📱വാർത്തകൾ ഒറ്റനോട്ടത്തിൽ📱 – 2024 | മെയ് 16 | വ്യാഴം ✍ കപിൽ ശങ്കർ

🔹പൗരത്വ ഭേദഗതി നിയമം നടപ്പിലാക്കി കേന്ദ്ര സര്‍ക്കാര്‍. 14 പേരുടെ അപേക്ഷകള്‍ അംഗീകരിച്ച് കേന്ദ്ര ആഭ്യന്തര സെക്രട്ടറി പൗരത്വ സര്‍ട്ടിഫിക്കറ്റ് കൈമാറി. സിഎഎക്കെതിരായ ഹര്‍ജി സുപ്രീം കോടതിയുടെ പരിഗണനയില്‍ ഇരിക്കെയാണ് പാകിസ്ഥാനില്‍ നിന്നു വന്ന അഭയാര്‍ത്ഥികള്‍ക്ക് കേന്ദ്രസര്‍ക്കാര്‍ പൗരത്വം നല്‍കിയത്. മാര്‍ച്ചില്‍ വിജ്ഞാപനം ഇറക്കിയതിനുശേഷമുണ്ടായ പ്രതിഷേധങ്ങള്‍ക്ക് ഇടയിലാണ് സിഎഎ കേന്ദ്ര സര്‍ക്കാര്‍ നടപ്പാക്കിയത്.

🔹റിപ്പോർട്ടർ ചാനലിനും മീഡിയ വണ്ണിനും എതിരെ വക്കീൽ നോട്ടീസ്. വടകരയിലെ മുതിർന്ന കമ്യൂണിസ്റ്റ് നേതാവ് വി കുഞ്ഞിക്കണ്ണനാണ് നോട്ടീസയച്ചത്. സി എച്ച് കണാരനെതിരായ ചരിത്ര വിരുദ്ധ പ്രസ്താവനക്കെതിരെയാണ് നിയമ നടപടി. സ്മൃതി പരുത്തിക്കാട്,സി ദാവൂദ് എന്നാവർക്കാണ് നോട്ടീസയച്ചത്.പരാമർശങ്ങൾ പിൻവലിച്ച് ചാനലിലൂടെ ഖേദ പ്രകടനം നടത്തണമെന്നാണ് ആവശ്യം.അഡ്വ.കെ വിശ്വൻ മുഖേനയാണ് വക്കീൽ നോട്ടീസയച്ചത്. കമ്യൂണിസ്റ്റ് പാർട്ടിയെ ബോധപൂർവ്വം ഇകഴ്ത്തി കാട്ടുന്നതിനാണ് ചരിത്ര വിരുദ്ധ വസ്തുത പ്രചരിപ്പിച്ചതെന്നാണ് വക്കീൽ നോട്ടീസിൽ ചൂണ്ടിക്കാട്ടുന്നത്.

🔹തൃശൂര്‍ ചാലക്കുടിയില്‍ അധ്യാപകനേയും കുടുംബത്തേയും കാര്‍ തടഞ്ഞു നിര്‍ത്തി ആക്രമിച്ച കേസില്‍ കുപ്രസിദ്ധ ഗുണ്ടയെ പോലീസ് പിടികൂടി. പരിയാരം ഒറ്റക്കൊമ്പന്‍ സ്വദേശി നെല്ലിശേരി വീട്ടില്‍ 33 വയസ്സുള്ള മുയല്‍എബി എന്ന എബിന്‍ ആണ് പിടിയിലായത്. ഏപ്രില്‍ 29 ന് ചാലക്കുടി പരിയാരത്തു വെച്ചാണ് വിനോദ സഞ്ചാരത്തിനായി എത്തിയ മാള സ്വദേശിയായ അധ്യാപകനെയും കുടുംബത്തെയും ഇയാള്‍ ആക്രമിച്ചത്.കാറിന്റെ മുന്നിലും സൈഡിലുമുള്ള ചില്ലുകള്‍ ഹെല്‍മറ്റുകൊണ്ട് തകര്‍ക്കുകയും അധ്യാപകനെ ആക്രമിക്കുകയുമായിരുന്നു. സംഭവത്തില്‍ കേസെടുത്തതിനെ തുടര്‍ന്ന് എബിന്‍ കുറച്ചു നാളായി മുങ്ങി നടക്കുകയായിരുന്നു. രണ്ട് വര്‍ഷംമുമ്പ് കൊന്നക്കുഴിയില്‍ കര്‍ഷകനെ സംഘം ചേര്‍ന്ന് ആക്രമിച്ച് കൊലപ്പെടുത്തിയ കേസിലെ പ്രതിയായ ഇയാള്‍ അടുത്തിടെയാണ് ജാമ്യത്തില്‍ ഇറങ്ങിയത്.

🔹ഡ്രൈവിംഗ് ലൈസന്‍സ് ടെസ്റ്റ് പരിഷ്‌കരണത്തിനെതിരെ ഡ്രൈവിംഗ് സ്‌കൂള്‍ സമര സമിതി നടത്തിവന്നിരുന്ന സമരം പിന്‍വലിച്ചു. ഡ്രൈവിംഗ് ടെസ്റ്റ് പരിഷ്‌കരണത്തില്‍ ഗതാഗത വകുപ്പ് മന്ത്രിയും മോട്ടോര്‍ വാഹന വകുപ്പും ഡ്രൈവിംഗ് സ്‌കൂള്‍ ഉടമകള്‍ക്ക് സ്വീകാര്യമായ നിലപാട് സ്വീകരിക്കാന്‍ തയ്യാറായി. ഇതോടെ ഇന്നലെ നടന്ന ചര്‍ച്ചയില്‍ സമരം പിന്‍വലിക്കാന്‍ ഡ്രൈവിങ് സ്‌കൂള്‍ യൂണിയന്‍ സമരസമിതി തീരുമാനിക്കുകയായിരുന്നു. മന്ത്രി കെബി ഗണേഷ് കുമാറുമായും ഗതാഗത വകുപ്പ് ഉന്നത ഉദ്യോഗസ്ഥരുമായും നടത്തിയ ചര്‍ച്ചയിലാണ് പ്രശ്‌ന പരിഹാരമായത്.

🔹ഗാര്‍ഹിക പീഡനക്കേസിന്റെ അന്വേഷണത്തില്‍ വീഴ്ച വരുത്തിയതിന് പന്തീരാങ്കാവ് എസ്എച്ച്ഒയ്ക്ക് സസ്‌പെന്‍ഷന്‍. കമ്മീഷണറുടെ റിപ്പോര്‍ട്ട് പരിഗണിച്ച് എസ്എച്ച്ഒ എ.എസ്.സരിനെ സസ്‌പെന്‍ഡ് ചെയ്തു. ഉത്തരമേഖല ഐജിയുടേതാണ് നടപടി. എസ്എച്ച് ക്കെതിരെ വകുപ്പുതല നടപടികളും ഉണ്ടാവും. ഗാര്‍ഹിക പീഡനത്തിനിരയായ പെണ്‍കുട്ടി പറഞ്ഞ പല കാര്യങ്ങളും ഗൗരവമായി എടുത്തില്ലെന്നാണ് കണ്ടെത്തല്‍. ഭര്‍തൃവീട്ടില്‍ സ്ത്രീധനത്തിന്റെ പേരില്‍ ക്രൂരമായ പീഡനം നേരിട്ടെന്നായിരുന്നു നവവധുവിന്റെ വെളിപ്പെടുത്തല്‍.

🔹കോഴിക്കോട് മെഡിക്കല്‍ കോളേജ് ആശുപത്രിയില്‍ അഞ്ചുവയസുകാരി അമീബിക് മസ്തിഷ്‌ക ജ്വരം ബാധിച്ച് ഗുരുതരാവസ്ഥയില്‍. ഒരാഴ്ച മുമ്പാണ് പെണ്‍കുട്ടി കടലുണ്ടി പുഴയില്‍, വേനലില്‍ വറ്റി കെട്ടിക്കിടക്കുന്ന വെള്ളത്തില്‍ കുളിക്കാനിറങ്ങിയത്. ഇവിടെ നിന്നാണ് വൈറസ് ബാധയേറ്റതെന്നാണ് സംശയം. മസ്തിഷ്‌ക ജ്വരം സ്ഥിരീകരിച്ചതോടെ കടുത്ത ജാഗ്രതയിലാണ് പഞ്ചായത്തും ആരോഗ്യവ വകുപ്പും. നട്ടെല്ലില്‍ നിന്നും സ്രവം പരിശോധിച്ചപ്പോഴാണ് അമീബിക് മസ്തിഷ്‌ക ജ്വരം സ്ഥിരീകരിച്ചത്.

🔹മതത്തിന്റെ പേരില്‍ ഷാഫി പറമ്പിലും മമ്മൂട്ടിയും വേട്ടയാടപ്പെടുന്നത് കേരളത്തെ നാണം കെടുത്തുന്നതാണെന്ന് കെ. സുധാകരന്‍. വടകരയില്‍ മത്സരിച്ചതിന്റെ പേരില്‍ ഷാഫിക്കെതിരെ സി പി എം നടത്തുന്ന വര്‍ഗ്ഗീയ പ്രചാരണങ്ങളും, സിനിമയിലെ ഒരു കഥാപാത്രത്തിന്റെ പേരില്‍ മമ്മൂട്ടിക്കെതിരെ സംഘപരിവാര്‍ നടത്തുന്ന വര്‍ഗ്ഗീയ പ്രചാരണങ്ങളും ഒരുപോലെ തള്ളിക്കളയേണ്ടതുണ്ട് എന്നും കെ സുധാകരന്‍ ഫേസ്ബുക്കില്‍ കുറിച്ചു.

🔹സംസ്ഥാനത്ത് ആദ്യമായി ആരംഭിക്കുന്ന ബിരുദ ഓണേഴ്‌സ് പ്രോഗ്രാമുകളുടെ പ്രവേശന നടപടികള്‍ക്ക് തുടക്കംകുറിച്ച് മഹാത്മാ ഗാന്ധി സര്‍വകലാശാല. സര്‍വകലാശാലയ്ക്കു കീഴിലുള്ള വിവിധ കോളജുകളില്‍ ഓണേഴ്‌സ് പ്രോഗ്രാമുകളില്‍ ഏകജാലക പ്രവേശനത്തിന് ഇപ്പോള്‍ ഓണ്‍ലൈന്‍ രജിസ്‌ട്രേഷന്‍ നടത്താം.

🔹വിദ്യാര്‍ഥികളുടെ സ്‌കൂള്‍ പ്രവേശനവുമായി ബന്ധപ്പെട്ട് ഉയര്‍ന്ന പരാതികള്‍ അന്വേഷിച്ചു റിപ്പോര്‍ട്ട് നല്‍കാന്‍ പൊതു വിദ്യാഭ്യാസ വകുപ്പ് പരീക്ഷാ ജോയിന്റ് കമ്മീഷണര്‍ക്ക് മന്ത്രി വി ശിവന്‍കുട്ടിയുടെ നിര്‍ദേശം. കുന്നംകുളം എംജെഡി സ്‌കൂള്‍, തിരുവനന്തപുരം സെന്റ് തോമസ് സെന്‍ട്രല്‍ സ്‌കൂള്‍ എന്നിവയ്ക്കെതിരെയാണ് പരാതിയെന്നും മന്ത്രി അറിയിച്ചു.

🔹കാഞ്ഞങ്ങാട് പത്ത് വയസുകാരിയെ തട്ടിക്കൊണ്ടുപോയി സ്വര്‍ണം കവര്‍ന്ന സംഭവത്തില്‍ കുട്ടി പീഡനത്തിനിരയായെന്ന് മെഡിക്കല്‍ റിപ്പോര്‍ട്ട്. പ്രതിയെ ഇതുവരെ പൊലീസിന് പിടികൂടാനായിട്ടില്ല. കുട്ടി കാഞ്ഞങ്ങാട് ജില്ലാ ആശുപത്രിയില്‍ ചികിത്സയില്‍ കഴിയുകയാണ്. ഇന്നലെ പുലര്‍ച്ചെ മൂന്ന് മണിയോടെ ഉറങ്ങിക്കിടന്ന കുട്ടിയെ തട്ടിക്കൊണ്ടുപോയി കമ്മല്‍ കവര്‍ന്നതിന് ശേഷം ഉപേക്ഷിക്കുകയായിരുന്നു.

🔹സിസ്റ്റര്‍ അഭയ കൊലക്കേസ് പ്രതി, ഫാ. തോമസ് കോട്ടൂരാന്റെ പെന്‍ഷന്‍ പിന്‍വലിച്ച് സര്‍ക്കാര്‍ . ധനകാര്യ വകുപ്പാണ് ഉത്തരവിറക്കിയത്. ബിസിഎം കോളജിലെ സൈക്കോളജി വിഭാഗം അധ്യാപകനായിരുന്ന തോമസ് കോട്ടൂരാനെ സിബിഐ കോടതി ജീവപര്യന്തം തടവിന് ശിക്ഷിച്ചതോടെയാണ് നടപടി.

🔹മുല്ലപ്പള്ളിയില്‍ നിന്നും ഇന്നലെ വീട് വിട്ടുപോയ 14 കാരനെ ചെന്നൈ- ഗുരുവായൂര്‍ എക്‌സ്പ്രസ്സിലെ യാത്രക്കാരന്‍ തിരിച്ചറിഞ്ഞു. സിനിമയില്‍ അഭിനയിക്കാന്‍ പോകുന്നുവെന്ന് കുറിപ്പ് എഴുതിവെച്ചായിരുന്നു കുട്ടി വീടുവിട്ട് പോയത്. കുട്ടിയുടെ ദൃശ്യങ്ങളടക്കം വാര്‍ത്ത വന്നതോടെയാണ് ട്രെയിന്‍ യാത്രക്കാരന്‍ തിരിച്ചറിഞ്ഞത്.

🔹തുലാപ്പള്ളിയില്‍ ശബരിമല ദര്‍ശനം കഴിഞ്ഞു മടങ്ങിയവര്‍ സഞ്ചരിച്ച മിനി ബസ് മറിഞ്ഞ് ഒരു മരണം. നാല് വയസ്സുള്ള ആണ്‍കുട്ടിയാണ് മരിച്ചത്. തമിഴ്‌നാട് തിരുവണ്ണാമല സ്വദേശികള്‍ സഞ്ചരിച്ച വാഹനമാണ് അപകടത്തില്‍പ്പെട്ടത്.

🔹ചികിത്സ കിട്ടിയില്ലെന്നാരോപിച്ച് വയോധികയുടെ മൃതദേഹവുമായി ബന്ധുക്കള്‍ ആലപ്പുഴ മെഡിക്കല്‍ കോളേജ് ആശുപത്രി അത്യാഹിതവിഭാഗത്തിന് മുന്നില്‍ പ്രതിഷേധിച്ചു. ഇന്നലെ രാത്രി പന്ത്രണ്ടരയോടെയാണ് പുന്നപ്ര അഞ്ചില്‍ ഉമൈബ (70) യുടെ മൃതദേഹവുമായി ബന്ധുക്കളും നാട്ടുകാരും അടങ്ങുന്ന നൂറോളം പേര്‍ പ്രതിഷേധിച്ചത്.

🔹മഞ്ചേരി ഗവണ്‍മെന്റ് മെഡിക്കല്‍ കോളേജ് ആശുപത്രി വളപ്പില്‍ നിന്നും ആംബുലന്‍സുകള്‍ ഒഴിപ്പിച്ച പൊലീസ് നടപടിയില്‍ പ്രതിഷേധിച്ച് പരിസരത്തെ സ്വകാര്യ ആംബുലന്‍സ് ഡ്രൈവര്‍മാര്‍ സമരം തുടങ്ങി. സിഐടിയു നേതൃത്വത്തില്‍ ഡ്രൈവര്‍മാര്‍ സമരം തുടങ്ങിയത്. ആംബുലന്‍സ് മാറ്റാന്‍ തയ്യാറാകാതിരുന്ന എട്ടു ഡ്രൈവര്‍മാരെ പൊലീസ് കസ്റ്റഡിയില്‍ എടുത്തു. ആശുപത്രി വികസന സമിതി യോഗത്തിലാണ് ആംബുലന്‍സുകള്‍ മാറ്റാനുള്ള തീരുമാനം ഉണ്ടായത്. സമരം ചെയ്ത നേതാക്കന്‍മാരെ ഉള്‍പ്പെടെ പൊലീസ് കസ്റ്റഡിയിലെടുത്തിട്ടുണ്ട്.

🔹തൃപ്പൂണിത്തുറയില്‍ അച്ഛനെ ഉപേക്ഷിച്ച മകന്‍ എരൂര്‍ സ്വദേശി അജിത്ത് അറസ്റ്റില്‍. സ്റ്റേഷനിലേക്ക് വിളിച്ച് വരുത്തി പൊലീസ് അറസ്റ്റ് ചെയ്യുകയായിരുന്നു. വണ്ടിക്ക് ഓട്ടമുണ്ടായത് കൊണ്ടാണ് വീട്ടിലേക്ക് വരാന്‍ പറ്റാത്തതെന്നാണ് ചോദ്യം ചെയ്യലില്‍ അജിത്ത് നല്‍കിയ മറുപടി. പ്രതിയെ ഇന്ന് കോടതിയില്‍ ഹാജരാക്കും. മകന്‍ ഉപേക്ഷിച്ച അച്ഛന്റെ വാര്‍ത്ത പുറത്ത് വന്നതോടെ സഹോദരനെത്തി ഏറ്റെടുക്കുകയായിരുന്നു.

🔹തൃശൂര്‍ പൂരത്തിന് വിദേശ വനിത വ്‌ലോഗറെ അപമാനിച്ച പാലക്കാട് ആലത്തൂര്‍ സ്വദേശി മധു പിടിയില്‍. തൃശ്ശൂര്‍ ഈസ്റ്റ് പൊലീസ് ആണ് ഇയാളെ പിടികൂടിയത്. തൃശൂര്‍ പൂരത്തില്‍ പങ്കെടുത്ത വിദേശ വനിത തന്റെ ഇന്‍സ്റ്റാഗ്രാം അക്കൗണ്ടിലിട്ട വീഡിയോയിലാണ് തനിക്കുണ്ടായ മോശം അനുഭവത്തെക്കുറിച്ച് വെളിപ്പെടുത്തിയത്. ശ്രീമൂലസ്ഥാനത്ത് പ്രതികരണം തേടുന്നതിനിടെ ഒരാള്‍ കടന്നു പിടിച്ചു എന്നായിരുന്നു വിദേശ വനിതയുടെ ആരോപണം. സംഭവത്തില്‍ കേസെടുത്ത പൊലീസ് പ്രതിയെ പിടികൂടുകയായിരുന്നു.

🔹സച്ചിൻ തെന്‍ഡുല്‍ക്കറുടെ സുരക്ഷാ ഉദ്യോഗസ്ഥന്‍ സ്വയം നിറയൊഴിച്ച് ജീവനൊടുക്കി. മഹാരാഷ്ട്ര സ്റ്റേറ്റ് റിസര്‍വ് പൊലീസ് ഫോഴ്‌സിലെ പ്രകാശ് കപ്‌ഡെ (39) ആണ് ആത്മഹത്യ ചെയ്തത്. ആത്മഹത്യയുടെ കാരണം വ്യക്തമല്ലെന്നും സംഭവത്തില്‍ വിശദമായ അന്വേഷണം നടത്തുമെന്നും പോലീസ് പറഞ്ഞു

🔹നടന്‍ വിനായകന്‍ പാലക്കാട് കല്‍പ്പാത്തി ക്ഷേത്രത്തില്‍ രാത്രി എത്തിയതിനെ ചൊല്ലി വിവാദം. ക്ഷേത്രത്തില്‍ രാത്രി 11 മണിയ്ക്ക് പ്രവേശിക്കണമെന്ന വിനായകന്റെ ആവശ്യം ഭാരവാഹികള്‍ അംഗീകരിച്ചില്ല. അതിനാല്‍ നാട്ടുകാരും വിനായകനും തമ്മില്‍ വാക്കുതര്‍ക്കം ഉണ്ടായി. സംഭവത്തിന്റെ വീഡിയോ സമൂഹമാധ്യമങ്ങളില്‍ പ്രചരിക്കുന്നുണ്ട്. ജാതി വിവേചനം മൂലമാണ് വിനായകനെ ക്ഷേത്രത്തില്‍ കയറ്റാത്തതെന്ന് ഒരു വിഭാഗം ആക്ഷേപമുന്നയിച്ചു. എന്നാല്‍ ഇത്തരം വാര്‍ത്തകള്‍ വ്യാജമെന്ന് ക്ഷേത്രം ഭാരവാഹികള്‍ വ്യക്തമാക്കി.

🔹സംസ്ഥാന ഹജ്ജ് ക്യാമ്പ് മെയ് 20 രാവിലെ 10 ന് കരിപ്പൂര്‍ ഹജ്ജ് ഹൗസില്‍ ആരംഭിക്കും. വൈകീട്ട് 4.30 നാണ് ഉദ്ഘാടന ചടങ്ങ്. 21 ന് പുലര്‍ച്ചെ 12.05 ന് ആദ്യ ഹജ്ജ് വിമാനം കരിപ്പൂരില്‍ നിന്ന് പുറപ്പെടും. ആദ്യ വിമാനം പുലര്‍ച്ചെ 3.50 ന് ജിദ്ദയിലെത്തും. ഹാജിമാരെ സ്വീകരിച്ച് യാത്രയാക്കുന്നതിനായി വിപുലമായ ക്രമീകരണങ്ങളാണ് കരിപ്പൂര്‍ ഹജ്ജ് ക്യാമ്പില്‍ ഒരുക്കുന്നത്

🔹ഒമാനിൽ മരിച്ച നമ്പി രാജേഷിന്‍റെ മൃതദേഹം തിരുവനന്തപുരത്തെത്തിച്ചു. എയർ ഇന്ത്യ മാനേജ്മെന്‍റിന്‍റെ അനാസ്ഥ മൂലം രാജേഷിനെ അവസാനമായി കാണാനാകാത്ത കുടുംബം മൃതദേഹവുമായി ഈഞ്ചക്കൽ എയർ ഇന്ത്യ എക്സ്പ്രസ് ഓഫീസിനു മുന്നിൽ പ്രതിഷേധിക്കുകയാണ്.
എയർ ഇന്ത്യയുടെ ഭാഗത്തുനിന്ന് തീരുമാനം ഉണ്ടാകാതെ പ്രതിഷേധം അവസാനിപ്പിക്കില്ല എന്ന് എയർ ഇന്ത്യ ഓഫീസിൽ നമ്പി രാജേഷിന്റെ ഭാര്യയുടെ പിതാവ് അറിയിച്ചു. എയർ ഇന്ത്യയുമായി ബന്ധമില്ലെന്ന് കമ്പനി പറയുന്നതായിട്ടാണ് അമൃതയുടെ പിതാവ് പറഞ്ഞത്.നമ്പീ രാജേഷിന്റെ മരണം എയർ ഇന്ത്യയുടെ മനപ്പൂർവമുള്ള നരഹര്യയെന്നുംനീതി കിട്ടും വരെ സമരം തുടരുമെന്നും ഭാര്യാ പിതാവ് രവി പറഞ്ഞു.

🔹ഇടുക്കി ഇരട്ടയാറില്‍ പോക്‌സോ കേസ് അതിജീവിത മരിച്ചത് കഴുത്തില്‍ ബെല്‍റ്റ് മുറുകിയതിനെ തുടര്‍ന്നാണെന്ന് പ്രാഥമിക പോസ്റ്റുമോര്‍ട്ടം റിപ്പോര്‍ട്ട്. ആത്മഹത്യയാണെന്നാണ് പൊലീസിന്റെ പ്രാഥമിക നിഗമനം. ഇത് സ്ഥിരീകരിക്കുന്നതിനായി പെണ്‍കുട്ടിയുടെ ബംഗലുരുവിലുള്ള സുഹൃത്തിനെ കസ്റ്റഡിയിലെടുത്ത് ചോദ്യം ചെയ്യും.
വിശദമായ അന്വേഷണത്തില്‍ വീട്ടുകാരല്ലാതെ മറ്റാരും ഉള്ളില്‍ കടന്നതായി കണ്ടെത്താന്‍ കഴിഞ്ഞില്ല. ആണ്‍ സുഹൃത്തുക്കളിലൊരാളോട് മൊബൈലില്‍ വഴക്കുണ്ടാക്കുന്നതായി കണ്ടിരുന്നുവെന്ന് അമ്മ മൊഴി നല്‍കി. തുടര്‍ന്ന് പൊലീസ് മൊബൈല്‍ ഫോണ്‍ വിശദമായി പരിശോധിച്ചു. താന്‍ മരിക്കുമെന്ന് ബംഗലുരുവിലുള്ള സുഹൃത്തിന് സന്ദേശം അയച്ചതിന്റെ തെളിവുകള്‍ മൊബൈലില്‍ നിന്നും പൊലീസിന് ലഭിച്ചു.
ഇയാള്‍ നിരവധി തവണ തിരിച്ചു വിളിച്ചെങ്കിലും പെണ്‍കുട്ടി എടുത്തിരുന്നില്ല. ഇലാസ്റ്റിക് കൊണ്ടുള്ള ബെല്‍റ്റ് കഴുത്തില്‍ മൂന്നു തവണ ചുറ്റിയിരുന്നു. ഇതേത്തുടര്‍ന്ന് കഴുത്ത് മുറുകിയതാണ് മരണകാരണമെന്ന് പോസ്റ്റുമോര്‍ട്ടത്തില്‍ കണ്ടെത്തി. ഇത് സ്വയം ചെയ്തതാകാമെന്നാണ് പോലീസിന്റെയും പ്രാഥമിക നിഗമനം.
മുറിക്കുള്ളില്‍ പിടിവലി നടന്നതിന്റെ ലക്ഷണങ്ങളുമില്ലായിരുന്നു. ആന്തരിക അവയവങ്ങളുടെ സാമ്പിളുകള്‍ വിശദ പരിശോധനക്ക് അയച്ചിട്ടുണ്ട്. പെണ്‍കുട്ടി സന്ദേശം അയച്ച സുഹൃത്തിനോട് ചോദ്യം ചെയ്യലിന് പൊലീസ് ഹാജരാകാന്‍ ആവശ്യപ്പെട്ടിട്ടുണ്ട്.

🔹കണ്ണൂരില്‍ മയക്കുമരുന്ന് വേട്ട. 207 ഗ്രാം മെത്തഫിറ്റമിനുമായി രണ്ട് യുവാക്കള്‍ പിടിയില്‍. കണ്ണൂര്‍ കരിപ്പാല്‍ സ്വദേശി മുഹമ്മദ് മഷൂദ്,കുറ്റിക്കോല്‍ സ്വദേശി മുഹമ്മദ് ആസാദ് എന്നിവരാണ് പിടിയിലായത്. എക്‌സൈസ് പട്രോളിങ്ങിനിടെയാണ് യുവാക്കള്‍ പിടിയിലായത്.

🔹ഫിഫ അ​റ​ബ് കപ്പ് ഖ​ത്ത​റി​ൽ നടത്താൻ തീരുമാനം. 2025, 2029, 2033 എന്നീ വർഷങ്ങളിൽ ആണ് ഖത്തറിൽ ചാ​മ്പ്യ​ൻ​ഷി​പ്പ് നടക്കുന്നത്. തായിലാന്റിലെ ബാ​ങ്കോ​ക്കി​ൽ ചേ​ർ​ന്ന ഫി​ഫ കൗ​ൺ​സി​ൽ യോ​ഗ​ത്തി​ലാ​ണ് അ​ടു​ത്ത മൂ​ന്നു സീ​സ​ണു​ക​ളി​ലെ വേ​ദി​യാ​യി ഖത്തറിനെ ​തെ​ര​ഞ്ഞെ​ടു​ത്ത​ത്.2021ൽ ​ഖ​ത്ത​ർ വേ​ദി​യാ​യ ഫി​ഫ അ​റ​ബ് ക​പ്പ് വി​ജ​യകര​മാ​യി ന​ട​ന്ന സാഹചര്യത്തിലാണ് ടൂ​ർ​ണ​മെ​ന്റ് തു​ട​ര​ണ​മെ​ന്ന അഭിപ്രായം ഖ​ത്ത​ർ ഫു​ട്ബാ​ൾ അ​സോ​സി​യേ​ഷ​ൻ അ​പേ​ക്ഷ അം​ഗീ​ക​രി​ച്ചത്. തെരഞ്ഞെടുക്കപ്പെട്ട വർഷങ്ങളിൽ ഡി​സം​ബ​റി​ലാ​യി​രി​ക്കും ടൂ​ർ​ണ​മെ​ന്റ് ന​ട​ക്കു​ന്ന​ത്.
ര​ണ്ട് ഫി​ഫ ​ടൂ​ർ​ണ​മെ​ന്റു​ക​ള്‍ക്കാണ് വ​രും​ വ​ർ​ഷം മു​ത​ൽ ഖ​ത്ത​ർ വേ​ദി​യാ​കു​ന്ന​ത്. അ​ണ്ട​ർ 17 ലോ​ക​ക​പ്പി​ന് 2025 മു​ത​ൽ 2029 വ​രെ തു​ട​ർ​ച്ച​യാ​യി അ​ഞ്ചു വ​ർ​ഷ​ങ്ങ​ളി​ൽ ഖ​ത്ത​റി​​നെ വേ​ദി​യാ​യി തെ​ര​ഞ്ഞെ​ടു​ത്തി​രു​ന്നു.ഇ​താ​ദ്യ​മാ​യാ​ണ് അ​ണ്ട​ർ 17 ലോ​ക​ക​പ്പി​ന് സ്ഥി​രം വേ​ദിയാകുന്നത് . 48 ടീ​മു​ക​ൾ മാ​റ്റു​ര​ക്കും.

🔹ഐപിഎല്ലില്‍ രാജസ്ഥാന്‍ റോയല്‍സിനെതിരെ പഞ്ചാബ് കിംഗ്‌സിന് അഞ്ച് വിക്കറ്റ് ജയം. ആദ്യം ബാറ്റ് ചെയ്ത രാജസ്ഥാന് 9 വിക്കറ്റ് നഷ്ടത്തില്‍ 145 റണ്‍സ് നേടാനേ സാധിച്ചുള്ളൂ. മറുപടി ബാറ്റിംഗിനിറങ്ങിയ പഞ്ചാബ് തുടക്കത്തില്‍ പതറിയെങ്കിലും 41 പന്തില്‍ 63 റണ്‍സെടുത്ത സാം കറന്റെ മികവില്‍ 18.5 ഓവറില്‍ അഞ്ച് വിക്കറ്റ് നഷ്ടത്തില്‍ ലക്ഷ്യം മറികടന്നു.

🔹കാര്‍ത്തിക് ആര്യന്‍ നായകനായി വരാനിരിക്കുന്ന ചിത്രമാണ് ‘ചന്ദു ചാമ്പ്യന്‍’. കാര്‍ത്തിക് ആര്യന്‍ യുവ നടന്‍മാരില്‍ ബോളിവുഡില്‍ മുന്‍നിരയിലാണ്. ചന്ദു ചാമ്പ്യന്‍ സിനിമയുടെ പുതിയ ഒരു പോസ്റ്റര്‍ പുറത്തുവിട്ടിരിക്കുകയാണ്. സംവിധാനം കബിര്‍ ഖാന്‍ നിര്‍വഹിക്കുന്ന ചിത്രത്തിന്റെ പോസ്റ്ററില്‍ നടന്‍ കാര്‍ത്തിക് ആര്യന്‍ ബോളിവുഡിനെ ഞെട്ടിക്കുന്ന ലുക്കിലാണ്. കാര്‍ത്തിക് ആര്യന്‍ നായകനാകുന്ന പുതിയ ചിത്രം ചന്ദു ചാമ്പ്യന്റെ റിലീസ് ജൂലൈ 14ന് ആണെന്ന് നേരത്തെ പ്രഖ്യാപിച്ചിരുന്നു. സുദീപ് ചാറ്റര്‍ജിയാണ് ചന്ദു ചാമ്പ്യന്‍ സിനിമയുടെ ഛായാഗ്രാഹണം നിര്‍വഹിക്കുന്നത്. ഭുവന്‍ അറോറയ്ക്കും പലക് ലാല്‍വാനിക്കുമൊപ്പം ചിത്രത്തില്‍ അഡോണിസും ഒരു നിര്‍ണായക വേഷത്തിലെത്തുന്നു. കായികതാരത്തിന്റെ അസാധാരണമായ യഥാര്‍ഥ ജീവിത കഥ പ്രമേയമാക്കുന്ന ചന്ദു ചാമ്പ്യന്റെ പോസ്റ്റര്‍ നിമിഷങ്ങള്‍ക്കുള്ളില്‍ ഹിറ്റായി മാറുകയും ചെയ്തിരുന്നു. ഒടുവിലായി സത്യപ്രേം കി കഥ സിനിമയാണ് കാര്‍ത്തിക് ആര്യന്‍ നായകനായി പ്രദര്‍ശനത്തിന് എത്തിയതും മോശമല്ലാത്ത ഒരു വിജയമായി മാറിയതും.

തയ്യാറാക്കിയത്:
കപിൽ ശങ്കർ