📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 13 | വെള്ളി ✍ കപിൽ ശങ്കർ

🔹സംസ്ഥാനത്തെ അർഹരായ 65,000 കുടുംബങ്ങള്‍ക്ക് കൂടി മുന്‍ഗണനാ റേഷൻ കാർഡുകള്‍ അനുവദിക്കുന്നതിന്റെ സംസ്ഥാനതല വിതരണോദ്ഘാടനം ഇന്ന് നടന്നു. മുൻഗണനാ കാർഡുകളുടെ വിതരണോദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു. ഇതോടെ എൽ ഡി എഫ് സർക്കാർ അധികാരത്തിൽ വന്ന ശേഷം ഇതുവരെയായി മഞ്ഞ, പിങ്ക് എന്നീ മുൻഗണനാ വിഭാഗത്തിലേക്ക് തരം മാറ്റി നൽകിയ ആകെ കാർഡുകളുടെ എണ്ണം 7,16,692 ആയി. രണ്ടാം എൽ ഡി എഫ്‌ സർക്കാരിന്റെ കാലത്ത്‌ ഏഴ് ലക്ഷം മുൻഗണനാ കാർഡുകള്‍ തരംമാറ്റി വിതരണം ചെയ്തെന്ന റെക്കോർഡ് കൂടിയാണ് കുറിക്കപ്പെടുന്നത്. കേന്ദ്ര സർക്കാരിന്റെ മാനദണ്ഡപ്രകാരം സംസ്ഥാനത്തെ ജനസംഖ്യയിൽ 53% ആളുകളെ മാത്രമേ മുൻഗണനാ പട്ടികയിൽ ഉൾപ്പെടുത്താൻ കഴിയൂ. ഈ പരിമിതി മൂലം അർഹരായ ഒട്ടേറെ കുടുംബങ്ങള്‍ക്ക് മുന്‍ഗണനാ കാർഡുകള്‍ നല്‍കാന്‍ കഴിയാതെ പോയിട്ടുണ്ട്. അർഹരല്ലാത്തവരിൽ നിന്ന് പിടിച്ചെടുത്തതും സർക്കാർ ആഹ്വാന പ്രകാരം സ്വമേധയാ ഉപേക്ഷിച്ചതുമായ കാർഡുകൾ വഴിയുണ്ടായ ഒഴിവുകളിലേക്ക് പുതിയ അർഹരെ ഉൾപ്പെടുത്തിയാണ് ഇത് മറികടന്നത്.

🔹പാചകവാതക സിലിണ്ടർ ബുക്ക് ചെയ്യുന്ന സമയ പരിധി ഉയർത്തി കേന്ദ്ര സര്‍ക്കാര്‍. പുതിയ നിര്‍ദേശ പ്രകാരം ഗ്രാമപ്രദേശങ്ങളിൽ എൽപിജി സിലിണ്ടറുകൾ ബുക്ക് ചെയ്യുന്നതിന് 45 ദിവസത്തെ സമയ പരിധിയാണ് നിശ്ചയിച്ചിരിക്കുന്നത്. അതേസമയം നഗര പ്രദേശങ്ങളിൽ 25 ദിവസത്തെ ഇടവേളയ്ക്ക് ശേഷമേ ബുക്കിങ് നടത്താൻ കഴിയൂ. രാജ്യത്ത് പെട്രോൾ, ഡീസൽ, മണ്ണെണ്ണ, പാചകവാതകം എന്നിവയ്ക്ക് ക്ഷാമമില്ലെന്നും ഇന്ധന ലഭ്യത സുരക്ഷിതമാണെന്നുമാണ് കേന്ദ്ര സർക്കാർ പാർലമെന്റിൽ ക‍ഴിഞ്ഞ ദിവസം അവകാശപ്പെട്ടത്. ഇതിന് പിന്നാലെയാണ് നിയന്ത്രണം ഏർപ്പെടുത്തിയിരിക്കുന്നത്.അതേസമയം രാജ്യത്തുടനീളം പാചകവാതക പ്രതിസന്ധി രൂക്ഷമാണ്. സംസ്ഥാനത്തെ ഹോട്ടൽ വ്യവസായവും പ്രതിസന്ധിയിലാണ്. ബേക്കറി, ഹോട്ടൽ, റസ്റ്റോറന്റ്‌ തുടങ്ങിയ ഇടങ്ങളിലേക്കുള്ള വാണിജ്യാവശ്യ സിലിണ്ടറിന്റെ വിതരണം പൂർണമായി നിലച്ച നിലയിലാണ്. സംസ്ഥാനത്തെ 10 ശതമാനത്തോളം ഭക്ഷണശാലകൾ ഇതിനോടകം പ്രവർത്തനം നിർത്തിക്ക‍ഴിഞ്ഞു. 24 മണിക്കൂർ പ്രവർത്തിക്കുന്ന ഹോട്ടലുകൾ പ്രവർത്തനം സമയം കുറച്ചു. കൂടുതൽ ഗ്യാസ് ഉപയോഗിക്കേണ്ടി വരുന്ന വിഭവങ്ങളും മെനുവിൽ നിന്ന് ഒഴിവാക്കി. സ്വകാര്യ ഹോസ്റ്റലുകളിലെ മെസുകളുടെ പ്രവർത്തനവും അവതാളത്തിലായി.

🔹അമേരിക്കയും ഇസ്രയേലും ചേർന്ന് ഇറാനെതിരെ നടത്തുന്ന ആക്രമണങ്ങളുടെ ഭാഗമായി പശ്ചിമേഷ്യയിൽ കടുക്കുന്ന യുദ്ധത്തിൻ്റെ സാഹചര്യത്തിൽ വിമാന ടിക്കറ്റ് നിരക്കുകൾ കുത്തനെ ഉയർന്നിരിക്കുകയാണ്. വ്യോമ പാതകളിൽ നിയന്ത്രണം വന്നതാണ് ടിക്കറ്റ് നിരക്ക് കുത്തനെ ഉയരാൻ ഇടയാക്കിയത്. ‍70,000 രൂപയാണ് ഈ ആഴ്ചയിലെ ടിക്കറ്റ് നിരക്ക്. അബുദാബിയിൽ നിന്ന് ദില്ലിയിലേക്കാണ് ഈ നിരക്ക്.
യുദ്ധസാഹചര്യം നിലനിൽക്കുന്നതിനാൽ ഇറാൻ വ്യോമപാത ഒഴിവാക്കിയാണ് വിമാനങ്ങൾ ഇപ്പോൾ യാത്ര നടത്തുന്നത്. ഇത് സമയ നഷ്ടത്തിനും ഇന്ധനച്ചെലവിനും കാരണമാകുകയും ചെയ്യുന്നു. ഇതാണ് ഇപ്പോൾ ടിക്കറ്റ് നിരക്കിനെ ബാധിച്ചിരിക്കുന്നത്. ടിക്കറ്റുകൾക്കുള്ള ഡിമാൻഡ് വർധിച്ചതും ടിക്കറ്റിൻ്റെ വില കൂടാൻ ഇടയാക്കിയിട്ടുണ്ട്.

🔹കെഎസ്ആർടിസി ജീവനക്കാർക്ക് ഏഴ് ശതമാനം ഡിഎ അനുവദിക്കാൻ നീക്കം. അടുത്ത ശമ്പളത്തോടൊപ്പം ഡിഎ കുടിശിക കൂടി നൽകാനാണ് ശ്രമം. ഡിഎ കുടിശിക അനുവദിക്കുന്നതിന് വേണ്ടി സർക്കാർ സഹായം തേടിയിട്ടുണ്ട്.കെഎസ്ആർടിസിയുടെ സിഎംഡി പ്രമോജ്ശങ്കറും ഫിനാൻഷ്യൽ അഡ്വൈസർ എ.ഷാജിയും ധനവകുപ്പുമായി കഴിഞ്ഞ ദിവസം ചർച്ച നടത്തിയിരുന്നു. ഡിഎ കുടിശിക അനുവദിക്കാൻ സർക്കാർ സഹായിക്കണമെന്നാവശ്യപ്പെട് ഗതാഗത മന്ത്രി കെ.ബി.ഗണേശ് കുമാർ മുഖ്യമന്ത്രിയോട് അഭ്യർഥന നടത്തിയിരുന്നു. ഇതേ തുടർന്നാണ് സർക്കാർ സഹായം ലഭിക്കുന്നതിനുള്ള നീക്കം സജീവമായത്. നിലവിലെ കണക്കനുസരിച്ച് കെഎസ്ആർടിസി ജീവനക്കാർക്ക് 35 ശതമാനം ഡിഎ ആണ് കുടിശിക ഉള്ളതെന്ന് കെഎസ്ആർടിസി അധികൃതർ വ്യക്തമാക്കി. 2020 മുതലുള്ള ഡിഎ കുടിശികയാണ് ഇത്. ഇതിൽ ഏഴ് ശതമാനമാണ് ഇപ്പോൾ അനുവദിക്കാൻ പോകുന്നത്. വൈകാതെ സർക്കാർ സഹായം അനുവദിച്ചു കൊണ്ടുള്ള ധനകാര്യ വകുപ്പിന്‍റെ തീരുമാനം ഉണ്ടാകും. കെഎസ്ആർടിസിയുടെ വരുമാനത്തിൽ നിന്നും ഡിഎ കുടിശിക നല്കാൻ കഴിയില്ലെന്ന് കണക്കുകൾ സഹിതം ധനകാര്യ വകുപ്പിനെ ബോധ്യപ്പെടുത്തിയിട്ടുണ്ട്. നിലവിൽ മാസം തോറും 50 കോടിരുപ വീതമാണ് സർക്കാർ സഹായമായി നല്കുന്നത്. ഡിഎ കുടിശികയിൽ കുറച്ചെങ്കിലും ജീവനക്കാർക്ക് നൽകുന്നതിനായി 50 കോടി എന്നത് 55 കോടിയായി ഉയർത്തണമെന്നാണ് കെഎസ്ആർടിസിയുടെ ആവശ്യം.
ഈ ആവശ്യത്തോട് ധനകാര്യവകുപ്പ് അനുകൂലമായ തീരുമാനം എടുക്കുമെന്ന് കെഎസ്ആർടിസി അധികൃതർ പറഞ്ഞു. ഒരു ശതമാനം പോലും ഡിഎ കിട്ടാതെ 2020 മുതൽ ജോലി ചെയ്യുന്ന ജീവനക്കാർക്ക് ഇത് ചെറിയ ആശ്വാസമാകും. ഏഴ് ശതമാനം ഡിഎ അനുവദിച്ചാലും പിന്നെയും 28 ശതമാനം കുടിശികയാണ് ബാക്കി നിൽക്കുക.

🔹വാമനപുരം കണിച്ചോട് ഒരു വയസ്സുകാരി മരിച്ച സംഭവം കൊലപാതകമാണെന്ന് കുറ്റം സമ്മതിച്ച് കുട്ടിയുടെ അമ്മ. ആറ്റിങ്ങൽ ഡി.വൈ.എസ്.പിയുടെ നേതൃത്വത്തിൽ നടത്തിയ ചോദ്യം ചെയ്യലിൽ അമ്മ കുറ്റം സമ്മതിക്കുകയായിരുന്നു. കുഞ്ഞിനെ കഴുത്ത് ഞെരിച്ച് കൊലപ്പെടുത്തുകയായിരുന്നു എന്നാണ് കുട്ടിയുടെ അമ്മയുടെ മൊഴി. പ്രതിക്ക് മാനസിക വിഭ്രാന്തി ഉള്ളതായാണ് പൊലീസിന്റെ പ്രാഥമിക നിഗമനം. പ്രതിയെ കസ്റ്റഡിയിൽ ചോദ്യം ചെയ്തു വരികയാണ്.അശ്വതി – സുഭാഷ് ദമ്പതികളുടെ മകൾ പവിത്രയെ അമ്മൂമ്മ തൊഴിലുറപ്പിന് പോയി മടങ്ങി എത്തിയപ്പോൾ കിടപ്പുമുറിയിലെ പായയിൽ ദുരൂഹ സാഹചര്യത്തിൽ മരിച്ച നിലയിൽ കാണുകയായിരുന്നു. ചലനമറ്റ് കിടന്ന കുട്ടിയെ ഉടൻ തന്നെ സ്വകാര്യ ആശുപത്രിയിൽ എത്തിച്ചെങ്കിലും ആശുപത്രിയിലെത്തുന്നതിന് മുൻപേതന്നെ കുട്ടി മരിച്ചിരുന്നു. കുട്ടിയെ മരിച്ച നിലയിലാണ് കൊണ്ടുവന്നതെന്നതാണ് ആശുപത്രി അധികൃതരിൽ നിന്നുള്ള വിവരം. കുട്ടിയുടെ കഴുത്തിൽ പാടുകൾ കണ്ടതിനെത്തുടർന്ന് സ്വഭാവിക മരണമല്ലെന്ന് പൊലീസിന് സംശയം തോന്നുകയായിരുന്നു. തുടർന്ന് കുട്ടിയുടെ അമ്മയെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് കുറ്റം സമ്മതിക്കുന്നത്.

🔹തൃശൂർ എരുമപ്പെട്ടിയിൽ വയോധികയെ ആക്രമിച്ച തെരുവ് നായയെ പിടികൂടി. നാട്ടുകാരും നായപിടിത്തക്കാരും സംയുക്തമായാണ് പുലർച്ചയോടെ നായയെ പിടികൂടിയത്. എരുമപ്പെട്ടി സ്വദേശി കാർത്യായിനി(84) ആണ് നായയുടെ ആക്രമണത്തിൽ കൊല്ലപ്പെട്ടത്.വ്യാഴാഴ്ച വൈകിട്ട് ആറോടെയാണ് കിടപ്പുരോഗിയായ വയോധികയെ തെരുവ് നായ ആക്രമിച്ചത്. ഇവർക്കൊപ്പം മുറിയിൽ ഉണ്ടായിരുന്ന മാനസിക വെല്ലുവിളി നേരിടുന്ന മകൻ ദേവദാസനെയും നായ കടിച്ച് പരിക്കേൽപ്പിച്ചിരുന്നു.ഇരുവർക്കും ഭക്ഷണവുമായി കാർത്യായനിയുടെ ഇളയ മകൻ മണി എത്തിയപ്പോഴാണ് ചോര തളംകെട്ടിയ നിലയിൽ കാർത്യായനിയുടെ മൃതദേഹം കണ്ടത്. കാർത്യായനിയുടെ മുഖമടക്കം ശരീരമാസകലം വികൃതമാക്കപ്പെട്ട നിലയിലായിരുന്നു.വയോധികയുടെ മുഖം ഉൾപ്പെടെ നായയുടെ ആക്രമണത്തിൽ വികൃതമായിരുന്നു. നാട്ടുകാരും പോലീസും ചേർന്ന് രാത്രി വൈകിയും നായക്കായി തെരച്ചിൽ നടത്തിയെങ്കിലും കണ്ടെത്താനായിരുന്നില്ല. തുടർന്ന് അർധരാത്രിക്ക് ശേഷം നടത്തിയ തെരച്ചിലിലാണ് നായയെ പിടികൂടാനായത്.തൃശൂർ മെഡിക്കൽ കോളജിൽ സൂക്ഷിച്ചിരിക്കുന്ന കാർത്യായനിയുടെ മൃതദേഹം പോസ്റ്റ്മോർട്ടത്തിനുശേഷം ഇന്ന് ബന്ധുക്കൾക്ക് വിട്ടുനൽകും.

🔹 ചിമ്മിനി ഉള്‍ക്കാട്ടില്‍ ഫോറസ്റ്റ് വാച്ചറെ കാട്ടാന ചവിട്ടിക്കൊന്നു. എച്ചിപ്പാറ ഉന്നതിയിലെ മലയന്‍ വീട്ടില്‍ പരേതനായ ബാലകൃഷ്ണന്‍റെ മകൻ കുമാര്‍ (42) ആണു മരിച്ചത്.ഇന്നലെ രാവിലെ മംഗലം ഡാമിന്‍റെയും ചിമ്മിനി ഡാമിന്‍റെയും അതിര്‍ത്തിപ്രദേശമായ ഒളകരയിലായിരുന്നു സംഭവം. ഫയര്‍ലൈന്‍ ജോലിക്കായി പോയ ആറംഗസംഘത്തിനുനേരേയാണ് പിടിയാനയുടെ ആക്രമണമുണ്ടായത്. ആനയുടെ മുന്നില്‍ അകപ്പെട്ട സംഘം പലവഴിക്കായി ഓടിരക്ഷപ്പെടുകയായിരുന്നു. അരമണിക്കൂറിനുശേഷം മറ്റുള്ള വർ തിരിച്ചെത്തിയപ്പോഴാണ് കാട്ടാന ആക്രമിച്ച നിലയില്‍ കുമാറിനെ കണ്ടത്.ബീറ്റ് ഫോറസ്റ്റ് ഓഫീസര്‍മാരായ ബിന്നി, ശ്രീജിത്ത്, വാച്ചര്‍മാരായ ഫാരിസ്, വിബിന്‍, അനീഷ് എന്നിവര്‍ ചേര്‍ന്നാണ് കുമാറിനെ കാടിനു പുറത്തെത്തിച്ചത്. വേലൂപ്പാടത്തെ സ്വകാര്യ ആശുപത്രിയില്‍ എത്തിച്ചെങ്കിലും മരിച്ചിരുന്നു.വരന്തരപ്പിള്ളി പോലീസ് മേല്‍നടപടികള്‍ സ്വീകരിച്ചു.കുമാർ പത്തുവര്‍ഷത്തിലധികമായി താത്കാലിക വാച്ചറായി ജോലിചെയ്യുകയാണ്. അവിവാഹിതനാണ്.അമ്മ: അമ്മാളു. സഹോദരങ്ങള്‍: സരുമണി, സൗമ്യ, പരേതനായ സാബു. സംസ്‌കാരം ഇന്നു രാവിലെ 11ന് എച്ചിപ്പാറ ഉന്നതി ശ്മശാനത്തില്‍.

🔹ഗ്യാസ് സിലിണ്ടറുകളുടെ ലഭ്യതക്കുറവുകാരണം ഏറ്റെടുത്ത കല്യാണസദ്യകൾപോലും മുടങ്ങുമെന്ന അവസ്ഥയാണെന്ന് ഓൾ കേരള കാറ്റേഴ്സ് അസോസിയേഷൻ (എകെസിഎ) ഭാരവാഹികൾ പത്രസമ്മേളനത്തിൽ പറഞ്ഞു.ഇതുമൂലം സാമ്പത്തികനഷ്ട‌വും നിയമനടപടികളും നേരിടേണ്ട ഗതികേടിലാണ്. മേഖലയുമായി ബന്ധപ്പെട്ട ആയിരക്കണക്കിനു തൊഴിലാളികളുടെ തൊഴിലും ഉപജീവനവും അനിശ്ചിതത്വത്തിലായിരിക്കുകയാണ്. നിലവിൽ പുതിയ സദ്യകൾ ഏറ്റെടുക്കാൻ സാധിക്കുന്നില്ല. ഗ്യാസ് ലഭിക്കാത്ത അവസ്ഥ തുടരുകയാണെങ്കിൽ സ്ഥാപനങ്ങൾക്കു പ്രവർത്തനം നിർത്തിവ‌യ്ക്കേണ്ടിവരും.

🔹പോക്സോ കേസിൽ അധ്യാപകന് തടവും പിഴയും. മലപ്പുറം, മങ്കട, ഉള്ളാട്ടുപാറ യുപി ഫായിസ്(28)നെയാണ് കൽപ്പറ്റ ഫാസ്റ്റ് ട്രാക്ക് സ്പെഷൽ കോടതി ജഡ്ജ് കെ. കൃഷ്ണകുമാർ മൂന്ന് വർഷം തടവിനും 50,000 രൂപ പിഴയടയ്ക്കാനും ശിക്ഷ വിധിച്ചത്.
2023 ജൂലൈയിൽ ഇയാൾ പ്രായപൂർത്തിയാവാത്ത കുട്ടിക്കെതിരേ ലൈംഗീകാതിക്രമം നടത്തുകയായിരുന്നു.അന്നത്തെ മാനന്തവാടി സ്റ്റേഷൻ സബ് ഇൻസ്പെക്ടർ ആയിരുന്ന എൻ. അജീഷ് കുമാർ കേസിൽ അന്വേഷണം നടത്തുകയും കോടതി മുൻപാകെ കുറ്റപത്രം സമർപ്പിക്കുകയുമായിരുന്നു. പ്രോസിക്ക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ ജി. ബബിത ഹാജരായി.

🔹 കൽപ്പറ്റ എക്സൈസ് സർക്കിൾ ഓഫീസിലെ എക്സൈസ് ഇൻസ്പെക്ടർ ബിജു പി. ഏബ്രഹാമും സംഘവും താഴെ മുട്ടിൽ ഭാഗത്ത് നടത്തിയ റെയ്ഡിൽ ആളൊഴിഞ്ഞ പറന്പിൽ നിന്നും മൂന്ന് മീറ്ററോളം ഉയരമുള്ള കഞ്ചാവ് ചെടി കണ്ടെത്തി.എൻഡിപിഎസ് കേസ് രജിസ്റ്റർ ചെയ്തു. കഞ്ചാവ് ചെടി നട്ടുവളർത്തിയ ആളെക്കുറിച്ചുള്ള അന്വേഷണം പുരോഗമിച്ചുവരുന്നതായി എക്സൈസ് അറിയിച്ചു. പരിശോധനയിൽ പ്രിവന്‍റീവ് ഓഫീസർ പി.ആർ. ജിനേഷ്, സിവിൽ എക്സൈസ് ഓഫീസർ പി.ഡി. അരുണ്‍ എന്നിവർ പങ്കെടുത്തു.

🔹കോഴിക്കോട് മെഡിക്കല്‍ കോളജിനു സമീപമുള്ള കൂറ്റന്‍ വാട്ടര്‍ ടാങ്കിനു മുകളില്‍ കയറി ആത്മഹത്യാഭീഷണി മുഴക്കിയ മലപ്പുറം സ്വദേശിയായ യുവാവിനെ പോലീസ്, അഗ്നിരക്ഷാസേന അധികൃതര്‍ സാഹസികമായി പിടികൂടി താഴെയിറക്കി.മഞ്ചേരി സ്വദേശിയായ സൈനുദീനാണ് ഇന്നലെ രാവിലെ മുതല്‍ ഉച്ചവരെ അധികൃതരെ മുള്‍മുനയില്‍ നിറുത്തിയത്.മഞ്ചേരി പോലീസ് രജിസ്റ്റര്‍ ചെയ്ത ലഹരിക്കേസിലെ പ്രതിയാണ് സൈനുദീന്‍. പോലീസ് കള്ളക്കേസെടുത്ത് പീഡിപ്പിക്കുന്നുവെന്നും തന്‍മൂലം കുടുംബ ജീവിതം താളംതെറ്റിയെന്നും ആരോപിച്ചാണ് സൈനുദീന്‍ രാവിലെ ഒമ്പതരയോടെ വാട്ടര്‍ ടാങ്കിനു മുകളില്‍ കയറിയത്. ഇയാള്‍ കയ്യില്‍ ബേ്‌ളഡും കുപ്പിച്ചില്ലും കരുതിയിട്ടുണ്ടായിരുന്നു. ഇവ ഉപയോഗിച്ച് ശരീരമാസകലം മുറിവേല്‍പ്പിച്ച് രക്തത്തില്‍ കുളിച്ചാണ് സൈനുദീന്‍ ടാങ്കിനു മുകളില്‍ നിന്നത്.ടാങ്കിനു മുകളിലുണ്ടായിരുന്ന കല്ലുകള്‍ ഇയാള്‍ താഴേക്ക് എറിഞ്ഞുകൊണ്ടിരുന്നത് വഴിയാത്രക്കാരില്‍ ഭീതി പടര്‍ത്തി. പോലീസ്, അഗ്നിരക്ഷാസേന ഉദ്യോഗസ്ഥര്‍ അനുനയ നീക്കം നടത്തിയെങ്കിലും സൈനുദീന്‍ വഴങ്ങിയില്ല.മുറിവിലൂടെ രക്തം വാര്‍ന്ന് സൈനുദീന്‍റെ ആരോഗ്യനില വഷളാകുമെന്ന് കണ്ട് പോലീസ്, അഗ്നിരക്ഷാസേനകളിലെ ഓരോ ഉദ്യോഗസ്ഥര്‍ ഗോവണി ഉപയോഗിച്ച് മറുവശത്തുകൂടി വാട്ടര്‍ ടാങ്കിനു മുകളിലെത്തി. സൈനുദീന്‍ നിന്നിരുന്നതിന്‍റെ പുറകുവശത്തുകൂടിയാണ് ഇവര്‍ മുകളില്‍ പ്രവേശിച്ചത്.കയ്യിലുണ്ടായിരുന്ന കല്ല് ഉപയോഗിച്ച് സൈനുദീന്‍ ഉദ്യോഗസ്ഥരെ ആക്രമിച്ചുവെങ്കിലും ജീവന്‍ പണയം വച്ച് അവര്‍ പിടികൂടുകയായിരുന്നു. സൈനുദീന്‍റെ ആക്രമണത്തില്‍ അഗ്നിരക്ഷാസേനാംഗത്തിന്‍റെ തലയ്ക്ക് പരിക്കേറ്റു. സൈനുദീനെ ബന്ധിച്ച് പ്രത്യേക വലയിലാക്കി താഴെയിറക്കുകയായിരുന്നു. രക്തം നഷ്ടപ്പെട്ട് ഇയാളുടെ ആരോഗ്യനില വഷളായതിനാല്‍ ഉടനടി കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

🔹ട്രാക്കിൽ അറ്റകുറ്റപ്പണികൾ നടക്കുന്നതിനാൽ ചില ട്രെയിനുകൾ വഴി തിരിച്ച് വിടുകയും ഭാഗികമായി റദ്ദാക്കുകയും ചെയ്യുമെന്ന് റെയിൽവേ തിരുവനന്തപുരം ഡിവിഷൻ അധികൃതർ അറിയിച്ചു.12674 തിരുവനന്തപുരം സെൻട്രൽ – ഡോ. എം. ജി. ആർ. ചെന്നൈ സൂപ്പർ ഫാസ്റ്റ് മെയിൽ നാളെ ആലപ്പുഴ വഴിയായിരിക്കും സർവീസ് നടത്തുക. മാവേലിക്കര, ചെങ്ങന്നൂർ, തിരുവല്ല, ചങ്ങനാശേരി, കോട്ടയം, തൃപ്പൂണിത്തുറ സ്റ്റോപ്പുകൾ അന്ന് ഒഴിവാക്കി. പകരം ആലപ്പുഴ, ചേർത്തല, എറണാകുളം ജംഗ്ഷൻ എന്നിവിടങ്ങളിൽ അധിക സ്റ്റോപ്പ് അനുവദിച്ചിട്ടുണ്ട്. 22503 കന്യാകുമാരി – ദിബ്രുഗഡ് വിവേക് സൂപ്പർ ഫാസ്റ്റ് എക്സ്പ്രസും നാളെ ആലപ്പുഴ വഴിയായിരിക്കും ഓടുക. കായംകുളം, ആലപ്പുഴ, എറണാകുളം ജംഗ്ഷൻ എന്നിവിടങ്ങളിൽ അധിക സ്റ്റോപ്പ് അനുവദിച്ചിട്ടുണ്ട്.

🔹 കപ്പലുകൾക്കു നേരേയുള്ള ഇറാന്‍റെ ആക്രമണങ്ങളിൽ മൂന്ന് ഇന്ത്യക്കാർ കൊല്ലപ്പെട്ടു. ഇറാക്കിലെ ബസ്രയ്ക്കു സമീപം അമേരിക്കയുടെ ക്രൂഡ്‌ ഓയിൽ ടാങ്കറായ സഫീസിയ വിഷ്ണു എന്ന കപ്പലിനു നേരേയുണ്ടായ ആക്രമണത്തിൽ ഒരു ഇന്ത്യൻ ജീവനക്കാരൻ കൊല്ലപ്പെട്ടു.കപ്പലിലുണ്ടായിരുന്ന മറ്റ് 15 ജീവനക്കാരെ സുരക്ഷിതമായി ഒഴിപ്പിച്ചു. ആക്രമണദൃശ്യങ്ങൾ ഇറാൻ പുറത്തുവിട്ടു. മേഖലയിലെ മറ്റു കപ്പലുകളിലുണ്ടായ ആക്രമണത്തിൽ രണ്ട് ഇന്ത്യക്കാർ കൊല്ലപ്പെടുകയും ഒരാളെ കാണാതായതായും ചെയ്തതായി കേന്ദ്ര വിദേശകാര്യ മന്ത്രാലയം ബുധനാഴ്ച സ്ഥിരീകരിച്ചിരുന്നു.
ഇറാനിൽ ഉണ്ടായിരുന്ന 9,000 ഇന്ത്യക്കാരിൽ പലരും നാട്ടിലെത്തിയെന്നു വിദേശകാര്യ വക്താവ് രണ്‍ധീർ ജയ്സ്വാൾ അറിയിച്ചു. ഇന്ത്യയിൽ മടങ്ങിയെത്തിയവരിൽ കൂടുതലും വിദ്യാർഥികളാണ്. ശേഷിക്കുന്നവർ റോഡുമാർഗം അർമേനിയയിലും അസർബൈജാനിലും എത്തി.ഇവർക്കു വാണിജ്യ വിമാനങ്ങളിൽ നാട്ടിലേക്കു മടങ്ങാനുള്ള ഏകോപനത്തിനും നടപടിക്രമങ്ങൾക്കുമായി സർക്കാർ സഹായിക്കുന്നുണ്ടെന്നും വിദേശകാര്യ വക്താവ് അറിയിച്ചു.

🔹ഇംഗ്ലണ്ടിലെ ഫ്രാഞ്ചൈസി ക്രിക്കറ്റ് ലീഗായ ദി ഹണ്ട്രഡിന്റെ 2026 സീസണിലേക്കുള്ള താരലേലത്തിൽ പാകിസ്ഥാൻ സ്പിന്നർ അബ്രാർ അഹമ്മദിനെ സ്വന്തമാക്കി സൺറൈസർസ് ലീഡ്സ്. ഏകദേശം 2.3 കോടി രൂപയ്ക്കാണ് സൺ ടിവി ഗ്രൂപ്പിന്റെ ഉടമസ്ഥതയിലുള്ള ഫ്രാഞ്ചൈസി അഹമ്മദിനെ പാളയത്തിലെത്തിച്ചത്.
നേരത്തെ ഇന്ത്യൻ ഉടമസ്ഥതയുള്ള ടീമുകൾ പാകിസ്ഥാൻ താരങ്ങളെ തിരഞ്ഞെടുക്കുമോ എന്ന ചർച്ചകൾക്കിടയിലാണ് , ഐപിഎല്ലിൽ സൺറൈസേഴ്‌സ് ഹൈദരാബാദിന്റെ ഉടമകളായ ലീഡ്‌സിന്റെ മാനേജ്‌മന്റ് അഹമ്മദിനെ സ്വന്തമാക്കിയത്.അതേസമയം, മറ്റൊരു പാകിസ്ഥാനി സ്പിന്നറായ ഉസ്മാൻ താരിഖ്നെ ബർമിങ്ഹാം ഫീനിക്സ് സ്വന്തമാക്കി. എന്നാൽ ഹാരിസ് റൗഫ്, ഷദാബ് ഖാൻ, സൈം അയൂബ് തുടങ്ങിയ പാകിസ്ഥാൻ താരങ്ങളെ ആരും വാങ്ങിയില്ല.മിസ്റ്ററി സ്പിന്നറായി അറിയപ്പെടുന്ന അബ്രാർ അഹമ്മദ് ടി20 ഫോർമാറ്റിൽ മികച്ച പ്രകടനമാണ് കാഴ്ചവെച്ചിട്ടുള്ളത്. ഇതിനകം നിരവധി അന്താരാഷ്ട്ര ടി20 മത്സരങ്ങളിൽ ശ്രദ്ധേയമായ വിക്കറ്റ് നേട്ടം സ്വന്തമാക്കിയ താരം മധ്യഓവറുകളിൽ നിർണായകമായ വിക്കറ്റുകൾ നേടുന്ന ബൗളർ ആണ്. ഈ വർഷത്തെ ദി ഹണ്ട്രഡ് ടൂർണമെന്റ് ജൂലൈ 21 മുതൽ ഓഗസ്റ്റ് 16 വരെ ഇംഗ്ലണ്ടിൽ നടക്കും.

🔹ടി 20 മത്സരങ്ങൾ കുറച്ച ടെസ്റ്റിലും ശ്രദ്ധ കേന്ദ്രീകരിക്കാൻ ഇന്ത്യൻ സൂപ്പർ താരം ജസ്‌പ്രിത് ബുമ്ര. അടുത്ത കൊല്ലം നടക്കുന്ന ഏകദിന ലോകകപ്പ് മുന്നിൽക്കണ്ടാണ് ഇന്ത്യൻ പേസറിന്റെ നീക്കം. ഈ വർഷത്തെ ഐപിഎൽ കഴിഞ്ഞതിനു ശേഷം ബുമ്രയുടെ മത്സരങ്ങളുടെ ക്രമം മുൻകൂട്ടി ആസൂത്രണം ചെയ്യുമെന്ന് പരിശീലകൻ ഗൗതം ഗംഭീർ വ്യക്തമാക്കി.
നേരത്തെ സ്വന്തം മണ്ണിൽ നടന്ന 2023 ലെ ഏകദിന ലോകകപ്പിൽ കിരീടം നേടാതെ പോയ ഇന്ത്യ അടുത്ത തവണ കപ്പടിക്കണമെന്ന ദൃഡനിശ്ചയത്തോടെയാണ് തയാറെടുക്കുന്നത്. ദക്ഷിണാഫ്രിക്ക , സിംബാബ്‌വെ നമീബിയ എന്നീ രാജ്യങ്ങളിൽ നടക്കുന്ന ടൂർണമെന്റിൽ ബുമ്രയുടെ ഫോമും ഫിട്നെസ്സും ഇന്ത്യയ്ക്ക് നിർണായകമായേക്കാം.ഈ വർഷത്തെ ടി 20 ലോകകപ്പിൽ ഇന്ത്യ കിരീടം നിലനിർത്തിയതിൽ ബുംറ നിർണായക പങ്കു വഹിച്ചു. ടൂർണ്ണമെന്റിലുടനീളം മികച്ച പ്രകടനം പുറത്തെടുത്ത അദ്ദേഹം ഫൈനലിലെ മികച്ച താരമായും തെരഞ്ഞെടുക്കപ്പെട്ടു.

🔹മലയാളികളെ ഏറെ ചിരിപ്പിച്ച സിനിമയാണ് പുലിവാൽ കല്യാണം. 2003 പുറത്തിറങ്ങിയ ചിത്രമാണെങ്കിലും ഇപ്പോഴും ആരാധകർ ഏറെയുള്ള സിനിമയാണ് പുലിവാൽ കല്യാണം. ഓരോ തവണ കാണുമ്പോഴും ചിരിയുടെ മാലപ്പടക്കങ്ങളാണ് സിനിമ കാണികൾക്ക് സമ്മാനിക്കുന്നത്.
ജയസൂര്യയെ നായകനാക്കി ഷാഫിയാണ് സിനിമ സംവിധാനം ചെയ്തത്. എന്നാൽ സിനിമയിലെ ഓരോ കഥാപാത്രങ്ങളും ഒന്നിനൊന്ന് മികച്ച് നിന്നതായിരുന്നു. സലീംകുമാർ, കൊച്ചിൻ ഹനീഫ, ഹരിശ്രീ അശോകൻ, ജഗതീ ശ്രീകുമാർ, ലാൽ, കാവ്യാ മാധവൻ എന്നു തുടങ്ങി വലിയ നിരയും സിനിമയിലുണ്ട്. എന്നാൽ സിനിമയിൽ നായകൻ താനായിരുന്നെങ്കിലും യഥാർഥത്തിൽ സ്കോർ ചെയ്തതും നായകനായതും സലീംകുമാറാണെന്നും അത് അദ്ദേഹത്തിൻ്റെ സിനിമയാണെന്നുമാണ് ജയസൂര്യ പറഞ്ഞിരിക്കുന്നത്. അഞ്ച് മണിക്കൂറിൽ ഏറെ ദൈർഘ്യമുള്ള സിനിമ പിന്നീട് കട്ട് ചെയ്താണ് ഇപ്പോഴുള്ള ദൈർഘ്യത്തിലേക്ക് എത്തിയതെന്നും ജയസൂര്യ പറയുന്നു. ഒരു അഭിമുഖത്തിലാണ് അദ്ദേഹം കാര്യം വ്യക്തമാക്കിയിരിക്കുന്നത്. ബോക്സ് ഓഫീസിൽ വലിയ വിജയമായി മാറിയ സിനിമയുടെ രചന നിർവഹിച്ചത് ഉദയകൃഷ്ണ, സിബി കെ തോമസ് എന്നിവർ ചേർന്നായിരുന്നു.

🔹2026 ജനുവരിയിൽ റിലീസായ നിഖില വിമൽ ചിത്രം പെണ്ണ് കേസ് ഒടിടിയിലെത്തി. ബോക്സ് ഓഫീസിൽ പ്രതീക്ഷിച്ച വിജയം നേടാൻ സാധിക്കാഞ്ഞ ചിത്രം നീണ്ട കാത്തിരിപ്പിനൊടുവിലാണ് ഒടിടിയിൽ റിലീസാകുന്നത്.
ആമസോൺ പ്രൈം വീഡിയോയിലാണ് മാർച്ച് 11 ന് ചിത്രം റിലീസ് ചെയ്തത്. ഫെബിൻ സിദ്ധാർത്ഥാണ് ചിത്രം സംവിധാനം ചെയ്തിരിക്കന്നത്. നിഖില വിമലിനെ കൂടാതെ ഹക്കിം ഷാജഹാൻ, അജു വർഗീസ്, രമേശ് പിഷാരടി, പ്രവീൺ രാജ, തുടങ്ങിയവർ ചിത്രത്തിൽ പ്രധാന വേഷങ്ങളിൽ അഭിനയിച്ചിട്ടുണ്ട്.ശിവജിത്ത്, ഇർഷാദ് അലി, പി.പി.കുഞ്ഞികൃഷ്ണൻ, ധനേഷ് കോളിയാട്, അനാർക്കലി നാസർ, കിരൺ പീതാംബരൻ, രഞ്ജി കാങ്കോൽ, അബിൻ ബിനോ, സഞ്ജു സാനിച്ചൻ, അഡ്വ. ഷുക്കൂർ, ശ്രീരേഖ, അഖിൽ കവലയൂർ, ഹരി പത്തനാപുരം, ലാലാ മലപ്പുറം, ശ്രീകാന്ത് വെട്ടിയാർ തുടങ്ങിയവരും ചിത്രത്തിൽ അഭിനയിച്ചിട്ടുണ്ട്.ചിത്രത്തിന്റെ സംഗീതം നിർവഹിച്ചിരിക്കുന്നത് അങ്കിത് മേനോനാണ്. ഛായാഗ്രഹണം ഷിനോസ്. പണം തട്ടുന്നതിനായി കല്യാണ തട്ടിപ്പ് നടത്തുന്ന രോഹിണി എന്ന യുവതിയാണ് ചിത്രത്തിന്റ കഥതന്തു.

💦 ഗുരുജിയുടെ വാക്കുകൾ

ആത്മീയത ജീവിതപ്രശ്നങ്ങൾക്കുള്ള പരിഹാരമല്ല. മറിച്ച് നാം അനുഭവിക്കുന്ന പ്രശ്നങ്ങളെ യാഥാർഥ്യബോധത്തോടെ അഭിമുഖീകരിക്കാനുള്ള ശക്തിപകരാൻ സഹായിക്കുന്ന സാന്നിധ്യമാണ്. വിശക്കുന്നവന് അന്നമാണ് പരിഹാരം. സ്നേഹം തേടുന്നവന് ഞാൻ കൂടെയുണ്ട് എന്നുപറയുന്ന വാക്കാണ് വേണ്ടത്. വസ്ത്രവും പാർപ്പിടവും തേടുന്നവന് ധ്യാനമോ അറിവോ അല്ല പരിഹാരം. നാം അഭിമുഖീകരിക്കുന്ന പ്രശ്നങ്ങൾ പലതാണ്. അതിനുള്ള പരിഹാരവും പലതാണ്. അതുരണ്ടും വിവേകത്തോടെ അറിയാനും പരിഹരിക്കാനുമുള്ള സാവകാശവും സുമനസ്സും നൽകുന്ന ഊർജ്ജമെന്ന നിലയിലാണ് ആത്മീയത പ്രസക്തമാകുന്നത്. ആത്മീയത എന്നതുകൊണ്ട് ഉദ്ദേശിക്കുന്നത് ജീവിതത്തെ സർഗാത്മകമാക്കുക എന്നു മാത്രമാണ്. ശരീരത്തെയും മനസ്സിനെയും ബുദ്ധിയെയും ഉണർവു നൽകുന്ന ലോകങ്ങളിൽ വ്യാപരിപ്പിക്കുക എന്നർഥം. പ്രതിസന്ധികളിൽ നിന്ന് ഒളിച്ചോടുന്നത് ഭീരുത്വവും, അവയെ നേരിടുന്നത് ആത്മധൈര്യവുമാണ്.. മസിൽ പവർ പോലെ തന്നെ പ്രധാനമാണ് മെന്റൽ പവർ. ജീവിതത്തിലെ തിരിച്ചടികളാണ് മനസ്സിനെ കരുത്തുറ്റതാക്കുന്നത്.. നിയന്ത്രിക്കാൻ കഴിയാത്ത കാര്യങ്ങളിൽ ആധി പിടിക്കാതെ, നമ്മുടെ പരിധിയിലുള്ളവയെ ശാന്തതയോടെയും നിശ്ചയദാർഢ്യത്തോടെയും കൈകാര്യം ചെയ്യുകയാണ് വേണ്ടത്. വീഴ്ചകളിൽ തളരാതെ, പ്രതീക്ഷ കൈവിടാതെ മുന്നോട്ട് പോവുക. അതിനെ ധൈര്യപൂർവ്വം അഭിമുഖീകരിച്ചാൽ ഏത് കൊടിയ പ്രതിസന്ധിയിലും വിജയം നമ്മോടൊപ്പം ഉണ്ടാകും.

തയ്യാറാക്കിയത്: കപിൽ ശങ്കർ

6 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 13 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

അന്യായമായ ആഗോള വ്യാപാര രീതി ഇന്ത്യയുൾപ്പെടെയുള്ള രാജ്യങ്ങൾക്കെതിരെ ട്രംപ് ഭരണകൂടത്തിന്റെ അന്വേഷണം

വോട്ട് ചെയ്യാൻ പൗരത്വ തെളിവ് നിർബന്ധം: ഫ്ലോറിഡ നിയമസഭ ബിൽ പാസാക്കി

22 വർഷത്തെ ജയിൽവാസം: നിരപരാധിയെന്ന് കണ്ട് ടെക്സസ് സ്വദേശിനിയെ വിട്ടയച്ചു

1 COMMENT

Leave a Reply to Saima sankar Cancel reply

Most Popular

ട്രെയിൻ തട്ടി മരിച്ച വിദ്യാർഥിയുടെ മാതാപിതാക്കൾ ജീവനൊടുക്കിയ നിലയിൽ

നിയമസഭാ തെരഞ്ഞെടുപ്പിൽ ഗ്രീൻ പ്രോട്ടോക്കോൾ കർശനമായി പാലിക്കണം

സംസ്ഥാനത്തു ഗുണനിലവാരമില്ലാത്ത മരുന്ന് നിരോധിച്ചു

മുഴുവൻ സ്‌കൂളുകളിലും കൗൺസിലിംഗ് നടപ്പിലാക്കണം: ബാലാവകാശ കമ്മിഷൻ

Recent Comments

EDITOR PICKS

ട്രെയിൻ തട്ടി മരിച്ച വിദ്യാർഥിയുടെ മാതാപിതാക്കൾ ജീവനൊടുക്കിയ നിലയിൽ

നിയമസഭാ തെരഞ്ഞെടുപ്പിൽ ഗ്രീൻ പ്രോട്ടോക്കോൾ കർശനമായി പാലിക്കണം

സംസ്ഥാനത്തു ഗുണനിലവാരമില്ലാത്ത മരുന്ന് നിരോധിച്ചു

POPULAR POSTS

എൽപിജി പ്രതിസന്ധിയിൽ ഭീതി വേണ്ട; കരുതലോടെ ഇന്ത്യ മുന്നോട്ടെന്ന് പ്രധാനമന്ത്രി നരേന്ദ്ര മോദി.

യു.എ.ഇ. താമസവിസ വിസ കാലാവധി കഴിഞ്ഞ് നാട്ടിൽ കുടുങ്ങിയവർക്ക് തിരിച്ചുവരാൻ ഇളവ്.

POPULAR CATEGORY

ABOUT US

FOLLOW US