📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 14 | ശനി ✍ കപിൽ ശങ്കർ

🔹സ്ത്രീ സുരക്ഷാ പെൻഷൻ പ്രഖ്യാപിച്ചപ്പോൾ എല്ലാവർക്കും ഒരു സംശയമായിരുന്നു, ഇത് നടപ്പിലാകുമോ, നടപ്പിലാക്കാൻ പറ്റി. കാര്യമാണോ എന്നിങ്ങനെ…എന്നാൽ ജനങ്ങൾ സ്ത്രീ പുരുഷ വ്യത്യാസമില്ലാതെ അവർ പറഞ്ഞു ഈ പദ്ധതി ഒരു കൈത്താങ്ങാണെന്ന്. അങ്ങനെ കേൾക്കുന്നതല്ലേ നമ്മുടെ വിജയം. കൈരളി ന്യൂസിന്റെ പബ്ലിക് ഓഡിറ്റ് എന്ന പരിപാടിയിൽ സ്ത്രീ സുരക്ഷാ പെൻഷനെക്കുറിച്ച് സംസാരിച്ച് മന്ത്രി കെ എൻ ബാലഗോപാൽ.സ്ത്രീകൾക്കൊരു സുരക്ഷാ പെൻഷൻ നൽകുകയെന്നത് ഏറ്റവും കരുതലോടെയുള്ള തീരുമാനമാണ്. സംസ്ഥാന സർക്കാരിൻ്റെ സ്ത്രീസുരക്ഷാ പദ്ധതി അത്ര കൃത്യതയോടും കരുതലോടും കൂടെയാണ് തീരുമാനിച്ചിരിക്കുന്നതെന്ന് മാലാ പാർവതിയും പറഞ്ഞു. സ്ത്രീകൾ, അവരിങ്ങനെ രാപകലില്ലാതെ ജോലി ചെയ്യുകയാണ് അവരുടെ അധ്വാനത്തിന് കൂലി ലഭിക്കാറില്ല, അവർക്കൊരു കൈത്താങ്ങാകുകയാണ് സർക്കാർ. ആ കൈത്താങ്ങ് നവംബർ ഒന്ന് മുതൽ നടപ്പിലാകുകയും ചെയ്തു. വീട്ടമ്മമാരുടെ വീട്ടുജോലിയെ ഒരു തൊഴിലായി അംഗീകരിച്ചുകൊണ്ടാണ് ഈ ചരിത്രപരമായ തീരുമാനം സർക്കാർA കൈക്കൊണ്ട്. സ്ത്രീ സുരക്ഷാ പെൻഷൻ എന്നത് എൽ.ഡി.എഫ് (LDF) പ്രകടനപത്രികയിലെ ഒരു പ്രധാന വാഗ്ദാനമായിരുന്നു. വലിയ സാമ്പത്തിക ബാധ്യതയുണ്ടാക്കുന്ന ഒന്നാണെങ്കിലും, കഴിഞ്ഞ ബജറ്റിലെ പ്രഖ്യാപനത്തിന് പിന്നാലെ നവംബർ ഒന്നു മുതൽ ഇത് നൽകിത്തുടങ്ങാൻ സർക്കാർ തീരുമാനിക്കുകയായിരുന്നു. എത്ര വലിയ ബുദ്ധിമുട്ടുകൾ ഉണ്ടായാലും പ്രകടനപത്രികയിലെ വാഗ്ദാനം പാലിക്കണമെന്ന സർക്കാരിന്റെ ഉറച്ച തീരുമാനമാണ് ഇതിലൂടെ നടപ്പിലാകുന്നതെന്ന് മന്ത്രി വ്യക്തമാക്കി. 35 വയസ്സു മുതൽ 60 വയസ്സു വരെയുള്ള സ്ത്രീകൾക്കാണ് ഈ സുരക്ഷാ പദ്ധതിയുടെ പ്രയോജനം ലഭിക്കുന്നത്. . സാമ്പത്തിക ആവശ്യങ്ങൾ വർദ്ധിച്ചുവരുന്ന ഈ കാലഘട്ടത്തിൽ മാസം തോറും ലഭിക്കുന്ന 1000 രൂപ പെൻഷൻ സ്വന്തമായി വരുമാനമില്ലാത്ത സ്ത്രീകൾക്കും വലിയൊരു കൈത്താങ്ങാണ്. സ്ത്രീ-പുരുഷ ഭേദമില്ലാതെ കേരളം ഒന്നടങ്കം ഈ പദ്ധതിയെ സ്വാഗതം ചെയ്തിരിക്കുകയാണെന്നാണ് ജനങ്ങൾക്കും സർ്കകാരിന്റെ ഈ തീരുമാനത്തെക്കുറിച്ച് പറയാനുള്ളത്.

🔹വന്യജീവി ആക്രമണങ്ങളില്‍ മരണപ്പെടുന്നവരുടെ ആശ്രിതര്‍ക്കുളള ധനസഹായം 10 ലക്ഷത്തില്‍ നിന്നും 14 ലക്ഷം രൂപയായി വര്‍ദ്ധിപ്പിക്കാന്‍ ഇന്ന് ചേര്‍ന്ന മന്ത്രിസഭാ യോഗത്തില്‍ തീരുമാനമായതായി മന്ത്രി എ.കെ.ശശീന്ദ്രന്‍ അറിയിച്ചു. പാമ്പ്, തേനിച്ച, കടന്നല്‍ എന്നിവയുടെ ആക്രമണം മൂലം മരണപ്പെടുന്നവരുടെ ആശ്രിതര്‍ക്കുള്ള ധനസഹായം 4 ലക്ഷം രൂപയില്‍ നിന്നും 10 ലക്ഷം രൂപയായും വര്‍ദ്ധിപ്പിച്ചു. വന്യജീവി ആക്രമണത്തില്‍ പരിക്കേറ്റ് ഒരാഴ്ച്ചയില്‍ കൂടുതല്‍ ആശുപത്രി വാസം വേണ്ടിവരുന്നവര്‍ക്കുള്ള ധനസഹായം പരമാവധി രണ്ട് ലക്ഷം രൂപയായി വര്‍ദ്ധിപ്പിച്ചു. വന്യജീവി ആക്രമണത്തിൽ മരണം സംഭവിക്കുന്നവരുടെ ആശ്രിതർക്കും പരിക്കേറ്റവർക്കുമുള്ള മുഖ്യമന്ത്രിയുടെ ദുരിതാശ്വാസ നിധിയിൽ നിന്നും അധിക ധനസഹായം അനുവദിക്കുന്നതിനുള്ള പൊതുമാനദണ്ഡം സംബന്ധിച്ച കരട് നിര്‍ദ്ദേശങ്ങളാണ് മന്ത്രിസഭായോഗം അംഗീകരിച്ചത്. മരണപ്പെടുന്നവരുടെ കുടുംബാംഗങ്ങള്‍ക്ക് എസ്.ഡി.ആര്‍.എഫില്‍ നിന്നും 4 ലക്ഷവും വനം – വന്യജീവി വകുപ്പില്‍ നിന്നുള്ള ധനസഹായമായി 10 ലക്ഷം രൂപയുമാണ് അനുവദിക്കുക. 40% -60% വരെ അംഗവൈകല്യം സംഭവിച്ചവര്‍ക്ക് എസ്.ഡി.ആര്‍.എഫില്‍ നിന്ന് 74,000 രൂപയും വനം വകുപ്പില്‍ നിന്ന് 1,26,000 രൂപയും അനുവദിക്കും. 60 ശതമാനത്തിലധികം അംഗവൈകല്യം സംഭവിക്കുന്നവര്‍ക്ക് 2,50,000 രൂപയും ഒരാഴ്ചയില്‍ കൂടുതല്‍ ആശുപത്രി വാസം വേണ്ടി വരുന്ന ഗുരുതര പരിക്കുള്ളവര്‍ക്ക് എസ്.ഡി.ആര്‍.എഫില്‍ നിന്ന് 16,000 രൂപയും വനം വന്യജീവി വകുപ്പില്‍ നിന്ന് 84,000 രൂപയും അനുവദിക്കും. ഒരാഴ്ചയില്‍ കുറവ് ആശുപത്രി വാസം വേണ്ടി വരുന്നവര്‍ക്ക് എസ്.ഡി.ആര്‍.എഫില്‍ നിന്ന് 5400 രൂപയും വനം വന്യജീവി വകുപ്പില്‍ നിന്ന് 94600 രൂപയുമാണ് അനുവദിക്കുക.

🔹വാമനപുരം കണിച്ചോട് ഒരു വയസുകാരി മരിച്ച സംഭവത്തിൽ കുഞ്ഞിനെ കൊന്നതാണെന്ന് സമ്മതിച്ച് അമ്മ. ആറ്റിങ്ങൽ ഡിവൈഎസ്പിയുടെ നേതൃത്വത്തിൽ നടത്തിയ ചോദ്യം ചെയ്യലിൽ അമ്മ കുറ്റം സമ്മതിക്കുകയായിരുന്നു. കുഞ്ഞിനെ കഴുത്ത് ഞെരിച്ച് കൊലപ്പെടുത്തുകയായിരുന്നു എന്നാണ് കുട്ടിയുടെ അമ്മയുടെ മൊഴി. പ്രതിക്ക് മാനസിക വിഭ്രാന്തി ഉള്ളതായാണ് പൊലീസിന്‍റെ പ്രാഥമിക നിഗമനം.വാമനപുരം കണിച്ചോട് വാര്യംകോണം ചരുവിള പുത്തൻവീട്ടിൽ അശ്വതി – സുഭാഷ് ദമ്പതികളുടെ മകൾ പവിത്രയാണ് മരച്ചത്. അമ്മൂമ്മ തൊഴിലുറപ്പിന് പോയി മടങ്ങി എത്തിയപ്പോൾ കിടപ്പുമുറിയിലെ പായയിൽ കുട്ടിയെ മരിച്ച നിലയിൽ കാണുകയായിരുന്നു. ചലനമറ്റ് കിടന്ന കുട്ടിയെ ഉടൻ തന്നെ സ്വകാര്യ ആശുപത്രിയിൽ എത്തിച്ചെങ്കിലും കുട്ടിയെ മരിച്ച നിലയിലാണ് കൊണ്ടുവന്നതെന്നതാണ് ആശുപത്രി അധികൃതരിൽ നിന്നുള്ള വിവരം.കുട്ടിയുടെ കഴുത്തിൽ പാടുകൾ കണ്ടതിനെത്തുടർന്ന് സ്വഭാവിക മരണമല്ലെന്ന് പോലീസിന് സംശയം തോന്നുകയായിരുന്നു. തുടർന്ന് കുട്ടിയുടെ അമ്മയെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് കുറ്റം സമ്മതിക്കുന്നത്. കുഞ്ഞിന് ഇടയ്ക്കിടെ അസുഖങ്ങൾ വരുന്നത് മൂലമുള്ള പ്രകോപനമാണ് കൃത്യം ചെയ്യാന്‍ കാരണമെന്ന് അശ്വതി പോലീസിനോട് പറഞ്ഞതായാണ് അറിയുന്നത്.തുടർന്ന് കൊലപാതകത്തിൽ പ്രതിയായ അമ്മ അശ്വതിയുടെ അറസ്റ്റ് പൊലീസ് രേഖപ്പെടുത്തി. അശ്വതി കുറ്റം സമ്മതിച്ചതിന് പിന്നാലെയാണ് അറസ്റ്റ് രേഖപ്പെടുത്തിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കൊലപാതകശേഷം അശ്വതി ആത്മഹത്യയ്ക്ക് ശ്രമിച്ചതായും പോലീസ് പറഞ്ഞു.

🔹ജോലി വാഗ്ദാനം ചെയ്ത് പണം തട്ടിയ ആളെ തമ്പാനൂര്‍ പോലീസ് പിടികൂടി. നേമം ഊക്കോട് പറങ്കിമാംവിള വീട്ടില്‍ ദീപു (34) ആണ് പിടിയിലായത്. നെയ്യാറ്റിന്‍കര സ്വദേശിയായ യുവാവ് നല്‍കിയ പരാതിയിലാണ് അന്വേഷണം ഉണ്ടായത്. കേരള പോലീസില്‍ ജോലി വാഗ്ദാനം നല്‍കിയായിരുന്നു തട്ടിപ്പ്. ഇപ്രകാരം 90,000 രൂപയാണ് നേരിട്ടും ഓണ്‍ലൈന്‍ വഴിയും ദീപു തട്ടിയെടുത്തത്. കാലാവധി കഴിഞ്ഞിട്ടും ജോലി ലഭിക്കാതായതോടെ യുവാവ് ദീപുവുമായി ബന്ധപ്പെടാന്‍ ശ്രമിച്ചുവെങ്കിലും ഫലമുണ്ടായില്ല. താന്‍ കബളിപ്പിക്കപ്പെട്ടുവെന്ന് മനസിലായതോടെയാണ് ഇയാള്‍ തമ്പാനൂര്‍ സ്റ്റേഷനില്‍ പരാതി നല്‍കിയത്. എസ്ഐ ബിനുമോഹന്‍, എസ്‌സിപിഒ അരുണ്‍കുമാര്‍, സിപിഒമാരായ എ.എ.അരുണ്‍, ഷഫീഖ് എന്നിവര്‍ ഉള്‍പ്പെട്ടവരാണ് പ്രതിയെ പിടികൂടിയത്. ദീപു മുമ്പ് തമ്പാനൂര്‍ സ്റ്റേഷനില്‍ ജോലിചെയ്തിരുന്നയാളാണെന്നും താന്‍ രാജിവയ്ക്കാന്‍ ആലോചിക്കുന്നുവെന്നും പകരം ജോലി നല്‍കാമെന്നുമായിരുന്നു വാഗ്ദാനം. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

🔹 പതിനൊന്നു വയസുകാരനെ പ്രകൃതി വിരുദ്ധ ലൈംഗിക പീഡനത്തിനിരയാക്കിയ മധ്യവയസ്കന് 33 വർഷം കഠിന തടവും ഒരു ലക്ഷത്തി അറുപതിനായിരം രൂപ പിഴയും ശിക്ഷ. നെല്ലനാട് നാഗര് കുഴി പ്ലാവോട് ആയിരവല്ലി ക്ഷേത്രത്തിന് സമീപം ഫിറോസ് മൻസിലിൽ ഫിറോസ് ഖാന്(52) ആണ് നെടുമങ്ങാട് ഫാസ്റ്റ് ട്രാക്ക് സ്പെഷൽ കോടതി ജഡ്ജ് സുധീഷ് കുമാർ ശിക്ഷ വിധിച്ചത്. 2018 ൽ ആയിരുന്നു കേസിനാസ്പദമായ സംഭവം. പിഴത്തുക അടച്ചില്ലെങ്കിൽ ഒന്നര വർഷം കൂടി ശിക്ഷ അനുഭവിക്കാനും കോടതി വിധിച്ചു. കേസിൽ പ്രോസിക്യൂഷന് വേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ . സരിതാ ഷൗക്കത്തലി ഹാജരായി. വെഞ്ഞാറമൂട് പോലീസ് രജിസ്റ്റർ ചെയ്ത കേസിൽ എം. സഹിൽ, ആർ വിജയൻ എന്നിവർ ചേർന്നാണ് അന്വേഷണം പൂർത്തിയാക്കിയത്.

🔹പാചക വാതക ക്ഷാമത്തിൽ കൊല്ലം ജില്ലയിലെ 48 ഹോട്ടലുകൾ പൂട്ടി. ഗാർഹിക ഉപഭോക്താക്കൾക്ക് മാത്രമായി സിലിണ്ടർ ചുരുക്കിയതോടെ ജില്ലയിലെ ഹോട്ടലുകളും റസ്റ്റോറന്‍റുകളും പ്രതിസന്ധിയിലായി. കുണ്ടറ, ചവറ, കൊട്ടാരക്കര, പറവൂർ, കരുനാഗപ്പള്ളിയിലടക്കം സിലിണ്ടറുകൾ കിട്ടാനില്ലാത്തതാണ് കടകൾ പൂട്ടാനും പ്രവർത്തന സമയം കുറയ്ക്കാനും ഇടയാക്കിയതെന്ന് വ്യാപാരികൾ പറയുന്നു.കൊല്ലത്ത് ചിന്നക്കടയിൽ ചില ഹോട്ടലുകൾ പ്രഭാത ഭക്ഷണം തന്നെ ഒഴിവാക്കി. പല ഹോട്ടലുകളും ഉച്ച ഭക്ഷണം മാത്രമാക്കി. നോൺ വെജ് ഹോട്ടലുകളിൽ മിക്കയിടത്തും ബിരിയാണി മാത്രമാണ് ശരണം. ഹോട്ടൽ മേഖലയെ ആശ്രയിച്ച് ജീവിക്കുന്ന നിരവധിപേരുടെ അന്നം മുടക്കിയിരിക്കുകയാണ് പാചക വാതക ക്ഷാമം.പ്രതിസന്ധി മറികടക്കാൻ വിറകടുപ്പുകളിലേക്ക് മാറുന്നതിന് കേരള ഹോട്ടൽ ആൻഡ് റെസ്റ്റോറന്‍റ് അസോസിയേഷൻ നിർദേശം നൽകിയിട്ടുണ്ടെങ്കിലും ഇത് അപ്രായോഗികമാണെന്നാണ് ഹോട്ടൽ ഉടമകൾ പറയുന്നത്. വിറകടുപ്പുകൾ ഉപയോഗിക്കാൻ സ്ഥല സൗകര്യകുറവുള്ള ഹോട്ടലുകൾ എന്ത് ചെയ്യുമെന്നാണ് ഉടമകൾ ചോദിക്കുന്നത്. ചില ഹോട്ടലുകൾ വിറകടുപ്പുകളിലേക്ക് മാറിയിട്ടുണ്ടെങ്കിലും എല്ലാ വിഭവങ്ങളും വിറകടുപ്പുകളിൽ പാചകം ചെയ്യാൻ കഴിയുന്നില്ല. ദീർഘനേരം വേകിക്കേണ്ട വിഭവങ്ങൾ പല ഹോട്ടലുകളും താത്കാലികമായി ഒഴിവാക്കിയതായി ഉടമകൾ പറയുന്നു . തട്ട് കടകൾ പലതും അപ്രത്യക്ഷമായി.ചായ കുടിക്കാനായി നഗരത്തിലേക്ക് ഇറങ്ങുന്നവർ വലിയ വില നൽകി ജ്യൂസ് വാങ്ങി കുടിക്കേണ്ട അവസ്ഥയായി.

🔹 ക്ഷേത്ര ഭണ്ഡാരം തകര്‍ത്ത് പണം കവര്‍ന്നയാള്‍ പിടിയില്‍.വടകര താഴെ അങ്ങാടി മൊയിലാറമ്പത്ത് ലത്തീഫിനെയാണ് (40) എസ്‌ഐ കെ.രഞ്ജിത്തും സംഘവും പിടികൂടിയത്.തോടന്നൂര്‍ ശിവക്ഷേത്രം ഭണ്ഡാരമാണ് ഇയാള്‍ കുത്തിപ്പൊളിച്ചത്. വെള്ളിയാഴ്ച പുലര്‍ച്ചെ മൂന്നിന് എസ്‌ഐയും സംഘവും പട്രോളിംഗ് നടത്തുമ്പോള്‍ മോഷ്ടാവ് മുന്നില്‍പെടുകയായിരുന്നു. ചെരണ്ടത്തൂര്‍ റോഡരികിലെ ഭണ്ഡാരം ആയുധം ഉപയോഗിച്ച് തകര്‍ത്ത് പണവുമായി രക്ഷപ്പെടുമ്പോഴാണ് പ്രതി പിടിയിലായത്. കളവ് ചെയ്ത 1,407 രൂപയും ആയുധവും പോലീസ് പ്രതിയില്‍ നിന്ന് കണ്ടെടുത്തു. ഇയാള്‍ നേരത്തേയും മോഷണക്കേസുകളില്‍ പ്രതിയാണെന്ന് പോലീസ് അറിയിച്ചു.

🔹നെയ്യാർ റിസർവോയറിൽ ചാടിയ ആർടിഒ ജീവനക്കാരി ശരണ്യയുടെ (25) മൃതദേഹം കണ്ടെടുത്തു. സ്‌കൂബ സംഘം നടത്തിയ തെരച്ചിലിലാണ് മൃതദേഹം കണ്ടെടുത്തത്. വ്യാഴാഴ്ച വൈകുന്നേരം ആറോടെയാണ് നേമം സ്വദേശിയായ ശരണ്യ അണക്കെട്ടിലേക്ക് ചാടിയത്. കാട്ടാക്കടയിൽ നിന്നും ഇരുചക്ര വാഹനത്തിൽ നെയ്യാർ ഡാമിന്‍റെ ഡാം ടോപ്പിൽ എത്തി ചെരുപ്പ് കരയിൽ ഊരി വെച്ച ശേഷം പാലത്തിൽ നിന്ന് റിസർവോയറിലേക്ക് ചാടുകയായിരുന്നു.ടിക്കറ്റ് കൗണ്ടറിൽ നിന്ന് ടിക്കറ്റ് എടുത്ത് അകത്ത് പ്രവേശിച്ച യുവതി പിന്നീട് റിസർവോയറിന് സമീപത്തേക്ക് പോവുകയായിരുന്നു.നെയ്യാർ റിസർവോയറിന്‍റെ കൈവരിക്ക് സമീപത്ത് സ്‌കൂട്ടറും അണകെട്ടിന് മുകളിൽ നിന്നും മൊബൈൽ ഫോണും പേഴ്‌സും താഴെ ഭാഗത്ത് ചെരിപ്പും കണ്ടെത്തിയിട്ടുണ്ടായിരുന്നു. സംഭവത്തെ തുടർന്ന് നെയ്യാർ ഡാം പോലീസും ഫയർഫോഴ്‌സും ചേർന്ന് ചേർന്ന് റിസർവോയറിൽ രാത്രി വൈകുവോളം തിരച്ചിൽ നടത്തിയിരുന്നു. തുടർന്ന് ഇന്നലെ രാവിലേ സ്‌കൂബ ടീമിനെ വരുത്തി പരിശോധനയ്ക്കായി ചെറിയ കനാൽ ഷട്ടറുകൾ അടച്ചു. രാവിലെ തുടങ്ങിയ തെരച്ചിലിനോടുവിൽ ഉച്ചക്ക് രണ്ടോടെ യുവതിയുടെ മൃതദേഹം കണ്ടെത്തുകയായിരുന്നു. തമ്പാനൂർ ആർടിഒ ഓഫീസിൽ ഓഫീസ് അസിസ്റ്റന്‍റായി ജോലി ചെയ്തിരുന്ന ശരണ്യയ്ക്ക് 11 മാസം മുൻപാണ് സർക്കാർ ജോലി ലഭിച്ചത്. ജോലിഭാരമോ സ്ഥലംമാറ്റം ലഭിക്കാത്തതോ ആണ് ശരണ്യയെ ആത്മഹത്യയിലേക്ക് നയിച്ചതെന്നായിരുന്നു ഭർത്താവായ സിരിലിന്‍റെ ആദ്യ മൊഴി. എന്നാൽ ശരണ്യയും ഭർത്താവും തമ്മിൽ നിരന്തരം പ്രശ്നങ്ങളുണ്ടായിരുന്നതായും സിരിലിനെതിരെ മുൻപ് പോലീസിൽ പരാതി നൽകിയിരുന്നതായും ബന്ധുക്കൾ വെളിപ്പെടുത്തി. മദ്യപിച്ച് എത്തുന്ന സിറിൽ ശരണ്യയെ നിരന്തരം മർദിക്കാറുണ്ടെന്ന് നാട്ടുകാരും പോലീസിന് മൊഴി നൽകിയിട്ടുണ്ട്.ഭർത്താവിന്‍റെ പീഡനത്തെത്തുടർന്നുള്ള മനോവിഷമമാണ് ശരണ്യയെ ഇത്തരമൊരു കടുത്ത തീരുമാനത്തിലേക്ക് എത്തിച്ചതെന്നാണ് പോലീസ് നിഗമനം.സംഭവത്തിൽ സിരിലിനെതിരെ കൂടുതൽ അന്വേഷണം നടത്തി വരികയാണെന്നും പോലീസ് അറിയിച്ചു. ഭർത്താവ് സിരീഷ് കോഴി ഫാമിൽ ആണ് ജോലി ചെയ്യുന്നത്. രണ്ട് കുട്ടികളുണ്ട്.

🔹തടി ലോറിക്ക് മുകളിലിരുന്നയാൾക്ക് വൈദ്യുതി ലൈനിൽ തട്ടി ഷോക്കേറ്റു. പുത്തൂരിലാണ് സംഭവം. ചെങ്ങന്നൂർ സ്വദേശിയായ 60 വയസുള്ള സന്തോഷിനാണ് ഷോക്കേറ്റത്. മരക്കഷണം കൊണ്ട് വൈദ്യുതകമ്പി ഉയർത്തുന്നതിനിടെയാണ് ഷോക്കേറ്റത്.11 കെവി വരെ കടന്നുപോകുന്ന റോഡാണിത്. സന്തോഷിനെ ലൈൻ ഉയർത്തി നൽകാനായി വാഹനത്തിന് മുകളിൽ നിർത്തിയിരിക്കുകയായിരുന്നു. മരക്കഷ്ണം ഉപയോഗിച്ച് ലൈൻ ഉയർത്തുന്നതിനിടെ വൈദ്യുത കമ്പി പൊട്ടി വീണിട്ടും ലോറി മുന്നോട്ട് പോയതിന് പിന്നാലെയാണ് അപകടമുണ്ടായത്. ഉടൻതന്നെ നാട്ടുകാർ ചേർന്ന് സന്തോഷിനെ പുത്തൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. നില ഗുരുതരമായതിനാൽ പ്രാഥമിക ശുശ്രൂഷ നൽകിയതിനുശേഷം കൊട്ടാരക്കര സ്വകാര്യ ആശുപത്രിയിലേക്ക് മാറ്റി.

🔹ട്രെയിനില്‍നിന്നു ചാലക്കുടിപ്പുഴയിലേക്ക് വീണ യുവാവിന്‍റെ മൃതദേഹം കണ്ടെത്തി. കാസര്‍കോട് സ്വദേശി അച്യുതാനന്ദ ഷേണായി (40) ആണ് വ്യാഴാഴ്ച രാവിലെ വേണാട് എക്‌സ്പ്രസില്‍ നിന്നും പുഴലേക്ക് വീണത്. ദൂരെനിന്ന് സംഭവം കണ്ടുനിന്ന നാട്ടുകാര്‍ അറിയിച്ചതിനെ തുടര്‍ന്ന് അഗ്നിരക്ഷാ യൂണിറ്റിലെ സ്‌കൂബ വിഭാഗം സ്ഥലത്തെത്തി പരിശോധന നടത്തിയെങ്കിലും പ്രയോജനമുണ്ടായില്ല. തുടര്‍ന്ന് വെള്ളിയാഴ്ച സ്‌കൂബാ ടീം മണിക്കൂറുകള്‍ തിരച്ചില്‍ നടത്തിയാണ് പടിഞ്ഞാറ് ചാലക്കുടിയിലെ കുടുങ്ങാപ്പുഴകടവ് പരിസരത്തുനിന്ന് മൃതദേഹം മുങ്ങിയെടുത്തത്.അങ്കമാലിയിലെ കരയാംപറമ്പില്‍ ഒരു ധനകാര്യ സ്ഥാപനത്തില്‍ ജോലി ചെയ്യുന്ന അച്യുതാനന്ദ ഷേണായി നാട്ടിലേക്ക് പോകുമ്പോഴായിരുന്നു അപകടം. മൃതദേഹം പോസ്റ്റ്‌മോര്‍ട്ടത്തിനായി ചാലക്കുടി താലൂക്ക് ആശുപത്രിയിലേക്ക് മാറ്റി.

🔹കൊച്ചി അന്താരാഷ്‌ട്ര വിമാനത്താവളത്തിൽനിന്നു ഗൾഫിലേക്കും ഗൾഫിൽനിന്ന് കൊച്ചിയിലേക്കുമായി ഇന്നലെ 39 വിമാനങ്ങൾ സർവീസ് നടത്തി. ഗൾഫ് മേഖലയിലേക്ക് 21 വിമാനങ്ങൾ കൊച്ചിയിൽനിന്നു പുറപ്പെട്ടു. ദുബായ്, ഷാർജ, അബുദാബി, മസ്കറ്റ്, ദോഹ എന്നിവിടങ്ങളിലേക്കാണു വിമാനങ്ങൾ സർവീസ് നടത്തിയത്. ഇതിൽ അഞ്ചു വിമാനങ്ങൾ ദുബായിലേക്കും നാലു വിമാനങ്ങൾ അബുദാബിയിലേക്കുമാണ് സർവീസ് നടത്തിയത്.18 വിമാനങ്ങൾ വിവിധ ഗൾഫ് രാജ്യങ്ങളിൽനിന്നു കൊച്ചിയിലേക്ക് വന്നു. പ്രധാനമായും എയർ ഇന്ത്യ എക്സ്പ്രസ്, സൗദി എയർലൈൻസ്, ഒമാൻ എയർ, ഇത്തിഹാദ്, ഇൻഡിഗോ, ഗൾഫ് എയർ, എയർ അറേബ്യ എന്നീ വിമാനകമ്പനികളാണു സർവീസ് നടത്തിയത്. ഇറാൻ -ഇസ്രായേൽ സംഘർഷം ആരംഭിച്ചതിനുശേഷം ഏറ്റവും കൂടുതൽ വിമാനങ്ങൾ വന്നതും പോയതും ഇന്നലെയാണ്.

🔹 പശ്ചിമേഷ്യൻ യുദ്ധത്തെത്തുടർന്ന് എൽപിജി ക്ഷാമം രൂക്ഷമായതോടെ പഞ്ചാബിലെ ബർണാല ജില്ലയിൽ ഏജൻസിക്കു മുന്നിൽ ഗ്യാസ് സിലിണ്ടറിനായി ക്യൂ നിന്ന 66 കാരൻ കുഴഞ്ഞുവീണു മരിച്ചു. ഭൂഷന്‍ കുമാർ മിത്തലാണ് ഹൃദയാഘാതം മൂലം മരിച്ചത്. അതിരാവിലെ വീട്ടിൽനിന്ന് ഇറങ്ങിയ 66 കാരൻ എട്ടു മുതൽ ക്യൂവിൽ നിൽക്കുകയായിരുന്നു. രാവിലെ 10 ഓടെയാണ് ഇദ്ദേഹം കുഴഞ്ഞു വീണത്. ആശുപത്രിയിലേക്ക് കൊണ്ടുപോയെങ്കിലും അവിടെ എത്തും മുൻപേ ഭൂഷന്‍ മരിച്ച‌ു.

🔹ടി 20 ലോകകപ്പിലെ വിജയത്തിനു ശേഷം അടുത്ത കൊല്ലത്തെ ഏകദിന ലോകകപ്പിനുള്ള തയാറെടുപ്പ് നടത്താൻ ബിസിസിഐ. 2011 നു ശേഷം കിട്ടാക്കനിയായി തുടരുന്ന ഏകദിന കിരീടം മുന്നിൽ കണ്ടു കൃത്യമായ ചുവടുകൾ വയ്ക്കുവാനൊരുങ്ങുകയാണ് ടീം ഇന്ത്യ. ഇതിനായി ഏകദിന മത്സരങ്ങൾ കൂടുതൽ കളിക്കുവാൻ ടീം ഒരുങ്ങുന്നു. ഈ മാസം ആരംഭിക്കുന്ന ഐപിഎല്ലിന് ശേഷം ഇന്ത്യ അഫ്ഗാനിസ്ഥാനെതിരെ ഒരു ടെസ്റ്റും മൂന്ന് ഏകദിനങ്ങളും കളിക്കും. തുടർന്ന് ഇംഗ്ലണ്ടിൽ മൂന്ന് ഏകദിനങ്ങളും അഞ്ച് ടി -20 മത്സരങ്ങളും ഇന്ത്യ കളിക്കും. ആ പര്യടനത്തിനിടെ അയർലണ്ടിനെതിരെയും ഇന്ത്യക്ക് മത്സരം ഉണ്ടാകാനിടയുണ്ട്. ശ്രീലങ്ക ക്രിക്കറ്റ് ബോർഡും ബിസിസിഐയോട് വൈറ്റ്-ബോൾ മത്സരങ്ങൾക്കായി അഭ്യർത്ഥിച്ചതായി റിപ്പോർട്ടുകളുണ്ട്. കൂടാതെ ബംഗ്ലാദേശ്, വെസ്റ്റ് ഇൻഡീസ്, ന്യൂസിലാൻഡ് എന്നിവർക്കെതിരെയും ഇന്ത്യയ്ക്ക് ഏകദിന പരമ്പരകൾ നിശ്ചയിച്ചിട്ടുണ്ടെന്നാണ് റിപ്പോർട്ട്. ന്യൂസിലാൻഡും അവരുടെ പര്യടനത്തിനിടെ അധിക ഏകദിന മത്സരങ്ങൾ സംഘടിപ്പിക്കാൻ ആവശ്യപ്പെട്ടിട്ടുണ്ട് എന്നാണ് റിപ്പോർട്ട്.

🔹സിംബാബ്‍വെ പേസർ ബ്ലസിങ് മുസാരബാനിയെ സ്വന്തമാക്കി കൊൽക്കത്ത നൈറ്റ്റൈഡേഴ്‌സ്. 2026 ഐപിഎൽ സീസൺ തുടങ്ങാൻ ഏതാനും ദിവസങ്ങൾ മാത്രം ശേഷിക്കെയാണ് കൊൽക്കത്തയുടെ ഈ നീക്കം. പി‌എസ്‌എൽ ടീമായ ഇസ്ലാമബാദ് യുണൈറ്റടുമായുള്ള കരാർ ഉപേക്ഷിച്ച് ആണ് മുസാരബാനി ഇന്ത്യയിലെത്തുന്നത്. ഈ മാസം അവസാനിച്ച ടി 20 ലോകകപ്പിൽ ആറ് മത്സരങ്ങളിൽ നിന്നും 13 വിക്കറ്റുകൾ എടുത്ത മുസാരബാനി ഏവരുടെയും ശ്രദ്ധ പിടിച്ചുപറ്റിയിരുന്നു. ടൂർണമെന്റിൽ സിംബാബ്‍വെയെ സൂപ്പർ എട്ടിലെത്തിച്ചതിൽ താരം പ്രധാന പങ്കു വഹിച്ചു.6 അടി 8 ഇഞ്ച് ഉയരമുള്ള ഫാസ്റ്റ് ബൗളർ 2017 മുതൽ സിംബാബ്‌വേയുടെ ഓൾ-ഫോർമാറ്റ് താരം ആണ്. സിംബാബ്‍വെയ്ക്കായി 89 ടി 20 മത്സരങ്ങളിൽ നിന്നും 106 വിക്കററ്റ് അദ്ദേഹം സ്വന്തമാക്കിയിട്ടുണ്ട്. മാർച്ച് 17-ന് കൊൽക്കത്തയിൽ എത്തുന്ന താരം മാർച്ച് 29-ന് മുംബൈ ഇന്ത്യൻസുമായുള്ള കൊൽക്കത്തയുടെ ആദ്യ പോരാട്ടത്തിൽ കളിച്ചേക്കാം.

🔹മലയാളികൾക്കിടയിൽ വലിയ സ്വീകാര്യതയുള്ള തെലുങ്ക് താരം അല്ലു അർജുൻ്റെ കരിയറിലെ ശ്രദ്ധേയമായ രണ്ട് ചിത്രങ്ങൾ വീണ്ടും തിയേറ്ററുകളിലെത്തുന്നു. താരത്തിൻ്റെ ജന്മദിനമായ ഏപ്രിൽ 8-നാണ് ‘റേസ് ഗുരം’ (ലക്കി ദി റേസർ), ‘ഹാപ്പി’ എന്നീ സിനിമകളുടെ റീ-റിലീസ് നിശ്ചയിച്ചിരിക്കുന്നത്. വർഷങ്ങൾക്ക് മുൻപ് പുറത്തിറങ്ങിയ ഈ ചിത്രങ്ങൾ കേരളത്തിലെ ബോക്സ് ഓഫീസിലും വലിയ ചലനങ്ങൾ സൃഷിട്ടിച്ചിരുന്നു. സുരേന്ദർ റെഡ്ഡി സംവിധാനം ചെയ്ത ‘റേസ് ഗുരം’ എന്ന ചിത്രത്തിൻ്റെ തെലുങ്ക് പതിപ്പാണ് വീണ്ടും പ്രദർശനത്തിനെത്തുന്നത്. അതേസമയം, അല്ലു അർജുൻ്റെ കരിയറിലെ ഏറ്റവും വലിയ വിജയങ്ങളിലൊന്നായ ‘ഹാപ്പി’യുടെ മലയാളം പതിപ്പും റീ-റിലീസിന് ഒരുങ്ങുന്നുണ്ട്. 20 വർഷങ്ങൾക്ക് മുൻപ് കേരളത്തിൽ 150 ദിവസത്തിലധികം പ്രദർശിപ്പിച്ച ഈ ചിത്രം എ. കരുണാകരനാണ് സംവിധാനം ചെയ്തത്. 4K ഡോൾബി അറ്റ്‌മോസ് സാങ്കേതികവിദ്യയോടെ പുതുക്കിയ പതിപ്പാണ് ഇത്തവണ പ്രേക്ഷകർക്ക് മുന്നിലെത്തുന്നത്.ഗീത ആർട്സിൻ്റെ ബാനറിൽ അല്ലു അരവിന്ദ് നിർമ്മിച്ച ‘ഹാപ്പി’യിൽ ജെനീലിയ ഡിസൂസ, മനോജ് ബാജ്‌പേയി എന്നിവരും പ്രധാന വേഷങ്ങളിലെത്തിയിരുന്നു. യുവൻ ശങ്കർ രാജ ഒരുക്കിയ ചിത്രത്തിലെ ഗാനങ്ങൾ ഇന്നും സംഗീത പ്രേമികൾക്കിടയിൽ പ്രിയപ്പെട്ടതാണ്.

🔹മലയാളി പ്രേക്ഷകർ ‘പെണ്ണും പൊറാട്ടും’ സിനിമ വളരെ മികച്ച പ്രതികരണത്തോടെയാണ് സ്വീകരിച്ചത്. ഐ എഫ് എഫ് യിൽ ഉൾപ്പെടെ സിനിമയ്ക്ക് നല്ല അഭിപ്രായമായിരുന്നു. പ്രശസ്ത നടൻ രാജേഷ് മാധവൻ സംവിധാനം ചെയ്ത ആദ്യ ചിത്രം എന്ന പ്രത്യേകത കൂടെ ഈ സിനിമയ്ക്ക് ഉണ്ട്. നൂറിലധികം പുതുമുഖങ്ങളും പക്ഷിമൃഗാദികളും സിനിമയിലെ കഥാപാത്രങ്ങളായി എത്തുന്നതാണ് ഈ സിനിമയുടെ ഏറ്റവും വലിയ പ്രത്യേകത.
തിയേറ്റർ റിലീസിന് ശേഷം സിനിമ ഇപ്പോൾ ഒ ടി ടി യിലേക്ക് എത്തുകയാണ്. ഇന്ന് മുതലാണ് ‘പെണ്ണും പൊറാട്ടും’ സിനിമ പ്രക്ഷകർക്ക് കാണാൻ കഴിയുക. നെറ്റ്ഫ്ലിക്സ് ആണ് സിനിമയുടെ സ്ട്രീമിംഗ് അവകാശം സ്വന്തമാക്കിയിരിക്കുന്നത്. മലയാളത്തിനൊപ്പം ഹിന്ദി, തമിഴ്, തെലുങ്ക്, കന്നഡ ഭാഷകളിലും സിനിമ ലഭിക്കും.ചിത്രത്തിന്റെ പ്രീമിയർ അരങ്ങേറിയത് ഗോവയിൽ നടന്ന ഇന്ത്യൻ ഇൻ്റർനാഷണൽ ഫിലിം ഫെസ്റ്റിവലിൽ ആയിരുന്നു. വലിയ പ്രേക്ഷക പിന്തുണയാണ് ചിത്രത്തിന് ഗോവയിൽ തന്നെ ലഭിച്ചത്. ഗാല പ്രീമിയർ വിഭാഗത്തിൽ, ഒട്ടേറെ മികച്ച അന്തര്‍ദേശീയ, രാജ്യാന്തര ചലച്ചിത്രങ്ങള്‍ക്കൊപ്പം ഈ വിഭാഗത്തിൽ കഴിഞ്ഞ വർഷം പ്രദർശിപ്പിച്ച ഒരേയൊരു മലയാള സിനിമയായിരുന്നു ഇത്.

💦 ഗുരുജിയുടെ വാക്കുകൾ

ജീവിതം വലിയ തത്വശാസ്ത്രങ്ങളുടെയും ഉദാത്ത അനുഭവങ്ങളുടെയും മാത്രം കലവറയല്ല. സുമധുരവും കയ്പ് നിറഞ്ഞതുമായ ചെറിയ സാധാരണ കാര്യങ്ങള്‍ കൂടി ഉള്‍പ്പെട്ടതാണ്. ഇത്തരം ചെറിയ കാര്യങ്ങളില്‍ സന്തോഷിക്കാനും അതിന്റെ സൗന്ദര്യം കാണുവാനും നാം പഠിക്കേണ്ടയിരിക്കുന്നു. അപ്രതീക്ഷിതമായി ഒരു കണ്ടുമുട്ടല്‍ , ഒരുമിച്ചിരിന്ന് ഭക്ഷണം കഴിക്കുന്ന വ്യക്തിയുമായി പങ്കിടുന്ന സംഭാഷണം, അയല്‍ക്കാരന്റെ സുഖാന്വേഷണം, പത്രത്തില്‍ വരുന്ന ഒരു കാര്‍ട്ടൂണ്‍, വീട്ടിലേക്ക് കയറി വന്ന ഒരു പൂച്ചക്കുട്ടി, പെട്ടെന്ന് നമുക്ക് നല്‍കാന്‍ കഴിയുന്ന ഒരു സഹായം, ഒരു വാല്‍ നക്ഷത്രം.. എന്തെല്ലാം ചെറിയ, വലിയ കാര്യങ്ങള്‍ ഇവയോരോന്നും എത്ര വിശുദ്ധമാണ്.

തയ്യാറാക്കിയത്: കപിൽ ശങ്കർ

5 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 14 | ശനി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

നോമ്പും വേഷപ്പകർച്ചകൾക്കിടയിലെ ആത്മീയതയും. ✍ ബാബു പി സൈമൺ, ഡാളസ്

ഇറാൻ യുദ്ധം രൂക്ഷം: 15,000 സൈനിക കേന്ദ്രങ്ങൾ തകർത്തു; പരമോന്നത നേതാവ് ഒളിവിൽ

അമേരിക്കയിൽ ഇറാൻ്റെ ‘സ്ലീപ്പർ സെല്ലുകൾ’ സജീവമാകാൻ സാധ്യത; ജാഗ്രതാ നിർദ്ദേശം

LEAVE A REPLY Cancel reply

Most Popular

ലോകകപ്പ് വിജയശിൽപിക്ക് ജന്മനാടിന്റെ ആദരം; സഞ്ജു സാംസണിനെ കെ.സി.എ ആദരിക്കും

പ്രവാസി ക്ഷേമനിധി അംശദായ കുടിശ്ശിക : പിഴപലിശ ഇളവ് മാര്‍ച്ച് 31 വരെ

പാചകവാതക പ്രതിസന്ധി: കേരളത്തില്‍ വാര്‍ റൂം പ്രവര്‍ത്തനം ആരംഭിച്ചു

ഇടുക്കി ജില്ലയില്‍ പട്ടയ ഭൂമിയിലെ നിര്‍മാണ നിരോധനം നീക്കി സര്‍ക്കാര്‍ തീരുമാനം.

Recent Comments

EDITOR PICKS

ലോകകപ്പ് വിജയശിൽപിക്ക് ജന്മനാടിന്റെ ആദരം; സഞ്ജു സാംസണിനെ കെ.സി.എ ആദരിക്കും

പ്രവാസി ക്ഷേമനിധി അംശദായ കുടിശ്ശിക : പിഴപലിശ ഇളവ് മാര്‍ച്ച് 31 വരെ

പാചകവാതക പ്രതിസന്ധി: കേരളത്തില്‍ വാര്‍ റൂം പ്രവര്‍ത്തനം ആരംഭിച്ചു

POPULAR POSTS

വിമാനയാത്രയ്ക്ക് ചെലവേറും; ഇൻഡിഗോ ടിക്കറ്റ് നിരക്ക് വർധിപ്പിച്ചു.

തൊഴുത്തിൽ ഉണ്ടുറങ്ങി അടിമയായി 65കാരൻ, പൊലീസ് മോചിപ്പിച്ചു; ‘യജമാനത്തി’ അറസ്റ്റിൽ.

POPULAR CATEGORY

ABOUT US

FOLLOW US