🌹 “ഇന്നത്തെ ചിന്താവിഷയം” 🌹 – 2025 | ജനുവരി 04 | ശനി ✍ പ്രൊഫസ്സർ എ.വി. ഇട്ടി മാവേലിക്കര

പോരിന് ഇറങ്ങുന്നവർ ഓർത്തിരിക്കേണ്ട കാര്യങ്ങൾ
————————————————————————–

ഒരു ഗുസ്തി മത്സരം നടക്കുകയായിരുന്നു. നാട്ടിലെ പേരുകേട്ട ഗുസ്തി വീരൻ, അവസാന റൗണ്ടിലെത്തി. എതിരാളിയെ ആർക്കും പരിചയമില്ലായിരുന്നു. ആരും അയാളെ ശ്രദ്ധിച്ചതു പോലുമില്ല. ആരും അറിയാത്ത ഒരാൾ.

അപ്രതീക്ഷിതമായിരുന്നു, പുതുമുഖത്തിൻ്റെ പോരാട്ട വീര്യം. ഗുസ്തി വീരനെ അനങ്ങാൻ പോലും സമ്മതിക്കാതെ, അയാൾ തറപറ്റിച്ചു. ഒരു നിമിഷം കാണികൾ സ്തബദരായി. പിന്നിടവർ കൂകി വിളിക്കാനും, അട്ടഹസിച്ചാർക്കാനും ആരംഭിച്ചു.

പെട്ടന്ന്, പരാജിതനായ ഗുസ്തി വീരനും,
ജനക്കൂട്ടത്തിൻ്റെ സന്തോഷത്തിൽ പങ്കുചേരാൻ തുടങ്ങി. അയാൾ, വിജയിയെ എടുത്തുയർത്തി, ആഹ്ലാദം പ്രകടിപ്പിച്ചു. ജനങ്ങൾ വീണ്ടും നിശബ്ദരായി. ഒരു കൊച്ചു കുട്ടി, ഗുസ്തി വീരനോടു ചോദിച്ചു: “നിങ്ങളല്ലെ തോറ്റത് ? പിന്നെന്തിനാണു സന്തോഷിക്കുന്നത് ?” അയാൾ പറഞ്ഞു:
”ആദ്യമായാണ്, ഒരു പുതുമുഖം, ചാംപ്യനെ തോൽപ്പിക്കുന്നതു ഞാൻ കാണുന്നത്. ആർപ്പുവിളിക്കുന്ന കാണികൾ ആർത്തു ചിരിക്കുന്നതും, നിശബ്ദരാകുകന്നതും,
ഒരേ സമയം ഞാൻ കണ്ടു. പിന്നെങ്ങനെ ഞാൻ സന്തോഷിക്കാതിരിക്കും?”

അനുഭവങ്ങൾ ആനന്ദകരമാകണമെങ്കിൽ, അവയോടുള്ള നമ്മുടെ സമീപനം മാറണം. എല്ലാ അനുഭവങ്ങളും, എല്ലാവർക്കും ആസ്വാദ്യകരമാകണമെന്നില്ല. ചിലതു സ്വാഭാവികമായും സന്തോഷം തരുമ്പോൾ, ചിലതിൽ നിന്നു സന്തോഷം കണ്ടെത്താൻ
നമുക്കാകണം. ആഗ്രഹിക്കുന്നതു മാത്രം ജീവിതത്തിൽ സംഭവിപ്പിക്കുവാനുള്ള ഇന്ദ്രജാലം, നമുക്കാർക്കും അറിയില്ല. എന്നാൽ, എല്ലാറ്റിനോടും സന്താഷത്തേടെ പ്രതികരിക്കാനുള്ള മന: സാന്നിദ്ധ്യം നാം നേടിയെടുക്കണം.

ഒരു നദിയും, കല്ലിൽത്തട്ടിയതിൻ്റെ പേരിൽ, ഒഴുക്കവസാനിപ്പിച്ചിട്ടില്ല. വഴിമാറി ഒഴുകിയിട്ടേയുള്ളൂ. ആർത്തലച്ച്, ആഴങ്ങളിലേക്കു വീണാലും, അതു വീണ്ടും കുതിച്ചെഴുന്നേറ്റ് , അനന്തമായി ഒഴുകും. വീഴുന്നവരുടെ മുമ്പിൽ, രണ്ടു സാദ്ധ്യതകളാണുള്ളത്. ഒന്നുകിൽ വിത്തായി വളരുക; അല്ലെങ്കിൽ ജഡമായി തീർന്ന്, ഇല്ലാതാകുക.

ആരും നിസ്സാരരല്ല. തനതു മേഖലകളിൽ, തക്ക സമയത്തു കഴിവുകൾ തെളിയിക്കാൻ ശേഷിയുള്ളവരാണ് എല്ലാവരും. തുടർച്ചയായ ജയങ്ങളിൽ നിന്നു ലഭിക്കുന്ന
അമിതാവേശവും, ആത്മവിശ്വാസവും തകർക്കാൻ, ആദ്യമായി ഗോദയിലിറങ്ങുന്നവൻ്റെ അപ്രതീക്ഷിത നീക്കങ്ങൾ കാരണമാകാം? എതിരാളിയെ തുല്യനായി കണ്ട്, ബഹുമാനിക്കുന്നതാണ്, ഒരു നല്ല പോരാളിയുടെ സവിശേഷ ഗുണം. ബഹുമാനം എല്ലാവരോടുമുണ്ടാകണം: അവരവരോടും, എതിരാളിയോടും, മത്സരത്തോടും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര