🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 21 | ശനി ✍ പ്രൊഫസ്സർ എ.വി. ഇട്ടി മാവേലിക്കര

ഹൃദയ ബന്ധത്തിൻ്റെ ഉടമകളാകാം
—————————————————-

ദിവസവും അവൾ സെമിത്തേരിയിൽ പൂക്കൾ വച്ചു പ്രാർത്ഥിക്കുമായിരുന്നു. ഇതു സ്ഥിരമായി കാണാറുണ്ടായിരുന്ന സമീപ വാസി, ഒരു ദിവസം അവളോടു ചോദിച്ചു: “അതു നിങ്ങളുടെ ആരാണ് ?”
“അതെൻ്റെ ഹൃദയത്തിൻ്റെ ഉടമയാണു് “, അവൾ പ്രതിവചിച്ചു.

വ്യവസ്ഥാപിത നിർവചനങ്ങളും അടയാളങ്ങളുമാകില്ല ബന്ധങ്ങളുടെ ആഴം നിർണ്ണയിക്കുന്നത്. അച്ഛൻ, അമ്മ, ഭാര്യ, ഭാർത്താവ്‌, മക്കൾ തുടങ്ങിയ എല്ല സംസർഗ നാമങ്ങളും, ജൈവശാസ്ത്രപരമായി മാത്രം നിലനിൽക്കുന്നിടത്ത്, ഇഴയടുപ്പത്തിൻ്റെ തെളിവുകളൊന്നും ഉണ്ടാകണമെന്നില്ല.
ബന്ധങ്ങൾ രൂപപ്പെടുന്നത് മനസ്സറിയാതെയോ, മന: പൂർവ്വമോ ആകാം.
അച്ഛനേയും, അമ്മയേയും ആർക്കും തെരഞ്ഞെടുക്കാനാകില്ല. എന്നാൽ,
സൗഹൃദങ്ങൾ കൃത്യമായ തെരഞ്ഞെടുപ്പിലൂടെ മാത്രമാണു സംഭവിക്കുക.

എങ്ങനെ തുടങ്ങി എന്നതിനേക്കാൾ, എങ്ങനെ തുടരുന്നുവെന്നതാണു ബന്ധങ്ങളുടെ ആഴവും വ്യാപ്തിയും നിശ്ചയിക്കുന്നത്. അവിടെ, രക്തബന്ധങ്ങളേക്കാൾ, ഹൃദയബന്ധങ്ങൾ പലപ്പോഴും ശക്തമായെന്നിരിക്കും. പ്രതിജ്ഞ ചൊല്ലി തുടങ്ങുന്ന ബന്ധങ്ങളിൽ പലതും പാതി വഴിയിൽ അവസാനിക്കുന്നത്, ഹൃദയം കൈമാറാൻ മറന്നു പോകുന്നതിനാലാണ്. ഹൃദയബന്ധങ്ങൾ ശക്തമാണെങ്കിൽ മാത്രമേ ഹൃദയ സ്പന്ദനങ്ങൾ അന്യോന്യം മനസ്സിലാക്കാനാകൂ.

നിവർത്തികേടിൻ്റെ പേരിൽ നിലനിർത്തേണ്ടി വരുന്ന ബന്ധങ്ങൾ, മനസ്സിൻ്റെ നിഷ്ക്കളങ്കതയും സമാധാനവും നശിപ്പിക്കും. കൃത്രിമമായി പ്രകടിപ്പിക്കേണ്ടി വരുന്ന സ്നേഹവും, നിസ്സഹായത കൊണ്ട് , ഒളിച്ചുവയ്ക്കണ്ടി വരുന്ന അമർഷവും ചേർന്നു സൃഷ്ടിക്കുന്ന നിർജീവതയുടെ ഇരകളാണു, മനുഷ്യരിൽ പലരും.

സ്വത്തിൻ്റെയും സമ്പത്തിൻ്റെയും ഉടമകളാകാൻ കിണഞ്ഞു ശ്രമിക്കുന്ന ഏറെപ്പേരുകൾക്കിടയിൽ, ആത്മാർത്ഥമായ ഹൃദയബന്ധത്തിൻ്റെ ഉടമകളാകാൻ ആഗ്രഹിക്കുന്ന ചിലരെയെങ്കിലും കണ്ടെത്താനായിരുന്നുവെങ്കിൽ, ജീവിതം സുഖമുള്ള അനുഭവമാകുമായിരുന്നു.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര