സഹായങ്ങളും ഉറപ്പാക്കണമെന്നും അദ്ദേഹം കത്തിൽ ആവശ്യപ്പെട്ടു.

🔹അന്താരാഷ്ട്ര വനിതാ ക്രിക്കറ്റിൽ ചരിത്രമെഴുതി പതിനഞ്ചുകാരി റുവാൻഡയുടെ ഫാനി ഉഡാഗുഷിമാനിന്ദെ. അരങ്ങേറ്റ അന്താരാഷ്ട്ര വനിതാ ട്വന്‍റി20 ക്രിക്കറ്റിൽ സെഞ്ചുറി നേടുന്ന ആദ്യ താരവും സെഞ്ചുറി നേടുന്ന ഏറ്റവും പ്രായം കുറഞ്ഞ താരവുമാണ് ഫാനി.നൈജീരിയ ഇൻവിറ്റേഷണൽ ട്വന്‍റി20 ടൂർണമെന്‍റിൽ ഘാനയ്ക്കെതിരേയാണ് താരം മൂന്നക്കം സ്വന്തമാക്കിയത്. 65 പന്തിൽ താരം 111 റണ്‍സടിച്ചു. സെഞ്ചുറി നേടുന്പോൾ ഫാനിയുടെ പ്രായം 15 വർഷവും 223 ദിവസവുമായിരുന്നു.ഫാനിയുടെ വെടിക്കെട്ട് മികവിൽ 20 ഓവറിൽ മൂന്ന് വിക്കറ്റ് നഷ്ടത്തിൽ റുവാണ്ട 210 റണ്‍സ് നേടി. മറുപടി ബാറ്റിംഗിൽ ഘാന 88 റണ്‍സിൽ പുറത്തായി. റുവാണ്ടയ്ക്ക് 122 റണ്‍സിന്‍റെ വമ്പൻ ജയം.

🔹പാകിസ്ഥാൻ സൂപ്പർ ലീഗിനെ (പിഎസ്എൽ) ഉപേക്ഷിച്ച് ഇന്ത്യൻ പ്രീമിയർ ലീഗിലേക്ക് പോയ താരങ്ങൾക്കെതിരെ കടുത്ത നടപടി എടുക്കുമെന്ന് പാകിസ്ഥാൻ ക്രിക്കറ്റ് ബോർഡ് (പിസിബി ) ചെയർമാൻ മൊഹ്സിൻ നഖ്വി. പല വിദേശ കളിക്കാരും പിഎസ്എൽ കരാറിൽ നിന്ന് പിന്മാറി ഐപിഎൽ ടീമുകളിലേക്ക് ചേക്കേറുന്ന പ്രവണതയുടെ പശ്ചാത്തലത്തിലാണ് പാകിസ്ഥാൻ ബോർഡ് ഭീക്ഷണിയുമായ് വന്നത്. ഇത്തരം പ്രവണതകളെ അംഗീകരിക്കാം പറ്റില്ലെന്നും കരാർ ലംഘിക്കുന്നവർക്കെതിരെ നിയമനടപടി സ്വീകരിക്കുമെന്നും നഖ്വി പറഞ്ഞു.ഈ വർഷത്തെ പിഎസ്എൽ മത്സരങ്ങൾ നടക്കുന്നത് ഐപിഎൽ മത്സരങ്ങളുടെ അതെ സമയത്താണ്. രണ്ടു ടൂർണമെന്റുകളുടെയും സമയക്രമത്തിലെ ഏറ്റുമുട്ടൽ കാരണം പല കളിക്കാരും ഐപിഎൽ കളിയ്ക്കാൻ പോവുകയാണ്. മികച്ച പ്രതിഫലം, ഉയർന്ന പ്രേക്ഷകശ്രദ്ധ, സുരക്ഷ എന്നീ ഘടകങ്ങൾ ആണ് പല വിദേശ കളിക്കാരെയും സ്വാധീനിക്കുന്നത്.നേരത്തെ ശ്രീലങ്കൻ നായകൻ ദഷുൻ ഷനാക ലാഹോറുമായുള്ള കരാർ ഉപേക്ഷിച്ച് രാജസ്ഥാൻ റോയൽസിലേക്കും സിംബാബ്‌വെ താരം ബ്ലസിങ് മുസാരബാനി കൊൽക്കത്ത നൈറ്റ് റൈഡേഴ്സിലേക്കും ചേക്കേറിയിരുന്നു.

🔹സിനിമകൾ ഇല്ലാതെ എന്ത് എന്റർടൈമെന്റ് അല്ലേ…പ്രത്യേകിച്ച് മലയാളികൾക്ക്. കൈക്കുള്ളിൽ ഒതുങ്ങുന്ന സ്ക്രീനിനേക്കാൾ ഒരു പോപ്പ്കോൺ ഒക്കെ കഴിച്ച് ആ തിയേറ്ററിൽ പോയി സിനിമ കാണുന്നതിന്റെ ഫീൽ ഒന്ന് വേറെതന്നാണല്ലേ. 2026 മാർച്ച് മാസം എന്നത് സിനിമകളുടെ ഒരു ഒഴുക്ക് തന്നായിരുന്നു. അതും ഓരോന്നും ഒന്നിനൊന്ന് മെച്ചം. കിടിലോസ്കി തന്നെ. കഥകൾ ആയാലും കഥാപാത്രങ്ങൾ ആയാലും എല്ലാം ഒന്നിനൊന്ന് കിടു. പോരാത്തതിന് മലയാളികൾ കണ്ട് ബാക്കി വെച്ച, സിനിമ തീർന്നതിന് ശേഷവും തിയേറ്ററിൽ നിന്ന് ഇറങ്ങിപ്പോരാൻ തോന്നാത്ത ചില ചിത്രങ്ങളുടെ രണ്ടാം ഭാഗവും.
മാർച്ച് മാസം തകർപ്പനാക്കി പ്രധാന മലയാള റിലീസുകൾ ഇവയൊക്കെയാണ്
ആട് 3 (Aadu 3)
മാർച്ച് 19-ന് പുറത്തിറങ്ങിയ ചിത്രം പ്രേക്ഷകരെ കുടുകുടാ ചിരിപ്പിച്ചെന്നാണ് പ്രതികരണങ്ങൾ. ഷാജി പാപ്പനെ പ്രേക്ഷകർ ഇരുകൈയ്യും നീട്ടിയാണ് സ്വീകരിച്ചത്.
ഭീഷ്മർ (Bheeshmar)
ധ്യാൻ ശ്രീനിവാസനും വിഷ്ണു ഉണ്ണികൃഷ്ണനും ഒന്നിച്ച കോമഡി ത്രില്ലർ ചിത്രം മാർച്ച് 20-നാണ് തിയേറ്ററുകളിൽ എത്തിയത്. ആദ്യ ദിനം ഹൗസ് ഫുൾ ആയിരുന്ന ചിത്രം ഫാസ്റ്റ് ഫില്ലിംഗ് ഷോകളുമായി വിജയത്തിലേക്ക് കുതിക്കുകയാണ്.
സംഭവം അധ്യായം ഒന്ന് (Sambhavam Adhyayam Onnu)
അസ്കർ അലിയും വിനീത് കുമാറും ചേർന്നഭിനയിക്കുന്ന സംഭവം അധ്യായം ഒന്ന് മാർച്ച് 6-ന് തിയേറ്ററുകളിലെത്തി. ജിത്തു സതീശൻ മംഗലത്ത് രചനയും സംവിധാനവും നിർവ്വഹിച്ച മിസ്റ്ററി ഫാൻറസി ത്രില്ലർ ഗണത്തിൽ പെടുന്ന ചിത്രത്തിന് പ്രേക്ഷകർ കുറച്ചൊന്നുമല്ല തിയേറ്ററിലേയ്ക്ക് പാഞ്ഞത്.
വമ്പത്തി (Vambathi)
സ്വാസിക പ്രധാന വേഷത്തിലെത്തിയ ചിത്രം മാർച്ച് 20-നാണ് റിലീസ് ചെയ്തത്. ലാൽ ബിജോ സംവിധാനം ചെയ്യുന്ന സ്ത്രീശക്തി പ്രമേയമാക്കിയ ചിത്രമാണ് വമ്പത്തി.
അജ സുന്ദരി (Aja Sundari)
ജോജു ജോർജ്, ലിജോമോൾ ജോസ് എന്നിവർ ഒന്നിക്കുന്ന ചിത്രം മാർച്ച് 20-ന് തിയേറ്ററുകളിലെത്തി. മലയാളം മിസ്റ്ററി ത്രില്ലർ ചിത്രമാണ് ‘അജ സുന്ദരി’.
ടോർപ്പിഡോ (Torpedo)
ഫഹദ് ഫാസിൽ, നസ്ലിൻ ഗഫൂർ, അർജുൻ ദാസ്, ഗണപതി എന്നിവർ പ്രധാന വേഷങ്ങളിലെത്തിയ ടോർപ്പിഡോ മാർച്ച് 20-നാണ് റിലീസ് ചെയ്തത്. തരുൺ മൂർത്തിയുടെ (സൗദി വെള്ളക്ക, തുടർം എന്നീ ചിത്രങ്ങളുടെ സംവിധായകൻ)സംവിധാനത്തലിറങ്ങിയ ചിത്രമാണിത്.വന്നതെല്ലാം തീ പാറിച്ചു, ഇനി വരാനിരിക്കുന്നത് അതിലും കിടുവാകാതിരിക്കുമോ… ഇനി റിലീസാകാൻ ബാക്കിയുള്ള ചിത്രങ്ങൾ ഇതാണേ…
പ്രതിഛായ (Prathichaya)
നിവിൻ പോളി നായകനാകുന്ന പൊളിറ്റിക്കൽ ത്രില്ലർ ചിത്രമാണ് പ്രതിഛായ. മാർച്ച് 26-നാണ് തിയേറ്ററുകളിലെത്തുന്നത്. സിനിമ ജീവിതത്തിന്റെ അൻപതാം വർഷത്തിൽ ബാലചന്ദ്രമേനോൻ നല്ലൊരു കഥാപാത്രത്തിൽ എത്തുന്നു എന്നതും ഈ ചിത്രത്തിന്റെ പ്രത്യേകതയാണ്. ഷറഫുദ്ധീൻ, ആൻ അഗസ്റ്റിൻ, ഹരിശ്രീ അശോകൻ, മണിയൻപിള്ള രാജു, നീതു കൃഷ്ണ, സബിത ആനന്ദ്, വിഷ്ണു അഗസ്ത്യ, നിശാന്ത് സാഗർ, ആർജെ വിജിത, സായ് കുമാർ, വൈശാഖ് ശങ്കർ, മേഖ തോമസ് , ചിരാഗ് ജാനി, അനീന, നന്ദിനി ഗോപാലകൃഷ്ണൻ, ചിലമ്പൻ ജോസ് തുടങ്ങി വൻ താരനിരയാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.
ഡെർബി (Derby)
സാഗർ സൂര്യ, ജോണി ആന്റണി എന്നിവർ പ്രധാന വേഷങ്ങളിലെത്തുന്ന ചിത്രം മാർച്ച് 27-നാണ് തിയേറ്ററുകളിൽ എത്തുന്നത്. ക്യാമ്പസ് പശ്ചാത്തലത്തിൽ ഒരുങ്ങുന്ന ഡർബി ഇന്നത്തെ യുവത്വത്തിന്റെ തുടിപ്പും പ്രസരിപ്പും പ്രണയം, ആക്ഷൻ, ഇമോഷൻ, ഫൺ എന്നിവയുടെ മിശ്രിതമായി കംപ്ലീറ്റ് എൻറർടെയ്നറായാണ് എത്തുന്നത്.
ഓപ്പറേഷൻ കംബോഡിയ (Operation Cambodia)
മാർച്ച് 23-ന് തിയേറ്റർ റിലീസ് പ്രതീക്ഷിക്കുന്ന ചിത്രമാണ് ഓപ്പറേഷൻ കംബോഡിയ. തരുൺ മൂർത്തിയുടെ സംവിധാനത്തിൽ ഒരുങ്ങുന്ന ചിത്രം ആക്ഷൻ ഹെവി ത്രില്ലറായിരിക്കുമെന്നാണ് റിപ്പോർട്ടുകൾ.
തമരക്കുണ്ണിലെ ഭദ്രപുരാണം (Thamarakkunnile Bhadrapuranam)
കലാഭവൻ മണിയുടെ അനിയൻ കണ്ണൻ (ആർ.എൽ.വി രാമകൃഷ്ണൻ) നായകനായി അഭിനയിക്കുന്ന ചിത്രം മാർച്ച് 27-ന് റിലീസ് നിശ്ചയിച്ചിരിക്കുന്നത്.

💦 ഗുരുജിയുടെ വാക്കുകൾ

‘പക്വത പ്രായമായവരുടെ ഗുണമാണ്. കുട്ടികളുടെ പെരുമാറ്റം അപക്വമായിരിക്കും’ ഈ പൊതുധാരണ തീർത്തും സ്വാഭാവികം. എന്തെന്നാൽ, പാകം വന്ന അവസ്ഥയാണ് പക്വത. തീക്ഷ്ണമായ ജീവിതാനുഭവങ്ങളിൽ നിന്നു ലഭിച്ച ഗുണപാഠങ്ങൾ വഴി കൈവന്ന വിവേകവും പ്രായോഗികബുദ്ധിയും പക്വതയിൽ അടങ്ങിയിരിക്കുന്നു.പക്ഷേ പ്രായമെത്രയായാലും പക്വത കൈവരാത്തവരുണ്ട്. കൗമാരത്തിൽപ്പോലും പക്വമായി പെരുമാറുന്നവരുമുണ്ട്. ജീവിതത്തിൽ സ്വീകാര്യത കിട്ടണമെങ്കിൽ നമ്മുടെ രീതികൾക്കു പക്വതയുണ്ടാവണം. ബോധപൂർവം തനതായി ഏർപ്പെടുത്തുന്ന നിയന്ത്രണങ്ങളിലൂടെ ആകർഷകമായ പക്വത കൈവരിക്കാൻ പലർക്കും കഴിഞ്ഞെന്നിരിക്കും.

തയ്യാറാക്കിയത്: കപിൽ ശങ്കർ

80 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 23 | തിങ്കൾ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ജങ്ക് ഫുഡ്‌ ഒഴിവാക്കിയാൽ 200 വയസ്സുവരെ ജീവിക്കാം’; ഡോക്ടറുടെ വാക്കുകൾ ഉദ്ധരിച്ച് ട്രംപ്

ഷിക്കാഗോയിൽ വെടിവെപ്പ് പരമ്പര: നാല് മരണം, 9 പേർക്ക് വെടിയേറ്റു

ബിറ്റ്‌കോയിൻ വിലയിൽ വൻ ഇടിവ്: $69,000-ത്തിന് താഴെയെത്തി

LEAVE A REPLY Cancel reply

Most Popular

മഞ്ഞുമ്മല്‍ ബോയ്സ് സാമ്പത്തിക തട്ടിപ്പ് കേസില്‍ നിര്‍മാതാവ് ബാബു ഷാഹിറിന്റെ അപ്പീല്‍ സുപ്രീം കോടതി തള്ളി

പശ്ചിമേഷ്യൻ സംഘർഷം: പാചകവാതക സിലിണ്ടറിലെ ഗ്യാസിന്റെ അളവ് പത്തു കിലോയായി കുറയ്ക്കാൻ സാധ്യത

ഇൻസ്റ്റഗ്രാമിലും യൂട്യൂബിലും ശ്രദ്ധേയനായ യുവാവിനെ 580 ഗ്രാം കഞ്ചാവുമായി അറസ്റ്റിൽ

എന്ത് വൃത്തികേടും കാണിക്കാൻ മടിയില്ലാത്ത കൂട്ടരാണ് കോണ്‍ഗ്രസ്; കോൺഗ്രസിനെതിരെ ആഞ്ഞടിച്ച് മുഖ്യമന്ത്രി.

Recent Comments

EDITOR PICKS

മഞ്ഞുമ്മല്‍ ബോയ്സ് സാമ്പത്തിക തട്ടിപ്പ് കേസില്‍ നിര്‍മാതാവ് ബാബു ഷാഹിറിന്റെ അപ്പീല്‍ സുപ്രീം കോടതി തള്ളി

പശ്ചിമേഷ്യൻ സംഘർഷം: പാചകവാതക സിലിണ്ടറിലെ ഗ്യാസിന്റെ അളവ് പത്തു കിലോയായി കുറയ്ക്കാൻ സാധ്യത

ഇൻസ്റ്റഗ്രാമിലും യൂട്യൂബിലും ശ്രദ്ധേയനായ യുവാവിനെ 580 ഗ്രാം കഞ്ചാവുമായി അറസ്റ്റിൽ

POPULAR POSTS

പശ്ചിമേഷ്യൻ സംഘർഷം: പാചകവാതക സിലിണ്ടറിലെ ഗ്യാസിന്റെ അളവ് പത്തു കിലോയായി കുറയ്ക്കാൻ സാധ്യത

ശബരിമല യുവതി പ്രവേശനം; തിരുവിതാംകൂർ ദേവസ്വം ബോർഡ് ഇന്ന് സുപ്രീംകോടതിയിൽ വാദങ്ങൾ സമർപ്പിക്കും.

മൈസൂരുവില്‍ സ്ലീപ്പര്‍ ബസ് ഡിവൈഡറില്‍ ഇടിച്ചുകയറി അപകടം; നാല് മലയാളികള്‍ക്ക് ദാരുണാന്ത്യം.

POPULAR CATEGORY

ABOUT US

FOLLOW US